Հոկտեմբերի 8-ին Ռուսաստանի նախագահ Վլադիմիր Պուտինի և Թուրքիայի վարչապետ Ռեջեփ Թայիփ Էրդողանի միջև լարված հեռախոսազրույց է տեղի ունեցել, այս մասին հրապարակել է թուրքական Aydinlik պարբերականը:

Ըստ պարբերականի՝ խոսակցության մի հատվածում Էրդողանն ուղղակի անջատել է հեռախոսը:

Հեռախոսազրույցի ընթացքում Պուտինը զգուշացրել է. «Եթե նույնիսկ մեկ զինվոր Սիրիա մտնի, կընկալենք, որ նրանք մտել են Մոսկվա»:

«Դա սպառնալիք է, չենք կարող ընդունել»,- ասել է Էրդողանը:

Պուտինը պատասխանել է. «Ինչպես ուզում եք, այնպես էլ ընդունեք»:

Նշվում է, որ հենց այս հատվածում Էրդողանն անջատել է հեռախոսը, իսկ  սիրիական աղբյուրների պնդմամբ՝ 2 կողմն էլ չի ընդհատել խոսակցությունը։

Քութաիսիում կայացած նորընտիր վրացական խորհրդարանի առաջին նիստի ժամանակ օրենսդիր մարմնի նախագահ է ընտրվել «Վրացական երազանք» կոալիցիայի ներկայացուցիչ Դավիդ Ուսուպաշվիլին, որի օգտին  քվեարկել է 88 պատգամավոր: Այս մասին հայտնում  է Թբիլիսիում APA գործակալությունը:

Նիստը տեղի է ունեցել կոալիցիայի ամենատարեց անդամ Իվանե Կղուրիձեի նախագահությամբ, Ուսուպաշվիլիի հետ մեկտեղ հանդես էին գալիս նաև խորհրդարանի նախկին ղեկավար Դավիդ Բակրաձեն, «Վրացական երազանք»-ը ներկայացնող Դավիդ Շաղվարելիձեն, Կոբա Դավիթաշվիլին և Միասնական շարժումը ներկայացնող Զաքարիա Կուրցինաշվիլին:

Ուսուպաշվիլին 44 տարեկան է, ավարտել է Թբիլիսիի պետհամալսարանի իրավաբանական ֆակուլտետն ու ասպիրանտուրան, տարբեր պետական պաշտոններ է զբաղեցրել:

Նախագահ Սերժ Սարգսյանը, ղեկավարվելով Հայաստանի Հանրապետության Սահմանադրության 55-րդ հոդվածի 8-րդ կետով` որոշել է Արգենտինայի Հանրապետությունում Հայաստանի Հանրապետության արտակարգ և լիազոր դեսպան Վահագն Մելիքյանին, համատեղության կարգով, նշանակել Ուրուգվայի Արևելյան Հանրապետությունում և Պարագվայի Հանրապետությունում Հայաստանի Հանրապետության արտակարգ և լիազոր դեսպան (նստավայրը` Բուենոս Այրես):

Ինչպես տեղեկացնում է ադրբեջանական ԱՊԱ գործակալությունը,Հայաստանի և Ադրբեջանի արտգործնախարարների հանդիպման ժամկետը դեռևս հստակ չէ։ Այդ մասին տեղեկացրել է ԵԱՀԿ Մինսկի խմբի ռուսաստանցի համանախագահ Իգոր Պոպովը։

Նա նշել է, որ այժմ բանակցություններ են ընթանում երկու երկրների նախարարությունների հետ։ «Հույս ունեմ, որ Հայաստանի և Ադրբեջանի արտգործնախարարների հանդիպումը կկայանա այս շաբաթ»,-ասել է նա։

Ռուսաստանցի համանախագահը նշել է, թե հանդիպումը կկայանա Փարիզում։ Նա հայտնել է, թե հանդիպումից հետո ԵԱՀԿ Մինսկի խմբի համանախագահները կայցելեն տարածաշրջան։

Բեյրութում երեկ տեղի ունեցած խոշոր ահաբեկչությունից հետո,  Լիբանանի  վարչապետ  Նաջիբ Միքաթին հրաժարականի դիմում է նեկայացրել նախագահին.  հայտնում է Reuters-ը:

Ականապատ մեքենան պայթել է Բեյրութի քրիստոնեաբնակ թաղամասի Սասին հրապարակում:  Վերջին տվյալներով, զոհվել է 8 մարդ, այդ թվում Լիբանանի անվտանգության ուժերի բարձրաստիճան աշխատակից Վիսամ ալ-Հասանը: Ավելի քան 80 մարդ վիրավորվել է:

Միքաթին նշել է, որ չնայած հրաժարականի դիմումին, Լիբանանի նախագահ Միշել Սուլեյմանը խնդրել է  իրեն որոշ ժամանակ պաշտոնում:

Իրանում Խուզեստան գավառից Բորուջեն քաղաք ուղևորվող դպրոցական ավտոբուսը շրջվել է։ Ավտովթարի արդյունքում զոհվել է 26 դպրոցական, 18 մարդ վիրավորվել է. հաղորդում է MEHR գործակալությունը։

Բորուջեն քաղաքի գործադիր իշխանության ղեկավար Ֆաթահ Քերեմին հայտնել է, որ 4 վիրավոր դպրոցական աղջիկ տեղափոխվել է Շեհ Քյուրդի հիվանդանոց, իսկ 14 մարդ՝ Էհվազ քաղաքի հիվանդանոց։ Նրանց վիճակը գնահատվում է բավարար։

Հոկտեմբերի 19-ին Լիբանանի մայրաքաղաք Բեյրութում պայթյունի հետևանքով  զոհվել է ութ մարդ: Ալ-Կաբաս թերթի փոխանցմամբ,յոթ դիակներն անճանաչելիորեն վնասվել են, իսկ հայազգի Ջորջետտա Սարգսյանի դիակն ամբողջությամբ չի վնասվել և կարողացել են ճանաչել:

Նրա դին, ինչպես նաև 46 վիրավորներին տեղափոխել են Աշրաֆիե շրջանի Ռիզկ հիվանդանոց:

Չճշտված տվյալներով, վիրավորների մեջ հայ երեխա կա: Տեղական լրատվամիջոցների տեղեկացմամբ, տղայի անունը Սեո է:

Թուրքիայի բանակի զինծառայողները հոկտեմբերի 19-ին կրակ են բացել սիրիացի զինվորականների դիրքերի ուղղությամբ:

Ավելի վաղ Թուրքիայի տարածքում պայթել են Սիրիայից արձակված երկու ականներ: Իմանալով այդ մասին՝ թուրք զինվորականները պատասխան կրակ են բացել սիրիական զինվորականների դիրքերի ուղղությամբ:

Թուրքիայի ԶՈւ արդեն բազմիցս են գնդակոծել Սիրիայի տարածքը: Թուրքիայի Գլխավոր շտաբի պետ գեներալ Նեջդեթ Օզելը զգուշացրել է Սիրիային «կոշտ պատասխանի» մասին թուրքական սահմանամերձ տարածքների գնդակոծության համար սիրիական բանակի կողմից:

Հիշեցեցք, որ թուրքական զորքերը կուտակվեցին սահմանի մոտ այն բանից հետո, երբ սիրիական ականի պայթյունի հետևանքով թուրքական գյուղի 5 բնակիչ զոհվեց, հայտնում է Ռոսբալտը:

Իրաքում ձերբակալվել են Թուրքիայի 1200 քաղաքացի: Վերջիններս Իբրահիմ Ալ-Հալիլ մաքսային անցակետում մուտքի վիզա էին ստացել Հյուսիսային Իրաքի քրդական ինքնավարությունից և փորձել են Իրաքի տարածքով գնալ Սաուդյան Արաբիա՝ հաջիի (ուխտագնացություն) ժամանակ աշխատանք գտնելու համար: Սակայն Իրաքի անվտանգության ուժերը ձերբակալել են նրանց: Բաղդադի ոստիկանությունը հայտարարել է, որ իրենք 14 ավտոբուսներից բաղկացած թուրքական քարավանը կանգնեցրել են այն պատճառով, որ Թուրքիայի քաղաքացիները նախապես մուտքի վիզա չեն ստացել Իրաքի կենտրոնական իշխանություններից:
Իրաքյան ոստիկանությունը սպասում է իր կառավարության որոշմանը:

Այսօր հզոր պայթյուն է եղելՍիրիայի ներքին գործերի նախարարության շենքի մոտ:

ИТАР-ТАСС գործակալության տեղեկացմամբ, ռումբը պայթեցրել է մահապարտ ահաբեկիչը, որը շենքին մոտեցել է մոտոցիկլետով:

Զոհերի և վիրավորների մասին տեղեկություններ չկան: