Այսօր վաղ առավոտյան, Արցախի ազատամարտիկների միության (ԱԱՄ) նախաձեռնությամբ Ստեփանակերտից Հայաստանի Հանրապետության հյուսիս-արևելյան՝ Տավուշի սահմանագոտի է մեկնել հարյուր ազատամարտիկ՝ ԼՂՀ վարչապետ Արայիկ Հարությունյանի և միության նախագահ Սամվել Կարապետյանի գլխավորությամբ:

«Արցախպրես»-ի թղթակիցն այդ կապակցությամբ մեկնելուց առաջ զրուցել է ազատամարտիկների հետ՝ նրանց տրամադրվածության և նպատակների մասին, որը ներկայացնում ենք ստորև.

Սամվել Աղաջանյան, Արցախի ազատամարտիկների միության Ասկերանի տարածքային միավորման նախագահ

— Մենք պատրաստ ենք «Մեկ ազգ, մեկ հայրենիք» կարգախոսի ներքո ծառայելու մեր հայրենիքի բոլոր հատվածներում:Մեկնում ենք մեծ ոգևորությամբ ու բարձր տրամադրությամբ: Մեր նպատակն է մեկ անգամ ևս թշնամուն ջախջախիչ հարված հասցնել և հասկացնել, որ այլևս հրաժարվի նման ոտնձգություններից: Ավելին՝ Արցախի ազատամարտիկները միշտ պատրաստ են մեկնել նաև Արևմտյան Հայաստան՝ ազատագրելու մեր հայրենիքի մյուս հատվածները ևս: Ասկերանի տարածքային միավորման անդամներից շատերն են ցանկություն հայտնել սահմանագիծ մեկնելու, սակայն տեղերի սահմանափակ լինելու պատճառով այս անգամ ավելի քիչ ազատամարտիկներ են ընդգրկվել Ասկերանից:

Էդիկ Խաչատրյան, Արցախի ազատամարտիկների միության աշխատակազմի ղեկավար

— Մեկնում ենք մեծ ոգևորությամբ: Յուրաքանչյուրիս պարտքն է պաշտպանել հայրենիքի սահմաններն ու ապահովել մեր ժողովրդի անվտանգությունը: Մենք ունենք մեկ ընդհանուր հայրենիք ու սահման և պատրաստ ենք ցանկացած պահի դիմագրավելու թշնամու բոլոր ոտնձգություններն ու դաս տալու նրան: Սահմանագիծ մեկնելու և մեր զինվորների կողքին կանգնելու մեր հերթական առաքելության նպատակը մեկ անգամ ևս ցույց տալն է, որ հայ ազգը պատրաստ է ցանկացած պահի միասնական գործելու, ինչը մեր հաղթանակի գրավականն է:

Հարութ Մնացականյան, ԱԱՄ «Հայրենյաց պաշտպան» երիտասարդական հասարակական կազմակերպության նախագահ

— Մենք տրամադրված ենք մարտական, և երիտասարդական խմբում կամավոր ընդգրկված 7 տղաները կազմ ու պատրաստ են փորձառու ազատամարտիկների կողքին իրականացնելու ցանկացած մարտական առաջադրանք: Նաև ոգևորված ենք, քանի որ կրկին մեր հայրենիքի սահմանին ենք կանգնելու: Այս այցելությունը սահմանագիծ խորհրդանշական բնույթ է կրում, քանզի սահմանին կանգնած մեր զինվորներն անթերի ու վստահ են իրականացնում իրենց առաքելությունը: Մեր նպատակն է ևս մեկ անգամ ցույց տալու մեր միասնությունն և այն կամքը, որ պատրաստ ենք կանգնելու բոլորիս հայրենիքի սահմանի ցանկացած հատվածի պաշտպանության դիրքերում:

Հրաչիկ Նասիբյան, ԱԱՄ Ստեփանակերտի տարածքային 5-րդ միավորման նախագահ

-Հաճախ ենք մասնակցություն ունենում ռազմահայրենասիրական տարաբնույթ միջոցառումների կազմակերպմանը՝ լինի դա Արիության դաս, այցելություն սահմանագիծ: Կարծում եմ, որ սահմանը բոլորիս տունն է: Մարտական տրամադրվածությամբ էլ մեկնում ենք հայրենիքի սահման՝ մեր ներդրումն ունենալու նրա պաշտպանության գործում: Մենք չենք հարձակվում և չենք ուզում պատերազմել, բայց որտեղից մեզ վրա կրակեցին, այնտեղ նրանց կոչնչացնենք:

Artsakhpress.am

Ադրբեջանի պաշտպանության նախարարությունն այսօր հայտարարություն է տարածել, որում նշված է, թե Հայաստանի զինված ուժերը սկսել են կրակել իրենց խաղաղ բնակչության վրա. տեղեկացնում է Interfax.az-ը: Ադրբեջանի պաշտպանական գերատեսչությունը նշել է նաև, թե վախենալով իրենց հզոր հարվածներից, Հայաստանի սահմանամերձ բնակավայրերից սկսել են մարդկանց տարհանել: Ադրբեջանի ՊՆ-ն Հայաստանին սպառնացել է իրենց «գյուղերի և խաղաղ բնակիչների վրա արձակվող կրակոցներն անմիջապես չդադարեցնելու դեպքում, օգտագործելով ցանկացած կրակային համակարգ, որ կա մեր զինանոցում, ոչնչացնել թշնամուն»: Այս առնչությամբ Aravot.am-ը մեկնաբանություն խնդրեց ՀՀ պաշտպանության նախարարի մամուլի քարտուղար Արծրուն Հովհաննիսյանից: Նա Ադրբեջանի ՊՆ-ի հաղորդագրությունը ծիծաղելի անվանեց: Պարոն Հովհաննիսյանը հերքեց Ադրբեջանի ՊՆ-ի այն պնդումները, թե Հայաստանի սահմանամերձ բնակավայրերից մարդկանց տարհանում են: Իսկ Ադրբեջանի խաղաղ բնակչության վրա կրակելու առնչությամբ ասաց. «Հայկական կողմը երբեք նման բան չի արել, չի անում ու չի անելու: Դրա կարիքը չկա»: Արծրուն Հովհաննիսյանը նաեւ Ադրբեջանին խորհուրդ տվեց մտածել «իրենց կողմից փախչող ժողովրդի մասին, սպիտակ դրոշների մասին, գյուղերից փախած գյուղապետերի մասին, մեկ էլ մորգերում ու հոսպատալներում վիրավորվածների և զոհվածների թաքցված դիակների մասին»:

Հակառակորդի կողմից ձեռնարկված գործողության հետեւանքով սեպտեմբերի 4-ին՝ ժամը 17:00-ի սահմաններում մարտական խնդիր կատարելու ժամանակ զոհվել են պաշտպանության բանակի պայմանագրային զինծառայողներ Մարատ Ռուդոլֆի Խաչանյանը և Արման Վաչագանի Ստեփանյանը:

Այս մասին հայտնում են ԼՂՀ ՊՆ մամուլի ծառայությունից և տեղեկացնում, որ դեպքի մանրամասները պարզելու համար կատարվում է քննություն:

«ԼՂՀ պաշտպանության նախարարությունը կիսում է կորստյան ծանր վիշտը և իր զորակցությունը հայտնում զոհված զինծառայողների ընտանիքների անդամներին, հարազատներին և ծառայակիցներին»,–ասվում է հաղորդագրությունում:

shamshyan.com-ը գրում է.

39-ամյա Ալիկ Հակոբյանին մեղադրանք է առաջադրվել այն բանի համար, որ նա Տավուշի մարզի Վ.Ծաղկավան գյուղից դեպի Բերդ քաղաք շուրջ 1 կմ հեռավորությամբ հանդիպել է ճամփեզրով քայլող իրեն անծանոթ՝ 49-ամայ Վիկտոր Վոլոդյայի Օրդյանին և վերջինիս իրենից խուսափելու և անհասկանալի լեզվով խոսելու, ինչպես նաև աջ ձեռքը ծոցագրպանից դուրս բերելու հանգամանքներից կարծելով, որ նա Ադրբեջանի քաղաքացի է և ծոցագրպանից ցանկանում է զենք հանել, իր մոտ գտնվող որսորդական հրացանով դիտավորությամբ կյանքից զրկելու նպատակով կրակել է վերջինիս, որի հետևանքով Վիկտոր Օրդյանն ստացել է հրազենային վնասվածք: Ալիկ Հակոբյանի դեմ քրեական գործ է հարուցվել` ՀՀ քրեական օրենսգրքի 34-104 հոդվածի 1-ին մասով։ Այս մասին SHAMSHYAN.com-ը տեղեկացավ Բերդի ընդհանուր իրավասության դատարանից։ Խափանման միջոց ընտրվել է ստորագրությամբ չհեռանալը։ Առաջիկայում կնշանակվի դատական քննության օրը։

Ադրբեջանական Haqqin.az գործակալությունը հայտնում է, որ Մուրովդաղի շրջանում ադրբեջանական բանակի 19-ամյա զինծառայող Սամիր Օրուջևը զոհվել է հրադադարի խախտման հետևանքով։

ԱՊԱ գործակալությունը, սակայն, Ադրբեջանի պաշտպանության նախարարությանը հղումով տեղեկացնում է, որ Օրուջևը վիրավորվել էր սեպտեմբերի 3-ին՝ «զենքի հետ վարվելու կանոնների խախտման հետևանքով»։

Չնայած զինծառայողին առաջին օգնություն է ցուցաբերվել, նա մահացել է բուժհաստատություն տեղափոխվելու ճանապարհին:

Հարուցվել է քրեական գործ, ընթանում է հետաքննություն։

Օրեր առաջ Էգեյան ծովում՝ Թուրքիայի Բոդրում քաղաքի մոտ նավակի աղետի հետևանքով մահացած 3-ամյա Այլան Քուրդիի հայրը՝ Աբդուլլահը, վերադարձել է Սիրիա՝ իր ընտանիքին հողին հանձնելու համար, հայտնում է AFP-ն:

Աբդուլլան, ում կինն ու երկու մանկահասակ որդիները խեղդվել էին ծովում, վերադարձել է հայրենի Քոբանի քաղաք, որպեսզի հուղարկավորի ընտանիքի անդամներին:

Ողբերգությունը մեծ արձագանք էր ստացել համացանցում Այլինի հրապարակված լուսանկարներից հետո, որոնցում նա անօգնական ընկած է լողափին:

The Guardian-ը հրապարակել է կադրեր, որտեղ երևում է, թե ինչպես է ծովափին ընկած փոքրիկին մոտենում թուրք փրկարարը, սակայն տղան արդեն մահացած էր:

Հիշեցնենք, որ սիրիացի փախստականները փորձում էին անօրինական կերպով հասնել Հունաստանի Կոս կղզի: Խեղդվել էր 5 մանկահասակ երեխա, 7 մարդ փրկվել էր Թուրքիայի առափնյա ոստիկանության կողմից, 2 մարդ ինքնուրույն կարողացել էր հասնել ափ փրկարարական ժիլետներով:

Աղբյուրը /168.am/

Սահմանին ստեղծված լարվածությունը Ադրբեջանի սադրանքների հետևանք է։ Այս մասին հայտարարել է ՀՀ պաշտպանության նախարարության մամուլի խոսնակ Արծրուն Հովհաննիսյանը։

Նա նշել է, որ նախօրեին ադրբեջանական կողմի գնդակոծումից վիրավորվել է Վազաշեն գյուղի 3 խաղաղ բնակիչ և մեկ պայմանագրային զինծառայող։ Բարեբախտաբար վիրավորների կյանքին վտանգ չի սպառնում։ «Հակառակորդը գործի է դրել հրաձգային զենք ու ականանետեր»,- նշել է Հովհաննիսյանը։

Նրա խոսքով՝ ընդհանուր առմամբ Հայաստանի հետ սահմանին և ԼՂՀ զորքերի հետ շփման գծում կրակոցների ինտենսիվությունը մի փոքր նվազել է նախորդ օրերի համեմատ։ «Հույս ունենք, որ միտումը կշարունակվի»,- հավելել է մամուլի խոսնակը։

Խոսելով ներկայիս լարվածության պատճառների մասին՝ Հովհաննիսյանը ընդգծեց, որ այն արհեստական բնույթ է կրում։ «Մի քանի օր առաջ Ադրբեջանի ԱԳՆ մամուլի խոսնակը սենսացիոն հայտարարություն արեց Միջազգային մարդասիրական նորմերը պահպանելու մասին։ Ընդ որում, մոռանալով նշել, որ լարվածության պատճառը ադրբեջանական կողմի սադրիչ գործողություններն են»,- նշեց Հովհաննիսյանը։ Նրա խոսքով՝ ադրբեջանական զինուժը բեմական ներկայացում է ցուցադրել ադրբեջանական հարսանիքի «գնդակոծումով» և սեփական սադրանքն օգտագործել է հայկական սահմանամերձ գյուղերը գնդակոծելու համար։

Հայկական կողմից պատասխան գործողության արդյունքը հայտնի է. ադրբեջանական գյուղերում խուճապ է, բնակիչները զանգվածաբար լքում են շրջանները, ադրբեջանական բանակը կորուստներ է կրում եւ փորձում կոծկել դրանք։ «Այդ ամենը արտահայտված է ադրբեջանական մամուլում»,- նշեց Հովհաննիսյանը։

«Հակառակորդի սադրանքը անպատասխան չի մնա։ Միաժամանակ հայկական կողմն անում է հնարավոր ամեն բան, որպեսզի թույլ չտա իրավիճակի հետագա լարումը»,- ընդգծեց Հովհաննիսյանը՝ հավելելով, որ ներկայումս սահմանին իրավիճակը հանգիստ է։

Պուտինը բացատրում է 11-ամյա տղային՝ ինչու է ռուբլին արժեզրկվում։

https://www.youtube.com/watch?v=cME6OJGiZHw

Ադրբեջանում ցնցված են այդ երկրի հետ հայկական երկու հանրապետությունների սահմաններում լարված իրավիճակի պայմաններում Հայաստանում պլանային «Շանթ-2015» ռազմավարական հրամանատարաշտաբային զորավարժությունների անցկացման բարձր մակարդակով:
Ինչպես հաղորդում է «Արմենպրես»-ը, ադրբեջանական իշխանամետ ԶԼՄ-ներն անթաքույց նախանձով են անդրադարձել զորավարժանքների հենց առաջին օրը Հայաստանի ղեկավարության, ուժային կառույցների պատրաստվածությանը և բնակչության բոլոր շերտերի ակտիվ մասնակցությանը միջոցառմանը:
Մասնավորապես, Ադրբեջանի իշխանության խոսափող haqqin.az և virtual.az լրատվական կայքերը գրել են, որ չնայած զորավարժանքների գաղտնի բնույթին, այն բնակչության շրջանում տագնապ չի առաջացրել անգամ սահմանամերձ որոշ շրջաններից բնակիչների զանգվածային տարհանման ժամանակ, ինչը եղել է զորավարժանքների տարրերից մեկը:
ԶԼՄ-ները մեջբերել են Հայաստանի ՊՆ մամուլի քարտուղար Արծրուն Հովհաննիսյանի` բնակչության համար արած այն պարզաբանումը, որ զորավարժանքները պետական բոլոր կառույցների աշխատանքները համակարգելու քննություն են`միտված հավանական ռազմական գործողություններին պետական կառույցների և բնակչության պատրաստվածության բարձրացմանը:
Ադրբեջանական իշխանամետ ԶԼՄ-ներն անդրադարձել են նաև զորավարժանքների շրջանակում ՀՀ նախագահ Սերժ Սարգսյանի կողմից սեպտեմբերի 3-ին հրավիրված Անվտանգության խորհրդի նիստին, որտեղ տեղեկություններ են հաղորդվել վերջին օրերին Հայաստանի շրջակայքում տեղի ունեցող իրադարձությունների մասին:
Հայաստանում սեպտեմբերի 3-ին մեկնարկել են «Շանթ 2015ե ռազմավարական հրամանատարաշտաբային զորավարժությունները: Համապետական նշանակության «Շանթ-2015ե զորավարժությունը պլանային բնույթի է և նպատակաուղղված է պաշտպանությանը պետության անմիջական նախապատրաստության և ագրեսիայի հետմղման ընթացքում պետական և ռազմական կառավարման մարմինների զորահավաքային նախապատրաստության, պատրաստականության բարձրաստիճանների բերման ունակության վերստուգմանը, փոխգործակցության և գործողությունների ներդաշնակության մակարդակի բարձրացմանը:
Հաշվի առնելով Հայաստանի շուրջ և մերձատարածքում ստեղծված ռազմաքաղաքական իրադրությունը, զորավարժության սցենարում առկա մտացածին հակառակորդը և իրավիճակը առավելապես համապատասխանեցված են իրականությանը: