Այսօր՝ սեպտեմբերի 3-ին, սպանություն է տեղի ունեցել Շիրակի մարզում։ Ժամը 02։00-ի սահմաններում ոստիկանության Անիի բաժին ահազանգ է ստացվել, որ Լուսաբաց գյուղի տներից մեկում կնոջ դի կա։

Ինչպես հայտնում է shamshyan.com-ը,նշված հասցե են մեկնել ոստիկանության Անիի բաժնի օպերատիվ խումբը, ովքեր նշված տանը հայտնաբերել են նույն տան բնակիչ, 52-ամյա Հայկուշ Սարգսյանի դին։ Դատաբժշկի նախնական տեղեկությունների համաձայն՝ մարմնի վրա կան բռնության հետքեր։

Դեպքի վայր են հրավիրվել նաև Հայաստանի քննչական կոմիտեի Շիրակի մարզային քննչական վարչության քննիչները։ Ոստիկաններն ու քննիչները պարզել են, որ Հ. Սարգսյանին կենցաղային հարցերի շուրջ ծագած վիճաբանության ժամանակ ալկոհոլ օգտագործած վիճակում ծեծի է ենթարկել և սպանել որդին՝ 31-ամյա Հովհաննես Չեռնոմորյանը, ով սպանություն կատարելու կասկածանքով բերման է ենթարկվել ոստիկանության Անիի բաժին։

ՀՀ Նախագահ Սերժ Սարգսյանը շնորհավորական ուղերձ է հղել Լեռնային Ղարաբաղի Հանրապետության անկախության տոնի առթիվ: Ինչպես տեղեկացրին ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից, ուղերձում մասնավորապես ասված է.

«Սիրելի՛ հայրենակիցներ,

Շնորհավորում եմ ձեզ Լեռնային Ղարաբաղի Հանրապետության անկախության 25-ամյակի առթիվ:

1991 թվականի սեպտեմբերի 2-ը հայոց նորագույն պատմության փառահեղ էջն է: Քառորդ դար առաջ արցախահայությունը կատարեց իր անբեկանելի ընտրությունը: Այդ բախտորոշ քայլը գիտակցված էր և իմաստավորված: Այդ ընտրությամբ, այդ կամքով ու վճռականությամբ ստույգ մահվան անդունդի եզրից դեպի կյանք և դեպի ազատություն վերադարձավ հայության ամենավտանգված հատվածը՝ արցախահայությունը:

Դուք կռվեցիք և հաղթեցիք անհավասար պատերազմում: Դուք կառուցեցիք մի պետություն և հասարակություն, որն ազատ է ինչպես երբևէ: Դուք ստեղծեցիք բանակ, որն ամուր է և մարտունակ ինչպես երբևէ: Դուք ավերակներից բարձրացրիք մի երկրամաս, որ երբևէ այսքան խնամված ու գեղեցիկ չի եղել: Դուք ապացուցեցիք ինքներդ ձեզ, ողջ հայությանը և աշխարհին, որ ազատ Արցախը ոչ միայն կենսունակ է, այլև ունի բազմակողմանի զարգացման մեծ ներուժ:

Իհարկե, այդ ներուժը դեռ ամբողջությամբ չի իրացվել: Իհարկե, դեռ շատ անելիքներ ունենք և՛ Արցախում, և՛ Հայաստանում: Եվ իհարկե, անելու ենք մեր անելիքը: Անելու ենք համայն հայության ջանքերով: Անելու ենք ի հեճուկս բոլոր դժվարությունների և մարտահրավերների:

Անցած ապրիլի ռազմական գործողությունները ևս մեկ անգամ, կարելի է ասել՝ մի ավելորդ անգամ, ապացուցեցին, որ թշնամին մեծ կորուստներով հետ է շպրտվելու, եթե փորձի ռազմական ճանապարհով հարց լուծել: Ապացուցեցին, որ Արցախի հարցը ռազմական ճանապարհով լուծող ուժ աշխարհում գոյություն չունի: Գոյություն չունի, որովհետև դուք կաք, որովհետև դուք հավատարիմ եք 25 տարի առաջ կատարած ձեր ընտրությանը: Չկա՛ ռազմական ճանապարհ: Կա քաղաքակա՛ն ճանապարհ:

Այսօր՝ այս նվիրական օրը, կրկին ասում եմ ձեզ. ինչպես երեկ, ինչպես այսօր, այնպես էլ վաղը դու՛ք եք որոշում ձեր ճակատագիրը: Արցախի լուսավոր ապագայի նկատմամբ մենք կասկածներ չունենք:

Կեցցե՛ ազատ ու անկախ Արցախը:

Կեցցե՛ Լեռնային Ղարաբաղի Հանրապետությունը»:

Հ հայտնի բուհերից առնվազն 4-ը հերքում են տեղեկատվությունը, թե այս տարի առաջին կուրսեցիների ուսաման վարձերի ավանդական վերջնաժամկետը սեպտեմբերի 15-18-ից սեպտեմբերի 1-ը տեղափոխելու մասին:

Tert.am –ին նման հավաստիացումներ տրվեցին Երևանի Մխիթար Հերացու անվան պետական բժշկական, Խաչատուր Աբովյանի անվան հայկական պետական մանկավարժական, Երևանի պետական և Հայաստանի պետական տնտեսագիտական համալսարաններից:

Երևանի Մխիթար Հերացու անվան պետական բժշկական համալսարանի ռեկտոր Միքայել Նարիմանյանը Tert.am-ի հետ զրույցում ասաց. «Ոչ, նման բան ինչպե՞ս կարող է լինի, մարդիկ կան, չեն հասցնում, և այլն, և այլն, մեզ մոտ, ինչպես նախկինում, վարձերի վճարման ժամկետը ամսի 15-ն է»:

Ավելին` ռեկտորը նաև տեղեկացրեց, որ ֆինանսական գծով պրոռեկտորի հետ ևս մեկ անգամ խոսել է այդ մասին:

Նշենք, որ «Չորրորդ իշխանություն» օրաթերթն իր այսօրվա համարում տեղեկացրել էր, որ բազմաթիվ ահազանգեր են ստացել տարբեր բուհերում սովորող ուսանողների ծնողներից, որոնց երեխաները սեպտեմբերին 1-ին չվճարելու պատճառով չեն կարողացել մասնակցել դասապրոցեսին և Գիտելիքի օրը նրանց համար դարձել էր «Սեպտեմբերմեկյան կոշմար»:

Tert.am –ի հետ զրույցում նույնը կրկնեց Հայաստանի պետական տնտեսագիտական համալսարանի ռեկտոր Կորյուն Աթոյանը` ասելով.«Ինձ թվում է` էդպիսի բան չի էլ կարող լինել… հակառակը, ժամանակը փորձում ենք ձգել մինչև սեպտեմբերի 20–ի կողմերը»:

Երևանի պետական համալսարանի ու Մանկավարժականի լրատվական ծառություններից ևս  նշեցին, որ առաջին կուրսեցիների վարձավճարների ժամկետների որևէ փոփոխություն չկա, նախկինի նման համալսարանում:

Իսրայելում մարմնավաճառների ծառաություններից օգտվելու համար այսուհետ տուգանելու են: Համապատասխան օրինագծին իր աջակցությունն է հայտնել Իսրայելի սոցապ նախարար Խաիմ Կացը: «Իններորդ ալիքի» փոխանցմամբ՝ Կացը նշել է, որ կաջակցի օրինագծին այն դեպքում, եթե պատիժը չվերաբերվի երկրի անչափահաս քաղաքացիներին: Ըստ օրինագծի, տուգանքը չի գերազանցելու 750 շեկելը (մոտ 200 դոլարը):

Տարեսկզբին Քնեսեթի պատգամավոր Շարոն Էսկելը նախաձեռնել էր օրինագիծ, ըստ որի քրեական պատժի են ենթարկվելու այն հաճախորդները, որոնք երկրորդ անգամ են օգտվում սեքս ծառայություններից: Իսկ առաջին անգամ օգտվողները,ըստ օրինագծի, չեն պատժվի ազատազրկումով:

Պատգամավորի խոսսքով օրենսդիր նախաձեռնությունը թույլ կտա հասարակությունից վերացնել այնպիսի երեւույթներ, ինչպիսիք են մարմնավաճառությունը ու դրան նպաստելը: Էսկելը ուշաադրություն է հրավիրել այն հանգամանքի վրա, որ օրինագիծը առավելագույնս կնվազեցնի սեքս ծառայությունների պահանջարկը, իսկ դրա հետ մեկտեղ՝ նաեւ առաջարկը: Պատգամավորի առաջարկով, երկրորդ անգամ սեքս ծառայություններից օգտվողին կսպառնա մինչեւ կես տարի ազատազրկում: Իսկ եթե դա առաջին անգամն է, ապա վճարովի սիրո սիրահարներին կպարտավորեցնեն հատուկ դասընթացներ անցնել, որտեղ նրանց կպատմեն իրենց արարքի անբարոյականության մասին:

Աղբյուր ՝ news.am

Խարդախության առնչությամբ հետաքննության շրջանակում Հայաստանի ոստիկանությունն առգրավել է Թայվանի 34 քաղաքացիների անձնագրերը: Այդ մասին չորեքշաբթի հայտնել է Թայվանի արտգործնախարարությունը, հայտնում է focustaiwan.tw–ը:

Վկայակոչելով Ռուսաստանում Թայվանի ներկայացուցչի հաղորդումը՝ նախարարությունը հայտնել է, որ մանդարիներեն խոսող կասկածյալների կողմից խարդախության հետ կապված հանցագործությունների վերաբերյալ հետաքննության շրջանակում Հայաստանի ոստիկանությունն այս ամիս խուզարկել է երկու տուն և հյուրանոցը, որտեղ մնացել են Թայվանի քաղաքացիները:

Ոստիկանությունն առգրավել է 34 թայվանցու անձնագրերը, բջջային հեռախոսները և համակարգիչները: Նրանց նկատմամբ հսկողություն է սահմանվել:

Նախարարությունը նշել է, որ թայվանցիներից մի քանիսը կապվել են Ռուսաստանում Թայվանի ներկայացուցչական գրասենյակի հետ՝ օգնություն խնդրելով: Նախարարությունը հայտնել է նաև, որ հարցի առնչությամբ Ռուսաստանում Թայվանի ներկայացուցիչ Դավիդ Վանգը մեկնել է Հայաստան:

Քրեա-օլիգարխիկ ռեժիմից ազատվելու համար մեր հանրությունը պետք է ունենա հետեւյալ չորս հարցերի հստակ պատասխանը: Նման բովանդակությամբ հայտարարություն է տարածել «Նոր Հայաստան» նախաձեռնության անդամ, կալանավորված եւ մեկ ամիս հացադուլի մեջ գտնվող Անդրիաս Ղուկասյանը:

Նա հայտարարությունում, մասնավորապես, ասել է.

«Առաջին. Իսկապես հիմա անհրաժեշտ են արտահերթ նախագահական ընտրություններ: Բոլորին պարզ է, որ Ռուսաստանն Արցախի անվտանգությունն ապահովելու գործում ոչ միայն չի աջակցում Հայաստանին, այլեւ հակառակը` խախտելով մեր պետության հանդեպ ՀԱՊԿ կանոնադրության գլխավոր դրույթները եւ միջազգային հարաբերությունների տարրական կանոնները, աջակցում է Ադրբեջանին: Ակնհայտ է նաեւ, որ միջազգային ատյաններում սպասարկելով Ռուսաստանի շահերը` Հայաստանն աստիճանաբար զրկվում է քաղաքակիրթ պետությունների աջակցությունից եւ հայտնվում է մեկուսացման մեջ: Շարունակել նման արտաքին քաղաքականությունը` նշանակում է գիտակցաբար գնալ Ադրբեջանի առջեւ կապիտուլյացիայի, Արցախի ինքնիշխանության կորստին ու հայաթափմանը: Արտահերթ նախագահական ընտրություններ անցկացնելը վերջին հնարավորություն է շտկելու արտաքին քաղաքականությունը եւ դուրս գալու ստեղծված փակուղուց: Այդ ընտրությունները հանդիսանալով ժողովրդի ճշգրիտ քաղաքական արձագանքը քառօրյա պատերազմում բացահայտված անվտանգության համակարգի բացթողումներին, անկասկած, կապահովեն երկրի համար զարգացման նոր քաղաքակրթական ուղղություն:

Երկրորդ. Ինչո՞ւ է անհրաժեշտ ժողովրդի վստահության կառավարությունը: Արտահերթ ընտրությունները ոչնչով չեն տարբերվի հերթական շինծու ընտրություններից, եթե պետական վարչական ռեսուրսները շարունակեն մնալ ՀՀԿ-ի վերնախավի ձեռքում: Ազատ եւ արդար ընտրություններ անցկացնելու համար անհրաժեշտ է օրենքով սահմանված եռամսյա ժամկետում  ընտրական ողջ գործընթացը եւ վարչական ռեսուրսը դնել այնպիսի կառավարության հսկողության տակ, որի անաչառության նկատմամբ հանրությունը չունի կասկածներ: Սա կարեւոր պայման է Հայաստանում լեգիտիմ իշխանություն ձեւավորելու համար: Այս եղանակով խնդիրը մեկ անգամ լուծելով` մենք կարող ենք մեր պետության առջեւ բացել իսկական ժողովրդավարության ճանապարհը:

Երրորդ. Ո՞վ կարող է գլխավորել այդ կառավարությունը: Մենք ունենք  մի այնպիսի հանրահայտ անձնավորություն, ով անհերքելի հեղինակություն է Հայաստանում, Արցախում եւ Սփյուռքում: Նա Շառլ Ազնավուրն է, ով Հայաստանի համար ծանր օրերին  եղել է մեր ժողովրդի կողքին եւ անշահախնդիր օգնություն ցուցաբերել: Ազնավուրը կարող է գլխավորել մեր պետությունն արտահերթ ընտրությունների անցկացման փուլում, որովհետեւ վեր է կանգնած հայաստանյան ներքին քաղաքական պայքարից, ունի մեծ միջազգային աջակցություն ազատ եւ արդար ընտրությունների խնդիրը լուծելու համար: Չեմ բացառում, որ կարող են լինել նաեւ այլ արժանի թեկնածուներ, բայց տվյալ դեպքում, գտնում եմ, որ Շառլ Ազնավուրի ներգրավումը լավագույն տարբերակն է Հայաստանը ճգնաժամից դուրս բերելու համար:

Չորորդ. Ինչպե՞ս հասնել այն բանին, որ Սերժ Սարգսյանը եւ վարչախումբն ընդունեն քաղաքացիական շարժման պահանջները: Դա կարող է տեղի ունենալ այն ժամանակ, երբ առկա կլինեն առնվազն երեք քաղաքական պայմաններ.

1) Բաղրամյան պողոտան պետք է հասանելի դառնա խաղաղ երթերի ու հավաքների համար, քաղաքացիական շարժումը պետք է վերացնի Ազգային ժողովի եւ Նախագահական նստավայրի մոտ երթեր ու հավաքներ անցկացնելու` գոյություն ունեցող արգելքը:

2) Ժողովրդի վստահության կառավարության ղեկավարի թեկնածուն պետք է արժանանա հանրության լայն աջակցությանը:

3) Հնարավորինս շատ կուսակցություններ պետք է միանան արտահերթ ընտրությունների անցկացման պահանջին:

Կարեւոր եմ համարել հանրության հետ կիսվել այս մտքերով, որովհետեւ ժամանակն իրոք սուղ է, իսկ քաղաքացիական շարժման արդյունավետությունից, առանց չափազանցնելու, այսօր կախված է մեր հայրենիքի ճակատագիրը»:

ՀՀ քննչական կոմիտեի Շիրակի մարզային քննչական վարչությունում հարուցվել է քրեական գործ՝  Լուսաղբյուր գյուղի 12-ամյա բնակչի մահվան դեպքի առթիվ։

2016 թվականի օգոստոսի 30-ին՝ ժամը 22:50-ին, «Մարալիկ առողջության կենտրոն» ՓԲ ընկերությունից ահազանգ է ստացվել, որ Շիրակի մարզի Լուսաղբյուր գյուղում կախված երեխա կա:

Անմիջապես դեպքի վայր է մեկնել քննչական-օպերատիվ խումբը։ Դեպքի վայրի զննությամբ՝ Շիրակի մարզի Լուսաղբյուր գյուղի 2-րդ փողոցի 4-րդ նրբանցքում գտնվող կիսակառույց շինության հարևանությամբ հայտնաբերվել է նույն գյուղի անչափահաս բնակիչ, 01.01.2004 թվականին ծնված տղա երեխայի դիակը՝ գետնին պառկած:

Նախնական տվյալներով՝ երեխայի դին հայտնաբերել է հորեղբայրը՝ նշված կիսակառույց շինության երկաթյա ամրանից հակավորման թելով կախված, դանակով կտրել է հակավորման թելը և դիակը իջեցրել:

Հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասի հատկանիշներով։ Ձեռնարկվում են անհրաժեշտ քննչական գործողություններ՝ անչափահասի մահվան հանգամանքները պարզելու ուղղությամբ, նշանակվել է դատաբժշկական փորձաքննություն։

ՀՀ քննչական կոմիտեի դեպարտամենտի
տեղեկատվության և հասարակայնության
հետ կապերի բաժին

Գյումրու «Ասպարեզ» ակումբի ղեկավար Լևոն Բարսեղյանն իր ֆեյսբուքյան էջում հրապարակել է սպանված Ավետիսյանների դուստրերի և  փեսաների ասուլիսը հենց Ավետիսյանների տանը:
Ավետիսյանների ազգականները շարունակում են պնդել, որ  սպանության գործը բացահայտված չէ, Պերմյակովը միայնակ չի եղել:

Մանրամասները՝ կից տեսանյութում և Լևոն Բարսեղյանի հեղինակած լուսանկարներում: