ՀՀ ԿԱ պետեկամուտների կոմիտեի մամլո ծառայությունը հաղորդագրություն է  տարածել, որում ասվում է.

«Կոտայքի տարածքային հարկային տեսչության առջև հավաքված անձանց գործողությունները՝ վարկաբեկիչ մեղադրանքով, կարող են բնորոշվել միայն որպես անձնական, իսկ ավելի կոնկրետ` որոշ անձանց շահագրգռվածություն: «Հարկային տեռորի» կամ «գործ սարքելու» մասին նրանց գնահատականները ոչ այլ ինչ են, եթե ոչ սեփական մեղքը թաքցնելու համար նախահարձակ լինելու վկայություն: Տեսչություն ներխուժել ցանկացող անձանց խմբին առաջնորդող անհատ ձեռնարկատեր Ռայա Մուշեղի Ղահրամանյանը փորձել է այսպիսով խուսափել իր անօրինական գործելաոճը բացահայտած հարկային մարմնի օրինական պահանջի կատարումից:

Խնդիրը հետևյալն է.

Հիմք ընդունելով մանրամեծածախ առևտրով զբաղվող Ռայա Ղահրամանյանի ներկայացրած տվյալները` Կոտայքի տարածքային հարկային տեսչության իրականացրած հսկողական և վերլուծական աշխատանքների արդյունքում անհատ ձեռնարկատերը հայտնվել է ռիսկային համարվող հարկ վճարողների ցանկում: Տեսչությունը գրավոր ծանուցել է հարկ վճարողին, որպեսզի վերջինս հայտարարագրի իրական իրացման շրջանառությունները և վարձու աշխատողների թվաքանակը, սակայն հարկ վճարողն անպատասխան է թողել ծանուցումները: Այնուհետև 26.02.2013թ.-ին և 18.11.2013թ.-ին անհատ ձեռնարկատիրոջ մոտ իրականացվել են հսկիչ-դրամարկղային մեքենաների կիրառման ճշտության ստուգումներ, և 2 դեպքում էլ արձանագրվել է խախտում: «Հսկիչ-դրամարկղային մեքենաներ կիրառողների գործունեության կասեցման մասին» ՀՀ օրենքի համաձայն` անհատ ձեռնարկատիրոջ գործունեությունը պետք է կասեցվեր, սակայն հարկային տեսչության կողմից հարկ վճարողին առաջարկվել է գործունեության կասեցումը փոխարինել տուգանքի վճարմամբ` «Հսկիչ-դրամարկղային մեքենաների կիրառման մասին» ՀՀ օրենքի 11-րդ հոդվածի 5-րդ ենթակետի դրութների համաձայն:

Հարկային վարչարարության շրջանակներում Կոտայքի տարածքային հարկային տեսչության աշխատակիցների կողմից իրականացված հսկողական աշխատանքների արդյունքում պարզվել է նաև, որ անհատ ձեռնարկատիրոջ երեք հսկիչ-դրամարկղային մեքենաները` գրանցված Աբովյան Հանրապետության 20 հասցեում, չեն գտնվում նույն տարածքում, այլ տեղադրված են տարբեր հեռավորությունների վրա գտնվող և առանձնացված տարբեր մուտքերով շինություններում, որից ակնհայտ է, որ հարկ վճարողը միաժամանակ երեք խանութներով չի կարող գործունեություն ծավալել` ունենալով 1 վարձու աշխատող, ինչպես հայտարարգրել էր Ռ. Ղահրամանյանը: Բացահայտումների մասին հարկային տեսչության աշխատակիցները տեղեկացրել են անհատ ձեռնարկատիրոջը և այդ պահին խանութներում արձանագրել 7 աշխատող:

Ակնհայտ է, որ ՊԵԿ աշխատակիցների գործողություններն իրավաչափ են, բխում են օրենքի պահանջից, և որևէ միտում, քան օրինականության պահպանումն է, չի կարող լինել: Հարկային մարմինը կատարում է իր աշխատանքը:

Օրենքով նախատեսված պարտավորությունները չկատարելու համար հարկային մարմնի օրինական գործողություններն ընդունել չցանկացող անձանց անհիմն բողոքը չի կարող հիմք լինել, որպեսզի հարկային ծառայությունը չկատարի օրենքի պահանջը:

ՊԵԿ-ը բոլոր դեպքերում անընդունելի է համարում ոչ օրինաչափ գործողությունների քողարկումը զրպարտության և ամբոխավարության մեթոդներով: Միաժամանակ տեղեկացնում ենք, որ նման վարվելակերպը չի բխում օրենքի պահանջներից և ենթակա է իրավական գնահատականի»:

Ինչպես տեղեկացրել էինք` նոյեմբերի 28-ի երեկոյան Երևանի Վաղարշյան փողոցում գտնվող սուպերմարկետի մոտ դանակահարություն էր տեղի ունեցել, ինչ արդյունքում` ժամը 21.47-ին, շտապօգնության խումբը բուժօգնության էր տեղափոխել 37-ամյա Արմեն Փ.-ին:

Մեկնած օպերատիվ խումբը պարզել էր, որ Վաղարշյան փողոցի թիվ 10 հասցեում գտնվող սուպերմարկետի դիմաց անհայտ անձը դանակով հարվածել էր Արմեն Փ.-ին և բազմաթիվ վնասվածքներ պատճառել:

Նոյեմբերի 29-ին ոստիկանության Արաբկիրի քննչական բաժնում ՀՀ քր. օր.-ի 34-104 հոդվածի 2-րդ մասի 7-րդ կետով և 258 հոդվածի 4-րդ մասով հարուցվել է քրեական գործ:

Ոստիկանության լրատվական ծառայությունից հայտնում են, որ շարունակելով օպերատիվ-հետախուզական և քննչական միջոցառումները` ոստիկանները պարզել են, որ նոյեմբերի 28-ին, ժամը 20.40-ին, Վաղարշյան փողոցի թիվ 10 հասցեում գտնվող առևտրի կենտրոնի մոտ 1973 թ. ծնված Աշոտ Մ.-ն, կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով քաղաքացիների նկատմամբ, ապօրինաբար կյանքից զրկելու դիտավորությամբ` բռունցքներով, ոտքերով, սուր ծակող-կտրող գործիքով, ինչպես նաև որպես զենք օգտագործվող այլ առարկաներով բազմաթիվ հարվածներ է հասցրել Արմեն Փ.-ի մարմնի տարբեր մասերին` պատճառելով  ծանր մարմնական վնասվածքներ: Աշոտ Մ.-ն և նրա հանցակիցները սպանությունն ավարտին չեն հասցրել իրենց կամքից անկախ հանգամանքներով:

Ձեռնարկված միջոցառումներով պարզվել է, որ Աշոտ Մ.-ն նոյեմբերի 29-ին, ժամը 05.23-ին, Երևան-Վիեննա չվերթի ինքնաթիռով մեկնել է ՀՀ-ից:

Ոստիկանության մի շարք ստորաբաժանումների և Ինտերպոլի ԱԿԲ ծառայողների կողմից ձեռնարկված անհետաձգելի միջոցառումների շնորհիվ` Արթուր Մ.-ն Վիեննայի օդանավակայանում ձերբակալվել է:

Ձեռնարկվում են միջոցառումներ Արմեն Փ.-ի  նկատմամբ սպանության փորձ կատարած մյուս անձանց ինքնությունները պարզելու և նրանց հայտնաբերելու ուղղությամբ:

Նախաքննությունը շարունակվում է:

ՀՀ գլխավոր դատախազի հրամանով` Տավուշի մարզի դատախազ, արդարադատության առաջին դասի խորհրդական Աննա Լեմսիկի Մանթաշյանն ազատվել է զբաղեցրած պաշտոնից` սեփական դիմումի համաձայն:

Այս մասին տեղեկացնում են Գլխավոր դատախազության լրատվական ծառայությունից:

Այսօր մեզ հասցեագրված հարցերին պատասխանում է  «Գալիկյան» փաստաբանական գրասենյակի ղեկավար Գարիկ Գալիկյանը.

ՀԱՐՑ

Ինձ հետաքրքրում է, թե երբ անձը դիմում է ոստիկանություն և հաղորդում տալիս հանցագործության մասին, ոստիկանության կողմից ի՞նչ ժամկետում պետք է համապատասխան հաղորդումը քննարկվի և պատասխան տրվի, և ոստիկանության աշխատակիցը ո՞ր դեպքում կարող է չընդունել քաղաքացու դիմումը:

 ՊԱՏԱՍԽԱՆ

ՀՀ քրեական դատավարության օրենսգրքի 180-րդ հոդվածի համաձայն.

1. Հանցագործության մասին հաղորդումները պետք է քննարկվեն և լուծվեն անհապաղ, իսկ գործ հարուցելու առիթի օրինականությունը և հիմքերի բավարար լինելն ստուգելու անհրաժեշտության դեպքում դրանց ստացման պահից 10 օրվա ընթացքում:

Նույն հոդվածի 2-րդ մասին համաձայն`

Նշված ժամկետում կարող են պահանջվել լրացուցիչ  փաստաթղթեր, բացատրություններ, այլ նյութեր ինչպես նաև կարող են կատարվել դեպքի վայրի զննություն, հանցագործություն կատարելու բավարար հիմքերի առկայության դեպքում կարող են բերման  և անձնական խուզարկության ենթարկվել անձինք, հետազոտման համար վերցնել նմուշներ, նշանակել փորձաքննություն:

Ինչ վերաբերվում է երկրորդ հարցին, ապա եթե դիմում ասելով ի նկատի ունեք հաղորդում հանցագործության մասին, ապա նշեմ, որ յուրաքանչյուր դեպքում  ոստիկանության աշխատակիցը  պարտավոր է քաղաքացուց ընդունել հաղորդումը, քանի որ հանցագործության մասին տեղեկություն ստանալու յուրաքանչյուր դեպքում`  համաձայն քրեական դատավարության  օրենսգրքի 181-րդ հոդվածի  կայացվում է հետևյալ որոշումներից մեկը

1. քրեական գործ հարուցելու մասին.

2. քրեական գործ հարուցելը մերժելու մասին.

3. հաղորդումն ըստ ենթակայության հանձնելու մասին

ՀԱՐՑ

Խնդրում եմ պարզաբանել, թե ի՞նչ տարբերություն կա փոխառության պայմանագրի և պարտավորագրի միջև, ինչպե՞ս է կազմվում պարտավորագիրը և ո՞ր դեպքերում է նոտարական վավերացում պահանջվում:

ՊԱՏԱՍԽԱՆ

ՀՀ օրենսդրության մեջ պարտավորագիր հասկացողություն չկա, սակայն գործնականում այն օգտագործվում է օրինակ՝ փոխառության պայմանագիր կնքելիս:

Փոխառության պայմանագրով մեկ կողմը  /փոխատուն/ մյուս կողմին /փոխառուին/ է հանձնում ի սեփականություն դրամ կամ տեսակային  հատկանիշներով որոշվող իրեր, իսկ փոխառուն պարտավորվում է փոխատուին վերադարձնել միևնույն գումարի կամ քանակության իրեր: /Քաղաքացիական օրենսգրքի 877 հոդված/

Օրենքում  վերը նշված ստացականն էլ կամ դրամական գումար տալը հավաստող այլ փաստաթուղթը կարելի է համարել պարտավորագիր: Ուստի կարելի է համարել, որ հավաստվում է մեկ անձի կողմից մեկ այլ անձի նկատմամբ  պարտավորության կատարումը:

Փոխառության պայմանագիրը կնքվում է գրավոր ձևով: Գրավոր ձևը պահպանված է համարվում այն դեպքում, երբ փոխառուն ի հավաստումն փոխառության պայմանագրի, փոխատուին  տալիս է ստացական կամ  փոխատուի կողմից փոխառուին որոշակի  քանակի իր տալը հաստատող այլ փաստաթուղթ, որը  ինչպես նշեցի` կարող է լինել նաև պարտավորագիր:

Ստացականը կամ այլ փաստաթուղթը ստորագրվում է փոխառուի կողմից և ձեռք է բերում ապացուցողական նշանակություն: Այդ իմաստով պարտավորագիր վերնագրված փաստաթուղթը հավասարվում է հասարակ գրավոր ձևով պայմանագրին:

Պայմանագրի գրավոր ձևը չպահպանելը հանգեցնում է  փոխառության  պայմանագրի անվավերության:

Փոխառության պայմանագիրը կնքելիս նոտարական վավերացում չի պահանջվում:

Հ.Գ. Ձեզ հետաքրքրող հարցերը կարող եք ուղարկել armv12@mail.ru էլ հասցեին: Իրավաբանական խորհրդատվությունը կմատուցեն ճանաչված փաստաբանական գրասենյակներ:

Թերթը նոր մանրամասներ է հաղորդում  Նապոլեոն Ազիզյանի գործի վերաբերյալ.

«ՉԻ» տեղեկություններով, հարուցված գործն արագորեն կարճվել էր։ Այս թեմայով մենք դիմել էինք ՀՀ ոստիկանությանը պարզելու, թե ֆրանսիացու նկատմամբ հարուցված քրեական գործը ինչ ճակատագրի է արժանացել, եթե կարճվել է, ապա ինչ հիմքով։

Երեկ ՀՀ ոստիկանությունից նախ հաստատեցին մեր տեղեկությունները, ապա նոր մանրամասներ հաղորդեցին պատմության վերաբերյալ։ Բանն այն է, որ ըստ ոստիկանության, դեռևս 2011 թվականի հոկտեմբերի 25-ին ոստիկանության Մալաթիա-Սեբաստիայի բաժին է դիմել Ժան Ժակ Մարի Արթուր Գոհենը՝ տեղեկացնելով, որ ՀՀ տարբեր քաղաքացիներ իրեն գումար են պարտք։ Այնուհետև ոստիկանության քննչական բաժնում նյութեր են պատրաստվել։

Պարզվել է, ֆրանսիացին ինքն է տոկոսով գումար տվել ՀՀ քաղաքացիներին. մի բան, որն արգելվում է ՀՀ օրենսդրությամբ։ Նույն թվականի դեկտեմբերի 29-ին քննչական մարմինը որոշում է կայացրել մերժել քրեական գործի հարուցումը։ Քրեական գործի հարուցումը կասեցվել է ֆրանսիացու գործուն զղջման կապակցությամբ. Այնուհետև արդեն 2013 թվականին ֆրանսիացին դիմել է Էրեբունու դատարան, որտեղ էլ գործը քննվել է քաղաքացիա-իրավական հարթության վրա։ Իսկ թե ինչու է դատավարությունն անցել առանց «մեղադրվող» կողմի կամ նրա փաստաբանի ներկայության, և ինչն է եղել, պատճառը, որ դատարանն այս ընթացքում որևէ ծանուցագիր չի ուղարկել Ազիզյանին, կարելի է միայն ենթաղրել։

ՀՀ ոստիկանությունից «ՉԻ»–ին հորդորել են դիմել Էրեբունու դատարան։

Երեկ ՀՀ  ոստիկանությունը հաղորդագրություն է տածել, ըստ որի  կաշառք վերցնելու պահին բռնվել է Երևան քաղաքի քննչական վարչության կենտրոնականի քննչական բաժնի ավագ քննիչ, ոստիկանության կապիտան Էդգար Պետրոսյանը:

«Այս հաղորդագրությունը հետաքրքիր է ոչ միայն այն պատճառով, որ սա ոստիկանության «ինքնամաքրման» մասին սերիալի հերթական սերիան է, այլ բո­լորովին ուրիշ պատճառով: Կաշառք վերցնելու պա­հին բռնված սույն «ավագ քննիչը» ընդամենը 5 տա­րի առաջ ոստիկանության Արաբկիրի բաժնի ավագ օպերլիազոր էր և կեղծ ցուցմունքներ էր տալիս Մար­տի 1- գործով: Մասնավորապես, էդգար Պետրոսյանը Մարտի 1-ի գործով հանդես է եկել որպես տուժող և կեղծ ցուցմունքներ է տվել քաղբանտարկյալներ Միսակ Հովակիմյանի, Վարդգես Գասպարիի և Հով­հաննես Ղազարյանի դեմ: Վերջիններս երկար ժա­մանակ անց են կացրել անազատության մեջ»,-գրում է թերթը:

Հոդվածն ամբողջությամբ՝ կարդացեք «Հայկական ժամանակ» օրաթերթի այսօրվա համարում:

Ինչպես հայտնի է, ՀՀ վարչապետ Տիգրան Սարգսյանի և Արարատյան հայրապետական թեմի առաջնորդ Նավասարդ Կճոյանի օֆշորային մեքենայությունների գործով նախաքննությունը վարում է ՀՀ ոստիկանության քննչական գլխավոր վարչությունը:

«Ժողովուրդ» օրաթերթը ոստիկանության հասարակայնության հետ կապերի և լրատվության վարչությունից հետաքրքրվել է, թե ինչ ընթացքի մեջ է գործը, արդյոք փորձաքննության ուղարկված Սարգսյանի և Կճոյանի ստորագրությունները համընկել են օֆշորային փաստաթղթերի տակ դրված ստորագրությունների հետ: Ոստիկանությունից հայտնեցել են.

«Փորձագիտական կենտրոնը միջնորդություն է ներկայացրել փորձաքննությանն առաջարկված հարցերին պատասխանելու համար տրամադրել փաստաթղթերի բնօրինակները: Նախաքննական մարմինը՝ ոստիկանության քննչական գլխավոր վարչության ՀԿԳ վարչությունը, գլխավոր դատախազության միջոցով իրավական օգնության միջնորդություն է ներկայացրել Կիպրոսի իրավասու մարմիններին՝ պահանջվող փաստաթղթերի բնօրինակները առգրավելու և նախաքննությանը տրամադրելու խնդրանքով»:

Հոդվածն ամբողջությամբ՝ կարդացեք «Ժողովուրդ» օրաթերթի այսօրվա համարում:

Նոյեմբերի 28-ին ՀՀ Ազգային անվտանգության ծառայության համապատասխան ստորաբաժանումների և ոստիկանության ներքին անվտանգության վարչության համատեղ օպերատիվ-հետախուզական միջոցառումների արդյունքներով՝ կաշառք ստանալու պահին բռնվել է ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժնի 1-ին բաժանմունքի ավագ քննիչ, ոստիկանության կապիտան Էդգար Պետրոսյանը, որը ոստիկանության համակարգում էր 2006 թվականից:

Ոստիկանության լրատվական ծառայությունից հայտնում են, որ նախապատրաստված նյութերն ուղարկվել են Հատուկ քննչական ծառայություն, որտեղ հարուցվել է քրեական գործ:

Էդգար Պետրոսյանը ձերբակալվել է:

Ոստիկանությունն այսուհետ էլ անզիջում է լինելու կոռուպցիայի և կաշառակերության դեմ պայքարում ու հետևողականորեն շարունակելու է համակարգի ինքնամաքրման գործընթացը:

ՀՀ գլխավոր դատախազի հրամաններով նշանակվել են Արմավիրի, Գեղարքունիքի, Սյունիքի մարզերի նոր դատախազներ, Սևանի կայազորի զինվորական նոր դատախազ, Երևան քաղաքի Կենտրոն և Նորք-Մարաշ վարչական շրջանների դատախազ, ՀՀ գլխավոր դատախազության հատկապես կարևոր գործերով քննության վարչության պետ: Այս մասին տեղեկացնում են Գլխավոր դատախազության լրատվական ծառայությունից:

ՀՀ գլխավոր դատախազի հրամաններով.

Արդարադատության առաջին դասի խորհրդական Արսեն Վիգենի Սիմոնյանը նշանակվել է Արմավիրի մարզի դատախազ՝ ազատվելով Կոտայքի մարզի դատախազի տեղակալի պաշտոնից:
Արդարադատության առաջին դասի խորհրդական Արսեն Ռաֆիկի Արսենյանը նշանակվել է Գեղարքունիքի մարզի դատախազ՝ ազատվելով Արարատի մարզի դատախազի տեղակալի պաշտոնից:
Արդարադատության երկրորդ դասի խորհրդական Արմեն Ալբերտի Աֆանդյանը նշանակվել է Սյունիքի մարզի դատախազ՝ ազատվելով ՀՀ գլխավոր դատախազության հատկապես կարևոր գործերով քննության վարչության ավագ դատախազի պաշտոնից:
Արդարադատության երկրորդ դասի խորհրդական Կարեն Սամվելի Բատիկյանը նշանակվել է Երևան քաղաքի Կենտրոն և Նորք-Մարաշ վարչական շրջանների դատախազ՝ ազատվելով Երևան քաղաքի դատախազի  տեղակալի պաշտոնից:
Արդարադատության երկրորդ դասի խորհրդական Թևոս Նարիմանի Միրզաբեկյանը նշանակվել է Սևանի կայազորի զինվորական դատախազ՝ ազատվելով Երևան քաղաքի Կենտրոն և Նորք-Մարաշ վարչական շրջանների դատախազի պաշտոնից:
Արդարադատության առաջին դասի խորհրդական Վահագն Ժուլվերի Մուրադյանը նշանակվել է ՀՀ գլխավոր դատախազության հատկապես կարևոր գործերով քննության վարչության պետ՝ ազատվելով Արմավիրի մարզի դատախազի պաշտոնից:

ՀՀ հատուկ քննչական ծառայությունում ՀՀ ՔՕ 325-րդ հոդվածի 1-ին մասի և 329-րդ հոդվածի 1-ին մասի հատկանիշներով հարուցվել է քրեական գործ` Ռ. Բ.-ի կողմից ակնհայտ կեղծ փաստաթուղթ օգտագործելու և ՀՀ պետական սահմանն ապօրինի հատելու դեպքի առթիվ:
Համաձայն նախաքննությամբ ձեռք բերված տվյալների` Ռ. Բ.-ն, բնակվելով Ֆրանսիայում և չպարզված հանգամանքներում ձեռք բերելով ՀՀ ոստիկանության Ամասիայի բաժնի անձնագրային ծառայության կողմից առանց օրինական հիմքերի և օրենքով սահմանված կարգի խախտմամբ 1998 թվականի նոյեմբերի 30-ին տրված ակնհայտ կեղծ անձնագիրը, այն օգտագործել է Ֆրանսիայում, իսկ 2013 թվականի հոկտեմբերի 10-ին վերադառնալով Հայաստան և ներկայացնելով «Զվարթնոց» օդանավակայանի սահմանային անցակետում` ապօրինի հատել է ՀՀ պետական սահմանը:

Նախաքննությունը շարունակվում է: