«Ժամանակ» օրաթերթը վերլուծություն է տպագրել ՀԱԿ-իշխանություն երկխոսության հեռանկարների մասին: Ըստ այդմ. «Եթե իշխանությանը հաջողվեց ժամանակ ձգել մինչեւ հերթական ընտրություն` այդ ընթացքում չգնալով համակարգային արմատական որեւէ փոփոխության, ապա դա զգալի հարված է լինելու ընդդիմության վարկանիշին: Այլ խնդիր է իհարկե, որ ժամանակը մինչեւ հերթական ընտրություն ձգվի, սակայն բանակցության ընթացքում ընդդիմությանը հաջողվի իշխանությանը մղել համակարգային իսկապես լուրջ փոփոխությունների, որոնք թե՛ երկրում ընթացիկ իրավիճակը կփոխեն քաղաքացիների համար շոշափելի առումով, թե՛ նաեւ իրենց մեջ կպարունակեն որոշակի երաշխիքներ ընտրական գործընթացում ընտրակեղծարարությունը եթե ոչ ամբողջությամբ, ապա զգալիորեն չեզոքացնելու առումով: Եթե ժամանակը այդպես ձգվի մինչեւ հերթական ընտրություն, ապա ընդդիմության վարկանիշը դրանից ոչ միայն էապես չի տուժի, այլ գուցե կարող է նաեւ ինչ-որ չափով բարելավվել:

Բայց նաեւ անկասկած է, որ ինչքան ժամանակը մոտենա հերթական ընտրության, ընդդիմության համար այդքան դժվար է լինելու իշխանությանը համակարգային փոփոխությունների մղել: Այստեղ, իհարկե, կարող են գործընթացին «միջամտել» ներքին եւ արտաքին քաղաքական ու տնտեսական լրջագույն եւ բարդացող խնդիրները, որոնք իհարկե «կխաղան» ընդդիմության օգտին: Սակայն այստեղ, իհարկե, կա մի բավական լուրջ վտանգ, որի մասին թե՛ իշխանությունը պետք է մտածի, թե՛ ընդդիմությունը: Եթե իրավիճակը է՛լ ավելի վատացավ, քան ներկայումս, ապա այդ դեպքում արդեն քաղաքացիները կարող են, մեղմ ասած, երես թեքել թե՛ իշխանությունից, թե՛ ընդդիմությունից»:

Երևանի քաղաքապետի պաշտոնից հեռացվելուց հետո, ըստ որոշ տեղեկությունների, Գագիկ Բեգլարյանը այստեղ-այնտեղ հայտարարում է, որ պատրաստվում է իր թեկնածությունն առաջադրել առաջիկա խորհրդարանական ընտրություններում։ Հաշվի առնելով, թե ինչ աղմուկով ՀՀԿ նախագահ Սերժ Սարգսյանը Բեգլարյանին հեռացրեց քաղաքապետի պաշտոնից, երեկ ՀՀԿ խորհրդի անդամ Հովհաննես Սահակյանից հետաքրքրվեցինք, թե արդյոք ՀՀԿ-ն Գագիկ Բեգլարյանին ընդգրկե՞լ է իր այն ցուցակում, որի գոյության մասին արդեն մամուլում հրապարակումներ են եղել. «Եթե Բեգլարյանը նման ցանկություն հայտնի, դա կքննարկվի կուսակցության խորհրդում։ Թե համամասնականի, թե մեծամասնականի դեպքում որոշում պետք է կայացնի կուսակցությունը, ու այդտեղ չեմ կարծում, թե խնդիր կա, մանավանդ, որ Գագիկ Բեգլարյանը շարունակում է մնալ ՀՀԿ անդամ»,- պատասխանեց Սահակյանը՝ հավելելով, որ քանի դեռ բավական ժամանակ կա մինչ ընտրություններ, ուստի որևէ ցուցակ ՀՀԿ-ում դեռ չի քննարկվում։

«ՉԻ» տեղեկություններով` այս օրերին ինտենսիվորեն Երեւանի, ինչպես նաեւ տարբեր մարզերի համապատասխան կառույցներում սկսել են ակտիվորեն հարկեր հավաքել, մասնավորապես խոսքը վերաբերում է գույքահարկին ու հողի հարկին:

«Մեր տեղեկություններով` բոլոր տեղերում հատկապես վատ հարկատուների ցուցակում են հայտնվել հայրենի բարձրաստիճան պաշտոնյաներն ու օլիգարխները: Բանն այն է, որ նրանցից շատերն այնքան են «հետ գցել» տների ու հողամասերի տեսքով, եւ այնքան ժամանակ հարկ չեն վճարել, որ հիմա այդ գումարների չափը` տուգանքների հետ միասին, հասել է միլիոնների: Եւ հիմա բազմաթիվ օլիգարխներ թաղապետարաններին դիմումներ են գրում` խնրանքով ներել ու կրճատել այդ գումարները: Որոշ օլիգարխներ անգամ խնդրել են, որ իրենց ընդառաջեն եւ պարտքերի մարման գրաֆիկ կազմեն, որպեսզի հարկերը քիչ-քիչ կարողանա վճարել: Որոշ թաղապետեր արդեն ներել-ընդառաջել են իրենց դիմած օլիգարխներից շատ-շատերին, իսկ ազգաբնակչության այլ խավերի շրջանակներում` հարկերի հավաքագրման անզիջում պայքար է ընթանում` «Բյուջե ենք լցնում» կարգախոսի ներքո»:

Օրաթերթի խմբագիրն անդրադառնում է օրերս ինտերնետում տեղադրված տեսանյութին, որտեղ Ամենայն Հայոց կաթողիկոս Գարեգին Բ-ն զրուցում է Վրաց կաթողիկոս Իլիա Բ-ի հետ։

Այս տեսագրության մեջ Գարեգին Բ-ն ցույց տվեց իր դաստիարակությունը, մտածելակերպը, էությունը։ Եվս մեկ անգամ ակնհայտ դարձավ, որ նա ոչնչով չի տարբերվում մեր օլիգարխներից, որոնց համար հարաբերություններ պարզելու ձևը «բազարն» է ու «ռազբորկան»՝ համապատասխան բառապաշարով և փաստարկների մակարդակով։ Կաթողիկոսը նաև նման է սերիալային մաֆիոզների, որոնց «պայծառ կերպարը» օրուգիշեր կերտում են մեր հեռուստաալիքները, որպեզի երիտասարդ սերունդն ունենա իդեալ, որին պետք է ձգտել։ Հետևաբար, այն փաստը, որ մենք ունենք այդպիսի ամենայն հայոց կաթողիկոս, պատահականություն չէ՝ դա հայելին է մեր մտավոր և հոգևոր դեգրադացիայի։

Ինձ համար արտառոց էր, մասնավորապես, այն, որ Հայաստանի հոգևոր առաջնորդը փորձում էր Իլիա Երկրորդի հետ խոսել «դու»-ով, ինչին վերջինս մեղմորեն դիմադրում էր։ Ես, իհարկե, չգիտեմ, թե էթիկետի ինչպիսի նորմեր են գործում հայ եկեղեցական «բիզնես-էլիտայում»։ Բայց մեր՝ սովորական հայերի մոտ ընդունված է, որ տարիքով զգալիորեն մեծ մարդու հետ պետք է խոսել «դուք»-ով և անընդհատ չհարվածել նրա ծնկին։

Երեկ լուր տարածվեց, թե Լոռու մարզպետ Արամ Քոչարյանին ազատել են աշխատանքից։ Ավելի ուշ տեղեկություն ստացանք, որ նա արձակուրդի համար դիմում է գրել, սակայն մեզանում հարկադիր արձակուրդները, որպես կանոն, նախորդում են պաշտոնաթողություններին։ Մենք փորձեցինք պարզել, թե ինչումն է բանը։ Մեզ պատմեցին, որ տևական ժամանակ է՝ վարչապետ Տիգրան Սարգսյանը դժգոհություններ ուներ Արամ Քոչարյանից, սակայն համբերության բաժակը լցվել է այն ժամանակ, երբ մարզպետը, մեղմ ասած, թյուրիմացության մեջ է գցել իր անմիջական ղեկավարին։ Ասում են՝ մարզպետը մեկնել է Վրաստան, բայց վարչապետին ասել է, թե մեկնում է Սանկտ-Պետերբուրգ՝ ինչ-որ գործերով։ Տեղեկանալով, որ իրեն խաբել են, Տիգրան Սարգսյանը մտել է Սերժ Սարգսյանի մոտ և պահանջել՝ կամ ես, կամ Քոչարյանը։ Եվ քանի որ մարզպետը մեղավոր է եղել, ուլտիմատումը դեր է խաղացել, և նախագահը որոշել է բավարարել վարչապետի պահանջը։ Ի դեպ, մեկ այլ մարզպետի հարցն էլ է տևական ժամանակ քննարկվում՝ Սյունիքի մարզպետի, սակայն, մեր տեղեկություններով, Սերժ Սարգսյանը որոշել է նրան հանել ԱԺ ընտրություններից հետո։ Մինչ այդ Լիսկան անելիք չունի։

Օրաթերթը ուշագրավ վերլուծություն է հրապարակել նախօրեին տարածված այն տեսանյութի մասին, որտեղ Ամենայն Հայոց կաթողիկոսի Վրաստան կատարած այցի ընթացքում Գարեգին Երկրորդի և Վրաստանի Պատրիարք Իլյա Երկրորդի զրույցի մի դրվագ է: Թերթի վերլուծաբանը գրում է. «Տեսանյութն իր աուրայով ինքնին առանձին ու կոնկրետ թեմատիկա է, որ խոսում է Հայ Առաքելական եկեղեցու Հովվապետի ընդհանուր ցածր պատրաստվածության մասին, նույնիսկ կարելի է ասել` քաղաքակրթվածության ընդհանուր մակարդակի մասին, ինչն իհարկե ցավալի իրողություն է: Թե ինչ կարելի է մտածել հիվանդ, զառամյալ ու ծեր, մի կերպ խոսող Իլյայի մասին, դա մեզ չի հուզում: Դրա մասին թող մտածեն վրացիները, քանի որ, մեղմ ասած, Իլյայի պարագայում էլ տեսարանը, այսպես ասած, հաճելիներից կամ հպարտացնողներից չէր:

Բայց խնդիրն այն է, որ գոնե քաղաքակրթական ցենզի առումով մենք ականատես ենք լինում երկու հոգևոր առաջնորդների պարզապես շրջադարձային տարբերության, և կարելի է ասել, որ դրսևորվում է հայոց Հովվապետի պարզապես տղայականությունը: Եվ հասկանալի է դառնում, թե ինչու էր Իլյան հետո խոսել Գարեգին Երկրորդի անփորձության մասին:

Իրականում, սակայն, դա ոչ միայն Գարեգին երկրորդի, այլև ընդհանրապես հայ ժողովրդի, հայկական հասարակության, հայկական պետականության անփորձության դրսևորումն է: Եվ անփորձությունն այստեղ մեղմացված տերմինաբանություն է, քանի որ ըստ էության դա իրականում գլոբալ անպատրաստություն է` անպատրաստություն միջազգային հարաբերությունների, ազգամիջյան հարաբերությունների, միջմշակութային հարաբերությունների, միջեկեղեցական հարաբերությունների:

Այս ամենում փորձառություն, այսինքն` պատրաստություն ձեռք բերելու փոխարեն, մեր հոգևոր և աշխարհիկ էլիտան մտածում է նորանոր բիզնեսներ, նորանոր լծակներ, նորանոր շքեղություններ ձեռք բերելու մասին, իսկ ով փորձում է բացատրել, որ մենք այդպես պետությունն ենք կորցնում, պետական կեցվածքն ու անունն ենք կորցնում, պետության հեղինակությունն ու ապագան ենք կորցնում, նրան հռչակում են օտարի ջրաղացին ջուր լցնող»:

Վերջերս առողջապահության նախարար Հարություն Քուշկյանն այցելել է Առողջապահության ազգային ինստիտուտ, որը երկար տարիներ տնօրինում էր Դերենիկ Դումանյանը, տեղեկացնում է «Հրապարակ»-ը։ Առողջապահության ինստիտուտին մոտ կանգնած թերթի աղբյուրների փոխանցմամբ՝ Քուշկյանը խիստ դիտողություն է արել Դումանյանին շենքի անմխիթար վիճակի պատճառով։ Նախարարի զայրույթն են հարուցել հատկապես քայքայված պատերին առաջացած անցքերը։ Թերթը հիշեցնում է, որ Դումանյանն այժմ Մխիթար Հերացու անվան պետական բժշկական համալսարանի ռեկտորն է։

«Մեր հանրապետությունում բնավ չկա հեղափոխական իրավիճակ, մեր հանրապետությունում կան խնդիրներ, որոնք մենք բոլորս տեսնում ենք: և եթե այդ խնդիրների մասին չխոսենք, չի նշանակի, որ այդ խնդիրները չկան: Մարդիկ սպասում են այդ խնդիրների լուծմանը, և մենք էլ աշխատում ենք այդ խնդիրները լուծել: Եւ եթե այդ խնդիրները բարձրացնում են նաև ընդդիմադիր ուժերը, մենք դա պետք է ողջունենք, առավել ևս, եթե այդ բարձրացման դրսևորումները իրենց մեջ չունեն ծայրահեղականության, արմատականության, ջարդուփշուր անելու էլեմենտներ»,-«Առավոտ»-ի հետ զրույցում ասել է ԱԱԽ քարտուղար, «Օրինաց երկիր» կուսակցության առաջնորդ Արթուր Բաղդասարյան

ԱԺ նախագահ Հովիկ Աբրահամյանը, ըստ օրաթերթի, հայտարարել է, թե իրենք ձգտելու են, որ առաջիկա խորհրդարանական ընտրությունները լինեն ազնիվ և թափանցիկ, ու միաժամանակ ամեն ինչ անելու են, որպեսզի «կոնկրետ ՀՀԿ–ն բարձր տոկոսներ ստանա»։

«ՉԻ»-ն գրում է. «Ժամանակին Գագիկ Ջհանգիրյանը մի առիթով ինչ-որ մարդկանց մեղադրել էր, թե ուզում են և՛ հաճույք ստանալ, և՛ կույս մնալ։ Ընդ որում՝ տեսականորեն դա միանգամայն հնարավոր է։ Փոխարենը` ոչ մի կերպ հնարավոր չէ պատկերացնել, որ ընտրություններն ազնիվ ու թափանցիկ լինեն, և ՀՀԿ-ն շատ ձայներ ստանա։ Սրանք անհամատեղելի բաներ են։
Չնայած՝ չի իմացվի։ Մեր ծանոթ ոստիկաններից մեկն օրինակ հաճախ էր պատմում, թե ինչպես է հերոսաբար վնասազերծել մի խումբ հանցագործների։ «Դե, ասում էր, արդեն գիշեր էր, մարդիկ քնած էին, ու որպեսզի մարդկանց չանհանգստացնեմ՝ մի հատ կամաց կրակեցի…»։ Ըստ երևույթին ՀՀԿ-ն մտադիր է նույն հնարքը կիրառել և «կամաց կրակել»։ Այսինքն՝ այնպես անել, որ մարդկանց թվա, թե ընտրություններն ազնիվ ու թափանցիկ են եղել, բայց իրականում ամենամեծ թվերը ՀՀԿ–ի օգտին նկարվեն»։

«Հայկական ժամանակ»-ի տեղեկություններով` իշխանական կուլիսներում մեծ թափով տեղի է ունենում խորհրդարանական ընտրությունների նախապատրաստություն: Երեկ թերթին հայտնի է  դարձել, որ Մենուա Հարությունյանը, որը թերևս կհեռանա «Արմնյուզ» հեռուստաընկերության տնօրենի պաշտոնից, ցանկանում է մեծամասնական ընտրակարգով պատգամավորի թեկնածու առաջադրվել Էրեբունի համայնքում: Եվ այդ «հողի վրա» նախօրեին, ըստ թերթի ստացած հավաստի տեղեկությունների, նրա և Էդուարդ Մադաթյանի (Խուճուճ էդո) որդիների միջև կոնֆլիկտ է առաջացել: Խոսակցություններ կան, որ բանը անգամ ծեծկռտուքի է հասել:

«ՀԺ»-ի հետ զրույցում Մենուա Հարությունյանն ասել է. «Ես էլ եմ այս առավոտ լսել, որ խնդիրներ եմ ունեցել, բայց ոչ մի բան էլ չի եղել»: Ըստ նրա՝ պարզապես ինքն Էրեբունի համայնքում իր նկարներն է կախել իրեն պատկանող գովազդային վահանակների վրա, ինչից աղմուկ է առաջացել, որ նա իր թեկնածությունն առաջադրելու է խորհրդարանական ընտրություններում: «Ինչպես հասկանում եմ, էլի մարդիկ կան, որ ցանկանում են թեկնածություն դնել, և նման աժիոտաժ է առաջացել»: Թերթի հետ զրույցում Մենուա Հարությունյանը հաստատել է, որ ինքը կարող է սույն ընտրատարածքում թեկնածու առաջադրվել: «Ես մեծամասնականով որ առաջադրվեմ, կամ էրեբունիում եմ առաջադրվելու, որտեղ ապրում եմ, կամ՝ Մեղրիում, որտեղ ծնվել եմ»,- ասել է Մենուա Հարությունյանը:

«ՀԺ»-ն նշում է նաև, որ, ըստ շրջող լուրերի, սույն համայնքում իրենց թեկնածությունն են ցանկանում առաջադրել նորաթուխ ՕԵԿ-ական էդուարդ Մադաթյանը կամ նրա ՀՀԿ-ական որդին՝ էրեբունու նախկին թաղապետ Մհեր Սեդրակյանի փեսան, գործարար Հրանտ Վարդանյանի որդին՝ ԱԺ «Դաշնակցություն» խմբակցության պատգամավոր Կարեն Վարդանյանը և ԱԺ ՀՀԿ խմբակցության պատգամավոր Գրիգորի Մարգարյանը: