«Հրապարակ» թերթը գրում է. «Երեկ տեղեկացանք, որ հայ վարսահարդարները մեկնում են Փարիզ` մասնակցելու Վարսահարդարների եւ դիմահարդարների աշխարհի առաջնությանը: Վարչապետի կինը` Աննա Հակոբյանն էլ մեկնեց Կիեւ` հումանիտար օգնություն տանելով Ուկրաինա: Տեղեկացանք նաեւ, որ Հայաստանում «Արծիվ գործընկեր-2023» հայ-ամերիկյան համատեղ զորավարժություն կանցկացվի, ինչին անմիջապես արձագանքեց ռուսական կողմը` Պեսկովի շուրթերով դա անվանելով «մտահոգիչ»։

Միաժամանակ ՊՆ հրավիրեցին Հայաստանում հավատարմագրված օտարերկրյա ռազմական կցորդներին եւ ներկայացրին հայ-ադրբեջանական սահմանին ստեղծված իրավիճակը` հավանաբար խնդրելով այս երկրների աջակցությունը` սահմանին նոր էսկալացիա թույլ չտալու հարցում: Ալեն Սիմոնյանը հերթական ոչ կոռեկտ հայտարարությունն արեց Զախարովայի հասցեին: ՀՀ իշխանությունն ակնհայտորեն կրակի հետ է խաղում, ստուգելով՝ կկրկնի՞ արդյոք Ռուսաստանն իր վարած քաղաքականությունը Վրաստանում եւ Ուկրաինայում»:

Առավել մանրամասն թերթի այսօրվա համարում

«Ժողովուրդ» օրաթերթը գրում է. Հայկ Մարությանն ունի 4 զավակ՝ 2 տղա եւ 2 աղջիկ։ Նրա զավակները Չեխիայի քաղաքացիներ են. «Ժողովուրդ» օրաթերթն այս մասին գրել է:

Օրեր առաջ Մարությանը ոչ միայն հաստատեց այս փաստը, այլեւ հայտարարեց, որ եթե իր որդիները մեծանան եւ ցանկանան ծառայել հայկական բանակում, ապա կծառայեն։

Մի քաղաքական ուժի ղեկավար, որը նույնիսկ քաղաքական ծրագիր չունի, խոսում է հայրենասիրության եւ հայրենիքի պաշտպանության կարեւորության մասին, իր որդիներին դարձրել է Չեխիայի քաղաքացիներ, որպեսզի խուսափեն ծառայությունից։

Ստացվում է, որ հայրենասիրություն եւ մարդասիրություն քարոզող անձն իր երեխաների մեջ սնել է այլ հայրենիք եւ սերմանել է սեր այլ հայրենիքների նկատմամբ։

Իրականում հայրենասիրություն բառը այդպիսի գործիչները դարձնում են այցեքարտ՝ բացելով ժողովրդի սրտի դռները, սակայն իշխանության գալով՝ դառնագին շրըխկացնում են դռները թե՛ հայրենիքի առաջ եւ թե՛ խղճի առաջ:
Հազարավոր ծնողներ մնացին անզավակ 2020թ.-ից հետո, եւ որեւէ մեկը նրանցից չէր հետաքրքրվել՝ ուզում են ծառայել հայկական բանակում, թե ոչ:

Ծառայությունը մեր երկրում պարտադիր է, եւ բոլորը հավասար են օրենքի առաջ: Հայկ Մարությանը թերեւս հենց ծառայությունից խուսափելու համար է իր որդիներին Չեխիայի քաղաքացիներ դարձրել:

Բայց մի՞թե հայրենիքը չի սկսվում այն սահմանից, որն արյունոտ է, մի՞թե հայրենիքի համար պարտք տալը ըստ ցանկության է»:

Առավել մանրամասն թերթի այսօրվա համարում

«Ժողովուրդ» օրաթերթը գրում է. «Ժողովուրդ» օրաթերթը օրեր առաջ հրապարակել էր հոդված՝ վիզա ստանալու հերթերի առաջացրած անհարմարությունների մասին: Մասնավորապես, շատ քաղաքացիներ, որոնք ցանկանում են ամենատարբեր նպատակներով մեկնել Հայաստանից, բախվում են վիզա ստանալու հերթերի եւ արժանապատվությունը նսեմացնող երեւույթների: Թե ինչեր են կատարվում վիզա կենտրոնների այս անսկիզբ ու անվերջ հերթերի հետեւում, «Ժողովուրդ» օրաթերթն արդեն գրել է, սակայն ինչ է անում ՀՀ արտաքին գործերի նախարարությունն իր քաղաքացիների իրավունքներն ու արժանապատվությունը պաշտպանելու համար, դեռ բացահայտված չէ:

«Ժողովուրդ» օրաթերթը հարցում ուղարկեց ՀՀ ԱԳՆ՝ ճշտելու, թե 4-5 ամիս «անշարժ» մնացող հերթերում սպասող քաղաքացիների խնդիրների լուծման, մասնավորապես՝ վիզաների տրամադրման գործընթացը հեշտացնելու եւ արժանապատիվ լուծում տալու համար ինչ գործուն քայլեր է անում ԱԳՆ-ն:

Հարցմանն ի պատասխան՝ մեզ Արտաքին գործերի նախարարությունից տեղեկացրին,որ օտարերկրյա պետությունների կողմից մուտքի վիզաների տրամադրումը հանդիսանում է «Հյուպատոսական կապերի մասին Վիեննայի կոնվենցիայի» 5-րդ հոդվածով սահմանված հիմնական գործառույթներից մեկը, որն իրականացնելիս դեսպանություններն առաջնորդվում են իրենց երկրների օրենսդրությամբ, եւ որեւէ երկրի արտաքին գերատեսչություն իրավասու չէ միջամտելու այդգործընթացին եւ անմիջական վերահսկողություն իրականացնելու լծակներ չունի:

«Այնուամենայնիվ, ՀՀ արտաքին գործերի նախարարությունը ցանկացած պատեհ առիթով բարձրացնում է խնդրո առարկա թեման, որը հիմնականում վերաբերում է եվրոպական երկրների՝ մուտքի վիզաների տրամադրման ծառայությանը (այցելության օր ամրագրելը)՝ քաղաքացիներին առավել մատչելի, այսինքն՝ խելամիտ ժամկետում հասանելի դարձնելու համատեքստում:

Վերոնշյալ հարցը բազմիցս քննարկվել է թե՛ ԵՄ կողմի եւ թե՛ ԵՄ անդամ երկրների ներկայացուցիչների հետ, այդ թվում՝ ս.թ. մարտի 23-ին ՀՀ ԱԳ նախարարի տեղակալ Պարույր Հովհաննիսյանի եւ Հայաստանում հավատարմագրված դիվանագիտական ներկայացուցչությունների եւ ՀՀ գերատեսչությունների գործընկերների հետ համատեղ հանդիպման ընթացքում:

Ըստ նախարարության դիտարկումների եւ դեսպանությունների կողմից ներկայացվող հիմնավորումների, որոնք հիմնականում հաստատվում են պաշտոնական վիճակագրության տվյալներով, խնդիրները հիմնականում ծագում են ոչ թե մուտքի վիզա ստանալիս ընթացակարգերի, այլ ժամադրության օր ամրագրելու քայլում, որը, հետքովիդային ժամանակաշրջանից սկսած (2022թ. գարուն-ամառ), էապես վատթարացել է դիմորդների կտրուկ աճի պատճառով։

Համաձայն պաշտոնական վիճակագրության՝ նախորդ համադրելի տարիների (2018,2019) համեմատ՝ մի շարք եվրոպական երկրների կողմից շենգենյան մուտքի վիզա տրամադրելու դիմումների քանակն աճել է 40-50 եւ ավելի տոկոսով, որին ոչ բոլոր դեսպանություններն են պատրաստ եղել իրենց կարողություններով եւ մարդկային ռեսուրսներով։ Որոշ դեսպանությունների հաջողվել է ժամադրությունների ընթացակարգը բարելավել, որոշներին՝ ոչ այնքան։

Հատկանշական է, որ ԵՄ անդամ երկրների դեսպանությունների աշխատակիցների համար հարցը նույնպես մեծագույն մտահոգության առարկա է։ Միեւնույն ժամանակ ԵՄ անդամ երկրների ներկայացուցիչները պատրաստակամություն են հայտնել ջանքեր գործադրելու վերոնշյալ պայմանների բարելավման ուղղությամբ։
ՀՀ արտաքին գործերի նախարարությունը շարունակում է ուշադրության կենտրոնում պահել խնդրո առարկա թեման եւ իր իրավասությունների շրջանակներում շարունակելու է հետեւողական լինել՝ վիզաների տրամադրման գործընթացների բարելավման ուղղությամբ իրականացվող աշխատանքներում»։

Այս երկարաշունչ պատասխանը ենթադրում է՝ դեսպանատների առջեւ ամբոխի նմանվող հերթերի, դրանց վերահսկողության ու կարգավորման հարցում ՀՀ ԱԳՆ-ն, մեծ հաշվով, իրավասություն չունի. միջազգային օրենսդրությունն է գործում: Հետաքրքիր է՝ ինչու այդ դեպքում Հայաստանում էլ չի գործում ՀՀ օրենսդրությունը նույն ուժգնությամբ եվրոպացիների նկատմամբ՝ բալանսավորելու իրավիճակը:

Ակնհայտ է, որ վիզա ստանալու համար ՀՀ քաղաքացին բազմակի անգամ նվաստանում է օտարերկրյա դեսպանություններում, եւ Նիկոլ Փաշինյանի իշխանությունն անկարող է լուծել այդ նվաստացման հարցը: Սա ազգային արժանապատվության հարց է»:

Առավել մանրամասն թերթի այսօրվա համարում

«Ժողովուրդ» օրաթերթը գրում է. «Ժողովուրդ» օրաթերթի խմբագրությունը պարբերաբար բողոքներ է ստանում քաղաքացիներից, որ Հայաստանի Հանրապետությունում գործող մի շարք բանկեր հրաժարվում են կատարել գործարքներ հին՝ 2006 թվականի արտադրության դոլարներով՝ քաղաքացիներին որեւէ բացատրություն չտալով:

Նշենք, որ 2006 թվականի արտադրության այդ «հին դոլարները» հին չեն համարվում նույնիսկ ԱՄՆ-ում, պարզապես 2010 թվականին ԱՄՆ-ն հայտարարեց, որ թողարկելու է նոր դիզայնով թղթադրամներ՝ նոր թանաքագծով, որը կփոխեր գույնը պղնձագույնից դեպի կանաչ, սակայն նախորդների՝ արտադրությունից դուրս գալու մասին որեւէ խոսակցություն չի եղել:

«Ժողովուրդ» օրաթերթը գրավոր հարցում ուղարկեց Հայաստանի կենտրոնական բանկ՝ հասկանալու՝ արդյոք Կենտրոնական բանկը տեղյակ է բանկերում թույլ տրվող ապօրինություններից: Ի պատասխան՝ ԿԲ-ից մեզ տեղեկացրին, որ ՀՀ կենտրոնական բանկը մշտադիտարկում է ֆինանսական շուկան եւ տեղյակ է այդ երեւույթի մասին: Հարցին, թե ինչու նախօրոք այս մասին չի զգուշացվել քաղաքացիներին, Կենտրոնական բանկից տեղեկացրին, որ ֆինանսական կառույցներն իրենց հաճախորդներին պարտավոր են տեղեկացնել մատուցվող ծառայությունների պայմանների փոփոխությունների վերաբերյալ: Դա չանելու դեպքում ֆինանսական ծառայությունների սպառողները կարող են իրականացնել իրենց շահերի պաշտպանության քայլեր, որոնց մասին տեղեկությունները հասանելի են ԿԲ կայքում՝ հետևյալ հղումով՝ https://www.cba.am/am/SitePages/fcpforconsumer.aspx:

Այս ամենից զատ արդյոք Կենտրոնական բանկը կարգավորումներ մտցնելու ուղղությամբ քայլեր անու՞մ է, կամ գուցե այդպիսիք այժմ արդեն կա՞ն:

«Կենտրոնական բանկը Հայաստանի Հանրապետությունում արտարժույթի շրջանառության ապահովման պարտավորություն չունի՝ ի տարբերություն ՀՀ ազգային արժույթի՝ դրամի շրջանառության ապահովման:

Հայաստանի Հանրապետությունում արտարժույթի փոխանակման շուկան խիստ մրցակցային է, եւ ֆինանսական կառույցների կողմից մատուցվող ծառայությունների սակագները որոշվում են շուկայական մեխանիզմով (յուրաքանչյուր բանկ կամ փոխանակման կետ ինքն է որոշում, թե որ արտարժույթով ինչ գործառնություններ իրականացնի եւ ինչ սակագնով)։ Ֆինանսական կառույցների ծառայությունների սակագներն ուղղակիորեն չեն կարգավորվում կամ հրահանգավորվում Կենտրոնական բանկի կողմից»,- հայտնեցին Կենտրոնական բանկից:

Այսինքն՝ երբ հնչում են որեւէ բանկի կամ ֆինանսական կազմակերպության գովազդում խոսքեր, թե կառույցը վերահսկվում է Կենտրոնական բանկի կողմից, խաբեություն է: ԿԲ-ն միայն լիցենզիայի տրամադրման ժամանակ է կանոններ նախանշում, հետո ինչ ցանկանում, անում են բանկերը:

Փաստացի ԱՄՆ-ում, այսպես ասած, հին դոլարները համարվում է արժույթ, իսկ Հայաստանում՝ ոչ: Ու ով է որոշել՝ պարզ չէ. պետությունը կազմակերպված քաոս է ստեղծել»:

Առավել մանրամասն թերթի այսօրվա համարում

«Հրապարակ» թերթը գրում է.  Այսուհետ քննչական գործողությունները՝ առերեսումներ, հարցաքննություններ, պետք է տեսանկարահանվեն: Օրենքի այդ պահանջն ուժի մեջ է մտնում հուլիսի 1-ից: 3 կառույց` Քննչական կոմիտեն, ԱԱԾ-ն եւ Հակակոռուպցիոն կոմիտեն, այդ սարքերը ձեռք բերելու համար տենդեր են հայտարարել: Քննչական կոմիտեն՝ 240 միլիոն դրամի, հակակոռուպցիոնը` 20 միլիոնի, ԱԱԾ-ն` 10: Քննչական կոմիտեի մրցույթի առաջին փուլին մասնակցել է 5 կազմակերպություն, երկրորդին` միայն մեկը: Ինչո՞ւ: Մասնակցողներն ուշացումով տեղեկացել են, որ տեսախցիկների այնպիսի տեխնիկական բնութագիր է սահմանվել, որն իրականացման ենթակա չէ, տնտեսվարողները փաստի առաջ են կանգնել, որովհետեւ նման տեսախցիկներ իրենց հայտնի չեն եղել, եւ նման գներով էլ հնարավոր չի եղել դրանք ձեռք բերել։

Մասնավորապես, տեխնիկական բնութագրում նշված է, որ տեսախցիկները պետք է տեսաձայնագրման 140 աստիճան հորիզոնական անկյուն ունենան, այսինքն՝ նկարահանեն 140 աստիճան անկյան տակ, ինչն անիմաստ է, որովհետեւ կարիք չկա սենյակի հեռավոր անկյունները նկարահանել, եթե կոնկրետ մարդու հարցաքննություն ես ուզում նկարահանել։ Տենդերի 2-րդ փուլում հաղթող է ճանաչվել «Փրիթի Ուեյ» ՍՊԸ-ն` «Վեստա» ապրանքանիշի տակ գործող: Այս ընկերության հետ արդեն 167 մլն 640 հազար դրամի պայմանագիր է կնքվել, որի դիմաց Քննչական կոմիտեին պետք է մատակարարվի 942 հատ տեսախցիկ․ 1 միավորի գինը՝ 178 հազար դրամ։ Ըստ պայմանագրի՝ մատակարարվող տեսախցիկները չինական արտադրության են, ապրանքանիշը՝ Spectre7 china jinda INT’L։ Սակայն ե՛ւ «Վեստայի» մրցակիցները, ե՛ւ մենք փորձեցինք համացանցում որոնել, թե ինչ տեխնիկական բնութագիր ունեն այդ տեսախցիկները եւ արդյո՞ք իսկապես նկարում են 140 աստիճան անկյան տակ, սակայն նման ապրանքանիշի տեսախցիկներ չհաջողվեց գտնել։

«Հրապարակ» թերթը գրում է.Մեզ պատմեցին, որ որդեկորույս ծնողները վերջին օրերին պառակտվել են: Մանավանդ այն բանից հետո, երբ զոհվածների ծնողները հայտարարեցին, որ դադարեցնում են նստացույցը: Առավել ընդդիմադիր, արմատական տրամադրված ծնողները որոշել են հեռանալ նրանցից։ Փաստորեն, իշխանությանը հաջողվեց այստեղ էլ պառակտում մտցնել։ Իսկ նստացույցը դադարեցնելու պատճառն այն է, որ ծնողների առաջ պայման է դրվել` կա՛մ պայքարը դադարեցնում եք, կա՛մ Գայանե Հակոբյանը երկար է նստելու:

Մեր աղբյուրը նշում է, որ ծնողներից ոմանք էլ Գայանե Հակոբյանին են սկսել մեղադրել՝ իշխանությունների հետ համագործակցելու համար։ Եվ որդեկորույս ծնողները բաժանվել են մի քանի թեւի՝ ավելի արմատական թեւ եւ ոչ այնքան։ Զոհված զինծառայողների ծնողներից մեկը մեզ պատմեց, որ անհասկանալի իրավիճակ է այժմ ծնողների շրջանում, պառակտում է, թե ոչ՝ հստակ չի կարող գնահատել, սակայն մի բան հստակ է, որ Գայանե Հակոբյանի վրա ճնշում է գործադրվել, ինչի արդյունքում էլ ստեղծվել է այս անհասկանալի իրավիճակը:

«Որդիների կանչ» ՀԿ նախագահ Վահիդ Սահակյանը մեզ հետ զրույցում ասաց, որ կարեւորն այս պահին Գայանե Հակոբյանի հարցն է, իսկ ինչ վերաբերում է պառակտմանը, ասաց․ «Նման բան չկա, ոչ մի պառակտում»:

Հոդվածն ամբողջությամբ կարող եք կարդալ «Հրապարակ» թերթի՝ 27․ 05․ 23 թ համարում։

«Ժողովուրդ» օրաթերթը գրում է․ «Ժողովուրդ» օրաթերթի տեղեկությունների համաձայն՝ օղակը ՀՀ առողջապահության նախկին նախարար, այժմ ԱԺ ՔՊ խմբակցության պատգամավոր Արսեն Թորոսյանի շուրջ սեղմվում է: Չի բացառվում, որ Թորոսյանն առաջիկայում ձերբակալվի:Երեկ նախաքննական մարմինը՝ Հակակոռուպցիոն կոմիտեն, ձերբակալեց Երեւանի փոխքաղաքապետ Գեւորգ Սիմոնյանին, քանի որ Սիմոնյանը առողջապահության նախարար Արսեն Թորոսյանի օրոք նրա տեղակալն էր:

Տեղեկացանք նաեւ, որ այս գործով հարցաքննությունները ինտենսիվ շարունակվում են:Մեզ հասած տեղեկությունների համաձայն՝ հարցաքննվել է ՊԵԿ փոխնախագահ Արտյոմ Սմբատյանը, որը Թորոսյանի՝ նախարար եղած ժամանակ դարձյալ փոխնախարար է եղել եւ Քովիդի գծով համակարգողը: Ըստ մեզ հասած տեղեկությունների՝ առայժմ իրավապահները Սմբատյանին միայն հարցաքննել են, իսկ թե ինչ կլինի, ցույց կտա ժամանակը:

Շղթան այսքանով չի ավարտվում: Հարցաքննվել են նաեւ 5 հիվանդանոցի տնօրեններ, որոնք Քովիդով հիվանդների են սպասարկել:

Հարցաքննվել են նաեւ առողջապահության արդեն նախկին նախարար Թորոսյանի աշխատակազմի երեք ղեկավարները, որոնցից Լուսինե Քոչարյանը եւ Ծաղիկ Վարդանյանն անգամ առերեսվել են:Այսպիսով, նախկին նախարար Արսեն Թորոսյանի գլխին սեւ ամպեր են կուտակվում, քանի որ, մեզ հասած բացառիկ տեղեկությունների համաձայն, նրա դեմ ցուցմունք տվողներ կան, ինչը ենթադրել է տալիս, որ Թորոսյանը եւս առաջիկայում գուցե ձերբակալվի:

Հիշեցնենք, որ Թորոսյանն այն նախարարն էր, որ նշանակվելուց հետո շատ անվանի բժիշկների ու առողջապահության կազմակերպիչների մասով «լայվ» էր մտնում ու հրապարակային բոլորին թալանի, կոռուպցիայի համար մեղադրում: Հիմա բացահայտվել է, որ ինքն է ղեկավարել ու կազմակերպել թալանը: Ավելին՝ «Ժողովուրդ» օրաթերթի տեղեկություններով՝ իրավապահները Թորոսյանի գործունեության շուրջ միայն Քովիդի գործընթացով չէ, որ բացահայտումներ են արել:Այլ նորություններ էլ կան, որոնց մասին կներկայացնենք առաջիկայում:

Հիշեցնենք, որ դեռեւս անցած տարի՝ նոյեմբերի 22-ին, «Ժողովուրդ» օրաթերթը գրել էր, որ իրավապահ համակարգում ներքին քննարկում է եղել, որ Աժ ՔՊ-ական պատգամավոր, առողջապահության նախկին նախարար Արսեն Թորոսյանին Հակակոռուպցիոն կոմիտեն պետք է հրավիրի հարցաքննության:

Ասել է թե՝ նախաքննական մարմինը պատրաստվել է ծանուցում ուղարկել Արսեն Թորոսյանին, սակայն իրավապահ համակարգում գնահատական է հնչել, որ նրան մեղադրանք առաջադրելու պահը դեռեւս չի հասունացել: Արդեն իսկ քրեական գործով ուշագրավ հանգամանքներ են ի հայտ եկել: Մեզ հասած տեղեկությունների համաձայն՝ այս օրերին Հակակոռուպցիոն կոմիտեն ակտիվ կերպով հարցաքննության է հրավիրում «Գրիգոր Լուսավորիչ» բժշկական կենտրոնի աշխատակիցներին: Իսկ ի՞նչ քրեական վարույթի մասին է խոսքը: Ըստ քրեական վարույթով ձեռք բերված տվյալների՝ «ՀՀ-ում նոր կորոնավիրուսային վարակի (Covid-19) կանխարգելման, վերահսկման, բուժման այլ համալիր միջոցառումների» իրականացման ծրագրով ՀՀ կառավարությունը հատկացրել է ավելի քան 26 մլրդ ՀՀ դրամ, որն ամբողջությամբ ֆինանսավորվել է ՀՀ կառավարության պահուստային ֆոնդից:

Հիշյալ ծրագրի շրջանակում ՀՀ առողջապահության նախարարի 2020թ. հրամանով հաստատվել է կորոնավիրուսային հիվանդության «CՕVID-19»-ի ախտորոշման և բուժման դիմաց պետական բյուջեից փոխհատուցում ստացող՝ բժշկական օգնություն և սպասարկում իրականացնող բժշկական կազմակերպությունների ցանկը, որում ներառվել է նաև «Մեդլայն Կլինիկ» ՍՊ ընկերությունը:

Ամբողջական հոդվածը՝ «Ժողովուրդ» օրաթերթի այսօրվա համարում

Նիկոլ Փաշինյանի եւ կուսակիցների հարաբերությունները վերջին ժամանակներում աննկարագրելի լարվել են։ Հատկապես ՔՊ վարչության անդամները, այսինքն՝ Փաշինյանի «նեղ կռուգն» աննախադեպ զգուշավոր է դարձել, եթե չասենք` վախվորած․ նրանք չեն համարձակվում բառ անգամ փոխանակել վարչության նիստերից, խուսափում են ուղիղ շփումներից, միջնորդավորված են շփվում։ Նիկոլ Փաշինյանը ՔՊ վարչության ընտրությունների հայտնի կեղծիքներից հետո 360 աստիճանով փոխել է վերաբերմունքը կուսակիցների նկատմամբ՝ նիստերին խոսում է խիստ, կտրուկ տոնով, երբեմն այնքան է բարկանում, որ իր առջեւում դրված թղթերն ու այլ պարագաներն է դեսուդեն նետում՝ փորձելով իր անձի նկատմամբ վախ ներշնչել, որ այսուհետ որեւէ ՔՊ-ականի մտքով չանցնի իր գլխից թռչել, ընտրություններ կեղծել։ Նա չի մարսում, որ իր թիմակիցները նման համարձակություն են դրսեւորել, եւ չի ներում ոչ միայն բուն զեղծարարներին, այլեւ վարչության նախկին բոլոր անդամներին, որոնք, ըստ Փաշինյանի, պարտավոր էին ուշադիր լինել եւ թույլ չտալ նման խայտառակություն, ինչը նշանակում է, որ դրսեւորել են հանցավոր անտարբերություն եւ պասիվ դիտորդի պես հետեւել զարգացումներին։ Նա այնքան կասկածամիտ է, որ կարծում է՝ բոլորն այս կամ այն չափով մասնակից են եղել այդ դավադրությանը։

ՔՊ-ում կարծում են, որ ԱԻ նախկին նախարար Արմեն Փամբուխչյանին հենց այդ պատճառով չվստահեց ՆԳ մեգանախարարությունը, մինչդեռ թվում էր, թե համեստ, թիմի համար խնդիրներ չստեղծող Փամբուխչյանին Փաշինյանը պետք է վստահեր եւ նշանակեր Վահե Ղազարյանի փոխարեն, որի միակ արժանիքը Փաշինյանին հավատարմությունն է։ Եթե նշանակվեր Փամբուխչյանը, սորոսականների ընդվզումն էլ չէր լինի, որը պայմանավորված էր Ղազարյանի նշանակմամբ։ Իսկ Փամբուխչյանը, ում օգտին վարչության ընտրությունների ժամանակ ձայներ էին կեղծել, վերահաշվարկի արդյունքում դուրս մղվեց ե՛ւ ՔՊ վարչությունից, ե՛ւ Նիկոլ Փաշինյանի սրտից՝ կորցնելով վստահությունը։ Սակայն կուսակցության մեր աղբյուրն ասում է, որ Փաշինյանն արշավ է սկսել ՔՊ-ական վերնախավի դեմ եւ ոչ մեկին անպատիժ չի թողնելու՝ գուցե այդ պատիժը մի քանի շաբաթից կամ մի քանի ամսից լինի, բայց Փաշինյանն իր գործողություններով ցույց է տալու, որ բոլորի ճակատագիրը մեկ մարդուց է կախված, եւ այդ մեկ մարդն ինքն է։ Եվ ինքն ինչպես ուզի, այնպես էլ կտնօրինի ՔՊ-ականների ճակատագիրը, ուստի իրեն պետք է ենթարկվեն՝ ինչպես սուլթանին, ինչպես կայսրին՝ առանց ծպտուն հանելու եւ ըմբոստության նշույլ դրսեւորելու։

Պատահական չէ, որ Փաշինյանը վերջին մեկ-երկու ամիսների ընթացքում պետական ապարատից հանում է ՔՊ-ականներին եւ կարեւոր պաշտոնների է նշանակում անկուսակցականներին։ Օրինակ, փոխվարչապետ Համբարձում Մաթեւոսյանին փոխարինեց նախկինների կադր Տիգրան Խաչատրյանով, արդարադատության նախարարի թափուր պաշտոնում նշանակեց Միքայել Մինասյանի եղբորը՝ Գրիգոր Մինասյանին, եւ այլն։ Խոսվում է, որ առաջիկայում էլ մտադիր է մարզպետների փոփոխություններ իրականացնել եւ նրանց փոխարեն նշանակել ոչ թե ՔՊ-ականների, այլ տեղի հարգված մարդկանց շրջանակից։

Պատմում են, որ Փաշինյանի պահվածքից ՔՊ-ում արդեն իսկ հետեւություններ են անում․ եթե ընդամենը ամիսներ առաջ կուսակցության վերնախավի ներկայացուցիչները, որոնք քիչ թե շատ ինքնուրույնություն ունեին եւ ոչ գլոբալ հարցերում կարող էին միայնակ որոշումներ կայացնել, այժմ բացարձակապես զրկված են դրանից եւ անգամ «զուգարան գնալու համար» պարտավոր են ստանալ Փաշինյանի թույլտվությունը։ Դա է պատճառը, որ անգամ բարձր պաշտոն զբաղեցնողները վախենում են հրապարակավ ինչ-որ բան ասել, ինչ-որ մարդկանց բան խոստանալ՝ իմանալով, որ դրանց կատարումն իրենցից կախված չէ, կախված է 24 ժամում 20 անգամ միտքը փոխող մարդուց։
Նիկոլ Փաշինյանը նախօրեին տեղի ունեցած ՔՊ վարչության նիստում չի թաքցրել վրդովմունքը, որ դեռ կան համայնքներ, որտեղ ներկուսակցական խժդժությունների պատճառով ՔՊ տարածքային խորհուրդները չեն ձեւավորվել։ Խոսքը մասնավորապես Սիսիան եւ Նաիրի համայնքների մասին է։ Ասել է, որ ՔՊ-ում չի հանդուրժելու «թեւեր», ճամբարներ, ու հանձնարարել է սեղմ ժամկետներում լուծել հարցը, հակառակ դեպքում պատասխանատուները կպատժվեն։ Փաշինյանը թերեւս հասկանում է՝ երկրի վիճակն այնպիսին է, որ թիմը կարող է պառակտվել, եւ կարող են իր պաշտոնանկության հիմքեր ստեղծվել։

Թերեւս դրանով է պայմանավորված այն, որ նախօրեին կայացած վարչության նիստում ոչ թե շուրջ 40 օր շրջափակված Լաչինի հարցն են քննարկել, այլ Սիսիանի եւ Նաիրիի տարածքային խորհուրդների կազմավորման։ Հարցի կարգավորումը դրվել է վարչության փոխնախագահներ Գեւորգ Պապոյանի եւ Վահագն Ալեքսանյանի վրա, թեեւ Սիսիանի պատասխանատուն ՔՊ-ական պատգամավոր Կարեն Համբարձումյանն է՝ հենց նա է Սիսիանի կառույցում խժդժություններ հրահրել, որի պատճառով խորհուրդ չի ձեւավորվում, մինչդեռ ՔՊ համագումարից առաջ նախատեսված էր, որ բոլոր կառույցները պետք է ձեւավորվեն։

Մենք դեռ ամիսներ առաջ էինք գրել, որ «Քաղպայմանագրի» Սիսիանի կառույցում 2 թեւի են բաժանվել եւ պատերազմում են իրար դեմ: Մի թեւը համակարգում են Առուշ Առուշանյանի դեմ ցուցմունքներ հավաքագրող Ներսես Խաչատրյանը, ակտիվ կուսակցական Արսեն Ավագյանը եւ այլ ՔՊ-ականներ: Մյուս թեւը՝ նախկինների ճամբարից հեռացած Կարեն Համբարձումյանը՝ իր թիմով: Տեւական ժամանակ այս թիմերը կատաղի պայքար էին մղում՝ մարզային պաշտոններում յուրայիններին տեղավորելու համար: Կարեն Համբարձումյանն իր բարեկամ, քաղաքապետի ժամանակավոր պաշտոնակատար Արմեն Հակոբջանյանի միջոցով համայնքային ենթակայության տակ գործող հիմնարկներից ազատում էր Արսեն Ավագյանի ազգականներին։ Եվ այս հակամարտության պատճառով էլ ՔՊ-ում տապալվում էին տարածքային խորհրդի ձեւավորման աշխատանքները՝ հրավիրված նիստերը բազմիցս չեն կայացել։ Երեկ Կարեն Համբարձումյանը մեզ վստահեցրեց, թե Սիսիանի կառույցում թեւեր գոյություն չունեն։ Իսկ թե ինչու այդ դեպքում տարածքային խորհուրդ չի ձեւավորվում, փառահեղ պատասխան տվեց․ «Կձեւավորվի, առաջիկայում ամեն բան էլ նորմալ կլինի»։ Եվ հավելեց․ «Մենք՝ բոլորս, միասնական եղել ենք, կանք ու առաջիկայում էլ կպաշտպանենք Արմեն Հակոբջանյանի թեկնածությունը, որին ՔՊ վարչությունն է կրկին առաջադրել»»։

Մանրամասները՝ թերթի այսօրվա համարում։

«Հրապարակ» թերթը գրում է. «2020 թ․ հունվարի 1-ից մինչեւ 2022 թվականի նոյեմբերի 30-ը ներառյալ ՀՀ քաղաքացիություն ստանալու համար դիմել է Թուրքիայի 155 քաղաքացի՝ մեր հարցմանն ի պատասխան տեղեկացրել են ոստիկանության անձնագրային եւ վիզաների վարչությունից՝ նշելով, որ Ադրբեջանի որեւէ քաղաքացի չի դիմել։

Թուրքիայի քաղաքացիների գերակշռող մասը, եթե ոչ ամբողջը, ազգությամբ հայեր են: Նշված ժամանակահատվածում ՀՀ նախագահի հրամանագրով ՀՀ քաղաքացիություն է շնորհվել 48 հազար 352 հայի։ Ոստիկանության անձնագրային եւ վիզաների վարչությունից խնդրել էինք տեղեկացնել նաեւ, թե 2021 թվականի փետրվարի 14-ից՝ ռուս-ուկրաինական պատերազմի սկսվելու օրվանից մինչ օրս Հայաստան եկած ՌԴ քաղաքացիներից քանիսն է դիմել ՀՀ քաղաքացիություն ստանալու համար։

Ոստիկանությունից պատասխանել են, որ ՌԴ նման քաղաքացիների թիվը կազմում է 17 հազար 498 մարդ։ Ոստիկանությունից, սակայն, չեն պատասխանել, թե քանի դիմում է բավարարվել՝ նշելով հետեւյալը․ «Պահանջվող ժամանակահատվածում բավարարված դիմումների վերաբերյալ հստակ տեղեկատվություն տրամադրել հնարավոր չէ, քանի որ դրանց մի մասը դեռեւս գտնվում է քննարկման փուլում։ Բացի այդ՝ նախկինում ներկայացված դիմումները եւս բավարարվել են նշված ժամանակահատվածում։ Ինչ վերաբերում է մյուս հարցադրմանը, թե ՌԴ քաղաքացիությունից քանիսն են հրաժարվել, հայտնում ենք, որ դա ՀՀ ոստիկանության ԱՎ վարչության գործառույթներից դուրս է»։

Առավելմանրամասն՝թերթիայսօրվահամարում

«Ժողովուրդ» օրաթերթը գրում է. Ուժային կառույցների օպերատիվ հետախուզական խմբերը կմտնեն մի շարք պաշտոնյաների տներ. ծանուցումների գործընթացը մեկնարկել է: «Ժողովուրդ» օրաթերթի տեղեկությունների համաձայն՝ ՀՀ պետական պաշտոնյաներն այս օրերին ծանուցումներ են ստանում Կոռուպցիայի կանխարգելման հանձնաժողովի կողմից: Մեզ հասած տեղեկությունների համաձայն՝ ծանուցման մեջ հանձնաժողովը կոնկրետ հարցադրում է անում պետական պաշտոնյաներին եւ պահանջում հայտնել, թե այս կամ այն գույքի կառավարման հետ ինչ առնչություն ունեն պաշտոնյաները:

«Ժողովուրդ» օրաթերթը գրել էր, որ Կոռուպցիայի կանխարգելման հանձնաժողովն ուշագրավ որոշում է կայացրել, որը խառնաշփոթ է ստեղծել պետական պաշտոն զբաղեցնող անձանց շրջանում: Այս պահի դրությամբ ցանկում ներառվել են 95 պետական պաշտոն զբաղեցնող անձինք, եւ չի բացառվում՝ ցանկը ավելանա։ Եվ, ահա, այս նոր որոշումը որոշակի անհանգստություն է առաջացրել պետական պաշտոն զբաղեցնող անձանց շրջանում:

Բանն այն է, որ Կոռուպցիայի կանխարգելման հանձնաժողովը համապատասխան վերլուծության ընթացքում ուժային կառույցների օպերատիվ-հետախուզական գործունեության բաժին դիմում է ներկայացնելու, որ կոնկրետ պետական պաշտոն զբաղեցնող անձանց գույքի մասով իրենց տեղեկություն տրամադրեն, ինչը ենթադրում է, որ այս որոշման արդյունքում չի բացառվում, որ ուժային կառույցները մտնեն պետական պաշտոն զբաղեցնող անձանց պատկանող սեփականություններ: Կստուգվեն կենցաղին առնչվող մանրամասներ…Մեկ բառով ասած՝ պաշտոնյաների տները եւ ունեցվածքը խոշորացույցի տակ են»:

Առավել մանրամասն՝ թերթի այսօրվա համարում