Հայաստանում ծնված, Ռուսաստանը ներկայացնող բռնցքամարտիկ Միշա Ալոյանը, որը Բաքվում կայացած բռնցքամարտի աշխարհի առաջնությանը նվաճել է ոսկե մեդալ, հայտնել է, որ ինքը Բաքվի մարզահամալիրից ստիպված է եղել դուրս գալ անվտանգության աշխատակիցների ուղեկցությամբ, քանի որ մուտքի մոտ նրան սպասում էին կատաղած ադրբեջանցի երկրպագուներ։

«Իրականում ես միայն ծնվել եմ Հայաստանում, իսկ ազգությամբ ես քուրդ-եզդի եմ, — Ալոյանի խոսքերն է մեջբերում Regnum.ru-ն։ — Սակայն ազգանունս հայկական է, և դրա համար ամեն անգամ, երբ մարզահամալիրում հայտարարվում էր իմ ազգանունը, դա ադրբեջանցիների վրա այնպիսի ազդեցությունն էր թողնում, ինչպես կարմիր գույնը՝ ցլերի։

Հենց, որ ես հայտնվում էի մարզահամալիրում, նրանք սկսում էին տրիբունաներից վիրավորանքներ գոռալ իմ հասցեին և սուլել։ Երկրպագում էին ում պատահի՝ կուբացիներին, բոտսվանցիներին, վալիյցիներին, մի խոսքով, բոլոր իմ հակառակորդներին։ Սակայն դա ինձ միայն ուժ էր տալիս։ Բայց արդեն երկրորդ շաբաթվա սկզբերին ես արդեն հոգնել էի այդ ամենօրյա ատելությունից»։

23-ամյա Ալոյանի խոսքերով, հատկապես բարդ ստացվեց իր համար քառորդ եզրափակիչը, որտեղ նա հանդիպել էր ադրբեջանցի Էլվին Մամիշզադեի հետ։ «Դա արդեն անցավ բոլոր թույլատրելի սահմանները, — ասել է բռնցքամարտիկը։ — Այն բանից հետո, երբ ես հաղթեցի, երկրպագուները սկսել էին հավաքվել մարզահամալիրի ելքի մոտ՝ սպասելով ինձ։ Այդ ժամանակ իմ մարզիչը եկավ հանդերձարան և ասաց, որ ես նույնիսկ չմտածեմ մարզահամալիրից դուրս գալու համար։

Արդյունքում, ես դուրս եկա մարզահամալիրից մրցամարտից 40 րոպե անց։ Եվ նույնիսկ այդ դեպքում էլ ինձ ուղեկցում էին անվտանգության 10 աշխատակիցներ, իսկ ոստիկանական մեքենան կանգնած էր հենց ելքի մոտ։ Իսկ ընդհանուր առմամբ, ես և Դավիթ Հայրապետյանը ոչ մի անգամ քաղաք դուրս չենք եկել։ Երկու շաբաթն էլ անցկացրել ենք բազայում, կամ էլ մարզահամալիրում»։

Հոկտեմբերի 11-ը կարող է պատմական դառնալ Հայաստանի մարզական, ֆուտբոլային պատմության մեջ: Կկրկնվի «Արարատ»-73-ի էֆեկտը, եթե ֆուտբոլի Հայաստանի հավաքականին այսօր հաջողվի հաղթանակ տանել Իռլանդիայի ընտրանու նկատմամբ: Դա լուրջ հայտ կլինի Եվրոպայի 2012թ-ի առաջնությանը մասնակցելու համար:

Վերջին տուրից առաջ մեր խմբի մրցաշարային աղյուսակը գլխավորում է Ռուսաստանի հավաքականը, որն, անկասկած, գործնականում նվաճել է եվրոառաջնության ուղեգիր. դժվար է պատկերացնել, որ ռուսները սեփական հարկի տակ պարտվեն բոլոր խաղերում ձախողված Անդորրայի հավաքականին:

Երկրորդ տեղի համար, որ դարձյալ պատուհան է դեպի Եվրոպայի առաջնություն, պայքարում են Իռլանդիայի և  Հայաստանի հավաքականները:

Այսօրվա խաղից առաջ իռլանդացիներն ունեն 18, մերոնք` 17 միավոր: Հայաստանի հավաքականին միայն հաղթանակ է պետք` խմբում երկրորդը լինելու համար:

Երկրպագենք ու հավատանք մեր հավաքականին, մեր տղաներին` հոկտեմբերի 11-ը պատմական դաձնելով մեր մարզական օրացույցում:

ԱԻՆ «Արտակարգ ալիք» լրատվական կենտրոնից հայտնում են, որ հոկտեմբերի 10-ին` ժամը 13.19-ին, տեղեկատվություն է ստացվել, որ դեղորայքային թունավորումով «Արմենիա» բժշկական կենտրոն է տեղափոխվել Երևան քաղաքի Քանաքեռ ՀԷԿ թիվ 4/1 շենքի 14-րդ բնակարանի բնակիչ, 1972 թվականին ծնված Ալինա Գրիգորյանը: Տուժածի առողջական վիճակը գնահատվել է միջին ծանրության:

Սուպերմարկետներից մեկում բացահայտ վաճառքի է հանված իջեցված գներով ապրանքներ: Այս փաստը ինքնին տարօրինակ է`օրեցօր բարձրացող գների ֆոնին, սա կասկածի տեղիք է տալիս: Իհարկե ոչ բոլորին`մարդիկ կան որոնք, գայթակղվում են զեղջերից ու գնում ապրանքն առանց երկմտելու: Հենց այս տիպի մարդկանց վրա էլ հույսները դրել են մեր բիզնեսմենները: Իսկ սպառողների շահերի պաշտպանները, նման դեպքերում համեստորեն լռում են:Առհասարակ նրանք կոնկրետացմանը կարծես այնքան էլ կողմ չեն: Այդպիսի տպավորություն ես ստանում նաև սննդի անվտանգության տեսչության աշխատանքից:

Նշված սուպերմարկետում, համեմատաբար էժան է վաճառվում նույն փաթեթավորմամբ սուրճը: Պատճառն  իրազեկները համարում են տվյալ սուրճի ժամկետանց լինելը: Ի դեպ, դատելով այստեղ վաճառվող սուրճերի գներից ու դրանց համից, կարելի է եզրակացնել, որ հատիկավոր սուրճն էլ է ժամկետանց:

Սննդի անվտանգության տեսչությանը խնդրեցինք պատասխանել, թե արդյոք սուպերմարկետների ապրանքաշրջանառությունը 70 միլիոնի չի հասնում ու եթե հասնում է ինչ պարբերականությամբ է ստուգվում ու ինչ խախտումներ է արձանագրվել:

«Վերահսկողություն միշտ էլ կա, ներկա պահին պլանային առումով ամբողջ հանրապետությունով մեկ մշտադիտարկումներ են անցկացվում և առաջիկա տասը օրվա ընթացքում տվյալները կհրապարակվեն: Իսկ ինչ վերաբերում է ժամկետն անց սննդամթերքի ազատ վաճառքին,ապա դա արգելված է ու ցանկացած ահազանգի դեպքում կկանխվի: Տարվա կտրվածքով բոլոր նման օբյեկտները անպայման ստուգվում են,սակայն եթե որևէ ահազանգ լինի,ապա նորից ստուգում կանցկացվի,այսինքն, եթե ստուգվել է, դա չի նշանակում,որ վերջ, ամեն ինչ նորմալ է: Մենք իրավունք ունենք նորից ամեն ինչ ստուգելու:Ներկա պահին  երկու ահազանգ է եղել սուպերմարկետում ժամկետն անցած ապրանքի վաճառքի հետ կապված`կոնկրետ ժամկետն անց հյութ են իբր վաճառում ցածր գնով:Սակայն ստուգման արդյունքում պարզել ենք, որ ոչ թե ժամկետն անցած է, այլ հաջորդ օրն է անցնելու ժամկետը ու որպեսզի վնասներ չկրեն, իրենք իրավունք ունեն ցածր գնով դա իրացնելու»,-մեզ հետ զրույցում ասաց տեսչության մամուլի պատասխանատու Բաբկեն Պիպոյանը:

Իսկ ինչքանո՞վ է վստահ տեսչությունը, որ մեկ օր անց հյութերը հանվելու են վաճառքից:

Այսօր հոգեկան առողջության միջազգային օրն է, Սրանք այն պաշտոնական տվյալներն են, որ մի քանի օր առաջ ներկայացրեց հոգեբույժ Հարություն Մինասյանը:

Հայաստանում հոգեկան հիվանդությամբ տառապողների պաշտոնական թիվը թեև հասնում է 45 հազարի, սակայն իրականում այդ հիվանդներն ավելի շատ են, այս կարծիքին է հոգեբույժ Հարություն Մինասյանը, ըստ նրա` պաշտոնական տվյալներով՝ մեր երկրում հոգեկան հիվանդների թիվը 80-100 հազար է կազմում:

«Սակայն դա էլ վերջնական թիվը չէ. ըստ միջազգային պրակտիկայի՝ ցանկացած երկրում հոգեբույժի կարիք ունի բնակչության 10 տոկոսը։ Եթե մենք մոտ 3 մլն ենք, ուրեմն հոգեկան խանգարումներ ունեցող անձանց թիվը մեր երկրում կազմում է շուրջ 300 հազար»,- նշել է Մինասյանը

Այսօր Հայաստանում բարդանում են սոցիալական պատճառներով ի հայտ եկած նևրոզները, հոգեկան տարբեր շեղումները. «Այսօր մարդիկ դժկամությամբ են գնում բուժման, դա գումարների հետ է կապված։ Մենք գործ ենք ունենում բարձիթողի, ծանր վիճակների հետ։ Դրանով է պայմանավորված հանրապետությունում քրեական իրավիճակի բարդացումը, սպանությունների, ինքնասպանությունների թվի ավելացումը»,- համոզված է հոգեբուժ Մինասյանը:

Պաշտոնական թվերով՝ նախորդ տարի Հայաստանում 600 ինքնասպանություն և ինքնասպանության փորձ է գրանցել։ Սակայն մասնագետի հաշկարկները ցույց են տվել, որ իրականում նման քայլի դիմող անձանց թիվը տարեկան հասնում է 700- 800 ի։ «Դա նշանակում է, որ օրական 2 մարդ է ինքնասպանություն գործում։ Նրանց գերակշիռ մասը աշխատունակ տարիքի մարդիկ են։ Դա սոցիալական չարիք է մեր երկրի համար»,- ասում է հոգեբույժը:

Ըստ Մինասյանի «Գիտնականների մի մասը գտնում է, որ միայն հոգեկան հիվանդը կարող է ինքնասպանության դիմել, մյուս մասն էլ կարծում է, որ միայն ուժեղ կամքի տեր մարդը կարող է նման քայլի դիմել»,- նշեց հոգեբույժը։ Նա գտնում է, որ միայն հոգեկան հիվանդն է ինքնասպանության դիմում։ Իսկ առողջ մարդը նման քայլի դիմում է միայն այն դեպքում, երբ գտնվում է գիտակցության նեղացման կամ հոգեկան խանգարման կարճատև ընթացքի մեջ:

Հոկտեմբերի 13-ից 17-ը Լատվիայի մայրաքաղաք Ռիգայում անցկացվելու է Սամբոյի պատանիների, երիտասարդների և աղջիկների աշխարհի 2011թ. առաջնությունը, որին Հայաստանի Հանրապետությունը մասնակցում է 24 ներկայացուցչով:

Պատանիների հավաքականում ընդգրկված են՝
Գրիգոր Մխիթարյան, 48 կգ քաշային կարգ
Ռազմիկ Պետոյան, 52 կգ ք/կ
Հովհաննես Ալեքսանյան, 56 կգ ք/կ
Արթուր Սահակյան, 60 կգ ք/կ
Ռաֆիկ Մանուկյան, 65 կգ ք/կ
Ավետիք Պողոսյան, 70 կգ ք/կ
Հովհաննես Սերոբյան, 75 կգ ք/կ
Մինաս Մադոյան, 81 կգ ք/կ
Մարտիրոս Հակոբյան, 87 կգ ք/կ:

Երիտասարդների հավաքական՝
Մաքսիմ Մանուկյան, 48 կգ ք/կ
Տիգրան Կիրակոսյան, 52 կգ ք/կ
Սերյոժա Ալեքսանյան, 57 կգ ք/կ
Կարեն Տոնոյան, 62 կգ ք/կ
Վահագն Գևորգյան, 68 կգ ք/կ
Հակոբ Մարգարյան, 74 կգ ք/կ
Մհեր Կարապետյան, 82 կգ ք/կ
Արթուր Բունիաթյան, 90 կգ ք/կ
Ազատ Աբրահամյան, +100 կգ ք/կ

Պատանիների առաջնությունում հայաստանցի միակ աղջիկ մասնակիցն է 52 կգ քաշային Ռոզա Խաչատրյանը:

Հավաքականների մարզիչներն են Հայկ Ավետիսյանը, Աղասի Գալստյանը, գլխավոր մարզիչը՝ Վովիկ Խոջայանը: Ռիգա է մեկնում նաև միջազգային կարգի էքստրա դասի մրցավար Էդուարդ Ասլանյանը: Պատվիրակությունը ղեկավարում է Հայաստանի սամբոյի ֆեդերացիայի նախագահ Լևոն Հայրապետյանը:

Հայաստանի սամբոյի ֆեդերացիան հիշեցնում է, որ հայաստանցի պատանի և երիտասարդ սամբիստները ապրիլի 14-ից 18-ը Պրահայում կայացած Եվրոպայի առաջնությունում նվաճել էին 5 բրոնզե և 2 արծաթե մեդալ:

Երկու տարում Հայաստանի հավաքականը «նկուղային տղաներից» վերածվել է փլեյ-օֆի մրցակցի: Աշխարհի գավաթի համար պայքարն ավարտելով խմբի ամենավերջին հորիզոնականում` Վարդան Մինասյանի թիմը դարձել է միասնական հրաշալի հավաքական, գրում է բրիտանական The Independent-ը«Եվրո 2012»-ի վճռորոշ` Իռլանդիա-Հայաստան հանդիպման նախօրեին:

Հաշվի առնելով փաստը, որ հավաքականի հիմնական խաղացողները նոր են բոլորել 20 տարին, վստահաբար կարելի է ասել, որ սա նախկին խորհրդային երկրի հավաքականի հաջողության միայն սկիզբն է:

Այս թիմում կան մի քանի անուններ, որոնք արժե հիշատակել որպես խաղացողներ, որոնց լավ ապագա է սպասվում:

Կարճաժամկետ հեռանկարում նրանք  գլխացավանք կդառնան Իռլանդիայի համար, երկարաժամկետ հեռանկարում` ավելի հաճախ կհայտնվեն ձեր էկրաններին եվրոպական առաջնություններում:

Ջովանի Տրապատոնին, գրում է թերթը, հարգանքով է խոսում նրանց հնարավորությունների մասին, բայց ժլատ է նրանց գովաբանելիս:

«Նրանք լավ որակներ ունեն: Եվ գոլեր են խփում: Նրանք սիրում են ռմբահարել հեռվից, նաև մեծ ինքնավստահություն ունեն: Բում, բում»,- ասել է Իռլանդիայի հավաքականի գլխավոր մարզիչը, այնուամենայնիվ, վստահություն հայտնելով, որ իրենք առավելություն կունենան:

Պարբերականը ներկայացնում է մեր հավաքականի այն ֆուտբոլիստներին, որոնցից Տրապատոնին պետք է զգուշանա:

Հենրիխ Միթարյան

22-ամյա տաղանդավոր այս երիտասարդը արագ է մտածում և սիրում է ռմբահարել հեռվից:

Յուրա Մովսիսյան

24-ամյա այս երիտասարդի միջազգային դեբյուտը տեղի ունեցավ անցած տարի,  խելացի տեղաշարժը դաշտում նրան վտանգավոր է դարձնում:

Գևորգ Ղազարյան

Ահա ևս մեկ ուժեղ հարձակվող, որն ընդունակ է հայտնվել ճիշտ վայրում ճիշտ ժամանակ:

Գորիսում, հոկտեմբերի 9-ին, տեղի է ունեցել ՀՀ զինված ուժերի 20 սպաների համար նախատեսված բնակելի շենքի բացման հանդիսավոր արարողությունը:

ՊՆ մամուլի ծառայությունից  հայտնում են, որ շնորհավորելով բնակարանամուտը տոնող սպաներին`  պաշտպանության փոխնախարար Արա Նազարյանը նշել է, որ զինծառայողներին բնակարաններով ապահովումը պաշտպանության նախարարության կարևորագույն խնդիրներից է:

Ծանոթանալով բնակարանային պայմաններին ու կատարված աշխատանքներին` պաշտպանության փոխնախարարը գոհունակությամբ արձանագրել է, որ սպաների համար նախատեսված բնակարանները կառուցված են շինարարական արդի չափանիշներով, կահավորված են և ապահովված են անհրաժեշտ բոլոր հարմարություններով:

Գորիսում, հոկտեմբերի 9-ին, տեղի է ունեցել ՀՀ զինված ուժերի 20 սպաների համար նախատեսված բնակելի շենքի բացման հանդիսավոր արարողությունը:

ՊՆ մամուլի ծառայությունից NEWS.am-ին հայտնում են, որ շնորհավորելով բնակարանամուտը տոնող սպաներին`  պաշտպանության փոխնախարար Արա Նազարյանը նշել է, որ զինծառայողներին բնակարաններով ապահովումը պաշտպանության նախարարության կարևորագույն խնդիրներից է:

Ծանոթանալով բնակարանային պայմաններին ու կատարված աշխատանքներին` պաշտպանության փոխնախարարը գոհունակությամբ արձանագրել է, որ սպաների համար նախատեսված բնակարանները կառուցված են շինարարական արդի չափանիշներով, կահավորված են և ապահովված են անհրաժեշտ բոլոր հարմարություններով:

«Չենք լռելու» երիտասարդական նախաձեռնությունը, «Աղբ եթերից» մրցանակաբաշխության երրորդ ռաունդում հաղթող է ճանաչել «Արմենիա» հեռուստաընկերությամբ ցուցադրվող «Դժվար ապրուստ» հեռուստասերիալը` ամենօրյա եթերային լացուկոծի և կանանց հանդեպ որպես սովորական երևույթ ներկայացվող բռնության տեսարանների համար:

Ինչպես նախորդ անգամ, փոստի միջոցով «Դժվար ապրուստ» հեռուստասերիալի ստեղծագործական խմբին է ուղարկվել հաղթանակի մասին հավաստագիր, իսկ «Արմենիա» հեռուստաընկերությանը փակ ծրարով առաքվել է 100 դրամ` աղբահանության գումար: «Չենք լռելու»-ն խնդրում է հեռուստաընկերության ղեկավարությանը գումարը ստանալուց հետո ծախսել այն նպատակային:

Հիշեցնենք, որ «Աղբ եթերից»-ի առաջին մրցանակակիրը Հանրային հեռուստատեսությամբ հեռարձակվող «Աննա» սերիալն էր` սյուժեն տարիներով արհեստականորեն ձգձգելու և հեռուստադիտողի ճաշակի վրա ակնհայտ բացասական ազդեցություն ունենալու համար:

Երկրորդ հաղթողը «Շանթ»-ի «Բանակում» սերիալն էր` զինված ուժերում առկա ոչ կանոնադրական հարաբերությունները փայլուն և հումորային փաթեթավորումով որպես նորմա ներկայացնելու համար, ինչը մեծ խոչընդոտ է առողջ և կանոնադրական հարաբերությունների վրա հիմնված բանակ ստեղծելու ընդհանուր նպատակի իրականացման հարցում:

«Աղբ եթերից»-ի հաջորդ հաղթողը հայտնի կդառնա այս ամսվա վերջին, իսկ այսօրվա ֆավորիտ դարձած «Դժվար ապրուստ» հեռուստասերիալի մասին պատկերացում կազմելու համար նախաձեռնությունն առաջարկում է դիտել պատահականության սկզբունքով ընտրված մի հատված.

Հետաքրքիր է, որ նախաձեռնությունը աղբ է համարում հենց այն սերիալները, որոնք տվյալ հեռուստաընկերության եթերում ամենառեյտինգայինն են և տվյալ հեռուստաընկերության բոլոր ծրագրերի մեջ զբաղեցնում են առաջին հորիզոնականը: Իսկ ռեյտինգը, ինչպես գիտենք, գրանցվում է դիտումների քանակով: Ստացվում է, որ եթե նշված սերիալները աղբ են, ուրեմն մյուս հաղորդումները դրան էլ չեն հավակնում: