«Նոր Նորք վարչական շրջանի նախկին թաղապետ, հանգուցյալ Դավիթ Պետրոսյանի արձանը դեռևս կանգնեցված չէ, թեև ավագանու որոշմամբ առաջարկությունը հաստատվել է։ Առաջարկությունը, ըստ քաղաքապետարանի, ներկայացրել էր Նոր Նորքի ներկայիս թաղապետը՝ Արմեն Ուլիխանյանը, սակայն վերջինս էլ դեռևս ամիսներ առաջ մեր թղթակցի հետ զրույցում հերքել էր, թե ինքն է այդ նախաձեռնության հեղինակը։ Ավագանու որոշմամբ նախկին թաղապետի կիսանդրին պետք է տեղադրվեր Նոր Նորքի թաղապետարանի դիմաց, սակայն ինչ-ինչ պատճառներով ձգձգվում է։

Երեկ Դավիթ Պետրոսյանի հորից՝ ՀՀԿ-ական Ռաֆիկ Պետրոսյանից հետաքրքրվեցինք, թե ինչու մինչև հիմա կիսանդրին տեղադրված չէ։ Վերջինս ասաց, որ ոչնչից տեղյակ չէ, և հորդորեց մեր հարցերի պատասխանը ստանալ քաղաքապետարանից։ Քաղաքապետարանից էլ ասացին, որ որոշումն արդեն կա, իսկ մնացածը՝ քանդակի էսքիզները, պատրաստումը և տեղադրումը, տեխնիկական հարցեր են։ Իսկ մենք կարծում էինք, թե հարցի հասարակական հնչեղություն ստանալուց հետո նախաձեռնության հեղինակները թերևս մտափոխվել են՝ գիտակցելով դրա անլրջությունը։

Հիշեցնենք, որ նախկին քաղապետի կիսանդրին կանգնեցնելու համար քաղաքապետարանը «շատ լուրջ» հիմնավորումներ էր գտել։ «…Որոշման համար հիմք է հանդիսանում Նոր Նորք վարչական շրջանի ղեկավարի միջնորդությունը՝ հաշվի առնելով վարչական շրջանի զարգացման, կառուցապատման բնագավառներում Դավիթ Պետրոսյանի ներդրումը։ Մեծ ներդրում է ունեցել կրթության, մշակույթի, սպորտի զարգացման, բարեկարգման, շենքերի գազիֆիկացման, բնակֆոնդի վերանորոգման, խաղահրապարակների կառուցման բնագավառներում»,–հիմնավորել էին քաղաքապետարանից։ Այս սկզբունքով շարժվելու դեպքում քաղաքապետարանը առնվազն պարտավոր է բոլոր վարչական շրջաններում, որոնց ղեկավարները քիչ թե շատ կատարել են իրենց գործառույթները, կանգնեցնել նրանց արձանները։ Հետաքրքիր «մշակութային» պատկեր կունենանք»,–գրում է թերթը։

«Հրապարակ».

Այսօր աստղագետ Էլյա Հովհաննիսյանը «Վարկած» ակումբում լրագրողների հետ հանդիպման ժամանակ ներկայացրեց, թե ի՞նչ է սպասվում մեզանից յուրաքանչյուրին 2013թ.-ին` ըստ ճապոնական հորոսկոպի.

Այսպես` ըստ կենդանակերպի նշանների.

Եզի, կամ ցուլի տարում ծնվածները`  երեխաների հետ կապված խնդիրներով կզբաղվեն:

Վագրերը` իրենց ծնողների հետ կապված շահադիտական հարցերի լուծումների մեջ կընկնեն: Ծնողները կամ կօգնեն կամ կզրկեն:

Ճագարի տարում ծնվածները`  եղբայրների հետ բարդությունների մեջ կգտնվեն:

Վիշապի  տարում ծնվածները ֆինասական հաջողություններ կունենան:

Օձի տարում ծնվածները  կանեն ինչ ուզում են և նրանց սպասում է աներկյուղ կյանք:

Ձիերի թշնամիները կշատանան, որոնք տեսանելի չեն և գործում են տակից, ինչը վերաբերում է նաև քաղաքական դաշտին:

Այծի տարում ծնվածների  համար սիրելու տարի է, կարող են սիրել և սիրվել:

Կապիկի տարում ծնվածները  մեծ հաջողություններ կունենան:

Աքաղաղներին հաջողություններ կտան ճամփորդությունները:

Շան տարում ծնվածների մոտ` տագնապ ու անհանգստություն կառաջանա կյանքի և առողջության  մասով:

Խոզի կամ վարազի տարում ծնվածներն ամուսնական հարցերի հետ կապված լուծումների մեջ կլինեն:

Առնետի տարում ծնվածները պետք է անհանգստանան իրենց առողջական վիճակի համար:

Աստղաբան, մաթեմատիկոս Էլյա Հովհաննիսյանն այսօր, «Վարկած» ակումբում տեղի ունեցած ասուլիսի ժամանակ նշեց, որ 2013 թվականը հենց  իր 13 թվով տագնապ է առաջացնում, սակայն վախենալ պետք չէ. «Քանի որ 13 թվանշանը հրեաների մոտ «մահ» բառի փոխարեն է ներկայացված , դրա համար էլ բոլորը վախենում են. սակայն յուրաքանչյուր  մարդ ունի իր ճակատագիրը, առաջնորդվում է դրանով և վախենալու, անհանգստանալու կարիք չկա»:

Նրա խոսքով, 2012 թվականը ճգնաժամային էր, ֆինանսական դժվարություններ կար բոլոր առումներով: Բայց 2013-ը  շատ ավելի լավ տարի է լինելու, քան 2012-ը:

«Աշխարհի բախտը հիմա վտանգի տակ է, քանի որ չարը շատ մեծացած է, նրա ամեն արարք նկատելի է: 2013-ին պետք է շատ հասարակական շենքեր կառուցվեն, որոնք  օգնեն ժողովրդին շատ ավելի բարձր մակարդակի հասնելու համար: Տարին հենց այդպիսին է. հաջողություն կունենան նրանք, ովքեր կաշախատեն, կանհանգստանան աշխարհի բախտի համար»,-ասաց աստղաբանը:

Նա տեղեկացրեց, թե Հայաստանում, որը համարվում է «Կշեռք», և ոչ մի անհանգստացնող հարց չի առաջանա, ընդհակառակը, ծաղկուն շրջանում է և 2016թ-ն արդեն Հայաստանին հասցնում է գագաթ:

Էլյա Հովհաննիսյանի տեղեկացմամբ, 1982-87թթ բոլոր ծնվածները եկել են օգնելու իրենցից հետո ծնվածներին. նրանք մեծ առաքելություն ունեն: Եթե չօգնեն ֆինանսական լուրջ հարցեր և դժվարություններ կլինեն:

Նոյեմբերի 29-ին, ժամը 17.15-ին ԱԻՆ տեղեկություն է ստացվել, որ Մալիշկա գյուղի մոտ վթար է եղել, կա տուժած:

Ըստ ԱԻՆ կայքի`դեպքի վայր է մեկնել մարզային փրկարարական ջոկատը:

Դեռևս չբացահայտված հանգամանքներում «ԲՄՎ» մակնիշի 20 ՕՍ 784 պ/հ ավտոմեքենան (վարորդ` 1991 թ. ծնված  Ռ. Մովսիսյան) դուրս է եկել ճանապարհի երթևեկելի մասից և բախվել գազատար խողովակի սյանը:

Մինչ փրկարարների ժամանումը` Եղեգնաձորի բժշկական կենտրոն տեղափոխման ճանապարհին Ռ. Մովսիսյանը մահացել է:

Փրկարարներն իրականացրել են ավտոմեքենայի հոսանքազրկման աշխատանքներ:

Ոստիկանության անձնագրային և վիզաների վարչությունն ու տարածքային անձնագրային ծառայություններն աշխատելու են նաև դեկտեմբերի 1-ի և 2-ի ոչ աշխատանքային օրերին:

Հայաստանի Հանրապետության կառավարության 2012 թ. հոկտեմբերի 25-ի «Հարկ վճարողների հաշվետությունները ներկայացնող ֆիզիկական անձանց նույնականացման քարտերի հաշվառման մասին» թիվ 1358-Ն որոշման պահանջների համաձայն` հարկ վճարողների կողմից 2012 թ. սեպտեմբերի 30-ից մինչև 2012 թ. նոյեմեբերի 30-ը ներառյալ նույնականացման քարտի միջոցով էլեկտրոնային ստորագրություն ձեռք բերելու հետ կապված սպասարկման ծախսերը սուբսիդավորման միջոցով ամբողջությամբ փոխհատուցելու է ՀՀ կառավարությունը:

Հիշյալ որոշմամբ սահմանված արտոնությունից օգտվելու նպատակով անհամեմատ աճել է նույնականացման քարտ ստանալու համար դիմող քաղաքացիների թիվը, ինչի պատճառով ՀՀ ոստիկանության անձնագրային և վիզաների վարչությունն աշխատում է ծանրաբեռնված աշխատանքային գրաֆիկով:

2012 թ. հունիսի 1-ից մինչև հոկտեմբերի 25-ը մուտքագրվել է նույնականացման քարտ ստանալու վերաբերյալ 10294 դիմում, իսկ որոշման ընդունումից հետո մինչև 2012 թ. նոյեմբերի 28-ը՝ 25176, այսինքն՝ 1 ամսվա ընթացքում գրեթե 2,5 անգամ ավելի, քան նախորդ 5 ամիսների ընթացքում:

ՀՀ ոստիկանության անձնագրային և վիզաների վարչությունն ու տարածքային անձնագրային ծառայություններն աշխատելու են նաև 2012 թ. դեկտեմբերի 1-ի և 2-ի ոչ աշխատանքային օրերին:

Ի՞նչ է սպասվում մեզ 2013 թվականին. Այս թեմայի մասին վաղը, ժամը 12:00-ին, «Վարկած» ակումբում  կխոսի աստղագետ, մաթեմատիկոս Էլյա Հովհաննիսյանը:

Հանրության արձագանքն էր պատճառը` լրատվամիջոցների տարածած լուրերի վերաբերյալ, թե ՝ «Խոսրովի անտառ» ՊՈԱԿ-ի տնօրենի հավակնորդը մոլի որսորդ է ու ԱԺ նախագահի հովանավորյալն ու նրան որսամիս մատակարարողը, թե՞ Վայրի բնության համաշխարհային հիմնադրամն ու Կովկասի բնության հիմնադրամի ներկայացուցիչների դիրքորոշումն ու ֆինանսական հոսքերի դադարեցման մասին հայտարարությունը, սակայն փաստն այն է, որ  այսօր ՀՀ բնապահպանության նախարարությունը հաղորդագրություն է տարածել, որով տեղեկացնում է, թե Գաբրիել Պողոսյանը չի նշանակվել «Խոսրովի անտառ» ՊՈԱԿ-ի տնօրեն:

Հիշեցնենք, որ օրեր առաջ Վայրի բնության համաշխարհային հիմնադրամի հայաստանյան մասնաճյուղի տնօրեն Կարեն Մանվելյանը հայտարարել էր, որ հիմնադրամը դադարեցնում է Խոսրովի արգելոցի ֆինանսավորումը` որսագող տնօրենի նշանակման պատճառով. «Խոսրովի արգելոցի տնօրենի թափուր պաշտոնի համար հայտարարված մրցույթում հաղթած Գաբրիել Պողոսյանը չի համապատասխանում այդ պաշտոնին ստանձնելու համար անհրաժեշտ որևէ պայմանի: Նա պետք է ունենա բարձրագույն կրթություն, որը չունի, պետք է ունենա համապատասխան տեսլական, հրատարակված մասնագիտական հոդվածներ և այլն: Մենք դեմ ենք Գաբրիել Պողոսյանի պաշտոնավարմանը` որպես
Խոսրովի արգելոցի տնօրեն և դադարեցնում ենք ֆինանսավորումը, մինչև որ նա ազատվի աշխատանքից և տնօրենի թափուր պաշտոնի համար նորից մրցույթ հայտարարվի»:

Իսկ Հայաստանում Կովկասի բնության հիմնադրամի ազգային համակարգող Արման Վերմիշյանն էլ նշել էր, որ Խոսրովի արգելոցի ֆինանսավորումն անմիջապես կվերսկսվի համապատասխան տնօրենի նշանակումից հետո. «Ես անձամբ եղել եմ այն հանձնաժողովի անդամ, որը 85 բալ նշանակեց այդ թեկնածուին, բայց, ըստ իս, նա բացարձակապես չի համապատասխանում պահանջներին: Մենք չէինք կարող աչք փակել նման իրողության վրա»:

Սրան է հաջորդել Բնապահապանության նախարարության հայտարարությունը.

«Նոյեմբերի 28-ին լրացավ «Խոսրովի անտառ» պետական արգելոցի ՊՈԱԿ-ի տնօրենի  նշանակման ժամկետը:  ՀՀ բնապահպանության նախարարությունը տեղեկացնում է, որ «Խոսրովի անտառ» պետական արգելոցի ՊՈԱԿ-ի  տնօրենի պաշտոնի  համար ս/թ նոյեմբերի 23-ին կայացված  մրցույթի արդյունքում հաղթող ճանաչված Գաբրիել Պողոսյանը չի նշանակվել այդ պաշտոնում:

ՀՀ բնապահպանության նախարար Արամ Հարությունյանը նշանակման ժամկետի լրանալու օրը` նոյեմբերի 28-ին,  անցկացրել է աշխատանքային  քննարկում, որին հրավիրվել է նաև Գաբրիել Պողոսյանը: Նախարարը ևս մեկ անգամ կարևորելով արգելոցի կառավարման հետ կապված խնդիրները՝ առկա դժվարությունները, ինչպես նաև թեկնածուի հետ կապված հանրային ոչ միանշանակ արձագանքն ու հասարակական կազմակերպությունների դիրքորոշումը, թվարկման կարգով նշել է արգելոցի կառավարման, արգելոցում իրականացվող աշխատանքների որակական բարելավման խնդիրները և տնօրենի թեկնածուից պահանջել այս ամենի նկատմամբ գործուն պատասխանատվության ստանձնում:

Նախարարը ևս մեկ անգամ ընդգծել է, որ այսօր, առավել ևս քան երբևիցե, արգելոցը լինելու է ինչպես նախարարության, այնպես նաև հասարակական կազմակերպությունների ուշադրության կիզակետում:

Գաբրիել Պողոսյանը՝ գիտակցելով առկա դժվարությունները և ունենալով նաև լրացուցիչ այլ ծանրաբեռնվածություն, խնդրել է ընթացք չտալ տնօրեն նշանակվելու խնդրանքով ՀՀ բնապահպանության նախարարություն ներկայացրած իր դիմումին: Այդ հիմքով իսկ կասեցվել է տնօրենի նշանակման գործընթացը»:

Նոյեմբերի 28-ին, ժամը 20.00-ի սահմաններում, Երևան-Գյումրի ճանապարհի 33-րդ կմ-ին իրար են բախվել «Համմեր» և «ՎԱԶ-2121»  մակնիշի ավտոմեքենաներ:

Պատահարի հետևանքով «ՎԱԶ-2121»-ի ուղևորը` 2005 թ. ծնված  Արմեն  Խաչատրյանը,  տեղում մահացել է, իսկ վարորդն   ու  երեք  ուղևորները և «Համմեր»-ի ուղևորը  մարմնական վնասվածքներով տեղափոխվել են հիվանդանոց:

Կատարվում է քննություն:

Երեւանի Խաչատուր Աբովյանի անվան հայկական պետական մանկավարժական համալսարանի ուսանողների դասերն արդեն 10 օր է` ուղեկցվում են աղմուկով: Այդ մասին գրում է «Ժողովուրդ» թերթը։

«Համալսարանի հարեւանությամբ «Լավանդա» դեղատունը շինարարություն է իրականացնում, եւ բանվորները վնասել են բուհի ջեռուցման խողովակը: Ու եթե այն չվերականգնեն, 6000 ուսանողների դասերը ստիպված կդադարեցվեն: «Լավանդա»-ի սեփականատեր Արայիկ Հայրապետյանը «Ժոդովուրդ»-ի հետ զրույցում ասաց, թե բուհի ռեկտորը թաքնվել է ուսանողների հետեւում. «Կոնկրետ ռեկտորի կաբինետը իմ կաբինետի վերեւն է, եւ երբ ինքը դռռացնում, դռռացնում, բռռացնում էր, ես ոչ մի տեսակի բան չասացի իրեն` հասկանալով, որ մարդը նոր է եկել եւ վերանորոգում է»:

Իսկ մանկավարժականի ռեկտոր Ոուբեն Միրզախանյանը մեզ փոխանցեց, թե գործարարին առաջարկվել է շինաշխատանքներն անել հանգստյան օրերին կամ երեկոյան 6-ից հետո. «Հիմա նա պետք վերականգնի համալսարանի ջեռուցումը: Ես թույլ չեմ տա, որ մեր ուսանողները եւ դասախոսները մրսեն»»,- մեջբերում է  «Ժողովուրդը»:

Այսօր՝ նոյեմբերի 28-ին, ժամը 16:00-ի սահմաններում, Ոստիկանության Մարտունու բաժին ահազանգ է ստացվել, որ Վարդենիկ գյուղի տներից մեկում ինքնասպանություն է տեղի ունեցել:

Ինչպես հայտնում է ֆոտոլրագրող Գագիկ Շամշյանը, նշված գյուղ են մեկնել Ոստիկանության Մարտունու բաժնի օպերատիվ խումբը՝ Մարտունու ոստիկանապետ Վահան Մարգարյանի գլխավորությամբ:

Պարզվել է, որ նշված գյուղի տներից մեկի խորդանոցի տանիքից՝ կախվելու միջոցով ինքնասպան է եղել 40-ամյա Ն. Գ.-ն: Ֆոտոլրագրողը հայտնում է, որ վերջինս ամուսնացած էր, ուներ երկու անչափահաս երեխա, իսկ ինքնասպանություն գործելուց առաջ տան անդամներին հայտնել է, որ գնում է գնումներ կատարելու և երբ ուշացել է, տանեցիներն անհանգստացել են ու սկսել են փնտրել: Նրան հայտնաբերել են խորդանոցում:

Ըստ տեղեկությունների, տղամարդն ունեցել է հոգեկան շեղումներ: Ֆոտոլրագրողը հայտնում է, որ 1,5 ամիս առաջ ինքնասպան է եղել նաև վերջինիս հայրը:

Փաստի առթիվ Ոստիկանության քննչական գլխավոր վարչության Գեղարքունիքի մարզի քննչական բաժնի Մարտունիի քննչական բաժանմունքում նյութեր են նախապատրասվում:

shamshyan.com