Թերթի տեղեկություններով  ՀՀ  ոստիկանության  կազմակերպված  հանցավորության  դեմ  պայքարի  6‑րդ  վարչությունը  ստուգումներ  է սկսել  ՀՀ ՃՈ  նախկին պետ  Մարգար Օհանյանի  պատկանող օբյեկտներում: Ստուգումներն իրականացվում են  առավելապես  Օհանյանին պատկանող  շուրջ տասը  երթուղային գծերի  ծառայություններում:

«Առավոտ» թերթը գրում է, որ ԱԻՄ նախագահ Պարույր Հայրիկյանը թերթի հետ զրույցում հայտնել է, որ չի պատրաստվում ձեռքերը ծալած նստել և բավականին լուրջ աշխատանքներ է տանում։

«Կա՛մ կլինեմ բևեռներից մեկի աոաջ մղող ուժերից մեկը, կա՛մ կստեղծեմ այն ուժը, որը ոչ մի բևեռի հետ չի լինի, բայց ինքը կորոշի, թե որ կողմ է թեքվելու կշեռքը»։
Հարցին՝ թե այս խորհրդարանական ընտրություններում լուրջ մասնակցություն արդյոք ենթադրում է, ԱԻՄ նախագահը պատասխանել է. «Արդեն սկսել եմ»։

Թերթը գրում է, որ երեկ ՀՀ դատական պատմության մեջ աննախադեպ որոշում է կայացվել. դատարանը ոչ միայն կալանք է դրել «Հրապարակ» օրաթերթի գույքի վրա, այլև որոշմամբ թերթին արգելել է տվյալ դատական գործի վերաբերյալ  հրապարակումներով հանդես գալ։ «Որոշումը կայացրել է Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Կարինե Պետրոսյանը, և որ ամենահետաքրքիրն է՝ ՀՀ դատական դեպարտամենտի ղեկավար Միսակ Մարտիրոսյանի հայցի հիման վրա։

Այս մասին հայտնի է դարձել այն բանից հետո, երբ ԴԱՀԿ մի աշխատակից երեկ ներկայացել է «Հրապարակի» խմբագրություն եւ տեղեկացրել, որ դատարանը արգելանք է դրել օրաթերթի գույքի եւ խոսքի ազատության վրա։ Իսկ թե կոնկրետ ինչ հայցի հիման վրա, ինչ հիմնավորմամբ է նման որոշում կայացվել, հայտնի չէ։ Օրաթերթը ոչ հայցադիմումն է ստացել, եւ ոչ էլ դատավորի որոշումը, այլ միայն ԴԱՀԿ աշխատակիցը վարույթի կատարողական թերթիկ է ներկայացրել խմբագրություն։ Փաստորեն, այսպիսով, Հայաստանում պաշտոնապես սկսել է կիրառվել գրաքննություն, եւ դատարանը կարող է արգելել որեւէ թեմայի լուսաբանում։ Որոշման չկատարումը հանգեցնում է քրեական պատասխանատվության»։

«ՉԻ» տեղեկություններով ՀՀ կապի և տրանսպորտի նախարար  Մանուկ Վարդանյանի բնակարանի հուլիս ամսվա գազի ծախսը կազմել է 800 հազար դրամ, այսինքն՝ նախարարի մի քանի ամսվա աշխատավարձի չափով։ Թե ի՞նչն է  պատճառը, որ շոգ հուլիսին նախարարի ընտանիքն այդքան գազ է օգտագործել, դժվար է կռահել։ Այնուամենայնիվ. փաստ այն է, որ Մանուկ Վարդանյանի ընտանիքը մեկ ամսվա կտրվածքով 800  հազար դրամի գազ է սպառել։

«Թեև նա շատ լավ հարաբերություններ ունի Հանրային հեռուստառադիոընկերության խորհրդի նախագահ Ալեքսան Հարությունյանի հետ, որն այսօր պատրաստվում է նոր եթերաշրջանին նվիրված հերթական ասուլիսը տալ, սակայն խնդիրներ են ծագել այլ պաշտոնատար անձի, թերևս Հանրայինի տնօրեն Գագիկ Բունիաթյանի հետ, և Գալստյանը ստիպված է ազատվել աշխատանքից»,- գրում է թերթը և հավելում.

«Մեր տեղեկություններով` Ալիկ Հարությունյանը փորձում է խնդիրը կարգավորել, սակայն, ամենայն հավանականությամբ, Գալստյանին այլ աշխատանք կառաջարկվի, հավանաբար ոլորտում խորհրդականի պաշտոն»։

Թերթը գրում է, որ գործարար Սամվել Մայրապետյանի գործերն այդքան էլ լավ չեն: Վերջինս ֆինանսական լուրջ խնդիրների պատճառով որոշել է վաճառել «Տոյոտայի» իր բաժնեմասը: «Բանն այն է, որ Սամվել Մայրապետյանը, որը մտերիմ հարաբերությունների մեջ է Ռոբերտ Քոչարյանի հետ, ինչպես նաեւ քավոր-սանիկային հարաբերություններ ունի փոխվարչապետ Արմեն Գեւորգյանի հետ հիմա «ճռռում» է վարկերի տակ: Ինչպես հայտնի է, Մայրապետյանը` Քոչարյանի եւ Գեւորգյանի հովանավորությամբ, զբաղված է էլտար շինարարությամբ:

Շինարարության համար վերցված վարկերի մարման ժամանակն արդեն վրա է հասել, իսկ նրա կառուցած շենքերը դեռեւս չեն վաճառվել. դրանք շարունակում են որպես գրավ մնալ բանկերի ենթակայության տակ: Կամ Մայրապետյանը պետք է մարի վարկն ու շենքերը գրավադրումից « ազատի», կամ էլ բանկերը ստիպված կլինեն «իրենցով անել» այդ շենքերը: Ուստի գործարարը որոշել է իր որոշ  բիզնեսները վաճառքի հանել եւ դրանցից ստացված գումարներով փակել վարկերը», — գրում է «Չորրորդ ինքնիշխանություն»-ը: