Երևանի քաղաքապետարանը տեղեկացնում է, որ սեպտեմբերի 26-ին Երևանի Տերյան 62 հասցեում գտնվող շենքի բակում ծառահատում է եղել ։

Հատվել է բնի 15սմ տրամագծով թվով 11 ծառ։ Քաղաքապետարանի մամուլի ծառայությունից  հայտնում են, որ նշված տարածքում սա ծառահատման երկրորդ փորձն է։   Այս մասին Երևանի քաղաքապետարանի աշխատակազմի բնապահպանության վարչությունը տեղյակ է պահել բնապահպանության տեսչության Երևանի տարածքային բաժնին ևԿենտրոնի ոստիկանությանը։ Կատարվում է նախաքննություն։

Քաղաքապետ Կարեն Կարապետյանի հանձնարարությամբ նույն տարածքը  աշնանային ծառատունկի ժամանակ կլրացվի նոր՝ 13 տնկիներով։

Այսօր տեղի ունեցած ասուլիսի ժամանակ Մոր և մանկան առողջության պահպանման գիտահետազոտական կենտրոնի տնօրեն, պրոֆեսոր Գեորգի Օկոևը հայտարարեց, որ Հայաստանում անպտղությունը 18 տոկոսի է հասնում, ինչը նորմայի սահմաններում է և աշխարհի մի շարք երկրների համեմատությամբ այնքան էլ վատ ցուցանիշ չէ։

Սակայն հարգարժան պրոֆեսորը չնշեց, որ Հայաստանի նման արտագաղթ ու օրեցօր պակասող բնակչություն ունեցող երկրում դա վտանգավոր է:

Ըստ նրա,  եթե անպտղության որոշ դեպքեր հնարավոր է բուժել բժշկական թեթև միջամտությամբ, ապա որոշ բարդ դեպքերում կարող է օգնել միայն արտամարմնային բեղմնավորումը, թեև դժվարացավ բուժման համար անհրաժեշտ գումարի չափն ասել, միայն նշեց, որ անհրաժեշտ դեղորայքի վրա ծախսվում է միջինը 1 մլն դրամ. «Արտամարմնային բեղմնավորման գները տարբեր են լինում՝ կախված լրացուցիչ հետազոտությունների ծավալից, դեղորայքի քանակից։ Որքան մեծ է կինը, այնքան ավելի շատ  եւ թանկ դեղորայք է անհրաժեշտ, որքան ձվարանների վիրահատությունները շատ են, այնքան ավելի մեծ է ծախսային մասը և այլն»,- պարզաբանեց բժիշկը:

Արտամարմնային բեղմնավորումը չի կարող է 100 տոկոսանոց  արդյունք ապահովել. «Նրանք ովքեր կասեն, որ արտամարմնային բեղմնավորման արդյունավետությունը բարձր է 40 տոկոսից, ազնիվ եղած չեն լինի։ Իսկ առավել բարձ ցուցանիշների համար պետք է աշխատել հնարավորինս երիտասարդ կնոջ հետ։ Օրինակ, Ֆրանսիայում 40-անց կանանց արտամարմնային բեղմավորում ընդհանրապես չեն անում»։

Ըստ բժշկի` անպտղության պատճառ կարող են հանդիսանալ մի շարք պատճառներ, այնպիսիք, ինչպիսին են կնոջ տարած 2 արտաարգանդային հղիությունները, ամուսինների իմունոլոգիական անհամատեղելիությունը, տղամարդու մոտ սերմնաբջիջների քանակի նվազումը և այլն:

Օկոևը նշեց, որ Հայաստանում և կանանց, և տղամարդկանց անպտղության մակարդակի ավելացման վրա անկասկած ազդել է նաև 90-ականների մութ ու ցուրտ տարիները. «Բայց որպես կանոն, մայրերն առաջինը մասնագետի մոտ բերում են աղջկան։ Մեկ այլ խնդիր է ընտանիքի անհամբեր լինելու, արդյունքի շուտ հասնելու ձգտումը։ Պետք է հիշել, որ անպտղությունը մեկ օրում բուժվող հիվանդություն չէ, դրա համար երկար ժամանակ և մեծ ճանապարհ է պետք անցնել»:

Եվրոպայի շախմատի թիմային առաջնության 4-րդ տուրն անհաջող էր հայկական «Միկա» տղամարդկանց և կանանց ակումբների համար, որոնք իրենց առաջին պարտություննները կրեցին: Առաջնությունն ընթանում է սլովենական Ռոգաշկա Սլատինա քաղաքում:

Տղամարդկանց թիմը 4:2 հաշվով զիջեց «Baden Baden»-ին: Հայկական թիմի կազմում ոչ ոքի խաղացին Գաբրիել Սարգսյանը, Արման Փաշիկյանը, Զավեն Անդրիասյանը և Ավետիք Գրիգորյանը, Տիգրան Պետրոսյանն ու Հրանտ Մելքումյանը զիջեցին իրենց մրցակիցներին: 4 տուրերից հետո «Միկան» 17 միավորով իջել է 9-րդ տեղը: Առաջնությունը 20,5 միավորով գլխավորում է «Saint-Petersburg Chess Federation»-ը:

5-րդ տուրում հայ շախմատիստները խաղալու են «Glasinac Sokolac»-ի դեմ:
Կանանց «Միկա» թիմը չկարողացավ դիմակայել «AEM Luxten Timisoara»-ին և պարտվեց 1,5:2,5 հաշվով: Էլինա Դանիելյանը, Հարիկա Դրոնավալին և Լիլիթ Մկրտչյանը միավորները կիսել են հակառակորդների հետ, իսկ Ժու Չենը զիջել է իր մրցակցին:

«Միկան» 11,5 միավորով 2-րդ տեղում է, առաջատարը «AEM Luxten Timisoara»-ն է 13 միավորով: 5-րդ տուրում հայկական թիմի մրցակիցը կլինի «Giprorechtrans»-ը, որը 8 միավորով գտնվում է 5-րդ տեղում:

Այսօր  լրագրողների հետ  հանդիպման ժամանակ Օպերային երգիչ, հայտնի «Լունա» երգի կատարող Ալեսանդրո Սաֆինան  վիրավորված հեռացավ սրահից, թեև  ասուլիսը դեռ չէր ավարտվել: Երևի  դրա գլխավոր պատճառն այն էր, որ լրագրողների  սուր հարցերի հետևանքով  լարված իրավիճակ ստեղծվեց.  Լրագրողներից մեկը հարց հնչեցրեց, թե արդյոք վատ չե՞ք զգում, որ փոխարինում եք մեկ այլ երգչի` Սեզարիա Էվորային, նրա չկայացած համերգի պատճառով: Նախ  կազմակերպիչները հրաժարվեցին թարգմանել հարցը, փորձելով իրենք պատասխանել .«սա փոխարինման հարց չէ, համերգին չեն գալիս մեկ այլ տոմսերով, այլ իր տոմսերով և  սա իր համերգն է»:

Իսկ երբ լրագրողը պնդեց իր հարցը ու կազմակերպիչների միջեւ բանավեճ ծավալվեց, եւ երգիչը հարցրեց, թե ինչ է կատարվում, կազմակերպիչները ստիպված էին հարցը թարգմանել, սակայն այս դեպքում եւս այն սխալ թարգմանվեց, (նշեցին, թե մեկ այլ երգչի համերգին շատ մոտ է այս համերգը):

«Եթե ես եկել եմ, ես արդեն ուրախ եմ»,- ասաց   Սաֆինան` հետաքրքրվելով, թե արդյոք իրենց դուր չի՞ գալիս, որ ինքը Հայաստանում է:

Այս հարցից հետո հնչեց մյուս հարցը, թե երգիչն ի՞նչ գիտի Հայաստանի մասին. «Ես փոքր-ինչ ծանոթ եմ ձեր մշակույթին եւ ավելի շատ գիտեմ Շառլ Ազնավուրի մասին»,- ասաց նա:

Լրագրողը, շարունակեց իր հարցը եւ հետաքրքրվեց, թե արդյոք երգիչը լսե՞լ է ցեղասպանության պահանջի մասին եւ ասուլիսը վարողը հետաքրքրվեց, թե որ լրատվամիջոցն է ներկայացնում եւ լրագրողին խնդրեց  փոխել իր խոսքի հնչերանգը, սկսվեց վիճաբանություն, երգիչն, ըստ երեւույթին վիրավորված եւ չհասկանալով, թե ինչ է կատարվում ասաց. «Ինչ-որ մեղք եմ գործել, որ եկել եմ Հայաստան»:

Եվս մեկ հարցի պատասխանելուց հետո Ալեսանդրո Սաֆինան լքեց սրահը:

Այսօր` կառավարության նիստի ընթացքում, ֆինանսների նախարարի տեղակալ Պավել Սաֆարյանը, ներկայացնելով 2012 թ. պետական բյուջեի նախագիծը, հայտարարեց, որ2012 թվականին 2700 դրամով կավելացվեն թոշակներն ու նպաստները:

Մասնավորապես` ընտանեկան նպաստները 26.8 հազ. դրամից կբարձրացվեն մինչև 29.5 հազ. դրամ, իսկ աշխատանքային թոշակները` 28.4 հազ. դրամից` մինչև 31.3 հազ. դրամ:

Սեպտեմբերի 28-ը պաշտոնապես նշվում է որպես Տեղեկատության ազատության միջազգային օր:

Ինֆորմացիայի ազատության կենտրոնի նախագահ Շուշան Դոյդոյանը իր խոսքում  հատուկ շնորհակալություն հայտնեց վարչապետին ու կառավարության աշխատակազմի ղեկավարին` գործադիրի աշխատանքի թափանցիկությանը նպաստելու համար: «Կենտրոնի ուսումնասիրությունները ցույց են տալիս, որ դատախազության համակարգում լրատվամիջոցների հետ աշխատանքի շատ լավ փորձ է ձևավորվել», ասաց նա :

Ի պատասխան գլխավոր դատախազ Աղվան Հովսեփյանն ասաց, թե իրավապահ համակարգի կողմից հասարակությանը տեղեկատվություն տրամադրելն իր առանձնահատկությունն ունի, որը կապված է նախաքննության գաղտնիության հետ. «Երբեմն չես կարող տեղեկատվություն տրամադրել, և չես կարող բացատրել, թե ինչու չես տրամադրում տեղեկատվությունը` հենց գաղտնիության սկզբունքից ելնելով: Սակայն մենք թափանցիկ ենք դարձրել ողջ իրավապահ համակարգի գործունեությունը: Բոլոր անհրաժեշտ միջոցները ձեռնարկել ենք, որ կարողանանք հանրությանը ճիշտ և ստուգված տեղեկատվություն հասցնել: Մենք կարիք ունենք հասարակական կարծիքի ճիշտ ձևավորման: Հանրությունը պետք է ճշմարտացիորեն կողմնորոշվի և ճիշտ գնահատական տա այս կամ այն հանցագործությանը»,- նշեց գլխավոր դատախազը:

Վարչապետ Տիգրան Սարգսյանի համոզմամբ` տեղեկատվության ազատության ապահովումը այսուհետ էլ գտնվելու է կառավարության ուշադրության կենտրոնում. «Խոհրդանշական է, որ անկախության քսան տարիների ընթացքում արձանագրում ենք, որ Հայաստանում գործում է տեղեկատվության ազատության կենտրոն, որը տասը տարի այս արժեքը տարածում է հանրապետությունում: Կենտրոնն ստուգում է մեր զգոնությունը` որքան են պետական գերատեսչությունները պարտաճանաչ և թափանցիկ»:

Տեղեկատվության հետ աշխատելու խնդիրը դարձրել է համար մեկ խնդիր, քանի որ տեղեկատվության հետ աշխատելն այնքան էլ հեշտ չէ, և կարիք կա այն զանազանել: Առաջին հերթին կարևոր է, թե որքանով է հասարակությանը տրամադրվող տեղեկությունն արժանահավատ: «Վերջին տարիներին էական առաջընթաց ենք ապահովել պետական մարմինների կողմից տեղեկատվության տրամադրման գործում, և դա նաև տեղեկատվական տեխնոլոգիաների շնորհիվ: Հայաստանը փոքրաթիվ պետությունների թվում է,որ տրամադրում է բյուջեի մասին մանրակրկիտ տեղեկատվություն առցանց:
Կառավարության կայքում առցանց կարելի է հետևել ֆինանսների նախարարության բոլոր ծախսերին: ՏՏ շնորհիվ հնարավորություն ունեք հետևելու կառավարությանն ուղղված ձեր նամակների ընթացքին: Սա չի նշանակում, որ մենք չունենք խնդիրներ, և տեղեկատվական կենտրոնի աշխատանքներից է բացահայտել մեր թույլ օղակները.
«Ոսկե բանալին» և «Ժանգոտ կողպեքն» այս պարագայում ընկալվում են որպես համագործակցության շատ լավ հնարավորություն»,- ասաց  վարչապետը: Ինֆորմացիայի ազատության կենտրոնը  Տեղեկատության ազատության միջազգային օրվա առիթով հատուկ մրցանակներ շնորհեց այն կազմակերպություններին, որոնք նշանակալի ավանդ են ունեցել Հայաստանում տեղեկատվության ազատության զարգացման գործում:

Մրցանակների արժանացան նաև Քաղծառայության խոհուրդը, տարածքային կառավարման նախարարությունը, USAID-ն, ԵԱՀԿ Երևանի գրասենյակը, Համաշխարհային բանկի հայաստանյան գրասենյակը, «Առավոտ» օրաթերթը և «Երկիր մեդիա» հեռուստաընկերությունը, Գյումրու «Ասպարեզ» ակումբը, Հելսինկյան ասոցիացիայի Վանաձորի գրասենյակը:

Դատարանների աշխատաոճի, նիստի մասնակիցներին արհամարհելու դեպքերը մեկ անգամ չէ, որ վրդովմունք է առաջացրել հանրության շրջանում: Երեկ Վերաքննիչ դատարանի քրեական պալատում պետք է տեղի ունենար «Շանթ» հեռուստաընկերության գործով դատական նիստը դատավոր Հենրիկ Ադամյանի նախագահությամբ:

Նիստը նշանակվել էր, մենք «Dataleqs» կայքից տեղեկանալով դատավարության մասին որոշեցինք մասնակցել, սակայն պարզվեց, որ դատավորն արձակուրդում է: Միթե դատական նիստ նշանակողները տեղյակ չեն, որ դատավորն արձակուրդում է: Ինչպե՞ս կարող է հարգանք ակնկալել մի կառույց, որ սնվելով ՀՀ քաղաքացիների գրպանից, չի բարեհաճում հարգանք դրսևորել նրանց նկատմամբ:

Ա.Ա.

Հասարակության մեջ լուրեր են պտտվում, որ վերջին  օրերին վնասազերծված ավազակախումբը , որը  մի քանի հարուստ  մարդկանց տներ է թալանաել  իր ավարից բաժին է հանել նաև «Զատիկ»մանկատանը: Նորօրյա  ռոբինհուդների մասին շրջանառվող լուրերի իսկությունը ճշտելու համար զանգահարեցինք  մանկատուն:

Տնօրեն Աշոտ Մնացականյանը մեզ հետ զրույցում չժխտեց,  որ հնարավոր նվիրատվության փաստը.«Գիտեք մեզ մոտ շատ են լինում նվիրատվություններ, եթե ձեր ասած անձինք ունեն համապատասխան փաստաթուղթ,  որը ստորագրվել է մեր կողմից, ուրեմն արել են: Սակայն ես չեմ կարող ասել,  պետք է  անուն ազգանուներով նայենք ցուցակների մեջ `տեսնելու համար, թե այդ անձանցից   կան արդյո՞ք նվիրատվություն կատարողների ցուցակում:  Իհարկե, չեմ  բացառում, որ լինեն»:

Մայր Աթոռ Սուրբ Էջմիածնում, նախագահությամբ Ն.Ս.Օ.Տ.Տ. Գարեգին Բ Ամենայն Հայոց կաթողիկոսի, երեկ տեղի է ունեցել Հայաստանի և Արցախի թեմակալ առաջնորդների ժողով:

Ժողովի ընթացքում անդրադարձ է կատարվել վանքերի և եկեղեցիների պահպանման և հոգատարության խնդիրներին: Ամենայն Հայոց կաթողիկոսի հորդորն էր թեմակալներին` մասնավոր ուշադրություն դարձնել սրբավայրերի վերանորոգման և վերակառուցման աշխատանքներին, որպեսզի որևէ կերպ չաղճատվի դրանց պատմական դիմագիծը:

Վերջում Ամենայն Հայոց Հայրապետն իր օրհնությունն է բերել թեմակալ առաջնորդներին` գնահատանք հայտնելով թեմերում հոգևոր սպասավորների կողմից իրականացվող նվիրյալ ծառայության համար:

Երեւանում, սեպտեմբերի 27-ին, ժամը 19:00-ի սահմաններում, անհայտ մեքենայի վարորդը վրաերթի է ենթարկել 22-ամյա աղջկան ու դիմել փախուստի:

Ոստիկանության մամուլի ծառայությունից  հայտնում են, որ վրաերթը տեղի է ունեցել Րաֆֆիի եւ Սեբաստիայի փողոցների խաչմերուկում: Վրաերթի ենթարկվածը, մարմնական վնասվածքներով տեղափոխվել է հիվանդանոց: Կատարվում է քննություն: