ՀՀ քննչական կոմիտեի ԵՔՔՎ Քանաքեռ-Զեյթուն վարչական շրջանի քննչական բաժնում իրականացված քննչական և վարութային ծավալուն գործողությունների արդյունքում պարզվել են գերեզմանատան հսկիչի կողմից գերեզմանատեղեր տրամադրելու գործընթացի շրջանակներում տարբեր քաղաքացիներից խարդախությամբ գումար հափշտակելու դեպքերի մի շարք հանգամանքներ:

ՔԿ-ից  հայտնում են, որ քննությամբ ձեռք բերված փաստական տվյալների համաձայն՝ Երևան քաղաքի 47-ամյա բնակիչը, 2015թ․ դեկտեմբերից մինչև 2021թ․ մարտն ընկած ժամանակահատվածում հանդիսացել է «Բնակչության հատուկ սպասարկման» ՀՈԱԿ-ի «Ավան» գերեզմանատան հսկիչ։ Չունենալով ՀՈԱԿ-ի ենթակայության տակ գտնվող «Քանաքեռ» գերեզմանատանը գերեզմանատեղիներ հատկացնելու, հուղարկավորություններ կազմակերպելու, գերեզմանատան շահագործման և պահպանման հետ կապված լիազորություններ՝  նա «Քանաքեռ» գերեզմանատանը, որտեղ տվյալ ժամանակահատվածում գերեզմանատեղիի հատկացումը կատարվել է անվճար, մի շարք քաղաքացիների հարազատների հուղարկավորության նպատակով գերեզմանատեղեր հատկացնելու համար, հանդես գալով որպես դրանց վերաբերյալ համապատասխան փաստաթղթեր տրամադրելու իրավասություն ունեցող անձ, չարաշահելով նրանց վստահությունը, վերջիններիս հայտնել է, թե իբր գերեզմանատեղերը տրամադրվում են գումարի դիմաց:

Քաղաքացիներին տրամադրելով այլ անձանց անվամբ գերեզմանի կեղծված քարտեր՝ գերեզմանատեղիի հատկացման նպատակով նա հափշտակել է տարբեր չափերով գումարներ՝ գույքային վնաս պատճառելով ինչպես քաղաքացիներին, այնպես էլ` Երևան համայնքին։

Բացի այդ, 47-ամյա տղամարդը հուղարկավորության համար գերեզմանատեղիներ տրամադրելու նպատակով կազմել է քաղաքացիների անվամբ գերեզմանի քարտեր՝ դրանցում որպես հիմք ներառելով կեղծ տվյալներ։ Այդ կերպ նա հուղարկավորության գրանցման և գերեզմանի վկայականի հատկացման համար ստեղծել է կեղծ հիմքեր, ինչպես նաև` այդ կերպ թաքցրել նոր գերեզմանատեղիի հատկացման փաստը:

Գերեզմանատան հսկիչը նաև ստեղծել է մի քանի տասնամյակ առաջ, իբրև թե, հուղարկավորված անձանցով գերեզմանատեղիների առկայության կեղծ հիմքեր։ Դրա արդյունքում ՀՈԱԿ-ի հուղարկավորությունների գրանցման բաժնում հնարավոր չի եղել ստուգել գերեզմանի քարտում լրացված՝ իրականությանը չհամապատասխանող կեղծ տվյալները, քանի որ առկա չեն եղել նախկինում՝ 1980 թվականի դրությամբ, կատարված հուղարկավորությունների վերաբերյալ հաշվառումներ: Նշված գործողությունների արդյունքում բազմաթիվ անձանց հուղարկավորությունը գրանցվել է, և «Երևանի բնակչության հատուկ սպասարկում» ՀՈԱԿ-ի կողմից տրվել են գերեզմանների վկայականներ:

Մեկ դեպքում էլ պարզվել է, որ հուղարկավորված անձի աճյունը, վերջինիս որդու խնդրանքով, նույն գերեզմանատանն ավելի հարմար վայր տեղափոխելու համար, որպես նոր գերեզմանատեղի, օրենսդրությամբ սահմանված կարգի խախտմամբ, իր իրական կամ ենթադրյալ իրավունքն ինքնակամ իրականացնելով՝ նա 35քմ մակերեսով հողատարածք է հատկացրել «Քանաքեռ» գերեզմանատանը հարակից՝ սեփականության իրավունքով մեկ այլ քաղաքացու պատկանող հողատարածքում՝ այն համարելով գերեզմանատան տարածք: Արդյունքում, հիշյալ անձի գերեզմանատեղին տեղափոխվել է նշված հողատարածք, որի հետևանքով էական վնաս է պատճառվել այդ հողամասի սեփականատիրոջ իրավունքներին՝ վերջինիս զրկելով հողատարածքը սեփական հայեցողությամբ տնօրինելու իրավունքից:

Քննությամբ տվյալներ են ձեռք բերվել նաև այն մասին, որ գումար հափշտակելու դիտավորությամբ, 2020թ․ սեպտեմբեր ամսից մինչև 2021թ․ հունվարի 20-ն ընկած ժամանակահատվածում, 47-ամյա տղամարդն անարգանքի է ենթարկել հիշյալ գերեզմանատանը գտնվող ընտանեկան 3 գերեզման։ Մասնավորապես՝ նա ոչնչացրել է դրանց վրա եղած տապանաքարերը, որից հետո ազատված գերեզմանատեղին ներկայացնելով իբրև նոր գերեզմանատեղի` խարդախությամբ, գումարի դիմաց այն հատկացրել է մեկ այլ քաղաքացու՝ հարազատի հուղարկավորության համար։ Քաղաքացին 47-ամյա տղամարդու պահանջով, գերեզմանատեղին մաքրելու, գերեզմանափոսը փորելու և գերեզմանատեղի վկայականը հատկացնելու պատրվակով, փոխանցել է պայմանավորված գումարի մի մասը, իսկ գումարի մյուս մասը պետք է փոխանցվեր գերեզմանի քարը տրամադրելուց հետո: Սակայն 47-ամյա տղամարդուն չի հաջողվել ապահովել գերեզմանի վկայականի հատկացումը:

Ձեռք բերված բավարար փաստերի հիման վրա 47-ամյա տղամարդուն մեղադրանք է ներկայացվել՝ ՀՀ քրեական օրենսգրքի 255-րդ հոդվածի 1-ին մասով, 44-255-րդ հոդվածի 1-ին մասով, 255-րդ հոդվածի 2-րդ մասի 3-րդ կետով (չորս դրվագ), 457-րդ հոդվածի 1-ին մասով (ինը դրվագ), 306-րդ հոդվածի 1-ին մասով (3 դրվագ) և 460-րդ հոդվածի 1-ին մասով:

Նախաքննությունը շարունակվում է:

Մայիսի 17-ին՝ ժամը 21:25-ի սահմաններում, Հայաստանի Հանրապետության արդարադատության նախարարության «Սևան» քրեակատարողական հիմնարկի դիտաշտարակներից մեկում ծառայություն իրականացնող պահպանության ապահովման բաժնի աշխատակցից ահազանգ է ստացվել այն մասին, որ անօդաչու թռչող սարքի (դրոնի) միջոցով փորձ է կատարվել հնարավոր ներնետում հիմնարկի տարածք:

Ահազանգից անմիջապես հետո իրականացվել է տարածքի զննություն, որի արդյունքում պատժախցերի մասնաշենքի տանիքի վրայից հայտնաբերվել է կպչուն ժապավենով ամրացված փաթեթ՝ մետաղյա կախիչով:

Փաթեթում առկա են եղել լիրիկա տեսակի 50 դեղապատիճ, 23,9 գրամ քաշով դեղնականաչավուն զանգված, 11 գրամ քաշով սպիտակ, փոշենման զանգված, 6,7 գրամ թափանցիկ և 5,7 գրամ դեղնավուն բյուրեղանման զանգվածներ, 8,3 գրամ քաշով սև կպչուն զանգված, ինչպես նաև 2 ներարկիչ՝ յուրաքանչյուրում՝ 4,5մգ սուր հոտով անգույն հեղուկ, 3 բջջային հեռախոս, USB լար և դատարկ, ապակյա ծխամորճ:

Հայտնաբերված իրերն ուղարկվել են ՀՀ ՔԿ Կոտայքի մարզային քննչական վարչություն: Նախաձեռնվել է քրեական վարույթ:

Aysor.am-ը գրում է.

«Իտալական ֆինանսական գվարդիան հայտնաբերել է կոկաինի ռեկորդային խմբաքանակ՝ 2734 կիլոգրամ, որը Հայաստան է ուղարկվել Էկվադորից: Նշվում է, որ արգելված բեռը կալանավորվել է Կալաբրիայի հարավային շրջանի Ջոյա Տաուրո քաղաքի նավահանգստում։ Թմրանյութը սառեցված է եղել 12 մետրանոց փաթեթներում՝ 78 տոննա բանանի մեջ։ Այս երկու կոնտեյներները Գուայաքիլից (Էկվադոր) վրացական Բաթումի նավահանգստով ուղեւորվում էին Հայաստան։

Aysor.am-ին ՊԵԿ-ից տեղեկացրեցին, որ իրենք տեղյակ չեն, թե ով է այդ 78 տոննա բանանի պատվիրատուն. «Քանի դեռ Հայաստան չի մտել, մենք ոչ մի բանի հետ կապ չունենք, ոչ մի տեղեկություն չենք կարող ունենալ: Այդ մասով միայն Իտալիան կարող է ասել, թե ովքեր են գնորդները եղել»:

«Սուրբ Գրիգոր Լուսավորիչ» բժշկական կենտրոնը մանրամասներ է հայտնել մայիսի 12-ին Երևանում տեղի ունեցած արտասովոր դեպքի մասին։

«Առեղծվածային դեպք Երևանում. Դատաբժիշկն արձանագրել է տղամարդու մահը, դին տեղափոխվել է դիահերձարան, իսկ Սուրբ Գրիգոր Լուսավորիչ ԲԿ բժիշկներն էլ վերակենդանացրել են նրան» վերտառությամբ հոդվածի` հայտնում ենք, որ մայիսի 12 -ին, ժամը15:40-ի սահմաններում, Երևանի խնամքի կենտրոններից մեկից շտապ օգնությունը «կլինիկական մահ» նախնական ախտորոշմամբ, անմիջապես «Սուրբ Գրիգոր Լուսավորիչ» բժշկական կենտրոնի շտապ և անհետաձգելի բուժօգնության ընդունարան է բերել մի քաղաքացու։

Մեր կլինիկայում կատարվել են սիրտ-թոքային վերակենդանացման միջոցառումներն` ընդլայնված ծավալով, գրագետ աշխատանքի արդյունքում հաջողվել է վերականգնել բուժառուի կարևոր կենսական ցուցանիշները։ Նա հոսպիտալացվել է ինտենսիվ խնամքի բաժանմունքում», ասվում է ԲԿ-ի տարածած հաղորդագրությունում։

Shamshyan.com-ի տեղեկություններով, մայիսի 12-ին առեղծվածային ու արտառոց դեպք է տեղի ունեցել Երեւանում. 1-03 շտապօգնության 54 խումբը Նոր-Նորքի 2-րդ զանգվածում գտնվող խնամքի կենտրոններից մեկից «կլինիկական մահ» ախտորոշմամբ Սուրբ Գրիգոր Լուսավորիչ բժշկական կենտրոն է տեղափոխել մի տղամարդու:

Ինչպես հայտնում է ֆոտոլրագրող Գագիկ Շամշյանը, տեղում դատաբժիշկը հայտնել է, որ արտաքին զննությամբ դիակի վրա բռնության հետքեր չեն հայտնաբերվել:

Գ. Շամշյանը հայտնում է, որ խնամքի կենտրոնից տղամարդու մահվան մասին տեղեկությունը փոխանցել են նրա հարազատներին, ու մինչ հարազատները կգնային հիվանդանոց, Սուրբ Գրիգոր Լուսավորիչ բժշկական կենտրոնի բժիշկները հիվանդանոցի դիահերձարանից տղամարդուն տեղափոխել են հիվանդանոց, եւ բժիշկների ցուցաբերած բուժօգնության արդյունքում «դիակը» վերակենդանացել է։

Նրան տեղափոխել են վերակենդանացման բաժանմունք։

Հայաստանի սահմանը հատած երկու ադրբեջանցիներից մեկը՝ Ագշին Բաբիրովը, դատապարտվել է 11  տարի 6 ամիս 15 օրվա ազատազրկման։ Այս մասին տեղեկությունը NEWS.am-ին հաստատեցին ՀՀ գլխավոր դատախազությունից:

Ադրբեջանցի զինծառայողը մեղավոր է ճանաչվել սահմանն ապօրինի հատելու, պետական սահմանով հրազեն և ռազմամթերք ապօրինի տեղափոխելու համար։ Նա ընդունել է իրեն առաջադրված մեղադրանքը։

Նրա հետ սահմանը հատած երկրորդ ադրբեջանցու՝ Հուսեյն Ախունդովի գործով քննությունը շարունակվում է։ Նա մեղադրվում է նաև «Զանգեզուրի պղնձամոլիբդենային կոմբինատ»-ի պահակին սպանելու համար։

Հիշեցնենք՝ ապրիլի 10-ին հայտնի դարձավ, որ Սիսիանի Բնունիս համայնքում ադրբեջանցիներ են հայտնվել։

Ավելի ուշ ՀՀ ՊՆ-ն հաստատեց տեղեկությունը` նշելով, որ ՀՀ տարածքում հայտնաբերվել և ձերբակալվել է Ադրբեջանի ԶՈւ մեկ զինծառայող, մյուսին որոնում են։ Ապրիլի 13-ին ՊՆ-ն հայտնեց, որ ՀՀ տարածքում հայտնաբերվել և ձերբակալվել է ադրբեջանցի երկրորդ զինծառայողը, որն էլ կասկածվում էր ԶՊՄԿ աշխատակցի սպանության մեջ։

 Ապրիլի 17-ին դատախազությունը հայտնեց, որ ՀՀ տարածքում հայտնված ադրբեջանցի երկու զինծառայողներին մեղադրանք է ներկայացվել, երկուսն էլ կալանավորվել են։

«Միայն 2020 թ. 44-օրյա պատերազմի և հայտարարված ռազմական դրության ժամանահատվածում զինվորական ծառայության պարտականությունները կատարելուց հրաժարվելու (ՀՀ նախկին քրեական օրենսգրքի 364-րդ հոդվածի 3-րդ մաս), զորամասը կամ ծառայության վայրը ինքնակամ թողնելու (ՀՀ նախկին քրեական օրենսգրքի 361-րդ հոդվածի 7-րդ մաս), դասալքության (ՀՀ նախկին քրեական օրենսգրքի  362-րդ հոդվածի 3-րդ մաս) և դրանց համակցությամբ այլ հանցագործությունների առթիվ նախաձեռնվել է  1786 քրեական վարույթ, որոնք առնչվում են 10690 անձի։

ՀՀ նախկին քրեական օրենսգրքի վերոնշյալ հոդվածներոց քննված վարույթներով քրեական հետապնդում է հարուցվել ընդհանուր առմամբ 756 անձի նկատմամբ»։ Այսօր Panorama.am-ի գրավոր հարցմանն ի պատասխան հայտնել են Քննչական կոմիտեից։

Ըստ ՔԿ-ի, նշված երեք հոդվածներով հարուցված 118 վարույթ՝ 143 անձի վերաբերյալ, ավարտվել է մեղադրական եզրակացությամբ։

Հիշեցնենք, որ ապրիլի 2-ին Տավուշի մարզում վարչապետ Նիկոլ Փաշինյանի կինը՝ Աննա Հակոբյանը մասնավորապես հայտարարել է. «Իրականությունն այն է, որ մենք 44-օրյա պատերազմի ընթացքում ունեցել ենք 11 հազար դասալիք, ես այլ կերպ չեմ արտահայտվում, դուք հասկացեք, թե ինչի մասին է խոսքը։ 11 հազար զինվորական, կամավոր, սպա և այլն, պատկերացնում եք, չէ՞, դա ինչ թիվ է»։

Հայտարարությունից օրեր անց Panorama.am-ը հարցում էր ուղղել ՔԿ նախագահին.

1. Հարգելի պարոն Քյարամյան, 44-օրյա պատերազմում դասալքության հատկանիշներով Քննչական կոմիտեում քանի՞ քրեական գործ կա հարուցված։

2. Քանի՞ մարդ է այդ գործերով ներգրավված որպես մեղադրյալ։ Քննչական կոմիտեն հաստատո՞ւմ է Աննա Հակոբյանի կողմից հնչեցրած տեղեկությունը։ Եթե ոչ, ապա Աննա Հակոբյանի վերոնշյալ հայտարարությունից հետո Քննչական կոմիտեն ի՞նչ գործողություններ է ձեռնարկել՝ ստուգելու այդ ինֆորմացիայի հավաստիությունը, աղբյուրը։

3. Դասալքության համար մեղադրվողներից քանի՞սն են սպա, քանի՞սը՝ ժամկետային զինծառայող, քանի՞սը՝ պայմանագրային, քանի՞սը՝ կամավորական։

4. Դասալքության հատկանիշներով հարուցված քրեական վարույթներից քանի՞սի նախաքննություն է ավարտվել։

5. Այդ գործերի շրջանակում քանի՞ ազատազրկված, քանի՞ դատապարտված անձ կա։

ՔԿ պատասխանն ամբողջությամբ՝ ավելի ուշ։

Սյունիք ներխուժած և այժմ կալանավորված ադրբեջանցի երկու զինծառայողներին այս փուլում չեն արտահանձնի։ ՀՀ գլխավոր դատախազ Աննա Վարդապետյանը լրագրողների հետ զրույցում ասաց, որ մինչդատական վարույթում արտահանձնում չի լինում, կարող է լինել միայն դատապարտված անձանց նկատմամբ օրինական ուժի մեջ մտած դատական ակտերի պայմաններում։

«Արտահանձնումները կարգավորվում են մի շարք կոնվենցիաներով։ Ադրբեջանի դեպքում դրանք Մոսկվայի 1998 թվականի և Ստրասբուրգի կոնվենցիաներն են»,- նշեց նա։
Հարցին՝ գերիների վերդարձի պայման դա կարող է լինել՝ Վարդապետյանը դժվարացավ պատասխանել՝ նշելով, որ ինքը հարցի հասցեատերը չէ։
Վարդապետյանը նաև հայտնեց, որ ադրբեջանցի երկու զինծառայողներից մեկի վերաբերյալ վարույթն ավարտվել է, գործն ուղարկվել է դատարան, մյուսով, որին մեղսագրվում է սպանությունը՝ ծանրացուցիչ հանգամանքներով, դեռևս նախաքննությունը շարունակվում է։

SHAMSHYAN.com-ի տեղեկություններով՝ ապրիլի 30-ին վիճաբանություն-ծեծկռտուք է տեղի ունեցել Արարատի մարզում։ Այդ օրը, ժամը 16։00-ի սահմաններում ՀՀ Ներքին գործերի նախարարության Ոստիկանության Արարատի մարզային վարչությունում օպերատիվ տեղեկություններ են ստացվել, որ Մասիս խոշորացված համայնքի Արևաբույր գյուղում ծեծկռտուք է տեղի ունեցել։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Ոստիկանության Արարատի մարզային վարչության պետ Սարիբեկ Ռուստամյանը և Ոստիականության Մասիսի բաժնի պետ Ասքանազ Դավթյանը։about:blank about:blank

Պարզվել է, որ տեղեկությունը հավաստի է։ Եվ այդ օրը, ժամը 15։50-ի սահմաններում Արևաբույր գյուղի Բաղրամյան փողոցում էլեկտրական լարերին խանգարող ծառի ճյուղերը կտրելու հարցի շուրջ վիճաբանություն է տեղի ունեցել նույն գյուղի բնակիչներ 36-ամյա Արայիկ Մելքոնյանի և 36-ամյա Տաճատ Մարգարյանի, 36-ամյա Ներսես Գասպարյանի և 26-ամյա Շավարշ Ավետիսյանի միջև, որի ընթացքում վերջիններս բռունցքներով ու ոտքերով հարվածներ են հասցրել Ա․ Մելքոնյանի մարմնի տարբեր հատվածներին։

Ոստիկանները տեղում հայտնաբերել են Տ․ Մարգարյանին, Ն․ Գասպարյանին և Շ․ Ավետիսյանին և տեղափոխել Ոստիկանության Մասիսի բաժին։

Դեպքի փաստով՝ Հայաստանի քննչական կոմիտեի Արարատի մարզային քննչական վարչության Մասիսի քննչական բաժնում նախաձեռնվել է վարույթ։

Գ․ Շամշյանի տեղեկություններով՝ բաժին տեղափոխվածներից Տ․ Մարգարյանը Մասիս խոշորացված համայնքի Արևաբույր գյուղի վարչական ղեկավարն է, իսկ ծեծված Ա․ Մելքոնյանը աշխատում է «Սպեցնազ» ՍՊԸ-ում որպես պահնորդ։

Տիգրան Արզաքանցյանից՝ առանձնապես խոշոր չափերով գումար շորթելու մեջ մեղադրվող Արտակ Գալստյանին՝ «Վանոյի Արտակին», խոշտանգելու դեպքով իրավապահները քննություն չեն իրականացնում, Գալստյանը պնդում է՝ իրեն խոշտանգել են Նիկոլ Փաշինյանի «դաբրո»-ով, ինչի մասին հայտնել էր ՔԿ նախագահ Արգիշտի Քյարամյանը։ Տեղեկությունը «Փաստինֆո»-ի հետ զրույցում փոխանցեց փաստաբան Արսեն Մկրտչյանը։

Հիշեցնենք, որ Արտակ Գալստյանը՝ «Վանոյի Արտակը», ձերբակալվել, ապա՝ կալանավորվել է 2023թ. ապրիլի 17-ին՝ առանձնապես խոշոր չափերով շորթում կատարելու մեղադրանքով։ Քրեական գործի տվյալներով՝ «Հանրային ձայն» կուսակցության նախագահ Արտակ Գալստյանը և նույն կուսակցության պատվավոր նախագահ Վարդան Ղուկասյանը միմյանց հետ նախնական համաձայնություն են ձեռք բերել Տիգրան Արզաքանցյանից առանձնապես խոշոր չափերով շորթում կատարելու վերաբերյալ։ 2022թ. մարտի 23-ին Ա. Գալստյանը հեռախոսակապ է հաստատել Տիգրան Արզաքանցյանի հետ և պահանջել 53.806.500 ՀՀ դրամին համարժեք 110.000 ԱՄՆ դոլար գումար տրամադրել իրենց՝ հակառակ դեպքում նրա և նրա կնոջ վերաբերյալ Վ. Ղուկասյանի կողմից վարվող «Հանրային ձայն» հաղորդաշարի ընթացքում կհրապարակվեն նրանց պատիվն ու արժանապատվությունը նվաստացնող, բարի համբավն արատավորող տեղեկություններ։ Տ.Ա.-ն չի կատարել նրանց պահանջը, որի հետևանքով Վ.Ղ.-ն իր youtube.com տեսանյութերի հրապարակման կայքում բացված էջով 2022թ. հոկտեմբերից մինչև 2023թ. փետրվարն ընկած ժամանակահատվածում մի քանի անգամ հրապարակել է նման տեղեկություններ։ Քրեական վարույթով պարզվել է նաև Վարդան Ղուկասյանի կողմից քաղաքացիներից սպառնալիքով գումար շորթելու այլ դեպքեր ևս՝ շուրջ 46 դրվագ։

Քրեական վարույթի շրջանակներում ձերբակալված, ապա կալանավորված Արտակ Գալստյանի պաշտպաններն արդեն տևական ժամանակ է, ինչ ահազանգում են՝ Գալստյանին խոշտանգելու մասին, սակայն իրավապահները որևէ կերպ քննություն չեն իրականացնում այդ ուղղությամբ։ Համենայն դեպս՝ իրավապահ մարմիններից որևէ հոդաբաշխ բացատրություն չի տրվել, իսկ Գալստյանի պաշտպան Արսեն Մկրտչյանը «Փաստինֆո»-ի հետ զրույցում արձանագրեց, որ բացարձակ քննություն չի տարվել, պաշտպանության կողմը չի էլ ակնկալում։

«Խոշտանգումը կատարելու պահին, ըստ իմ վստահորդի, Արգիշտի Քյարամյանն ասել է, որ «դաբրո» ունի Նիկոլ Փաշինյանից՝ անգամ մինչև ֆիզիկական ոչնչացում։ Բնականաբար այս պարագայում ակնկալել, որ խոշտանգման փաստով կարող է նորմալ քննություն իրականացվել, միամտություն կլիներ։ Հասկանալի է, որ այս պարագայում, հաշվի առնելով Արգիշտի Քյարամյանի անձը, հատկապես, մտերմությունը Նիկոլ Փաշինյանի հետ և Փաշինյանի ուժայիններում հենարաններից մեկը լինելը, բնականաբար, չեմ ակնկալում, որ այդ ուղղությամբ ընդհանրապես կարող է քննություն իրականացվել»,- նշեց Մկրտչյանը՝ հավելելով, որ հաղորդումը ներկայացրել է ապրիլի 28-ին, սակայն առ այս պահը որևէ արձագանք չկա։ Ըստ փաստաբանի՝ անկախ նրանից, թե քննությունը ինչ կպարզեր հետագայում, առնվազն Արգիշտի Քյարամյանի պաշտոնավարումը պետք է կասեցվեր, իսկ գործը՝ ՔԿ-ից ուղարկվեր այլ կառույց, որ գոնե հանրության և իրավապաշտպան հանրության մոտ կասկած չառաջանար, որ պետությունն իր պոզիտիվ պարտականությունը փորձում է կատարել։ Արտակ Գալստյանին խոշտանգման ենթարկելը, փաստաբանի փոխանցմամբ, դրսևորվել է՝ հարվածներով, սպառնալիքներով, տեխնիկական միջոցներով կտտանքներ են կիրառվել՝ պատճառելով ֆիզիկական ցավ, ինչը զուգորդվել է հայհոյանքով։

«Այդ հայհոյախառը արտահայտությունների ներքո նաև կառույցի առաջին դեմքն արտահայտվել է, որ «իմ հասցեին հայհոյանք հնչեցնողն այս ինչն է», «դու՝ այս ինչն ես», «քեզ պաշտպանողը՝ այս ինչն է», հայհոյանք է տվել, «դու պատասխան ես տալու այն բանի համար, որ ինձ հայհոյում են»։ Այնուհետև տվել են հեռախոս, պահանջել են, որ Արտակ Գալստյանը զանգահարի Վարդան Ղուկասյանին, ինչն արվել է, խնդրել է, որ միայն Արգիշտի Քյարամյանի հասցեին հայհոյանքներ չհնչեն, սակայն, դա տեղ չի հասել, շատ ավելի վատ հայհոյանքներ են հնչել»,- նշեց փաստաբանը։

Ա. Մկրտչյանի վստահեցմամբ՝ խոշտանգված վիճակում Արտակ Գալստյանը բուժզննության ենթարկվել է, առկա են լուսանկարները, բժշկական տեղեկանքը, սակայն, նկատի ունենալով, որ դրանք անձնական տվյալներ են պարունակում, պաշտպանության կողմը չի հրապարակում։

«ՔԿՀ-ն՝ ի հեճուկս Քննչական մարմնի, չգնաց այն ճանապարհով, որ քողարկեր կատարվածը, որովհետև ես Արտակ Գալստյանից երկու րոպե ավելի շուտ արդեն ՔԿՀ-ում էի, մարդիկ ուղղակի պարզ ասեցին, որ կան մարմնական վնասվածքի հետքեր։ Միակ վտանգը, որ մենք ունեցել ենք, դա այն էր, որ ուղեկցողների վրա կարող էր հանիրավի սլաքներ ուղղվեր, դրա համար էլ րոպեների ճշգրտությամբ հայտնում եմ ժամանակը, թե երբ է մարմնական վնասվածքը պատճառվել, հրապարակայնացրել եմ իմ և ուղեկցողների խոսակցությունը, որ, եթե մի օր այս գործը քննվի, թեև կասկածում եմ, որ Նիկոլ Փաշինյանի պաշտոնավարման տարիներին այս դեպքով օբյեկտիվ քննություն կարող է իրականացվել, ուղեկցողներին հանրիավի չկասկածեն մի բանում, որն իրենք չեն արել»,- նշեց Մկրտչյանը՝ հավելելով, որ ուղեկցողներն ամբողջ ընթացքում իրենց աչքի առաջ են եղել, որևէ ավելորդություն իրենց թույլ չեն տվել։

ՔԿՀ-ում այժմ Արտակ Գալստյանի նկատմամբ օպերատիվ-հետախուզական միջոցառումներ են իրականացվում, փաստաբանի դիտարկմամբ՝ «անմակարդակ», ինչի արդյունքում չգիտի, թե ինչ տվյալներ են ցանկանում ստանալ։ Բացի այդ, ճնշումներ են իրականացվում նաև Արտակ Գալստյանի ընտանիքի անդամների նկատմամբ, այսօր առավոտյան բերման է ենթարկվել Գալստյանի որդին՝ իբրև հեռախոսն առգրավելու պատճառաբանությամբ, Գալստյանը հոր դեմ ցուցմունք չի տվել։ Փաստաբանի խոսքով՝ եթե ներպետական ատյանում ակնհայտ է, որ անձը խոշտագվում է, սակայն ոչինչ չի ձեռնարկվում, ապա միջազգային կառույցներում պետք է այդ մասին բարձրաձայնել, ըստ այդմ, պաշտպանը իրավաչափ է համարում արտերկրում ի պաշտպանություն Գալստյանի իրականացվող ակցիաները։
Անդրադառնալով Գալստյանի մեղադրանքին՝ պաշտպանը դրանք ծիծաղելի, անեկդոտիկ որակեց, ըստ նրա՝ «եթե մեղադրանք հորինողը ծանոթ լիներ Գալստյանին, շփված լիներ, կհորիներ թեորիապես լինելիք բան»։

«Նախաքննության գաղտնիքից ելնելով՝ չեմ կարող մանրամասներ ներկայացնել, թեև հազիվ եմ զսպում, որ չպատմեմ, թե ինչ անեկդոտիկ մեղադրանքի հետ գործ ունենք, զարհուրելի։ Որ ասում եմ՝ ոչ պրոֆեսիոնալ նախաքննություն, քննչական մարմին, այստեղ նաև հաղորդում տվողի մտքի թռիչքն է շատ կարևոր, քանի որ նա նկարագրում է այնպիսի բաներ, որոնք շատ հեշտ են ստուգվում, պարզվում է՝ նման բան ոչ միայն չի կարող լինել Արտակ Գալստյանի կողմից, այլև՝ ՀՀ-ում առհասարակ, քանի որ նրա մատնանշած փաստական հանգամանքներից առնվազն մեկը վերաբերում է այնպիսի տվյալի, իրի նկարագրության, որը ՀՀ-ում հայտնի չէ։ Այսինքն՝ «հեքիաթ, հեքիաթ պապս» դրվել է մեղադրանքի մեջ։ Մի քաղաքական ուժի լիդերի կարգավիճակին հավակնող անձը՝ մյուս քաղաքական ուժի քաղաքապետի թեկնածուի մասին հաղորդում է ներկայացնում՝ անհնարին իրավիճակի մասին»,- նշեց փաստաբանը՝ փակագծեր չբացելով, թե ինչ իրի մասին է խոսքը։
Կալանավորման որոշման դեմ պաշտպանության կողմը բողոք ներկայացրել է, կարծում է՝ բողոքը, գուցե, կմակագրվի Արմեն Դանիելյանին կամ վերահսկման ներքո գտնվող այլ դատավորի։