Երեկ թերթին էր զանգել բանդայի գործով կալանավորված 39-ամյա Արման Դալաքյանի մայրը և պնդում էր, որ իր տղան բանդայի անդամ չէ, գլխին սարքում են: «Ո՞րն է նրա մեղքը, որ Գառնու լավաշի տնօրենի միջնեկ տղայի հետ ծանո՞թ է»: Նա պատմել է, որ Արմանը կալանավորվելուց հետո ինքնասպանության փորձ է արել: «Մի քանի հոգով հարձակվել են վրան, այնքան ծեծել, կողեսկրերը ջարդել, վիրահատել են «Էրեբունի» հիվանդանոցում, հետո տարել հոսպիտալ: Վերակենդանացման բաժնում է եղել. հաստ աղիքն է ծակված, թոքն է ծակված»: Ո՞վ է ծեծել: «Քննիչներն են ծեծել, ո՞վ պիտի ծեծեր: Ով տարել է 6-րդ բաժին, նա էլ ծեծել է որդուս՞:

«Չորրորդ ինքնիշխանութուն» թերթի հոդվածագիրը «Հաճախորդների ակտիվացման նոր փուլը» վերնագրով հոդվածում գրում է. «ՀՅԴ-ն ու «Ժառանգությունն» իրենց պահվածքով իշխանություններին ասում են. «ի՞նչ կլինի՝ էս անգամ էլ մեզ խցկեք խորհրդարան, հաստատ պետք կգանք, էդ Կոնգրեսը շառ ա»։ Այ հենց սա է քաղաքական առևտուրը, որով այսօր ինտենսիվորեն զբաղված են այդ երկու «ընդդիմադիր» կուսակցությունները (և ոչ միայն նրանք)։ Այսինքն՝ այս ուժերն առաջիկա ընտրություններում «ստավկա են արել» կոալիցիայի հաղթանակի վրա (շատ ազնիվ դիրքորոշում է ընդդիմադիր ուժերի համար) և հույս ունեն, որ կոալիցիան իրենց կօգնի»։

Հայ ազգային կոնգրեսը երեկ պատասխանեց կոալիցիային, որը երկխոսությունը վերսկսելու Կոնգրեսի առաջարկին ի պատասխան հայտարարել էր, թե վերսկսելու պայմանը շուրջօրյա հանրահավաքները դադարեցնելն է: Կոնգրեսը, ինչպես և սպասվում էր, հայտարարեց, որ հանրահավաքները չի դադարեցնելու:

Ավելին` Կոնգրեսը հայտարարեց նաև, որ դադարեցնում է երկխոսության ակնկալիքը և Հայաստանի ներքաղաքական իրավիճակի միակ ելք դիտարկում ժողովրդական լայն մոբիլիզացիային ուղղված գործընթացը, ակտիվ ջանքերն այդ ուղղությամբ: Կոնգրեսի հայտարարության մեջ նշվում է նաև, թե եթե կոալիցիան ինքը դիմի երկխոսության համար, ապա Կոնգրեսը միայն այդ դեպքում կքննարկի վերսկսելու հարցը: Այդպիսով, ակնհայտ է, որ իրավիճակը մտնում է փակուղի: Փակուղի` այն իմաստով, որ երկու կողմերն էլ ընդունում են մի դիրք, որը նրանց տեղ չի թողնում մերձենալու: Կոալիցիան պայման է դնում շուրջօրյա հանրահավաքների դադարեցում, իսկ Կոնգրեսն էլ չի ընդունում այդ պայմանն ու երկխոսության իմաստը համարում է կորսված:

Բայց առաջին հայացքից լիակատար փակուղի ենթադրող այդ իրավիճակը կարող է շրջվել գլխիվայր: Սակայն դա այն դեպքում, երբ Կոնգրեսի մոտ շուրջօրյա հանրահավաքների ընթացքում քաղաքացիական մոբիլիզացիայի բավարար աստիճան ձևավորելը չստացվի: Այսպես` Կոնգրեսը շուրջօրյա հանրահավաքների որոշակի ժամկետից հետո կհայտարարի, որ դրանք ժամանակավորապես դադարեցնում է և ձեռնամուխ լինում, այսպես ասած, մարզային աշխատանքների, շրջաններում հասարակական պոտենցիալը մոբիլիզացիոն դիրք բերելու, այսպես ասած` նախամոբիլիզացիոն վիճակի հասցնելու և է՛լ ավելի մեծածավալ շուրջօրյա հանրահավաքային ակցիա անելու համար:

Առավել ևս, որ Կոնգրեսի առաջնորդ Տեր-Պետրոսյանը սեպտեմբերի 30-ի իր ելույթում նշել է մոբիլիզացիոն, հասարակական ակտիվությանն ուղղված գործողությունների հնարավոր լայն սպեկտր և ընդդիմության գործունեությունը չի պայմանավորել միայն շուրջօրյա հանրահավաքներով: Երբ շուրջօրյա հանրահավաքները, որպես ակտիվ գործողությունների առաջին փուլ, ժամանակավորապես կհամարեն դադարեցված, իշխանությունը կարող է օգտվել այդ պահից և հայտարարել, որ քանի որ դրանք դադարել են, իրենք Կոնգրեսին առաջարկում են վերադառնալ երկխոսության վերսկսման հարցը քննարկելուն: Կոնգրեսը դա կարող է հանրությանը ներկայացնել որպես վերսկսելու առաջարկ, որ անում է իշխանությունը, ու գնալ այդ քայլին: Ընդ որում` այստեղ որևէ էական նշանակություն չի ունենա, թե ինչքան ժողովուրդ կկարողանա մոբիլիզացնել:

Բանն այն է, որ հենց Կոնգրեսը շուրջօրյա ակցիաները դադարեցնի, իշխանության համար շահեկան կլինի անմիջապես վերսկսել երկխոսությունը, քանի որ դա անելու պարագայում Կոնգրեսը երևի թե առավել տևական ժամանակով կզրկվի մոբիլիզացիոն պոտենցիալից, եթե այդպիսին դեռևս կա: Այստեղ երկակի վիճակում է հայտնվում Կոնգրեսը, քանի որ մի կողմից` երկխոսությունը նրան հնարավորություն է տալիս հանրությանը ներկայացնել իրավիճակը այնպես, որ իշխանությանը դնելով բարդ վիճակում` ստիպել են իրենց հետ նստել երկխոսության, մյուս կողմից էլ` հանրությունն այլևս է՛լ ավելի կարող է չվստահել Կոնգրեսի ռադիկալ և հեղափոխական տոնայնությամբ ելույթներին: Իր հերթին, բավական ռիսկային է իրավիճակը նաև իշխանության համար, քանի որ երկրում իսկապես բարդ սոցիալ-տնտեսական և քաղաքական վիճակ է, ու ըստ էության կայծ է հարկավոր, որ կրակ բռնկվի ժողովրդական տրամադրություններում:

Եվ մտածելը, թե Կոնգրեսի «կայծքարերը» մաշվել են ու այլևս վտանգավոր չեն` կարող է իսկապես ճակատագրական լինել իշխանության համար, և այդ առումով երկխոսությունն իշխանության համար որոշակի երաշխիքային վիճակ է: Այդ իսկ պատճառով իշխանությունը նույնիսկ շահագրգռված պետք է լինի Կոնգրեսին փոխզիջումներ առաջարկելով, որպեսզի վերսկսվի երկխոսությունը: Սակայն այս ամենում, իհարկե, կրկին առաջնային պլան է գալիս և սրությամբ դրվում է հարցը, թե այդ պրոցեսներից ինչ արդյունք է սպասում հասարակությանը: Այստեղ է ամենամտահոգիչը, քանի որ քաղաքական պրոցեսների անարդյունավետությունը ձևավորելու է համընդհանուր ապատիայի մի մթնոլորտ, որը հաղթահարելը չափազանց դժվար կարող է լինել: Սա իսկապես լուրջ, և երևի թե չափազանցություն չի լինի ասել, որ ներկայումս առարկայորեն շոշափվող կամ ուրվագծվող խնդիր է:

Ընդ որում` այդ խնդրի հանդեպ պետք է անտարբեր չլինեն բոլոր այն քաղաքական ուժերը և քաղաքացիական միավորումները, որոնք իրապես մտահոգ են Հայաստանում իրավիճակի որակական փոփոխությամբ և դա են համարում իրենց գործունեության իրական իմաստը: Ապատիայի համընդհանուր խորացումը հարվածելու է բոլորին` անկախ, թե ում սխալի, իներտության կամ անհեռատեսության հետևանքով է դա տեղի ունենում: Քաղաքականության հանդեպ հասարակական վստահության հարցը Հայաստանում ներկայումս դառնում է, թերևս, առավել կարևոր խնդիր, քան իշխանափոխությունն ինքնին:

Օրերս «Սևան» քրեակատարողական հիմնարկում տեսակցության գնացած մի կնոջ հնարամտությունը կռահել են աշխատակիցներն ու առգրավել թմրանյութը։ Նա ցանկացել էր ամուսնուն նվեր անել և դեղահաբերի տեսքով թմրանյութը տեղադրել էր ոչ ավել ոչ պակաս՝ հեշտոցում։

Թերթը  գրում է, որ Երեւևան մտնող ճանապարհների մեծ մասը փակ են, եւ ոստիկանները երթուղայիններին արգելում են մուտք գործել քաղաք: «Երեկ Աշտարակից Երեւան մտնող հատվածում Թալինից եկող երթուղայինի ուղեւորները «Ժամանակ»-ին հայտնեցին, որ միայն վարորդի եւ ոստիկանների երկարատեւ բանակցություններից հետո են նրանք կարողացել հասնել Երեւան:

«Երեք օր է՝ Երեւան եկող ուղեւորներին բերում ենք մինչեւ Աշտարակի Գայի պոստ: Շարժվելուց ուղեւորներին նախապես զգուշացնում ենք, որ կարող է կրկին ճանապարհները փակած լինեն: Համբերությունս հատեց եւ որոշեցի դիմել լրատվամիջոցներին ու այդ մասին տեղեկացրեցի նաեւ ոստիկաններին, ինչից անմիջապես հետո նրանք իրար խառնվեցին եւ մի քանի րոպե խորհրդակցությունից հետո որոշեցին ուղեւորներից ստորագրություն վերցնել, որ նրանք ուսանողներ են: Հա, երթուղայինում 70-ն անց երկու տատիկ էլ կային, նրանք նույնպես ստորագրեցին, որ ուսանողներ են»,- ասաց երթուղայինի վարորդը»,- գրում է «Ժամանակ»-ը:

Թերթի խմբագիրը գրում է. «Հայաստանում ներկայումս ստեղծված իրավիճակը պահանջում է ոչ ստանդարտ, նորարարական մոտեցումներ։ Մասնավորապես, «X, հեռացի՛ր, Y, մոտեցի՛ր, Z, վերադարձի՛ր» շաբլոնային մտածելակերպը պետք է իր տեղը զիջի իրական հասարակական պահանջներին և, եթե ուզեք, պատվերներին, որոնք մի կողմից՝ իրատեսական, մյուս կողմից՝ զուրկ կլինեն բոլոր քաղաքական ուժերին քիչ թե շատ հատուկ երեսպաշտությունից։ Այսօր իշխանության և ընդդիմության կողմից հրամցվող կարգախոսները չունեն այդ գովելի որակները»։

Ալիկ Սարգսյանին սկսել են ակտիվորեն PR անել։ «Հանուն ապագայի» քաղաքացիական նախաձեռնությունը, որի ղեկավարներից է Հանրային խորհրդի պետաիրավական հանձնաժողովի անդամ Լևոն Երզնկյանը, ոստիկանապետին ճանաչել է «Ամսվա մարդ»։ Գտել են, որ Սարգսյանը սեպտեմբերին ամենաարդյունավետ աշխատանք ցուցադրած պետական գերատեսչության ղեկավարն է։ Հավանաբար, նկատի ունեն վերջերս վնասազերծված բանդայի հետ կապված աշխատանքը։

Մեր պաշտոնյաներն ու մեծահարուստները երբեմն տարօրինակ ճաշակ ու սովորույթներ են ունենում։ Ասենք, նրանցից մեկը տուն է կառուցում Ազգային ժողովի շենքի նմանությամբ։ Մյուսը մի ամբողջ գազանանոց է պահում, կազմված վայրի գազաններից։ Երրորդը տան մոտակայքում եկեղեցի է կառուցում, որ թաքուն ապաշխարհի։ Չորրորդը մարդկանց նստացնելուց ազատ ժամերին ծաղիկներ է լուսանկարում։ Իսկ որոշ բարձրաստիճան անձինք ու օլիգարխներ էլ հաճախակի այցելում են աստղագուշակների և բախտ նայողների։ Թերթի տեղեկություններով, աստղերի միջոցով իրեն սպասվող իրադարձությունները պարբերաբար ճշտելու սովորույթ ունի ՀՀ փոխվարչապետ, տարածքային կառավարման նախարար Արմեն Գևորգյանը։

Թերթը գրում է, որ երեկ ընդդիմության նստացույցը սկսվելուց մի քանի ժամ անց ոստիկանները մտել են Ազատության հրապարակին մերձակա բոլոր սրճարանները եւ հրահանգել անմիջապես փակել դրանք։

«Մասնավորապես,  թերթի լրագրողի տեսախցիկը արձանագրել է ոստիկաններին «Ջազվե» սրճարանում, որից անմիջապես հետո սրճարանի տնօրենը, որը մինչ այդ ասում էր, որ իրենք աշխատում են մինչեւ առավոտ, մոտեցել է սրճարանի բոլոր հաճախորդներին եւ հայտարարել, որ իրենք փակվում են, եւ խնդրել է, որ բոլորը հեռանան։ «Ջազվեի» փակվելուց ընդամենը 10 րոպե առաջ էլ փակվել էր «Մեղեդի» սրճարանը», -գրում է «Չորրոդ ինքնիշխանություն»-ը: