Երեւանի «Օջախ» ռեստորանային համալիրում այսօր՝ նոյեմբերի 26-ի գիշերը դանակահարություն է տեղի ունեցել:

Shamshyan.com-ի փոխանցմամբ, «Օջախ» ռեստորանային համալիրից Աբովյանի բժշկական կենտրոն է տեղափոխվել Չարենցավան բնակիչ 22-ամյա Տիգրան Շահգալդյանը: Վերջինս ոտքերի եւ նստատեղի հատվածում ունի սուր-կտրող-ծակող առարկայից ստացած հետքեր:

Շահգալդյանը Չարենցավանի քաղաքապետ Հակոբ Շահգալդյանի տղան է եւ Կոտայքի նախկին մարզպետ Կովալենկո Շահգալդյանի թոռը:

Աղբյուրի փոխանցմամբ, կասկածներ կան, որ նրան դանակարահել է Սյունիքի նախկին մարզպետ` «Լիսկա» մականվամբ Սուրիկ Խաչատրյանի տղան, ով մինչ աղջիկների եւ վիրավորի հետ «Օջախ» ռեստորանային համալիր ժամանելը եղել է Ծաղկաձորում:

Փաստի առթիվ ոստիկանության Կոտայքի բաժնի հետաքննչական բաժանմունքում նյութեր են նախապատրաստվում:

Երեկ կառավարության նիստից առաջ միջադեպ տեղի ունեցավ կառավարության շենքի գլխավոր մուտքում: Բանակում խաղաղ պայմաններում զոհված զինծառայողներից մեկի մայրը՝ որդու նկարը ձեռքին փորձում էր մուտք գործել շենք, սակայն անվտանգության աշխատակիցները թույլ չտվեցին: Մոտ 5 րոպե քաշքշուկից հետո զինծառայողի մորը թույլ չտվեցին ներս մտնի, սակայն այդ ընթացքում մահացած որդու նկարը քաշեցին, որն ավելի վրդովեցրեց մորը:

Առավել մանրամասն՝ Armtimes.com-ի տեսանյութում:

lragir.am-ի զրուցակիցն է «Սասնա ծռեր» խմբի անդամներ Կյուրեղյան եղբայրների հայրը՝ Արմենակ Կյուրեղյանը։

Պարոն Կյուրեղյան, Սասնա ծռերը երեկ հայտարարություն էին տարածել, որտեղ նշել էին, որ Սասնա ծռեր հիմնադրամի գործունեությունն այլևս ոչ միայն նպատակահարմար չէ, այլև վնասակար է ազատագրական պայքարի համար: Այս հայտարարությունից առաջ էլ Դուք և Նանոր Բարսեղյանը դուրս եկաք հիմնադրամից։

Երբ ես մտել եմ որպես հոգաբարձուների խորհրդի անդամ և նախագահ, վստահ եմ եղել, որ այդ անունը կապված է անմիջապես «Սասնա ծռեր» խմբավորման տղաների հետ, այսինքն՝ իրենց հակառակ ոչ մի գործողություն չի լինելու։ Բայց հետո պարզվում է, որ այդ անունը կապ չունի նրանց հետ։ Եթե հենց սկզբից կապ չունենար, ես ոչ էլ կընդգրկվեի հիմնադրամում։

Եվ ինչո՞ւ անհրաժեշտություն առաջացավ, որ «Սասնա ծռերը» բանտից կոչով հանդես գան։ Ոչ թափանցիկության խնդի՞ր էր առաջացել։

Ես առայժմ սպասում եմ որոշ տվյալների, ու երբ ստանամ դրանք` հայտարարություն կանեմ։ Ֆելիքս Հայրապետյանն արդեն հայտարարեց, որ ես սկզբունքային տարաձայնություններ ունեմ թափանցիկության, հիմնադրամի անվտանգության և ընդհանրապես կառավարման մեթոդների հարցում։ Իրոք, ինքը ճիշտ է ասել, բայց մեկնաբանությունները, որ արել է այդ հայտարարությունից հետո, դա միայն մեկնաբանություններ են։ Ավելի մանրամասն պարզաբանումներով ես վերջնական կոնկրետ տվյալներ ստանալուց հետո կհայտնեմ։ Հիմնադրամի հոգաբարձուների խորհրդում իմ գտնվելու ժամանակահատվածի համար ես իմ ամփոփ եզրակացություն-հայտարարությունը կանեմ։  Հիմա դեռ այդ ամբողջն ամփոփված չէ։

Վերջերս «Սասնա ծռերը» բանտից ու ընդհատակից հանդես եկան կոչ-հայտարարությամբ, որտեղ նորից պայքարի կոչ արեցին և նշեցին, որ կառաջնորդեն ժողովրդին։ Նախընտրական շրջանում այս գործողությունները, այդ հայտարարությունները որքանո՞վ են ակտուալ։ Արդյոք դրանցով ինչ-որ փոփոխությունների հասնելու հույս կարող է լինել։

Համախմբումը տեղի է ունենում այն մարդկանց, այն քաղաքական ուժի կամ խմբի շուրջ, երբ այդ մարդիկ իրենց անձնական օրինակով ցույց են տալիս, որ նվիրված են իրենց բարձրաձայնած գաղափարներին և պատրաստ են այդ գաղափարների համար շատ բան զոհաբերել՝ հանուն հայրենիքի, հանուն հայ ժողովրդի և մեր պետականության։ «Սասնա ծռերը» դա ապացուցեցին, որ պատրաստ են անգամ իրենց կյանքը դնել հայրենիքի համար։ Իմ կարծիքով, չկա մեկ ուրիշ ուժ, որը կարող է համախմբում իրականացնել։

Քաղաքական ուժերն ու գործիչները պատրաստվում են խորհրդարանական ընտրություններին, դաշինքներ են փորձում ստեղծել՝ հաղթանակի հասնելու համար։ Ձեր կարծիքով, դա սպառվա՞ծ տարբերակ է, թե դաշինքներով հնարավոր է ինչ-որ արդյունքի հասնել։

Ինչքան էլ դաշինքներ ստեղծեն, ինչքան էլ քաղաքական ուժերը միավորվեն ու փորձեն այս ընտրական օրենսգրքով իշխանություն վերցնել, իմ կարծիքով չի ստացվի, որովհետև դա արդեն բազմիցս փորձված տարբերակ է։ Քանի՞ դեպքում է եղել, որ միավորվել են ու ոչինչ չի ստացվել, որովհետև պետության գործող կառուցվածքն այնպիսին է, որ ցանկացած օրինախախտում, ցանկացած ապօրինություն, որը տեղ է ունենում, այդ թվում ընտրությունների ժամանակ, ուղարկվում է դատարան, իսկ դատարանը ենթարկվում է հենց այդ ապօրինություն անողներին, ընդ որում ենթարկվում է սահմանադրությամբ։ Այսինքն՝ իշխանության թևերի տարանջատում չկա։ Ինչպե՞ս կարող է այս պայմաններում մարդը հաղթել, ի՞նչ ճանապարհով։ Այս իրավիճակում ընտրությունների գնալով հաջողության հասնել հնարավոր չէ։ Այլ բան, որ հեղափոխական վերելքն այնքան մեծ լինի, ամբողջ ժողովուրդն այնքան կանգնած լինի, որ արդեն իշխանությունը դե ֆակտո անցած լինի ժողովրդին, այդ դեպքում ընտրությունները դառնում են ֆիկտիվ բան։Ընդհանրապես, մեր տիպի երկրներում, որտեղ դիկտատուրա է, ընտրություններով իշխանություն փոխելն անհեթեթություն է, պատմության մեջ նման բան չի եղել, որ դիկտատորական երկրներում ընտրություններով իշխանություն փոխվի։ Միշտ հեղափոխություն է տեղի ունեցել, կամ իշխող ուժը ժամանակի ընթացքում հասնելով գիտակցության, ինքն է հանձնել իշխանությունը, ասելով՝ լավ, հերիք է։ Ինչպես ասենք Պինոչետը հանձնեց իշխանությունը, հայտարարեց ազատ ընտրություններ, տվեց իշխանությունն ու գնաց։ Մնացած բոլոր նմանատիպ երկրներում հույս ունենալ, որ ընտրություններից հետո իշխող ուժը կզիջի իր տեղը, միամտություն կլինի։ Ուղղակի ներկայիս քաղաքական ուժերը երևի թե, իրենց պայքարի ձևը տեսնում են այնպես, որ գնան խորհրդարանում տեղեր զբաղեցնեն և այնտեղից քննադատեն իշխանություններին։ Նման Հայաստանը կոնկրետ ինձ չի բավարարում։

Նշվում է, որ «Սասնա ծռերի» տղաներից մի քանիսին սպառնում է ցմահ ազատազրկում։

Ես ենթադրում եմ, որ դա արվում է նրա համար, քանի որ նորից առաջ է քաշվել ազատագրված տարածքների հանձնման հարցը, և անպայման պետք է խստացումներ լինեն, որպեսզի դրսում գտնվող մարդիկ տեսնեն, թե նման հարցեր բարձրացնելու դեպքում ինչ ապագա է սպասում իրենց։ Անպայման պետք է այդ խստացումներն անեին, իրոք այդ խնդիրը կա, որ խոսում են 7 շրջանները հանձնելու մասին։ Ես կարծում եմ, որ ոչ մի ուժ կամ իշխանություն նման քայլ անելուց հետո չի մնա։ Այսինքն նա կլինի հայ ժողովրդի կենսական շահերին ամենամեծ հարվածողը, որովհետև Արցախի անվտանգությունն անմիջապես կհավասարվի զրոյի։ Պատերազմը նրանով չի, որ շրջանները հանձնեցին, այլևս պատերազմ չի լինի։ Եթե թշնամին կարողանում է, պատերազմ է սկսում ու ոչնչացնում քեզ։ Հովհաննես Թումանյանի կկվի պատմությունը պետք է հիշենք, որ մի շրջան տվեցին՝ հաջորդն է  ուզելու։ Հատկապես Ալիևի պարագայում, երբ ապրիլյան պատերազմում ծեր մարդկանց մարմիններն էին խոշտանգել։ Ինչպես կարելի է հավատալ նրանց կամ ինչ-որ մեկի երաշխիքին, որ ազատագրված տարածքները հանձնելով պատերազմ չի լինի։ Իսկ ի՞նչ են ասելու մեր հաջորդ սերունդները, 50-100 տարի հետո մեր պատմությունն ինչ է գրելու դրա մասին՝ որ վախեցավ այդ սերունդը և արյունով ազատագրված տարածքները նորից տվեց թշնամուն զուտ այն բանի համար, որ իրեն վախեցրին պատերազմո՞վ։ Այսինքն՝ վախեցա՞ն։ Դրանից հետո մեր սերունդը ամոթից ո՞ր ծակն է մտնելու։

lragir.am

Նոյեմբերի 23-ին արտակարգ դեպք է տեղի ունեցել Երևանում։ Ժամը 21։00-ի սահմաններում ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել, որ դիմակավորված 2 անձինք ներս են մտել Արաբկիր 53 փողոցի թիվ 5 տուն, որտեղ կապել են տանտիրոջ ոտքերը և ավազակային հարձակում կատարելով՝ դիմել փախուստի։

Ինչպես հայտնում է ֆոտոլրագրող Գագիկ Շամշյանը, օպերատիվորեն նշված վայր են ժամանել Երևանի ոստիկանապետ, ոստիկանության գնդապետ Սարգիս Մարտիրոսյանը, քրեական հետախուզության գլխավոր վարչության պետ, ոստիկանության գնդապետ Սամվել Ասատրյանը, կազմակերպված հանցավորության դեմ պայքարի գլխավոր վարչության պետի առաջին տեղակալ, ոստիկանության գնդապետ Ալիկ Մարգարյանը, ոստիկանության Արաբկիրի բաժնի պետ, ոստիկանության գնդապետ Արթուր Մկրտչյանը՝ օպերատիվ խմբով։

Ժամանել են նաև Հայաստանի քննչական կոմիտեի Երևանի քննչական վարչության Արաբկիր վարչական շրջանի քննչական բաժնի քննիչները՝ բաժնի պետի տեղակալ Լաչինյանի գլխավորությամբ։ Ֆոտոլրագրողը հայտնում է նաև, որ տեղում աշխատել են նաև ոստիկանության փորձաքրեագետն ու շնավարժը։

Պարզվել է, որ նույն օրը, ժամը 20։40-ի սամաններում դիմակավորված անձինք, տեսնելով, որ նշված տան դուռը բաց է, մուտք են գործել ներս, որոնցից մեկը՝ զինված ատրճանակով, բռնություն է կիրառել այնտեղ գտնվող Գայանե Բալյուզյանի նկատմամբ՝ ատրճանակը դնելով քունքի վրա, իսկ մյուս ստահակը իր մոտ եղած երկաթե ինչ-որ գործիքով հարվածել է նրա եղբոր՝ 47-ամյա Հովհաննես Բալյուզյանի մարմնի տարբեր մասերին և պահանջել գումար, ոսկյա, արծաթյա զարդեր։ Ֆոտոլրագրողը հայտնում է նաև, որ ճիվաղները, աղմուլ լսելով, իրենց կամքից անկախ ոչինչ չհափշտակելով՝ դիմել են փախուստի։

Ֆոտոլրագրողի տեղեկություններով՝ նոյեմբերի 24-ին ոստիկանության քրեական հետախուզության գլխավոր վարչության աշխատակիցները ստացված օպերատիվ տվյալներն իրացնելով՝ Էրեբունի վարչական տարածքից ավազակային հարձակում կատարելու կասկածանքով գլխավոր վարչություն են բերման ենթարկել Երևան քաղաքի Նիզամու փողոցի բնակիչ, 23-ամյա Սուրեն Կիրակոսյանին և Էրեբունու փողոցի բնակիչ, 19-ամյա Միքայել Մինասյանին։

Գ. Շամշյանի տեղեկություններով՝ Հաղթանակ զբոսայգում հայտնաբերվել է ստահակների կողմից թաքցված դիմակն ու ձեռնոցները։ Փաստի առթիվ Արաբկիրի քննչական բաժնում քննիչ Խալաթյանի կողմից հարուցվել է քրեական գործ։ Մ. Մինասյանն ու Ս. Կիրակոսյանը ձերբակալվել են։

shamshyan.com

Երեւանի Խորենացի փողոցում հուլիսի քսանին զանգվածային անկարգություններ կատարելու մեջ մեղադրվող` Արշակ Սադոյանի որդու` Արեգ Սադոյանի համար դատախազը պահանջեց երեք տարվա ազատազրկում, սակայն միջնորդեց պատիժը պայմանականորեն չկիրառել:

Գործով մյուս ամբաստանյալի` Ռաֆայել Կարագյոզյանի համար էլ մեղադրող Պետրոսյանը պահանջեց երեք տարվա ազատազրկում:

«Ծանրացնող կամ մեղմացնող հանգամանքներ չկան, սակայն կան բնութագրեր, որոնցով դրական են գնահատվում ամբաստանյալները: Ռաֆայել Կարագյոզյանը ծառայել է ոստիկանության զորքերում եւ կարող էր լինել հակառակ կողմում, սակայն բռնություն է գործադրել, հետեւաբար խնդրում եմ նրան մեղավոր ճանաչել եւ դատապարտել երեք տարվա ազատազրկման: Ինչ վերաբերում է Արեգ Սադոյանին, նա քաշել է ոստիկանի վահանը, սակայն հաշվի առնելով, որ նա միայն դա է արել, խնդրում եմ նրան նույնպես մեղավոր ճանաչել եւ դատապարտել երեք տարվա ազատազրկման, սակայն պատիժը պայմանականորեն չկիրառել»,- ասաց մեղադրողը:

Տուժողի ներկայացուցիչները միացան մեղադրողին:

Նշենք, որ այսօր` նոյեմբերի 24-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում դատաքննությունն անցկացվեց արագացված կարգով, քանի որ նման միջնորդություն ներկայացրին ամբաստանյալները` հայտարարելով, որ իրենց առաջադրված մեղադրանքներն ընդունում են:

Ըստ մեղադրական եզրակացության` Ռաֆայել Կարագոզյանը 2016թ. հուլիսի 20-ին Երևանում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով և վնասելով արտահայտված  զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ոտքով բազմաթիվ հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշել և փորձել է խլել մեկ այլ ոստիկանության աշխատակցի վահան: Արեգ Սադոյանը նույնպես ոստիկանության աշխատակիցների նկատմամբ բռնություն գործադրելու մեջ: Երիտասարդներին մեղադրանք է առաջադրվել Քրեական օրենսգրքի 225-րդ հոդվածի 2-րդ մասով: Նրանք կալանավորված են:

 NEWS.am

«Հետք»-ը նամակ է ստացել զորակոչային տարիքը լրացած քաղաքացիների նկատմամբ հայտարարվող հետախուզման մասին:

«Հարգելի խմբագրություն

Խնդիրը, որի վերաբերյալ ուզում եմ բարձրաձայնել Ձեր լրատվական ծառայության միջոցով, վերաբերվում է զորակոչային տարիքը լրացած երիտասարդներին, որոնց թիվը 17 հազարից ավելի է, և որոնք մինչև առ այսօր դեգերում են Երկիր մոլորակի աշխարհագրական տարբեր վայրերում: Դեռ ավելին. նրանք բնութագրվում են որպես պարտադիր զինվորական ծառայությունից խուսափողներ, և նրանց բոլորի նկատմամբ անխտիր կարգով ձևակերպվել և հայտարարվել է հետախուզում: Սա իբրև իրավաբանորեն հիմնավորված դրույթ է գոյություն ունեցող օրենքի պահանջներից ելնելով: Սակայն մերօրյա երիտասարդներին նման վերաբերմունքի արժանացնելը և նրանց որպես պարտադիր զինվորական ծառայությունից խուսափողներ պիտակավորելը, ըստ իս, բոլորովին հեռու է իրական պատկերը ռեալ գնահատելու և բնութագրելու իրողությունից:

Որևէ մեկին չի հետաքրքրում, թե այդ երիտասարդները ինչու և ինչպես են հայտնվել աշխարհագրական տարբեր կետերում՝ թողնելով հայրենիքը և նրա նկատմամբ ունեցած պարտականությունների կատարման սուրբ առաքելությունը: Միթե նրանք չեն գիտակցում, որ մենք շրջապատված ենք հարևան թշնամի պետություններով: Ես կարող եմ հակադարձել և պնդել, որ մերօրյա երիտասարդները իրենց մտավոր և ֆիզիկական ունակություններով, նվիրվածությամբ, հայրենասիրությամբ, անձնազոհությամբ և այլ, և այլ որակական հատկանիշներով մի քանի աստիճան բարձր են թե նախորդ սերնդի իրենց հասակակիցներից և թե այն անձանցից, որոնք մշակել, ընդունել և կիրառում են օրենք կոչվող այդ դրույթները, որոնցով անգամ արգելափակվում է մեր երիտասարդների վերադարձը հայրենիք:

Առանց ուսումնասիրելու, թե ով ինչ հանգամանքներում և ինչ պատճառներով է հայտնվել երկրագնդի տարբեր լայնություններում, բոլորի նկատմամբ մասսայական ձևակերպելով պարտադիր զինվորական ծառայությունից խուսափելը որպես քրեորեն հետապնդվող արարք՝ նրանց նկատմամբ հայտարարելով հետախուզում՝ դրանով համարելով իրենց պաշտոնեական պարտականությունները կատարած և ավարտած: Այնինչ իրականում այդ երիտասարդների մի զգալի հատված, իրենց ընտանիքների ծանր և ծանրագույն պայմաններից դրդված, բռնել են արտագնա աշխատանքի ճանապարհը, մյուս մասը ուսման նպատակով մեկնել է արտերկիր՝ շարունակելու և խորացնելու իր գիտելիքները, երրորդ հատվածը ընդգրկվել է տարբեր միջազգային ծրագրերի իրականացման գործընթացների մեջ և այլն, և այլն: Անհատապես ուսումնասիրելու փոխարեն բոլորին մեկ կնիքով պիտակավորում են որպես պարտադիր զինվորական ծառայությունից խուսափողների և վերջ: Իհարկե, նրանց մեջ կլինեն նաև պարտադիր զինվորական ծառայությունից խուսափողներ: Բայց դա չի նշանակում, որ բոլորին մեկ արշինով պետք է չափել:

Այսօր ունենք այնպիսի շնորհալի երիտասարդներ, որոնք իրենց հայրենասիրությամբ, անձնվիրությամբ և նվիրվածությամբ անում են շատ ավելին, քան ներկայիս իշխանավորները միասին վերցրած: Եվ սա հեղինակավոր և բանիմաց մարդկանց գնահատականներն են: Նույնը չես կարող ասել մերօրյա իշխանավորների մասին, որոնք անտարբերության են մատնել թվարկածս 17 հազար երիտասարդների ճակատագրերը և որևէ քայլ չեն ձեռնարկում այդ 17 հազար երիտասարդներին հայրենիք վերադարձնելու ուղղությամբ:

Երիտասարդի զորակոչային տարիքը լրացել է, այլևս իրավունք չունի ծառայության մեկնելու, ինչպես նաև հայրենիք վերադառնալու խնդիրն է վտանգված, քանի որ նրա նկատմամբ հետախուզում է հայտարարված: Դրա հետ մեկտեղ իրավունք չունի նաև գոնե ֆինանսապես փոխհատուցելու իր չծառայած տարիների համար, որովհետև օրենքը վերաբերվում և տարածվում է մինչև 01.05.1988 թվականին ծնվածների վրա, որը գործել է մինչև 01.05.2015 թվականը: Վերջ: Թե 2015 թվականի մայիսի մեկից հետո զորակոչային տարիքը լրացած երիտասարդները ինչքան ժամանակ պետք է դեգերեն մոլորակի աշխարհագրական տարբեր լայնություններում, առ այսօր անհայտ է բոլորի համար:

Արտագաղթի նման պայմաններում արտագաղթողների թիվը 17 հազարով ավելացնելը բացարձակ չի խոսում այն մասին, որ մեր հանրապետությունը մտահոգված է իր քաղաքացիների ճակատագրով: Իսկ մենք՝ քաղաքացիներս, առանց մի որևէ զորակոչի զորավիգ ենք կանգնում մեր հայրենիքի պաշտպանությանը ցանկացած ոտնձգությունների դեպքում՝ առանց սպասելու որևէ մեկի հրավերին կամ կանչին և առանց հաշվի առնելու ներքաղաքական խժդժությունները և արտաքին ազդակները; Ըստ իս՝ 17 հազար երիտասարդի հայրենիք վերադառնալու դեպքում ինչ-որ չափով կլուծվեն ոչ միայն ժողովրդագրական խնդիրները, այլև նրանք հնարավորություն կունենան իրենց անմիջական նպաստը բերելու հայրենիքի տնտեսության զարգացմանը և հզորացմանը; Ամփոփելով ասելիքս՝ հույսով եմ, որ նյութը հրապարակելուց հետո իշխանությունները այս հարցին հրատապ լուծում կտան:

Հայաստանի Հանրապետության խնդիրներով մտահոգ քաղաքացի

Ռ. Այվազյան»:

Բաց նամակ «Սասնա Ծռեր» հիմնադրամի հիմնադիր Ֆելիքս Հայրապետյանին.

Հարգելի պարոն Հայրապետյան

Մենք հաստատում ենք, որ Ձեր հիմնադրած «Սասնա Ծռեր» հիմնադրամը անցած ամիսների ընթացքում իր կատարած աշխատանքով անուրանալի և երախտագիտության արժանի ներդրում է կատարել ինչպես մարդասիրական, այնպես և Հայաստանի ազատագրման գործին նպաստելու առումներով:

Այդուհանդերձ, տարակուսանքով և ցավով տեղեկացանք, որ «Սասնա Ծռեր» հիմնադրամի հոգաբարձուների խորհրդի որոշ անդամներ քաղաքական չեզոքություն չեն պահպանում և կատարում են «Սասնա Ծռեր» խմբավորման ապստամբական – ազատագրական գաղափարը և գործողությունները մերժող քայլեր, միևնույն ժամանակ փորձելով «Սասնա Ծռեր» խմբավորման ճանաչումն ու հեղինակությունն օգտագործել նրա ծրագիրը չընդունող քաղաքական ուժի շահերը սպասարկելու համար:

Զուգահեռաբար, նրանք հոգաբարձուների խորհրդում խախտել են միջանձնային հարաբերությունների էթիկան, ինչպես նաև ձգտել են կամք պարտադրել խորհրդի այն անդամներին, ովքեր «Սասնա Ծռեր» խմբավորման և նրա մարտիկների նկատմամբ հոգեբանական և գաղափարական առումով դրական վերաբերմունք ունեն, ինչի պատճառով խորհրդում ստեղծվել է ոչ աշխատանքային մթնոլորտ և նրանցից երկուսն արդեն հեռացել են այնտեղից:

Նկատի ունենալով վերոնշյալը, վստահաբար կարող ենք եզրակացնել, որ հիմնադրամի նման գործունեությունն այլևս ոչ միայն նպատակահարմար չէ, այլև վնասակար է ազատագրական պայքարի համար:

Ուստի, առաջնորդվելով Հայաստանի ազատագրման պայքարի գերակայություններով, ինչպես նաև նպատակ ունենալով կանխել նրա աջակիցների շրջանում հնարավոր պառակտումը, առաջարկում ենք սահմանափակվել կատարած աշխատանքով և դադարեցնել «Սասնա Ծռեր» անվանմամբ հիմնադրամի գործունեությունը:

Եթե ցանկություն ունեք զուտ մարդասիրական նկատառումներով շարունակելու ձեր նախաձեռնությունը, խնդրում ենք այն իրագործել այլ անվանում ունեցող հիմնադրամի միջոցով:

Հուսով ենք, որ կընդառաջեք մեր առաջարկությանը և այն իրագործելու նպատակով կօգտագործեք օրենքի, հիմնադրամի կանոնադրության և Ձեր անձնական հեղինակության ու ազդեցության ամբողջ ռեսուրսը՝ դրանով իսկ նպաստելով պայքարի հաջորդ փուլին սահուն կերպով անցնելուն:

Ըստ այդմ՝ «Սասնա Ծռեր» շարժման համակիրներին հորդորում ենք այլևս միջոցներ չտրամադրել հիմնադրամին, իսկ մեր հարազատներին՝ չդառնալ նրա շահառուն: Մենք առաջիկայում կառաջարկենք պայքարի նյութական աջակցության նոր ձևաչափեր և գործիքարան, որոնք ենթադրում են նաև դրամահավաքներ և ծառայելու են պայքարի բոլոր, այդ թվում՝ ռազմագերիների և քաղբանտարկյալների օգնության նպատակներին:

Հարգանքով և համագործակցության հույսով՝

Մխիթար Ավետիսյան՝ «Սասնա Ծռեր» խմբավորման շտաբի պետ

Պավել Մանուկյան՝ «Սասնա Ծռեր» խմբավորման շտաբի անդամ

Վարուժան Ավետիսյան՝ «Սասնա Ծռեր» խմբավորման շտաբի անդամ, խմբավորման խոսնակ

«Փաստինֆո»-ն տեղեկա ցրել էր, որ Սարի-թաղում թիվ 47 դպրոցի մոտ անչափահասի սպանության գործով նախաքննությունն ավարտվել է և գործն արդեն դատարանում է այն մակագրվել է Էրեբունի և Նուբարաշեն վարչական շրջանների ընդհանուր իրավասության դատարանի դատավոր Աննա Դանիբեկյանին:

Քիչ առաջ մեր տեղեկությունը հաստատեց նաև Քննչական կոմիտեն՝ տարածված հաղորդագրությամբ անդրադառնալով գործի մանրամասներին:

ՀՀ քննչական կոմիտեի ՀԿԳ քննության գլխավոր վարչությունում ավարտվել է մարտի 13-ին Սարի-Թաղում 16-ամյա տղայի սպանության դեպքի առթիվ հարուցված քրեական գործի նախաքննությունը: Այս մասին տեղեկացնում է Քննչական կոմիտեի լրատվական ծառայությունը:

Սարի թաղում անչափահասի սպանության գործը դատարանում է

Մարտի 13-ին ահազանգ էր ստացվել առ այն, որ Սարի-Թաղում գործող  թիվ 47 դպրոցի դիմաց տեղի է ունեցել վիճաբանություն, որի  ժամանակ Սարի-Թաղի 16-ամյա բնակիչը կրծքավանդակի առաջնային մակերեսին ստացել է կյանքի հետ անհամատեղելի՝ կտրած-ծակած թափանցող վնասվածք։ Եվս 5 անձ, տարբեր աստիճանի մարմնական վնասվածքներով, տեղափոխվել են բժշկական կենտրոն։

Դեպքի առթիվ հարուցվել է քրեական գործ՝ ՀՀ քրեական օրենսգրքի 3 հոդվածներով, որի նախաքննությունը, ՀՀ քննչական կոմիտեի նախագահի հանձնարարությամբ, իրականացվել է ՀՀ ՔԿ ՀԿԳ քննության գլխավոր վարչությունում:

Ձեռնարկված մեծածավալ քննչական և դատավարական գործողությունների արդյունքում բացահայտվել են դեպքի բոլոր հանգամանքները, շարժառիթը, առերևույթ հանցագործություն կատարած անձանց շրջանակը, անհատականցվել նրանցից յուրաքանչյուրի գործողությունները:

Նախնական քննության տվյալներով՝ մարտի 13-ին, Սարի-Թաղի անչափահաս բնակիչների միջև մի հարցի շուրջ թյուրընկալման պատճառով տեղի է ունեցել վիճաբանություն, որը հետագայում վերածվել է ծեծկռտուքի։  Ձեռք բերված ապացույցների համաձայն՝ ծեծկռտուքին մասնակցել են նաև Սարի Թաղի բնակիչներ Պետրոսյան եղբայրները (ծնված 1990, 1991 թթ.), որի ժամանակ էլ նրանցից  կրտսերը նախապես իր հետ վերցրած դանակով հարվածել է 16-ամյա տղայի սրտի շրջանին՝ պատճառելով կյանքի հետ անհամատեղելի մարմնական վնասվածք: Վերջինս ստացած վնասվածքից մահացել է։ Նույն միջադեպի ժամանակ դանակի գործադրմամբ վնասվածքներ են պատճառվել նաև այլ անչափահասների՝ պատճառելով միջին և ծանր մարմնական վնասներ:

Մինչդատական վարույթում ձեռք բերված բավարար ապացույցների համակցությամբ՝ կրտսեր եղբորը մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասի և 113-րդ հոդվածի 2-րդ մասի 3-րդ կետի հատկանիշներով, իսկ ավագ եղբորը՝ ՀՀ քրեական օրենսգրքի 112-րդ հոդվածի 1-ին մասի և 113-րդ հոդվածի 2-րդ մասի 3-րդ կետի հատկանիշներով:

Քրեական գործը՝ մեղադրական եզրակացությամբ, ուղարկվել է դատարան:

Կրթական ոլորտի վերաբերյալ ՎՊ հաշվետվության ուսումնասիրման արդյունքում ՀՀ գլխավոր դատախազությունում հարուցվել է քրեական գործ: Այս մասին հայտնում է ՀՀ գլխավոր դատախազության կայքը։ 

Նշվում է, որ ՀՀ գլխավոր դատախազության պետական շահերի պաշտպանության վարչության կողմից ՀՀ վերահսկիչ պալատի հրապարակած ընթացիկ հաշվետվության տվյալների հիման վրա իրականացրած ուսումնասիրությամբ պարզվել է, որ «Կրթության որակ և համապատասխանություն» վարկային ծրագրի շրջանակներում ՀՀ կրթության և գիտության նախարարության «Կրթական ծրագրերի կենտրոն ծրագրերի իրականացման գրասենյակ» պետական հիմնարկի պաշտոնատար անձանց կողմից պայմանագրի կողմ հանդիսացող ՓԲԸ-ի, ՊՈԱԿ-ի, ինչպես նաև քաղաքացի Ա.Մ.-ի հետ 2014թ. ընթացքում կնքված պայմանագրերի կատարման ընթացքում կազմված աշխատանքների հանձնման-ընդունման ակտերում մտցվել են իրականությանը ակնհայտ չհամապատասխանող տվյալներ, ինչպես նաև հաստատվել պայմանագրի պայմաններին չհամապատասխանող հաշվետվություններ, ինչի արդյունքում իրականում չկատարված և խախտումներով կատարված աշխատանքների դիմաց նշված իրավաբանական և ֆիզիկական անձանց վճարված գումարներով պետությանը պատճառվել է առանձնապես խոշոր չափերի գույքային վնաս:

Փաստի առթիվ ՀՀ գլխավոր դատախազության պետական շահերի պաշտպանության վարչության դատախազի կողմից ՀՀ քրեական օրենսգրքի 308-րդ հոդվածի 1-ին մասի և 314-րդ հոդվածի հատկանիշներով հարուցվել է քրեական գործ, որի նախաքննությունը հանձնարարվել է ՀՀ քննչական կոմիտեին: