Ըստ ՀՀ ոստիկանության օպերատիվ հաղորդագրությունների ամփոփագրերի` հուլիսի 19-ից 21-ն ընկած ժամանակահատվածում հանրապետությունում արձանագրված մարմնական վնասվածք հասցնելու 50 դեպքից բացահայտվել է 35-ը, խարդախության` 10, խուլիգանության՝ 4 և յուրացման 2 դեպքերը բացահայտվել են: Բացահայտվել է նաև գողության 12 դեպք։
Նախկինում կատարված հանցագործություններից բացահայտվել է մարմնական վնասվածք հասցնելու՝ 3, գողության՝ 2 և կողոպուտի 1 դեպք:
Անցած 3 օրվա ընթացքում հանրապետությունում արձանագրվել է ճանապարհատրանսպորտային 27 պատահար, ինչի հետևանքով 2 մարդ զոհվել է, 37-ը ստացել տարբեր աստիճանի մարմնական վնասվածքներ:

Շենգավիթ վարչական շրջանի ընդհանուր իրավասության դատարանում այսօր հրապարակվեց մարմնավաճառներ Անժելա Խաչատրյանի, Նարե Ներսիսյանի, Էլմիրա Խաչատրյանի և Պայծառ Դանաչյանի դատավճիռը:

Ըստ մեղադրանքի 2013թ-ի դեկտեմբերի 2-ին, ժամը` 01:00-ի սահմաններում , մարմնավաճառությամբ զբաղվելու կասկածանքով ոստիկանության աշխատակիցների կողմից Երևան քաղաքի Գ.Նժդեհի փողոցի 27 հասցեում գտվող ՀՀ ոստիկանության Շենգավիթի բաժին բերելուց հետո, մուտք են գործել նույն բաժնի առաջին հարկի միջանցք , որտեղ վիճաբանել են իրենց ծառայողական պարտականությունները կատարող ոստիկանության Շենգավիթի բաժնի ՔՀԲ օպեր-լիազոր Բաբկեն Ալավերդյանի, ոստիկանության ՊՊԾ գնդի 5-րդ վաշտի 2-րդ դասակի ոստիկաններ Խաչատուր Մելքումյանի և Արման Նավասարդյանի հետ, որի ժամանակ չեն ենթարկվել վերջիններիս օրինական պահանջներին և իրենց մոտ եղած ածելիով բռնություն գործադրելու սպառնալիքների ներքո` փորձել են ածելիով վնասել Ա.Նավասարդյանի դեմքը, հետապնդել են նրան և Բաբկեն Ալավերդյանին` հարկադրելով նրանց ոստիկանության Շենգավիթի բաժնից փախուստի դիմել:

Ինչ է տեղի ունեցել. մեզ հասած տեղեկություններով՝ այդ ժամանակահատվածում Հայաստանում էր ՌԴ նախագահ Վլադիմիր Պուտինը, ոստիկանները խնդրել էին փողոցում կանգնող մարմնավաճառներին գոնե այդ օրը գործի դուրս չգալ, սակայն կանայք ընդդիմացել էին, և ոստիկանները ստիպված բերման էին ենթարկել նրանց: Արդեն ոստիկանության բաժնում տեղի է ունեցել քաշքշուկ, որի արդյունքում Նարե Ներսիսյանը վնասել է Արման Նավասարդյանի աջ դաստակը և դիտավորությամբ վերջինիս առողջությանը պատճառել միջին ծանրության վնաս՝ առողջության տևական քայքայումով: Վնասվածքի պատճառով ոստիկանն այլևս չի կարող զենք գործածել: Ամբաստանյալներն, իրենց վերջին խոսքում ընդունեցին մեղքը՝ հայցելով դատարանի ներողամտությունը:

«Խնդրում եմ ներողամիտ լինել, քանի որ դեռ վաղ տարիքում որբացել եմ, ուսում չեմ ստացել, ունեմ արու զավակ , որն իմ խնամքի տակ է: Հուսով եմ, որ դատարանը հաշվի կառնի այս հանգամանքը»,- ասաց Նարե Ներսիսյանը:

Իսկ Պայծառ Դանաչյանը նշեց, որ իր խնամքի տակ է գտնվում ութամյա դուստրը և ծեր մայրը ու խնդրեց սահմանել այնպիսի պատիժ, որ երեխան անմայր չմնա:

Նշենք, որ ամբաստանյալներից մի քանիսն ընթերցում էին թղթի վրա նախօրոք գրված «վերջին խոսքը»:

Ամբաստանյալներ Անժելա և Էլմիրա Խաչատրյանները մայր ու աղջիկ են: Ըստ դատավճռի՝ Նարե Ներսիսյանը դատապարտվեց 5 տարի, Պայծառ Դանաչյանը՝ 2 տարի, 6 ամիս, Էլմիրա Խաչատրյանը՝ 6 ամիս ազատազրկման, իսկ Անժելա Խաչատրյանը ազատ արձակվեց՝ 400.000 դրամ տուգանք վճարելու պայմանով:

18.07.2014թ., ժամը  07.00-ի սահմաններում,  N զորամասի մարտական հենակետում մահացու հրազենային վիրավորում է ստացել նույն զորամասի ժամկետային զինծառայող, շարքային Գևորգ Արտեմի Ավագյանը:

Դեպքի առթիվ ՀՀ ՊՆ քննչական ծառայությունում ՀՀ քր. օրենսգրքի -ի 104 հոդ. 1-ին մասի /սպանություն/  հատկանիշներով հարուցվել է քրեական գործ, կատարվում է նախաքննություն:

Սպանություն կատարելու կասկածանքով ձերբակալվել է ժամկետային զինծառայող, շարքային Արմեն Հրաչյայի Սարգսյանը:

Քրեական գործով նախաքննությունը շարունակվում է:

Հայաստանի Հանրապետության պաշտպանության նախարարությունը կիսում է ծանր կորստյան վիշտը և իր զորակցությունն է հայտնում շարքային Գևորգ Արտեմի Ավագյանի ընտանիքի անդամներին, հարազատներին և ծառայակիցներին:

Ռուսաստանի կողմից Ադրբեջանին զենք վաճառելը եթե բիզնես է, ապա վաճառվել է Ղարաբաղը: Այս մասին անցյալ տարվա նոյեմբերի դեպքերի գործով այսօրվա նիստում հայտարարեց ամբաստանյալ, «Ցեղակրոն» կուսակցության առաջնորդ Շանթ Հարությունյանը:

Ռուսաստանը, թույլ չտալով Հայաստանին ստորագրել եվրոասոցացման պայմանագիրը, մեկուսացրել է Հայաստանն ու զրկել երկիրը միջազգային, մասնավորապես՝ եվրոպական քաղաքական աջակցությունից:

Քաղաքական մեկուսացման մաս է կազմում նաև ԵՎՐԱԶԵՍ-ի գործընթացը: Դիվերսանտների բացահայտումը, ըստ Շ.Հարությունյանի, նպատակ ունի քողարկել Մոսկվայից Հայաստան գործուղված իրական դիվերսանտներին: Շանթ Հարությունյանն այս ընդհանուր շղթայի մեջ է դիտում նաև գործարար Լևոն Հայրապետյանի ձերբակալությունը:

Ամբաստանյալ Ավետիս Ավետիսյանը հայտարարեց, որ գործով ամբաստանյալները քաղաքական հալածյալներ են և գտնվում են գերության մեջ: Իրենք Գարեգին Նժդեհի գաղափարակիցներ են, դուրս են եկել արժեքների հեղափոխության՝ փրկելու համար կործանման եզրին հայտնված երկիրն ու ժողովրդին:

Ամբաստանյալ Սևակ Մնացականյանը խոսեց արդարության ու անարդարության մասին, մասնավորապես՝ մարդկանց շահագործման մասին. մարդիկ շահագործվում են ոչ միայն տարվա 11 ամիսներին, այլև՝ արձակուրդի ընթացքում և «պետությունը ոչ մի բան չի անում դրա դեմ»: «Քանի դեռ կա անտարբերություն, Հայաստանում լինելու է անարդարություն»,- ասաց նա:

«Երեկ Վոլոդյա Ավետիսյանը, այսօր՝ մենք, իսկ վաղը դատապարտվելու է ժողովուրդը»: Ամբաստանյալը քննադատություն հնչեցրեց «փուչիկ» հանդիսացող ազգային մտավորականության հասցեին, որը կրիայի պես փակվել է իր պատյանի մեջ՝ այն դարձնելով միաժամանակ իր ծննդավայրն ու գերեզմանը: Այսպես շարունակվելու դեպքում 22-րդ դարը կլինի առանց հայ տեսակի ու առանց պետականության:

Ամբաստանյալ Արմեն Հովհաննիսյանը պահանջեց, որպեսզի իրենց նկատմամբ դադարեցվի «քրեական հետապնդումը» և պատասխանատվության ենթարկվի «սրբապիղծ կառավարությունը»:

Այսօրվա դատական նիստում ավարտվեց նախորդ դատական նիստում սկսված տուժող ոստիկան Գեղամ Խաչատրյանի հարցաքննությունը:

Դատարանում հրապարակված նրա նախաքննական ցուցմունքում մասնավորապես նշվում էր, որ Շահեն Հարությունյանն իրեն բարձրախոսով հարվածել է, ինքն ուժեղ ցավ ու գլխապտույտ է ունեցել, ապա հետապնդել է Շահենին ու բռնել: Ըստ տուժողի՝ ինքը հետագայում է իմացել, որ Շահենն անչափահաս է:

Պաշտպանական կողմը բարձրացրեց նախաքննական ու դատաքննական ցուցմունքների՝ տեսանյութին անհամապատասխանության հարցը: Այն հարցին, թե դրանցից  որն է հավաստի համարում, տուժողը հայտարարեց՝ մեկը մյուսին չի հակասում:

Այսօր դատարանն ավարտեց նաև տուժող ոստիկան Պետրոս Հայրապետյանի հարցաքննությունը: Նա դեպքերի ընթացքում ստացել է հարված քունքի շրջանում ու շուրջ մեկ շաբաթ գտնվել հիվանդանոցում:

Հաջորդ դատական նիստում կհարցաքննվեն դատակոչի ցուցակով հաջորդ 4 տուժողները:

Փաստինֆո

Ղեկավարվելով Հայաստանի Հանրապետության Սահմանադրության 55-րդ հոդվածի 5-րդ կետով և հիմք ընդունելով «Հայաuտանի Հանրապետության քննչական կոմիտեի մասին» Հայաuտանի Հանրապետության օրենքի 20-րդ և 51-րդ հոդվածների 1-ին մասերը` Սերժ Սարգսյանը որոշել է Աղվան Հովսեփյանին նշանակել Հայաստանի Հանրապետության քննչական կոմիտեի նախագահ: Այս մասին տեղեկանում ենք ՀՀ Նախագահի աշխատակազմի լրատվական ծառայության տարածած հաղորդագրությունից։

ԼՂՀ իրավապահ մարմինների կողմից որոնողական միջոցառումների արդյունքում Շահումյանի շրջանի նախկին Շապլար գյուղի մոտակայքում հայտնաբերվել է 2014թ. հուլիսի 04-ից անհայտ կորած` Շահումյանի շրջանի Նոր Էրքեջ գյուղի բնակիչ, 1997թ. ծնված Սմբատ Ցականյանի դիակը, որի մարմնի վրա, ըստ դատաբժշկական փորձաքննության եզրակացության, առկա են բազմաթիվ հրազենային վնասվածքներ:

Նախաքննությամբ ձեռք բերված տվյալների համաձայն, Սմբատ Ցականյանը առևանգնվել է զինված դիվերսիոն-հետախուզական և լրտեսական գործողություններ իրականացնելու նպատակով ԼՂՀ տարածք ապօրինի ներթափանցած` Ադրբեջանի Հանրապետության քաղաքացիներ Շահբազ Գուլիևի (ծնվ. 1968թ.), Դիլհամ Ասկերովի (ծնվ. 1960թ.) և ձերբակալման պահին ԼՂՀ իրավապահ մարմինների համապատասխան ստորաբաժանումներին դիմադրություն ցուցաբերած և տեղում ոչնչացված` նախաքննությամբ ինքնությունը չպարզված անձի կողմից:

Ս. Ցականյանի սպանության փաստով հարուցված քրեական գործը 17.07.2014թ. ուղարկվել է ԼՂՀ Ազգային անվտանգության ծառայությունում 09.07.2014թ. հարուցված թիվ 341001.14 քրեական գործին կցելու և մեկ վարույթում նախաքննությունը շարունակելու համար: Այս մասին տեղեկացնում են ԼՂՀ գլխավոր դատախազությունից:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը 6 տարվա ազատազրկման է դատապարտել պահեստազորի գնդապետ Վոլոդյա Ավետիսյանին:

Նշենք, որ գործով մեղադրող Հենրիկ Պապիկյանը միջնորդել էր ամբաստանյալին դատապարտել 6,5 տարվա ազատազրկման։

Քաղաքացի Արմեն Հ-ն հաղորդում է տվել այն մասին, որ 2014թ. հուլիսի 1-ի լույս 2-ի գիշերը ՀՀ ոստիկանության Շենգավիթի բաժնի դիմաց ոստիկանության աշխատակիցն իրեն ենթարկել է բռնության` բռունցքով հարվածել է կրծքավանդականին, պատճառելով ուժեղ ցավ:
Քաղաքացի Արմեն Հ-ի հաղորդման հիման վրա ՀՀ հատուկ քննչական ծառայությունում նախապատրաստված նյութերով` ՀՀ քրեական օրենսգրքի 309-րդ հոդվածի 2-րդ մասի հատկանիշներով հարուցվել է քրեական գործ:
Կատարվում է նախաքննություն:

«Առավոտ» թերթի լրագրող Ռուզան Մինասյանը 4-րդ անգամ է ներկայանում Կենտրոն և Նորք-Մարաշ վարչական շրջանների ընդհանուր իրավասության դատարան՝ գործարար համբավի պաշտպանության համար դատարան դիմած առողջապահության նախարարության թիվ 3 կլինիկական հիվանդանոցի հայցով:

Դատավոր Ալեքսեյ Սուքոյանն այսօրվա նիստը հետաձգեց դարձյալ պատասխանողի՝ իրավաբան Ռուբեն Այվազյանի (լուսանկարում) բացակայության պատճառով: Դատարանը նրան պատշաճ ձևով ծանուցել էր, սակայն նա չէր ներկայացել դատարան: Ուշադրության արժանի էր այն, որ փոստային բաժանմունքից ստացված ծանուցագրում գրված էր, թե նա բացակայում է հանրապետությունից:

Սակայն, ինչպես նման դեպքերում է լինում, դատարանը չունի մեխանիզմներ այդ հանգամանքը ստուգելու համար:

Առողջապահության նախարարության թիվ 3 կլինիկական հիվանդանոցի ներկայացուցիչն է ՀՀ փաստաբանների պալատի անդամ Մուրադ Ասրյանը:

Ըստ հայցվորի, պատասխանողը` իրավաբան Ռուբեն Այվազյանը, 2012թ. մայիսի 22-ին «Վարկած» ակումբում հրավիրված մամուլի ասուլիսի ժամանակ հայտնել է, որ նշյալ բուժհիմնարկում իր հորը՝ ճարտարագետ, «Կալաշնիկով» ինքնաձիգի փամփուշտի արտադրության ավտոմատ հոսքագծի նախագծող Լև Այվազյանին մայիսի 12-ին պատշաճ բժշկական օգնություն ցույց չտալով՝ «առանձնապես դաժանությամբ սպանել են»:

Նշենք, որ 2012թ. մայիսի 22-ին այլ լրատվամիջոցների հետ դատարան հրավիրված լրագրող Ռուզան Մինասյանը լուսաբանել է «Վարկած» ակումբում հրավիրված մամուլի ասուլիսը:

Մեր տեղեկություններով, այսօր ծանուցագրով դատարան էր հրավիրվել նաև «Վարկած» կայքի պատասխանատու Ռուզան Ավոյանը, որը, սակայն, դատարան չէր ներկայացել:

Հաջորդ դատական նիստը նշանակվեց օգոստոսի 13-ին:

Aravot.am