Սեպտեմբերի 14-ին, ժամը 10.20-ին, Փշատավան գյուղի մի բնակչուհի ոստիկանության Արմավիրի բաժնում հաղորդում է տվել, որ գիշերը տան մուտքի դուռը բացելով՝ ննջասենյակի զգեստապահարանից գողացել են 180.000 ՌԴ ռուբլի, 3.000.000 դրամ և 4.400 ԱՄՆ դոլար` պատճառելով 8.000.000 դրամի նյութական վնաս:

Ոստիկանության լրատվական ծառայությունից հայընում են, որ ձեռնարկված միջոցառումների շնորհիվ պարզվել է, որ գողությունը կատարել է համագյուղացին՝ 1975 թ. ծնված Գևորգ Մարգարյանը:

Գողոնն առգրավված է:

Գ. Մարգարյանը ձերբակալված է:

Կատարվում է նախաքննություն:

Սննդամթերքի անվտանգության պետական ծառայության (ՍԱՊԾ) երեք աշխատակիցներ, որոնց դեմ կաշառակերության փաստով գործ էր հարուցվել, այլևս չեն աշխատում ծառայությունում: Այս մասին «Ժողովուրդ»-ը տեղեկացել է ՍԱՊԾ մամլո խոսնակ Բաբկեն Պիպոյանից. «Նրանք արդեն ազատված են իրենց աշխատանքային պարտականություններից»: Թերթը հիշեցնում է, որ ՀՀ ոստիկանության կազմակերպված հանցավորության դեմ պայքարի գլխավոր վարչությունը. (6-րդ վարչություն) կաշառք վերցնելու մեղադրանք էր առաջադրել ՀՀ գյուղատնտեսության նախարարության ՍԱՊԾ մի քանի աշխատակիցների: «6»-ը պարզել էր, որ ՍԱՊԾ աշխատակիցները Երևանի հացի և խմորեղենի մի շարք արտադրամասերում ստուգումներ չանցկացնելու համար 2009-2012թթ. ընթացքում դրանց տնօրենների հետ պայմանավորվածություն են ձեռք բերել և տարբեր ժամանակներում տարբեր չափերի կաշառք ստացել:

Հ.Գ. Հետաքրքիր է այն հանգամանքը, թե ինչու Սննդամթերքի անվտանգության պետական ծառայությունը չի նշում ձերբակալված աշխատակիցների անունները:

Սեպտեմբերի 6-ին Միացյալ Նահանգների Նյու Յորքի հարավային շրջանի Դատական ակտերի կատարման ծառայությունը կատարման է տրամադրել Կատարողական թերթ՝ Վարդան Այվազյանի հանդեպ կատարման համար հոգուտ «Գլոբալ Գոլդ Մայնինգ» ՍՊԸ-ի («ԳԳՄ»)։ Կատարողական թերթը տրամադրվել է դատավոր Զեյ Փոլ Օտկենի (J. Paul Oetken) որոշման հիման և այդ որոշումը (թիվ. 12,1260), առանց բողոքարկման, վերջանական ուժի մեջ մտնելուց հետո։ Կատարման թերթի պայմաններով ԳԳՄ-ի օգտին կայացրած որոշմամբ պետք է գանձվի երեսունյոթ միլիոն հինգ հարյուր երեսունյոթ հազար ինը հարյուր յոթանասունութ հազար ԱՄՆ դոլար և երկու ցենտ ($37,537,978.02):

«Հետքը» հայտնում է, որ ըստ վճռում եղած նյութերի՝ «2006 թ. «Գլոբալ Գոլդ Մայնինգ» ընկերության դուստր ընկերություններից մեկը, որը Հանքավանի հանքավայրի լիցենզառուն էր, ենթարկվել էր կոռումպացված և ոչ պատշաճ պահանջների Հայաստանի բնապահպանության նախկին նախարար Վարդան Այվազյանի կողմից։ Ընկերությունը տեղեկացրել էր այդ իրավիճակի մասին Հայաստանի և Միացյալ Նահանգների համապատասխան մարմիններին: Արդունքում ընկերությունը Այվազյանի պատճառով կորցրել էր Հանքավանի հանքավայրի նկատմամբ հսկողությունը։

Ընկերությունը ներգրավել էր միջազգային և տեղի իրավաբանների՝ դուստր ընկերության դեմ ուղղված ապօրինի և կոռումպացված գործընթացների հիման վրա պատասխանատվության ենթարկելու համար։ 2006 թ. նոյեմբերի 7-ին ընկերությունը սահմանել է 30-օրյա բարի կամքի ժամկետ՝ բանակցությունների համար (որը նախապայման էր 2003 թ. Բաժնեմասի գնման պայմանագրի համաձայն միջազգային արբիտրաժին դիմելու համար): Այն պետք է տեղի ունենար երեք հայտնի վաճառողների/բաժնետերերի, նախկինում ծպտյալ բաժնետեր և մյուս բաժնետերերին ուղորդող Այվազյանի հետ։

Միջազգային առևտրի պալատի («ՄԱՊ») կանոնների համաձայն՝ ընկերությունը 2006թ-ի դեկտեմբերի 29-ին դիմել է Փարիզում տեղակայված արբիտրաժ։ 2008 թ. հունիսի 25-ին Նյու Յորքի հարավային շրջանի դաշնային դատարանը կայացրել է որոշում՝ Այվազյանից պահանջելով որպես պատասխանող ներկայանալ ՄԱՊ-ի արբիտրաժ։

2008 թ. սեպտեմբերի 5-ին ՄԱՊ-ի Միջազգային արբիտրաժային դատարանը կայացրել է որոշում, որի համաձայն՝ Այվազյանը պետք է համարվի որպես կողմ Նյու Յորքի հարավային շրջանի դաշնային դատարանի՝ 2008 թ. հունիսի 25-ին կայացրած որոշման համաձայն։ Այնուհետև՝ 2011 թ. դեկտեմբերին, ՄԱՊ-ի Տրիբունալը որոշել է գործընթացը շարունակել միայն հայտնի երեք բաժնետերերի մասով:

2012 թ.մարտին ԳԳՄ-ն դիմել է դաշնային դատարան՝ պահանջելով որոշում կայացնել Այվազյանի նկատմամբ նույն Դատարանի կողմից նախկինում կայացրած որոշման հիման վրա և/կամ համապատասխանեցնել ՄԱՊ-ի Տրիբունալը նախադեպերին։

Այվազյանի գործողությունների արդյունքում կրած վնասների ապացույցների հիման վրա ԳԳՄ-ի օգտին կայացված $37,537,978.02 ԱՄՆ դոլարի դաշնային դատարանի վերջնական որոշումը բաղկացած է $27,152,244.50 ԱՄՆ դոլար վնասի հատուցման գումարից, գումարած $10,385,734.52 ԱՄՆ դոլար տույժերը՝ հաշվարկված 9%-ով՝ սկսած 2008 թվականից։

Ընկերությունը ծանուցել է ՄԱՊ-ին առ այն, որ մնացած երեք բաժնետերերի նկատմամբ ընթացող արբիտրաժը պետք է դադարեցվի վիճարկելի լինելու հիմքով՝ հաշվի առնելով Այվազյանի հանդեպ կայացրած որոշումը։

Ի՞նչ իրավական հետևանքներ կարող են ունենալ Վարդան Այվազայնի նկատմամբ Նյու Յորքի դաշնային դատարանի կայացրած վճիռը: Ամենայն հավանականությամբ, ոչ մի հետևանք էլ չի ունենա, քանի որ Հայաստանի և Միացյալ Նահանգների միջև այդ ոլորտում համաձայնագիր առայսօր չի ստորագրվել: Միակ հետևանքն այն  լինելու, որ Վարդան Այվազյանը չի կարող մուտք գործել Միացյալ Նահանգներ:

Ընկերության իրավաբանը «Հետքին» տեղեկացրել է, որ վճիռը և կատարողական թերթը ուղարկվել է Վարդան Այվազյանի երկու հասցեներով՝ Երևան և Չարենցավան:

«Հայկական ժամանակն» անդրադառնում է երեկ Ավան և Նոր Նորք վարչական շրջանների ընդհանուր իրավասության դատարանում մեկնարկած «Հարսնաքարի» գործով դատավարությանը` մասնավորապես նշելով. «Այն անցավ լարված մթնոլորտում և մեծ թվով ոստիկանների աչալուրջ ներկայությամբ:
Դահլիճում ներկա էին երկու տասնյակից ավելի ոստիկաններ, որոնց մի մասը կանգնած էր ամբաստանյալների կողքին, մյուս մասը` ամբաստանյալների և դահլիճում հավաքված քաղաքացիների միջև: Եվս մեկ տասնյակ քաղաքացիական հագուստով ոստիկաններ նստել էին դահլիճի նստարանների աոաջին շարքում: Ի դեպ, ամբաստանյալները նկատելի խնամված տեսք ունեին, բոլորովին նման չէին այնպիսի անձանց, որոնք երկու ամիս կալանավայրում էին անցկացրել: Դահլիճում հավաքվածները նույնիսկ դառնորեն կատակում էին. «Նեմեցը բերդում իրա տղերքին լավ էլ նայում ա»: Նիստին ներկա քաղաքացիները ամոթանք էին տալիս ամբաստանյալների պաշտպաններին, անվանելով նրանց մարդասպանների փաստաբաններ, նրանք էլ կոչ էին անում պահպանել անմեղության կանխավարկածը` նշելով, որ իրենց պաշտպանյալների մեղքը դեռ ապացուցված չէ»:
Հայկական ժամանակ

Այսօր Վահե Ավետյանի դատական առաջին նիստը Ավան և Նոր-Նորք վարչական շրջանների ընդհանուր իրավասության դատարանում` դատավոր Դավիթ Հարությունյանի նախագահությամբ, հարթ չի ընթացել:

Ամբաստանյալի աթոռին էին վեց անձինք` ՀՖՖ նախագահ Ռուբեն Հայրապետյանի թիկնապահներ և նրան պատկանող «Հարսնաքար» ռեստորանային համալիրի աշխատակիցներ Արման Խաչատրյանը, Նորայր Հայրապետյանը, Գարիկ Մարգարյանը, Արման Բաղդասարյանը, Դավիթ Ադամյանն ու Արթուր Բաբլոյանը:

Դատարանի մոտ էին «Վահե Ավետյան» շարժման ակտիվիստները, որոնք բողոքի ակցիա են իրականացրել:

Դատական առաջին նիստում ներկայացրել են դատավարության կողմերին` ամբաստանյալներին, նրանց պաշտպաններին, մեղադրող կողմերին: Առաջին նիստին չի ներկայացել տուժողի իրավահաջորդ Վահե Ավետյանի հայրը` Գառնիկ Ավետյանը:

Հարսնաքարի» գործով դատական նիստերը կընթանան ամեն չորեքշաբթի. դատավորը տուժողների շահերի ներկայացուցիչներին խնդրեց հոկտեմբեր ամսվա չորեքշաբթի օրերին այլ դատական նիստեր չպլանավորել։

Հայաստանի Մարդու իրավունքների պաշտպան Կարեն Անդրեասյանի տեղակալ Աշոտ Վահանյանը դուրս է գալիս համակարգից և իր աշխատանքային գործունեությունը պատրաստվում է շարունակել մասնավոր ընկերությունում: Այսօր ՄԻՊ-ի հրամանով սեփական դիմումի համաձայն աշխատանքից ազատվել է Մարդու իրավունքների պաշտպանի առաջին տեղեկալ, աշխատակազմի ղեկավար Աշոտ Վահանյանը:

Կարեն Անդրեասյանը խոր ափսոսանք է հայտնել Աշոտ Վահանյանի հեռանալու կապակցությամբ և բարձր է գնահատել գործակցության ողջ ընթացքում նրա աշխատանքն ու ներդրումը՝ մարդու իրավունքների պաշտպանության առաքելությունն իրականացնելիս, այս մասին հայտնում են Պաշտպանի աշխատակազմից:

Ի դեպ Աշոտ Վահանյանը տեղակալ էր նշանակվել այս տարվա փետրվարին, միաժամանակ շարունակելով պաշտոնավարել աշխատակազմի ղեկավարի պոստում:

Աշոտ Վահանյանը 1996-2001թթ. աշխատել է ՀՀ պաշտպանության նախարարությունում իրավական բաժնի պետ, այնուհետև որպես ՀՀ կենտրոնական բանկի նախագահի իրավական գծով խորհրդական:

2008-ից Աշոտ Վահանյանն աշխատել է ՀՀ կառավարությունում պետաիրավական վարչության պետ:

ՀՀ նախկին նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանն անդրադարձել է ՀՖՖ նախագահ Ռուբեն Հայրապետյանի` «Նուվել դ’Արմենի» ամսագրին տված հարցազրույցին:

Վիկտոր Սողոմոնյանի հայտարարության մեջ ասվում է.

«Առաջին անգամ եմ մեկ հարցազրույցում հանդիպում անհեթեթությունների այսպիսի բազմության: Այնքան, որ արձագանքելն իսկ անհարմար է: Թվում էր, թե անցած 3-4 օրերի ընթացքում Հայրապետյանը պետք է որ հասկանար դա (կամ էլ’ իրեն պետք է հասկացնեին) եւ հանդես գար համապատասխան բացատրություններով:
Ցավոք, դա տեղի չունեցավ:

Արդյունքում Հայրապետյանին այսօր չեն բշտում թերեւս միայն կուսակիցներն ու ալարկոտները: «Լռությունը’ ոսկի է» ասացվածքը կարծես հենց Հայրապետյանի համար էր մտածված: Շուրջ տասը տարի Ազգային Ժողովի ամբիոնից մի ելույթ չի ունեցել, մեկ էլ հանկարծ «մտքերի» այսպիսի ջրվեժ, այն էլ’ քաղաքագիտական-կոնսպիրատիվ շեղումով:

Հ.Գ.  Ի դեպ’ շների մասին: Ռոբերտ Քոչարյանն ունի ընդամենը մեկ շուն’ «գոլդեն ռետրիվեր» ցեղատեսակի, Սիմբա անունով: Այդ շան բնավորության գլխավոր առանձնահատկությունն էլ այն է, որ երբեք դատարկ տեղը չի հաչում»:

Շաբաթ օրը ժամը 22:30-ի սահմաններում 01 084 պետհամարանիշով «Օպել-Վեկտրա» մեքենայի վարորդը վազանց է կատարել Էջմիածնի կենտրոնական փողոցով սլացող Էջմիածին քաղաքի կոմունալ բաժնի պետ Նորիկ Միրզախանյանի` «Կառտոլ Նորոյի» մեքենային: Վերջինս կանգնեցրել է վազանց կատարած մեքենային, վարորդին քարշ տալով հանել է մեքենայից և սկսել է հայհոյել ու ծեծել

Դեպքը կատարվել է գեներալ Մանվելին պատկանող սրճարանի մոտ և գեներալի թիկնազորայիններն էլ, ամենայն հավանականությամբ, միացել են  ծեծկռտուքին և իհարկե, աջակցել են Կարտոլ Նորոյին (Նորիկ Միրզախանյանը գեներալ Մանվել Գրիգորյանի մտերիմներից է: Ասում են, գեներալն ամեն կերպ պաշտպանում է Նորիկին):

Նրանց են միացել նաև  «045»-ով մեքենաներ, և մոտ 10 րոպե ծեծել են այդ երիտասարդին: Վերջինս ինքնապաշտպանվել է` որքան որ հնարավոր է եղել:

Ոստիկանությունը հաստատեց տեղեկությունը և ArmVersion-ին հայտնեց, որ Վաղարշապատի քննչական բաժանմունքում դեպքի առթիվ նյութեր են նախապատրաստվում:

Նշենք, որ վերջերս  Նորիկ Միրզախանյանի ավտոմեքենայից իրավապահները թմրանյութ էին հայտնաբերել և, ըստ շրջանառվող լուրերի,  գեներալ Մանվելը միջամտել էր և Կարտոլ Նորոն այդ պատմությունից չոր էր դուրս եկել, տեսնենք այս անգամ Կարտոլ Նորային բախտը կժպտա, թե ոչ:

Հայաստանի գլխավոր դատախազի տեղակալի հանձնարարությամբ ՀՀ ոստիկանության քննչական գլխավոր վարչության հատկապես կարևոր գործերով քննության վարչությունում հարուցվել է նոր քրեական գործ՝ Հարթաշեն համայնքի ղեկավար Ա.Ղուկասյանի կողմից անչափահաս Ա. Մ.-ին իր հետ սեռական հարաբերություն ունենալուն հարկադրելու դեպքի առթիվ՝ ՀՀ քրեական օրենսգրքի 140-րդ հոդվածի հատկանիշներով:

Գլխավոր դատախազության մամուլի ծառայությունից հայտնում են, որ, մասնավորապես` 2012թ. սեպտեմբերի 4-ին «Հետք» էլեկտրոնային թերթում հրապարակվել էր հոդված` «Բացահայտվել է Հարթաշենի գյուղապետի անառակաբարո գործողությունների մեկ այլ զոհ» վերնագրով: Ըստ  հոդվածագրի` նշված համայնքի ղեկավար Ա. Ղուկասյանը նույն համայնքի անչափահաս բնակչուհու` Ա. Մ.-ի  հետ, վերջինիս կամքին հակառակ, շանտաժի ենթարկելով, սեռական հարաբերություն է ունեցել, որի արդյունքում ծնված նորածնին Ա. Ղուկասյանի պահանջով Ա. Մ.-ն սպանել է:

ՀՀ գլխավոր դատախազի տեղակալի գրությամբ՝ սեպտեմբերի 10-ին տվյալ հրապարակումն ուղարկվել է ոստիկանություն՝ քրեական գործ հարուցելու և բազմակողմանի ու օբյեկտիվ քննություն իրականացնելու հանձնարարությամբ:

Բացի այդ,  Ա. Ղուկասյանի կողմից նույն համայնքի մեկ այլ անչափահասի` Ա. Պ.-ին բռնաբարելու և նրա նկատմամբ անառակաբարո գործողություններ կատարելու վերաբերյալ Սյունիքի մարզի ընդհանուր իրավասության առաջին ատյանի դատարանում քննվող քրեական գործով ներգրավվել է նոր մեղադրող: ՀՀ գլխավոր դատախազի հանձնարարությամբ մեղադրանքի պաշտպանությանը դատարանում կմասնակցի նաև Վայոց Ձորի մարզի դատախազ Էդուարդ Հակոբյանը:

Միաժամանակ դատարանից պահանջվել են տվյալ քրեական գործով դատաքննության նյութերի պատճենները, իսկ ոստիկանության Սյունիքի մարզի բաժնից` Ա. Մ.-ի նորածին երեխայի մահվան դեպքի առթիվ հարուցված քրեական գործի նյութերը՝  ՀՀ ոստիկանության քննչական գլխավոր վարչության ՀԿԳ քննության վարչությունում հարուցված նոր քրեական գործով համատեղ ընթացք տալու համար:

Բացի այդ՝ հանձնարարվել է գործով նոր ներգրավված դատախազին քրեական գործով հաջորդ դատական նիստին հանդես գալ դատաքննությունը, ՀՀ քրեական դատավարության օրենսգրքի 309 պրիմ հոդվածով սահմանված կարգով,  երկու ամսով հետաձգելու մասին միջնորդությամբ:

Վերահսկիչ պալատի նախագահ Իշխան Զաքարյանն այսօր ԱԺ-ում ներկայացրել է վերահսկիչ պալատի 2011 թվականի հաշվետվությունը:

Զաքարյանը նշել է, որ բյուջետային միջոցներն անարդյունավետ են օգտագործվում: Գնումները կատարվում են ոչ թափանցիկ, ոչ հանրային և խտրական հիմքերով:

Միայն գույքահարկի գծով ընտրանքային կարգով ստուգված համայնքներում հաշվետու ժամանակաշրջանում չի վճարվել 330 միլիոն 676.7 հազար դրամ:

Խախտումներ կան նաև հանքարդյունաբերության ոլորտում` 20 ընդերքօգտագործողների կողմից միայն 2011 թվականին պետական բյուջե չի վճարվել մոտ 79 մլն դրամ:

Վերահսկիչ պալատը խախտումներ է գտել նաև առողջապահության և սոցիալական ապահովման ոլորտներում:

Ըստ ՎՊ հաշվետվության՝ անտառտնկումների համար կատարված ծախսերի մոտ 40%-ն անարդյունավետ է եղել, ընդ որում՝ այստեղ հաշվի են առել միայն այն ծախսերը, երբ տնկված անտառները 100 %-ով «չորացել են»: