Թերթը գրում է, որ Կապանի «Դինո գոլդ մայնինգ քամփնի» (ԴԳՄՔ) ընկերության նախկին գլխավոր տնօրեն Ռոբերտ Ֆալլետտան և նրա կինը՝ ընկերության նախկին աշխատակից Ֆարիդա Ֆալլետտան, աշխատավարձի գումարի բռնագանձման պահանջով դիմել են Սյունիքի մարզի ընդհանուր իրավասության դատարան՝ ընդդեմ «Դինո գոլդ մայնինգ քամփնիի»։

«Ֆարիդա Ֆալլետտան ընկերությունից պահանջում է 2011 թվականի հունվար-հունիս ամիսների համար 18 000 կանադական դոլար (առանց հարկերի եւ այլ պարտադիր վճարների), իսկ Ռոբերտ Ֆալլետտան՝ 52 միլիոն ՀՀ դրամ։ Այս տարվա փետրվարի 27-ին տեղեկացրել ենք, որի՝ ԴԳՄՔ սեփականատեր «Դանդի Փրիշս Մեթլզ» (Dandee Precious Metals) կանադական ընկերության գլխավոր գործառնական տնօրեն Ռիկ Հաուզը այցելել էր Կապան եւ մեկ օր անց «Դինո գոլդ մայնինգ քամփնիի» գլխավոր տնօրեն Ռոբերտ Ֆալլետտային ազատել գլխավոր տնօրենի պաշտոնից»,- գրում է «Առավոտ»-ը:

Թերթը գրում է, որ իր հավաստի աղբյուրների փոխանցմամբ` սեպտեմբերի 23-ին վնասազերծված եւ բացահայտված ավազակախմբի անդամներից մեկը` Քյարամ Ամոյանը, «օրենքով գող» կարգվելու ցանկություն ունի:

Տեղեկության համաձայն` Քյարամին այդ հարցում պետք է օգնի նրա սպանված Քեռու` «օրենքով գող» Ճակոյի կապերը:

Թերթը գրում է, որ մի քանի օր առաջ մահացած մորը հուղարկավորելու նպատակով Հայաստան է ժամանել Աժ պատգամավոր, ՀՀԿ-ական Հարություն Փամբուկյանը:

«Երեկ թաղմանը ներկա է գտնվել իշխանական գրեթե ողջ վերնախավը: Չի եղել միայն Սերժ Սարգսյանը, որը բացակայում է հանրապետությունից: Հարություն Փամբուկյանը, որն այժմ Մոսկվայում է ապրում, որոշ տեղեկություններով, որոշել է չվերադառնալ Հայաստան: Թերեւս նա չի մասնակցի նաեւ առաջիկա խորհրդարանական ընտրություններին: Հիշեցնենք, որ Երեւանի քաղաքապետի ընտրություններին Փամբուկյանը ՀՀԿ շտաբի պետն էր»,- գրում է «Հրապարակ»-ը:

Թերթը  գրում է, որ  իր սեպտեմբերի 13 –ի «Պաշտպանության նախարարությունը Դոմբասից քարածուխ է բերել Հայաստան. Հարուցվել է քրեական գործ» վերնագրով մի հրապարակային 6 հարց  ուղղելով պատասխանատուներին: «Հարցերնբ ուղղել էինք , որպեսզի դրանց պատասխանները ստանալուց հետո հանդես գանք առավել ընդգրկուն հրապարակմամբ: Պատասխանները չստացանք:

Փոխարենը հրապարակման հեղինակը ծանուցագիր ստացավ, որով հիավիրվում էր ՀՀ ՊՆ քննչական ծառայություն` թիվ 90154311 քրեական գործով` որպես վկա ցուցմունք տալու: Ի դեպ, այդ գործով արդեն մեկ անձ ձերբակալվել է: Վերջինս ՀՀ պաշտպանության նախարարության բաժնի պետերից մեկն է, ում հետ կապվում է չարաշահումների թեման»,- գրում է «Չորրորդ ինքնիշխանություն»-ը:

Թերթը զրուցել է  Հանրապետություն կուսակցության քաղխորհրդի անդամ, ՆԳ նախկին նախարար Սուրեն Աբրահամյանի հետ: Ներկայացնում ենք հայտված զրույցից:

Կան գնահատականներ, որ Կոնգրեսն ուշացել է վճռական քայլեր անելու համար, եւ ժողովուրդն արդեն հիասթափվել է ու այժմ վճռական քայլերի համար անհրաժեշտ ռեսուրսներ Կոնգրեսն այլեւս չունի: Արդյո՞ք արդարացի են այդ գնահատականները, եւ արդյո՞ք ՀԱԿ-ի ուժերը բավարար են դրված նպատակին հասնելու համար:

— Ես միանշանակ այդ գնահատականի հետ համաձայն չեմ, այդ կարգի  « բայղուշություններ»

մենք շատ ենք լսել` ե՜ւ գարնանը, ե՜ւ ձմռանը, արդեն քանի տարի է մենք այդ  «բայղուշությունները» լսում ենք: Այն մարդիկ, որոնք հանիրավի, պատվիրված կամ չարախնդալով նման գնահատականներ են տալիս` թող իրենք բարի լինեն առկա խնդիրների լուծման ուղղությամբ թեկուզ մի քայլ, մի գործ անել: Մենք մեր առջեւ դրել ենք խնդիրներ եւ համոզված գնում ենք առաջ: Իհարկե, մի օր լավ կլինի, մի օր վայրիվերումներ կլինեն, մարդկանց քանակի հետ կապված որոշակի խնդիրներ կլինեն, բայց այն ուղին, որ մենք ընտրել ենք՝ ցանկանալով կայացնել ժողովրդավարական պետություն, օլիգարխիայի մեջքը կոտրելը, սոցիալական արդարության վերականգնումը, իրավական պետության տարրերի ստեղծումը, միշտ արդիական է, եւ այս հարցերը միշտ եղել են այն վառ ուղեցույցները, որոնց ձգտելու են հազարավոր մարդիկ եւ հասնելու են իրենց նպատակին: Եթե անգամ քաղաքական ընդդիմություն չլիներ՝ հանձինս Հայ ազգային կոնգրեսի, միեւնույն է, այս իշխանական համակարգով այս երկրին ապագա չի սպասվում, եւ այն փոխելը անհրաժեշտ է:

Իսկ արտահերթ ընտրություններ իրականացնելու ժամանակն արդյոք անցած չէ՞:

— Հայ ազգային կոնգրեսը քաղաքական կառույց է եւ երկրում ընթացող բոլոր քաղաքական գործընթացներին ամենաակտիվ մասնակցությունն է ունենում եւ ունենալու է, անգամ եթե մենք գտնում ենք, որ միակ ճիշտ ճանապարհը արտահերթ ընտրություններն են:

Այսինքն՝ եթե չլինեն արտահերթ ընտրություններ, ՀԱԿ-ը կգնա՞ հերթական ընտրությունների:

— Միանշանակ, մենք երկրում ընթացող բոլոր քաղաքական պրոցեսներին մասնակցելու ենք, մեր գերնպատակը ժողովրդին հաճո իշխանություն ձեւավորելն է, իսկ ընտրությունները այդ նպատակին հասնելու համար լոկ միջոց են:

Թերթը զրուցել է «Գառնի Սուրիկի լավաշ» ընկերության սեփականատեր Սուրիկ Հակոբյանի հետ, ում որդին` Արտուշա Հակոբյանը կասկածվում է վնասազերծված բանդայի գործով: Ներկայացնում ենք զրույցից մի հատված.

Ասում են, որ բանդայում իրականում պաշտոնյաների որդիներ են եղել: Դուք տեղյա՞կ չեք, թե ում մասին է խոսքը:

Չէ, ես որտեղի՞ց իմանամ: Ախր, ու՞մ  մասին ասեմ, ո՞ր պաշտոնյայի մասին ասեմ: Մի պաշտոնյա բարեկամ ունենք, մեզ չի ընդառաջում: Այսինքն, ճիշտը առաջ չի տանում, ճիշտը չի մեկնաբանում: Ես ուրիշների հետ ի՞նչ գործ ունեմ: Ես չգիտեմ, բայց լսել եմ, որ պաշտոնյաների տղաներ կային:

Ո՞վ է ձեր պաշտոնյա բարեկամը:

Ալիկ Սարգսյանը:

Ի՞նչ բարեկամ է:

Հորեղբորս տղայի մորաքրոջ տղան է:

Դիմե՞լ եք նրան:

Ես կարամ իրան դիմեմ, ես իրան կարող եմ մոտիկանա՞լ, չեմ կարող, ո՞վ կմիացնի ինձ իրա հետ: Ախր իմ տղան ոչ մի կապ չունի: Տարել են, ասում են` դու ես եղել: Բայց էդ մարդը աշխատող մարդ է, ոչ մի բանի կարիք չունի:

Այդ համատեքստում հատկապես ուշագրավ է մի հանգամանք` կապված Հայաստանի էներգետիկ համակարգի հանդեպ Ֆրանսիայի հետաքրքրության հետ: Ըստ պաշտոնական հաղորդագրության` Սերժ Սարգսյանն ու Ֆիյոնը քննարկել են Հայաստանում նոր ատոմակայանի կառուցման գործընթացում Ֆրանսիայի ներգրավվածության հարցը, ինչի հեռանկարներն ու հնարավորությունները պարզելու համար պատվիրակություն կժամանի Հայաստան և տեղում կծանոթանա նոր ատոմակայանի ծրագրին:

Այդ հանգամանքը հետաքրքրական է ինքնին երկու իմաստով: Նախ` բուն ատոմակայանի կառուցման: Եթե իհարկե, այդ նախագիծն իրականում մեծ բլեֆ չէ, ուրեմն բավական հետաքրքրական է, որ «Ռոսատոմից» բացի, դրանով հետաքրքրվում է նաև Ֆրանսիան: Ինչպես հայտնի է, «Ռոսատոմը» պատրաստակամություն է հայտնել ապահովել նոր ատոմակայանի շինարարության միայն քսան տոկոսի ֆինանսավորումը, ինչը կազմում է մոտ 1 միլիարդ դոլար, հաշվի առնելով, որ նոր ատոմակայանի արժեքը գնահատվում է մոտ 5 միլիարդ դոլար: Հետաքրքիր է, թե ֆինանսավորման ի՞նչ չափաբաժնի պատրաստակամություն կհայտնի Ֆրանսիան, և չի բացառվում, որ նոր ատոմակայանը Հայաստանում լինի էներգաարտադրող բացառիկ օբյեկտ, որը ռուսների ենթակայության կամ տնօրինության տակ չէ:

Դա իսկապես կարող է առնվազն հոգեբանական տնտեսա-քաղաքական շրջադարձային իրողություն լինել Հայաստանում: Եվ հենց այդտեղ էլ տեղի ունեցածի կամ նշմարվող զարգացման երկրորդ հետաքրքրական պահն է: Բանն այն է, որ Հայաստանի էներգետիկ համակարգը ներկայումս ամբողջությամբ տնօրինում է Ռուսաստանը, և արևմտյան ընկերությունները այդ համակարգով վերջին անգամ հետաքրքրվել են գրեթե տասը տարի առաջ, երբ վաճառվում էին բաշխիչ ցանցերը: Դրանք էլ, ի վերջո, բաժին հասան ռուսներին, և այն էլ` ոչ թե մրցութային պայմաններով, այլ ուղղակի վաճառքի միջոցով: Եվ ահա, տասը տարի անց Արևմուտքն` ի դեմս Ֆրանսիայի, համենայնդեպս, հետաքրքրություն է դրսևորում էներգետիկ համակարգի հանդեպ, և Հայաստանի իշխանությունն էլ քննարկում է այդ հարցը Արևմուտքի հետ: Սա ամենևին չի նշանակում, որ վաղը արդեն ռուսների մոնոպոլիան Հայաստանի էներգետիկ համակարգում ավարտվելու է:

Սակայն նկատի ունենալով համակարգի գերռազմավարական նշանակությունը Հայաստանի համար,- ինչպես ցանկացած պետության,- դրա հանդեպ արևմտյան հետաքրքրության բացահայտ և փաստացի բավական կոնկրետ քննարկման տեսքով դրսևորումը իրենից բավական հետաքրքրական միտում է ներկայացնում, որը կարող է ունենալ ուշագրավ շարունակություն թե՛ տնտեսական, թե՛ քաղաքական ռազմավարական ազդեցության իմաստով: Համենայնդեպս, այդ միտման մեջ կարող է նշմարվել Հայաստանի գերկարևոր ռազմավարական համակարգում մեկ պետության մենաշնորհի մայրամուտ, ինչն անկասկած խրախուսելի գործընթաց է, եթե իհարկե, կրկին այդ գործընթացը չբախվի Ռուսաստանի հանդեպ Հայաստանի իշխանության անձնապաստան կամակատարությանը:

Թերթը գրում է, որ ՀՀ բարձրաստիճան ոստիկաններից մեկը, պարզվում է, բավականին լավ հումոր ունի։ «Օրերս այդ անձը եղել է Սյունիքի մարզում, որտեղից այնքան տպավորված է վերաադարձել, որ որոշել է հայկական հեռուստաընկերություններվ ընթացող սերիալների սյուժեն պրոյեկտել այդ տարածաշրջանի քաղաքների վրա՝ հաշվի անելով սերիալների սյուժեների եւ քաղաքների միջեւ եղած ընդհանրությունները՝ թե՛ սոցիալական իմաստով, թե՛ բարոյահոգեբանական մթնոլորտի առումով։ Եվ այսպես՝ ոստիկանը առաջարկում է Սիսիանը վերանվանել «Դժվար ապրուստ», Ղափանը՝ «Ո՞ ւր է իմ տղամարդը», Գորիսը՝ «Ոստիկաններ», Մեղրին՝ «Եզրագծից այն կողմ», Քաջարանը՝ «Կյանքի գինը»։ Մնում է այս ամենի շուրջ համաձայնություն ձեռք բերել տեղի ֆեոդալների հետ։ Համենայնդեպս՝ գաղափարը վատը չէ»,- գրում է «Չորրորդ ինքնիշխանություն»-ը:

Առավոտ թերթի խմբագիրը գրում է. «Ցանկացած երկիր և ցանկացած ժողովուրդ ունի իր «բրենդը»` նյութական կամ հոգևոր մշակույթի երևույթներ, որոնց միջոցով այդ ժողովրդին ճանաչում են աշխարհում: Օրինակ, ֆրանսիացիների Էյֆելյան աշտարակը, շվեյցարական շոկոլադը, ռուսական «մատրյոշկաները» և այլն: Այդ «բրենդներն» ունեն խորության կամ լրջության տարբեր մակարդակ: Աշխարհի հասարակ բնակիչների համար Գերմանիան գուցե նրբերշիկի կամ գարեջրի հետ է ասոցացվում, իսկ զարգացած մարդկանց համար` Գյոթեի: Թե նրբերշիկը և թե մեծ բանաստեղծը այդ երկրի ծնունդ են, և գերմանացիների մի քանի սերունդ ակամա կամ գիտակցաբար նպաստել է նրան, որ իրենց երկիրը ճանաչելի դառնա հենց այս խորհրդանիշներով:
Իսկ ի՞նչ ենք արել մենք՝ հայերս, այդ ուղղությամբ: Բնազդային, ենթագիտակցաբար դրսևորումները մի կողմ թողնենք և դառնանք գիտակցված , նպատակաուղղված ջանքերին: Հայկական կոնյակն, անշուշտ, «բրենդ» է`չնայած այդ խմիչքն արտադրող գործարանի վաճառքի հետևանքով այն փոքր-ինչ խամրեց: Արարատ լեռը, բնականաբար, մեր բրենդն է` որքան էլ թուրքերը դրա դեմ բողոքեն: Չի կապվում բիբլիական այդ սարը թուրքական մշակույթի հետ` չնայած այս պահին գտնվում է թուրքական պետության տարածքում: Բրենդ է, իհարկե, Շառլ Ազնավուրը` Աստված նրան երկար կյանք տա: Աշխարհին մեր ազգը պետք է մատուցել նման պոզիտիվ, հպարտության առարկա հանդիսացող երևույթներով: Ցեղասպանությունը դրանց շարքին չի պատկանում: Այդ աղետալի իրադարձության մասին, իհարկե, արժե խոսել պատեհ առիթներով, արժե մարդկության խիղճը արթուն պահել, որ նա հիշի 20-րդ դարի ոճրագործության մասին: Բայց մեր ցավի մասին իմանալ-չիմանալը չարժե սարքել «թեսթ» ցանկացած օտարերկրացու համար: Դրանով մենք մեզ մի տեսակ նսեմացնում ենք, խեղճուկրակ ենք դարձնում: Այդ արտասահմանցին կարող է շատ լավ ֆուտբոլիստ, երգիչ, գիտնական կամ փաստաբան և, գումարած դրան` պարկեշտ մարդ լինել, բայց ոչ մի բան չիմանալ ցեղասպանության մասին:

Թերթը գրում է, որ Երեւանում գործող հանցավոր խումբը կազմելու եւ ղեկավարելու մեղադրանքով կալանավորված Արտյուշ Հակոբյանի հայրը` «Գառնի Սուրիկի լավաշ» ընկերության ղեկավար Ս. Հակոբյանը ԲՀԿ անդամ է, երկար տարիներ եղել է ԲՀԿ Գառնիի կառույցի նախագահ:

«Այդ մասին երեկ մեզ ասաց հենց ինքը` Ս. Հակոբյանը եւ ավելացրեց, որ իր կուսակիցները զանգահարել են իրեն, հետաքրքրվել են տեղի ունեցածի մասին, սակայն օգնություն չեն առաջարկել»,- գրում է «Հայկական ժանանակ»-ը: