Ռուսաստանի Դաշնությունում սկանդալ է հասունացել, երբ  նախագահ Դմիտրի Մեդվեդևը Ռուսաստանի տնտեսության արդիականացման և տեխնոլոգիական զարգացման հանձնաժողովի նիստի ժամանակ ՌԴ ֆինանսների նախարար Ալեքսեյ Կուդրինին առաջարկել է օրվա ընթացքում հրաժարական տալ։

Ռուսական լրատվամիջոցները հաղորդում են, որ Մեդվեդևի դիրքորոշումը պայմանավորված է Կուդրինի այն հայտարարությամբ, թե` «ինքն իրեն չի տեսնում Մեդվեդևի ղեկավարած կառավարությունում»:

Կուդրինը, ի պատասխան նախագահի ասել է, թե հրաժարական տալուց առաջ ինքը կխորհրդակցի վարչապետ Պուտինի հետ. «Ես իրոք տարաձայնություններ ունեմ Ձեզ հետ, բայց ես Ձեր առաջարկի առնչությամբ որոշում կընդունեմ վարչապետի հետ խորհրդակցելուց հետո»:

Այս միջադեպը եղել է , այն բանից հետո, երբ Սեպտեմբերի 24–ին,  Մոսկվայում անցկացվող «Եդինայա Ռոսիա» կուսակցության համագումարում ՌԴ վարչապետ Վլադիմիր Պուտինը հայտարարել էր, թե համաձայն է իր թեկնածությունն առաջադրել 2012թ. նախագահական ընտրություններին, հույս հայտնելով, որ նախագահական ընտրություններում իր հաղթանակի դեպքում Ռուսաստանի կառավարությունը կղեկավարի Մեդվեդևը։

Վրաստանի նախագահ Միխայիլ Սահակաշվիլին «Հատուկ ռեպորտաժ» ծրագրին տված հարցազրույցում հայտարարել է, որ ինքն ազգությամբ հայ չէ, եւ անգամ Վրաստանի ղեկավարի մայրն է զարմացած, որ «ոչ ոք չի խոսում» իր ոչ հայկական ծագման մասին։

«Հայաստանի հեռուստաընկերություններից մեկի ներկայացուցիչները եկել էին ինձ հետ հարցազրույց անելու։ Նրանք ինձ ասացին, որ գիտեն իմ հայկական ծագման մասին եւ ավելացրեցին, որ վախենում են՝ ինձ մոտ այդ առումով բարդույթներ ի հայտ գան։ Ես նրանց պատասխանեցի. ինձ համար մեծ պատիվ կլիներ հայ լինել։ Միակ խնդիրն այն է, որ ես հայ չեմ»,- հայտարարել է Սահակաշվիլին։

«Հեռուստատեսությամբ եւս մեկ հաղորդում է եղել, խորհրդային տարիների մի մնացուկ տեղից վեր թռավ եւ ասաց, որ Սահակաշվիլին հայ է։ Ինձ զանգահարեց մայրս եւ ասաց. ինչո՞ւ ոչ ոք այնտեղ չասաց, որ դու հայ չես։ Մենք էթնիկ բոլոր խմբերի խառնուրդ ենք, մեծ քաղաքակրթությամբ երկիր»,- ընդգծել է Վրաստանի նախագահը։

Մեկնաբանելով Վրաստանում «Կրոնների մասին» օրենքի ընդունման փաստը՝ Սահակաշվիլին հայտարարել է, որ այն կընդունվեր, եթե նույնիսկ փողոց 100 հազար մարդ դուրս գար։ Նախագահի խոսքով, 8 տարի առաջ, երբ նախատեսվում էր այս օրենքի ընդունումը, Թբիլիսիի փողոցներ 100 մարդ էր դուրս եկել եւ բողոքի ակցիա անցկացրել։ Այն  ժամանակվա իշխանություններն օրինագծի քննարկումը հետաձգել էին։ Ինչպես նշել է Սահակաշվիլին, խորհրդային վարչակազմին ձեռնտու չէր կրոնական հանդուրժողականությունը, հայտնում է «Գրուզիա online»-ը։

Ըստ թուրքական պարբերականի  Անկարան  Երևանին ուղղված ժեստ է կատարել հայ–թուրքական Արձանագրություններն վերադարձնելով խորհրդարան:

Բան այն է, որ Թուրքիայի նախարարների խորհուրդը վերականգնել է շաբաթներ առաջ Թուրքիայի նոր գումարման խորհրդարանում անվավեր ճանաչված Հայաստանի և Թուրքիայի միջև դիվանագիտական հարաբերությունների հաստատման և երկկողմ հարաբերությունների զարգացման մասին Արձանագրությունները:

Հիշեցնենք, որ Հայ-թուրքական Արձանագրությունները ստորագրվել են 2009թ. հոկտեմբերի 10-ին Ցյուրիխում:Սակայն համաձայն թուրքական խորհրդարանի կանոնակարգ-օրենքի, բոլոր այն օրինագծերը, որոնք չեն հաստատվում և կյանքի չեն կոչվում նախորդ գումարման խորհրդարանի կողմից, նոր գումարման խորհրդարանում անվավեր են ճանաչվում: Սակայն Նախարարների խորհուրդն ու պատգամավորներն օժտված են անվավեր ճանաչված օրինագծերը կրկին օրակարգ բերելու լիազորությամբ:

ՌԴ նախագահ Դմիտրի Մեդվեդևը «Եդինայա Ռոսիա» կուսակցության համագումարի ժամանակ վարչապետ Վլադիմիր Պուտինին առաջարկել է առաջադրվել  2012թ. Ռուսաստանի նախագահական ընտրություններին։

Ինչպես հաղորդում է ռուսական Lenta.ru կայքը, Մեդվեդևը հույս է հայտնել, որ համագումարը կպաշտպանի իր որոշումը։

Ավելի վաղ Մեդվեդևը համաձայնել էր Պետդումային ընտրություններում «Եդինայա Ռոսիայի» ցուցակը գլխավորելու Պուտինի առաջարկին։ ՌԴ նախագահն իր որոշումը բացատրել է նրանով, որ գլխավորելով «Եդինայա Ռոսիայի»  ցուցակը, ինքը կկարողանա կենտրոնանալ կուսակցական գործունեության վրա։

Ռուսաստանի նախագահը նաև ընդգծել է, որ նախագահական ընտրություններից հետո ինքը պատրաստ է աշխատել ՌԴ կառավարությունում։

Մեդվեդևի ելույթն ուղիղ եթերով հեռարձակել է ռուսական Россия 24 հեռուստաալիքը։ Հողորդվում է, որ Մեդվեդևի հայտարարությունն այն մասին, թե տանդեմից որ մեկն է մասնակցելու գալիք նախագահական ընտրություններին, ծափողջուններով է ընդունվել։

Թուրքական Zaman թերթի փոխանցմամբ՝ բրիտանական New Statesman պարբերականը կազմել է աշխարհի 50 ազդեցիկ անձանց ցանկը։ Առաջատար եռյակում են ընդգրկվել Գերմանիայի կանցլեր Անգելա Մերկելը, ԱՄՆ Կենտրոնական հետախուզական վարչության (ԿՀՎ) ղեկավար, գեներալ Դևիդ Պետրեուսը և Չինաստանի մարդու իրավունքների պաշտպան Այ Վեյվեյը։

ԱՄՆ նախագահ Բարաք Օբաման զբաղեցրել է 5-րդ տեղը, իսկ Թուրքիայի վարչապետ Էրդողանը՝ 11-րդ։ Բրիտանական պարբերականը, հիշեցնելով, որ Էրդողանը երեք անգամ անընդմեջ դարձել է Թուրքիայի վարչապետ, նշել է, որ նա Թուրքիայի Հանրապետության հիմնադիր Մուսթաֆա Քեմալ Աթաթուրքից հետո ամենաուժեղ թուրք առաջնորդն է։

Բրիտանական պարբերականն ընդգծել է նաև Էրդողանի կառավարման ժամանակաշրջանում Թուրքիայի տնտեսական հաջողությունները։

Հիշեցնենք, որ New Statesman պարբերականը հիմնադրվել է 1913 թվականին, Լոնդոնում։

Ըստ «ԻՏԱՌ–ՏԱՍՍ»-ի`Բրիտանական «New Statesman» շաբաթաթերթը կազմել է աշխարհի ամենաազդեցիկ մարդկանց ցանկը, որում ներառված է 50 անձի անուն:
Այս տարվա ամենաազդեցիկ մարդ է ճանաչվել Գերմանիայի կանցլեր Անգելա Մերկելը` եվրամիության տարածքում տնտեսական ճգնաժամի հաղթահարման գործում ընդունված որոշումների համար, բացի դրանից` նրանից է կախված լինելու համաշխարհային տնտեսության իրադարձությունների ընթացքը։ Մերկելը 2008–ին զբաղեցնում էր 8–րդ, իսկ 2009–ին 12–րդ տեղը։
«New Statesman»–ի ցանկում երկրորդը ամերիկացի նախկին գեներալ Դեվիդ Պետրեուսն է, ով, թողնելով Աֆղանստանում կոալիցիոն զորքերի գլխավոր հրամանատարի պաշտոնը, դարձավ ԱՄՆ Կենտրոնական հետախուզական վարչության ղեկավար։
Երրորդը չինացի նկարիչ ու այլախոհ Այ Վեյվեյն է։ Նա հանդես է գալիս իր հայրենիքում մարդու իրավունքների խախտումների դեմ։ Վեյցեյը ձերբակալվել էր այս տարվա ապրիլին, հարկերից խուսափելու մեղադրանքով, սակայն բաց էր թողնվել հունիսի վերջին, իրեն մեղավոր ճանաչելուց հետո։
Բրիտանական պարբերականի ցանկի առաջին ութնյակում է նաև Ռուսաստանի վարչապետ Վլադիմիր Պուտինը, ԱՄՆ նախագահ Բարաք Օբաման,Մեծ Բրիտանիայի, Իսրայելի ու Թուրքիայի վարչապետեր Դեվիդ Քեմերոնը, Բենյամին Նեթանյահուն ու Ռեջեփ Թայիփ Էրդողանը։

Ըստ «Ջիհան» գործակալություն հաղորդման` ՄԱԿ–ի ամբիոնից Թուրքիայի վարչապետ Ռեջեփ Թայիփ Էրդողանը հայտնել է այն համոզմունքը,որ Ադրբեջանական հողերի օկուպացիային պետք է վերջ դրվի։
Թուրքիայի վարչապետը ելույթով հանդես է եկել ՄԱԿ–ի Գլխավոր ասամբլեայի 66-րդ նստաշրջանում։ Ելույթի ընթացքում Էրդողանն ի թիվս այլ հարցերի անդրադարձել է նաև ղարաբաղյան հակամարտության կարգավորմանը։
«Բոլորիս բարոյական և քաղաքական պատասխանատվությունն է լուծումներ գտնել միջազգային խնդիրների համար… Ադրբեջանական հողերի տարիներ շարունակվող օկուպացիային պետք է վերջ դրվի։ Ղարաբաղյան հիմնախնդրի չլուծվածությունն անընդունելի է»,– ասել է Էրդողանը։

Ադրբեջանի մայրաքաղաք Բաքվի Բադամբար շրջանում Սեպտեմբերի 21-ի ուշ երեկոյան, բողոքի ակցիա է տեղի ունեցել, հաղորդում է ադրբեջանական մամուլը:
Բողոքի ակցիային մասնակցել են մոտ 3 հազար մարդ: Նրանք հարձակվել են Զարիֆա Ալիեւայի անունը կրող այգու մոտ հավաքվող պոռնիկների վրա, պահանջել են փակել այգու սրճարանները, որոնք պոռնկական ծառայությունների մատուցման վայր են դարձրել: «Մինչեւ առավոտ մեր աչքի առաջ պոռնիկներն են կանգնում: Այստեղով մեր քույերն ու մայրերն են անցնում, իսկ նրանք շարունակ հայհոյում են»,- բողոքել են ցուցարարները:
Ակցիայից մեկ ժամ հետո ոստիկանները միջամտել եւ ցրել են ցույցը:
Հ.Գ. Մեր ակտիվիստները, մասնավորապես «Չենք լռելու» ակցիայի նախաձեռնողները, տեսնես ինչու են լռում, երբ Երևանի կենտրոնում`ֆայլաբազարում ժամը 7-ից սկսած պոռնիկների խումբը բացահայտ աշխատանքի է դուրս գալիս: Չէ՞ որ այդտեղով էլ մեր մայրերն ու քույրերն են անցնում:

Վրաստանի մայրաքաղաքում սեպտեմբերի 20-ին մեկնարկել է հանդիսավոր միջոցառումների շարքը` նվիրված Հայաստանի Հանրապետության անկախության 20-ամյա հոբելյանին:

Այն սկսվել է Թբիլիսիի կոնսերվատորիայի շենքում կազմակերպված «Լուսանկարչական էտյուդներ Հայաստանից» ցուցահանդեսով, որին ներկայացված են եղեկ ճանաչված լուսանկարիչներ Յուրի Մեչիտովի, Մայա Դեիսաձեի, Յուրի Ակուլյանի, Վալերի Ունանյանցի և Ազատ Մանուկյանի` վերջին տարիների ընթացքում Հայաստանում արված լուսանկարները: Ցուցահանդեսը բացել է Վրաստանում Հայաստանի դեսպան Հովհաննես Մանուկյանը:

Ցուցահանդեսից հետո կոնսերվատորիայի մեծ դահլիճում կայացել է Հայաստանի անկախության 20-ամյակին նվիրված հանդիսավոր նիստ: Հայաստանի դեսպան Հովհաննես Մանուկյանը շնորհավորել է ներկաներին տոնի կապակցությամբ և նշել, որ Հայաստանը ոչ միայն ավելի քան երեք միլիոն հայաստանցիների, այլև միլիոնավոր աշխարհասփյուռ հայերի հայրենիքն է:

Վիրահայոց թեմի առաջնորդ Տեր Վազգեն եպիսկոպոս Միրզախանյանը ներկաներին փոխանցել է Ամենայն Հայոց Կաթողիկոս Ն.Ս.Օ.Տ.Տ. Գարեգին Բ-ի շնորհավորանքի խոսքը հոբելյանական տարեդարձի կապակցությամբ:

Այնուհետև Հայաստանի դեսպանը հրապարակել է Վրաստանի հայ համայնքի վաստակաշատ ներկայացուցիչների անունները, ովքեր պարգևատրվել են ՀՀ մշակույթի, սփյուռքի, կրթության և գիտության նախարարությունների մեդալներով, պատվոգրերով և շնորհակալագրերով, ինչպես նաև Վրաստանում ՀՀ դեսպանության պատվոգրերով և շնորհակալագրերով:

Առաջին օրվա տոնական միջոցառումների շարքն ավարտվել է համերգով, որի ժամանակ Թբիլիսիի հանրաճանաչ երգիչների և համույթների կատարմամբ հնչել են ՀՀ օրհներգը, հայկական հայրենասիրական և ժողովրդական երգեր:

Վրաստանի նախագահ Միխայիլ Սահակաշվիլին ուղեւորվել է ԱՄՆ` ՄԱԿ-ի Գլխավոր ասամբլեայի 66-րդ նստաշրջանին մասնակցելու համար, հաղորդում է GHN-ն:

Արդեն հայտնի է, որ Սահակաշվիլին հանդիպում կունենա ԱՄՆ գործող նախագահ Բարաք Օբամայի, ինչպես նաեւ նրա նախորդած նախագահներ Ջերջ Բուշի եւ Բիլ Քլինթոնի հետ: Վրաստանի նախագահը բացելու է «Կոնկորդիա»-ի գագաթաժողովը, որը անցկացվելու է ՄԱԿ-ի ԳԱ-ի նստաշրջանին զուգահեռ: Սահակաշվիլին նաեւ մասնակցելու է «Բաց ղեկավարման համար համագործակցության» կոնֆերանսին: