Ավարտվեց հրաձգության 10 մետրից օդամուղ հրացանով վարժության մրցումը: Հայաստանը ներկայացնում էր 18 ամյա Հրաչիկ Բաբայանը: 2014 թվականին Նանկինում կայացած Պատանեկան Օլիմպիական խաղերի արծաթե մեդալակիրը պարզապես ապշեցրեց իր վստահ ու կայուն կրակոցներով: Նա վաստակեց 629.3 միավոր, սահմանեց Եվրոպայի երիտասարդական ռեկորդ, գրավեց առաջին տեղն ու մտավ եզրափակիչ: Եզրափակչի 8 մասնակիցներից 5-ը արդեն նվաճել էին Ռիո դա Ժանեյրոյի օլիմպիական խաղերի ուղեգիր: Պետք էր հաղթել Գերմանիայի և Իսրայելի ներկայացուցիչներին և նվաճել օլիմպիական վարկանիշ: Ամեն ինչ հրաշալի էր ընթանում:

Սկզբում Հրաչիկը առաջատարն էր, ապա երրորդը, հետո երկրորդը: Այդպես մինչև 12-րդ կրակոցը: 14-րդ կրակոցին հանկարծ տեղի տվեցին մեր պատանու նյարդերը, նա խոցեց 9.2 նիշը և զբաղեցնելով 5-րդ տեղը` դուրս մնաց հետագա պայքարից: Իսկ Իսրայելի ներկայացուցիչը նվաճեց բաղձալի ուղեգիրը:

Սակայն կարևորն այն է, որ այս մրցման ամենակրտսեր մասնակիցն արժանացավ մասնագետների ամենաբարձր գնահատականին: Հրաչիկ Բաբայանն առաջին անգամ մտավ մեծահասակների մրցման եզրափակիչ և ցույց տվեց իր լավագույն արդյունքը: Իսկ դա նշանակում է, որ մեծ հաղթանակները դեռ առջևում են:

Պայքարը շարունակվում է:

Կարեն Գիլոյանի ֆեյսբուքյան էջից

ՀՀ Արարատի մարզի դատախազի զեկուցագրի համաձայն` ՀՀ ոստիկանության Արարատի մարզային վարչության Մասիսի բաժնի պաշտոնատար անձինք կատարել են պաշտոնեական կեղծիք:

Մասնավորապես՝ ոստիկանության աշխատակիցները 2015 թվականի փետրվարի 17-ին՝ ժամը 21:00-ի սահմաններում, օպերատիվ տվյալների հիման վրա քաղաքացի Հրայր Ա.-ին՝ նրա վարած ավտոմեքենայով հիշյալ բաժին բերման ենթարկելու վերաբերյալ նյութերի նախապատրաստման ընթացքում, անձնական այլ դրդումներից ելնելով, ավտոմեքենայի, ինչպես նաև Հրայր Ա.-ին և վերջինիս ընկերոջ մասնակցությամբ կատարված դեպքերի վայրերի զննության վերաբերյալ կազմված պաշտոնեական փաստաթուղթ հանդիսացող արձանագրություններում մտցրել են կեղծ տեղեկություններ:

ՀՀ ոստիկանության աշխատակիցների կողմից պաշտոնեական կեղծիք կատարելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 314-րդ հոդվածի 1-ին մասի հատկանիշներով հարուցվել է քրեական գործ:

Կատարվում է նախաքննություն:

ՀՀ քննչական կոմիտեի հատկապես կարևոր գործերի քննության գլխավոր վարչության վարույթում շարունակվում են ձեռնարկվել անհրաժեշտ քննչական և դատավարական գործողություններ՝ Գորիսի «Սդղի գյոլ» կոչվող տարածքում Հարություն և Մուշեղ Զաքարյան եղբայրների նկատմամբ կիրառված բռնությունների բոլոր հանգամանքները, միջադեպին ներկա գտնված անձանցից յուրաքանչյուրի գործողությունները պարզելու ուղղությամբ։

Հաշվի առնելով հանրության հետաքրքրությունը՝ տեղեկացնում ենք, որ նախաքննությամբ բավարար ապացույցներ են ձեռք բերվել առ այն, որ Մուշեղ Զաքարյանի նկատմամբ կիրառված բռնություններին խմբի կազմում մասնակցություն են ունեցել նաև ՀՀ քաղաքացիներ Շ.Դավթյանը և Մ.Խաչատրյանը։

Հունիսի 13-ին  Շ.Դավթյանին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով՝ մի խումբ անձանց կողմից Մ.Զաքարյանին միջին ծանրության մարմնական վնաս պատճառելու համար և հարցաքննվել։ Նրա նկատմամբ որպես խափանման միջոց է ընտրվել ստորագրություն չհեռանալու մասին։

Ձեռք բերված ապացույցների համակցությամբ՝ վարույթն իրականացնող մարմինը որոշում է կայացրել՝ Մ. Խաչատրյանին ՀՀ քրեական օրենսգրքի 113-րդ հոդվածի 2-րդ մասի 3-րդ կետով որպես մեղադրյալ ներգրավելու մասին։ Քննիչը միջնորդություն է ներկայացրել Կենտրոն և Նորք-Մարաշ վարչական շրջանների ընդհանուր իրավասության դատարան՝ նրա նկատմամբ խափանման միջոց կալանավորումը կիրառելու վերաբերյալ, ինչը բավարարվել է և հունիսի 15-ին հայտարարվել է հետախուզում։

Հանձնարարություն է տրվել ոստիկանության համապատասխան ստորաբաժանումներին՝ ձեռնարկել անհրաժեշտ օպերատիվ-որոնողական միջոցառումներ՝ Մայիս Խաչատրյանին հայտնաբերելու ուղղությամբ։

Ավելի վաղ տեղեկացրել ենք, որ Մ.Զաքարյանին խմբի կողմից միջին ծանրության մարմնական վնաս պատճառելու համար մեղադրանք է առաջադրվել նաև ՀՀ քաղաքացիներ Դ.Հակոբյանին և Յ.Մանուչարյանին, որոնց նկատմամբ որպես խափանման միջոց է կիրառվել կալանավորումը։

ՀՀ ՔԿ ՀԿԳ քննության գլխավոր վարչությունում նախաքննությունը շարունակվում է: Քննության արդյունքների և կայացված դատավարական որոշումների մասին տեղեկություն կտրամադրվի լրացուցիչ։

Հանրապետության տարածքում`

Հունիսի 16-18-ի երեկոյան ժամերին շրջանների զգալի մասում սպասվում են կարճատև անձրև և ամպրոպ, առանձին վայրերում` կարկուտ, ամպրոպի ժամանակ սպասվում է քամու ուժգնացում՝ 20-25 մ/վրկ արագությամբ: 19-20-ին սպասվում է առանց տեղումների եղանակ:

Քամին` հարավ-արևմտյան` 5-10 մ/վրկ:

Օդի ջերմաստիճանը 16-18-ին էապես չի փոխվի, 19-20-ին կբարձրանա 2-3 աստիճանով:

ՀՀ հատուկ քննչական ծառայությունում քննվող քրեական գործի նախաքննության ընթացքում ոստիկանության Նոր Նորքի քրեական հետախուզության բաժնի պետ Արմեն Ա.-ին ՀՀ քրեական  օրենսգրքի 308-րդ և 314-րդ հոդվածների 1-ին մասերի հատկանիշներով մեղադրանք է առաջադրվել:

Արմեն Ա.-ն մեղադրվում է այն բանի համար, որ ոստիկանության Տավուշի մարզային վարչության Իջևանի բաժնի քրեական հետախուզության բաժանմունքի պետի պաշտոնը զբաղեցնելու ժամանակ, տեղեկություն ստանալով, Հ.Ղ.-ի նկատմամբ 2013թ. փետրվարի 25-ին Տավուշի մարզի  Աչաջուր գյուղում շատերի կյանքի համար վտանգավոր եղանակով` հրազենի գործադրմամբ սպանության փորձ կատարվելու մասին, ավելին՝ 2013թ. մարտ ամսվա սկզբներին վերջինիս տան բակում անձամբ տեսնելով Հ. Ղ.-ի ավտոմեքենայի վրա առկա հրազենային վնասվածքները, իսկ նրա հորից տեղեկանալով նշված ենթադրյալ հանցանքի կատարման մեջ համագյուղացու կողմից մասնակցություն ունենալու կասկածի մասին, իր կողմից սպասարկվող վարչական տարածքում չբացահայտված առանձանապես ծանր հանցագործությունների գծով բացասական ցուցանիշ չունենալու անձնական շահագրգռվածությունից ելնելով՝ չի կատարել ծառայողական պարտականությունները և պաշտոնեական դիրքն օգտագործել է ծառայության շահերին հակառակ:

Մասնավորապես՝ Արմեն Ա.-ն հանցագործության  դեպքի մասին Կ.Ղ.-ի բանավոր հաղորդման վերաբերյալ արձանագրություն չի կազմել, հանցագործության մասին հաղորդումը չի գրանցել, հայտնաբերված հանցագործության մասին դատախազին և քննիչին անհապաղ տեղյակ չի պահել, չի զննել դեպքի վայրը և որևէ միջոց չի ձեռնարկել հանցագործության հետքերը, այլ նյութական օբյեկտները հայտնաբերելու ուղղությամբ, հազենային վնասվածքներով Հ.Ղ.-ի ավտոմեքենան համապատասխան փորձաքննության չի ուղարկել, առանձնապես ծանր հանցագործությունը և դա կատարող անձանց բացահայտելու նպատակով համապատասախան օպերատիվ-հետախուզական և քրեադատավարական միջոցառումներ չի ձեռնարկել:

Այնուհետև, դարձյալ, հանցագործության դեպքը թաքցնելու անձնական դրդումից ելնելով, կազմել է պաշտենեական կեղծ փաստաթուղթ: Նա 2013թ. մարտ ամսվա սկզբներին Հ.Ղ.-ի տան բակում «Տոյոտա Պրադո» մակնիշի ավտոմեքենայի զննության ժամանակ հայտնաբերելով հրազենային վնասվածքներ, դրանք չի արձանագրել, այլ հետին ամսաթվով կազմել է արձանագրություն, որում մտցրել է ակնհայտ կեղծ տեղեկություններ, թե, իբր, ավտոմեքենայի վրա  հրազենային վնասվածքներ չկան և այն անվնաս է: Զեկուցագրի հիման վրա նախապատրաստված նյութերը՝ իբրև հանցագործության դեպք տեղի չունենալու վերաբերյալ, կազմված  եզրակացությամբ թողնվել է առանց հետևանք:

Պաշտոնեական դիրքը չարաշահելու և պաշտոնեական կեղծիք կատարելու մեջ մեղադրվող Նոր Նորքի քրեական հետախուզության բաժնի պետ Արմեն Ա.-ի նկատմամբ դատարանի որոշմամբ որպես խափանման միջոց ընտրվել է կալանավորումը:

Կատարվում է նախաքննություն:

ՀՀ հատուկ քննչական ծառայությունում քննվող քրեական գործով ՀՀ ֆինանսների նախարարության Լոռու տարածքային հարկային տեսչության ավագ տեսուչ Արմեն Պ.-ին ՀՀ քրեական օրենսգրքի  311-րդ հոդվածի 2-րդ մասով և 311-րդ հոդվածի 3-րդ մասի 2-րդ և 3-րդ կետերով մեղադրանք է առաջադրվել:

Հարկային ավագ տեսուչ Արմեն Պ.-ն մեղադրվում է այն բանի համար, որ նա  2014-2015 թվականների ընթացքում հայտնաբերել է Լոռու մարզի վարչական տարածքում ապօրինի ձեռնարկատիրական գործունեությամբ զբաղվող քաղաքացիների, սակայն «Հարկերի մասին» ՀՀ օրենքի 26-րդ հոդվածի համաձայն՝ պարտավոր լինելով օրենքով սահմանված կարգով պետական գրանցում չունեցող, չհաշվառված կամ հարկային մարմիններում չհաշվառված անձանց կողմից ձեռնարկատիրական, ապօրինի գործունեությամբ զբաղվելու դեպքում գանձել տուգանք, վարչական պատասխանատվության չենթարկելու, վերոհիշյալ փաստերը չարձանագրելու և ապօրինի ձեռնարկատիրական գործունեությունը չդադարեցնելու, ինչպես նաև «Ստուգումների կազմակերպման և անցկացման մասին» ՀՀ օրենքի 2-րդ և 3-րդ հոդվածների  համաձայն՝ օժտված լինելով տնտեսավարող սուբյեկտի գործունեության ոլորտում օրենքի և այլ իրավական ակտերի հիման վրա պետական մարմիններին ներկայացված կամ հրապարակված հաշվետվությունների արժանահավատությունը պարզելու նպատակով ստուգումներ իրականացնելու լիազորությամբ, վերջիններիս օգտին իր լիազորությունների շրջանակում ակնհայտ ապօրինի անգործության համար՝ այն է ստուգումներ չիրականացնելու, առանց գրանցման աշխատող անձանց չհայտնաբերելու և չգրանցելու, վարչական պատասխանատվության չենթարկելու պայմանով, կաշառք ստանալու դիտավորությամբ նախնական համաձայնության գալով Լոռու մարզի տարածքային հարկային տեսչության աշխատակից Հրաչ Մ.-ի հետ՝ խմբով անօրինական, ինչպես նաև օրինական տնտեսական գործունեություն ծավալող բազմաթիվ քաղաքացիներից պահանջել և ստացել են խոշոր չափերով կաշառք:

Խոշոր չափերով կաշառք ստանալու մեջ մեղադրվող հարկային տեսչության ավագ հարկային տեսուչ Արմեն Պ.-ի նկատմամբ դատարանի որոշմամբ որպես խափանման միջոց ընտրվել է կալանավորումը:

Հիշեցնենք, որ ավելի վաղ հայտնել էինք, որ ՀՀ հատուկ քննչական ծառայությունում քննվող նույն քրեական գործով խոշոր չափերով կաշառք ստանալու համար մեղադրանք էր առաջադրվել նաև  հիշյալ մարզի հարկային տեսչության աշխատակից Հրաչ Մ.-ին, և վերջինիս նկատմամաբ որպես խափանման միջոց ընտրվել էր կալանավորումը:

Նախաքննությունը շարունակվում է:

Դատախազության համակարգում մի քանի օր է, ինչ քննարկում են Կոստանյանի մտերիմ ընկեր Տիգրան Խեչոյանի պաշտոնանկությունը: Դատախազները չեն զարմանում, որ Կոստանյանը «պադդերժկա չարեց» ընկերոջը, քանի որ նրա համար քույր, եղբայր, բարեկամ «գոյություն չունի»:

Պարզվում է, որ զինդատախազ եղած ժամանակ նա իր մոտ ազգականի որդուն անգամ չի խնայել և դատել է զորամասը լքելու համար: Վերջինս Կոստանյանից «քաշված» միակ բարեկամը չէ: Գլխավոր դատախազը դատել է նաև հոր ընկերոջը, հոր ընկերոջ որդուն և ուրիշների:

Նշենք, որ Տիգրան Խեչոյանը 2 օր առաջ ուշ երեկոյան բերման է ենթարկվել ԱԱԾ, ասում են՝ նա մեծ փողեր է վերցրել ու չի կարողացել գործը գլուխ բերել:

Հրապարակ

ՀՀ քննչական կոմիտեի Երևան քաղաքի Աջափնյակ և Դավթաշեն վարչական շրջանների քննչական բաժնում ավարտվել է անչափահասներին կտրող-ծակող առարկայով մարմնական վնաս պատճառելու դեպքի առթիվ հարուցված քրեական գործի նախաքննությունը:

Նախաքննության ընթացքում ձեռնարկված քննչական և դատավարական գործողությունների արդյունքում պարզվել է, որ անչափահասները վնասվածքներն ստացել են 2015 թվականի փետրվարի 22-ին՝ ժամը 19:00-ի սահմաններում, Երևան քաղաքի թիվ 195 դպրոցի մոտ տեղի ունեցած վիճաբանության ժամանակ։

Պարզվել է նաև առերևույթ հանցագործություն կատարած անձի ինքնությունը, ով նույնպես անչափահաս է։

Նախաքննությամբ ձեռք բերված ապացույցների համաձայն՝ 2015 թվականի փետրվարի 22-ին` ժամը 19:00-ի սահմաններում, անչափահաս Աբովյանը Երևան քաղաքի Մազմանյան և Բաշինջաղյան փողոցների խաչմերուկում հանդիպել է իր ծանոթին, ով զանգահարելու համար խնդրել է տրամադրել իր բջջային հեռախոսը:

Հեռախոսով զրուցելով քայլել են դեպի թիվ 195 դպրոցի բակ, որտեղ հանդիպել են այլ ծանոթ անձանց: Առաջացել է վիճաբանություն, որի ժամանակ երկու անչափահասի՝ Նիկողոսյանին և Սահակյանին, պատճառվել են մարմնական վնասվածքներ։ Նիկողոսյանի կրծքավանդակի ձախ հատվածին կտրող-ծակող առարկայով պատճառված մարմնական վնասվածքը դատաբժշկական փորձաքննության եզրակացությամբ գնահատվել է ծանր, իսկ Սահակյանի վնասվածքը՝ միջին ծանրության:

Նախաքննության ընթացքում տուժող Սահակյանը բողոք չի ներկայացրել։ Նկատի ունենալով, որ ՀՀ քրեական դատավարության օրենսգրքի 183-րդ հոդվածի համաձայն՝ միջին ծանրության մարմնական վնասվածք պատճառելու համար գործերը հարուցվում են ոչ այլ կերպ, քան տուժողի բողոքի հիման վրա, ուստիև` 2015 թվականի մարտի 19-ին որոշում է կայացվել Վ.Սահակյանի առողջությանը դիտավորությամբ միջին ծանրության մարմնական վնասվածք պատճառելու դեպքի առթիվ Աբովյանի նկատմամբ քրեական հետապնդում չիրականացնել` դիմողի բողոքի բացակայության հիմքով:

Մինչդատական վարույթի ընթացքում ձեռք բերված ապացույցների հիման վրա Աբովյանին մեղադրանք է առաջադրվել` Նիկողոսյանին ծանր մարմնական վնաս պատճառելու համար՝ ՀՀ քրեական օրենսգրքի 112-րդ հոդվածի 1-ին մասով: Նրա նկատմամբ խափանման միջոց է ընտրվել ծնողի հսկողությանը հանձնելը:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին, մեղադրական եզրակացությունը հաստատվել է, և գործն ուղարկվել Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարան:

ՀՀ հատուկ քննչական ծառայությունում քննվող քրեական գործի նախաքննության ընթացքում՝ որպես միջնորդ հատուկ ծառայություն իրականացնող պաշտոնատար անձին խոշոր չափերով կաշառք տալու կասկածանքով ձերբակալվել է քաղաքացի Արմեն Գ.-ն:

Հիշեցնենք, որ  2015 թվականի մայիսի 29-ին հաղորդագրություն էինք տարածել, որ քաղաքացի  Կարինե Շ.-ի հաղորդման հիման վրա միջնորդի միջոցով հատուկ ծառայություն իրականացնող պաշտոնատար անձին խոշոր չափերով կաշառք տալու և վերջինիս կողմից միջնորդի միջոցով խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 312-րդ հոդվածի 2-րդ մասով, 313-րդ հոդվածի 1-ին մասով և 311-րդ հոդվածի 3-րդ մասի 3-րդ կետով հարուցվել է քրեական գործ:

Քաղաքացին հաղորդում էր տվել այն մասին, որ 2015 թվականի մայիսի 18-ին՝ ժամը 01:30-ի սահմաններում, թմրամիջոց պահելու և օգտագործելու կասկածանքով ՀՀ ոստիկանության Մասիսի բաժին են բերման ենթարկվել ամուսինը և նրա բարեկամը: Վերջիններիս քրեական պատասխանատվության չենթարկելու դիմաց հիշյալ բաժնի հատուկ ծառայություն իրականացնող անձը միջնորդի միջոցով պահանջել է 1000 ԱՄՆ դոլար կաշառք: Կարինե Շ.-ն գումարի մի մասը` 400 հազ. ՀՀ դրամը, նույն օրը միջնորդի` Արմեն Գ.-ի, միջոցով փոխանցել է նրան և պայմանավորվածություն ձեռք բերել, որ մնացած գումարն էլ փոխանցելու է հետագայում:

Նախաքննությունը շարունակվում է: