ՆԱՏՕ-ի ակտիվությունը կտրուկ բարձրացել է, ԱՄՆ-ից զգալի ուժեր են տեղակայվել Ռուսաստանի սահմանների մոտ, հայտարարել է ՌԴ նախագահ Վլադիմիր Պուտինը ՌԴ պաշտպանության նախարարության կոլեգիայի ընդլայնված նիստում։

«ՆԱՏՕ-ի ռազմական բլոկի ակտիվությունը վերջերս կտրուկ աճել է,   մեր սահմանների մոտ են տեղակայել ամերիկյան մեծաքանակ ուժեր, այդ թվում՝ ավիատեխնիկա,  ավելացել է Հյուսիսատլանտյան դաշինքի զորքերի թիվը Արևելյան և Կենտրոնական Եվրոպայում։ Ֆինլանդիային արդեն իսկ ներգրավել են ՆԱՏՕ-ի կազմ, նախատեսում են ներգրավել նաև Շվեդիային։ Փաստացի՝ դա նշանակում է դաշինքի կողմից մեր սահմաններին ավելի մոտենալու հերթական փուլի մեկնարկ»,- ասել է Պուտինը։

Նա հիշեցրել է, որ 1991 թվականին Արևմուտքը Միխայիլ Գորբաչովին խոստացել էր չընդլայնել ՆԱՏՕ-ն դեպի Արևելք։

«Եվ ահա, խնդրեմ․ այսպիսի գործընկերներ են նրանք՝ անամոթաբար ստում են՝ ամեն քայլափոխի»,- ասել է Պուտինը։

Ռուսական զորքերի խմբավորումները Սիրիայում և Ղարաբաղում շարունակում են մնալ խաղաղության պահպանման հիմնական երաշխավորը։ «ՌԻԱ նովոստի»-ն գրում է, որ այդ մասին հայտարարել է ՌԴ պաշտպանության նախարար Սերգեյ Շոյգուն։

«Ռուսական զորքերի խմբավորումները Սիրիայում և Ղարաբաղում շարունակում են մնալ խաղաղության պահպանման հիմնական երաշխավորը»,-ասել է Շոյգուն Ռուսաստանի պաշտպանության նախարարության կոլեգիայի ընդլայնված նիստում։

Նախարարը ռուսական զորքերին հանձնարարել է Սիրիայում և Ղարաբաղում ապահովել խաղաղությունը և կայունությունը՝ նաև փոփոխված իրավիճակում։

Շառլ Ազնավուրի հարյուրամյակի առթիվ Փարիզի քաղաքապետարանը, հարգանքի տուրք մատուցելով ֆրանսահայ արվեստագետին և հումանիստին, Ելիսեյան այգիների մի ընդգրկուն հատված կանվանվի Շառլ Ազնավուրի անունով։

«Արմենպրես»-ն այս մասին տեղեկանում է «Ազնավուր» հիմնադրամի տարածած հաղորդագրությունից:

Փարիզի կենտրոնում գտնվող այս տարածքը ժամանակավորապես փակ կլինի վերանորոգման ու բարեկարգման աշխատանքների նպատակով և կվերաբացվի հանրության առջև 2024 թվականի գարնանը։

Եվրամիության  երկրները ոչնչացրել են COVID-19-ի 4 միլիարդ եվրո արժողությամբ առնվազն 215 միլիոն դեղաչափ պատվաստանյութ՝ դրանց ավելցուկի պատճառով: «Արմենպրես»-ի փոխանցմամբ՝ նման տվյալներ է հաղորդում POLITICO պարբերականը։

Ըստ POLITICO-ի վերլուծության՝ եվրոպական երկրները ստացել են պատվաստանյութի 1,5 միլիարդ դեղաչափ (Եվրոպայում յուրաքանչյուր անձի համար 3-ից ավելի)․ դրանցից շատերը հայտնվել են մայրցամաքի աղբավայրերում։

Պատվաստանյութերի զգալի քանակություն ձեռք է բերվել 2021 թվականին՝ համավարակի բուռն շրջանում, երբ Բրյուսելը  1,1 միլիարդ դեղաչափի մատակարարումների խոշոր պայմանագրեր կնքեց ամերիկյան Pfizer ընկերության և գերմանական BioNTech-ի հետ:

Ինչպես ընդգծում է POLITICO-ն, «պատվաստանյութերի ավելցուկ չափաբաժինները երրորդ երկրներ փոխանցելու փորձերը խափանվել են պահանջարկի նվազման և լոգիստիկ խնդիրների պատճառով»:

Հրատարակությունը հիշեցնում է, որ հարցեր են ծագել այն բանից ի վեր, երբ The New York Times-ը հաղորդեց, որ Եվրահանձնաժողովի նախագահ Ուրսուլա ֆոն դեր Լայենը Pfizer-ի հետ պայմանագրի շուրջ բանակցություններ է վարել հաղորդագրությունների միջոցով։

Այդ պայմանագրի շուրջ Եվրահանձնաժողովը նորից բանակցություններ է վարել Եվրամիության այն երկրների ճնշման տակ, որտեղ պատվաստանյութերի ավելցուկ է եղել։ Լեհաստանը և Հունգարիան դադարել են պատվաստանյութեր ընդունել, սակայն Pfizer ընկերությունը նրանց դատի է տվել չվճարելու համար։ Ռումինիայում դատախազները ցանկանում են անձեռնմխելիությունից զրկել նախկին վարչապետին և առողջապահության երկու նախկին նախարարներին՝ պնդելով, որ պատվաստանյութերի անհարկի ձեռքբերումները պետությանը հասցրել են ավելի քան 1 միլիարդ եվրոյի վնաս։

Միևնույն ժամանակ, պատվաստանյութերը կշարունակվեն մատակարարվել, քանի որ վերանայված պայմանագրի համաձայն՝ եվրոպական երկրները Pfizer-ից պետք է պատվաստանյութեր գնեն մինչև առնվազն 2027 թվականը։

Կովկասում անվտանգության և խաղաղության ճանապարհն անցնում է Ադրբեջանի և Հայաստանի միջև համապարփակ և կայուն խաղաղության պայմանագրի ստորագրմամբ:

Այս մասին հայտարարել է Թուրքիայի ազգային պաշտպանության նախարար Յաշար Գյուլերը։

Նա նշել է, որ Թուրքիան աջակցում է այդ նպատակով գործադրվող անկեղծ ջանքերին և ցանկանում է, որ հնարավորինս շուտ դրական արդյունքի հասնի.

«Մենք գոհ ենք երկու երկրների միջև վստահության բարձրացման ուղղությամբ կոնկրետ քայլեր ձեռնարկելու վերջին որոշումից»,-ասել է Թուրքիայի պաշտպանության նախարարը:

Երկրի նախագահի պաշտոնում առաջադրվել է «Մեծ Ադրբեջան» կուսակցության նախագահ Էլշադ Մուսաևի թեկնածությունը, հայտնում են ադրբեջանական լրատվամիջոցները։

Ինչպես հայտնել է Էլշադ Մուսաևը, այս մասին որոշումը  կայացվել է «Մեծ Ադրբեջան» կուսակցության քաղխորհրդում։

Ադրբեջանի նախագահի պաշտոնում Է.Մուսաևի առաջադրման հետ կապված փաստաթղթերը Կենտրոնական ընտրական հանձնաժողով կներկայացվեն դեկտեմբերի 19-ին։

Ավելի վաղ հայտնի էր դարձել, բացի երկրի գործող ղեկավար Իլհամ Ալիևից, Ադրբեջանի նախագահի պաշտոնում ևս երկու թեկնածուի առաջադրման մասին․ նրանք են՝ «Սոցիալական հետազոտությունների կենտրոնի» խորհրդի նախագահ Զահիդ Օրուջը և «Մեծ ստեղծագործում» կուսակցության և Միլլի Մեջլիսի մշակույթի հանձնաժողովի ներկայացուցիչ Ֆազիլ Մուստաֆան։

Ադրբեջանում նախագահական ընտրությունները նշանակված են 2024 թվականի փետրվարի 7-ին։

ԽՍՀՄ տարածքում ամենամեծ ներկայացված Ամերիկյան դեսպանատան առնթեր 2500 ՀԿ-ներ՝ դրամաշնորհներ, գումարներ հայ երիտասարդներին, հայ հասարակությանը համոզել են, որ Հայաստանը կարող է ապրել առանց Ռուսաստանի։ Նման հայտարարություն է արել ՌԴ  Պետդումայի փոխխոսնակ Պյոտր Տոլստոյը։

Ինչպես հայտնում է «Ռիա Նովոստի» գործակալությունը,  «Ռուսաստան-Հայաստան» առաջին հանրային ֆորումի բացման ժամանակ խորհրդարանականը կոչ է արել Հայաստանին չկրկնել հետխորհրդային երկրների սխալները, որոնք փորձում էին ստանալ ամեն հնարավորը  Ռուսաստանից և միաժամանակ ստանալ ամեն ինչ Եվրոպայից։

«Երբ Ղարաբաղում ընթանում էր վերջին պատերազմը, իմ աշխատասենյակում բառացիորեն ամեն շաբաթ Հայաստանի խորհրդարանի պատգամավորներ էին լինում, ովքեր ասում էին. «Զանգեք, ասեք, մի բան արեք,  դադարեցրեք պատերազմը, մեր տղաները մահանում են, նրանց դագաղներով բերում են ճակատից»։ Իսկ այսօր այս պատգամավորներն այլեւս չկան՝ ընդհանրապես, ոչ ոք։ Հիշեցնեմ, որ այն ժամանակ արյունալի պատերազմը դադարեցրեց հենց Պուտինը»,- ասել է Պետդումայի փոխխոսնակը։

Նա ավելացրել է, որ ինչպես հազարավոր, միլիոնավոր իր հայրենակիցները, ինքն էլ վստահ է, որ երկու երկրներն առաջ են գնալու միասին։

«Առանց Ռուսաստանի Հայաստանը, ցավոք, որպես պետություն չի լինի»,- ասել է նա։

Ադրբեջանը վճռական է Հայաստանի հետ հարաբերությունների կարգավորման և խաղաղ գործընթացի առաջխաղացման հարցում: Այս մասին հայտարարել է Ադրբեջանի արտգործնախարար Ջեյհուն Բայրամովը՝ ելույթ ունենալով Սևծովյան տնտեսական համագործակցության կազմակերպության արտաքին գործերի նախարարների խորհրդի 47-րդ նիստում, որը տեղի է ունեցել տեսակոնֆերանսի միջոցով։

Բայրամովը կարծիք է հայտնել, որ ներկայումս տարածաշրջանում բարենպաստ պայմաններ են ստեղծվել խաղաղություն կառուցելու համար։

Տաջիկստանն ու Ղրղզստանը հաջորդ տարի կարող են սահմանային համաձայնագիր ստորագրել։ Այս մասին հայտարարել է Բելառուսի նախագահ Ալեքսանդր Լուկաշենկոն Մինսկում ԱՊՀ երկրների անվտանգության մարմինների և հետախուզական ծառայությունների ղեկավարների 19-րդ հանդիպման մասնակիցների հետ հանդիպմանը, փոխանցում է ՏԱՍՍ-ը։

«Ես մշտապես գովում եմ (Տաջիկստանի և Ղրղզստանի) առաջնորդներին։ Լավ արեցիք, բրավո, սահմանների 90 տոկոսից ավելին արդեն համաձայնեցված է։ Եվ ես վստահ եմ, որ հաջորդ տարի նրանք կստորագրեն սահմանային պայմանագիր»,- նշել է Բելառուսի նախագահը։

Նա անդրադարձել է նաև Ղարաբաղի թեմային՝ ասելով, որ վերջերս այն քննարկել է Ադրբեջանի նախագահ Իլհամ Ալիևի հետ։ «Նրա հետ Դուբայում խոսել ենք նաև Ղարաբաղում գտնվող մարդկանց մասին։ Ալիևն ասում է). «Մենք ոչ մեկին ձեռք չենք տա: Ընդհակառակը, մենք այնպես կանենք, որ բոլորը հասկանան, որ մենք քաղաքակիրթ երկիր ենք»,- Ադրբեջանի ղեկավարի խոսքերն է մեջբերում Լուկաշենկոն։

«Ես գիտեմ Ադրբեջանում տիրող իրավիճակը, այնտեղի իշխանությունները ուժեղ են, նրանք ունակ են դա անել՝ աջակցել և օգնել [ժողովրդին]»,- ասել է Բելառուսի նախագահը։

Ադրբեջանական կողմը շուտով կներկայացնի իր դիրքորոշումը Հայաստանի կողմից նոյեմբերի վերջին ներկայացրած խաղաղ համաձայնագրի պայմանների վերաբերյալ։ Ադրբեջանական  լրատվամիջոցների հաղորդմամբ, հայտարարել է Ադրբեջանի արտգործնախարար Ջեյհուն Բայրամովը Բաքվում իր թուրք գործընկեր Հաքան Ֆիդանի հետ համատեղ ասուլիսում։

«Առաջարկությունների փաթեթը, որը մենք ստացել ենք Հայաստանից, տարբերվում է նախորդից։ Այն ավելի լավատեսական է»,- ասել է նա։

Բայրամովը նաև արձագանքել է երկու երկրների զորքերը սահմանից դուրս բերելու Երևանի առաջարկին. «Եթե զորքերը դուրս բերվեն չսահմանազատված սահմանից, ո՞վ է երաշխավորելու, որ այնտեղ ոչինչ չի լինելու։ Այս առաջարկն անընդունելի է ադրբեջանական կողմի համար։ Ադրբեջանական բանակն այսօր պաշտպանում է իր սահմանները։ Համաձայն չեմ Հայաստանի ԱԳՆ ղեկավարի հայտարարության հետ սահմանից զորքերի դուրսբերման վերաբերյալ»։