Էքստրասենս Անի Մաջնունյանի սպանության մեղադրանքով կալանավորված «Յանուս» թատրոնի գեղարվեստական ղեկավար Մուշեղ Մխիթարյանը, ով արդեն 31 օր է՝ հացադուլի մեջ է, այսօր զանգահարել է ArmLur.am-ի խմբագրություն՝ ցանկանալով իր խոսքն ասել թատերագետ Լևոն Մութաֆյանի անսպասելի մահվան մասին:

Մուշեղ Մխիթարյանի խոսքով՝ ինքը տևական ժամանակ շփվել է Լևոն Մութաֆյանի հետ, իրենք հասցրել են մտերմանալ, հարազատ մարդիկ դառնալ: Մ. Մխիթարյանը չի հավատում հանկարծամահության վարկածին, քանի որ թատերագետն առողջական լուրջ խնդիրներ չուներ. միայն արյան ճնշման տատանումներ են եղել ժամանակ առ ժամանակ, իսկ սա, ըստ մեր զրուցակցի, այն աստիճան չէր սրվել, որ հանկարծամահության հանգեցներ:

Մուշեղ Մխիթարյանի խոսքը ներկայացնում ենք ամբողջությամբ՝ առանց խմբագրման. «Լևոն Մութաֆյան՝ թատերագետ, դրամատուրգ, մանկավարժ, դերասան, ռեժիսոր. այս ցանկը կարելի է թվել շատ երկար: «Յանուս» թատրոնի գեղարվեստական խորհրդի անդամ էր: Այս ցանկն ավարտվում է լավ ընկեր և բարեկամ բառերով: Նրա հետ ընկերություն անելն ինձ համար մշտահաճո զբաղմունք և մեծագույն պատիվ էր: Հասցրել ենք միմյանց լավ ճանաչել: Նա միշտ կգտներ ժամանակ ընկերների համար:

Նույնիսկ երբ ձերբակալվեցի, նա չէր դադարում տեսակցության գալ ինձ, միշտ ասում էր, որ ամեն ինչ կանի ինձ դուրս բերելու համար: Նա այն քիչ մտավորականներից էր, որ թե՛ զանգերով, թե՛ գործնական քայլերով անընդհատ կողքիս էր: Շունչս սկսեց կտրվել, երբ իմացա նրա հետ կատարվածի մասին: Կյանքից հեռացավ ընկերս, միակ ապավենս: Նրա մահը բազում հարցերի տեղիք է տվել: Գուցե Լևոնը, ինչպես մոգ Գաբին էր ասում, այն հաջո՞րդն է, ով պետք է սպանվեր Անի Մաջնունյանի մահից հետո: Արդեն երկար ժամանակ վախից չեմ կարողանում քնել: Շատ բան կա, որ չենք կարողանում բացահայտել: Ցավակցում եմ նրա մտերիմներին, աղջկան, որդուն: Շնորհակալ եմ ամեն ինչի համար, շնորհակալ եմ, որ գիտակցելով ամեն բան՝ միշտ պայքարել ես հանուն ճշմարտության»: ArmLur.am-ի հարցին՝ ինչու է Լևոն Մութաֆյանի մահը կապում Անի Մաջնունյանի սպանության հետ, Մուշեղ Մխիթարյանը պատասխանեց. «Քանի որ նա ամեն ինչ անում էր ինձ օգնելու համար: Գաբին ասել էր, որ երկրորդին էլ պետք է սպանեին: Նա ասել էր, որ դրանից հետո ես դուրս չեմ գա: Ինձ կսպանեն.. բայց ես ինքս ինձ հետ խոսք եմ տալիս, ոչինչ չեմ անի»:

Նկատեցինք, որ էքստարսենսի սպանության կասկածանքով Մուշեղի ձերբակալությունից հետո Լևոն Մութաֆյանը ֆեյսբուքյան գրառում էր կատարել, որտեղ այնքան էլ ջերմ բառերով չէր բնութագրել նրան: Այդ դեպքում ինչպե՞ս ստացվեց, որ նրանք մտերիմ հարաբերություններ են ունեցել, ավելին՝ Լևոն Մութաֆյանն իրեն փորձել է օգնել: Մուշեղ Մխիթարյանը պարզաբանեց. «Այդ ժամանակ խնդիր եղավ, մենք մի հարցի շուրջ վիճված էինք, ճիշտ չէին ներկայացվել իմ և Անի Մաջնունյանի հարաբերությունների մասին տեղեկությունները: Երբ ճիշտն իմացավ, ասաց, որ ամեն ինչ կանի ինձ այստեղից հանելու հարցում օգնելու համար»,- ապա շարունակեց. «Ես սարսափում եմ այն մտքից, որ սա կարող է դժբախտ պատահար չլինել: Նրա 60-ամյակն անցած տարի տոնեցինք: Նա այնպիսի հիվանդություն չուներ, որ ոչ ոք չիմանար»:

Ամբողջական հոդվածը կարող եք կարդալ այս հասցեով՝ http://armlur.am/443984/ 

News.am-ը գրում է. Նոյեմբերի 8-ին հայ-ադրբեջանական սահմանը հատած եւ այսօր հայրենիք վերադարձած 76-ամյա Լուսիկ Աբովյանն իրեն լավ է զգում, առողջական որեւէ գանգատ չունի:

«Իջեւանի» բժշկական կենտրոնում իրեն այցի եկած Տավուշի մարզպետ Հովիկ Աբովյանին եւ զինվորականներին Լուսիկ Աբովյանը պատմեց, որ նախօրեին ճնշման հետ կապված խնդիր է ունեցել, սակայն այժմ իրեն լավ է զգում:

«Ինձ ինչ-որ պետքն ա, տվել են, բայց նրանց եփածը ես չեմ կերել, չեմ սիրում: Հիմա լավ եմ, ճնշումս նորմալ ա, սրտիս աշխատանքն է: Իմ առողջականին ի՞նչ ա եղել որ»,- ասաց Լուսիկ տատը:

76-ամյա Լուսիկ Աբովյանը պատմեց, որ նոյեմբերի 8-ին մառախուղի պատճառով մոլորվել է եւ հայտնվել ադրբեջանական կողմում:

Մանրամասները՝ սկզբնաղբյուր կայքում և տեսանյութում

Գիշերվանից սկսված ուժեղ քամին Վանաձորում վնասել է շենքերի ու տների տանիքնեն, արմատախիլ արել ծառեր: Այսօր առավոտից քաղաքի տարբեր թաղամասերի բնակիչներից ահազանգեր են ստացվում, որ կան ընկած ծառերի: Հաստաբուն բարդին, ընկնելով քաղաքի գլխավոր Դեմիրճյան փողոցի վրա, միակողմանի փակել էր քաղաքը մյուս համայնքներին միացնող ճանապարհը: Մինչ Վանաձորի քաղաքապետարանի ենթակայությամբ գործող «Նեցուկ» կազմակերպության աշխատակիցներն ընկած ծառը կհեռացնեին ճանապարհի բանուկ մասից, ստացվեց երկրորդ ահազանգը. նույն փողոցում, մի քանի մետր այն կողմ, ընկել էր եւս երկու ծառ: Մեկ այլ ծառ էլ ընկել էր Վանաձորի Լենինգրադյան փողոցում: Այս անգամ այն վնասել է 60-ամյա Սիրուշ Ջուլհակյանի տնակը: Բարեբախտաբար, պատճառվածը միայն նյութական վնաս է: Ծառի ընկնելու պահին տանը ոչ ոք չի եղել:

yerkirmedia.am

ՀՀ ԳՆ սննդամթերքի անվտանգության պետական ծառայությունը ահազանգի հիման վրա («Սուր անկյուն» հաղորդաշարի հոկտեմբերի 18-ի թողարկում) դիտարկում և անասնահամաճարակային մշտադիտարկում է իրականացրել Երևան քաղաքի «Երևան Սիթի», «ՍԱՍ», «Պարմա», «Կրպակ», «Նոր Զովք» սուպերմարկետների ցանցի խանութներում, ինչպես նաև «Անդրե Րենթեր» ՍՊԸ-ի արտադրամասում՝ ստուգելու իրացվող թռչնամսի անվտանգության ցուցանիշները: Դիտարկման շրջանակներում ներմուծված և տեղական արտադրության թռչնամսի 21 նմուշ հանձնվել է լաբորատոր փորձաքննության: Համաձայն փորձաքննության արդյունքների՝ դրանցից վեցում հայտնաբերվել են խախտումներ. «Նուբարաշենի թռչնաբուծական ֆաբրիկա» ԲԲԸ-ի արտադրության թարմ հավը (21.10.2015թ.), «Սարատովի թռչնաֆաբրիկա» ՍՊԸ-ի արտադրության սառեցված հավի բդիկը (ներմուծող «Ամսա Իմեքս» ՍՊԸ, 17.06.2015թ.) և «Կուռնիկով» ՍՊԸ-ի արտադրության սառեցված հավը (ներմուծող «Ամսա Իմեքս» ՍՊԸ, 14.07.2015թ.), «Անդրե Րենթեր» ՍՊԸ-ի արտադրության պաղեցված «Շուշի» հավը (19.10.2015թ.), «Ագրոթեքինվեստ» ՍՊԸ-ի արտադրության «Լուսակերտ» հավի թևը (14.10.2015թ.) մանրէաբանական ցուցանիշներով, իսկ «Տեղական» ՍՊԸ-ի արտադրության պաղեցված «Տեղական» հավը (21.10.2015թ.) մանրէաբանական և ախտածին սալմոնելա ցուցանիշներով չեն համապատասխանել սահմանված նորմերին ու պահանջներին: Հակաբիոտիկներ չեն հայտնաբերվել: ՀՀ ԳՆ սննդամթերքի անվտանգության պետական ծառայությունը կասեցրել է նշված խմբաքանակների իրացումը: Ծառայությունը շարունակում է ուսումնասիրությունները թռչնամսի իրացման շուկայում՝ հետագծելիության սկզբունքով դիտարկումներ իրականացնելով «Տեղական» ՍՊԸ-ում՝ պարզելու, թե որ փուլում է թռչնամիսը վարակվել սալմոնելայով: Հավելենք, որ Հայաստանի Հանրապետություն մինչև նոյեմբերի 1-ը ներմուծված թռչնամսի 365 խմբաքանակներից լաբորատոր փորձաքննության է ենթարկվել 228-ը, հուլիս ամսվանից սկսած՝ մինչև Հայաստանի Հանրապետության տարածք մտնելը նմուշառվում և փորձաքննության է ենթարկվում ներմուծվող թռչնամսի շուրջ 85 տոկոսը:

ՀՀ ԳՆ սննդամթերքի անվտանգության պետական ծառայություն

Այսօր՝ նոյեմբերի 9-ին, գողություներ են տեղի ունեցել Արարատի մարզում: Ժամը 00:30-ի սահմաններում Գետազատ գյուղի բնակիչ, 50-ամյա Շիրին Կայմազովը կեսգիշերին կնոջ հետ վերադառնալով տուն՝ նկատել է, որ տունն ամբողջովին տակնուվրա է արված ու թալանված:

Ինչպես նշված գյուղից հայտնում է ֆոտոլրագրող Գագիկ Շամշյանը, ամուսինները նոյեմբերի 8-ին, ժամը 17:30 մինչև 23:30-ն ընկած ժամանակահատվածում գյուղում մասնակցելիս են եղել հարսանեկան արարողության: Սովորականի նման երեկոյան փակել են տան դռներն ու լուսամուտները և մեկնել են հարսանեկան արարողությանը մասնակցելու:

Ֆոտոլրագրողի հետ զրույցում ամուսիններն ասում էին. «Գողը կամ գողերը տուն են մտել պատուհանի երկաթյա ճաղավանդակը կոտրելուց հետո: Սենյակներն ամբողջովին տակնուվրա են արել՝ իրենց հետ տանելով 750 եվրո, 50 հազար դրամ: Զգեստապահարանից հափշտակել են ոսկյա զարդեր: Անգամ իրենց սև գործն անելու ժամանակ այլ սենյակներն են տակնուվրա արել՝ հավանաբար մտածելով, որ այնտեղ ել կլինեն գումար, ոսկյա, արծաթյա թանկարժեք իրեր»:

Ֆոտոլրագրողի տեղեկություններով՝ հանցագործ ճիվաղներն ընդհանուր առմամբ ամուսիններին պատճառել են 2 մլն դրամի վնաս:

Գյուղացիենրը ֆոտոլրագրողի հետ զրույցում զայրացած ու արդարացիորեն ասում էին. «Տարիներ առաջ ամուսիններ տունն էլի ենթարկվել էր թալանի ու մինչև այսօր Արտաշատի ոստիկանները հանցագործությունը չեն բացահայտել: Հարուցված քրեական գործն էլ, չգիտես ինչու, քննիչի կողմից հանցակազմի բացակայության պատճառով գցել են արխիվ: Եթե էդ գողությունը բացահայտեին, ապա այսօրվա դեպքն էլ տեղի չէր ունենա, ինչպես նաև վերջին 1.5 ամսվա ընթացքում ևս 2 նմանատիպ գողություն, որը տեղի է ունեցել նույն գյուղում»:

Երեկ նաև ժամը 01:00-ի սահմաններում նույն գյուղի բնակիչ, 62-ամյա Վազիզ Համզոյանը, ով նույնպես մասնակցելիս է եղել նույն հարսանեկան արարողությանը, կեսգիշերին գալով տուն՝ հայտնաբերում է այն ամբողջովին թալանված: Նույն ձեռագիրն է, որում կան Շ. Կայմազովի տան դեպքում:

Վ. Համզոյանի տանից ճիվաղը կան ճիվաղները տան ննջասենյակի զգեստապահարանից գողացել են ոսկյա զարդեր, որը կազմում է մոտ 370 հազար դրամ, իսկ նյութական վնասը կազմում է մոտ 450 հազար դրամ:

1,5 ամիս առաջ էլ նույն ձևով թալանել են Վ. Համզոյանի եղբոր՝ նույն գյուղի բնակիչ Ազիզ Համզոյանի բնակարանը: Ստահակը կամ ստահակները այս դեպքում Ա. Համոզյանի բնակարանից թալանել են մոտ 12 հազար դոլարի ոսկյա ու արծաթյա իրեր, 2 մլն 280 հազար դրամ, 2050 եվրո, իր և կնոջ ոսկյա զարդերը: Այս դեպքն էլ նախորդ դեպքերի նման չի բացահատվել:

Ո՞վ է այդ առեղծվածային գողությունների հեղինակը կամ հեղինակները, դրա պատասխանը պետք է տան ոստիկանության Արտաշատի բաժինն ու Հայաստանի քննչական կոմիտեի Արարատի մարզային քննչական վարչության Արտաշատի քննչական բաժնի քննիչները, սակայն նրանք, ըստ գյուղացիների պատմածի, նմանատիպ դեպքերից հետո գալիս են հանցագործությունների վայր, մատնաետքերն են վերցնում, գրանցում են՝ ոնց են մտել տներ, ինչ են տարել ու ամեն անգամ ասում են, թե՝ ժողովուրդ ջան, չմտածեք, գողի … օրը 40 օր է, կբռնենք, բայց ըտենց 40 օրեր ա, մաշացնում ենք, իսկ հետո ականատես ենք լինում հերթական գողությանը: «Հեռուստատեսությամբ անընդհատ ասում են, թե Հայաստանն ապահով երկիր է, դուռ ու լուսամուտը բաց կարաք հանգիստ քնեք: Հիմա մենք չենք, դուք եք՝ ի՞նչ անենք: 1,5 ամսում գյուղում 3-րդ եզդի ազգաբնակչի տունն են թալանում: Էլի փառք ենք տալիս Աստծուն, որ հանցագործը կամ հանցագործները մյուս գյուղերում բնակվող մեր հայրենակիցների օրը չեն գցել»,-ասացին նրանք՝ նկատի ունենալով վերջին 1 ամսում մի քանի եզդի ընտանիքների նկատմամբ դիմակավորված ճիվաղների կողմից ավազակային հարձակումները, երբ ստահակները թալանելուց առաջ դաժան ծեծի էին ենթարկել ամուսիններին:

Գ. Շամշյանի տեղեկություններով՝ փաստի առթիվ Արտաշատի քննչական բաժնում գողության հատկանիշներով քրեական գործ է հարուցվել, իսկ հանցագործությունը կբացահայտվի, թե ոչ, դեռևս պարզ չէ:

shamshyan.com

Հայ Ազգային Կոնգրեսը հայտարարություն է տարածել` պահանջելով եթերում հավասար իրավունքներ «Այո»-ի և «Ոչ»-ի համար:

«Եռանկյունի» հաղորդումը, որը հեռարձակում է Հանրային հեռուստատեսությունը եւ որը  վարում է ՀՀ կրթության եւ գիտության նախարար Արմեն Աշոտյանը, ՀԱԿ-ը ծաղր է համարում քարոզչության հավասարության սկզբունքի նկատմամբ:

«Ազգային ժողովում Հանրային հեռուստառադիոընկերության խորհրդի հաշվետվության քննարկման ժամանակ Հայ Ազգային Կոնգրեսը դիմեց այդ խորհրդի տնօրենին՝ հանրաքվեի քարոզարշավի շրջանում բանավիճային մի հաղորդաշար կազմակերպելու առաջարկով, որում հավասար պայմաններ ապահովված կլինի «Այո»-ի և «Ոչ»-ի քարոզչության համար:
Հանրային հեռուստատեսությունում քարոզչության հենց առաջին օրը բացված «Եռանկյունի» հաղորդաշարը ծաղր է քարոզչության հավասարության սկզբունքի նկատմամբ։ Այդ հաղորդաշարը վարում է ոչ այլ ոք, քան իշխող կուսակցության փոխնախագահ, կրթության և գիտության նախարար Արմեն Աշոտյանը։ Սա քիչ է, այդ հաղորդաշարի համար նաև հավաքվել է կողմնակալ լսարան՝ հաղորդման ժամանակ ընդդիմության վրա հաղորդավարի հարձակումներին ծափահարելու համար։ Ակնհայտ է, որ իշխող ռեժիմը վախենում է հանրային հեռուստատեսությամբ «Այո»-ի և «Ոչ»-ի համար հավասար պայմաններով բանավեճի կազմակերպումից։ Աշխարհում գոյություն չունի դեմոկրատական երկիր, որում հնարավոր լիներ, որ հանրային (կամ անգամ մասնավոր) հեռուստատեսությունում բանավեճի վարողի դերում լիներ ոչ թե անաչառ և անկողմնակալ լրագրող, այլ իշխող կուսակցության ղեկավարներից մեկը։ Այս ամենը շահերի ակնհայտ բախում է պարունակում և ցույց է տալիս ռեժիմի պատկերացումները ժողովրդավարության մասին։
Սահմանադրական դատարանի նախագահ Գագիկ Հարությունյանի՝ սահմանադրության փոփոխման հանձնաժողովի նախագահ դառնալուց և դրա քարոզչության մեջ ակտիվ ներգրավումից հետո սա երկրորդ օրինակն է, որ ցուցադրում է ռեժիմի արհամարանքը ժողովրդավարության և ազատ խոսքի տարրական սկզբունքների նկատմամբ, ինչպես նաև ամեն գնով Սահմանադրությունը փոխելու գերշահագրգռությունը։ Սա նաև ևս մեկ անգամ մատնում է իշխանությունների ստախոսությունն ու խաբեբայությունը՝ թե Սահմանադրությունը փոխվում է հանուն Հայաստանի ու նրա ժողովրդի բարեկեցության։
Հայ ազգային կոնգրեսը պահանջում է իշխանություններից անմիջապես հրաժարվել սահմանդրական հանրաքվեի լեգիտիմությունը խարխլող այս հերթական քայլից և ստեղծել հանրային բանավեճի այնպիսի ձեւաչափ, որը կվարեն չեզոք և անկողմնակալ դիրքով պրոֆեսիոնալները և կապահովվի լսարանի հրավիրման հավասար իրավունքները «Այո»-ի և «Ոչ»-ի կողմնակիցների համար»։

SHAMSHYAN.com-ի տեղեկություններով` երեկ՝ նոյեմբերի 6-ին, ճանապարհային ոստիկաններն ու Իջևանի հիվանդանոցի բժիշկները հրաշք են գործել: Ինչպես հայտնում է ֆոտոլրագրող Գագիկ Շամշյանը, կեսօրին ճանապարհային ոստիկանության 2-րդ սպայական գումարտակի 4-րդ վաշտի հրամանատարի տեղակալ Կարեն Մատինյանը Տավուշի մարզի Խաշթառակ գյուղում ծառայություն կատարելու ժամանակ նկատել է, որ մի կին անգհանգիստ և լացակումած օգնություն է խնդրում քաղաքացիներից: ՃՈ վաշտի հրամանատարի տեղակալը կանգնեցնում է իր ծառայողական ավտոմեքենան և կինը մոտենում է նրան ու ասում, որ անչափահաս երեխան ընկել է իրեց տան բակի լողավազանի մեջ և ինքը անզոր է երեխային փրկել: Կ. Մատինյանը առանց հապաղելու մտնում է լողավազան, դուրս բերում երեխային, ում անուն ազգանունը` ըստ տեղեկույթունների` Արմեն Մովսիսյան է, ու իր ծառայողական ավտոմեքենայով երեխային տեղափոխում Իջևանի բժշկական կենտրոն: Այնտեղ էլ Հիպոկրատի երդմանն հավատարիմ` երեխայի կյանքը փրկում են տեղի բժիշկները: Այս պահին էլ  երեխան գտնվում է բժիշկների հսկողության տակ:
Shamshyan.com

Սահմանամերձ Տավուշի մարզի Կոթի գյուղի 24-ամյա բնակիչ Մհեր Գյանջալյանը մոտ քսաներեք օր կոմայում գտնվելուց հետո գիտակցության է եկել։ Այս մասին NEWS.am-ին հայտնեց «Արմենիա» հանրապետական բժշկական կենտրոնի Վերակենդանացման բաժանմունքի վարիչ Սուրեն Մակարյանը: «Գիտակցությունը տեղն է արդեն, բայց ընդհանուր առմամբ վիճակը շարունակում է ծանր մնալ»,-ասաց Սուրեն Մակարյանը: Նշենք, որ Մհեր Գյանջալյանը հոկտեմբերի 14-ին շմոլ գազից թունավորմամբ մահամերձ վիճակում տեղափոխվել էր «Արմենիա» հանրապետական բժշկական կենտրոնի Թունաբանական բաժանմունք, ավելի ուշ Գյանջալյանը տեղափոխվել էր Վերակենդանացման բաժանմունք: Ըստ բժիշկի՝ Մհեր Գյանջալյանը շմոլ գազից թունավորվելով՝ քնած ժամանակ մահճակալից աջ ձեռքի վրա ընկել և ծանր տրավմա է ստացել։