Թերթի տեղեկություններով՝ եվրոպական լուրջ կառույցներում սկսել են ծաղրել հայ պաշտոնյաներին, մասնավորապես՝ ՀՀԿ ծագում ունեցող պատգամավորներին և նախարարներին։ Բանն այն է, որ եվրոպաներում քաղաքական ձևաչափերում լուրջ հանդիպումների մասնակցող հայ պաշտոնյաներին նրանց եվրոպական գործընկերները սկսել են դիմել ոչ թև «պարոն», այլ «товарищ» դիմելաձևով։ Եվրոպացիների՝ այսպիսի դիմելաձևը սկսվել է սեպտեմբերի 3-ից հետո, երբ Սերժ Սարգսյանը հայտարարեց Հայաստանի՝ Մաքսային միությանը անդամակցելու պատրաստակամության մասին։

Մեր տեղեկություններով՝ այս դիմելաձևից ՀՀ պաշտոնյաները խիստ կոմպլեքսավորվում են և չեն էլ փորձում ինչ-որ ձևով հակադարձել եվրոպացիներին:

Մանրամասները՝  «Չորրորդ ինքնիշխանության»այսօրվա համարում:

Սեպտեմբերի 21-ին Արամ Խաչատրյան համերգասրահում տեղի կունենա համերգ՝ նվիրված ՀՀ Անկախության օրվան: Որպես մենակատար հրավիրված է Մոսկվայի պետական Ֆիլհարմոնիայի մենակատար էդուարդ Կունցը. իսկ ծրագրի գլխավոր՝ աոաջին մասում, կհնչի Պյոտր Չայկովսկու թիվ 1 դաշնամուրային կոնցերտը:

ՀՀ պետական ամենանշանակալի օրվա տոնական համերգի այսօրինակ ծրագիրը (պինդ բռնվեք) ռուսների ցանկությամբ է կազմվել: Սեպտեմբերի 21-ի տոնական համերգի գլխավոր հովանավորը՝ ռուսական «ԳեոՊրո- Մայնինգ» ընկերությանն է, որը Հայաստանում զբաղված է թանկարժեք մետաղների, մասնավորապես՝ ոսկու հանքերի շահագործմամբ: Ինչպես հայկական ամեն մի ռազ­մավարական օբյեկտ, ռուսական հերթական ընկերու­թյանն են տրվել նաև Հանքավանի ոսկու հանքավայրը, Սոթքը, Արարատի ոսկու կորզման հանքը, Ագարակի պղնձամոլիբդենային կոմբինատը: Ինչպես մեզ փոխան­ցեցին Հայաստանի պետական ֆիլհարմոնիկ նվա­գախմբի Արտիստական և երգացանկային բաժնից, Ֆիլհարմոնիկ նվագախմբին է դիմել ոմն Ռուզան Գրիգորյան՝ «ԳեոՊրո Մայնինգ» ընկերությունից, առաջարկելով հո­վանավորել սեպտեմբերի 21-ի տոնական համերգը: Բնականաբար, նվագախմբի գեղարվեստական ղեկա­վար և գլխավոր դիրիժոր էդուարդ Թոփչյանը, ինչպես նաև ՀՊՖՆ տնօրինությունը համաձայնել են առաջար­կին: Ի դեպ, Հայաստանի պետական ֆիլհարմոնիկ նվա­գախմբի մշտական հովանավորների ցանկում «ԳեոՊրոՄայնինգ» ընկերության անունն ընդհանրապես չկա:

Հոդվածն ամբողջությամբ՝ կարդացեք «Հայկական ժամանակ»-ի այսօրվա համարում:

«Համացանցային մեղադրանքները, հայհոյանքնե­րը, «դավադրությունների բացահայտումները» և այլն կարելի է համեմատել մոծակի խայթոցի հետ. սկզբում տհաճ է, բայց եթե մի 15 րոպե համբե­րես և չքորես, կանցնի և կմնա փոքր հետք, որը գուցե կերևա մի քանի ժամ, որից հետո դա էլ կվերանա: Բայց եթե քորես, կարող է մի քանի օր քեզ անհանգստացնել և ավելին՝ կդաոնա քո կյանքում հիշարժան իրադարձություն, և դեռ երկար ժամանակ դու գուցե բողոքելու ես՝ «էն օրը մո­ծակներն ինձ այնպես կծեցին»: Նման մեխանիզմ ունի նաև համացանցային բանավեճը, հերթական խայթոցից հետո պետք է զսպել էմոցիաները և չպատասխանել. 15 րոպեից այդ խայթոցն ան­կարևոր և աննշան կթվա:

Այնուամենայնիվ, մի խորհուրդ տամ բոլոր նրանց, ովքեր համացանցում «վերջնական ճշմար­տություններ» են գրում: Այդ խորհուրդը ձևակերպել Է ֆրանսիացի գրող Էրիխ էմանուել Շմիդտի հե­րոսներից մեկը. «Դու չափից դուրս շատ ես խոր­հում, քանի որ միտքը դնում ես քո և աշխարհի միջև: Դու ավելի շուտ ճամարտակում ես, քան դի­տարկում, դու ելնում ես կանխակալ գաղափարներից՝ չգիտակցելով երևույթը: Փոխանակ դիտար­կես իրականությունը, ինչպես որ այն գոյություն ու­նի, դու այն տեսնում ես մութ ակնոցով, որը դրել ես քթիդ… Դու չափից դուրս քիչ ես խորհում, որովհետև դոփում ես տեղում, կրկնում ես, ծամում ես ծեծված ճշմարտությունները, տարածված կարծիքները, որոնք ճշմարտության տեղ ես դնում՝ փոխանակ վերլուծես դրանք: Դու թութակ ես սե­փական նախապաշարումների վանդակում: Դու խորհում ես չափից դուրս շատ, բայց դրա հետ մեկտեղ՝ ոչ բավարար, որովհետև ինքնուրույն չես մտածում»: Այս խոսքերի տակ մնում է միայն ստո­րագրել:

Խմբագրականն ամբողջությամբ՝ կարդացեք «Առավոտ»-ի այսօրվա համարում:

Թերթի տեղեկություններով՝ նախագահականում բավականին դժգոհ են ՀՀ առողջապահության նախարար Դերենիկ Դումանյանի՝ Դերոյի գործունեությունից։ Անգամ Սերժ Սարգսյանն ինքն է հետաքրքրվել Դերոյի աշխատանքով՝ նշելով, որ նա չի երևում ոչ մի տեղ։ Արդյունքում՝ Դումանյանն այս օրերին ընկած է «կարմիր լենտ» կտրելով։

Բանն այն է, որ Համաշխարհային բանկի ծրագրով կառուցված հիվանդանոցների «պոչերը»՝ ամբուլատորիաները, Դերոյի նախկինները չէին հասցրել բացել։ Եվ հիմա Դերոն ընկած ամբուլատորիաներ է բացում՝ ցույց տալով, թե ինքը կարևոր գործով է զբաղված և զարգացնում Է ոլորտը։ Մինչդեռ ամբուլատորիաների բացման ծրագրի իրականացման հետ Դումանյանը որևէ առնչություն չունի։ Ի դեպ՝ նրա «կարմիր լենտ» կտրելու արարողությունը ակտիվորեն լուսաբանվում Է TV–ների կողմից։ «ՉԻ» տեղեկություններով՝ նախագահականից հրահանգ Է տրված հեռուստաընկերություններին նկարահանել Դումանյանին, որպեսզի նրանք կարողանան Սերժ Սարգսյանի մոտ տպավորություն ստեղծել, որ իր ասած Դերոն աշխատում է։

Իրականում Դերենիկ Դումանյանը ոչ միայն ինքն Է իրեն անգործության մատնել, այլ նաև իր ղեկավարած հսկա գերատեսչության կարևոր վարչությունների աշխատակիցներին է մատնել անգործության»,–գրում է թերթը։

Մանրամասները՝ «Չորրորդ ինքնիշխանության» այսօրվա համարում:

Նախկին գլխավոր դատախազ Աղվան Հովսեփյանի՝ պաշտոնից հնդկական ֆիլմի մոտիվներով հեռացումը, պարզվում է՝ ամենից շատ ազդել է նրա գերդաստանի վրա:

Հատկապես հուզվել է Գառնիկիչի եղբայրը՝ ՀՀ ԱԺ ՀՀԿ խմբակցության պատգամավոր Ռուբեն Հովսեփյանը, որը երեկ բավական բուռն է արձագանքել «Հրապարակ» օրաթերթի լրագրողի հարցերին, ապա հեռախոսն իբր անջատելուց հետո սկսել է հայհոյել:

Թերթի լրագրողը Ռուբեն Գառնիկիչին հարցրել է. ինչո՞ւ նա չի մեկնել Մոսկվա՝ հայկական եկեղեցու բացմանը, որտեղ, որոշ տեղեկություններով, ապարանցիները և ռուսաստանաբնակ հայ գործարարները Սերժ Սարգսյանի մոտ փորձելու են բարեխոսել՝ փիառ անել Աղվան Հովսեփյանի համար։ ԱԺ պատգամավորը կեսկատակ-կեսլուրջ պատասխանել է, թե իրեն չեն հրավիրել:

«Թե՞ հույսներդ արդեն կտրել եք և համակերպվել, որ Ձեր եղբայրն այլևս գլխավոր դատախազ չի աշխատելու»,- հարցրել է թերթի լրագրողը։

«Չհասկացա, էդ ի՞նչ վերաբերմունք ա, ի՞նչ հույսեր ենք կտրել, կամ ի՞նչ ա նշանակում՝ պիառ են անելու… ղալաթ են արել գրել են, ինչի՞ց պիտի հույսներս կտրենք, խի Հովսեփյան Աղվան մենակ գլխավոր դատախազ եք տեսե՞լ»,- զայրացել է եղբոր շնորհիվ պատգամավոր դարձած Ռուբեն Հովսեփյանը:

Լրագրողը հիշեցրել է, որ իրենք էին այդպես տեսնում, անձամբ Ռուբեն Հովսեփյանն էր վստահ հայտարարում, որ եղբայրը վերանշանակվելու է դատախազ: Բայց Հովսեփյանը նեղացել է և ասել, որ չի ուզում այդ թեմայով խոսել: Ապա նրան թվացել է, թե անջատել է հեռախոսը, ու անցել է հարազատ բառապաշարին՝ դիմելով կողքին գտնվող ինչ-որ մեկին.

«Հլը սրանց նայեք, սրանց մուտիլովկաները… Ձեր տիրոջ մերը…»: Հայհոյել է բարեկիրթ պատգամավորն ու զրուցակցին ներկայացրել, թե ով էր զանգահարողը:

Հոդվածն ամբողջությամբ՝ կարդացեք «Հրապարակ»-ի այսօրվա համարում:

Նախօրեին՝ կիրակի օրը, Արմավիրի մարզի Տարոնիկ համայնքը գյուղապետ է ընտրել։ Ինքնաառաջադրված չորս անկուսակցական թեկնածուներից ամենաշատ քվեն ստացել է Արմեն Խլղաթյանը։ Նա Գյումրի քաղաքի ԱԳԼՃԿ-ներից մեկում հերթափոխի պետ էր աշխատում։ Խլղաթյանը ստացել 1567 ձայն։ Նրան 308 ձայնով զիջել Է «Նոր Ակունք» ՓԲԸ-ի օպերատոր Գևորգ Զաքարյանը՝ ստանալով ընտրողներից 259-ի քվեն։

Մյուս երկու թեկնածուները՝ Կարապետ Խաչատրյանը և Մովսես Սահակյանը անհամեմատ ավելի քիչ քվե են ստացել, համապատասխանաբար՝ 90 և 217։ Տարոնիկի գյուղապետի ընտրությունները այն բացառիկներից է, որտեղ ոչ միայն ՀՀԿ-ն, այլև մյուս կուսակցությունները ներգրավված չեն։ Նման դեպքերում որպես կանոն՝ ընտրված թեկնածուն մարզպետի ցուցումով շատ արագ գրանցվում և դառնում է Հանրապետական կուսակցության անդամ:

Մանրամասները՝ «Հայկական ժամանակ»-ի այսօրվա համարում:

Թեև նախագահական, պատգամավորական  ընտրությունների գլխավոր կազմակերպիչը Սյունիքի մարզում նախկին մարզպետ  Սուրիկ Խաչատրյանն էր, ով ընտրակեղծիքների ու ընտրական ռեպրեսիաների կուռ մեխանիզմ է ձևավորել, սակայն ընտրողների շրջանում ընդվզում էր նկատվում իշխանության դեմ: Ընտրություններն ուղեկցվում էին սկանդալներով ու աղմկահարույց միջադեպերով:

Այս մասին այսօրվա համարում գրում է «Հրապարակ» օրաթերթն ու հավելում, որ ընդվզման կուլմինացիան  նախագահական ընտրություններին Րաֆֆի Հովհաննիսյանի օգտին քվեարկության բարձր մակարդակն էր,  որոշ տեղերում՝ բացարձակ հաղթանակը, ինչը  հույսեր էր ներշնչում, որ Լիսկայի լծից ազատագրվելու կամք է հասունանում Սյունիքում: Սյունիքն ընդգրկող թիվ 38 ընտրատարածքում տարիներ շարունակ հայրիկի՝ Պղնձամոլիբդենային կոմբինատի տնօրեն Մաքսիմ Հակոբյանի շնորհիվ պատգամավոր է «ընտրվել» ներկայիս մարզպետ Վահե Հակոբյանը:

«Լիսկային գահընկեց անելուց և Վահե Հակոբյանին մարզպետ կարգելուց հետո ընտրատարածքը թափուր է մնացել, և այժմ պատգամավորի պաշտոնի համար պայքարում են 3 թեկնածու՝ ՀՀԿ-ական Արմեն Կարապետյանը, ինքնառաջադրված անկուսակցական, «Կապանի ՀՀԳ» ՍՊԸ տնօրեն Վահրամ Հովհաննիսյանը և «Ժառանգությունից» առաջադրված Կապանի բնակիչ, ազատամարտիկ Սամվել Հայրապետյանը»,-գրում է հոդվածագիրն ու ավելացնում, որ հիմնական պայքարը գնում է իշխանական թեկնածուի և «Ժառանգության» թեկնածուի միջև:

Թերթի հետ զրույցում «Ժառանգության» թեկնածուն ասել է, որ չնայած ամեն ինչ խաղաղ է, սակայն որոշ խոչընդոտներ առաջանում են:

Հոդվածն ամբողջությամբ՝ կարդացեք «Հրապարակ»-ի այսօրվա համարում:

Երբ սեպտեմբերի սկզբին պարզ դարձավ, որ մեր երկիրը պատրաստվում է մտնել Մաքսային միության մեջ, ինչպես նաև՝ դառնալ Եվրասիական միության համահիմնադիրներից մեկը, ոմանք առաջարկում էին այդ հարցը դնել հանրաքվեի։ Ընկերներիցս մեկն ասաց, թե վախենում է, որ այդ հանրաքվեն կկեղծվի, ինչպես մեզանում կեղծվում են բոլոր հանրաքվեներն ու ընտրությունները։ Ես, ճիշտն ասած, ավելի խորը մտավախություն ունեմ՝ որ նման հանրաքվեն, եթե տեղի ունենար, չէր կեղծվի, և հայաստանցիների ճնշող մեծամասնությունը կողմ կարտահայտվեր այդ միություններին։ Ավելին՝ եթե այսօր հանրաքվեի հարց դրվի՝ դուք կո՞ղմ եք, որ Հայաստանը մտնի ՌԴ կազմի մեջ, ամենևին էլ վստահ չեմ, որ մեր քաղաքացիների մեծամասնության համար անկախության զաղափարն ավելի բարձր կլինի։ Բայց քանի որ մենք ոչ մի սոցիոլոգիական հարցման և ոչ մի հանրաքվեի չենք հավատում, ապա իմ այդ ենթադրությունները էմպիրիկ ձևով ստուգել հնարավոր չէ։

Մեր նպատակը, իմ ընկալմամբ, կարելի է ձևակերպել շատ կարճ՝ ուժեղ պետություն, թույլ իշխանություն։ Այսինքն՝ պետությունը, որպես ինստիտուտ, այնքան հզոր պետք է լինի, որ ոչ մի իշխանավոր չկարողանա դրան հակադրվել։

Օրինակ՝ Սուրիկ Խաչատրյանը ուժեղ իշխանավոր է (ներկա ժամանակով եմ գրում, որովհետև մարզպետի պաշտոնից նրան ազատելը որևէ բան չի փոխել), առանց նրա թույլտվության ոչ ոք Սյունիքում չի կարող նույնիսկ կրպակ դնել, նրա ընտանիքի և նրա «զարզանդյան գվարդիայի» անդամները կարող են հարձակվել ՀՀ ցանկացած քաղաքացու վրա, եթե վերջինիս դեմքի արտահայտությունն իրենց դուր չգա, սպանություն կատարած նրա որդին առանց լուրջ հիմնավորումների ազատ է արձակվել։ Հիմա ասացեք՝ որտե՞ղ են նման ուժեղ իշխանավորներն ավելի շատ Ռուսաստանո՞ւմ, Ղազախստանո՞ւմ, թե՞, ասենք, Նորվեգիայում։ Ասացեք նաև, թե որ շուկան է ավելի արդյունավետ գործում՝ այնտեղ, որտեղ ուժեղ իշխանավորները տիրացել են կամ մասնաբաժին ունեն բոլոր լուրջ բիզնեսներո՞ւմ, թե՞ այնտեղ, որտեղ բիզնեսը թողնվել է մասնավոր անձանց նախաձեռնությանը, բայց խստորեն վերահսկվում է պետության կողմից։

Սակայն ամբողջ ցավն այն է, որ մեր համաքաղաքացիների մեծ մասը երազում է ուժեղ պաշտոնյայի մասին, որը բռունցքը կխփի սեղանին և իրենց խնդիրը կլուծի։ Դա պատրանք է. ուժեղ իշխանավորը կամայականությունների, ոչ թե կարգուկանոնի գրավականն է:

«Առավոտ»-ի խմբագրականն ամբողջությամբ՝ թերթի այսօրվա համարում:

Դատական կարգադրիչների գործի շրջանակներում երեկ երեկոյան կալանավորվել է նաև Դատական դեպարտամենտի դատական կարգադրիչների ծառայության կադրերի բաժնի պետը։ Այս գործով արդեն 10-ից ավելի մեղադրյալներ կան։ Իսկ Դատական կարգադրիչների ծառայության պետի երկու տեղակալները փախուստի մեջ են։ Կարգադրիչների ծառայության որոշ աշխատակիցներ, որոնց արդեն մեղադրանք է առաջադրվել, սկսել են վերականգնել պետությանը պատճառված վնասը, որն անցնում է 300 միլիոնը:

Հոդվածն ամբողջությամբ՝ «Հրապարակ»-ի այսօրվա համարում:

Թերթը գրում է, որ Ազգային ժողովի ՀՀԿ-ական պատգամավոր, ԱԺ պետաիրավական հանձնաժողովի նախագահ Դավիթ Հարությունյանը երեկ բացառել է, որ իր թեկնածությունը կարող է առաջադրվել ՀՀ գլխավոր դատախազի պաշտոնում։

Ներկայացնում ենք Դավիթ Հարությունյանի հետ հարցուպատասխանը.

-Պարոն Հարությունյան, ձեր անունը ևս շրջանառվում է ՀՀ գլխավոր դատախազի հավանական թեկնածուների շարքում, հնարավո՞ր է ձեր առաջադրումը։

-Անլուրջ խոսակցություններ են։

-Բացառո՞ւմ եք։

-Այո։

ՀՀ ապագա գլխավոր դատախազի անունը դեռևս անհայտ է։ Հավանական թեկնածուներից մեկի՝ Երևանի դատախազ Հրաչյա Բադալյանի անունը ևս երեկ, ըստ որոշ լրատվական կայքերի, շրջանառությունից դուրս է եկել։ Նա, ինչպես տեղեկացրել էինք, առողջական խնդիրներ ունի։ Քաղաքական շրջանակներում արդեն կարծում են, որ Սերժ Սարգսյանը ՀՀ գլխավոր դատախազի պաշտոնում ներկայացնելու է խիստ «էկզոտիկ» որևէ անձի և դա Է պատճառը, որ թեկնածուի անունը մինչև հիմա գաղտնի Է պահվում:

Մարմանասները՝ «Հայկական ժամանակ»-ի այսօրվա համարում։