Կենտրոն և Նորք Մարաշ համայնքների ընդհանուր իրավասության դատարանի’ նախօրեին ուշ երեկոյան կայացած նիստում որոշվել է ևս երկու ամսով երկարաձգել ՀՀ ոստիկանության քրեական հետախուզության գլխավոր վարչության նախկին պետ, ոստիկանության գեներալ-մայոր Հովհաննես Թամամյանի կալանքի ժամկետը: Արդեն երրորդ անգամն է, որ կալանքը երկարացնելու որոշում է կայացվում:
Միջնորդությունը ներկայացրել էր ՀՔԾ-ն դեռ սեպտեմբերի 14-ին:

«Լիահույս եմ, որ Եվրամիությունը նախարարների խորհրդի արտոնությամբ Հայաստանի հետ կարճ ժամանակում կտա վիզային ռեժիմի դյուրացման մեկնարկը: Եթե մենք շահագրգիռ ենք հարաբերությունների հզորացմամբ տարածաշրջանային երկրների հետ, ապա կարևոր բաղադրիչ է մարդկանց ազատ տեղաշարժի հարցը, որին մեծ կարևորություն ենք տալիս»,-հայտարարեց  Հայաստանում Գերմանիայի արտակարգ և լիազոր դեսպան Հանս Յոխեն Շմիդթն լրագրողների հետ հանդիպման ժամանակ`հույս հայտնելով, որ Վարշավայում Արևելյան գործընկերության երկրների և Եվրամիության ներկայացուցիչների գագաթնաժողովից հետո դրական տեղաշարժեր կլինեն:

Դեսպանի խոսքով Եվրամիության անդամ պետությունների մեծամասնությունը շահագրգիռ է Հարավային Կովկասի երկրների հետ հարաբերությունների զարգացմանն ու ամրապնդմանը: Իրենք կշարունակեն իրենց ուժերի ներածին չափ օգնել Հարավային Կովկասի տնտեսության զարգացմանը :Նա համոզված է, որ  արտագաղթն ընդհանրապես կանխելու համար պետք է տնտեսության զարգացում ու կայունացում,աշխատատեղերի ստեղծում:

«Վիկիլիքս»-ի հրապարակումների մասին խոսելիս  Շմիդթը նշեց, որ դրանք, իրոք, մեծ արձագանք ունեցան, սակայն անհրաժեշտ է առաջ գնալ և վստահություն վայելելու համար շարունակել նույն թափանցիկ  աշխատանքը : «Պետք է աշխատենք այնպես, որ պետությունը վստահի մեզ մեր գործառույթների մեջ` հանուն ժողովրդավարական զարգացումների այդ երկրում»,- ընդգծեց դեսպանը:

Մոսկվայի իրավապահները ձերբակալել են երեք մարդու, ովքեր կասկածվում են երեկ տաքսու հայազգի վարորդ Սերգեյ Ավանեսյանի սպանության մեջ։

Երեկ առավոտյան Պոլետաևի փողոցում մի աղբարկղում հայտնաբերել էին Ավանեսյանի դին` հրդեհված վիճակում։ Նրա մեքենան գտնվել էր մի քանի թաղամաս հեռու։ Ռուսաստանի տարբեր մարզերից մայրաքաղաք եկած հանցագործները Ավանեսյանին թալանել են ու գողացել մեքենան։ Պարզվել է, որ Ավանեսյանը Մոսկվայում սեփական մեքենայով տաքսիստ էր աշխատում։

Ըստ «Ժողովուրդ» օրաթերթի իրազեկ աղբյուրների, օրերս Եղվարդում խողովակների գողության կասկածանքով ձերբակալված երկու անձանցից մեկը, ՀՀ Վճռաբեկ դատարանի քրեական պալատի նախագահ Դավիթ Ավետիսյանի եղբայրն է։

Վերջինս, ի դեպ, նաև Ավետիսյանի վարորդն է, որը դեպքի հաջորդ օրն ազատվել է աշխատանքից։ Թերթին հայտնի է դարձել, որ Դավիթ Ավետիսյանի եղբոր նկատմամբ դատարանը խափանման միջոց է կիրառել ստորագրությունը՝ քաղաքից չբացակայելու վերաբերյալ, իսկ նրա հանցակցին դատարանը երկու ամսով կալանավորել է։

ՀՀ ոստիկանության հասարակության հետ կապերի վարչությունից հաստատել են այն տեղեկությունը, որ Եղվարդում մի քանի օր առաջ խողովակների գողություն է եղել, որի կատարողնորից մեկը կալանավորված է, մյուսը ստորագրությամբ ազատ է արձակվել

Այսօր` սեպտեմբերի 15-ին, Հայաստանի եւ Արգենտինայի միջեւ ստորագրվելիք վիզային ռեժիմի վերացման մասին համաձայնագիրը նոր հնարավորություններ կբացի համագործակցության համակողմանի զարգացման համար:

Այս մասին այսօր, Երեւանում, հայտարարել է Հայաստանի ԱԳ նախարար Էդվարդ Նալբանդյանը` Արգենտինայի ԱԳ փոխնախարար Ալբերտո դե Ալոտոյի հետ հանդիպման ժամանակ:

ԱԳՆ մամուլի ծառայությունից հայտնում են, որ Արգենտինայի ԱԳ փոխնախարարը Հայաստան է ժամանել միջգերատեսչական խորհրդատվությունների անցկացման նպատակով: Հանդիպման ժամանակ Նալբանդյանը նշել է, որ երկու երկրների փոխհարաբերությունները դրված են ամուր հիմքերի վրա, հաճախակի են բարձր մակարդակի փոխայցելությունները, գոյություն ունի լայն իրավապայմանագրային հենք,  միջազգային կազմակերպություններում արդյունավետ համագործակցություն,  տնտեսական ակտիվ փոխգործակցություն:

Ալբերտո դե Ալոտոն, ընդգծելով, որ իր երկրում ամենաջերմ եւ բարեկամական վերաբերմունքն են տածում Հայաստանի ու հայ ժողովրդի նկատմամբ, ասել է, որ Արգենտինան շարունակելու է Հայաստանի հետ հարաբերությունները խորացնելու քաղաքականությունը: Զրույցի ընթացքում Էդվարդ Նալբանդյանն ու Ալբերտո դե Ալոտոն քննարկել են քաղաքական, տնտեսական, մշակութային երկկողմ հետաքրքրություն ներկայացնող հարցերի լայն շրջանակ:

Հանդիպման ընթացքում կողմերը կարեւորել են միջխորհրդարանական կապերի ամրապնդումը, ինչպես նաեւ միջազգային կազմակերպությունների շրջանակներում առավել սերտ համագործակցությունը: Էդվարդ Նալբանդյանը ներկայացրել է արցախյան հիմնախնդրի կարգավորման բանակցային գործընթացի վերջին զարգացումները, անդրադարձել է տարածաշրջանային խնդիրների նկատմամբ Հայաստանի մոտեցումներին: Հանդիպումից հետո տեղի է ունեցել փաստաթղթերի ստորագրման արարողություն, որի ընթացքում Էդվարդ Նալբանդյանն ու Ալբերտո դե Ալոտոն ստորագրել են «Հայաստանի Կառավարության եւ Արգենտինյան Կառավարության միջեւ Սովորական անձնագրերի դեպքում մուտքի արտոնագրի պահանջի վերացման մասին Համաձայնագիրը», ՀՀ ԱԳՆ դիվանագիտական դպրոցի տնօրեն Վահե Գաբրիելյանը եւ Ալբերտո դե Ալոտոն՝ «ՀՀ ԱԳՆ Դիվանագիտական դպրոցի եւ ԱՀ արտաքին գործերի, միջազգային առեւտրի եւ պաշտամունքի նախարարության Ազգային արտաքին ծառայության ինստիտուտի միջեւ փոխգործակցության Համաձայնագիրը» եւ ՀՀ Մշակույթի փոխնախարար Արթուր Պողոսյանը եւ Ալբերտո դե Ալոտոն՝ «2011-2015թթ. Հայաստանի Հանրապետության եւ Արգենտինյան Հանրապետության միջեւ մշակութային համագործակցության մասին ծրագիրը»:

Ինչպես գրում է «Московские новости» թերթը, Մոսկվայում իրավապահները ձերբակալել են Վարդեն մականունով հայտնի վրացի «օրենքով գող» Մալխաս Ապցիաուրիին։ 41–ամյա Վարդենը ձերբակալվել է Մոսկվայի առևտրային կենտրոններից մեկի մերձակայքում։ Խուզարկության ժամանակ նրա մոտ հայտնաբերվել է մոտ 4 գ հերոին։

Թերթը նշում է, որ ժամանակին «օրենքով գողերը» «գահընկեց» են արել Վարդենին, սակայն նա չի ճանաչում քրեական հեղինակությունների կողմից կայացված որոշումը։

Վարդենը, որին Ռուսաստանի իշխանություններն առաջիկայում արտահանձնելու են Վրաստանին, Մոսկվայում վերահսկում էր բնակարանային գողությամբ զբաղվող հանցավոր խմբավորումներին։

Երեկ ակտիվորեն քննարկվում էր,այն փաստը, որ  սոցիալական ցանցերի վերահսկողությամբ զբաղվելու է  Հավաքական անվտանգության պայմանագրի կազմակերպությունը: Թե ինչի կբերի դա, առայժմ իրենք էլ չեն պատկերացնում, բայց որ լուրջ անհանգստացած են ու ԱՊՀ տարածքում նախապատարստվում է լուրջ գրոհ սոցիալական ցանցերի վրա, արդեն չեն թաքցնում:

«Դուք երևի հիշում եք, որ Լոնդոնում տեղի ունեցած հուզումները հրահրված էին նաև սոցիալական ցանցերում արված հայտարարություններով: Այդ պատճառով պետք է վերահսկողություն լինի: Սակայն դա պետք է արվի բանականության շրջանակներում` հաշվի առնելով քաղաքացիների շահերը և ազատությունները»,-  այսօր Մինսկում կայացած  ԱՊՀ անդամ երկրների գլխավոր դատախազների հավաքի ժամանակ, հայտարարել է  Ռուսաստանի գլխավոր դատախազ Յուրի Չայկան: Բելառուսիայի նրա գործընկերն էլ ասել է, թե այս խնդիրը պետք է լուծում ստանա ՄԱԿ-ի մակարդակով:

Դատախազները եկել են այն համոզման, որ սոցիալական ցանցերը մեծ վտանգ են ներկայացնում ծայրահեղականության և այլ քրեական ու վտանգավոր գաղափարների տարածման համար:
Համենայնդեպս տարբեր մակարդակներով արվող հայտարարությունները վկայում են, որ իրավապահներն իրոք անհանգստացած են:

Հաղորդում է NEWSRU.com կայքը

Մեծարգո Սերժ Սարգսյան      Թույլ տվեք մեզ՝ մի խումբ  մտավորականներիս ու հասարակական կազմակերպություններիս, դիմել Ձեզ մի մարդասիրական խնդրանքով:

Վերջին տարիներին տեղական մամուլում հաճախ է արծարծվում Հայաստանում ցմահ ազատազրկվածների հարցը: 2009 թ.-ին 13.000 քաղաքացիների ստորագրությամբ դիմում հանձնվեց ՀՀ նախագահի նստավայր, Հանրային խորհուրդ, նաև պետկան ատյաններ, որտեղ ցմահ դատապարտյալները խնդրում են Ձեր և պատկան մարմինների ուշադրությունը հրավիրել Հայաստանում ցմահ ազատազրկվածների հարցին: Մտահոգիչ է, բայց և փաստ, որ ՀՀ-ում առկա են մոտ 100 ցմահ ազատազրկման դատապարտվածներ: ԵԽ Մարդու իրավունքների հանձնակատար Թոմաս Համմարբերգը, անդրադառնալով նույն խնդրին, նույնպես արտահայտեց իր մտահոգությունն այս հարցի առնչությամբ: Սլովենիան, օրինակ, մոտավորապես Հայաստանի չափ բնակչություն ունի, սակայն ցմահ դատապարտյալների թիվը վեցն է: Հաշվի առնելով այն հանգամանքը, որ Հայաստանում ցմահ դատապարտյալների գործերի վերանայման նախադեպ չկա, մեզանում չի կիրառվում նաև ԴՆԹ թեսթը՝ որպես նմանօրինակ գործերի վերաբացման հիմք, /ինչպես արվում է արտերկրի շատ երկրներում/, ուստի խնդրում և առաջարկում ենք ներման ինստիտուտի միջոցով կատարել առաջին քայլը այս բարդ իրավիճակը մեղմելու համար:

Ցանկանում ենք Ձեր ուշադրությունը հրավիրել 15 և ավելի տարիներ իրենց պատիժը կրող, մեկ անձի սպանության մեղադրանքով մահապատժի, ապա ՀՀ նախագահի  2003 թ-ի հրամանագրով ցմահ ազատազրկման դատապարտվածների ճակատագրին: Նրանք ընդամենը մի քանիսն են:

Չցանկանալով ստանձնել դատավորի դեր՝ այդուհանդերձ, հիշեցնենք, որ այդ դատավարություններն ընթացել են Հայաստանի նորանկախ հանրապետության ձևավորման առաջին տարիներին, որտեղ պետական համակարգերը սաղմնավորման փուլում էին:

2011 թ.-ը հոբելյանական է մեր 20-ամյա հանրապետության համար: Քաղաքակիրթ աշխարհում ներման ինստիտուտը տոների կապակցությամբ մեծ տարածում ունի և վկայում է պետության ղեկավարի մեծահոգության ու մարդասիրության մասին:

Մեծարգո Սերժ Սարգսյան, ապավինում ենք Ձեր մեծահոգությանը և Հայաստանի Հանրապետության անկախության 20-րդ տարեդարձի կապակցությամբ թախանձագին խնդրում ենք կիրառել Ձեր սահմանադրական բացառիկ իրավունքը և ներում շնորհել 15 և ավելի տարիներ իրենց պատիժը կրող, մեկ անձի սպանության մեղադրանքով մահապատժի, ապա ՀՀ նախագահ Ռ. Քոչարյանի 2003 թ.-ի հրամանագրով ցմահ ազատազրկման դատապարտված անձանց՝ դրանով իսկ փոքր-ինչ մեղմելով Հայաստանում ցմահ ազատազրկման դատապարտվածների խնդիրը:

Հ.Գ. Դմում-խնդրանքի տակ ստորագրել են 30 մտավորական ու 8 հասարակական կազմակերպությունների նախագահներ:

Պատից թե՛ այս, թե ՛այն կողմ բոլորս էլ ապրում ենք… ապրում մինչև մահ: Խնդիրն ազատությա՛ն մեջ է…

Ժողովրդի կողմից ընտրված մարդիկ Ազգային Ժողովում օրենքներ են գրում թղթերի վրա, հետո նույն այդ ժողովրդի կողմից ընտրվածները այդ օրենքներին ուժ են տալիս…

Ի՞նչ է նշանակում այդ ուժ տալը, եթե իրական կյանքում շատ օրենքներ այդպես էլ կիրառություն չեն ստանում:

Միջին ու ավագ սերնդին լավ հայտնի է նախորդ դարի 90-ականների Հայաստանը պատից այն կողմ, իսկ պատից ա՞յս կողմ…

Հայաստանը մորատորիում էր հայտարարել 1991 թ-ին. դա նշանակում էր, որ մահապատիժը մեր երկրում չէր իրականացվում, մինչդեռ… այն պարզապես գնդակահարությամբ չէր ի կատար ածվում, այլ…

Հասարակության անունից պետությունն այլ տարբերակով էր սպանում պատից այս կողմ, այնտեղ, որտեղից հիմա ես եմ գրում:

1997 թվին «Նուբարաշեն» մեկուսարանի 5-րդ հարկում 5 խցերում պահվում էին 24 մահապարտներ: Մի օր առավոտյան մոտեցող աղմուկի ձայներ լսվեցին: Քիչ անց մահապատժի դատապարտվածների դիմաց դիմակավորներ էին կանգնած` մահակներով զինված: Դեռ դուռը չբացած`գոռացին. «Բոլորդ շարվեք պատի տակ` դեմքով դեպի պատը»:

Մահապատժի դատապարտվածներից շատերը դեռ քնած էին և միանգամից չհասկացան` ինչ է կատարվում: Իմ հետ միասին ևս երեքը կային խցում:  Աչքի պոչով նայում էինք: Դիմակավորներից մեկը մոտեցավ ու կողքիս կանգնած մոտ 60 տարեկան մահապարտի գլխին ամբողջ ուժով մահակով խփեց. «Քեզ չասեցի՞ն պատին նայի»: Դիմակավորը գոռում էր ու շարունակում արդեն գետնին ընկած մարդուն ոտքերով խփել:

Միայն մեկն էր առանց դիմակի`համազգեստով ու գնդապետի ուսադիրներով: Երբ ներս էին մտնում, նկատեցի, որ նրա մոտ ատրճանակ կար:

-Հիմա ինձ լսեք. էսօր, հենց ստեղ էլ ձեզ գնդակահարելու ենք: Թե ուզում եք` աղոթե՛ք, մի՛ րոպե ունեք:

Մի ամբողջ րոպե…ի՞նչ անել…աղոթե՞լ, թե՞…

Նույնը կատարվում էր մահապարտների մյուս խցերում: Տարիքով մահապարտներից մեկը վախից տակն էր թրջել, մյուսը` ծնկի էր իջել, խնդրում էր իրեն չսպանել, ջահելներից մեկը հայհոյում էր դիմակավորներին: Բոլոր մահապարտներին մոտ երկու ժամ դաժանաբար ծեծում էին` մահակներով, ոտքերով, ձեռքերով: Խցի հատակը արյունոտ էր…

Այս ջարդից հետո, մոտակա ամիսներին մահացավ ևս չորս մահապարտ: Ժամանակ առ ժամանակ ջարդերը շարունակվում էին և անմարդկային պայմանների հետ միասին` սով,արևի լույսի բացակայություն, սառնամանիք ու ահավոր տոթ, մահապատժի վճիռները իրականացվում էին այս կերպ:

Վերադառնանք մեր օրերը: 2011 թ-ի մայիսի 23-ին ԱԺ-ում ընդունվեց «ՀՀ քրեական օրենսգրքում փոփոխություններ կատարելու մասին» օրենքը: Կարդացեք ներքևում գրված ՀՀ նախագահին ուղղված դիմումը և պարզ կդառնա` խոսքն ինչի մասին է:

Վերջերս ցմահ դատապարտյալ Էմիլ Վերդյանը հացադուլ հայտարարեց ի նշան բողոքի, որ ցմահների գործերի պատշաճ վերանայում սկսվի հիշյալ փոփոխությունների շրջանակներում: Նա հեռու գնաց ևանգամ երակները կտրեց:

Օրերս ևս երեք մարդ դատապարտվեց ցմահ ազատազրկման, և այժմ Հայաստանում 100-ից ավելի ցմահ դատապարտյալ ունենք:

Թե ինչու էին 90-ականներին նման հարցերը լուծվում օրենքին հակառակ,մեր հասարակությունն արդեն գիտի: Իսկ ինչպե՞ս են այսօր հարցերը լուծվում, ինչպե՞ս են իրականացվում ընդունվող օրենքները մեր անկախ Հայաստանում:

ԲԱՑ ՆԱՄԱԿ ՀՀ ՆԱԽԱԳԱՀԻՆ

Հարգարժան ՀՀ նախագահ պարոն Սերժ Սարգսյան

Հայաստանի դատաիրավական համակարգն արդեն 19 տարի բարեփոխումների է ենթարկվում, սակայն նույն այդ բարեփոխումների համատեքստում անկախ Հայաստանի դատական «կենսագրության» մեջ չկա ցմահ ազատազրկման դատապարտվածների գործերի վերանայման նախադեպ: Դատական սխալների հավանականությունն ընդունում են անգամ ամենազարգացած երկրներում, որտեղ պարբերաբար կատարելագործվում են դատական համակարգերը: Արդյունքում` վերաբացվում են տասնյակ գործեր, և շատ ցմահ կամ մահվան դատապարտվածներ հաճախ ճանաչվում են անմեղ կամ մեղմացվում են նրանց պատժաչափերը:

Ինչո՞ւ Հայաստանում մեր արդարադատությունը, դատաիրավական համակարգը չեն ընդունում դատական սխալների հավանականությունը և չեն անդրադառնում դրանց սխալներին ու հետևանքներին:

Մտահոգիչ է, որ փոքրաքանակ բնակչություն ունեցող Հայաստանում 100 ցմահ դատապարտյալ կա, իսկ 17-ն արդեն մահացել են երկար  տարիներ անմարդկային պայմաններում գոյատևելուց հետո:

Անդրադառնալով Ռ.Քոչարյանի կողմից իրականացված ներմանը` ակնառու է մեկ հանգամանք, որի մասին ժամանակին և մինչ օրս էլ բարձրաձայնում են իրավաբաններ, իրավապաշտպան կազմակերպություններ. այն է` ՀՀ նախագահի սահմանադրական բացառիկ իրավունքն է ներում շնորհել ցանկացած դատապարտյալի, սակայն պատժաչափ փոխելու լիազորությունը դատարանին է: Իսկ ներման դեպքում, իրավաբանական հայտնի դրույթի համաձայն, որպես մեղմացում նախկին մահապարտներին պետք է տրվեր քրեական գործերի անհատական վերանայման հնարավորություն և տրվեր նախկին Քր.Օր.-ով առավելագույն համարվող պատժաչափը, այն է` 15տարի:

2010թ-ին ՀՀ Գլխավոր դատախազը «ՀՀ Քրեական օրենսգրքում փոփոխություններ ու լրացումներ կատարելու մասին» նախագիծ ներկայացրեց, որն արժանացավ Կառավարության հավանությանը: Այս տարվա մայիսի 23-ին այն ընդունվեց ԱԺ-ի և վավերացվեց ՀՀ նախագահի կողմից: Փոփոխությամբ 104-րդ հոդվածի 2-րդ մասով ազատազրկում է սահմանված 12-20 տարի ժամկետով կամ ցմահ ազատազրկում: Փոփոխությունը հիմնավորված է նրանով, որ հանրապետությունում վերջին տարիներին կատարված սպանությունների և դրանցով դատարանների կողմից կայացված դատավճիռների ուսումնասիրությունները ցույց են տալիս, որ շատ դեպքերում կատարված արարքի համար ցմահ ազատազրկումը կարող է լինել խիստ պատիժ, բայց միաժամանակ 15 տարի ազատազրկումն էլ մեղմ պատիժ է: Օրենքի փոփոխությամբ առավելագույն պատժաչափ է սահմանվել 20 տարին` նախկին 15-ի փոխարեն:

Օրենքի այս փոփոխությունը ներկայիս ցմահ դատապարտվածների համար միանշանակ մեղմացում է. փաստում են մի շարք իրավաբաններ: Եվ քանի որ, ըստ Քր.Դատ. Օր.-ի հայտնի դրույթի, մեղմացնող օրենքները հետադարձ ուժ ունեն, հետևաբար այս պրոցեսին պիտի հետևի գործերի վերանայում: Տրամաբանությունն, ըստ մասնագետների, հետևյալն է. եթե ներկայիս ցմահ դատապարտյալները, որոնցից 38-ը նախկին մահապարտներ են, դատապարտվեին մեր օրերում, միգուցե նրանց արարքին համարժեք լիներ ոչ թե ցմահ ազատազրկումը, այլ 16,17…, այսինքն` մինչև 20 տարի ազատազրկում, ինչպես և նախատեսում է ներկայիս օրենքը:

Արդյո՞ք արդարացի է, երբ Հայաստանում մահապատժի, իսկ հետո ցմահ ազատազրկման են դատապարտում ինձ` 20 տարեկան երիտասարդիս, ով իրական մարդասպանի կեղծ ցուցմունքների  հիման վրա մեղադրվեց մեկ մարդու սպանության մեջ և 1996 թ-ին դատապարտվեց մահապատժի, և նույն պատժին`ցմահ ազատազրկման են ենթարկվում նաև բազմակի դատվածություններ ունեցող, բազմաթիվ սպանություններ, ահաբեկչություն կատարած անձինք:

Իրական մարդասպանը 15 տարի, չնայած գաղութում, բաց երկնքի տակ և հողի վրա քայլերով անցկացնելուց հետո արդեն ազատության մեջ է: Իսկ ես 16-րդ տարին է` բանտի խցի երկաթբետոնե պատերի մեջ տառապում եմ չարած հանցանքի համար:

Հարգարժան ՀՀ նախագահ պարոն Սերժ Սարգսյան, իմ քրեական գործի վերանայման խնդրանքով այս 16 տարիներին իմ ընտանիքը և անձամբ ես բազմաթիվ դիմումներ ենք ուղղել ՀՀ բոլոր նախագահներին, տարբեր իրավասու ատյաններ` գործի վերանայման խնդրանքով, սակայն անարդյունք: Տրվում էր ստանդարտ պատասխան` անհրաժեշտ են նոր ի հայտ եկած հանգամանքներ: Իսկ այժմ, օրենքի փոփոխությամբ, առաջացել է գործի վերանայման բացառիկ հնարավորություն:

Մեծարգո նախագահ Սերժ Սարգսյան, դիմում եմ Ձեզ խնդրանքով, որպեսզի վերանայվի իմ քրեական գործը և նշանակվի իմ արարքին համարժեք պատժաչափ:

Հարգանքով` Մհեր Դավթի Ենոքյան

«Նուբարաշեն»  ՔԿՀ

Հ.Գ. Բաց նամակով հանդես գալուս պատճառն այն է, որ արդեն 16-րդ տարին իմ ու իմ ընտանիքի կողմից ՀՀ բոլոր երեք նախագահներին ուղղված դիմումները հասցեատերերին այդպես էլ չեն հասնում:

Հայաստանի հատուկ քննչական ծառայությունը վաղը միջնորդություն է ներկայացնելու Երևանի Կենտրոն և Նորք-Մարաշ վարչական շրջանների ընդհանուր իրավասության դատարանին` ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի կալանքը երկարաձգելու համար:

Հիշեցնենք, որ Թամամյանը անազատության մեջ է գտնվում մարտի 24-ից, և նրա կալանքի ժամկետն ավարտվում է սեպտեմբերի 18-ին: Ի դեպ, սա արդեն երրորդ միջնորդությունն է, որը ներկայացնում է ՀՔԾ-ն։