Reuters գործակալությունը տեղեկացնում է, որ Սիրիայի Ջիսր ալ Շուղուր քաղաքում երեկ տեղի ունեցած բախումների հետևանքով զոհվել է հատուկ ծառայությունների ավելի քան 120 աշխատակից։ Ըստ գործակալության  տեղեկությունների, այս արյունոտ հաշվեհարդարը կարելի է շրջադարձային համարել կառավարական ուժերի և ցուցարարների՝ ավելի քան 3 ամիս շարունակվող բախումներում։

Իրավապահ մարմինների աշխատակիցների մեծ մասը զոհվել է քաղաքային անվտանգության ծառայության գրասենյակը գրոհելու ժամանակ։

Սիրիայի պետական հեռուստատեսությունը հաղորդել է, որ քաղաքում տեղի է ունեցել «իսկական սպանդ»: Որոշ  սպանվածների մարմինները անդամահատված են եղել, իսկ մյուսներին գցել են Օրոնտես (Ասի) գետը։ Սիրիայի կառավարությունն արդեն խոստացել է «վճռական» հակահարված տալ մեղավորներին։

Ըստ Agence France-Presse գործակալության՝ այսօր Իրաքում 5 ամերիկացի զինվոր է սպանվել:

Պենտագոնի պաշտոնական հաղորդագրության մեջ զինվորների մահվան հստակ պատճառները չեն նշվում, սակայն որոշ լրատվամիջոցներ հաղորդում են, որ ամերիկացիներին   ռմբակոծել են Բաղդադի հարևանությամբ գտնվող «Վիկտորիա» ռազմաբազայում:

4 տարվա ընթացքում Իրաքում 4459 ամերիկացի զինվոր է մահացել:

Բարաք Օմաբայի որոշմամբ, Իրաքից ԱՄՆ զորքերը պետք է հեռանան 2011 թվականի վերջին: Այժմ Իրաքում ավելի քան 50.000 զինվոր կա:

BBC-ն տեղեկացնում է, որ Պորտուգալիայի վարչապետ Ժոզե Սոկրատեշը հրաժարական է տվել խորհրդարանական ընտրություններում իր գլխավորած կուսակցության պարտությունից հետո:

Խորհրդարանական ընտրություններում սոցիալիստները պարտվել են սոցիալ-դեմոկրատներին, որոնք հավաքել են ընտրողների ձայների 38%-ը։ Սոցիալ-դեմոկրատները հանդես են գալիս արագ սեփականաշնորհման և Պորտուգալիայի բյուջետային համակարգի կայունացման ուղղությամբ հետագա քայլեր ձեռնարկելու օգտին:

Եմենի նախագահ Աբդուլլահ Սալեհն այժմ Սաուդյան Արաբիայում է: Ընդդիմադիրները հայտարարել են, որ ռմբակոծության ժամանակ վիրավորված Սալեհին թույլ չեն տալու վերադառնալ տուն:

Ի դեպ, նրա վերադարձը հղի է մեծ վտանգով հենց իր՝ Եմենի նախագահի համար, որովհետև ընդդիմությունը մտադիր չէ նահանջել և պնդում է, որ Սալեհը Եմենում այլևս տեղ չունի:

Հիշեցնենք, որ 33 տարի նախագահող Սալեհին վիրավորել են  ուրբաթ օրը, նախագահի նստավայրի ռմբակոծման ժամանակ:

Սաուդյան Արաբիա տեղափոխված վիրավոր նախագահին արդեն վիրահատել են 2 անգամ: Լիովին վերականգնվելու համար Սալեհին առնվազն 2 շաբաթ է անհրաժեշտ, որից հետո նա դեռևս հույս է փայփայում, որ հայրենիք կվերադառնա:

Եմենի նախագահ Ալի Աբդուլլա Սալեհը, ով վիրավորվել էր նախագահական պալատի ռմբակոծման ընթացքում, ելույթ է ունեցել հեռուստատեսությամբ և հայտարարել, որ  հարձակումն իրականացրել է ընդդիմադիր ցեղախմբերից մեկը:

Սալեհի խոսքերով  հարձակման հետևում կանգնած է շեյխ Սադեկ ալ Ահմարի գլխավորած Հաշիդ ցեղը: Նախագահը հայտարարել է, որ միջադեպի հետևանքով զոհվել են իրավապահ մարմինների  7 աշխատակից:

Իր հերթին շեյխ Սադեկը հայտարարել է, որ  իր ցեղի ներկայացուցիչները կատարվածի հետ որևէ կապ չունեն:Վերջինիս խոսքերով մեղավոր է միայն նախագահ Սալեհը:

Եմենի նախագահի ելույթը հեռարձակվել է պետական հեռուստաընկերությամբ՝ առանց տեսանյութի:Սալեհը չի ցանկացել ցույց տալ իր դեմքը` բազմաթիվ վերքերի պատճառով:

Քաթարում Չինաստանի դեսպան Չժան Չժիլյանը բանակցել է Լիբիայի Ազգային անցումային խորհրդի առաջնորդ Մուստաֆա Աբդել Ջալիլի հետ, հաղորդում է Reuters-ը՝ վկայակոչելով ՉԺՀ արտաքին գործերի նախարարության հայտարարությունը:
Հաղորդագրության մեջ չի նշվում բանակցությունների ոչ տևողության, ոչ քննարկված թեմաների, ոչ էլ՝ հանդիպման արդյունքների մասին: Ասված է միայն, որ կողմերը «փոխադարձաբար տեսակետներ հայտնեցին Լիբիայում ստեղծված իրավիճակի մասին»:
Չինաստանի ԱԳՆ-ն նաև տեղեկացրել է, որ հյուսիսաֆրիկյան այս պետության նկատմամբ Պեկինի դիրքորոշումը անփոփոխ է: «Մենք հուսով ենք, որ լիբիական ճգնաժամը կհաղթահարվի քաղաքական լուծմամբ, և կարծում ենք, որ այդ երկրի ապագան պետք է որոշվի ժողովրդի կամքով»:

Մինչ այս հանդիպումը՝ ՉԺՀ-ն աբստամբների ներկայացուցիչների հետ չի շփվել և աջակցել է Մուհամար Քադաֆիի ռեժիմի լեգիտիմացմանը: Չին դիվանագետներն ու ղեկավարները բազմիցս երկխոսության կոչ են արել հակամարտող կողմերին և պահանջել են դադարեցնել ՆԱՏՕ-ի գործողությունները:
Դիտորդների կարծիքով՝ նման կեցվածքի պատճառն այն էր, որ Քադաֆիի օրոք Չինաստանը մեծ ներդրումներ է արել լիբիական տնտեսությունում և նրան անհանգստացնում էր, ապստամբների հաղթանակի դեպքում, հնարավոր տնտեսական կորուստների հեռանկարը:

Այնուհանդերձ, ՉԺՀ-ի ներկայացուցիչը ՄԱԿ-ի Անվտանգության խորհրդում չի օգտվել վետոյի իրավունքից:

Ռուսաստանը, որը նույնպես երկար ժամանակ որդեգրել էր նույն դիրքորոշումը՝ ինչ որ Չինաստանը, մայիսի վերջին կայացած բանակցությունների ժամանակ ընդունեց լիբիական ընդդիմության ղեկավարությանը՝ որպես լեգիտիմ գործընկեր և Քադաֆիին խորհուրդ տվեց հրաժարական տալ:

Ուդմուրտիայի զինապահեստներում հնչած պայթյունի հետևանքով ծագած հրդեհից տուժածների թիվը աճել է՝ հասնելով 52-ի, ուրբաթ օրը «ՌԻԱ Նովոստի»-ին հայտնել է Ռուսաստանի ԱԻՆ տեղեկատվության վարչության ներկայացուցիչը:

Ավելի վաղ հայտարարված էր 45 տուժածների և 18 հիվանդանոց տեղափոխվածների մասին:

«Այս պահի դրությամբ 52 մարդ դիմել է բժշկական օգնության, 25-ը ստանում են բուժօգնություն, 2-ն արդեն դուրս են գրվել», — հայտնել են գործակալությունից:

Ըստ ՊՆ ներկայացուցչի՝ հրետանային ռազմամթերքի պայթյունները շարունակվում են 2-3 րոպե հաճախականությամբ:

Պաշտպանության նախարարի տեղակալ Դմիտրի Բուլգակովը պատմել է «Ինտերֆաքս»-ին, որ պահեստներում առկա են հրթիռային զինամթերքի ոչ մեծ պաշարներ, որոնք բետոնե ծածկույթի տակ են և պայթյունավտանգ չեն:

Պուգաչով գյուղի մոտակայքում տեղակայված Կենտրոնական ռազմական շրջանի 102-րդ զինանոցում պայթյունի հետևանքով հրդեհն սկսվել է հունիսի 2-ի երեկոյան: Վտանգավոր տարածքից էվակուացվել է 28 հազար մարդ:

CNN հեռուստաընկերությունը տեղեկացնում է, որ առնվազն 17 մարդ է զոհվել, ավելի քան 46-ը տարբեր աստիճանի մարմնական վնասվածքներ են ստացել Սոմալիի մայրաքաղաք Մոգադիշոյում` հակակառավարական ցույցերի մասնակիցների և   ոստիկանության բախումների հետևանքով: Տեղական առողջապահական կազմակերպությունների ներկայացուցիչները տեղեկացրել են, որ բոլոր զոհվածները քաղաքացիական անձինք էին:

Վերջին օրերին Սոմալիի մայրաքաղաքում բախումները նոր թափ են հավաքել: Կառավարական զինուժը, Աֆրիկյան միության զորքերի օգնությամբ, շրջապատել է իսլամիստական բազաներից մեկը, որը Բակարա շուկայի մոտ է գտնվում: Անընդհատ ընթացող   բախումների հետևանքով շուկան այլև չի գործում, առանց դրա էլ աղքատ բնակչությունը մնացել է առանց անհրաժեշտ սննդամթերքի:

Սոմալիի պաշտպանության նախարար Աբդուլհաքիմ Մուհամադը հայտարարել է, որ շուկայի գրավումը զորքերի գլխավոր նպատակն է, քանի որ հենց այնտեղից են իսլամիստները հարվածներ հասցնում քաղաքին:

Associated Presse գործակալությունը տեղեկացնում է, որ ՆԱՏՕ- ի ուժերն առնվազն տասը օդային հարված են հասցրել Մուամար Քադաֆիի ռազմական օբյեկտներին, որոնք գտնվում են Լիբիայի մայրաքաղաք Տրիպոլիում:

Լիբիայի կառավարության ներկայացուցիչը տեղեկացնում է, որ հարձակումը տեղի է ունեցել այսօր՝ վաղ առավոտյան:  Զոհվածների և վիրավորվածների մասին տեղեկություններ դեռևս չկան:

Ըստ գործակալության տեղեկությունների՝ այսօրվա օդային հարվածները շատ հզոր են եղել:

Երբևէ պատկերացնո՞ւմ եք, որ Հայաստանում հարցում անցկացվի, ու դրա արդյունքներով Արդրբեջանն ընդգրկվի բարեկամ երկրների հնգյակում: Մոտ ապագայում նման բան հնարավոր չէ: Հնարավոր չէ նաև, որ տեսանելի ապագայում Հայաստանի նկատմամբ բարեկամական տրամադրություններ լինեն Ադրբեջանում:

Թեմայի շուրջ սկսեցի մտածել, երբ երեկ ծանոթացա ռուսաստանցիների շրջանում «Լևադա» կենտրոնի անցկացրած հարցումներին: Ռուսաստանցիները Գերմանիան նշել են իրենց երկրի հինգ բարեկամների շարքում:

Եվ սա այն դեպքում, որ անցյալ հարյուրամյակում Ռուսաստանն ու Գերմանիան ունեցել են, մեղմ ասած, ոչ բնականոն հարաբերություններ, իսկ ավելի ստույգ` երկու աշխարհամարտերում ոխերիմ թշնամիներ էին:

Հարցման արդյունքներն ինձ ուրախացնում են, որովհետև, տվյալ պարագայում, ռուսները չեն դարձել պատմության գերին և հարցին պատասխանել են` ապագային նայելով:

Ինչևէ, սոցհարցման տվյալները չեն հուշում այն մասին, թե ռուսները մոռացել են իրենց պատմությունը: Բնավ` ոչ: Երկրորդ համաշխարհային պատերազմը, դրանում հաղթանակը համարյա ֆետիշացվում են նրանց կողմից:

Աշխարհն է փոխվել, այդ թվում` Գերմանիան և Ռուսաստանը: Գերմանիան դարձել է ֆաշիզմն ու բռնությունը դատապարտող համաշխարհային դերակատարներից մեկը, և այսօրվա ռուսաստանցին պատճառ չունի այդ երկիրը Հիտլերի հետ նույնացնելու: Ռուսաստանն էլ է փոխվել: Չնայած այս երկրի ավտորիտար բնույթին` այլևս չկա այն «երկաթյա վարագույրը», որը սովետական մարդուն, ռուսաստանցուն անջատում էր քաղաքակիրթ աշխարհից:

Մի օր Հայաստանում և Ադրբեջանում նույնպես կփոխվեն հասարակական տրամադրությունները, մեկս մյուսի մեջ թշնամիներ չենք փնտրի: Գուցե մեր սերունդը չտեսնի, բայց այդ օրը գալու է: Այդ օրը գալու է, երբ տեղի ունենա մտածողության փոփոխություն, և հայն ու ադրբեջանցին գիտակցեն, որ իրենք մի մասնիկն են միասնական աշխարհի, որտեղ սահմանները խիստ հարաբերական նշանակություն ունեն: