Սահմանադրական փոփո­խությունների հանրաքվեից առաջ՝ քարոզարշավի փուլում, իշխանությունների ներկայացուցիչներն անընդ­հատ հայտարարում էին, թե կառավարման խորհրդարա­նական համակարգի անցնելու դեպքում կտրուկ կմեծանա ինչպես խորհրդա­րանի, այնպես էլ կուսակցությունների դերը։ Իրականությունը, սակայն, բոլորովին այլ է, և աստի­ճանաբար ավելի ու ավելի ակնհայտ է դառնում, որ Սերժ Սարգսյանը որոշել է ոչ միայն փաստացի վերաց­նել նախագահի ինստիտու­տը, այլև խորհրդարանը դարձնել դեկորատիվ կառույց՝ ցուցափեղկի նման մի բան, որտեղ ընդդիմա­դիրները բոցաշունչ, բայց անվնաս ճառեր կարտասանեն, իսկ իշխող մեծամասնությունը սուսուփուս կանցկացնի ՀՀԿ խորհրդում կամ գործադիր մարմնում ընդունված որոշումները։

Բայց ցուցանակ­ները պիտի բոլոր առումներով անթերի լինեն, այսինքն՝ զանազան շմայսներն ու սեյրաններն այնտեղ որևէ անելիք չպիտի ունե­նան։ Իսկ դա Սերժ Սարգսյանի համար պրոբլեմ է, որովհետև նախ՝ այդ կարգի դեմքերն ընտրությունների ժամանակ լուրջ տոկոսներ են խփում, երկրորդ՝ հաճախ իրենք էլ իրենց հաշվին են անում դա և կուսակցու­թյունն ազատում են ֆինան­սական բեռից, և երրորդ՝ հարկ եղած դեպքում առա­վել ակտիվ ընդդիմադիրնե­րի կամ լրագրողների «պոր­տը տեղն են դնում»։ Հիմա հարց է ծագում՝ ինչպե՞ս պի­տի Սերժ Սարգսյանը լուծի այս խնդիրը։

Բանն այն է, որ Սերժ Սարգսյանին անհրաժեշտ է բացարձակապես անդեմ և որևէ ինքնուրույնությունից զուրկ խորհրդարանական մեծամասնություն, որովհե­տև եթե ինքը որոշել է երկի­րը ղեկավարել որպես վարչապետ կամ ՀՀԿ առաջնորդ (գենսեկ), տեսականորեն հնարավոր է, որ խորհր­դարանական մեծամաս­նությունը դավադրու­թյուն կազմակերպի և պալատական հեղաշր­ջում իրականացնի։ Իսկ որպեսզի դա տեղի չունե­նա՝ ՀՀԿ խմբակցությու­նում պիտի ընդգրկված լինեն այնպիսի պատգա­մավորներ, որոնցից յու­րաքանչյուրի վրա «մի կուբամետր կոմպրոմատ» լինի, կամ՝ նրանք մեծ ունեցվածքի տեր լի­նեն, որպեսզի վախենան դա կորցնելուց (որևէ մե­կի համար գաղտնիք չէ, որ Հայաստանում որևէ մե­կի ունեցվածքը «օրինական ճանապարհով» խլելը հաշ­ված ժամերի խնդիր է)։ Բայց մյուս կողմից էլ՝ ցանկալի է, որ ցուցանակ-խորհրդարանում ոչ թե կիսաքրեական օլիգարխներ լինեն, այլ լավ հագնված, սիրալիր և օտար լեզուների տիրապետող «հե­ռանկարային» կարիերիստ­ներ։

Եվ Սերժ Սարգսյանը կարծես թե գտել է այս երկու մոդելները համատեղելու ձևը։ Ամենայն հավանակա­նությամբ օլիգարխներին ու կիսաքրեական դեմքերին պարզապես համապատասխան քվոտաներ կտրվեն, թե ով քանի պատգամավոր կա­րող է ունենալ ՀՀԿ խմբակ­ցությունում։ Իհարկե՝ պայ­մանով, որ նրանք անձամբ պատգամավոր չդառնան և այդ աթոռներին նստեցնեն վերոհիշյալ չափանիշներին համապատասխանող ջա­հելների։ Դա միաժամանակ երկու հարց կլուծի։ Առաջին՝ ցուցանակը պատշաճ տեսք կունենա (եվրոպաներում կրթություն ստացած կարիերիստները հազիվ թե միմ­յանց համբալ անվանեն կամ սպառնան բռնաբարել ընդ­դիմախոսներին), և երկ­րորդ՝ միանգամայն վերահս­կելի կլինեն, որովհետև հա­կառակ դեպքում Սերժ Սարգսյանն ուժային կա­ռույցների միջոցով պատժամիջոցներ կկիրառի նրանց «պապաների» նկատմամբ։

Չորրորդ իշխանություն

«Գորիսի ոստիկանապետի կողմից ծեծի ենթարկված Արթուր Գևորգյանի գործը, ինչպես հայտնի է, Հատուկ քննչական ծառայության վարույթում է։ Հենց այսպես էլ պետք է լիներ, քանի որ ծեծկռտուքի մասնակիցներն ու գործով անցնող վկաները պաշտոնյաներ են։ «ՉԻ»-ն երեկ նոր մանրամասննր իմացավ ՀՔԾ վարույթում գտնվող այս գործից։ Մեր տեղեկություններով՝ միջադեպի մասնակիցներից որոշները եղել են թմրադեղերի ացդեցաթյան տակ։ Դա հաստատվել է նաև փորձաքննությամբ։ Խոսքը ոչ թե ոստիկանապետի «թիմի», այլ «հակառակորդ կողմի» ներկայացուցիչների մասին է։ Հիշեցնենք, որ մարտի 8-ին Գորիսի ոստիկանապետ Գևորգ Ազիզյանը, ինչպես նաև մարզի իրավապահ կառույցի ղեկավարները, մասնակցել են ծեծկռտուքի, որն արձանագրել են «Դիանա» ռեստորանային համալիրը վերահսկող տեսախցիկները»:

Չորրորդ իշխանություն

Դատարանները շարունակում են մեղմ վերաբերմունք ցուցաբերել սահմանադրական փոփոխությունների օրվա ընտրակեղծարարների նկատմամբ։

Երեկ Կոտայքի մար­զի ընդհանուր իրա­վասության դատարանը 2015թ. դեկտեմբերի 6-ի սահ­մանադրական փոփոխու­թյունների հանրաքվեի արդ­յունքները կեղծելու մեջ մե­ղադրվող 28/35 տեղամասային ընտրական հանձնաժողովի նախագահ, ՀՀԿ-ական Հենրիկ Շահբազյանի նկատմամբ շատ մեղմ պատիժ է սահմանել՝ նրան դատապարտելով պայ­մանական ազատազրկման։

Բանն այն է, որ Կոտայքի մարզի Կոտայք գյուղում տե­ղակայված 28/35 տեղամասում չնայած համատարած ընտրակեղծիքներին, «Ոչ»-ը 3 ձայնի առավելությամբ, հաղթանակ էր տարել։ Հանրաքվեի ժամա­նակ 304 քաղաքացի քվեարկել էր «Ոչ»-ի և 301-ը՝ «այո»-ի օգտին։ Հանձնաժողովի նախա­գահ Հենրիկ Շահբազյանն էլ իր տեղամասի փաստաթղ­թերն ընտրատեղամասային ընտրական հանձնաժողով ներկայացնելուց առաջ կեղծել էր արդյունքները, արձանագ­րություններում և գրանցամատյանում «այո»-ի 301 ձայնը գրիչով դարձրել էր 601:

Ըստ մեղադրական եզրակացու­թյան. «Կողմնակից լինելով սահմանադրական փոփոխու­թյուններին, դժգոհ մնալով իրենց տեղամասում քվեար­կության արդյունքներից և օգտվելով վարչական շենքի միջանցքում միայնակ գտնվե­լու հանգամանքից՝ Հենրիկ Շահբազյանը, քվեարկության իրական արդյունքներն «Այո»-ի օգտին կեղծելու դիտավորու­թյամբ, երկու արձանագրու­թյուններում և թիվ 28/35 հան­րաքվեի տեղամասային հանձ­նաժողովի գրանցամատյանում գրիչով կրկնագծման եղա­նակով 300-ով՝ ավելացրել է մասնակիցների թիվը՝ այն «611»-ից դարձրել «911», նույն չափով ավելացրել է «Այո» քվեարկված քվեաթերթիկնե­րի թիվը՝ այն «301»-ից դարձ­րել «601», իսկ արձանագրու­թյուններում համամասնորեն նվազեցրել է նաև մարված քվեաթերթիկների թիվը՝ այն «795»-ից դարձրել «495 » և ավելացրել քվեատուփում առ­կա սահմանված նմուշի քվեա­թերթիկների թիվը՝ այն «611»-ից դարձրել «911», այդ կերպ կեղծել է հանրաքվեի թիվ 28/35 տեղամասի քվեարկության արդյունքները և արձանագ­րության կեղծված երկու օրի­նակներն ու գրանցամատյանը հանձնել ԸԸՀ»։

ՀՀԿ-ական Հենրիկ Շահբազյանի հանցագործությունը բացահայտվել էր Հայ Ազգային Կոնգրես կուսակցության
ջանքերով։ Հանրաքվեի արդյունքները հրապարակելուց հետո ՀԱԿ-ում համեմատել էին 28/35 ընտրատեղամասի հանձնաժողովի իրենց անդամի ներկայացրած արձանագրությունն ու ԿԸՀ-ի հրապարակած վերջնական արդյունքները,
անհամապատասխանություն էին նկատել և հանցագործության մասին հաղորդում ներկայացրել ՀՀ գլխավոր դա-
տախազություն։ Այստեղ քրեական գործ էր հարուցվել ՀՀ քրեական օրենսգրքի 150 հոդվածի հատկանիշներով, և
նյութերն ուղարկվել էին Հատուկ քննչական ծառայություն՝ նախաքննության։

Չորրորդ իշխանություն

ՀՀ քննչական կոմիտեի ՀԿԳ քննու­թյան գլխավոր վարչությունում քննվող քրեական գործով ձերբակալվել է երեք անձ՝ ՀՀ-ում Եվրոպական միության պատվիրակության գրասենյակի կողմից հատկացված դրամաշնորհից առանձնա­պես խոշոր չափերի գումարներ հափշտակելու կասկածանքով։ Այս մասին երեկ տեղեկացրել է Քննչական կոմիտեի մամուլի ծառայությունը։

Նախնական քննությամբ պարզվել է, որ Տիգրան Սուքիասյանը, Ռուբինա Տեր-Մարտիրոսյանը, Գևորգ Ղազարյանը, ուրիշի գույքը խարդախությամբ հափշտակելու հարցի շուրջ նախնական համաձայնության գա­լով, 2012 և 2013 թվականների ընթաց­քում կեղծ փաստաթղթեր պատրաստե­լու և օգտագործելու միջոցով «Մարտունու ուսանողական խորհուրդ» հասարա­կական կազմակերպության անունից մշակել են «Հիմնարար իրավունքներն ու ազատությունները՝ ապագայի երաշ­խիք» անվամբ կեղծ ծրագիր և դրա շր­ջանակներում գործողություններ կատա­րելու պատրվակով ստացել ու հափշտակել են ՀՀ-ում Եվրոպական միության պատվիրակության գրասենյակի կողմից հատկացված դրամաշնորհի առանձնա­պես խոշոր չափերի գումարներ։

Չորրորդ իշխանություն

ԱԺ նախագահ Գալուստ Սահակյանը, որ առողջական խնդիրների պատճառով բուժման համար մեկնել էր արտասահ­ման, Հայաստան վերադառնալուց հետո պարբերաբար գալիս է խորհրդարան։ Իսկ երեկ պարոն Սահակյանը համաձայն­վել է պատասխանել լրագրողների հար­ցերին և հավաստիացրել, որ իր առողջա­կան վիճակն արդեն նորմալ է: Նա խոսել է նաև քաղաքական գործընթացների մա­սին, բնականաբար՝ իրեն հատուկ ոճով կազմված նախադասություններով (կա­րող ենք ասել, որ Գ.Սահակյանի առողջա­կան վիճակն իրոք նորմալ է)։

Ինչպես հայտնի է, ընդդիմադիր ուժե­րը պնդում են՝ նոր ԸՕ-ում դրույթ ամ­րագրել քվեարկողների կողմից ստո­րագրված ընտրացուցակների հրապա­րակման մասին, մինչդեռ իշխանություն­ները դեմ են դրան: Եվ ահա, Գալուստ Սահակյանը հայտարարել է. «Ես այդ դրույթի մեջ էտպես ճշմարիտ բան չեմ տեսնում, բայց դե թող աոաջարկեն։ Կփորձենք երևի թե ինչ-որ ձևով պատասխանել»։

ԸՕ-ի շուրջ հանրային մոբիլիզացիա ստեղծելու ՀԱԿ նախաձեռ­նության մասին նա ասել է.«Դե քաղա­քական ընդդիմադիր ուժ է, եթե խնդիր­ներ ունի, կարող է մարդկային մեծ խումբ հավաքել, իր խնդիրները ներկա­յացնել իշխանություններին, որևէ բան չեմ տեսնում», իսկ հարցին, թե ընդդիմու­թյունը սպառնում է փողոց դուրս գա, Գ.Սահակյանր պատասխանել է.

«Ես այստեղ որևէ զանգվածային ակցիա չեմ տեսնում, որովհետև այն խնդիրնե­րը, որ բոլորի համար հիմնականում, նկատի ունեմ մեծ մասի համար դա վճ­ռական է օրենսգրքում, օրենսգրքում ար­տահայտած բոլոր մտքերը կլինեն օրենքներում, իսկ այդպես մարդ հավա­քել, չգիտեմ խուճապ ստեղծել և այլ և այլն, դա քաղաքակիրթ ճանապարհ է»։

Չորրորդ իշխանություն

ԱԺ ՀՀԿ խմբակցության պատգամա­վոր Կարեն Կարապետյանի վերջին հարցազրույցը լուրջ դժգոհություն է առաջացրել ՀՀԿ ներսում։ Նախ Կ. Կարապետյանն ասել է, որ իր օլիգարխ եղբայրը՝ Սամվել Կարա­պետյանը, չի կարող Հայաստանում անգլիական թագուհու կարգավիճակ ու­նենալ, և հետո շարունակել է. «Սամվել Կարապետյանն այսօր շատ ավելի աշ­խատակիցներ ունի, քան Հայաստանի ողջ պետական ապարատն է»։

Այլ կերպ ասած՝ Կ. Կարապետյանն անուղղակի հասկացրել է, որ իր եղբայրն ավելի շատ մարդու է ղեկավարում, քան՝ Սերժ Սարգսյանը, և ահա, ինչպես պնդում են «ՉԻ» աղբյուրները, ՀՀԿ-ականները խիստ դժգոհ են այս համեմատությունից և կարծում են, որ իրականում Կ. Կարապետյանը փորձել է հրապարակավ նվաստացնել ու նսեմացնել Սերժ Սարգսյանին, առավել ևս, երբ նա լինե­լով իշխանական կուսակցության ղեկա­վար մարմնի անդամ, պարբերաբար քն­նադատում է իշխանություններին և փորձում իբր ժողովրդի մասին մտածողի տպավորություն թողնել։

Ըստ մեր աղբ­յուրների, ՀՀԿ-ում շատերը պնդում են, որ Ս. Սարգսյանը Հայաստան վերադառ­նալուն պես պետք է առնվազն պարզա­բանումներ պահանջի Կարապետյանից։

Չորրորդ իշխանություն

Հիշո՞ւմ եք՝ սահմանադրական փոփոխությունների հանրաքվեից րնդամենը երկու օր առաջ Սերժ Սարգսյանը Գյումրիի քաղաքապետ Սամվել Բալասանյանի հետ խորհրդակցության ժամանակ ինչ խոստումներ էր տվել։

Հիշեցնենք՝ «Անհրաժեշտ է, և ես արդեն համապա­տասխան ցուցում տվել եմ ներգրավել միջոցներ՝ 23 միլիոն եվրո, որ ամբողջովին պետք է ուղղվի Գյումրիի բարեկարգմանն ու լուսավորությանը։ Եթե քաղաքային իշխանությունները, Դուք հիմա հրապարակավ խոստանում եք, որ այդ միջոցները կօգտագործվեն արդյունավետ և մինչև վերջին դրամը կօգտագործվի Գյումրիի բարեկարգման համար, ապա հենց եր­կուշաբթի օրվանից կարող ենք սկսել զործընթացը»,- հայտարարել էր Ս. Սարգսյանը։

Այլ կերպ ասած՝ նա փորձել էր հանրաքվեից առաջ սիրաշահել գյումրեցիներին և այդպես «այո»-ի համար ձայներ կորզել։ Գյումրիում հանրաքվեի ժամանակ հաղթեց «Ոչ»-ը, ընդ որում՝ անգամ պաշտոնական տվյալներով։ Ու հի­մա, Ս. Սարգսյանի մոտ կայացած խորհրդակցությու­նից տևական ժամանակ է անցել, բայց ոչ 23 մլն եվ­րոն կա, ոչ էլ որևէ քայլ է արվում Գյումրիում փողոցների վերանորոգման համար։

ԱԺ-կառավարություն հարցուպատասխանի ժա­մանակ Լևոն Զուրաբյանը բարձրացրեց այդ հարցը՝ ասելով, որ Ս. Սարգսյանի հայտարարությունից հետո Գյումրիի «Գալա» հեռուստաընկերությունում ձևավորված համակարգող կենտրոնը նամակ է գրել կա­ռավարություն՝ ծրագրի իրականացման ընթացքի մասին տեղեկատվություն ստանալու վերաբերյալ։ Ստացված պատասխանում կառավարությունը հայտնել էր, թե Վերակառուցման և զարգացման եվ­րոպական բանկի կողմից ծրագրի ֆինանսավորման վերաբերյալ ձեռք է բերվել նախնական համաձայնու­թյուն և այժմ բանակցություններ են տարվում ֆոր­մալ պայմանագիր կնքելու նպատակով։

Երեկ ԱԺ-ում Լևոն Զուրաբյանը մի քանի հարց հնչեցրեց:

Չորրորդ իշխանություն

«ՉԻ» տեղեկությունեեբով՝ ՀՀԿ-ում կրքերը թեժացել են։ Մինչ ԱԺ նախա­գահ Գալուստ Սահակյանը բուժման նպատակով մեկնել է Գերմանիա, նրա պաշտոնի համար «կռիվ են տալիս» ԱԺ փոխնախագահ Էդուարդ Շարմազանովն ու ԿԳ նախկին նախարար Արմեն Աշոտյանը։ Նրանցից յուրաքանչյուրն այս օրերին փորձում է Սերժ Սարգսյանին իր հավատարմությունը ապացու­ցել և ջանքեր չի խնայում ապացուցե­լու, որ ամենահարմար թեկնածուն ինքն է։

«ՉԻ» աղբյուրների փոխանցմամբ՝ ԱԺ նախագահ դառնալու հավակնու­թյուն ունի նաև ՀՀԿ-ական Արտակ Զաքարյանը, որը ներկայումս ղեկավա­րում է ԱԺ արտաքին հարցերի մշտա­կան հանձնաժողովը։

Չորրորդ իշխանություն

Եվ այսպես՝ Վարդան Օսկանյանը հաստատեց, որ մտա­դիր է մոտ ապագայում կուսակցություն ստեղծել, ու միաժա­մանակ հայտարարեց, որ «Ռոբերտ Քոչարյանն այս ամենի հետ կապ չունի»։ Բայց իրականում, իհարկե, բոլորն էլ հաս­կանում են, որ այդ հայտարարությունը ոչինչ չի նշանակում։ Որովհետև անկախ նրանից՝ այդ կուսակցության թիկուն­քում Ռոբերտ Քոչարյանն է, թե ոչ՝ Վարդան Օսկանյանի պատասխանը երկու դեպքում էլ նույնն էր լինելու։

Իսկ ինչո՞ւ է այդքան կարևոր Ռոբերտ Քոչարյանի հնարավոր մաս­նակցության հարցը։ Որովհետև Քոչարյանի «պապայությամբ» ստեղծված ուժն ու Վարդան Օսկանյանի սե­փական նախաձեռնությամբ ստեղծված կուսակցությունը, մեղմ ասած, տարբեր քաշային կատեգորիաների խաղա­ցողներ են։ Քոչարյանն, ըստ շրջանառվող տեղեկություն­ների, ունի գործնականում անսահմանափակ ֆինան­սական ռեսուրսներ ու բազ­մաթիվ թաքնված համակիր­ներ՝ իշխանական համակար­գում, մինչդեռ Վարդան Օս­կանյանը «մաքուր» քաղաքա­կան գործիչ է՝ առանց մեծ ռե­սուրսների, առանց լուրջ թի­մի, ու մեր մեջ ասած՝ երբեք էլ իշխանությունների ներսում (քրեաօլիգարխիկ համակար­գում) որպես յուրային չի ըն­կալվել։ Բայց խնդիրր միայն ռեսուրսները չեն։

Բանն այն է, որ նոր ստեղծվելիք կու­սակցության հետագա դերա­կատարումն էլ է կախված նրանից՝ Քոչարյանը կապ ու­նի՞ այդ կուսակցության հետ, թե՝ ոչ։ Վերջին հաշվով, կու­սակցությունն ընդամենը գործիք է, և նույն գործիքը կարելի է ծառայեցնել տար­բեր (անգամ՝ տրամագծորեն հակադիր) նպատակների։ Ու քանի որ այս հարցում առայժմ հստակության չկա, փորձենք երկու տարբերակ­ներն էլ քննարկել։

1. Կուսակցության թի­կունքում, այնուամենայնիվ, Ռոբերտ Քոչարյանն է, ու հենց նա էլ փաստացի ղեկա­վարելու է նորաստեղծ ուժը։ Այս դեպքում հարց է ծագում՝ իսկ դա նրա ինչի՞ն է պետք։ Միակ պատասխանը՝ Ռո­բերտ Քոչարյանը ցանկա­նում է պահպանել իր ազդե­ցությունը Հայաստանի ներ­քաղաքական կյանքում, ու դրա համար ձգտում է խորհրդարանում ունենալ մեծությամբ երկրորդ քաղա­քական ուժը (նա շատ լավ հասկանում է, որ ընտրու­թյունների միջոցով առաջի­նը դառնալ չի կարող)։ Իսկ դա նրան պետք է իր և մեր­ձավորների հայաստանյան բիզնեսներն ապահովագրե­լու համար։ Տևական ժամա­նակ Քոչարյանը ԲՀԿ-ի մի­ջոցով այդ հարցը կարծես թե լուծել էր, բայց իրավիճակը փոխվել է, և Քոչարյանին նոր ուժ է պետք։ Եթե դա այդպես է, ապա Վարդան Օսկանյանը, որպես «ցուցանակ», շատ ճիշտ է ընտրված: Այլ հարց է, որ այդ դեպքում կուսակցության դերակատարումն է, մեծ հաշվով, բացասական լինելու, որովհետև նորաստեղծ կուսակցությունն աշխատելու է ընդդիմադիր էլեկտորատի վրա, պարզ ասած՝ ընդդիմությունից է ձայներ «փախցնելու»: Ու եթե հաջողվի հւորհրդարանում «պատվավոր երրորդ տեղը զբաղեցնել»՝ դա Հայաստանի համար որևէ դրական հետևանք չի ունենալու (չմոռանանք, որ հենց Ռոբերտ Քոչարյանն է Սերժ Սարգսյանին դարձրել նախագահ)։

Չորրորդ իշխանություն

Նախօրեին Կրեմլում կայացած Սերժ Սարգսյան-Վլադիմիր Պուտին հանդիպման ուշագրավ դրվագնե­րից տեղական և ռուսական լրատվամիջոցները երեկ առանձնացրել էին հետևյալ իրողությունները։

Առաջին՝ չնայած հայկական կողմի պնդումներին, թե Մոսկվան ականջալուր է լինելու իրենց հորդորնե­րին և վերանայելու է գազի պայմանագիրը, այնուամե­նայնիվ, այդպես էլ զազային որևէ փաստաթուղթ չս­տորագրվեց։ Երկրորդ՝ պարզվում է Սերժ Սարգսյանը հրապարակավ իր աջակցությունն է հայտնել Սիրիայի հարցով Ռուսաստանի դիրքորոշմանը։ Երրորդ՝ պաշ­տոնապես հայտարարվեց, որ Սերժ Սարգսյանը շնոր­հակալություն է հայտնել Վլադիմիր Պուտինին «այն ջանքերի համար, որոնք գործադրում է Ռուսաստանը Ղարաբաղի հակամարտության կարգավորման ուղ­ղությամբ»։

Հավելենք նաև, որ երեկ արդեն էներգետիկայի և բնական պաշարների փոխնախարար Իոսիֆ Իսայանը «Ազատություն» ռադիոկայանին փոխանցել է, որ գազի գնի իջեցման շուրջ մոտ չորս ամիս շարունակվող հայ-ռուսական բանակցությունները առայժմ արդյունք չեն տվել։ «Շարունակում ենք բանակցությունները: Ես կարծում եմ՝ կիջնի»,- հույս է հայտնել Իսայանը։

Հիշեց­նենք, որ դեռևս հունվար ամսին ՀՀ վարչապետ Հովիկ Աբրահամյանը կառավարության նիստում հայտարա­րեց, թե դիմել են Ռուսաստանի իշխանություններին գազի գնի նվազեցման առաջարկով։ Վարչապետն ան­գամ վստահություն էր հայտնել՝ «հաշվի առնելով Ռուսաստանի հետ մեր գործընկերության ռազմավարական բնույթը՝ ակնկալում ենք ստանալ հարցի դրական լուծում»։

Չորրորդ իշխանություն