Բաքվում ընթացող բռնցքամարտի աշխարհի առաջնությունում այսօր 60 կգ քաշային Վլադիմիր Սարուխանյանը պարտվել է ամերիկացի Խոսե Ռամիրեսին 5:6, 4:7, 3:9 հաշվով: Երեկոյան մրցահերթում մեկնարկային մենամարտը կանցկացնի նաև 75 կգ քաշային Անդրանիկ Հակոբյանը:

Մինչ այժմ մեկնարկային մենամարտը հաղթանակով է ավարտել միայն 64 կգ քաշային Հրաչիկ Ջավախյանը:

Հոկտեմբերի 1-ը ՄԱԿ-ի որոշմամբ 1991 թվականից նշվում է որպես Ծերերի միջազգային օր:
Ինչպես տեղեկացնում է ՄԱԿ-ի պաշտոնական կայքէջը, այս կապակցությամբ ՄԱԿ-ի գլխավոր քարտուղար Բան Կի Մունը կոչ է արել աշխարհի բոլոր երկրներին՝ ավելի մեծ ուշադրություն դարձնել ծերերի խնդիրներին:

Այսօր աշխարհում կա մոտ 700 միլիոն մարդ, ում տարիքը բարձր է 60-ից, ընդ որում ծեր տղամարդիկ 66 միլիոնով ավելի շատ են իրենց տարեկից կանանցից:

ՄԱԿ-ի տվյալներով՝ 2050 թ. 60 և ավելի տարիք ունեցող մարդկանց թիվն աշխարհում կգերազանցի 2 միլիարդը` կազմելով աշխարհի բնակչության մոտ 20%-ը: Արդյունքում մարդկության պատմության մեջ առաջին անգամ ծերերի թիվը կգերազանցի երեխաների թվին:

Սան Պաուլուում ընթացող շախմատի Մեծ սաղավարտ շարքի եզրափակիչ մրցաշարի չորրորդ տուրում Լեւոն Արոնյանը սպիտակներով պարտվեց ուկրաինացի Վասիլի Իվանչուկին, որը 10 միավորով միանձնյա գլխավորում է մրցաշարային աղյուսակը: Աշխարհի չեմպիոն Վիշի Անանդը սեւերով հաղթեց իսպանացի Ֆրանսիսկո Վալյեխոյին եւ 5 միավորով հավասարվեց Արոնյանին: Մագնուս Կարլսենն ու Հիկարու Նակամուրան խաղացին ոչ ոքի:

Այսօր` Ազգային անվտանգության խորհրդում, տեղի է ունեցել ՀՀ թմրամոլության եւ թմրամիջոցների ապօրինի շրջանառության դեմ պայքարի հարցերով միջգերատեսչական հանձնաժողովի նիստ: Հանձնաժողովի կազմում ընդգրկված են  ՀՀ ոստիկանության, ՀՀ գլխավոր դատախազության, ՀՀ ԱԱԾ, առողջապահության եւ արդարադատության նախարարությունների ներկայացուցիչներ:

ԱԱԽ աշխատակազմում համատեղ ջանքերով մշակվել է թմրամոլության եւ թմրամիջոցների ապօրինի շրջանառության ազգային ծրագիրը, որը հավանության է արժանացել ԱԱԽ-ի կողմից եւ հաստատվել ՀՀ նախագահի հրամանագրով: Արդյունքում ստեղծված հանձնաժողովն այսօր քննարկել է կատարված աշխատանքները եւ նախանշել ապագա ծրագրերը: Այս մասին հաղորդում են ԱԱԽ-ից:

Պաշտոնական վիճակագրության ուսումնասիրությունը ցույց է տալիս, որ 2010թ. առաջին կիսամյակի համեմատությամբ այս տարի գրանցվել է այս ոլորտի իրավախախտումների շուրջ 7,4% աճ, սակայն առկա է նաեւ  հանցագործությունների բացահայտման դրական միտում` շուրջ 10%-ով:

ԱԱԽ քարտուղարի համոզմունք է հայտնել ,որ այս հանցատեսակի դեմ պայքարը պետք է ընթանա երեք հիմնական ուղղություններով` կանխարգելում, պատժի անխուսափելիություն նման հանցագործություն կատարողի համար եւ բուժման կարիք ունեցող անձանց արդյունավետ վերականգնում:Նա նշել է, որ ավարտին է մոտենում կազմակերպված հանցավորության դեմ պայքարի ազգային ռազմավարության մշակումը: Այս ուղղությամբ համակարգված փաստաթուղթ ստեղծելու նպատակով ԵՄ-ի հատուկ փորձագետը արդյունավետորեն համագործակցում է մեր իրավապահ մարմինների հետ:

Միքայել Վաթինյանի «Ժաննան և ձայները» լիամետրաժ  գեղարվեստական ֆիլմը, որին աջակցել է նաև «Ոսկե Ծիրան» միջազգային կինոփառատոնը, ունենալու է համաշխարհային պրեմիերա Պուսանի միջազգային կինոփառատոնում:Ռեժիսոր Միքայել Վաթինյանի եւ պրոդյուսեր Արմինե Անդայի «ԺԱՆՆԱՆ Եւ ՁԱՅՆԵՐԸ» լիամետրաժ գեղարվեստական կինոնախագիծը դեռ 2007 թվականին  «Ոսկե ծիրան» միջազգային կինոփառատոնի «Ռեժիսորներ առանց սահմանների» կինոֆորումի մասնակից էր:

Այդտեղից էլ այն բոլոր ռեգիոնալ նախագծերից ընտրվել է մասնակցելու և ներկայացվելու Պուսանի միջազգային կինոփառատոնի համատեղ արտադրության կինոպլատֆորմին: Այն առաջին հայկական կինոնախագիծն էր, որ ներկայացվել է Պուսանում, միանգամից ստանալով նաեւ մրցանակ` Գյոթեբորգի միջազգային կինոփառատոնի, Պուսանի միջազգային կինոփառատոնի եւ ասիական կինոշուկայի կոցմից: Կինոնախագիծը հրավիրվել է ներկայացվելու շատ բարձրակարգ կինոփառատոներում:

Ֆիլմն իրականացվել է «Հոշկի ֆիլմ» կինոընկերության կողմից` Հայաստանի ազգային կինոկենտրոնի աջակցությամբ, «Ոսկե ծիրան» միջազգային կինոփառատոնի, Գյոթեբորգի միջազգային կինոփառատոնի, զարգացվելով նաև Եվրոպական աուդիովիզուալ նախաձեռնության շրջանակներում, որտեղ դարձյալ առաջին հայկական կինոնախագիծն էր: Ֆիլմի հիմնակազմը սցենարի հեղինակ եւ ռեժիոր Միքայել Վաթինյանից ու համա-սցենարիստ, պրոդյուսեր, եւ գլխավոր դերակատար Արմինե Անդայից բացի ընդգրկում է բեմադրող օպերատոր Թամամ Համզային /Սիրիա/, բեմադրող նկարիչ Իվանա Կրչադինացին /Սերբիա/, կոմպոզիտոր Արթուր Մանուկյանին, որը նաեւ ռեժիսորի անիմացիոն կարճամետրաժ ֆիլմի` ԲՈԺՈ-ի կոմպոզիտորն է: 2011 թվականի հոկտեմբերին, աշխարհից ընտրված 10 լիամետրաժ ֆիլմերի շարքում ԺԱՆՆԱՆ Եւ ՁԱՅՆԵՐԸ ֆիլմը կունենա համաշխարհային պրեմիերա Հարավային Կորեայում` աշխարհի ամենահեղինակավոր եւ ամենակարեւոր փառատոներից մեկի` Պուսանի միջազգային կինոփառատոնի Flash Forward /Մեջբերում ապագայից/ մրցույթում:

Անգլիական Պրեմիեր Լիգայում հանդես եկող  «Սանդերլենդ» թիմի պաշտպան Թայթուս Բռամբլան մեղադրվում է սեռական ոտնձգության և թմրանյութերի օգտագործման մեջ:

Ըստ  «Սանդերլենդ»-ի պաշտոնական կայքի՝ թիմի ղեկավարությունը ժամանակավորապես արգելել է ֆուտբոլիստին մասնակցել ակումբի մարզումներին՝ այն բանից հետո, երբ պաշտպանը 15 ժամ անցկացրել է ոստիկանությունում: Խոսակցություններ կան, որ անգլիական ակումբը ինքն է հետաքննություն սկսել այս դեպքի կապակցությամբ:

Բուքմեյքերները սկսել են խաղադրույքներ ընդունել, թե արդյոք Հայաստանը կնվաճի՞ «Եվրո-2012»-ի եզրափակիչ փուլի ուղեգիր։
Այն, որ Հայաստանը կհայտնվի «Եվրո-2012»-ում, սահմանվել է 10.00 գործակից։ Չհայտնվելու գործակիցը կազմել է 1.01։

Ընտրական B խմբից դուրս գալու գործակիցը կազմել է 5.55, իսկ դուրս չգալունը՝ 1.11։

Հիշեցնենք, որ ընտրական B խմբում 2-րդ հորիզոնականում հայտնվելու դեպքում Հայաստանը կնվաճի փլեյ-օֆֆում հանդես գալու իրավունք։

Ոստիկանության աշխատակիցները հայտնաբերել ու բերման են ենթարկել 46-ամյա կավատուհուն:

Ոստիկանության մամուլի ծառայությունից  հայտնում են, որ սեպտեմբերի 29-ին, ոստիկանության կազմակերպված հանցավորության դեմ պայքարի գլխավոր վարչության ծառայողները բերման են ենթարկել Երեւան քաղաքի 46-ամյա մի բնակչուհու, ով 2009-2011 թթ. ընթացքում գույքային օգուտի դիմաց նպաստել է մի շարք կանանց պոռնկությամբ զբաղվելուն` 5000-ից 20 000 դրամի դիմաց: Կավատը միջնորդել է մարմնավաճառ կանանց սեռական հարաբերության մեջ մտնել իրեն ծանոթ տղամարդկանց հետ:

Կատարվում է քննություն:

Ավտոլվացման կետի աշխատակիցը «Դեու Նեքսիա» մակնիշի տաքսի ավտոմեքենան լվանալուց հետո փախցրել է:

Ոստիկանության մամուլի ծառայությունից  հայտնում են, որ սեպտեմբերի 29-ին, ժամը 11.15-ին, ոստիկանության Էրեբունու բաժին է դիմել «Վանդավ Կոմֆորտ» տաքսի ծառայության աշխատակիցը եւ հայտնել, որ նույն օրը, ժամը 05.30-ին, իրենց ընկերության ավտոլվացման կետի 28-ամյա աշխատակիցը փախցրել է ընկերությանը պատկանող «Դեու Նեքսիա» մակնիշի ավտոմեքենան:Պարզվել է, որ նույն օրը, ժամը 05.30-ին, երիտասարդը, վարելով նշված ավտոմեքենան, Կարապետ Ուլնեցիի եւ Ներսիսյան փողոցների հատման մասում բախվել է բնակելի տան պատին, ինչի պատճառով էլ ավտոմեքենան վնասվել եւ տեղափոխվել է Ճանապարհային ոստիկանության տուգանային հրապարակ:Կատարվում է հետաքննություն: