Հայաստանի հավաքականի դարպասապահ Ռոման Բերեզովսկին Իռլանդիայի հետ խաղից հետո ամենաընկճվածն էր և չէր կարողանում ուշքի գալ անհիմն կարմիր քարտից: Փորձառու դարպասապահը ArmSport.am-ի հետ զրույցում նշեց, որ մինչ օրս էլ դեռ ամբողջովին ուշքի չի եկել, թեև հայ ֆուտբոլասերների ինտերնետային ակցիաները 37-ամյա ֆուտբոլիստին զգալիորեն օգնել են:

— Ռոման, վերջին շրջանում Facebook-ում ստեղծվել են խմբեր, որոնցում հազարավոր հայ ֆուտբոլասերներ խնդրում են, կոչ են անում չհեռանալ Հայաստանի հավաքականից: Ի՞նչ կասես այս կապակցությամբ:
— Իռլանդիայի խաղից հետո շատ ծանր վիճակում էի և մինչ օրս էլ փորձում եմ դուրս գալ այդ վիճակից: Ինչ վերաբերում է սոցիալական ցանցերում ստեղծված խմբերին, ապա տեղյակ եմ դրանց մասին և կարող եմ ասել, որ շատ հաճելի է, որ հայ ֆուտբոլասերներն աջակցում են ինձ: Ես ինքս որևէ սոցիալական կայքից չեմ օգտվում, բայց տեղյակ եմ, որ հազարավոր երկրպագուներ նման ակցիայի են միացել, և դա շատ կարևոր էր ինձ համար այս դժվար պահին: Խոստումներ տալ չեմ կարող, քանի որ դեռ պետք է հստակություն լինի իմ ապագայում: Ես ցանկանում եմ շարունակել կարիերաս հավաքականում, բայց ամեն ինչ ինձանից չէ կախված:
— Իսկ ի՞նչը կարող է խանգարել:
— Ներկայիս ակումբի’ “Խիմկիի” հետ պայմանագիրն ավարտվում է 2012թ. ամռանը, որից հետո ամեն ինչ մշուշոտ է: Հավաքականի դարպասապահը պետք է ակումբում կայուն խաղային պրակտիկա ունենա, որ կարողանա ազգային թիմին օգտակար լինել:
— Այսինքն ամեն ինչ կախված է ակումբայի՞ն ելույթներից:
— Այո: Ես դեռ չգիտեմ, թե որտեղ կշարունակեմ ելույթներս: Հստակ առաջարկներ դեռ չկան: Դա է պատճառը, որ չեմ ցանկանում խոստումներ տալ:
— Վերջերս տեղեկություն ստացանք, որ պատրաստվում ես այցելել Կապան, որտեղից ժամանակին տեղափոխվել ես Ռուսաստան…
— “Գանձասար” ակումբի նախագահն է հրավիրել, որ այցելեմ: Ես համաձայնվել եմ, բայց դեռ չգիտեմ երբ կհաջողվի, քանի որ խաղացանկը խիտ է: Նախատեսված էր նոյեմբերին, բայց հավանաբար չի ստացվի: Առաջիկայում ազատ ժամանակահատված գտնելու դեպքում կայցելեմ:
— Հնարավո՞ր է կարիերադ շարունակես Հայաստանում:
— Այդ մասին չեմ մտածել: Հստակ պատկերացում չունեմ Հայաստանի առաջնության մակարդակի մասին և դժվար է ասել, թե արդյոք դարպասապահը Հայաստանում կարո՞ղ է անհրաժեշտ մարզավիճակում լինել:

Ըստ Ոստիկանության օպերատիվ հաղորդագրությունների ամփոփագրերի` անցած շաբաթվա ընթացքում՝ հոկտեմբերի 13-20-ը, հանրապետությունում արձանագրվել է ճանապարհատրանսպորտային 59 պատահար. 11 մարդ զոհվել է, 83-ը՝ ստացել տարբեր աստիճանի մարմնական վնասվածքներ:

Ըստ Համաշխարհային բանկի դասակարգման`տնտեսական առումով Հայաստանը նախորդ տարվա համեմատ 6 տեղով բարելավել է իր դիրքը՝ զբաղեցնելով 55–րդ տեղը 183 երկրների շարքում։
Հայաստանը առաջընթաց է արձանագրել դասակարգման 11 չափանիշներից 4–ի, հետընթաց՝ 7–ի գծով. երկիրը 10 տեղով առաջ է գնացել բիզնես սկսելու դյուրինության, 38 տեղով՝ շինարարության թույլտվությունների ստացման, 6 տեղով՝ հարկերի վճարման, 5 տեղով՝ վարկերի հասանելիության ոլորտներում, միաժամանակ, 2 տեղ հետընթաց է արձանագրվել էլեկտրացանցին միացման, 1 տեղով՝ մտավոր սեփականության գրանցման, նույնքան՝ արտաքին առևտրի դյուրինության, 27 տեղով՝ պայմանագրերի պայմաննեերի կատարման պարտադրման, 6 տեղով՝ սնանկացման ընթացակարգերի ոլորտներում։
ԽՍՀՄ երկրներից առաջատարը Վրաստանն է, որը 4 տեղով զիջել է դիրքը և դարձել 16–րդը։ Ադրբեջանն իր ցուցանիշը բարելավել է 3 տեղով և զբաղեցրել 66–րդ տեղը։ Դասակարգման մեջ Լատվիան 21–րդն է, Էստոնիան՝ 24–րդը, Լիտվան՝ 27–րդը, Ղազախստանը՝ 47–րդը, Բելառուսը՝ 69–րդը, Ռուսաստանը՝ 120–րդը, Ուկրաինան՝ 152–րդը, Ուզբեկստանը՝ 166–րդը։
Աղյուսակը կրկին գլխավորում է Սինգապուրը, որին հետևում են Հոնգկոնգը, Նոր Զելանդիան, ԱՄՆ–ը և Դանիան, եզրափակում` աֆրիկյան երկրներ Կոնգոյի Հանրապետությունը, Կենտրոն–Աֆրիկյան Հանրապետությունը և Չադը։

Այսօր լրագրողների հետ ժամանակ ՀԱԿ ներկայացուցիչ, տնտեսագետ Վահագն Խաչատրյանը,  անդրադառնալով հաջորդ տարվա ֆինանսական նախագծին ու ԱՊՀ Ազատ առևտրի գոտու ստեղծման պայմանագրին, ասաց, որ 2012թ. բյուջեն որևէ ամբիցիա չի պարունակում, ցանկություն էլ չեն ունեցել ցույց տալու, թե ինչ-որ բան են ուզում անել. «Պարզապես բյուջե են կազմել: Իրականում, երբ խորանում ենք, տեսնում ենք, որ շատ վտանգավոր նախաձեռնություն է: Կառավարությունն այն ծայրից չի սկսել, որից պետք է սկսեր: Կառավարությունը պետք է գնահատեր տնտեսական պոտենցիալը, արդյո՞ք այն մոտ 10 միլիարդ դոլարանոց տնտեսական պոտենցիալն է»,- ընդգծեց  Խաչատրյանը:

Անդրադառնալով բյուջեն 101 միլիարդ դրամով ավելացնելու կառավարության որոշմանը` ՀԱԿ ներկայացուցիչը հավելեց, որ այդ գումարը հավաքելու համար հարկավոր է քաղաքական որոշում, թե ումից պետք է հավաքվեն այդ գումարները. «Իսկ քաղաքական որոշման համար Սերժ Սարգսյանը պետք է հավաքի օլիգարխներին և ասի` վերջ, այսօրվանից աշխատում ենք ինվոյսներով, այսինքն սեւ շուկան պիտի էականորեն կրճատվի: Խաղի կանոնները պիտի փոխվեն: Հիմա կանոնները չեն փոխվում, իսկ գումարները փորձում են ավելացնել: Առաջանում է լուրջ պրոբլեմ, թե ում հաշվին պետք է արվի: Եթե չկա քաղաքական որոշում, հերթական անգամ այդ բեռն ընկնելու է մանր եւ միջին բիզնեսի վրա: Հերթական անգամ այդ մարդիկ ենթարկվելու են ճնշման,- ասաց բանախոսը,- եթե այդ ավելացման բեռը չի ընկնելու բոլորի, այդ թվում խոշոր տնտեսվարողների վրա, բյուջեն կարելի է շատ վատ գնահատել. շուստրիներն էլի մնալու են ստվերային դաշտում: Այս բյուջեն շատ բացասական ազդեցություն կունենա բիզնեսի վրա»:

Ըստ տնտեսագետի`Հայաստանի արտաքին պարտքը ևս անհանգստացնող և ռիսկային փաստ է. «ԱՄՆ-ի համար 100 տոկոսանոց կամ Ֆրանսիայի համար 120 տոկոսանոց արտաքին պարտքը միգուցե վտանգավոր չէ, սակայն Հայաստանի համար 40 տոկոսից ավելի արտաքին պարտքը ռիսկային է»,- նկատեց նա:

Պետական պարտքը 2012թ. կհասնի 4,764 միլիարդ դոլարի: Այս տարի եղել է 4,4 միլիարդ դոլար. «Սրա մոտ 80 տոկոսն արտաքին պարտքն է: Արտաքին պարտքը 2011-ին եղել է 3,8 միլիարդ, հաջորդ տարի կլինի 4,17 միլիարդ դոլար: Հաշվի առնելով, որ անցյալ տարի վերահսկիչ պալատը նշել էր, որ վարկի սպասարկումը 2013-ից դառնում է ռիսկային, կառավարությանը հորդորել էր, վարկեր վերցնելուց հաշվի առնել  այդ հանգամանքը»,- ասաց Խաչատրյանը:

Խաչատրյանի համոզմամբ` եթե կառավարությունը մտածեր Հայաստանի մասին, մի քանի սցենարներով բյուջե կներկայացներ, քանի որ բոլոր քաղաքակիրթ երկրներում այդպես են անում. «Ռուսաստանը, օրինակ, հաշվի առնելով նավթի գինը, երեք բյուջե է հաշվարկել: 2009-ին ես ասում էի, որ լուրջ չեն իրենք, չի կարելի ճոխությամբ բյուջե կազմել: Ընդամենը երկու ամիս անց տնտեսությունը 14 տոկոս անկում ապրեց: Աշխարհի տնտեսական միտումները հստակ չեն»,- հավելեց նա:

Դժվար է ասել կլինե՞ն դրական փոփոխություններ. դրական միտումներ հնարավոր կլինի տեսնել, երբ խաղի կանոնները փոխված լինեն:

Անդրադառնալով ԱՊՀ առևտրային հարաբերություններին`տնտեսագետն այն միտքն հայտնեց, թե  ստորագրած Ազատ առևտրի գոտու համաձայնագիրը որոշակի մտահոգությունների տեղիք է տալիս. խոսքը վերաբերում է ԱՊՀ Ազատ առևտրի գոտու ստեղծման պայմանագրին. «1994 թվականից այդ խոսակցությունները գնում են, ըստ էության, մենք գտնվում ենք այդ ռեժիմում: Երբ Հայաստան, Ռուսաստան կամ ԱՊՀ տարածքում ապրանքների տեղաշարժ է գնում, մի շարք ապրանքների գծով մենք հարկեր չենք վճարում: Ի վերջո, Ռուսաստանը` հատկապես Պուտինը, ինտենսիվ փորձում էր ստորագրել այդ համաձայնագիրը, և ի վերջո կարողացել է ստորագրել տալ»:

Համաձայնագիրը ստորագրել են ԱՊՀ ութ պետություններ, իսկ Ադրբեջանը, Թուրքմենստանը և Ուզբեկստանը չեն ստորագրել այն, ըստ  Խաչատրյանի` սա պատահական չէ. նրանք հրաժարվել են, որովհետև ուզում են հասկանալ, թե ինչ կտա այդ համաձայնագիրն իրենց, իսկ  Հայաստանի տնտեսության վերաբերյալ, այս պահին դժվար է որևէ ստույգ բան ասել:

Տնտեսագետի համար անհանգստացնողն այն է, որ  Հայաստանը Առևտրի համաշխարհային կազմակերպության անդամ է, որի անդամ չէ Ռուսաստանը: Հայաստանը որոշակի սահմանափակումներ ունի. « Գոնե հույս ունեմ, որ այնպիսի որոշումներ կընդունվեն, որ չեն հակասի ԱՀԿ-ին, որոնք կարող են տույժերի հանգեցնել»,- ասաց  ՀԱԿ ներկայացուցիչը:

Հիշեցնենք, որ ԱՊՀ երկրները պայմանավորվել են Ազատ առևտրի գոտու ստեղծման մասին: Փաստաթուղթը նախատեսում է մի շարք խմբերի ապրանքների արտահանման և ներմուծման մաքսատուրքի վերացում: Ռուսաստանի վարչապետի համոզմամբ` դրա արդյունքում գները կնվազեն:

Այսօրվա ասուլիսում կառավարությանն առընթեր Պետական գույքի կառավարման վարչության պետ Արման Սահակյանը հայտնեց, որ այս տարվա հունվարի 1-ի դրությամբ պետական գույքի հաշվառման գրանցամատյանում հաշվառված է 4220 անվանում անշարժ գույք, որից 703-ը դեռ չունի սեփականության իրավունքի պետական գրանցում:

2011թ.-ի առաջին կիսամյակում իրականացվել է 188 միավոր պետական անշարժ գույքի նկատմամբ սեփականության իրավունքի պետական գրանցում, 81 պետական ոչ առևտրային կազմակերպության հետ կնքվել է անհատույց օգտագործման պայմանագիր և ապահովվել պետական գրանցումը: Ընթացիկ տարվա առաջին կիսամյակում վարչությունն իրականացրել է համայնքների վարչական սահմաններում գտնվող պետական սեփականություն հանդիսացող շենքերի, շինությունների տակ գտնվող, ինչպես նաև դրանց սպասարկման և օգտագործման համար անհրաժեշտ հողամասերի պատկանելիության ճշգրտմանն ուղղված աշխատանքներ: Ուսումնասիրությունների արդյունքում պարզվել է, որ 4220 անվանում պետական անշարժ գույքից 605-ը գտնվում են կառավարության համապատասխան որոշումներով համայնքներին հանձնված հողամասերի վրա:
Դրա հետ մեկտեղ վարչությունը Էկոնոմիկայի նախարարություն է ներկայացրել 2010թ.-ի ֆինանսատնտեսական դիտարկումների հիման վրա շահույթով աշխատող 75 առևտրային կազմակերպությունների ցանկը, որոնցում առաջարկվել է ներդնել կորպորատիվ կառավարման կանոնագիրք:

Վարչությունը նպատակահարմար է գտնում լիազոր ներկայացուցիչների ինստիտուտը առաջնահերթ ներդնել «Կուրորտաբանության և ֆիզիկական բժշկության ԳՀԻ», «Գեոէկոնոմիկա» ընկերություններում (այս ուղղությամբ արդեն իսկ որոշակի քայլեր են արվում) ապա և էկոնոմիկայի նախարարության «Չափագիտության ազգային ինստիտուտ», առողջապահության նախարարության «Պրոֆ.Ռ.Օ. Յոլյանի անվ. արյունաբանական կենտրոն» և արդարադատության նախարարության «Պաշտոնական տեղեկագիր» ՓԲ ընկերություններում:

Անդրադառնալով «Սևան» հյուրանոցի կառուցմանը` բանախոսը հավաստեց, որ այն կհասնի իր տրամաբանական ավարտին ( հիշեցնենք, որ հյուրանոցը 1996 թ. վաճառվել է «Կարուսել Իստաբլիշմենթ» ընկերությանը, որը պատկանում է բրիտանահայ գործարար Վաչե Մանուկյանին):

Թեև պարտավորվել էին 5 տարվա ընթացքում կառուցել հյուրանոցը` այն մինչ այժմ կիսաքանդ վիճակում է:

Հ.Գ. Մեր ունեցած տեղեկություններով, Սևան հյուրանոցը պատկանում է Սամվել Կարապետյանին`Կալուգայի Սամոյին:

Երևանի Շահումյան հրապարակին հարող նախկին արդարադատության նախարարության շենքը, հրդեհվելուց հետո, վերածվել է ավերակի, իսկ դրա հարևան կառույցը՝ նախկին «Սևան» հյուրանոցը, երկար տարիներ ձեռքից ձեռք անցնելուց հետո, իր տարածքով եկել միացել է նախարարության կիսաքանդ շենքին. «Սևան» հյուրանոցի շարքում էր նախկին ԿԳ նախարարության շենքը: Հենց այս ամբողջ տարածքի սեփականատեր է դարձել «Տաշիր գրուպ»-ի սեփականատեր Սամվել Կարապետյանը:

Այս տարածքը նա, այսպես ասած, «չենջ» է արել. արդարադատության նախարարության կիսաքանդ շենքի տարածքը գնելու փոխարեն՝ դրա դիմաց խոստացել է նոր շենք կառուցել Մելիք-Ադամյան փողոցի վրա, որտեղ, հավանաբար, պետք է տեղավորվի արդարադատության նախարարությունը: Այս շենքից տարածք կստանա նաև Հատուկ քննչական ծառայությունը, որն արդեն քանի տարի է, տնվորի կարգավիճակով, հանգրվանել է ՀՀ գլխավոր դատախազության շենքում: Սակայն, այս պահին ո՛չ բարձրահարկ վարչական շենքի վերականգնման ավարտն է երևում, ո՛չ Շահումյանի հրապարակը կռնատ դարձնող կառույցի: Դե, Սամվել Կարապետյանն այն մարդը չէ, որին կարելի է ասել՝ աչքիդ վերևը հոնք կա. տարածքն իրենն է, շենքն իրենն է, երբ քեֆը տա՝ էն ժամանակ էլ կավարտի:

Դիմացը ամառ է. տարիներ շարունակ դատարկ ակնախոռոչների նման երևանցուն նայող կիսավարտ շինությունների ճակատագիրը կարծես այնքան էլ չի մտահոգում Երևանի քաղաքապետարանին: Ըստ լրատվական վարչության պետի՝ կիսակառույցներին հատկացվող ժամկետների լրանալուց հետո, շինության սեփականատերը կարող է դիմել քաղաքապետարան և ավելացնել ժամկետները: Տնտեսական ճգնաժամից հետո անավարտ շինությունների թիվը Երևանում անթույլատրելիորեն շատացել է: Առանց դրա էլ՝ կանաչ տարածքներից զրկված քաղաքը դարձել է փոշու ու կեղտի բույն: Սակայն քաղաքային իշխանությունները անզոր են, սեփականատերերը, որպես կանոն, այնպիսի ֆիգուրներ չեն, որոնց խաթրին կարողանա դիպչել քաղաքապետը:

Այսօր լրագրողների հետ հանդիպման ժամանակ Հայաստանի Գրողների միության նախագահ Լևոն Անանյանը կարծիք  հայտնեց, որ քաղաքականցված մթնոլորտում մտավորականի համար շատ դժվար է  կարծիք հայտնել. Ըստ Անանյանի` սովետական ժամանակաշրջանում մտավորակնները ծառայում էին որպես ագիտատոր, մյուս կողմից պետությունը ուշադիր էր մտավորականների հանդեպ. « Մենք տեսնում ենք, որ անկախությունից հետո փոխվել է մտավորականի դերը»,- ասաց նա։

Մտավորականությունը արտացոլում է նաև հասարակության իրական պատկերը,  ու  քանի որ իշխանությունները ձեռքերը լվացին մտավորականներից`նրանց ազատություն տրվեց շուկայական հարաբերություններում իրենց հարցերն ինքնուրույն լուծելու. «Մտավորականի կարևորությունը ստվերի մեջ է. մտավորականները, ինչպես և հասարակությունը, տարբաժանված է: Սակայն մենք պետք է միավորվենք, քանի որ կան արտաքին ու ներքին սպառնալիքներ, ամեն բնագավառում ես վտանգներ եմ տեսնում»,- ավելացրեց նա` նշելով, որ շուտով կսկսվեն նախընտրական բևեռցումները. վիճակը կթեժանա, իսկ «մենք մեր ներքին խնդիրները լուծելու համար, ցավոք, չենք դրսևորում էն կամքը, որը մեզ անդունդից կփրկի»:

Նրա համոզմամբ՝ ամեն մտավորականի խնդիրն է ԼՂՀ ազատության և անկախության հարցը «դարձնել միջազգային ճանաչման հիմք». «Անհրաժեշտ է բոլոր մեր պատմական քաղաքական բնույթի գրականությունը թարգմանել տարբեր լեզուներով, որ աշխարհը դրան ծանոթանա, ոչ թե դա լինի ներքին սպառման համար միայն»,- ընդգծեց նա:

Շատ վատ  է դիտվում այն իրողությունը, երբ մտավորականները կապվում են քաղաքականության հետ, քանի որ  այդ դեպքում դադարում են լինել մտավորական-ստեղծագործող. «լավ կլիներ, որ մտավորականները քաղաքականացված չլինեին, մյուս կողմից դա նրանց իրավունքն է, որոշելու հարցն է, այս կամ այն կերպ մտնել քաղաքականության մեջ», — համոզված է Անանյանը

Արմավիրի մարզում, հոկտեմբերի 18-ի առավոտյան, Մեծամորի ատոմակայանի մոտակայքով հոսող «Հրազդանի» ներքին ջրանցքում նկատվել է տղամարդու դի։

Հայաստանի ԱԻՆ փրկարար ծառայությունից  հայտնում են, որ դեպքի վայր է մեկնել մարզային փրկարար ջոկատը։

Փրկարարները ջրանցքից դուրս են բերել Երեւանի Օհանով փողոցի թիվ 30 շենքի 2-րդ բնակարանի բնակիչ, 62-ամյա Ռուբեն Հովհաննեսի Եղիազարյանի դին եւ հանձնել ոստիկանության աշխատակիցներին:

Այսօր մենք արդեն անդրադարձել ենք «Նաիրիտի»  խնդրին, նշել որ այս պահին ոչինչ էլ չի արվում աշխատավարձերի խնդիրը լուծելու համար:

Նշել ենք նաև, որ Նաիրիտում ճամպրուկային տրամադրություն է:Թե խաղեր են տարվում երբեմնի արդյունաբերական հսկայի ճակատագրի շուրջ այս պահին մշուշով է պատված: Նշենք, որ այսօր լեհական «Սավեքս» ընկերությունը, որ «Նաիրիտի» կառավարման օպերատորի դերը ստանձնելու հայտ էր ներկայացրել
կրկին ակտիվություն է ցուցաբերել: «Սավեքս» ընկերությունը, այս հարցում արդեն փորձ ունի, սակայն ժամանակին բանակցությունները դրական արդյունք չունեցան:

ՀՀ-ում Լեհաստանի դեսպան Զդիսլավ Ռաչինսկին հայտարարել է, թե լեհական բոլոր այն ընկերությունները, որոնք մինչ օրս համագործակցել են «Նաիրիտի» հետ, շարունակում են հետաքրքրություն ցուցաբերել և վերլուծական աշխատանքներ են իրականացնում` հետագայում ներդրումներ կատարելու համար: Միաժամանակ, դեսպանը որևէ ժամկետ չի նշել՝ ասելով, թե արդյունքների մասին կարելի կլինի խոսել 1 տարվա ընթացքում:

Այսօր Գյուղատնտեսության նախարարության Սննդի անվտանգության պետական ծառայության, Սննդի անվտանգության և որակի վերահսկողության տեսչության պետ Արթուր Վարժապետյանը ասուլիսում իրականությանը չհամապատասխանող մի դիտարկում արեց. Երևանի Խորենացու փողոցի մսի կրպակաշարում (ԳՈՒՄ-ի շուկայի մոտ գտնվող) այս տարվա հունիսին անցկացված մշտադիտարկումից հետո կրպակների 80%-ը վերականգնել է գործունեությունը` ապահովելով առևտրի սանիտարահիգիենիկ պատշաճ պայմաններ: Ընդհակառակը`այդ կրպակները 80 տոկոսով մնացել են նույնը, ավելին` այնտեղ ընդամենը կոսմետիկ մի քանի դետալներ են փոխվել, իսկ հակասանիտարական վիճակը չի բարելավվել:Հետաքրքիր է, ե՞րբ է պարոն Վարժապետյանը այցելել կրպակաշար, կամ եղել է այնտեղ երբևէ:

Ընդամենը երեկ մսի կրպակների մոտով անհնարին էր քայլել, ստիպված փոխել եմ  մայթը, կեղտաջրերը, գարշահոտությունը կենդանիների փորոտիքը…ոչինչ չի փոխվել:

Իսկ տեսչության պետն ասում է, թե կրպակատերերի վրա ազդեցություն է թողել առաջին հերթին մասնագետի խոսքը, այլ ոչ տուգանվելու վտանգը: Ոչ մեկը, ոչ մյուսը վիճակը չեն շտկել, դրանում կարող է համոզվել, յուրաքանչյուրը` ով կհամարձակվի անցնել կրպակաշարի կողքով:

Տեսչության պետը հավատացնում է , որ կրպակաշարում սառնարանից դուրս միս չի պահվում, միսն իրացվում է անասնաբուժական փորձաքննության ենթարկվելուց հետո: Սա էլ մեղմ ասած չի համապատասխանում իրականությանը: Ըստ նրա  ընթացքի մեջ է կրպակներում պաշտպանված լուսավորության (պլաֆոն) հարցի լուծումը. «Կրպակատերերն ասում են, որ ոչ ճիշտ լուսավորությունը փոխում է մսի գույնը»:Իսկ միգուցե՞ հենց դա է պատճառը, որ միսը, ինչպես փորձում է հավատացնել Վարժապետյանը վաճառում են գրեթե դրսում, բնական լույսի տակ:

Ինչևէ, կամ տեսչության պետը չի տիրապետում իրավիճակին, որն այս նախարարության համար նորություն չէ, ու կարծես գործելաոճ է դարձել, կամ նա թյուրիմացության մեջ է, ու դա հրամցնում է հանրությանը:

Հայաստանի կառավարությունը քննարկում է հարկային փոփոխությունների նոր փաթեթը, որն, ամենայն հավանականությամբ, հոկտեմբերի վերջին կուղարկվի խորհրդարան: Այդ մասին այսօր` հոկտեմբերի 18-ին, լրագրողներին ասաց ՀՀ ֆինանսների նախարար Վաչե Գաբրիլյանը: Նրա խոսքով` քննարկվում են ինչպես հարկային բեռի մեծացման, այնպես էլ ստվերի կրճատման հաշվին հարկային հավաքագրումների ավելացման հնարավորությունները:

Մասնավորապես` նախատեսվում է ակցիզային դրույքների վերանայում: Քանի որ որոշ ակցիզներ հաստատագրված վճարների տեսքով են եղել, գների բարձրացումից հետո կարիք կա դրանք վերանայել: «Օրինակ` կան ապրանքներ, որոնց գինը 100 միավոր էր, իսկ ակցիզը` 10 դրամ: Հիմա գինը բարձրացել է 180 դրամ, բայց ակցիզը նույն 10 դրամն է մնացել: Եթե այդ ակցիզը բարձրացնենք, դա հարկի բարձրացում չէ, այլ ճշգրտում»,- ասաց Վ. Գաբրիելյանը:

Բացի այդ, նախարարի խոսքով, ԱԺ-ում շրջանառության մեջ է գտնվում հանքարդյունաբերության մեջ հարկային ռեժիմի փոփոխության վերաբերյալ օրինագիծ, որը նույնպես կարելի է հարկային նոր փաթեթի մաս համարել: Դրանով ճշգրտվում է ռոյալթիների ռեժիմը, որը ոչ միայն բյուջեի համար կապահովի եկամուտների աճ, այլեւ կխրախուսի օտարերկրյա ներդրումների մուտքը: