Ադրբեջանի ԱԳՆ-ի պաշտոնական ներկայացուցիչ Էլման Աբդուլաևը 1news.az-ին հաղորդել է, որ  ադրբեջանական դիվանագետների և պաշտոնական անձանց տեղաշարժերի մասին տեղեկատվություն չի տրվի: Այդ մասին:

«Հաշվի առնելով Հայաստանի նախագահի ագրեսիվ հայտարարությունները, մեր պաշտոնական անձանց և քաղաքացիների դեմ ուղղված ցանկացած սադրիչ գործողության պատասխանատվությունը կընկնի այդ երկրի ղեկավարության վրա», — նշել է նա:  Տեղեկատվության գաղտնիացման համար առիթ են հանդիսացել հատկապես  Հայաստանի նախագահ Սերժ Սարգսյանի խոսքերը` ասված երկրում հավատարմագրված ՄԱԿ-ի անդամ երկրների դիվանագիտական ներկայացուցչությունների և հանրապետությունում գործող միջազգային կառույցների ղեկավարների հետ արտակարգ խորհրդակցության ընթացքում:

Ադրբեջանում շարունակում են մեծարել հայ սպա Գուրգեն Մարգարյանի կացնահարած Ռամիլ Սաֆարովին:  Ադրբեջանի Պաշտպանության նախարարությունը մայորի կոչում շնորհելուց հետո Սաֆարովին է նվիրել  նոր բնակարան, ինչպես  նաև 8 տարվա ընթացքում կուտակված նրա աշխատավարձը: Այս մասին հայտնում է Salam News-ը:

ԱՄՆ նախագահ Բարաք Օբամանին  խորապես մտահոգել է Ռամիլ Սաֆարովի արտահանձման և ներում շնորհելու փաստը: ԱՄՆ Ազգային անվտանգության խորհրդի պաշտոնական ներկայացուցիչ Թոմի Վիթորը տարածել է հայտարարություն, որում ասվում է.

«Սաֆարովը խոստովանել էր հայկական բանակի սպա Գուրգեն Մարգարյանի` 2004թ. Բուդապեշտում կատարած սպանությունը, և այդ դաժան արարքի համար Հունգարիայում ցմահ ազատազրկման էր դատապարտվել:

Մենք մեր վրդովմունքն ենք հայտնում Ադրբեջանի իշխանություններին` Սաֆարովին ներում շնորհելու կապակցությամբ: Այդ քայլը հակասում է տարածաշրջանում լարվածությունը թուլացնելու և հաշտեցմանը նպաստելու ջանքերին: Միացյալ Նահանգները նաև պարզաբանում է պահանջում Հունգարիայից՝ Ռամիլ Սաֆարովին Ադրբեջանին հանձնելու իր որոշման կապակցությամբ»:

Ադրբեջանում շարունակում են հերոսացնել մարդասպան Ռամիլ Սաֆարովին: 1news.az-ը  վկայակոչելով Ադրբեջանի պաշտպանության նախարարությանը, տեղեկացրել է,  որ Ադրբեջանի պաշտպանության նախարար  Սաֆար Աբիևը  սեպտեմբերի 1-ին շնորհավորել է նրան վերադարձի կապակցությամբ և ադրբեջանական բանակի լեյտենանտ Ռամիլ Սաֆարովին մայորի կոչում շնորհել:

Բուդապեշտում հայ սպա Գուրգեն Մարգարյանին կացնահարած Ռամիլ Սաֆարովին ներում է  շնորհել Ադրբեջանի նախագահ Իլհամ Ալիևը: Տեղեկացնում է 1news.az-ը:

Ղեկավարվելով Ադրբեջանի Սահմանադրության 22-րդ մասի 109-րդ հոդվածով` երկրի նախագահն այսօր ստորագրել է 2006թ.-ի ապրիլի 13-ին Բուդապեշտում ցմահ ազատազրկված Ադրբեջանի քաղաքացի Ռամիլ Սահիբ օղլու Սաֆարովին (1977թ. ծնված) ներման արժանացնելու մասին որոշումը:

Սաֆարովի էքստրադիցիայի հարցերով զբաղվում էր ադրբեջանցի գործարար և Վլադիմիր Պուտինի համակուրսեցի Իլհամ Ռագիմովը:

 ԱԳՆ պաշտոնական ներկայացուցիչ Էլման Աբդուլաևը հայտարարել է, որ Ադրբեջանի արտգործնախարարությունը բարձր է գնահատել հունգարական կողմի հետ համագործակցությունն ադրբեջանցի սպային հայրենիք վերադարձնելու հարցում:

Հացի փռերից մեկում հրդեհ է բռնկվել, և ամուսինը` Բեկզոտ Նեմատովը, հղի կնոջը պաշտպանելու նպատակով, նրան հրել է պատուհանից, այնուհետև ինքն է թռել: Դեպքը տեղի է ունեցել Ռուսաստանի Դաշնության Նոր Մոսկվա շրջանում:

Life News-ի փոխանցմամբ, հրդեհը բռնկվել է գիշեր, և ամուսինների փրկության միակ տարբերակը եղել է պատուհանից դուրս ցատկելը: Գետնին ընկնելուց հետո հղի կինը փորձել է վեր կենալ, սակայն ապարդյուն:

29-ամյա Հուսնաբատ Նեմատովային  և ամուսնուն  բազմաթիվ այրվածքներով ու վնասվածքներով տեղափոխել են հիվանդանոց: Ավելի ուշ հիվանդանոցում պարզվել է, որ նա կոնքազդրի բավական ծանր կոտրվածք է ստացել, իսկ մարմնի 35 %-ն այրվել է: Բժիշկների խոսքով, պտղին վտանգ չի սպառնում:

Հրդեհի հետևանքով զոհվել է 2 մարդ:

Դամասկոսի Հայոց առաջնորդարանից տեղեկացնում են, որ մի քանի ժամ առաջ դուրս են  բերվել օրեր առաջ սպանված Մաթոսյանների դիակները: Հայերի  մարմինները հաջողվել է դուրս բերել Կարմիր Մահիկի ջանքերով:

Հիշեցնենք, օգոստոսի 28-ին տեղեկություն էր տարածվել, որ 49-ամյա Պետրոս, 46-ամյա Գևորգ և 22-ամյա Լևոն Մաթոսյանները սպանվել են Դամասկոսի Ջոբար թաղամասում, սակայն չեն կարողանում դուրս բերել նրանց դիակները:

Իսկ երեկ հերքվել էր այն տեղեկությունը, որ Դամասկոսի մերձակայքում «Իսլամի բրիգադ» («Լուվա ալ Իսլամ») խմբավորման գործողությունների զոհ են դարձել 6 հայ:

Մահացել է Ռուսաստանի ժողովրդական արտիստ, թատրոնի և կինոյի անվանի դերասան, «Սպասիր ինձ» հեռուստահաղորդման հաղորդավար Իգոր Կվաշան:

РИА Новости-ն՝ վկայակոչելով Ռուսաստանի «Առաջին ալիք»-ի  մամուլի ծառայությանը, տեղեկացրել  է, որ «Սովրեմեննիկ» թատրոնի համահիմնադիր Իգոր Կվաշան մահացել է այսօր` ժամը 17.00-ին:

Իգոր Կվաշան ծնվել է 1933թ. փետրվարի 4-ին, Մոսկվայում: 1957թ. Գալինա Վոլչեկի և Օլեգ Եֆրեմովի հետ նա հիմնադրել է «Սովրեմեննիկ» թատրոնը:

Կվաշան խաղացել է հիսունից ավելի ներկայացումներում, նույնքան ֆիլմերում, այդ թվում` «Հանրապետության հարստությունը», «Նույն այդ Մյունհաուզենը», «Մարդը Կապուցինների փողոցից», «Երեքի սրտերը»:

ԱՄՆ-ի Ջորջիա նահանգում 4 զինծառայողներ  են ձերբակվել: Նրանք նպատակ են ունեցել գրավել Ֆորտե Սթյուարտ քաղաքի զինամթերքի պահեստները, պայթեցնել ներքին անվտանգության վարչության շենքն ու Վաշինգտոն նահանգի հիդրոկառույցները: Այս ամենից հետո, նրանք ծրագրել էին մահափորձ իրականացնել Օբամայի դեմ, ինչն էլ կդառնար պետական հեղաշրջման պատճառ:

Դավադիրները չեն թաքցրել իրենց ատելությունը գործող նախագահի նկատմամբ: Նրանց ղեկավար Այզեկ Ագիգին հայտարարել է «Տարօրինակ անունով, սևամորթ նախագահը տեղ չունի Սպիտակ տանը»:   Ծրագրի նախապատրաստական աշխատանքների ժամանակ հանցագործները սպանել են 2 վկաների, ովքեր պատահաբար իմացել են նրանց դավադրության մասին:

Հետաքննության արդյունքում պարզվել է, որ ձերբակալվածները «Հավերժ կենդանի, միշտ պատրաստ» (Forever Enduring Always Ready, F.E.A.R.) հակակառավարական արմատական խմբավորման անդամներ են: Խմբավորումը կազմված է նախկին և ներկա զինվորականներից:

Համաձայն ԱՄՆ-ի օրենսդրության` բոլոր դավադիրներին մահապատիժ է սպառնում: Մահապատժի չի ենթարկվի միայն  խմբավորման անդամներից մեկը` Մայքլ Բերնեթը. Վերջինս համաձայնել է համագործակցել իրավապահ մարմինների հետ և ցուցմունք է տվել ընկերների դեմ:

Հայաստանցի 21-ամյա Նարինե Մկրտչյանին սեռական շանտաժի զոհ դարձրած, աղջկան ինքնասպանության  դրդած թուրք եղբայրներ Օրհան Օքումուշին և Բարըշ Օքումուշին թուրքական դատարանը ազատ է արձակել` 6-ամսյա կալանքից հետո ։

Թուրքական Haberturk-ի տեղեկացմամբ՝  դատական նիստի ժամանակ ամբաստանյալների փաստաբանը պահանջել է ազատ արձակել եղբայրներին։ Դատարանը բավարարել է փաստաբանի պահանջը և 2 եղբայրներին ստորագրությամբ ազատ արձակել։

Դատական նիստից հետո Նարինեի մայրը բողոքել է, հայտարարել, որ անարդար է, երբ մեղավորներին հանգիստ բաց են թողնում։ «Աղջիկս նրանց պատճառով է ինքնասպան եղել։ Աղջկաս նկարահանել են և շանտաժ արել։ Դատը դեռ չի ավարտվել։ Ես վարչապետին դիմում եմ գրելու և պատմեմ տեղի ունեցածը»,-ասել է Նունե Մկրտչյանը։

Հիշեցնենք, որ  4 տարի առաջ Թուրքիա ներգաղթած Նարինե Մկրտչյանը եղբոր և խորթ հոր հետ անօրինական բնակվել է Ստամուլի Քումքափը թաղամասում: Նա սիրահարվել է թուրք հարևան Օրհան Օքումուշին, ով խոստացել է ամուսնանալ հետը և մերկ լուսանկարել է նրան:

Օրհանի եղբայրը` 25-ամյա Բարըշ Օքումուշը նույնպես սպառնացել է Նարինեին` ասելով, որ «եթե իր հետ էլ չլինի, լուսանկարները ցույց կտա աղջկա եղբորը»:

Սակայն քանի որ Նարինեի ընտանիքն անօրինական է բնակվել Թուրքիայում, ոստիկանության դիմել հնարավոր չի եղել: Աղջիկը փետրվարի 28-ին թույն է խմել և ինքնասպան եղել: