«Հայկական ժամանակ». ԲՀԿ առաջնորդ Գագիկ Ծառուկյանը վերջին 1 տարում ունեցել է 21 մլրդ 433 մլն դրամի, 60 մլն 81 հազար դոլարի և 40 մլն եվրոյի եկամուտ: Տվյալները նշված են նրա` ԿԸՀ ներկայացրած գույքի և եկամուտների մասին հայտարարագրում:
Ծառուկյանը հայտարարագրել է ադամանդե քարով երեք մատանի` 3 մլն, 1 մլն և 700 հազար դոլար արժեքներով, երեք ձեռքի ժամացույց` մեկը 300 հազար, երկուսը` 500 հազարական դոլար արժեքով: 2012 մարտի 1-ի դրությամբ` բանկային հաշվեհամարներում ունեցել է 1 միլիարդ 161 մլն դրամ, 30 մլն 730 հազար դոլար և 20 մլն 483 հազար եվրո: Նա հայտարարագրել է նաև թանկարժեք կահույք` 8-ը ննջարանի, 2-ը ճաշասենյակի, որոնց ընդհանուր արժեքը կազմում է ավելի քան 800 հազար եվրո: Ամենաթանկը` 127 հազար 820 եվրո արժողությամբ, ճաշասենյակի կահույքն է: Գագիկ Ծաոուկյանը բաժնետոմսեր ունի 32 տարբեր ընկերություններում: Նրան պատկանող շինությունների ընդհանուր մակերեսը մոտ 9 հազար քառակուսի մետր է, իսկ հողամասերինը` մոտ 32 հեկտար, ունի նաև յոթ հատ ավտոմեքենա, որից ամենավերջինը` «Ռոլս-Ռոյս կուպե ֆանտոմը» ձեռք է բերել 2008-ին:

Հայաստանի նախկին վարչապետ Հրանտ Բագրատյանն այսօր` ապրիլի 17-ին կայացած մամուլի ասուլիսում դիտողություն  արեց նախագահին. «Նրան անմիջապես նախագահը պիտի զանգեր, ականջները քաշեր», Ի նկատի ունենալով Ռուբեն Հայրապետյանի վերջին հայտարարությունները», կարծում է Բագրատյանը:

Նա ասաց, որ պատրաստ է ցանկացած բանավեճի, անգամ եթե ՀՀԿ-ն դրան ուղարկի Ռուբեն Հայրապետյանին. «Չնայած, նա տնտեսությունից բան չի հասկանում:… Սկզբում ասել էր` 10-ից մեկը, հետո խոսքը փոխեց, թե առաջին 10-ը ի նկատի ունեմ: Դա արդեն լկտիություն է: Նա մի հինգ անգամ հայտարարեց, որ չի դնում թեկնածությունը, մի 15 անգամ էլ հայտարարեց, որ դնում է: Եւ այդ մարդը ֆուտբոլ է ղեկավարում»:

Բագրատյանն անդրադարձավ նաև նախօրեին Մալաթիա-Սեբաստիա վարչական շրջանում տեղի ունեցած միջադեպին: Ըստ ՀԱԿ անդամի, Սամվել Ալեքսանյանը վախից է նման քայլեր անում: «Նրա անվան հետ կանացի ներքնազգեստի տարրերից մեկն են կապում, էս մարդն էլ կազմակերպել էր էդ կանանց հավաքը: Կանայք նրանից կախված են ինչ-որ ձեւով: Վախենում է, որովհետեւ ասելիք չունի»:

Ըստ Նախկին վարչապետի, Սամվել Ալեքսանյանը, որպես գործարար պետք է տարեկան ոչ թե 10-15 մլրդ, այլ 120-150 մլրդ դրամ հարկ վճարեր պետական բյուջե: «Այդ մարդը գողանում է մարդկանց կենսաթոշակները», — համոզված է Բագրատյանը:

Այսօր լրագրողների հետ հանդիպման ժամանակ «Ժառանգություն» խմբակցության պատգամավոր, թիվ 6 ընտրատարածքում մեծամասնական ընտրակարգով պատգամավորության թեկնածու առաջադրված Արմեն Մարտիրոսյանը ասաց որ  իրենց համակիրներն ահազանգում են, թե որոշ կուսակցություններ «Ժառանգությանը» դարձրել են թիրախ:

«Դա անում են անթաքույց և շատ տգեղ ձևով, և այն աստիճան, որ դռնեդուռ ընկած ոչ թե իրենց ծրագրերը՝ այլ «Ժառանգության» սև PR-ն են իրականացնում»,- ասաց նա`հստակ նշելվ որ դա անում են  «Հայ ազգային կոնգրես» ընդդիմադիր դաշինքի ներկայացուցիչները։

«Հստակ ասեմ, որ ՀԱԿ ներկայացուցիչներից ոմանք այսպիսի վարքագիծ են դրսևորել, անունը չեմ տա, մեր կուսակցության ներկայացուցչի դուռը ծեծել են և ասել, թե ««Ժառանգությունը» ծախվել է»,– ասաց նա:

Իսկ թե ո՞ւմ է ծախվել «Ժառանգությունը» հարցին՝ Արմեն Մարտիրոսյանը էական չհամարեց պատասխանել: Ամեն դեպքերում նա հավատացրեց, որ իրենք այն ուժն են, որ երեք նախագահների մեջ չեն տեղավորվում և 2013-ին ունենալու են նախագահի իրենց սեփական թեկնածուն:

«Ժառանգությունը» լինելով ընդդիմադիր, հստակ ներկայացրել է նրանց շահը և երբեք խաղերով չի հանդես եկել»,- ասեց Արմեն Մարտիրոսյանը և ավելացրեց, որ բնակիչների հետ հանդիպումներից հետո իրենք հասկացել են, որ «Ժառանգությունը» ԱԺ-ում ավելի շատ տեղեր կունենա, քան նախապես ենթադրում էին:

Ժամանակ. Ժառանգության փոխնախագահ Ռուբեն Հակոբյանը երեկ հնարավոր է համարել Հայ ազգային կոնգրեսի և Բարգավաճ Հայաստանի միջև պայմանավորվածություն առ այն, որ խորհրդարանական ընտրությունից հետո նրանք կոալիցիա կազմավորեն Ազգային ժողովում: Բարգավաճ Հայաստանն արդեն հերքել է նման պայմանավորվածության հավանականությունը: Կոնգրեսը կարծես թե դեռ չի արձագանքել, և ըստ էության, սա շատ բնութագրական հանգամանք է, որ ԲՀԿ-ն հերքում է, իսկ Կոնգրեսը խորհրդավոր լռություն պահպանում:

Բանն այն է, որ Բարգավաճ Հայաստանին Կոնգրեսի հետ կոալիցիոն պայմանավորվածությունները և պարտավորությունները պետք չեն, իսկ ահա Կոնգրեսին պետք են նման խոսակցությունները, որոնք կշիռ կհաղորդեն բավական փակուղային վիճակում հայտնված քաղաքական ուժին: Բանն այն է, որ Կոնգրեսն այսօր իսկապես լուրջ խնդիրներ ունի իր քաղաքական կշռի առումով և Բարգավաճ Հայաստանի հետ համագործակցության միտումներով փորձում է լրացնել այդ կշռի պակասը: Բարգավաճ Հայաստանը կշռի պակաս, մեղմ ասած, չունի, և ներկայումս, անկասկած, հանդիսանում է խորհրդարանական ընտրություններում հաղթողի ռեալ հավակնորդներից մեկը: Ըստ որում` այդ հաղթական ռեսուրսի զգալի մասն ապահովվում է նաև այն պատճառով, որ ԲՀԿ-ն չի հարում, այսպես ասած, ավանդական ընդդիմությանը և հանդիսանում է, այսպես ասած, իշխանության և ընդդիմության մի սիմբիոզ, և դրա համար էլ նրան շատ են ձայն տալիս՝ միաժամանակ դիտարկելով, այսպես ասած, իշխող ընդդիմության ծիրում:

Հայ ազգային կոնգրեսի հետ բացահայտ պայմանավորվածությունները Բարգավաճ Հայաստանի այդ իմիջը որոշակիորեն կարող են խաթարել այն մեծ զանգվածի մոտ, որը ԲՀԿ-ին ձայն է տալիս հենց այդ իշխանություն-ընդդիմություն սիմբիոզի համար, այսինքն` ձայն է տալիս ՀՀԿ-ից դժգոհ լինելով, բայց միևնույն ժամանակ իշխանությունը, այսպես ասած, «նաղդ» տարբերակի մեջ դիտարկելով: Այս իմաստով, Կոնգրեսի հետ ԲՀԿ հետագա խորհրդարանական կոալիցիան ներկայումս առավելապես պատրանք է, որովհետև ԲՀԿ-ն կա՛մ մեծամասնություն կվերցնի ինքը, կա՛մ էլ չվերցնելու դեպքում կոալիցիա կկազմի ՀՅԴ հետ, որպես քոչարյանական ծիրի մի ուժ, որի հետ միասին կփորձեն հակակշիռ լինել ՀՀԿ-ին:

Եվ այս իմաստով, արդեն նոր խորհրդարանում շատ ավելի հավանական և իրատեսական է Կոնգրեսի և ՀՀԿ հնարավոր պայմանավորվածությունը, քան Կոնգրես-ԲՀԿ կոալիցիայի տարբերակը, եթե իհարկե ՀՀԿ-ն մնա փոքրամասնություն և ՀՀԿ-ԲՀԿ ավանդական տարբերակն այս անգամ չաշխատի ո՛չ դե յուրե, ո՛չ ստվերային դե ֆակտո տարբերակով, երբ ՀՀԿ-ն ու ԲՀԿ-ն կարող են կոալիցիա չկազմել, սակայն խաղալ շատ ավելի համակարգված և բաժանել դաշտը շատ ավելի հստակ պայմանավորված, քան կոալիցիոն տարբերակով:

Այսօր Արաբկիր համայնքի նախկին թաղապետ Հովհաննես Շահինյանը և մի քանի այլ ՀՀԿ-ականներ, ՀՀ նախագահի անունով կուսակցությունից դուրս գալու դիմում են ներկայացրել: Այս լուրը հաստատեց Շահինյանը, Aravot.am -ի հետ զրույցում, ասելով, որ այդ մասին կխոսի ընտրություններից հետո:

Փոխարենն այդ փաստը «պարտակել» է Արաբկիրի տարածքային գրասենյակի ղեկավար Արմեն Մարտոյանը: Կա՞ն արդյոք նման դիմումներ եւ ինչո՞ւ են այդ մարդիկ որոշել հեռանալ ՀՀԿ-ի շարքերից՝ թղթակցի հարցին ի պատասխան, Արաբկիրի տարածքային գրասենյակի ղեկավար Արմեն Մարտոյանն ասել է, որը ինքը «առավոտվա ժամը 10-ից աշխատում» է և ոչ մի դիմում չի ստացել. «Նման բան դեռ այս րոպեին ինձ մոտ չի գրանցվել: Ես չգիտեմ դուք այդ տեղեկատվությունը որտեղի՞ց ունեք: Ես ձեր հարցին չեմ կարող պատասխանել»: 

Նախագահ Սերժ Սարգսյանը  Սյունիքի մարզ կատարած աշխատանքային այցի շրջնակներում այցելեց Մեղրիի նոր կառուցվող բժշկական կենտրոնի շինհրապարակ և ծանոթացել  իրականացվող աշխատանքներին:
Մեղրիում երկհարկանի բժշկական կենտրոնի կառուցումը նախատեսվում է իրականացնել համաշխարային բանկի աջակցությամբ, առողջապահական համակարգի արդիականացման 2-րդ ծրագրի լրացուցիչ ֆինանսավորման շրջանակներում:

Լրագրողների հետ զրույցում ՀՀ Առողջապահության նախարարության, առողջապահական ծրագրերի իրականացման գրասենյակի տնօրեն Գուրգեն Դումանյանն ասաց, որ այս ծրագրով կկատարվի Մեղրիի և Ագարակի բժշկական կենտրոնների բոլոր հիվանդանոցային և ամբուլատոր ծառայությունների համախմբումը մեկ` նորակառույց հիվանդանոցային համալիրի շենքում:

«Դա թույլ կտա առավել արդյունավետ և աշխարհագրական առումով մատչելի բժշկական ծառայություններ մատուցել տարածաշրջանի բնակչությանը: Վերոնշյալ ծրագրի իրականացումը թույլ կտա ազատել Ագարակի և Մեղրիի հիվանդանոցների, ինչպես նաև Մեղրիի պոլիկլինիկայի շենքերը»,- ասաց Գուրգեն Դումանյանը:
Նրա խոսքով՝ հիվանդանոցի շենքը տեղակայվելու է 3500քմ տարածքում, իսկ շենքում կտեղակայվի 45 տեղանոց բազմապրոֆիլ բժշկական կենտրոն:

Բժշկական կենտրոնի ընդհանուր ներդրումները կկազմեն շուրջ 3.6 մլն ԱՄՆ դոլար:

«Օրինաց երկիր» կուսակցության անցած ճանապարհի  պարզ ու լուսավոր անցյալի մասին միտքը, որ այսօր կայացած քննարկման ժամանակ հնչեցրեց թիվ 26 ընտրատարածքում ՕԵԿ պատգամավորության թեկնածու Տիգրան Ղալեչյանը, մեղմ ասած զավեշտ էր. «Մեր ձեռագիրը շիտակ ու ընթեռնելի է, մենք ինքներս՝ ազնիվ: Ժողովուրդը հիշում ու գնահատում է մեր անցած ճանապարհը: Օդի մեջ ով ինչ ուզի՝ կարող է ասել: ՕԵԿ-ը արդար քաղաքական ուժ է և որևէ մեկին կաշառք չի բաժանել: Իսկ մուրաբաները ուղղակի նվերներ են եղել. մենք մեր կուսակիցներին նվերներ միշտ ենք բաժանել, պարզապես նախընտրական շրջանում մեր հանդեպ ուշադրությունը ավելի է մեծացել: Եթե նվերը համարում եք ընտրակաշառք, ապա դա ձեր խնդիրն է»:

Ինչին ի պատասխան քննարկման մյուս մասնակից՝ ՀԱԿ անդամ Պետրոս Մակեյանի հեգնանքը նկատելի էր. «ՕԵԿ-ի անցյալը ոչ թե լուսավոր է, այլ հակառակը՝ մութ է: Եթե անգամ նրա կենսագրության լուսավոր էջեր փնտրեք, չեք գտնի: Դուք երիտասարդ եք և չգիտեք, որ ձեր կուսակցության կենսագրության հետ լուրջ խնդիրներ կան: Դուք ջահել եք, և ես Ձեզ իրականությունը չեմ բացի: Ուղղակի կասեմ. ձեր՝ կոալիցիա մուտք գործելը կանաչ լույս վառեց երկրորդ նախագահ կոչվածի ճանապարհին, որպեսզի նա Մարտի 1 իրականացներ: Նախագահ ասածը ձեր կուսակցությանը հրապարակավ հայտարարեց դավաճան, հետո ձեր ղեկավարը նշանակվեց ԱԽ քարտուղար»:

Տիգրան Կարապետյանն էլ այդ առիթով հիշեց. «Նախորդ ընտրություններին ՕԵԿ-ը ընդդիմադիր դիրքորոշում ուներ, սակայն ընտրությունների հաջորդ օրը փոխեց իր կեցվածքը:»:

ՕԵԿ-ական թեկնածուի «Մենք այդ որոշումը ընդունեցինք, որպեսզի երկիրը կարողանա առաջ գնալ, զարգանալ: Մեր որոշումն ուղղված է եղել երկրի առաջընթացին», խոսքն ներկաներին ժպիտ պարգևեց: ՕԵԿը վաղուց քաղաքական դիակ է ու նրան վերակենդանացնելն անհնար է:

Նախագահ Սերժ Սարգսյանն այսօր ընդունել է պաշտոնական այցով Հայաստան ժամանած Բելառուսի Հանրապետության արտաքին գործերի նախարար Սերգեյ Մարտինովին:

Ինչպես տեղեկանում ենք ՀՀ նախագահի մամուլի ծառայությունից, Սերժ Սարգսյանը և Բելառուսի արտգործնախարարը համակարծիք են եղել, որ կա հայ-բելառուսական բարեկամական հարաբերություններն առավել ամրապնդելու, տարբեր ոլորտներում փոխգործակցությունն ընդլայնելու երկկողմ ցանկություն և հատկապես տնտեսական համագործակցությունը զարգացնելու ուղղությամբ ջանքերն ակտիվացնելու անհրաժեշտություն:

Զրուցակիցները հեռանկարային են համարել մեքենաշինության, գյուղատնտեսության, բարձր տեխնոլոգիաների, գիտության և կրթության, ինչպես նաև ատոմային էներգետիկայի բնագավառում փորձի փոխանակումն ու համագործակցության զարգացումը:

Ընդգծելով, որ որպես դաշնակից երկրներ, Հայաստանը և Բելառուսը նաև ՀԱՊԿ ակտիվ մասնակիցներ են՝ Նախագահ Սարգսյանը և Բելառուսի արտաքին գործերի նախարար Սերգեյ Մարտինովը կարևորել են միջազգային կառույցների շրջանակներում ևս փոխշահավետ համագործակցությունը:

ՀՀ Կենտրոնական ընտրական հանձնաժողովը այսօր` ապրիլի 14-ին կայանալիք նիստում քննարկելու է պատգամավորության թեկնածուների ներկայացրած ինքնաբացարկի  4՝ մեկ համամասնական և  3- մեծամասնական ընտրակարգով առաջադրված  թեկնածուների դիմումները:

Մեծամասնական ընտրակարգով ինքնաբացարկներ կան թիվ 11, 35 եւ 38 ընտրատարածքներում:

ՀՀԿ համամասնական ընտրացուցակից ինքնաբացարկ է հայտարարել Բժշկական համալսարանի կլինիկական ֆարմակոլոգիայի ամբիոնի վարիչ, բժշկական գիտությունների դոկտոր, պրոֆեսոր Նարինե Միրզոյանը՝ կինոռեժիսոր Տիգրան Խզմալյանի կինը:

Ընտրարշավին ակտիվորեն մասնակցելու միտում ունեցող պաշտոնյաների թիվը աճել է ևս 5 ով: Մինչև մայիսի 6-ն արձակուրդ են ձևակերպել նախընտրական գործընթացում ներգրավված.

ՀՀ տրանսպորտի և կապի նախարար Մանուկ Վարդանյանը

ՀՀ քաղաքաշինության նախարար Վարդան Վարդանյանը

ՀՀ առողջապահության նախարարի 1-ին տեղակալ Հայկ Դարբինյանը

ՀՀ առողջապահության նախարարի տեղակալ Վահան Պողոսյանը

ՀՀ տարածքային կառավարման նախարարի տեղակալ Ստեփան Բարսեղյանը

Գեղարքունիքի մարզպետի տեղակալ Գագիկ Ստեփանյանը