Սիբիրյան խոցի դեպքերի տարածումից հետո, երբ հայտնի դարձավ, որ «Անասնաբուժասանիտարիայի, սննդամթերքի անվտանգության, բուսասանիտարիայի ոլորտի ծառայությունների կենտրոն» ՊՈԱԿ-ի թերացումներն են պատճառը, աշխատանքից հեռացվեց տնօրեն Մամիկոն Գասպարյանը։ Սակայն շատ ուշագրավ է նոր նշանակումը։ Այս պաշտոնում ժամանակավոր պաշտոնակատար է նշանակվել Արմեն Ավագյանը, ով երկու անգամ հեռացվել է Սննդի անվտանգության պետական ծառայությունից։

Ընդ որում, մեկ անգամ անվստահություն հայտնելով՝ հեռացրել է նախկին ղեկավար, ներկայումս գյուղնախարարի առաջին տեղակալ, անասնաբուժասանիտարիայի ու սննդամթերքի անվտանգության կուրատոր Գրիշա Բաղյանը, իսկ երկրորդ անգամ՝ երեք նկատողությամբ, հեռացրել է ներկայիս ղեկավար Աբրամ Բախչագուլյանը։

Նշենք, որ առաջին դեպքում նա դատարանով վերականգնվել է աշխատանքի, երկրորդ դեպքում, փաստորեն, սահուն տեղավորվեց պաշտոնի:

Հրապարակ

«Իր այցելությունները Ֆրանսիա և Ռուսաստան, ինչպես նաև կարճատև արձակուրդն ավարտած Սերժ Սարգսյանը վերադարձել է Հայաստան։ Այս անգամ նրան դիմավորողների շարքում օդանավակայանում չի եղել Գագիկ Ծառուկյանը։ Փաստորեն, նոյեմբերի 11–ից մինչև 21-ը բավականին բան է փոխվել ՝ ԲՀԿ առաջնորդը նոյեմբերի 11-ին նրան սովորականի նման ճանապարհել է Ֆրանսիա, իսկ դիմավորելիս չի գնացել օդանավակայան։ Ի դեպ, պատճառը երկրից բացակայությունը չէ. մեր հարցին ի պատասխան Ծառուկյանի խոսնակն ասաց, որ ԲՀԿ առաջնորդը Հայաստանում է»։

Հրապարակ

«Հրապարակը» գրում է. «ԲՀԿ-ի մոտ օրինաչափություն է դառնում մի քանի օր շարունակ քաղխորհրդի նիստեր անցկացնելու պրակտիկան: Եվ նախորդ օրը, եւ երեկ «կանյաչնիում» ԲՀԿ-ն քաղխորհրդի նիստեր է արել: Մասնակցել են հիսունական մարդ` պատգամավորներ եւ մարզային կառույցների ղեկավարներ:

Երկու օրվա նիստերի օրակարգում էլ նույն հարցն է եղել. ի՞նչ են մտածում շարքերն ու պատգամավորներն առաջիկա նախագահական ընտրությունների եւ Ծառուկյանի առաջադրման մասին: Բոլոր մարզային կառույցների ներկայացուցիչները հատ-հատ ներկայացրել են իրենց տեսլականը մասնակցության մասին, պնդել, որ պետք է ներկայանալ բացառապես սեփական թեկնածուով, եւ այդ թեկնածուն պետք է լինի Գագիկ Ծառուկյանը: Օսկանյանին ոչ մեկը չի մատնանշել: Սերժ Սարգսյանի մասին, ըստ մասնակիցների, որեւէ բառ` «լավ կամ վատ», չի հնչել:

Ծառուկյանն ասել է, որ իր որոշումն արդեն կայացրել է, սակայն որեւէ բառ այդ որոշման մասին չի արտաբերել, ԲՀԿ-ի արմատական տրամադրված մասը հասկացել է, որ Ծառուկյանն անպայման առաջադրվելու է, ոչ արմատական մասը դեռ հույս ուներ, որ «հնարավորությունը հիսուն-հիսուն է»: Ծառուկյանն ասել է նաեւ, որ որոշումը կհրապարակի իր ծննդյան օրվանից մի քանի օր անց: Հիշեցնենք, որ ծննդյան օրը նոյեմբերի 25-ին է, նա 56 տարեկան է դառնում: Ապա տեղեկացրել է՝ քանի որ ծննդյան օրն ինքը սովորաբար անցկացնում է հանրապետությունից դուրս, կգնա-կգա-կհայտարարի իր որոշման մասին: Ներկաներն ասել են` ուշ է, վաղը հրապարակեք: Նա պատասխանել է` չէ, նորմալ է:

«Ես ոչ միայն Սմբատ Այվազյանի հետ ունեմ լուրջ տարաձայնություններ, այլ նաեւ քաղխորհրդի անդամ Ռաֆիկ Մկրտչյանի հետ»,- Aravot.am-ի հետ զրույցում ասել է «Հանրապետություն» կուսակցության քաղխորհրդի անդամ Սուրեն Աբրահամյանը՝ խոսելով ամուլում հրապարակած այն տեղեկության մասին, որ Սուրեն Աբրահամյանի եւ Սմբատ Այվազյանի միջեւ լուրջ տարաձայնություններ կան: Այդ մասին գրում է «Առավոտ» թերթը։

Սուրեն Աբրահամյանին խնդրեցինք պարզաբանել իր տարաձայնությունները կուսակցության քաղխորհրդի անդամների հետ: «Ռաֆիկ Մկրտչյանի հետ տարաձայնությունները հետեւյալն են՝ ես բացատրում եմ Ռաֆայել Սերգեյիչին, որ աշնան թափված տերեւները պետք է աշնանը հավաքվեն, ինքը «բեյնը մտցրել է», որ չէ, պետք է գարունը հավաքվեն: Իսկ Սմբատ Այվազյանին տասը տարի է ասում եմ, որ քո՝ հրաշալի նարդի խաղալը պայմանավորված է զառով, ինքն էլ ասում է՝ չէ, իմ խաղաոճով: Այնպես որ, խիստ տարաձայնություններ ունենք մենք»,- հեգնեց պարոն Աբրահամյանը:

Հետաքրքրվեցինք՝ ինչպե՞ս են պատրաստվում հարթել այդ տարաձայնությունները: Մեր զրուցակիցը հույս հայտնեց, որ նախագահական ընտրությունների շեմին այդ բոլորը կհարթվեն: Հարցին՝ միասնական թեկնածուո՞վ եք հանդես գալու, ասաց. «Այո, այո»»,- մեջբերում է «Առավոտը»:

«Առավոտ».

«Արձակուրդից վերադարձած Հովիկ Աբրահամյանը երեկ ընդհանրապես պառլամենտ չեկավ։ Տեղեկացրին՝ դեռ արձակուրդում է. Գալուստ Գրիգորիչը, ԱԺ փոխխոսնակները հեռախոսով նրան պերմանենտ տեղեկացնում էին պառլամենտում տիրող օպերատիվ իրավիճակի մասին, ժամը չորսին էլ Արգամիչը թռնելու էր Սանկտ Պետերբուրգ՝ ԱՊՀ միջխորհրդարանական վեհաժողովին մասնակցելու։ Նույն կերպ միջանցքներից ԲՀԿ-ի մոդերատորներն էին հեռախոսով զեկուցում խորհրդարանում տիրող օպերատիվ իրավիճակի մասին:

Հրապարակ

Հանրապետականները սխալ են վարվել՝ տապալելով ընդդիմության հրավիրած արտահերթ նիստը: Խորհրդարանը մտքեր փոխանակելու և, ինչու չէ, դրանք քարոզելու համար է: Եթե վստահ ես քn ճշմարտության մեջ, մասնակցիր քննարկմանը, արտահայտիր քո տեսակետը և դեմ քվեարկիր քn չհավանած օրինագծին: Եթե ՀՀԿ-ն այդպես աներ, աշխարհը, ենթադրում եմ, շուռ չէր գա: Մյուս կողմից` ընդդիմադիրները ակնհայտորեն սխալվում են` ասելով, որ Աժ նիստին մասնակցելը պատգամավորների առաջ դրված սահմանադրական պահանջ է՝ նախքան նման բան ասելը պետք էր խորհրդակցել իրավաբանների հետ:

Բայց խոսքս Աժ-ի ցանկապատի մոտ ակցիայի մասին է: Դիտեք այդ տեսանյութերը, լսեք, թե ինչ են խոսում այդ մարդիկ: Չգիտեմ` նրանք ՀԱԿ ակտիվիստներ են, թե պարզապես «ժողովրդի ներկայացուցիչներ», բայց նրանց դատողություններից և «փաստարկների» մակարդակից պարզապես մարդու «ականջներն են թոռոմում» (եթե թույլատրելի է ռուսերենից բառացի թարգմանությունը): Ակնհայտ է, որ այդ մարդիկ բացարձակապես չգիտեն, թե ինչի համար են եկել, ինչ պահանջներով է անցկացվում բողոքի ակցիան: Ես չեմ կարծում, որ խորհրդարանի 4 խմբակցությունների օրենսդիրները մտադիր են ժողովրդին համախմբել 100 տոկոսանոց համամասնական ընտրակարգի կամ խորհրդարանական համակարգի շուրջ: ՀԱԿ-ը, ՀՅԴ-ն, «Ժառանգությունը» ներկայացնող բոլոր պատգամավորները և ԲՀԿ-ից 8-10 հոգի ունեն բավականաչափ մտավոր մակարդակ` հասկանալու համար, որ հանուն պառլամենտական հանրապետության մարդկանց ոտքի չես հանի: Մեր քաղաքացիների մեծամասնությունը չգիտի` դա ինչ է և որն է դրա օգուտը:

Գիտեմ, որ ընդդիմադիրներն ինձ հետ համաձայն չեն լինի, բայց ինձ թվում է, որ այսօրվա հայաստանցիների համար նման համախմբող գաղափար չեն կարող լինել ժողովրդավարությունը, լեգիտիմությունը, սահմանադրական կարգը, օրինականությունը, արդարությունը և այլն: Դրանք չափից դուրս վերացական հասկացություններ են, և բացահայտել դրանց կապը ամեն մի քաղաքացու աշխատավարձի կամ թոշակի հետ գրեթե անհնարին է: Այդպիսի միասնական գաղափար չի կարող լինել նաև «ռեժիմից ազատվելը»` չնայած այստեղ, որքան հասկանում եմ, միասնություն չկա նույնիսկ ընդդիմադիր կուսակցությունների միջև: Թվում է, թե «ռեժիմից ազատվելը» պետք է համախմբի բոլոր դժգոհներին, որովհետև նույն փողոցային ակցիաների ժամանակ դուք կլսեք իշխանությունների հասցեին ամենաթունդ հայհոյանքներ, անեծքներ, բողոքներ, ատելության զանազան դրսևորումներ: Բայց այդ էմոցիաները չեն ձևակերպվում որպես քաղաքական համոզմունք և պահանջ: Եվ քանի դա այդպես է, այդ բողոքող և անիծող մարդիկ սուսուփուս կվերցնեն ընտրակաշառքը և կքվեարկեն «ինչպես որ հարկն է»:

Առավոտ

Ըստ արտագնա աշխատանքից վերադարձող մեր հայրենակիցների՝ թանկացել են Մոսկվա-Երևան ավիատոմսերը։ Մասնավորապես, ըստ նրանց, եթե նույն չվերթի էկոնոմ կարգի տոմսը ընդամենը 7 օր առաջ մոտ 295 դոլար էր, այժմ առնվազն 370 է։

Նման պատկեր է ստսսցվում նաև «Արմավիա»–ի կայքում ներկայացված գներից։ Տարեվերջին մեծանում է Մոսկվա-Երևան չվերթի պահանջարկը՝ ըստ արտագնա աշխատանքից վերադարձողների թվի, ինչն ավիաընկերությունների համար մեծ գումարներ աշխատելու լավ հնարավորություն Է։ «Արմավիա»–ից երեկ հրաժարվեցին մեկնաբանել այս փաստը առաջարկելով հարցերն ուղղել գրավոր:

Հայկական ժամանակ

ԱԺ գյուղատնտեսության եւ բնապահպանության հարցերի հանձնաժողովը նախկինում դրական եզրակացություն է տվել օրինագծին…
Նոյեմբերի 23-ին ԱԺ-ում լսումներ են անցկացվելու «Սերմերի մասին» օրենքում կառավարության առաջարկած փոփոխության վերաբերյալ։ Այդ մասին գրում է «Ժամանակ» թերթը։

«Հիշեցնենք, որ կառավարությունն ուզում է օրենքից հանել սերմերի փորձաքննության համար անհրաժեշտ երկու տարի ժամկետը եւ պարզեցնել սերմեր ներկրելու գործընթացը։ ԱԺ գյուղատնտեսության եւ բնապահպանության հարցերի հանձնաժողովը նախկինում դրական եզրակացություն է տվել օրինագծին, սակայն այժմ հանձնաժողովի ԲՀԿ-ական նախագահի օրոք հանձնաժողովը դեմ է օրինագծին եւ համարում է, որ ներկրված սերմերը պետք է երկու տարի փորձաքննություն անցնեն։ Ի դեպ,ԱԺ իրավաբանական վարչությունը եւս բացասական եզրակացություն է տվել օրինագծի վերաբերյալ»,- գրում է «Ժամանակը»։

«Ժամանակ».

Հունիսի 17-ին «Հարսնաքարը» պայթեցնելու փորձ արած և դրա համար 4–ամսյա ազատազրկման դատապարտված ՊՆ փոխգնդապետ Վարդան Սամվելյանը, որ նոյեմբերի 1-ին ազատ արձակվեց, երեկ մեր թղթակցին բացատրել է իր արարքի իմաստը։

«Համենայնդեպս, կիմանային, որ հայկական բանակում բոլոր սպաները չէ, որ կանացի հորմոններ են ձեռք բերել»,– ասել է Սամվելյանը։ Ըստ նրա՝ ՀՀ ՊՆ-ն համարժեք չարձագանքեց «Հարսնաքարի» դեպքին, որի հետևանքով մահացավ ռագմաբժիշկ Վահե Ավետյանը, ևս 4-ը հայտնվեցին հիվանդանոցում։ Հարցին ինչ պետք է աներ ՊՆ-ն, փոխգնդապետը պատասխանել է. «Էդ դեպքից մի երկու ամիս առաջ, երբ որ քաղմասում մեկը գեներալի հետ վատ էր խոսացել, մտան սաղ քաղմասը գրավեցին։ Թող գնային՝ «Հարսնաքարն» էլ գրավեին»։ Սամվելյանը, որն այդ դեպքի պատճառով գրկվել է ՊՆ-ում իր աշխատանքից, իրականում գնացել էր ռազմաբժիշկներին ծեծի ենթարկած թիկնապահներին պատմելու։

«Հայկական ժամանակ».

«…Հանրությունը դեռ չէր մարսել ՀՀԿ շենքի տանիքից ընկած և մահացած 27-ամյա երիտասարդի դժբախտությունը, հերթական պատահարն է գրանցվել։ Այս անգամ դժբախտ դեպքը տեղի է ունեցել Սերժ Սարգսյանի հովանավորությամբ, նրա նախընտրական ծրագրի շրջանակներում երիտասարդ ընտանիքների համար կառուցվող շենքերից մեկում։ Նոյեմբերի 19-ին, ժամը 12-ի սահմաններում, Ծարավ Աղբյուրի 55/8 հասցեում կառուցվող շենքի 4-րդ հարկից վայր է ընկել Կոտայքի մարզի Կապուտան գյուղի բնակիչ, 1959 թվականին ծնված Հոփան Աբրահամյանը։ Վերջինիս «տրավմատիկ շոկ» ախտորոշմամբ անմիջապես տեղափոխել են «Արթմեդ» բժշկական կենտրոն, սակայն երեկոյան կողմ նա մահացել է։ Ոստիկանությունից տեղեկացանք, որ նշանակվել է դատաբժշկական փորձաքննություն։

…Երբ դեպքի օրը զանգահարեցինք ծրագրի ղեկավար, սպորտի և երիտասարդության հարցերի փոխնախարար Արսեն Քարամյանին, նա անգամ տեղյակ չէր կատարվածից։ Խնդրեց ավելի ուշ զանգել, որպեսզի խոսի շինարարությունն իրականացնող կազմակերպության հետ։ Երբ ավելի ուշ զանգահարեցինք, Քարամյանը հաստատեց կատարվածը։ «Ցավում եմ, շատ եմ ցավում, շատ հմուտ աշխատող էր»,– ասաց նա։ «Էյջ դի էյ» շին– կազմակերպության տնօրենի հետ խոսելով, Քարամյանը պարզել էր, որ դեպքը տեղի է ունեցել «անզգույշ շարժման հետևանքով»։ «Հարթ մակերևույթի վրա է կանգնած եղել, ինչից հետո մոտ 4-5 մետրից վայր է ընկել»,– ասաց փոխնախարարը։ Փոխհատուցելո՞ւ եք ընտանիքին՝ հարցրինք նրան։ «Հասկանում եք, ես այստեղ ընդամենը պատվիրատու եմ։ Փոխհատուցման հարցով պետք է զբաղվի շինարարական կազմակերպությունը, քանի որ իրենց աշխատողն է եղել։ Եթե ինչ-որ ձև ունենամ, անպայման կհորդորեմ, որպեսզի փոխհատուցեն։ Հասկանալի է, որ մարդու կյանքը ոչ մի բանով չես փոխհատուցի, բայց, ամեն դեպքում, ընտանիքին էլ պետք է հասկանալ, այդ մարդը եկել էր փող աշխատելու։ Ես շինկազմակերպությանը կհորդորեմ, կառաջարկեմ փոխհատուցել ընտանիքին»,–եղավ պատասխանը։ Հիշեցնենք, որ այս շենքերի հետ կապված՝ սա արդեն երկրորդ դեպքն է։ Առաջինը տեղի էր ունեցել 2010 թվականի նոյեմբերին։ Այդ ժամանակ էլ աշխատողը երեսպատման աշխատանքներ կատարելիս էր երկրորդ հարկից ընկել ու մահացել։ «Ցավոք, սա երկրորդ դեպքն է, բայց այս կարգի դեպքերը շինարարության մեջ բացառել հնարավոր չէ»,– նկատեց Քարամյանը»,–գրում է թերթը։

«Հրապարակ».