Ադրբեջանցի սպա Ռամիլ Սաֆարովի գործի վերաբերյալ Եվրախորհրդարանի բանաձևն է մեկնաբանել Ադրբեջանում ԵՄ ներկայացուցչության ղեկավար, դեսպան Ռոնալդ Կոբիան:

Վերջինս լրագրողներին հայտարարել է, որ Եվրոպական Խորհրդարանը, բացարձակապես անկախ կազմակերպություն լինելով, իրավունք ունի իր կարծիքն արտահայտել այս կամ այն հարցի վերաբերյալ.

«Երբեմն մենք կիսում ենք Եվրախորհրդարանի կարիքը, երբեմն՝ ոչ: Ռամիլ Սաֆարովի գործն արդեն մնացել է անցյալում, մենք պետք է նայենք ապագային»:

Սեպտեմբերի 28-ին կկայանա Հարավային Կոնեկտիկուտի Պետական համալսարանի նոր ռեկտորի` Մարի Ա. Փափազյանի երդմնակալության արարողությունը: Courant-ի փոխանցմամբ, այս հաստատության 11-րդ և ԱՄՆ-ի պատմության մեջ բուհի առաջին հայուհի ռեկտորն է:

Մարի Ա. Փափազյանը գիտությունների թեկնածու է, անգլիական գրականության մասնագետ: Մարի Ա. Փափազյանը եղել է Նյու Յորքի համալսարանի Լեհմանի քոլեջի փոխնախագահը: 16-17-րդ դարերի նշանավոր անգլիացի պոետ ու երգիծաբան Ջոն Դոնին նվիրված գրքի հեղինակ է:

Սույն թվականի սեպտեմբերի 20-23-ին Տոկիոյում կայացող «JATA» միջազգային զբոսաշրջային ցուցահանդեսի ընթացքում ադրբեջանական պատվիրակությունը փորձել է քարոզչական բնույթի հակահայկական ապատեղեկատվությամբ մեծաքանակ նյութեր տարածել մասնակիցների և այցելուների շրջանում:

Հայաստանի ազգային մրցունակության հիմնադրամի պատվիրակությունը պահանջել է ցուցահանդեսի կազմակերպիչներին արգելել ադրբեջանական սադրանքները, ինչին կազմակերպիչ կողմի ղեկավարությունն օպերատիվ արձագանքել է, և ադրբեջանական նյութերը դուրս են հանվել ցուցահանդեսից:

Ադրբեջանի ջանքերը՝ միջազգային զբոսաշրջային հարթակներն օգտագործել հակահայկական քարոզչության համար, հերթական անգամ ձախողվեցին՝ հանդիպելով զգոնության մեր հակազդեցությանը:

Հիշեցնենք, որ օրեր առաջ Փարիզում կայացող «Top Resa» միջազգային զբոսաշրջային ցուցահանդեսում վնասվել էր Հայաստանն ու Արցախը ներկայացնող տաղավարը, մասնավորապես ԼՂՀ պաստառները. ադրբեջանական կողմը բողոքել էր Արցախի մասնակցության փաստի կապակցությամբ: Չնայած այս ամենի՝ տաղավարը վերականգնվեց, իսկ հայկական քարտեզները և գովազդային նյութերը լայնորեն հասանելի էին միջազգային հանրության համար:

Վրաստանի նախագահ Միխեիլ Սահակաշվիլին  2009- 2010թթ. ընկած ժամանակահատվածում, ենթարկվել է պլաստիկ վիրահատությունների: Այս մասին հայտնում է vz.ru-ն՝ մեջբերելով վրացական GNS ստուդիայի ռեպորտաժը, որը ցուցադրվել է ընդդիմադիր «Մաեստրո» հեռուստաալիքով:

Վրաստանի նախագահը ԱՄՆ-ի, Գերմանիայի, Թուրքիայի, Իտալիայի կլինիկաներում պետական բյուջեի հաշվին կոսմետիկ և երիտասարդացնող պրոցեդուրաներ է ընդունել:

Ըստ աղբյուրի՝ 2009-2010թթ. ծախսերի հաշվետվությունների  Մյունխենի կլինիկայում 2009թ Բոտոքսի պատվաստումը Սահակաշվիլու վրա նստել է 9 հազ եվրո, իսկ 2010թ. Նյու Յորքում որոշակի երիտասարդացնող պրոցեդուրայի համար վճարվել է 7 850 դոլար:

Լեռնային Ղարաբաղի պաշտպանական բանակի օպերատիվ տվյալների համաձայն, սեպտեմբերի 16-ից 22-ն ընկած ժամանակահատվածում ադրբեջանական զինված խմբավորումները ղարաբաղա-ադրբեջանական հակամարտ գոտու ողջ երկայնքով հրադադարի պահպանման ռեժիմը խախտել են շուրջ 300 անգամ` տարբեր տրամաչափի հրաձգային զինատեսակներից հայ դիրքապահների ուղղությամբ արձակելով ավելի քան 1300 կրակոց:

Այս մասին տեղեկացնում են ԼՂՀ պաշտպանության նախարարության լրատվական ծառայությունից:

ԼՂՀ ՊԲ առաջապահ զորամասերի կողմից ձեռնարկված համապատասխան գործողությունների արդյունքում հակառակորդի նախահարձակ գործողությունները կասեցվել են:

Հայկական կողմը կորուստներ և վիրավորներ չի ունեցել:

Սեպտեմբերի 21-ի լույս 22-ի գիշերը «Նոր Մոսկվայի» հյուրանոցներից մեկում  25-ամյա ուզբեկը թուրքի  է դանակահարել:

«ՌԻԱ Նովոստի»-ի փոխանցմամբ, ոստիկանություն է ահազանգել մոթելի պահակը:

Դեպքի վայր մեկնած ոստիկանները հայտնաբերել են Թուրքիայի 26-ամյա քաղաքացու դիակը, որը մահացել էր կրծքավանդակի շրջանում ստացված վնասվածքից:

Ուզբեկստանի քաղաքացին ձերբակալված է:

Այսօր` սեպտեմբերի 22-ին Ադրբեջանում  ինքնասպան է եղել Ազգային բանակի զինվոր Մայիս Ղասիմզադեն: Այս մասին հայտնել են Ադրբեջանի  պաշտպանության նախարարության մամուլի ծառայությունից:

«ԱՊԱ»-ի տեղեկացմամբ, միջադեպը գրանցվել է սեպտեմբերի 22-ի առավոտյան Ֆիզուլիի «N» զորամասում: 19-ամյա զինվորին գտել են կախված վիճակում:

Փաստի առթիվ հարուցվել է քրեական գործ, կատարվում է քննություն:

Իրանի հյուսիս-արևելյան հատվածում այսօր` սեպտեմբերի 22-ին, ժամը 7:50-ի սահմաններում 4,2 մագնիտուդ ուժգնությամբ նոր երկրաշարժ է գրանցվել:

ԱՄՆ երկրաբանական ազգային ծառայության փոխանցմամբ, երկրաշարժի էպիկենտրոնը գտնվել է Թավրիզից 96 կմ հեռավորության վրա: Երկրաշարժի հիպոկենտրոնը գտնվել է 10 կմ խորության տակ:

Ստորգետնյա ցնցումները զգացվել են նաև Հայաստանի հարավային շրջաններում, մասնավորապես` Կապան քաղաքում:

Հալեպ քաղաքում ավելի քան 100 աֆղան գրոհայիններ են ոչնչացվել սիրիացի զինվորականների կողմից:

Ինչպես տեղեկացնում է ՍԱՆԱ սիրիական լրատվական գործակալությունը, գերի են ընկել «Ջեբհաթ ան-Նուսրա» ծայրահեղական խմբավորման մի քանի գրոհայիններ, որոնց թվում են Եմենի 1 քաղաքացի, 2 սաուդցի, 2 աֆղան, 1 կատարցի:

Արտասահմանցի ջիհադականների ներկայության մասին գրում են ինչպես տեղական, այնպես էլ արևմտյան լրատվամիջոցները:

Ադրբեջանի Զինված ուժերը լայնածավալ զորավարժություններ է անցկացնում, հայտնում է ԱՊԱ-ն՝ վկայակոչելով երկրի պաշտպանության նախարարության մամուլի ծառայությանը:

Հաղորդագրության մեջ նշված է, որ Ադրբեջանի ԶՈՒ զորավարժություններին մասնակցում են ցամաքային զորքերը, ռազմաօդային և ռազմածովային ուժերը` պաշտպանության նախարար, գեներալ- գնդապետ Սաֆար Աբիևի հրամանատարության ներքո::

Vesti.az-ի փոխանցմամբ,  ակնկալվում է, որ զորավարժությունների ժամանակ կկիրառվի ժամանակակից տեխնիկա ու սպառազինություն:

Վարժանքների անցկացման վայրի մասին չի հաղորդվում: