The New York Post‑ի հաղորդմամբ, Նյու Յորքի դատախազությունը որոշել է արդարացնել Արժույթի միջազգային հիմնադրամի նախկին տնօրեն Դոմինիկ Ստրոս Կանին։ Հավանաբար, դա տեղի կունենա հաջորդ դատական նիստի ժամանակ կամ գուցե` ավելի շուտ:
Հիշեցնենք, որ մի քանի օր առաջ Դոմինիկ Ստրոս Կանի տնային կալանքն արդեն հանվել է, նրան է վերադարձվել գրավի գումարը, և բոլորը սպասում են, որ շուտով բոլոր մեղադրանքները կհանվեն նրա վրայից:

Թերթը նաև ընդգծել է, որ սպասուհու տված ցուցմունքների հանդեպ վստահությունն այնքան չնչին է, որ դատարանը չի պատրաստվում բավարարել նրա հայցը:

BBC հեռուստաընկերության հաղորդմամբ` երեկ Եգիպտոսում կրկին բախումներ են սկսվել այն բանից հետո, երբ Կահիրեի դատարանը ազատ է արձակել 7 ոստիկանների, որոնք մեղադրվում են ցուցարարներին սպանելու համար:

Դատարանի մոտ ծայր առած բախումների ժամանակ հարյուրավոր ցուցարարներ փակել են դեպի Սուեզի ջրանցք տանող ճանապարհը: Որոշ տվյալներով՝ ազատ արձակված ոստիկանները այս տարվա հունվարի վերջին 17 մարդ են սպանել Սուեզում հակակառավարական ցույցերի ընթացքում, սակայն դատարանը որոշում է կայացրել նրանց գրավի դիմաց  ազատ արձակել, իսկ դատական նիստը հետաձգել մինչև սեպտեմբեր:

Երեկվա բախումներին հիմնականում մասնակցել են ցույցերի ընթացքում զոհվածների հարազատները:
Այսօր նաև հայտնի է դարձել, որ Եգիպտոսի ժամանակավոր իշխանությունները որոշել են խորհրդարանական ընտրություններն անցկացնել սեպտեմբերի վերջին, որին կհաջորդեն նախագահական ընտրությունները:

Ռուսական «Կոմերսանտ» թերթի տեղեկացմամբ` Լիբիայի առաջնորդ Մուամար Քադաֆին հայտարարել է, թե  պատրաստ է թողնել իշխանությունը` անվտանգության երաշխիքների դիմաց, որոնք իրեն խոստանում է Ֆրանսիան:

Ինչպես հայտնի է, Ֆրանսիայում պատրաստ են բացել գնդապետի ընտանիքի բանկային հաշիվները, ինչպես նաև փրկել նրան Հաագայի միջազգային տրիբունալից:

Դրանից բացի, Քադաֆիի խաղաղ հեռանալու դեպքում` քննարկվում է նաև նրա երկրում մնալու հնարավորությունը: Սակայն դրան կարող է խոչընդոտել Քադաֆիի ներկայացրած պայմաններից մեկը, որին դժվար թե համաձայնեն Բենղազիում: Բռնակալը պնդում է, որ իր որդուն` Սաիֆ ալ Իսլամին ընտրություններին մասնակցելու հնարավորություն տրվի:

ITAR-TASS գործակալությունը  և lenta.ru կայքը տեղեկացնում են, որ Լիբիայի առաջնորդ Մուամար Քադաֆին երեկ հայտարարել է, որ  պատերազմական գործողությունները կտեղափոխի արևմտյան այն երկրների տարածքներ, որոնք մասնակցում են Լիբիայի տարածքի ռմբակոծությանը:

«Ձեզ մեծ աղետ է սպասվում, եթե անմիջապես  չդադարեցնենք ռազմական գործողությունները և հանգիստ չթողնեք Լիբիայի ժողովրդին: Մենք հանգիստ կարող ենք ներխուժել Եվրոպա մեղուների նման և ագրեսորներին պատասխանել իրենց իսկ մեթոդներով»,- նշել է Քադդաֆին իր հեռախոսաուղերձում:

Քադաֆին կոչ է արել միջազգային կոլաիցիայի անդամներին պարզապես ներողություն խնդրել և արագ հեռանալ իր երկրից:

Հիշեցնենք, երեկ  Հասարակածային Գվինեայում ավարտվել է Աֆրիկյան Միության գագաթնաժողովը, որտեղ ընդունվել է «ճանապարհային քարտեզ», որը նախատեսում է բանակցությունների սկիզբ` Տրիպոլիի և Բենգազիի ապստամբների միջև:

Իսկ Մուամար Քադաֆին համաձայնել է բանակցություններ վարել ընդդիմության հետ:

Գերմանիան ռոտացիոն սկզբունքով դարձավ ՄԱԿ–ի Անվտանգության Խորհրդի նախագահ։

Սահմանված մեկ ամսում ՄԱԿ–ի մշտապես գործող գլխավոր քաղաքական մարմնի նիստերը վարելու է ՄԱԿ–ում Գերմանիայի մշտական ներկայացուցիչ Պետեր Վիթինգը:

ՄԱԿ–ի ԱԽ–ում Գերմանիայի գործունեության առանցքային թեման է դառնալու ՄԱԿ–ի կողմից Հարավային Սուդանի անկախության ճանաչումը և նոր պետության անդամակցությունը տարբեր միջազգային կազմակերպությունների:

France Presse գործակալությունը տեղեկացնում է, որ ֆրանսիական France2 հեռուստաալիքին տված հարցազրույցում Լիբիայի առաջնորդ Մուամար Քադաֆիի դուստրը՝ Աիշան, հայտարարել է, որ պաշտոնական Տրիպոլիի և անցումային ընդդիմադիր Ազգային խորհրդի ներկայացուցիչների միջև ընթանում են ինչպես ուղիղ, այնպես էլ միջնորդավորված բանակցություններ:

«Մենք գործադրում ենք բոլոր ջանքերը , որպեսզի այլևս չթափվի լիբիացիների արյունը:  Դրա համար մենք պատրաստ ենք համաձայնության գալ նույնիսկ սատանայի, այսինքն՝ զինված ապստամբների հետ»,- ասել է Աիշան:
Ի դեպ, նա ընդգծել է, որ Մուամար Քադաֆին լիբիացի ժողովրդի խորհրդանիշն ու առաջնորդն է և այդ իսկ պատճառով չի կարող և չպետք է հեռանա, նաև մեղադրել է Նիկոլա Սարկոզիին` Լիբիայի ժողովրդին սպանելու համար:

Lenta.ru կայքը տեղեկացնում է, որ Վենեսուելայի նախագահ Ուգո Չավեսը ժողովրդին ուղղված հեռուստաուղերձում խոստովանել է, որ ինքը քաղցկեղ է ունեցել: Նա ասել է, որ կոնքի հատվածում թարախակույտի հեռացման վիրահատությունից բացի, ևս մեկ վիրահատության է ենթարկվել, որի ժամանակ հեռացվել է չարորակ ուռուցքը։

Վերոնշյալ վիրահատությունից հետո արևմտյան լրատվամիջոցները տեղեկություններ էին տարածել, որ Չավեսի վիճակը կրիտիկական է։

Սակայն հեռուստաուղերձում Վենեսուելայի նախագահը բավականին լավ տեսք է ունեցել:

Հունիսի 30-ին ԵԱՀԿ գործող նախագահ, Լիտվայի ԱԳ նախարար Աուդրոնյուս Աժուբալիսը հայտնել է, որ նշանակվել է ԵԱՀԿ գլխավոր քարտուղար:  Նոր քարտուղարը Կոսովոյում ՄԱԿ-ի նախկին հատուկ ներկայացուցիչ Լամբերտո Զանյերն է:

Նախորդ տարվա դեկտեմբերի 6-ին հաղորդվում էր, որ  ԵԱՀԿ գլխավոր քարտուղարի  պաշտոնի հիմնական հավակնորդներից մեկը Թուրքիայի ներկայացուցիչն  է: Թուրքիան այդ պաշտոնի համար առաջարկել էր դիվանագետ Էրսին Էրչինին, սակայն, նրան, ըստ ամենայնի, Եվրոպայում չեն աջակցել:

Հիշեցնենք, որ նախկին գլխավոր քարտուղար Մարկ Պերրեն դե Բրիշամբոն իր պարտականությունները կատարել է 2 տարի անընդմեջ:



Մեծ Բրիտանիայում այսօր պետական կառույցների աշխատակիցները 24-ժամյա գործադուլ են հայտարարել: Աշխատակիցները հանդես են գալիս կենսաթոշակային համակարգի բարեփոխման դեմ, որը կառվարությունը ընդունել է որպես կոշտ տնտեսման միջոց:

Բարեփոխումները ենթադրում են  թոշակի անցնելու տարիքի բարձրացում, ինչպես նաև կենսաթոշակային հիմնադրամներին թոշակի գումարի մուծման ավելացում: Իշխանությունները պնդում են , որ  նման քայլը թույլ կտա պայքարել բյուջեի դեֆիցիտի դեմ:

Որպես բողոքի ակցիա ողջ երկրով մեկ այսօր փակ են դպրոցների մեծ մասը, չեղյալ են հայտարարվել ավիաչվերթների զգալի մասը:

Reuters գործակալությունը և Եգիպտոսի առողջապահության նախարարությունը տեղեկացրել են, որ Կահիրեի Թահրիր հրապարակում նախօրեին տեղի ունեցած բախումների ժամանակ վիրավորվել է ավելի քան 1000 մարդ, այդ թվում՝ հատուկ ծառայությունների աշխատակիցներ:
Որոշ լրատվամիջոցների տեղեկություններով, վիրավորների թիվը հասնում է 1036-ի, որոնցից 40-ը ոստիկաններ են: Երեկվանից Թահրիրն ամբողջությամբ փակված էր, քանի որ ցուցարարները ցանկանում էին հենց այնտեղ հավաքվել: Ցույցի մասնակիցների մեծամասնությունը երկրում տեղի ունեցած հեղափոխության ժամանակ զոհված մարդկանց  հարազատներն են, որոնք պահանջում են անհապաղ պատասխանատվության ենթարկել մեղավորներին:

Al-Jazeera հեռուստաընկերության հաղորդմամբ, ոստիկանությունը բավական կոշտ է գործել, իսկ ցուցարարները կոտրել են հարակից շենքերի ապակիները, ջարդել մեքենաներ: Հիշեցնենք, որ Մուբարաքի նկատմամբ սպանությունների գործով դատավարությունը սկսվելու է օգոստոսի 3-ին: