ՀՀ քննչական կոմիտեի Երևանի քննչական վարչության Էրեբունի և Նուբարաշեն վարչական շրջանների քննչական բաժնում հարուցվել է քրեական գործ՝ անչափահասին առևանգելու դեպքի առթիվ։ Այս մասին տեղեկացնում է քննչական կոմիտեի լրատվական ծառայությունը:
Հոկտեմբերի 19-ին՝ ժամը 20:00-ին, «Էրեբունի» բժշկական կենտրոնից ոստիկանության բաժնում հաղորդում է ստացվել, որ շտապ-օգնության խումբը կենտրոն է տեղափոխել 15-ամյա Խաչատրյանին՝ կապկպված վիճակում։
Ահազանգի հիման վրա նյութերի նախապատրաստման ընթացքում՝ անչափահասը հաղորդում է ներկայացրել, որ 2014թ. հոկտեմբերի 19-ին՝ ժամը 19:00-ի սահմաններում, Երևան քաղաքի Զավարյան փողոցում 4 տղամարդ բռնության գործադրմամբ իրեն նստեցրել են մի ավտոմեքենա և տեղափոխել անհայտ ավտոտնակ, որտեղ կապել են ոտքերը, ձեռքերը, աչքերը և բերանը։ Ապա՝ իր և իր հոր հասցեին հնչեցնելով սեռական բնույթի հայհոյանքներ և սպանության սպառնալիքներ՝ նույն ավտոմեքենայով տեղափոխել են Երևան քաղաքի Տիգրան Մեծի 47 շենքի հարակից տարածք և փախուստի դիմել:

2014թ. հոկտեմբերի 14-ին՝ ժամը 09:30-ի սահմաններում, անհայտ քաղաքացուց ոստիկանության Արարատի բաժին ահազանգ է ստացվել այն մասին, որ Արարատի մարզի Այգավան գյուղի Ս.Դավթյան 2-րդ հասցեի հարակից տարածքում հայտնաբերվել է բռնի մահվան հետքերով անհայտ անձի դիակ: Այս մասին հայտնում է ՀՀ Քննչական կոմիտեի տեղեկատվության և հասարակայնության հետ կապերի բաժինը: 

Անմիջապես դեպքի վայր է մեկնել օպերատիվ-քննչական խումբը։ Դեպքի վայրի զննությամբ ճանապարհի ձախ կողմում՝ երթևեկելի մասից 6 մետր հեռավորության վրա, նախկին «կոլխոզի» պահեստների տարածքում, հայտնաբերվել է անձը չպարզված 35-40 տարեկան տղամարդու դիակ՝ բերանքսիվայր վիճակում: Դիակից շուրջ 3 մետր հեռու՝ դեպի ճանապարհը, հայտնաբերվել են արնանման հետքեր և «Գառնի» տեսակի ծխախոտի տուփ, որի մեջ եղել են գլանակներ:
Դիակի՝ դիահերձարան տեղափոխվելուց հետո կատարվել է դիակի արտաքին զննում, որի ընթացքում պարզվել է, որ դեմքի շրջանում առկա են բազմաթիվ վնասվածքներ:
Դեպքի առթիվ ՀՀ քննչական կոմիտեի Արարատի մարզի քննչական վարչությունում նույն օրը հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով:
Նախաքննության ընթացքում ձեռնարկված միջոցառումների արդյունքում պարզվել է, որ հանցագործության զոհ է դարձել Արարատի մարզի բնակիչ Կարեն Բարսեղյանը։ Քննությամբ պարզվել է նաև առերևույթ հանցագործություն կատարած անձի ինքնությունը, ով, ըստ քննության տվյալների, 2014թ. հոկտեմբերի 13-ին երեկոյան տեղի ունեցած վիճաբանության ժամանակ հարվածներ է հասցրել Կարեն Բարսեղյանին, ինչի արդյունքում էլ վերջինս մահացել է:
Կ.Բարսեղյանի սպանության կասկածանքով հոկտեմբերի 14-ին ձերբակալվել է նույն մարզի բնակիչ Ղևոնդյանը։ Վերջինս՝ որպես կասկածյալ հարցաքննվելիս, տվել է խոստովանական ցուցմունք, իսկ այսօր՝ հոկտեմբերի 15-ին, տեղի ունեցած քննչական փորձարարության ժամանակ մատնացույց է արել հանցագործության վայրը, նկարագրել է դեպքի հանգամանքները:
Նախաքննությունը շարունակվում է:

ՀՀ արդարադատության նախարարության «Նուբարաշեն» քրեակատարողական հիմնարկի կալանավոր Պարույր Փ.-ի հաղորդման հիման վրա ՀՀ հատուկ քննչական ծառայությունում նախապատրաստված նյութերով ՀՀ քրեական օրենսգրքի 308-րդ հոդվածի 1-ին մասի հատկանիշներով հարուցվել է քրեական գործ: Այս մասին տեղեկացնում է ՀՔԾ մամուլի ծառայությունը։
ՀՀ արդարադատության նախարարության «Նուբարաշեն» քրեակատարողական հիմնարկի կալանավոր Պարույր Փ.-ն հաղորդում է տվել այն մասին, որ 2013 թվականի մարտի վերջերին ՀՀ ոստիկանության ՔԳՎ Մալաթիայի քննչական բաժնում քննվող քրեական գործով որպես կասկածյալ հարցաքննվելիս քննիչին բանավոր հայտնել է Երևանի գրավատներից մեկում իրեն ապօրինի ազատությունից զրկելու մասին, սակայն քննիչը հիշյալ հանգամանքը չի արձանագրել և օրենքով սահմանված կարգով ընթացք չի տվել: Կատարվում է նախաքննություն:

Լուսանկարում՝ մեջտեղում՝ բանդայի ղեկավար Ռաֆայել Հարոյանը

Հռիփսիմե Գալստյան

Այսօր հանդես եմ եկել նոր օրենսդրական նախաձեռնությամբ։ Ըստ այդմ առաջարկել եմ ճանապարհային երթևեկության կանոնները խախտելիս նախատեսված տուգանքները փոքրացնել 2,5 անգամ, իսկ արագության գերազանցումը հաշվարկել նկատի ունենալով “+, -” 20 ինտերվալը։ Ըստ այդմ առաջարկվել են փոփոխություններ “Վարչական իրավախախտումների վերաբերյալ” ՀՀ օրենսգրքի 124-րդ հոդվածում։ Առաջարկություններն արվել են վերլուծելով համանման մոտեցումները Գերմանիայում, Ռուսաստանում և Ուկրաինայում:

Հրանտ Բագրատյանի ֆեյսբուքյան էջից:

Երեկ Ծաղկաձորում մեկնարկել է ՀՀ հարկադիր կատարման ծառայության կազմակերպած միջազգային գիտագործնական երկրորդ համաժողովը, որին հրավիրված էին մասնակցելու աշխարհի 19 երկրի ներկայացուցիչներ: Այն կրում էր «Կատարողական վարույթի խնդիրների ավանդական և նորարարական լուծումները» խորագիրը:

Դատական կատարողների միջազգային միության նախագահ Լեո Նետենը Հայաստանում հարկադիր կատարման համակարգի զարգացման գծով մեր երկիրն դասակարգել է՝ որպես տասներորդ երկիր: Նա փաստել է, որ ՀՀ հարկադիր կատարման ծառայությունն իր ստեղծման օրվանից ուսումնասիրում է միջազգային լավագույն փորձն ու պրակտիկան և փորձում  վերցնել լավագույն էլեմենտներն ու տեղայնացնել Հայաստանում և սա է հենց իրենց մոտեցումը՝ ծանոթանալ միջազգային լավագույն փորձին և այն տեղայնացնել քո երկրում:

Սակայն այդ տեղայնացման արդյունքում որևէ դրական տեղաշարժ տեղի չի ունեցել. սակայն սա այլ խոսակցության թեմա է:

Հայաստանի գլխավոր հարկադիր կատարող, արդարադատության գեներալ-մայոր Միհրան Պողոսյանը մի շատ հետաքրքիր բացահայտում է կատարել. «Ես բազմիցս ասել եմ, որ այսօր 60 անգամ ավելացել է ծառայությունում մեր աշխատանքը: Այսինքն, եթե մենք 6-7 տարի առաջ ամսական հարուցում էինք 2 հազար վարույթ, ապա այսօր հարուցում ենք 120 հազար վարույթ, սա աննախադեպ քանակ է, և ուզում եմ շեշտել, որ աշխատակիցների քանակը չի ավելացել ոչ մի մարդով, այսինքն՝ պետբյուջեի վրա ծախսային հոդված չենք ավելացրել»,-ասաց նա՝ ավելացնելով, որ իրենք այդ ամենն անում են տեղեկատվական տեխնոլոգիաների ներդրմամբ:

Սա իհարկե շատ տխուր վիճակագրություն է:

Միհրան Պողոսյանն անդրադարձել է նաև վերջին շրջանում բարձրացած աղմուկին, ըստ որի՝ ՃՈ-ն մեծ թվով հարկադիր կատարման ենթակա որոշումներ էր ուղարկում, որոնց արդյունքում բանկերը քաղաքացու հաշիվների վրա կալանք էին դնում ոչ այն չափով, ինչ նշված էր ԴԱՀԿ որոշման մեջ:

Այժմ ըստ ԴԱՀԿ ղեկավարի  համագործակցություն կա բանկերի և պետավտոտեսչության միջև. «Այսօր այդ բոլոր խնդիրները, որ Դուք նշեցիք, արդեն լուծված են: Այո՛, կային խնդիրներ, ես դրա մասին բազմիցս խոսել եմ, որ ավել էր դրվում կալանքը, քան նշված էր մեր կողմից, բայց դա ժամանակավրեպ է, և այդ հարցերն այսօր լուծված են»:

Իսկ արդյո՞ք ոլորտը լրացուցիչ օրենսդրական կարգավորման կարիք չունի հարցին, ի պատասխան  ՀՀ գլխավոր հարկադիր կատարողը հավատացրել է, որ ինքը նման անհրաժեշտություն չի տեսնում:

Սպանություն Առինջում.Երկու անձ ինքնաձիգից կրակահերթ են արձակել Ավետիսյան ամուսինների ավտոմեքենայի ուղղությամբ

2014 թվականի հոկտեմբերի 13-ին՝ ժամը 20:05-ին, ՀՀ ոստիկանության բուժվարչության Ավանի հոսպիտալից ոստիկանության Կոտայքի բաժին ահազանգ է ստացվել, որ գլխի ձախ քունքային շրջանի հրազենային վնասվածքով իրենց մոտ է տեղափոխվել Կոտայքի մարզի Առինջ գյուղի բնակիչ, 1959 թվականի ծնված Լևոն Ավետիսյանը, ով գիտակցության չգալով՝ մահացել է։
Ահազանգի հիման վրա դեպքի վայր է մեկնել օպերատիվ-քննչական խումբը։ Նյութերի նախապատրաստման ընթացքում պարզվել է, որ 2014 թվականի հոկտեմբերի 13-ին երկու անհայտ անձինք, որոնցից մեկը՝ դիմակավորված, նախապես դարանակալելով Կոտայքի մարզի Առինջ գյուղի Մհեր Մկրտչյան 2-րդ փողոցի թիվ 9-ը տան՝ ժամը 19։45-ի սահմաններում նկատել են ՀՀ քաղաքացի Լևոն Ավետիսյանի BMW մակնիշի ավտոմեքենան և սպանելու դիտավորությամբ ինքնաձիգից կրակահերթ արձակել մոտեցող մեքենայի ուղղությամբ։
Կրակոցների հետևանքով վարորդ Լ.Ավետիսյանը, ստանալով մահացու հրազենային վնասվածք, կորցրել է մեքենան ղեկավարելու հնարավորությունն ու բախվել պատին, իսկ ուղևոր Ն.Ավետիսյանը (Լևոն Ավետիսյանի կինը) ստացել է կրծքավանդակի ձախ կեսի հրազենային վնասվածք։
Դիմակավորված անձը մոտեցել է մեքենային և զենքի սպառնալիքով ուղևոր Ն.Ավետիսյանից հափշտակել կանացի պայուսակը և դիմել փախուստի։
Ն.Ավետիսյանը տեղափոխվել է հիվանդանոց։
Դեպքի առթիվ ՀՀ քննչական կոմիտեի Կոտայքի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մաս 7-րդ և 8-րդ կետերով և 235-րդ հոդվածի 1-ին մասով։
Քննության շրջանակներում ձեռնարկվում են անհրաժեշտ օպերատիվ-որոնողական և քննչական գործողություններ՝ հանցագործությունը բացահայտելու ուղղությամբ։

Սերժ Սարգսյանը այսօր ստորագրած հրամանագրով հաստատել է Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրության մրցույթում հաղթող ճանաչվածների ցուցակը: Նախագահը ՀՀ արտաքին գործերի նախարարին հանձնարարել է նշված ցուցակը, անհրաժեշտ փաստաթղթերի հետ միասին, սահմանված պահանջների և ընթացակարգերի պահպանմամբ ներկայացնել Եվրոպայի խորհրդի խորհրդարանական վեհաժողովին:

Այս մասին հայտնում են  ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից:

Տվյալ  մրցույթում հաղթող են ճանաչվել Արմեն Շուրայի Հարությունյանը, Արայիկ Գառնիկի Ղազարյանը և Նելիկ Նիկողոսի Հարությունյանը:

ՀՀ հատուկ քննչական ծառայության պետ, արդարադատության գեներալ-լեյտենանտ Վահրամ Շահինյանի հրամանով ծառայության ընդհանուր բնույթի հանցագործությունների վարչության պետ, արդարադատության փոխգնդապետ Թաթուլ Շուշանյանը, իր դիմումի համաձայն, ազատվել է զբաղեցրած պաշտոնից: