Օրերս կաշառք վերցնելու համար ձերբակալվել է Երևանի քաղաքապետարանի առևտրի և սպասարկման վարչության գլխավոր մասնագետ Կարեն Միքայելյանը, գրում է «Հրապարակ»-ը: Ոստիկանության  հանցավորության դեմ պայքարի գլխավոր վարչության աշխատակիցները նրան բռնել են 2 հազար 500 դոլար կաշառք վերցնելու պահին: Վերջինս այդ գումարով փորձել է օրինականացնել Գ. Էմին փողոցում գտնվող մի ապօրինի կառույց: Թերթը հիշեցնում է, որ ընթացիկ տարում սա երկրորդ նման դեպքն է քաղաքապետարանում: Մոտ մեկ ամիս առաջ՝ կաշառք ստանալու պահին ձերբակալվել էր քաղաքապետարանի աշխատակազմի և ճարտարապետության ու քաղաքաշինության վարչության բաժնի պետի ժամանակավոր պաշտոնակատար  Արթուր Ստեփանոսյանը: Ինչպես այն ժամանակ, այնպես էլ երեկ, թերթի թղթակցի հետ զրույցում, քաղաքապետի մամուլի քարտուղար Շուշան Սարդարյանն ասել էր, թե դատապարտում են այդ արարքը, և մեղավորներն օրենքով սահմանված կարգով կստանան իրենց պատիժը:

Հայաստանում վաճառվող սուրճի մանրածախ գինը մոտ 20 տոկոսով թանկացել է, տեղեկացնում է «ՀԺ»-ն և հավելում՝ չնայած գները 10 օր առաջ են սկսել բարձրանալ, բայց խանութներում նոր է արտահայտվում։ 100 գրամ սուրճի միջինը թանկացել է 50-60 դրամով։

Ներկրողների խոսքով, արդեն մոտ մեկ ամիս է միջազգային շուկայում սուրճի գինը պարբերաբար բարձրանում է։ Գների բարձրացման պատճառներն առայժմ հայտնի չեն, և երաշխիք չկա, որ չի շարունակվի բարձրանալ։ Սուրճ արտադրող երկրներում բերքահավաքը նոր է սկսվել։ Արդեն իսկ հայտնի է, որ միջին և փոքր չափի տեսակի սուրճերի բերքի հետ կապված որևէ խնդիր չկա, և դրանց ծավալներն անցած տարվան չեն զիջում, բայց, միևնույն է, գները բարձրանում են։ Հայաստան սուրճ ներկրող ընկերություններն արդեն սպառել են էժան ներկրած խմբաքանակների պաշարները և այժմ սկսել են վաճառել նոր գներով ներկրած ապրանքը, գրում է թերթը։

Սայաթին նոր գործ են տվել

ՀՀ ոստիկանության հասարակայնության հետ կապերի և լրատվության վարչության պետ Սայաթ Շիրինյանին, որը մեկ տարի առաջ ազատվել էր իր պաշտոնից և մնացել ոստիկանության կադրերի տրամադրության տակ, նոր աշխատանք են տվել, գրում է «ՀԺ»-ն և հիշեցնում, որ Շիրինյանը հանրությանն առավել լավ հայտնի է մարտի 1-ի իրադարձություններից հետո իր արած հայտարարություններով: Մարտի 1-ի վերաբերյալ սուտ տեղեկությունների մի զգալի մասը, որոնք հետագայում հերքվել են, հրապարակվել են հենց նրա շուրթերով: Շիրինյանն արդեն մոտ մեկ ամիս է աշխատում է Սերժ Սարգսյանի աշխատակազմին կից ստեղծված հանրային կապերի և տեղեկատվության կենտրոնում՝ որպես փորձագետ: Այս տեղեկությունը թերթի թղթակցի հետ զրույցում հաստատել է նաև նշված կենտրոնի տնօրեն Արա Սաղաթելյանը:

Կարինեին կփոխարինի Սոնա՞ն

Թերթի տեղեկություններով, անցած շաբաթ «իր դիմումի համաձայն» պաշտոնանկ արված Պետական գույքի կառավարման  վարչության պետ Կարինե Կիրակոսյանին այդ պաշտոնում փոխարինելու է ներկայումս ֆինանսների նախարարության ֆինանսական վերահսկողության տեսչության պետ Սոնա  Դարբինյանը: Ըստ թերթի աղբյուրների, ՊԳԿ  վարչության պետի  պարտականությունները ներկայումս ոչ ոք չի կատարում` նշանակված չէ ժամանակավոր պաշտոնակատար, և  տեղակալներից ոչ մեկին չի տրվել համապատասխան  լիազորություն:

Հայաստանի իշխանական շրջանակին մոտ կանգնած «Ժամանակ»-ի աղբյուրները հայտնում են, որ Հայաստանում Իրանի դեսպանատունը ՀՀ նախագահի աշխատակազմին տեղեկացրել է, որ հունիսի 6-ին Երևան ժամանող Իրանի նախագահ Մահմուդ Ահմադինեժադը ցանկություն ունի հանդիպելու ՀՀ երկրորդ նախագահ Ռոբերտ Քոչարյանին:

Ահմադինեժադի ցանկության մասին Իրանի դեսպանն արդեն հայտնել է նաև Ռոբերտ Քոչարյանի գրասենյակին: Ըստ թերթի աղբյուրների, այս օրերին ՀՀ իշխանությունները փորձելու են ամեն ինչ անել՝ Ահմադինեժադի օրակարգից Ռ. Քոչարյանի հետ նախատեսված հանդիպումը հանելու համար, սակայն դա կարծես նրանց չի հաջողվելու:

ՉԻ»-ի տեղեկություններով, ՀՀԿ-ական, Երևանի նախկին քաղաքապետ Գագիկ Բեգլարյանն այս օրերին «երկխոսում» է իշխանությունների, ավելի կոնկրետ՝ Սերժ Սարգսյանի հետ։ Ըստ շրջող խոսակցությունների՝ Գագիկ Բեգլարյանը փորձել է Սերժ Սարգսյանին հասկացնել, որ ինքն այնքան էլ դեմ չի լինի առաջիկայում կայանալիք ընտրություններին (հերթական կամ արտահերթ՝ կարևոր չէ) մասնակցել համամասնական ընտրակարգով, այսինքն՝ ցուցակով։ Եվ քանի որ Գագիկ Բեգլարյանը դեռևս չի լքել Հանրապետականի շարքերը, ուստի ՀՀԿ ցուցակով ԱԺ պատգամավոր դառնալու հավակնություն, բնականաբար, կարող է ցուցաբերել և ցուցաբերել է։ Սակայն, թերթի տեղեկություններով, Սերժ Սարգսյանն այնքան էլ հակված չէ Գագիկ Բեգլարյանին ցուցակով պատգամավոր դարձնել։ Հակառակը, վերջինս խորհուրդ է տվել Բեգլարյանին՝ մասնակցել մեծամասնական ընտրակարգով և առաջադրվել Կենտրոն համայնքն ընդգրկող տեղամասերից մեկում։ Սակայն, ըստ թերթի, Սերժ Սարգսյանը  այս «խորհուրդը» `Բեգլարյանին տեսնել մեծամասնական  ընտրակարգով  առաջադրված, այնքան էլ անկեղծ չէ: Խոսակցություններ կան, որ Սերժ Սարգսյանն այսպիսով ուզում է փակել Գագիկ Բեգլարյանի` քաղաքական գործընթացների վրա ազդեցություն  ունենալու հարցը: Թերթը գրում է, որ ըստ իրենց հասած լուրերի, մեծամասնական թեկնածու Բեգլարյանի դեմ ակտիվորեն աշխատելու է հենց Սերժ Սարգսյանը` նրան չթողնելով որևէ կերպ հավաքել պատգամավորի համար անհրաժեշտ քվեները: Արդյունքում` Գագիկ Բեգլարյանը չի ընտրվելու, իսկ Սերժ Սարգսյանը և՛ վերջնականապես ազատվելու է նրանից, և՛ «ձև է բռնելու», թե ապահովել է ազատ, արդար ու թափանցիկ ընտրությունների անցկացումը:

Թերթի խմբագիրը գրում է. «Ընդդիմությունը համարում է, որ իր երեք հիմնական պահանջները կատարվել են և, իր ասելով, պայքարելու է միայն մի բանի՝ արտահերթ նախագահական ընտրությունների համար։ Այդ գաղափարն ինձ, ճիշտն ասած, դուր չի գալիս։ Նախ՝ ինձ խոցելի է թվում ընդդիմության այն թեզը, թե արտահերթ ընտրություններն ավելի արդար են անցնելու, քան հերթականները։ 20 տարում ամենաանարդար ընտրություններն անց են կացվել արտահերթ՝ 98 թվականին, երբ իշխանությունը (այդ թվում՝ ՀՀՇ-ական նոմենկլատուրան) ամեն ինչ արել է, որպեսզի ընտրողների բացարձակ մեծամասնության համակրանքը վայելող Կարեն Դեմիրճյանը չդառնա նախագահ։ Այնուհետև՝ բացարձակապես պարզ չէ, թե ինչու է նախապատվությունը տրվում նախագահական ընտրություններին, երբ գործող Սահմանադրությամբ նախագահը չափազանց կաշկանդված կլինի, եթե խորհրդարանում մեծամասնություն չունենա։ Հետևաբար, ԱԺ ընտրություններն ավելի կարևոր են։ Վերջապես, եթե նպատակը հանդարտ, անցնցում իշխանափոխությունն է, ապա արտահերթ ընտրություններն արդեն իսկ ցնցում են»։

Օրերս Կենտրոն և Նորք-Մարաշ վարչական շրջանների ընդհանուր իրավասության դատարանը 15 տարվա ազատազրկման դատապարտեց  ՀՀ մաքսային կոմիտեի նախկին նախագահ Արմեն Ավետիսյանի տան կողոպուտը կազմակերպելու մեջ մեղադրվող գործարար, «Կոշիկի քաղաք» խանութների ցանցի սեփականատեր Արա Կարապետյանին:

Գործարարի փաստաբանները, ըստ «Հրապարակ»-ի, համոզված են, որ վճիռն անօրինական է, և պատրաստվում են այն բողոքերկել: Երեկ էլ Արա Կարապետյանի բարեկամներն ու հարազատներն էին հավաքվել նախագահականի մոտ և բողոքում էին դատական պրոցեսի ժամանակ կատարված անօրինականությունների դեմ: «Մենք պահանջում ենք հաշվի առնել այն ապացույցները, որոնք մենք ներկայացրել էինք դատարանին, և դատարանը գնահատման չի արժանացրել»,-ասել է փաստաբան Լուսինե Գրիգորյանը: Նրան և Արա Կարապետյանի հարազատներից մի քանիսին նախագահի աշխատակազմի քաղաքացիների ընդունելության և նամակների բաժնում ընդունեցին և, խնդիրը լսելով, խորհուրդ տվեցին` եթե գործում կեղծիքներ են տեսնում, անհրաժեշտ է նամակում գրել և հիմնավորել այդ թերությունները, ինչպես նաև կցել անհրաժեշտ փաստաթղթեր, որից հետո նախագահականից կպատասխանեն:

Մեր թերթի  տեղեկություններով, վերջին երկու ամիսներին խիստ լարվել են դատական համակարգի ղեկավարության և ՀՀ գլխավոր դատախազ Աղվան Հովսեփյանի հարաբերությունները: Դատավորները փորձում են հասնել Հավսեփյանի պաշտոնանկությանը: «Միայն ընթացիկ շաբաթում, որպես Հովսեփյանի բողոքի «ակցիա» դատավորները 2 մեղադրական եզրակացություն են «մերժել»:

Մի դեպքում Շենգավիթի վարչական շրջանի ընդհանուր իրավասության դատարանն է արդարացման դատավճիռ կայացրել, իսկ վերաքննիչ քրեական դատարանն էլ մեկ այլ գործով մեղադրական դատավճիռը բեկանել և ուղարկել է նոր քննության: Մեր տեղեկություններով, դատավորների կողմից Հովսեփյանի դեմ սկսված արշավի թիկունքում կանգնած է գլխավոր դատախազի տեղակալ Գևորգ Կոստանյանը, որը սակայն, աշխատում է մնալ աննկատ, ձևացնելով, թե ինքը ոչ մի առնչություն չունի այդ ամենի հետ, պարզապես Հովսեփյանն այլևս ի վիճակի չէ վերահսկել դատավորներին:

«Ժամանակ»-ը զրուցել է համաներմամբ ազատ արձակված Սասուն Միքայելյանի հետ: Ներկայացնում ենք մի հատված զրույցից:

Գաղտնիք չէ, որ Դուք քաղաքական գործընթացներից զատ, Սերժ Սարգսյանի հետ անձնապես մտերիմ հարաբերություններ ունեք: Ձեր անձնական հարաբերություններում սև բծեր կա՞ն, թե՞ դրանք կվերականգնվեն:

Իմ և Սերժ Սարգսյանի միջև երբեք սև բծեր չեն եղել և չեն էլ կարող լինել, որովհետև ես և Սերժ Սարգսյանը եղել ենք մարտական ընկերներ: Եկեք այս ամենը երկու հարթության վրա դնենք: Ես և Սերժ Սարգսյանը եղել ենք մարտական ընկերներ, պատերազմի դաշտում ունեցել ենք մեկ թշնամի և պայքարել ենք թշնամու դեմ: Մարտական ընկերները երբեք չեն բաժանվում: Իսկ եթե գանք քաղաքական դաշտ, ապա քաղաքական հարաբերությունների մեջ մենք չենք կարողացել համագործակցել: Ես ասել եմ այն, ինչ ասել եմ երեք տարի առաջ` լինելով «Հանրապետական» կուսակցության անդամ: Ոչ մի բան չի փոխվում իմ անձնական հայացքների մեջ: Այս ընթացքում որոշ մարդիկ ասում էին` Միքայելյան Սասունը դավաճանել է Սերժ Սարգսյանին: Հիմա ես առաջին անգամ հայտարարություն եմ անում. ես Սերժ Սարգսյանի վարչապետ եղած ժամանակ իր աշխատասենյակում ասել եմ, եթե նման մարդկանց հետ գնաս ընտրությունների` ես չեմ գա քո հետ նախագահական ընտրություններին: Ավելին` եթե Սերժ Սարգսյանը այս տարիների ընթացքում երկրում ընդհանուր ներքաղաքական, սոցիալ-տնտեսական վիճակը կարգավորած լիներ` ես գոռոզ տղա չեմ, ես ներողություն կխնդրեի իմ ընկերոջից: Բայց այն, ինչ ասում էի 3 տարի առաջ, այսօր կատարվեց: Հիմա մարդիկ թող մտածեն` ումից պետք է ներողություն խնդրեն: Ե՞ս պետք է ներողություն խնդրեմ, թե՞ «Հանրապետական» կուսակցությունը:

Կպահանջե՞ք Սերժ Սարգսյանի հրաժարականը:

Ինչի՞ համար Սերժ Սարգսյանի հրաժարականը պահանջեմ: Կոնգրեսը կորոշի:

Առաջիկա խորհրդարանական ընտրություններում առաջադրելո՞ւ եք ձեր թեկնածությունը:

Եթե իմանամ երբ է առաջիկա խորհրդարանական ընտրությունները` կասեմ: Նկատի ունեմ արտահերթ և հերթական ընտրությունների հավանականությունը:

… Քաղաքական գործընթացները հնարավոր է հանգեցնեն նրան, որ Ղարաբաղի ազատազրկված տարածքները հետ վերադարձվեն: Դուք ի՞նչ դիրքորոշում ունեք այս հարցում:

Ես կռվող տղա եմ և ոչ մի տարածք չունեմ վերադարձնելու` անկախ քաղաքական հայացքներից: Ես եղել եմ զինվոր, հետագայում նաև քաղաքական գործիչ, սակայն իմ քաղաքականության մեջ միշտ հոգի եմ դրել: Ես չեմ կարող ազատազրկված տարածքները հետ վերադարձնել: Չեմ էլ ժխտում, որ ընդհանուր ներքաղաքական վիճակում ամեն ինչ հնարավոր է:

Իսկ եթե Կոնգրեսն էլ համաձայնի տարածքները վերադարձնելո՞ւն:

Ես վերադարձնելու տարածք չունեմ: Ես զինվոր եմ: Ես տարածքներ եմ գրավել: Կներեք` չեմ գրավել, ազատագրել եմ:

«Ժամանակին այսպիսի մի շատ ճիշտ ձևակերպում կար՝ ով իրական քաղբանտարկյալ է, նա հրաժարվում է բոլոր տեսակի ներումներից ու համաներումից», հայտարարել է դաշնակցական Արմեն Ռուստամյանը։

«ՉԻ» — Մեր ջերմ ողջույնները Վահան Հովհաննիսյանին և դաշնակցական մյուս ընկերներին։ Եթե հիշում եք՝ 1998-ին նրանք բանտերից ազատվեցին «իրավիճակի փոփոխության պատճառով», և որևէ մեկը չբողոքեց այդ ձևակերպման դեմ։ Այսինքն՝ նրանք ընդունեցին, որ քրեական հանցագործներ են եղել (ըստ պրն Ռուստամյանի տրամաբանության)։

Բայց սա դեռ մի կողմ թողնենք։ Ի՞նչ է տեղի ունեցել Հայաստանում։ Ընդդիմության մի շարք ներկայացուցիչներ հայտնվել են բանտերում, հետո այդ նույն ընդիմության պայքարի շնորհիվ իշխանությունները ստիպված են եղել նրանց ազատ արձակել, ու բանից պարզվում է՝ քաղբանտարկյալները պիտի չօգտվեին այդ հնարավորությունից. պիտի զոռով մնային բանտախցերում ու այնտեղից շարունակեին պայքարը։

Չէ, մենք հասկանում ենք, որ ընկ Ռուստամյանն անպայման ուզում է ինչ-որ ձևով վնասել քաղբանտարկյալներին, բայց մեր մեջ ասած՝ կարող էր և գոնե մի քանի օրով զսպել իրեն։ Չնայած՝ ընդդիմության հանդեպ «թույն շնչելը» դաշնակների հիմնական զբաղմունքն է, այնպես որ՝ ահագին զսպել են իրենց։

Երեկ, ըստ թերթի, Սերժ Սարգսյանը ելույթ է ունեցել Առևտրաարդյունաբերական պալատի 4-րդ համագումարում։ Նա թվարկել է կառավարության ձեռնարկած մի քանի քայլեր՝ հարկային և մաքսային ոլորտի փոփոխությունները, գերավճարների խնդրի լուծումը, ազատ տնտեսական գոտիների ստեղծման սկիզբը, գործարար միջավայրի «կտրուկ» բարելավումը և այլն։ Խոսել է նաև տեղական արտադրության խթանման մասին. «Մեր բոլորի գործունեության առաջնային նպատակն է, որը, իհարկե, շատ ավելի աշխատատար է, բայց մենք ծույլ ժողովուրդ չենք»։ Նա անընդունելի է համարել, երբ գործարարը նստում-մտածում է հարկերից խուսափելու մասին կամ չարաշահում է իր գերիշխող դիրքը՝ շուկաներում գերշահույթ ստանալու նպատակով։ (Տեսնես՝ ովքե՞ր են այդ «զզվելի ներկրողները», որոնց չի ճանաչում։ Հուսով ենք՝ մանր ու մեծ ընկերները չեն նեղանա, և ամեն մեկը կմտածի, թե ակնարկն իր մասին չէր։ Եվ առանց կատակի՝ պետք է սպասել, որ տուժողներ կլինեն. չմոռանանք, որ ոստիկանության մասին ելույթին հետևեց Հովհաննես Թամամյանի ձերբակալությունը)։

Ամեն դեպքում, այս ելույթից մինչև ՀԱԿ-ի առաջադրած սոցիալ-տնտեսական բլոկի պահանջների կատարում՝ կես քայլ է, կարծում է «Չի»-ն։ Եվ դրանով նաև կմոտենան Սերժ Սարգսյանի «երազած ժամանակները», երբ հնարավոր կլինի՝ «հայ մարդու «տաղանդները» բացահայտվեն ոչ միայն աշխարհի ամենատարբեր երկրներում», այլև Հայաստանը դառնա «մեր ժողովրդի տաղանդները բացահայտելու լավագույն օջախը»։