Սեպտեմբերի 1–ին Ողջաբերդ գյուղի սկզբնամասում հայտնաբերվել էր բռնության հետքերով մարմին, որի անձը պարզվեց մոտ 2 շաբաթ հետո. «Մենք մերոնցով» թերթի խմբագիր Ալվարդ Աբրահամյանն էր։ Ըստ «Հրապարակ»–ի տեղեկությունների՝ կինն ունեցել է մեծ պարտքեր և տարբեր գործարքների մեջ է եղել, ու հավանաբար դա է եղել սպանության պատճառը։
Մահվանից մոտ 20 օր առաջ Աբրահամյանն այցելել է թերթի խմբագրություն։ Պատճառը եղել է «Մենք ու մենք» թերթին կատարված անդրադարձը, որտեղ մեջբերվել էր Ազգային անվտանգության ծառայության հաղորդագրությունն այն մասին, որ «Մենք ու մենք»–ի հետ համագործակցող լրագրող Էլինա Խաչատուրովան շորթում կատարելու մեղադրանքով ձերբակալվել է հուլիսի 30–ին։ Աբրահամյանը «Հրապարակ»–ի խմբագրությունում հայտնել է, որ վաղուց չի խմբագրում «Մենք ու մենք» թերթը։ Ժամանակին ինքն ու Քրիստինե Ավագյանը հիմնել են ՍՊԸ, մեկը եղել է խմբագիր, մյուսը՝ տնօրեն, սակայն ինչ–ինչ պատճառներով նրանց ջրերը նույն առվով չեն հոսել։ Աբրահամյանը հեռացել է և բացել մեկ այլ, բայց շատ նման բովանդակությամբ «Մենք մերոնցով» թերթը։ «Պարզապես ցանկացա ասեմ, որ իմ անունը չկապեք էդ թերթի և այդ միջադեպի հետ»,– ասել էր Աբրահամյանը։

Թերթը գրում է, որ Երեւանի պետական համալսարանում շրջանառվող լուրերի համաձայն` վերջին շաբաթների ընթացքում մեծ քանակությամբ ուսանողներ եւ երիտասարդ դասախոսներ են անդամագրվել  Հայաստանի հանրապետական  կուսակցությանը: «Հիշեցնենք, որ բուհի տարածքում քաղաքական գործունեություն ծավալելը եւ կուսակցական քարոզչությամբ զբաղվելը համարվում է օրենքի կոպիտ խախտում:

«Առավոտի» աղբյուրի փախնցմամբ, կուսակցականացման գործընթացը ԵՊՀ-ում ղեկավարուն է բուհի ուսանողական բաժնի պետ Միհրան Հակոբյանը: Կասկածից վեր է, որ այս ամենի մասին տեղյակ է նաեւ ռեկտոր Արամ Սիմոնյանը, որի հովանավորյալն է հենց հանդիսանում Մ. Հակոբյանը: Մեր ունեցած տեղեկությունների համաձայն`Մ. Հակոբյանը ուսանողական խորհրդի եւ կուսակցական դասախոսների միջոցով ստեղծել է քաղաքական ուղղվածություն ունեցող կազմակերպչական ցանց, որը մի կողմից`օգտագործվում է ռեկտոր Արամ Սիմոնյանի հենարանը ամուր պահելու գործում, մյուս կողմից` ՀՀԿ շարքերը համալրելու արդյունավետ մեխանիզմ է: Այսպիով, Արամ Սիմոնյանի երիտասարդների խումբը ներկայումս ժրաջան աշխատանք է ծավալում ԵՊՀ-ում, եւ մոտ ապագայում մենք ականատես ենք լինելու «դեմքով դեպի կուսակցուուն» ծրագրի հաջորդ փուլերին»,- գրում է «Առավոտ»-ը:

Պետական միջոցները մսխվում են ոչ միայն ոստիկանության համակարգում (և այլուր), դրանք յուրացվում են նաև Պաշտպանության նախարարության համակարգում։ Այո, զինված ուժերում դրանք անցնում են միլիոնի նշաձողը, և սա նորություն չէ ոչ ոքի համար։ Թերթի տեղեկություններով՝ ՀՀ ռազմական ոստիկանությունում կա հարուցված մի քրեական գործ։ Գործը հարուցվել է Պնախարարության վարչության պետերից մեկի՝ ոմն Գևորգյանի վրա, ով զբաղվել է համակարգում իրականացվող շինարարական և տեղաբաշխման աշխատանքների կոորդինացմամբ։

Թերթը հրապարակային հարցեր է ուղղում Պնախարարությանն ու Ռազմական ոստիկանությանը՝ նշելով, որ պատասխանները ստանալուն պես կհամադրեն իրենց ձեռքի տակ գտնվող փաստաթղթերը, ապա հանես կգան նոր հրապարակմամբ՝ փորձելով հասկանալ՝ Դոնբասից Հայաստան քարածուխ և մազութ մտե՞լ է, թե՞ ոչ։

Ուրբաթ օրը կայացած ՀՀԿ խորհրդի նիստին մասնակցել են նաև «նեղացածները»՝ Երևանի նախկին քաղաքապետ Գագիկ Բեգլարյանն ու Սոցապահովության պետական ծառայության նախկին պետ Վազգեն Խաչիկյանը։ Այս դեմքերի մասնակցությունը նիստին, նշանակում է, որ Սերժը ներել է նրանց։ Առաջիկայում քննարկվելու է նրանց որևէ ոլորտում տեղավորելու հարցը։

Թերթը գրում է, որ ԲՀԿ նախագահ Գագիկ Ծառուկյանին պատկանող Երեւանի Մաշտոցի պողոտայի շուկան գնել է ԱԺ պատգամավոր Սամվել Ալեքսանյանը: Այս պահին շուկայում լայնամասշտաբ շինարարություն է ընթանում: «Մեր տեղեկություններով, Սամվել Ալեքսանյանը մտադիր է շուկան դարձնել ամենամեծ Yerevan City-ն»,- գրում է   «Ժամանակ»-ը:

Բուլղարիայի հայոց թեմի նորանշանակ առաջնորդական տեղապահ տեր Աբգար վարդապետ Հովակիմյանը թերթի հետ զրույցում հայտնել է, որ մինչև վերջերս առաջնորդարանի տակ գեյ-ակումբ է գործել։ Եկեղեցական վարչությունն էլ հայր սուրբի մոտ արդարացել է, թե դա «աղվոր դրամ կբերե»։

Թերթը գրում է, որ լավատեղյակ աղբյուրներից հայտնի է դարձել, որ ՀՀ ճանապարհային ոստիկանության նախկին պետ Մարգար Օհանյանը սեպտեմբերի 2-ին կալանավորվելուց անմիջապես հետո տեղափոխվել է ոչ թե «Վարդաշեն», այլ «Երեւան-Կենտրոն» ՔԿՀ։

«Մեր  աղբյուրները փոխանցում են, որ «Երեւան-Կենտրոնում» Օհանյանին տեղավորել են այն նույն խցում, որտեղ գտնվում է ՀՀ ոստիկանության քրեական հետախուզության գլխավոր վարչության նախկին պետ Հովհաննես Թամամյանը։ Այդ նույն՝ երկտեղանոց խցում, ի դեպ, ժամանակին պահվել է «ՀԺ»-ի գլխավոր խմբագիր, նախկին քաղբանտարկյալ Նիկոլ Փաշինյանը», գրում է «Հայկական ժամանակ»-ը:

«Հայկական Ժամանակ» թերթի տեղեկություններով` Ռոբերտ Քոչարյանի՝ Իսակով պողոտայում գտնվող առանձնատանը նրան է այցելել Սերժ Սարգսյանը։ Այղ պատճառով Իսակով պողոտայի այդ հատվածը բավական երկար ժամանակ դժվարանցանելի է եղել։

«Ըստ լուրերի` Քոչարյանը և Սարգսյանը քննարկել են ներքաղաքական վերջին զարգացումների հնարավոր սցենարները։ Այս հանդիպման վերաբերյալ պաշտոնական մեկնաբանություն ստանալու համար նախագահականից մեր թղթակցին առաջարկել Էին գրավոր հարցում ուղարկել, որի պատասխանը, սակայն, երեկ այդպես էլ չստացանք»,- գրում է թերթը: