Մետրոյի «Գարեգին Նժդեհ» կայարանում հունիսի 14-ին ոստիկանի կրակոցներից մահացու հրազենային վնասվածք ստացած, ավազակային հարձակում կատարելու մեջ կասկածվող 30-ամյա Արման Ենգիբարյանը զինված է եղել գազային ատրճանակով: Այս տեղեկությունը «ՀԺ»-ի թղթակցի հետ զրույցում հաստատել է ՀՀ ոստիկանապետ Ալիկ Սարգսյանը:

Վերջինս ասել է նաեւ, որ մինչեւ վնասազերծումը Ենգիբարյանը չորս անգամ կրակել է իրեն հետապնդող ոստիկանության աշխատակիցների ուղղությամբ, եւ նրանք ստիպված են եղել իրենց ծառայողական զենքից պատասխան կրակ բացելով` վնասազերծել նրան: Երվ հետապնդելիս հանցագործը կրակել է ոստիկանների ուղղությամբ, նրանք կարծել են, թե նա մարտական զենքից է կրակում, եւ միայն վնասազերծումից հետո է պարզվել, որ ատրճանակը գազային է եղել: «Եթե հանցագործին չբռնեին եւ բաց թողնեին, ես չգիտեմ, թե այդ ժամանակ ինչ էինք ասելու, ինչ էինք անելու, ես Ձեզ ինչ էի պատասխանելու: Ես ոստիկանին չեմ մեղադրում, նա գործել է օրինաչափ»,-ասել է Ալիկ Սարգսյանը:

«Իշխանության եւ ընդդիմության երկխոսության արդյունքում, ինչպիսին էլ այն լինի, ավազակապետությունը չի կազմաքանդվի, ժողովրդավարություն չի հաստատվի, օլիգոպոլիաները չեն վերանա, կոռուպցիան չի նվազի, սոցիալ-տնտեսական իրավիճակը չի շտկվի: Չափից դուրս լավատեսական սպասումները նույնքան վտանգավոր են, որքան «սեւ» անհավատությունը: Այդ գործընթացը կարող է բերել արտահերթ կամ հերթական ընտրությունների: Դժվար թե Հայաստանի քաղաքացիների կյանքի իմաստը եւ ամենագլխավոր ձգտումը արտահերթ ընտրություններն են: Բայց մեր հասարակության զարգացած մասը հասկանում է, որ եթե ընտրությունների արդյունքները գոնե որոշ չափով արժանահավատ եւ վստահելի լինեն, դա կլինի մեծ առաջընթաց քայլ, որը մեր երկրի առաջ նոր հեռանկարներ կբացի:

Ենթադրում եմ, որ Լեւոն Տեր-Պետրոսյանն ու Սերժ Սարգսյանը դրանում շահագրգռված են, իսկ Թոխմախի Մհերը, նրա նմանները, ինչպես նաեւ ՀԱԿ-ի «ոչ ադեկվատ» մասը` ոչ: Ես լինեի երկխոսող-բանակցողների տեղը, կկենտրոնանայի արդար ընտրությունների խնդրի վրա. այստեղ կարելի է պայմանավորվել բազմաթիվ մեխանիզմների մասին` հաշվի առնելով նաեւ ինտերնետի եւ, մասնավորապես, օnline հեռարձակման հնարավորությունները: Մենք այսօր ռեալ հնարավորություն ունենք ձեւավորելու քիչ թե շատ լեգիտիմ իշխանություն: Եթե այդպես լինի, այլեւս երկրորդական հարց կդառնա, թե որ քաղաքական ուժն է մեծամասնություն կազմելու խորհրդարանում եւ ով է զբաղեցնելու նախագահի աթոռը»,-իր խմբագրականում գրում է «Առավոտ» օրաթերթը:

Հրապարակման հետագա տողերում կարդում ենք. «Հուսով եմ, որ իշխանությունն ու ընդդիմությունը ժամանակ չեն ծախսի մանր-մունր խնդիրների վրա` որտեղ, ժամը քանիսին, քանի հոգով հանդիպեն ու այլն: Մանկապարտեզ չի: Եւ մի հարց էլ. Կոնգրեսի քննադատներից ոմանք ասում են, որ ընդդիմության նպատակներից մեկն այն է, որ նախագահ Սարգսյանը ներքին ճակատում դուրս գա խոցելի վիճակից եւ ղարաբաղյան բանակցություններին գնա «լավ խաղաքարտերով»:

«ՉԻ» տեղեկություններով` այս օրերին ՀՀ ազգային անվտանգության ծառայության աշխատակիցները շարունակում են «հավաքագրել» օլիգարխներին եւ պատգամավորներին պատկանող այն ավտոմեքենաները, որոնք Հայաստան են հասել ապօրինի ճանապարհով:

Խոսակցություններ կան, որ ԱԱԾ «տուգանային հրապարակում» են հայտնվել անգամ ԱԺ պատգամավոր Սաշիկ Սարգսյանին սպասարկող մեքենաները: Նույն տխուր իրավիճակում է հայտնվել նաեւ ԱԺ պատգամավոր Լեւոն Սարգսյանին` Ալրաղացի Լյովին սպասարկող «ավտոմոբիլային» անձնակազմը: Շրջանառվող խոսակցություննրի համաձայն` նրանից էլ ԱԱԾ-ն առգրավել է չորս մեքենա: Որսն այս առումով դեռեւս ավարտված չէ:

«Ժամանակ»-ին հայտնի է դարձել, որ 2011թ. հուլիսի 1-ից 11-ը Երեւանի «Armenia Marriot» հյուրանոցում տեղի է ունենալու աշխարհասփյուռ հայ մասոնականների համաժողովը: «Մեզ հաջողվեց պարզել, որ մինչ օրս Հայաստանում անդամագրված շուրջ 80 մասոնականներ կան, որոնք ճանաչված են համաշխարհային մասոնական կազմակերպությունների կողմից:

Հայաստանի մասոնական կազմակերպությունը կրում է Հայաստանի գերագույն օթյակ (Grand Lodge of Armenia) անունը, որի ստեղծման եւ ճանաչման համար անհրաժեշտ է եղել առնվազն երեք երկրի հավանությունն ու ճանաչումը: Ըստ կազմակերպությանը մոտ կանգնած մեր աղբյուրրի, Հայաստանում Գերագույն մասոնական օթյակ ունենալուն հավանություն են տվել ԱՄՆ-ի, Ռուսաստանի եւ Ֆրանսիայի մասոնական կազմակերպությունները:

Հայտնի է, որ հայ մասոնականները վերջերս դիմել են Սերժ Սարգսյանին Երեւան քաղաքում Մասոնական տաճարի կառուցման համար հող հատկացնելու խնդրանքով, սակայն նախագահականից այդպես էլ պատասխան չի ստացվել: Հայաստանի մասոնականներն էլ տարածք են ձեռք բերել Վահագնի թաղամասում եւ առաջիկայում ծրագրում են իրենց գործունեությունն իրականացնել հենց այս թաղամասից»,-գրում է թերթը:

ՀՀ տրանսպորտի տեսչության Լոռու մարզի տարածքային բաժնում նոր հաստիք են բացել` երկաթուղային տեսուչ: Սկզբում, ինչպես պահանջում է օրենքը, Քաղծառայության խորհուրդը ռեզերվից նոր կադր է պահանջել` ժամանակավոր պաշտոնակատար նշանակելու համար, մինչեւ մրցույթի արդյունքում հաղթող ճանաչվելը, սակայն կարճ ժամանակ անց փոշմանել են: «Հրապարակ»-ի տեղեկություններով` փոշմանելու պատճառն այն է, որ այդ պաշտոնը «բրոնյա» արված է եղել, եւ մոտ 2 ամիս առաջ բաժնի պետի պաշտոնում նշանակել են անկախ պատգամավոր Վիկտոր Դալլաքյանի եղբորը` Սամվել Մարտինյանին:

«Չնայած մրցույթը նախատեսված է օգոստոսի 25-ին, սակայն Մարտինյանի հարցը բարձր մակարդակով լուծված է, ասում են` Արթուր Բաղդասարյանի մակարդակով»,-գրում է թերթը:

«Մեր միջոցառումներին գործնական կերպով մասնակցում են հարյուրավոր խմբեր, որոնց հանրագումարը շատ ավելի մեծ թիվ է կազմում, քան հանրահավաքների մասնակիցներն են»,- հայտարարել է «Ժառանգության» պատգամավոր Արմեն Մարտիրոսյանը։
«ՉԻ»-ն հակադարձում է. «Խոսքն ամենայն հավանականությամբ «Ժառանգության» կազմակերպած «քաղաքացիական ժողովների» մասին է, որոնց լավագույն դեպքում մասնակցում է մի 60-70 հոգի։

Թե ինչպես են այդ 60-70 մասնակիցները ներկայացնում «հարյուրավոր խմբեր»՝ մնում է անհայտ։ Չէ, մենք հասկանում ենք, որ «Ձախորդ Փանոսը» հեքիաթի հանրահայտ հերոսն, օրինակ, կարող է միաժամանակ ներկայացնել և՛ ջրային թռչունների որսի սիրահարների ակումբը, և՛ ընտանեկան բռնություններից տուժածների միությունը։ Ավելին, Արմեն Մարտիրոսյանն ինքը միաժամանակ և՛ ընդդիմադիր կուսակցության անդամ է, և՛ «Նիգ-Ապարան» հայրենակցական միության ներկայացուցիչ։ Եվ այնուամենայնիվ, 60-70 հոգուն չի կարելի անվանել «հարյուրավոր խմբեր» ու եզրակացնել, որ նրանց հանրագումարը հանրահավաքների մասնակիցների թվից մեծ է։

Չնայած՝ ո՞վ ասաց, որ չի կարելի։ Պրն Մարտիրոսյանի երկրորդ «կարգավիճակը» լիովին տալիս է այդ իրավունքը»։

«Առավոտ»-ի խմբագիրը գրում է. «Վստահ եմ, որ մենք ՝ հայաստանցիներս, արժանի ենք այս հարցերում չլինել դաղստանցիների, բելառուսների և ադրբեջանցիների կողմից։ Հեռու եմ ազգային սնապարծությունից, պարզապես ելնում եմ պատմական իրողություններից, ինչպես նաև մասնագետների գնահատականներից։ Հենց վերջերս եմ զրուցել արևմտյան փորձագետների հետ, և նրանք ինձ ասացին, որ թեև զուտ ձևական առումով մամուլի ազատության վիճակով մենք առաջ ենք Ադրբեջանից և գտնվում ենք Վրաստանի մակարդակի վրա, բայց մտածելակերպով ավելի եվրոպամետ ենք և համապատասխան ռեժիմ հաստատելու դեպքում իրապես կարող ենք նոր որակ ստեղծել տարածաշրջանում։ Ես էլ եմ դրան հավատում՝ խոսելով մեր բազմաթիվ արատների մասին, եկեք չմոռանանք մեր առավելությունները։

Ինչ մնում է ռեժիմին։ Իշխանությունը կարծես թե նորից պատրաստվում է «սղացնել» «Հեռուստատեսության և ռադիոյի» մասին իբր բարեփոխումներ, որոնք կօգնեն նրան բաժանել հաճախականություններն իրեն ծառայող «պատասխանատու» հեռուստաընկերություններին։ Ես այդպես հասկացա օրենքի փոփոխությունները մշակող աշխատանքային խմբի՝ լրագրողական հ/կ-ները ներկայացնող հ/կ-ների ղեկավարների նախորդ օրվա հայտարարությունից։ Ճիշտ է, որ մերոնք դրա մասին խոսում են այսօր, թե չէ՝ հերթական «մրցույթն» անցկացնելուց հետո իշխանությունները կասեն՝ օրենքը կատարելագործման կարիք ունի։ Հրաշալի արդարացում է»։

Պարուհիների հետ զրուցել են «1937 թվականի ոգով»

«Առավոտ» օրաթերթը հունիսի 10-ին հրապարակել էր մոսկվաբնակ Արսեն Մարգարյանի նամակ-ահազանգը, ըստ որի` Հայ Առաքելական եկեղեցու ռուսաստանյան թեմի առաջնորդ Եզրաս սրբազանը թեմի կազմում գործող «Հայասա» պարային համույթին աշխատավարձ չի տալիս, չնայած այս համույթի համար գումարներ են տրամադրում ռուսահայ գործարարները` Ռուբեն Վարդանյանը, Սամվել Կարապետյանը, Լևոն Հայրապետյանը և այլք:

Արսեն Մարգարյանը նոր նամակով տեղեկացրել է օրաթերթին, որ առաջին նամակից հետո, Եզրաս սրբազանի կարգադրությամբ, նրա օգնականները հրավիրել են «Հայասայի» պարուհիներին և «1937 թվականի ոգով զրուցել հետները` հասկանալու համար, թե ով է տեղեկատվական արտահոսքի հեղինակը»: «Հայ Առաքելական եկեղեցու նախկին սպասավոր տեր Սահակը մի առիթով ասել էր, որ այսօր Հայ Առաքելական եկեղեցին ամբողջությամբ պատկանում է Գարեգին Բ կաթողիկոսին և նրա եղբայր Եզրաս սրբազանին: Տեր Սահակը չէր էլ ենթադրում, որ Հայ Առաքելական եկեղեցին նաև ԽՍՀՄ ԿԳԲ-ի «լավագույն ավանդույթների» վերածննդով է զբաղված»,-գրում է Արսեն Մարգարյանը:

«Առավոտ»-ը  հիշեցնում է, որ Եզրաս սրբազանը Ամենայն հայոց կաթողիկոս Գարեգին Բ-ի հարազատ եղբայրն է: «Կաթողիկոսը եղբորը թեմի առաջնորդ կարգեց մեծ կռվով-վեճերով: Սա այն կաթողիկոսն է, որ ուզում է քանդել Երևանի «Մոսկվա» կինոթատրոնի ամառային դահլիճը, իսկ սակավածառ Արմավիր քաղաքում էլ այգի հատել` եկեղեցի կառուցելու համար»:

Ըստ «Ժամանակ»-ի իշխանությանը մերձ աղբյուրների, ՀՀԿ վերնախավը, մեղմ ասած, այնքան էլ գոհ չէ Արագածոտնի մարզպետ, ՀՀԿ-ական Սարգիս Սահակյանի գործունեությունից: Պատճառն այն է, որ նա չի կարողանում չեզոքացնել իրենից առաջ մարզը գլխավորած ՀՅԴ ուրվականը: Դրանից բացի, ընտրությունների ժամանակ չի կարողանում հանրապետականների օգտին պահանջված թվեր ապահովել: Այս ամենով հանդերձ` խոսակցություններ են պտտվում, թե մարզպետի եղբայրն առաջիկա խորհրդարանական ընտրություններին առաջադրելու է իր թեկնածությունը:

Թերթի թղթակիցը զրուցել է մարզպետի հետ: «Ինձանից դժգոհելու խնդիր չկա: Արագածոտնի մարզում Հանրապետականները բավականին մեծ հեղինակություն ու կշիռ ունեն: Ավելին, իմ բոլոր հնարավորություները օգտագործելու եմ` բարձրացնելու համար Հանրապետական կուսակցության հեղինակությունը, և դա այդպես էլ կլինի»,- ասել է նա:

—Արագածոտնի մարզում լուրեր են տարածվում, թե 2012 թ. ԱԺ ընտրություններին, մեծամասնական ընտրակարգով, թիվ 15 ընտրատարածքում առաջադրվելու է Ձեր եղբայրը` Նաիրի Սահակյանը: Ավելին, ասում են նաև, որ թիվ 15 ընտրատարածքում Նաիրի Սահակյանի թեկնածությունը պաշտպանելու է Հանրապետական կուսակցությունը: (Ստացվում է, որ նա դեմ է դուրս գալու ԱԺ պատգամավոր Խաչիկ Մանուկյանի՞ն):

-Իմ եղբայրը իր թեկնածությունը չի դնելու: Իմ եղբայրը կյանքում չի դնելու իր թեկնածությունը, որովհետև ես Հանրապետական կուսակցության անդամ եմ, մարզային կուսակցության նախագահն եմ: Ոնց կորոշի երկրի նախագահը, գործընթացները կզարգանան այդ կարգով: Երկրի նախագահը`Հանրապետական կուսակցության նախագահը, ինչ որոշում կկայացնի, մենք պարտավոր ենք ի-րա-գոր-ծե-լու:

Թերթի տեղեկություններով՝ վերջին շրջանում խիստ լարվել են Սերժ Սարգսյանի և ՀՀ գլխավոր դատախազ Աղվան Հովսեփյանի հարաբերությունները: Իսկ դա, ըստ թերթի, տեղի է ունեցել այն բանից հետո, երբ հայտնի է դարձել, որ Սերժ Սարգսյանի օգնական Արմեն Աբելյանի աներոջ և զոքանչի դեմ քրեական գործ բացելու ցուցումը տվել է անձամբ Աղվան Հովսեփյանը։

«ՀԺ»-ն հիշեցնում է, որ նախորդող շաբաթվա ընթացքում դատարանները միանգամից երկու արդարացման դատավճիո են կայացրել, որոնք, ըստ էության, ՀՀ գլխավոր դատախազ Աղվան Հովսեփյանի դեմ են եղել. Օրերս թերթին հայտնի է դարձել դրանցից մեկի՝ մայիսի 24-ին Շենգավիթ վարչական շրջանի ընդհանուր իրավասության դատարանի արձակած վճռի նախապատմությունը և մանրամասները, որոնք ծանր հետևանք կարող են ունենալ ՀՀ գլխավոր դատախազի հետագա կարիերայի համար:

Հունիսի 21-ին կայանալիք Երևանի պետական համալսարանի ռեկտորի  ընտրություններում առաջադրվել է մեկ թեկնածու` Արամ Սիմոնյանը: «Հրապարակ»-ի տեղեկություններով, մտերիմներն արդեն շնորհավորել են նրան, քանի որ մրցակիցներ չունի և համարվում է մեխանիկորեն ընտրված: Սակայն, ըստ թերթի, համալսարանի 72 հոգանոց խորհրդի որոշ անդամներ մտադիր  են դեմ քվեարկել նրան: ԵՊՀ-ում մեծ ազդեցություն ունի նախկին պրոռեկտոր, այժմ սպորտի և երիտասարդության հարցերով փոխնախարար Արսեն Քարամյանը: Սիմոնյանի ու Քարամյանի միջև լուրջ հակասություն կա, և Քարամյանն աշխատում է նրա դեմ, գրում է թերթը:

Ակտիվորեն պատրաստվում է «քցել» շեֆին

«Հրապարակ» օրաթերթի տեղեկություններով՝ ԲՀԿ նախագահ Գագիկ Ծառուկյանն ակտիվորեն պատրաստվում է առաջիկա աշնանը դուրս գալ կառավարող կոալիցիայից: Ըստ նախնական ծրագրի՝ ԲՀԿ-ն պետք է կոալիցիայից դուրս գա այն ժամանակ, երբ հնարավորինս հզոր լինի, և փոքր լինեն իր այդ քայլին հակազդելու և ԲՀԿ-ին վնասելու հնարավորությունները։ Այս ծրագիրն իրականացնելու համար, ըստ թերթի աղբյուրների, Ծառուկյանն արդեն սկսել է քաղաքական հանդիպումներ ունենալ տարբեր ազդեցիկ անձանց և ուժերի հետ։ Նա փորձում է պայմանավորվածություն ձեռք բերել այդ անձանց հետ, որ եթե ԲՀԿ-ն ՀՀԿ-ի ու Սերժ Սարգսյանի հետ բախման գնա, նրանք պահպանեն չեզոքություն և անգամ աջակցեն իրեն: Պարբերականի  տեղեկություններով՝ հանդիպումներ լինելու են ոչ միայն քաղաքական դեմքերի, այլև օլիգարխների, քրեական և գողական աշխարհի հեղինակությունների հետ: