Լոռու մարզային քննչական վարչության Սպիտակի քննչական բաժնում ավարտվել է Լոռու մարզի բնակիչ Գ.Սիմոնյանի առողջությանը ծանր վնաս պատճառելու դեպքի առթիվ հարուցված քրեական գործի նախաքննությունը։

Նախաքննությամբ պարզվել է առերևույթ հանցագործություն կատարած անձի ինքնությունը, շարժառիթը։
Մասնավորապես՝ քննությամբ պարզվել է, որ Լոռու մարզի բնակիչ Լ.Նասլյանը, 2014թ. դեկտեմբերի 11-ին՝ ժամը 23:00-ի սահմաններում, գտնվելով ալկոհոլի ազդեցության տակ, իրեն հայհոյելու հանգամանքը պարզաբանելու պատճառով վիճաբանել է համագյուղացի Գ.Սիմոնյանի հետ, որի ընթացքում ձեռքերով և ոտքերով հարվածներ է հասցրել վերջինիս գլխին։ Հարվածների հետեւանքով Սիմոնյանին պատճառվել են գանգուղեղային բաց բութ վնասվածքներ, աջից ճակատային շրջանի և ձախից ծոծրակային շրջանի սալջարդ վերքեր, աջից ճակատոսկրի և քունքոսկրի կոտրվածքներ, սեպոսկրի կոտրվածք, ձախից ծոծրակոսկրի կոտրվածք, ձախ քունքոսկրի բրգի և պտկաձև ելունի կոտրվածք և այլ վնասվածքներ, որոնք դատաբժշկական փորձաքննության եզրակացությամբ գնահատվել են կյանքի համար վտանգավոր:
Ձեռք բերված ապացույցների համակցությամբ՝ Լ.Նասլյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասի հատկանիշներով:
Նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը, և գործն ուղարկվել է Լոռու մարզի ընդհանուր իրավասության դատարան:

ՀՀ Նախագահ Սերժ Սարգսյանի հրամանագրով դատավորներ են նշանակվել: Ինչպես տեղեկացնում են ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունից, ՀՀ Նախագահի հրամանագրում ասված է.
«Ղեկավարվելով Հայաստանի Հանրապետության Սահմանադրության 55-րդ հոդվածի 11-րդ կետով և հիմք ընդունելով Արդարադատության խորհրդի 2015 թվականի հունվարի 26-ի ԱԽ-2-Ո-4 որոշումը և ԱԽ-2-Ե-1 եզրակացությունը` որոշում եմ.

1. Ռուզաննա Հակոբյանին նշանակել Հայաստանի Հանրապետության վճռաբեկ դատարանի քաղաքացիական և վարչական պալատի դատավոր` դադարեցնելով նրա` Հայաստանի Հանրապետության վարչական դատարանի դատավորի լիազորությունները:

2. Մխիթար Պապոյանին նշանակել Հայաստանի Հանրապետության վերաքննիչ քրեական դատարանի դատավոր՝ դադարեցնելով նրա` Հայաստանի Հանրապետության Կոտայքի մարզի ընդհանուր իրավասության առաջին ատյանի դատարանի դատավորի լիազորությունները»:

Իշխանությանը մոտ կանգնած մեր աղբյուրները հայտնում են, որ Ցեղասպանության 100-ամյա տարելիցի առիթով ՀՀ-ում համաներում հայտարարելու սպասումները կարող են և չարդարանալ. իրավապահ համակարգում շատերը դեմ են նման որոշմանը:

Խնդիրն այն է, որ նախորդ համաներումներից հետո Հայաստանում քրեածին վիճակը էապես լարվել է, և բանտից ազատ արձակված բազմաթիվ մարդիկ մեկ շաբաթ, մեկ ամիս անց կրկին կալանավորվել են։ Ներկայում, երբ տնտեսական վիճակը բավականին բարդ է, ըստ որոշ մասնազետների, ազատ արձակվածների ադապտացման հնարավորությունները ավելի են նվազել և այս պայմաններում համաներման կիրառումը կարող է լրջորեն սրել քրեածին վիճակը ՀՀ-ում և բերել անցանկալի հետևանքների: ԱԺ միջանցքներում խոսում են, սակայն, որ Սերժ Սարգսյանը այս հարցում դեռ վերջնական որոշում չունի:

Հայկական Ժամանակ

Հարկային պարտավորությունները չկատարելու մեջ կասկածվող՝ ԱԺ նախկին պատգամավոր Հակոբ Հակոբյանն իրեն մեղավոր չի ճանաչում առաջադրված մեղադրանքում: Այս մասին խոսել է Հակոբյանի փաստաբան Աշոտ Ղազարյանը:

Նրա խոսքով՝ Ճոյտին դեռ մեղադրանք չի առաջադրվել, նա կասկածյալի կարգավիճակում է և գտնվում է ձերբակալվածների պահման վայրում:

«Այս պահին մեկուսարանում եմ, հանդիպելու եմ պաշտպանյալիս հետ»,- ավելացրեց նա:

news.am

«Անկարգությունն ու ծառայակիցների ահաբեկումը չպետք է տեղ ունենան ՀՀ զինված ուժերում: Զինված ուժերի անձնակազմը լինելու է առավել կրթված ու արհեստավարժ: Կարգապահությունը հիմնված է լինելու զինծառայողների միջև փոխադարձ հարգանքի և Հայրենիքի պաշտպանության գործում ներդրում կատարելու գիտակցումով հրամանների անվերապահ կատարման վրա: Այս ամենում օրինակելիության կատարյալ տիպար են լինելու հրամանատարները՝ ղեկավարելով անձնական օրինակով» և այլն:

ՀՀԿ նախընտրական ծրագրի այս դրվագը հիշեցինք Վազգեն Սարգսյանի անվան ռազմական ինստիտուտում տեղի ունեցած զարհուրելի սպանությունից հետո: Արդեն 6 օր է անցել դեպքից, սակայն ՊՆ-ն մինչ օրս չի հայտնում ձերբակալվածներից մեկի հոր՝ ինստիտուտի պետի սպառազինությունների գծով տեղակալ, գնդապետ Զարմիկ Մարկոսյանի անունը: Նրա որդին՝ Գնել Թևոսյանը, կուրսանտ Հայկազ Բարսեղյանի սպանության համար կալանավորված 4 ուսանողներից մեկն է: Հենց նա է, իրավիճակին ծանոթ մեր աղբյուրի համաձայն, հրեշավոր հանցագործության գլխավոր մեղավորը, որն իր՝ գնդապետի որդու «ավտարիտետով» իշխել է մյուսներին: Հայր ու տղա, փաստորեն, տարբեր ազգանուններ են կրում:

Տեղյակ աղբյուրը հայտնում է, որ ազգանունը փոխել է Գնելը, իր և գնդապետի միջև ազգակցական կապն արտաքուստ քողարկելու համար: Երեկ ՊՆ խոսնակ Արծրուն Հովհաննիսյանին ընդամենը մեկ հարց տվեցինք՝ ինչպե՞ս է Ռազմական ինստիտուտի պետի տեղակալ Մարկոսյանի անունը: «Ես նման մարդ չեմ ճանաչում»,- ասաց Հովհաննիսյանը, ինչը, իհարկե, անհավանական էր: Սա ընդամենը նշանակում է, որ ՊՆ-ն արդեն փորձում է պարտակել կատարվածը, փրկել հանցագործին խայտառակությունից, պահպանել նրան դաստիարակողի «բարի համբավը»: Թեպետ գնդապետ Զարմիկ Մարկոսյանին, ինչպես նաև ինստիտուտի պետի մյուս տեղակալ Արմեն Մզիկյանին պաշտոնանկ էին արել: Ինչու են այս մարդիկ ազատվում աշխատանքից, պաշտոնապես չի բացատրվում:

Հանրությունն ընդամենը կարող է ենթադրել, որ նրանց, ինչպես նաև մեր գլխավոր սպայական բուհի պետի՝ գեներալ-լեյտենանտ Մարտին Կարապետյանի աշխատանքից ազատման պատճառն այնտեղ կատարված խայտառակ միջադեպն էր: Առհասարակ, սա Պնախարար Սեյրան Օհանյանի ձեռագիրն է՝ պատժել իր ենթականերին, բայց այնպես, որ ոչ ոք չիմանա, թե ինչու: Բանակում տեղի ունեցող հանցագործություններից հետո սովորաբար միշտ էլ մարդիկ են ազատվում, սակայն այնպես, որ այս մասին ոչ ոք չիմանա, իբր որ «հայ սպայի» անունը չարատավորվի: Գուցե սա է պատճառը, որ զինծառայողների խոշտանգումների, սպանության հետ կապված հանցագործությունները մեր բանակում կրկնվելու միտում ունեն:

Մինչ Քննչական կոմիտեն զբաղվում է այս զարհուրելի սպանությամբ, ԶԼՄ-ներում դեպքի մանրամասներն են շրջանառվում՝ մեկը մյուսից սարսափելի: Համակուրսեցիները փորձել են իրենց ենթարկել Հայկազին, վերջինս դիմադրել է, բանը հասել է գիշերային ծեծկռտուքի, որի ընթացքում Հայկազին խեղդել են բարձով: Նրա մարմնին ծեծի հետքեր են հայտնաբերվել, իսկ երակներին՝ կտրվածքներ: Մի աղբյուրի համաձայն, կալանավորվածներից մյուսը նույնպես պետական ծառայողի որդի է, սակայն այնքան էլ «հաբռգած» չէ: Հայրն ԱԱԾ աշխատող է:

Հիշենք դեպքով կալանավորված ապագա սպաներին հայրանուններով՝ Վաչե Արմենի Սահակյան, Մովսես Ռոմիկի Ազարյան, Գնել Զարմիկի Թևոսյան, Նորիկ Սահակի Սահակյան: Նրանք բոլորը մեղադրվում են մի խումբ անձանց կամ կազմակերպված խմբի կողմից սպանության մեջ:

Սյուզան Սիմոնյան

ՀՀ գլխավոր դատախազ Գ. Կոստանյանը, ղեկավարվելով ՀՀ և ՌԴ միջև ՀՀ տարածքում  ռուսաստանյան ռազմական բազայի գտնվելու հետ կապված գործերով իրավասության և փոխադարձ իրավական օգնության հարցերի վերաբերյալ Համաձայնագրի 6-րդ հոդվածով, հունվարի 12-ին Գյումրի քաղաքում ՀՀ յոթ քաղաքացիների սպանության դեպքի առթիվ հարուցված քրեական գործի վարույթը  ՀՀ իրավապահ մարմիններին փոխանցելու վերաբերյալ միջնորդությամբ դիմել է ՌԴ գլխավոր դատախազ Յու. Չայկային:

ՀՀ հատուկ քննչական ծառայությունում ՀՀ ոստիկանության ներքին անվտանգության վարչությունից ստացված նյութերով պետական հատուկ ծառայություն իրականացնող անձանց կողմից խմբով, նախնական համաձայնությամբ շինություն ապօրինի մուտք գործելով գույքի գաղտնի հափշտակություն կատարելու դեպքի առթիվ ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով հարուցվել է քրեական գործ:
Ըստ նյութերի նախապատրաստմամբ ձեռք բերված տվյալների՝ ՀՀ ոստիկանության Արմավիրի մարզային վարչության Բաղրամյանի բաժնի հերթապահ մասի պետական հատուկ ծառայություն իրականացնող երկու աշխատակիցները 2015 թվականի հունվարի 5-ին՝ ժամը 16:00-ի սահմաններում, նախնական համաձայնության գալով, խմբով պատուհանից ապօրինի մուտք են գործել հիշյալ բաժնի հետնամասում գտնվող ՀՀ աշխատանքի և սոցիալական հարցերի նախարարության զբաղվածության պետական գործակալության Բաղրամյանի մասնաճյուղի չգործող վարչական շենք և այնտեղից գաղտնի հափշտակել են մետաղյա պահարաններ:

Կատարվում է նախաքննություն: