Պետական դումայի պատգամավոր Աշոտ Եղիազարյանը  բնակվում է Կալիֆորնիայի Բևերլի Հիլզում, ըստ «Ժամանակ» օրաթերթի՝ գրել է The Wall Street Journal-ը: Թերթը տեղեկացրել է, որ Վաշինգտոնում Ռուսաստանի դեսպանատունը ԱՄՆ իշխանություններին է  փոխանցել Եղիազարյանին արտահանձնելու բոլոր փաստաթղթերը: Սակայն, քանի որ ԱՄՆ-ի և Ռուսաստանի միջև չկա արտահանձնման  պայմանագիր, հիմա ամերիկյան պաշտոնյաներն  ուսումնասիրում են Եղիազարյանի այն հայտարարությունները, թե ինչ կկատարվի իր հետ, եթե իրեն վերադարձնեն Ռուսաստան: Այս պահին պարզություն չկա նաև Եղիազարյանի միգրացիոն կարգավիճակի հարցում. նա ԱՄՆ-ում է գտնվում անցած տարվա սեպտեմբերից: Ավելի վաղ Եղիազարյանը պատրաստվում էր քաղաքական  ապաստան խնդրել ԱՄՆ-ից: Հոդվածագիրը հեգնում է, որ այս  հակամարտությունը կարծես ստեղծված լինի Հոլիվուդի համար: Եղիազարյանի նկատմամբ վարկաբեկման գործընթացն ընթանում է հենց ԱՄՆ-ում: Վերջերս հրապարակվել էին նրա լուսանկարներն անծանոթ կանանց հետ: Փաստաբանները նշել են, որ դա արվում էր, որպեսզի Եղիազարյանը հետ կանչեր  Կիպրոսի  դատարան  ներկայացրած հայցը, որով Պետդումայի պատգամավորը  պահանջում էր վերադարձնել իրենից «անօրինականորեն խլած ունեցվածքը»:

Հայաստանի իշխանական շրջանակին մոտ կանգնած «Ժամանակ»-ի աղբյուրները հայտնում են, որ Հայաստանում Իրանի դեսպանատունը ՀՀ նախագահի աշխատակազմին տեղեկացրել է, որ հունիսի 6-ին Երևան ժամանող Իրանի նախագահ Մահմուդ Ահմադինեժադը ցանկություն ունի հանդիպելու ՀՀ երկրորդ նախագահ Ռոբերտ Քոչարյանին:

Ահմադինեժադի ցանկության մասին Իրանի դեսպանն արդեն հայտնել է նաև Ռոբերտ Քոչարյանի գրասենյակին: Ըստ թերթի աղբյուրների, այս օրերին ՀՀ իշխանությունները փորձելու են ամեն ինչ անել՝ Ահմադինեժադի օրակարգից Ռ. Քոչարյանի հետ նախատեսված հանդիպումը հանելու համար, սակայն դա կարծես նրանց չի հաջողվելու:

«Ժամանակ»-ը զրուցել է համաներմամբ ազատ արձակված Սասուն Միքայելյանի հետ: Ներկայացնում ենք մի հատված զրույցից:

Գաղտնիք չէ, որ Դուք քաղաքական գործընթացներից զատ, Սերժ Սարգսյանի հետ անձնապես մտերիմ հարաբերություններ ունեք: Ձեր անձնական հարաբերություններում սև բծեր կա՞ն, թե՞ դրանք կվերականգնվեն:

Իմ և Սերժ Սարգսյանի միջև երբեք սև բծեր չեն եղել և չեն էլ կարող լինել, որովհետև ես և Սերժ Սարգսյանը եղել ենք մարտական ընկերներ: Եկեք այս ամենը երկու հարթության վրա դնենք: Ես և Սերժ Սարգսյանը եղել ենք մարտական ընկերներ, պատերազմի դաշտում ունեցել ենք մեկ թշնամի և պայքարել ենք թշնամու դեմ: Մարտական ընկերները երբեք չեն բաժանվում: Իսկ եթե գանք քաղաքական դաշտ, ապա քաղաքական հարաբերությունների մեջ մենք չենք կարողացել համագործակցել: Ես ասել եմ այն, ինչ ասել եմ երեք տարի առաջ` լինելով «Հանրապետական» կուսակցության անդամ: Ոչ մի բան չի փոխվում իմ անձնական հայացքների մեջ: Այս ընթացքում որոշ մարդիկ ասում էին` Միքայելյան Սասունը դավաճանել է Սերժ Սարգսյանին: Հիմա ես առաջին անգամ հայտարարություն եմ անում. ես Սերժ Սարգսյանի վարչապետ եղած ժամանակ իր աշխատասենյակում ասել եմ, եթե նման մարդկանց հետ գնաս ընտրությունների` ես չեմ գա քո հետ նախագահական ընտրություններին: Ավելին` եթե Սերժ Սարգսյանը այս տարիների ընթացքում երկրում ընդհանուր ներքաղաքական, սոցիալ-տնտեսական վիճակը կարգավորած լիներ` ես գոռոզ տղա չեմ, ես ներողություն կխնդրեի իմ ընկերոջից: Բայց այն, ինչ ասում էի 3 տարի առաջ, այսօր կատարվեց: Հիմա մարդիկ թող մտածեն` ումից պետք է ներողություն խնդրեն: Ե՞ս պետք է ներողություն խնդրեմ, թե՞ «Հանրապետական» կուսակցությունը:

Կպահանջե՞ք Սերժ Սարգսյանի հրաժարականը:

Ինչի՞ համար Սերժ Սարգսյանի հրաժարականը պահանջեմ: Կոնգրեսը կորոշի:

Առաջիկա խորհրդարանական ընտրություններում առաջադրելո՞ւ եք ձեր թեկնածությունը:

Եթե իմանամ երբ է առաջիկա խորհրդարանական ընտրությունները` կասեմ: Նկատի ունեմ արտահերթ և հերթական ընտրությունների հավանականությունը:

… Քաղաքական գործընթացները հնարավոր է հանգեցնեն նրան, որ Ղարաբաղի ազատազրկված տարածքները հետ վերադարձվեն: Դուք ի՞նչ դիրքորոշում ունեք այս հարցում:

Ես կռվող տղա եմ և ոչ մի տարածք չունեմ վերադարձնելու` անկախ քաղաքական հայացքներից: Ես եղել եմ զինվոր, հետագայում նաև քաղաքական գործիչ, սակայն իմ քաղաքականության մեջ միշտ հոգի եմ դրել: Ես չեմ կարող ազատազրկված տարածքները հետ վերադարձնել: Չեմ էլ ժխտում, որ ընդհանուր ներքաղաքական վիճակում ամեն ինչ հնարավոր է:

Իսկ եթե Կոնգրեսն էլ համաձայնի տարածքները վերադարձնելո՞ւն:

Ես վերադարձնելու տարածք չունեմ: Ես զինվոր եմ: Ես տարածքներ եմ գրավել: Կներեք` չեմ գրավել, ազատագրել եմ:

«Ժամանակ»-ի տեղեկություններով, Հայաստանի նախկին արտգործնախարար Վարդան Օսկանյանը հավակնել է հայաստանյան բանկերից մեկի խորհրդի նախագահ դառնալ։ Սակայն, չկարողանալով հաղթահարել բանկի խորհրդի անդամ դառնալու համար անհրաժեշտ պահանջները, նա պարզապես զրկվել է բանկի խորհրդի նախագահի պաշտոնին ընտրվելու մասնակցության իրավունքից։ Թերթը ենթադրում է, որ խոսքը Վարդան Օսկանյանի շեֆի՝ Քոչարյանների ընտանիքի, որոնք մի շարք բանկերի համասեփականատերեր են, բանկերից մեկի մասին է։ «Ժամանակ»-ը հիշեցնում է, որ ըստ ռուսաստանյան «Վերսիա»-ի՝ Քոչարյանները հետևյալ բանկերի համասեփականատերերից են՝ «Արցախբանկ», «Առէքսիմբանկ», «Յունիբանկ», «Հայբիզնեսբանկ», «Կոնվերսբանկ»։

Թերթի իշխանական աղբյուրները հայտնում են, որ երեկ Հատուկ քննչական ծառայությունում Մարտի 1-ի գործի շրջանակներում հարցաքննվել է ՀՀ ոստիկանապետի տեղակալ, քննչական գլխավոր վարչության պետ Գագիկ Համբարձումյանը։

Ըստ «Ժամանակ»-ի տեղեկությունների, Գագիկ Համբարձումյանն անձամբ շատ քիչ առնչություն ունի Մարտի 1-ի գործի հետ, սակայն իր ենթակայության տակ գտնվող ոստիկանության բազմաթիվ քննիչներ, օրենքի խախտմամբ, ներգրավված են եղել ՀՔԾ աշխատանքների մեջ։

Ֆիլմը ռեկտորներին էլ հասավ

«Ժամանակ»-ը գրում է, որ «Մարտի 1» հասարակական կազմակերպությունը Տիգրան Պասկևիչյանի` մարտի 1-ի դեպքերի մասին պատմող «Հայաստանի կորսված գարունը» փաստավավերագրական ֆիլմը երեկ բաժանել է բուհերի ռեկտորներին: Թերթի տեղեկություններով, ֆիլմը բաժանվել է նաև Երևան քաղաքի դպրոցների տնօրեններին:

Դաշնակցությունը պատրաստվում է այսօր` օրվա երկրորդ կեսից կազմաքանդել իշխանական համակարգը: Ընդ որում` նրանք խոստանում են դա անել  հենց նույն իշխանությունների ձեռքերով, գրում է «Ժամանակ»-ը:

Բանն այն է, հիշեցնում է թերթը, որ այսօր խորհրդարանում պետք է քննարկվի ՀՅԴ խմբակցության` կառավարությանը ներկայացրած  հարցապնդումը, իսկ արդյունքում ՀՅԴ-ն պատրաստվում է անվստահություն հայտնել կառավարությանը, ընդ որում` դա անել հենց խորհրդարանական մեծամասնության միջոցով: Ի դեպ, ՀՅԴ-ն արդեն պատրաստել է կառավարությանն անվստահություն հայտնելու ԱԺ որոշման նախագիծը, և հիմա մնում է, որ ներկայացվի խորհրդարանին…

2011 թվականի մայիսի 6-ին «Ժամանակ»-ը տեղեկացրել էր, որ ԱԱԾ աշխատակիցները ձերբակալել են ԱԺ պատգամավոր Լևոն Սարգսյանի (Ալրաղացի Լյով) «Գայդ» մականունով թիկնապահին: Թերթին երեկ հաջողվել է պարզել, որ անցյալ շաբաթավերջին ԱԱԾ աշխատակիցները Երևանում հայտնաբերել են Արմեն Սարգսյանի կողմից ապօրինի ճանապարհով ձեռք բերված Bentley և Mercedes G class ավտոմեքենաներ։ Ընդ որում, հետաքրքրական է, գրում է թերթը, որ Bentley ավտոմեքենան պատկանում է ՀՀ ոստիկանության քննչական գլխավոր վարչության պետի տեղակալ Արսեն Ղազարյանի հորեղբոր որդուն՝ Էդիկ Ղազարյանին:

ԱԱԾ աշխատակիցները պարզել են, որ ավտոմեքենաները ոչ միայն մաքսանենգ ճանապարհով են հասցվել Հայաստան, այլև գողացված են եղել Եվրոպայի տարբեր երկրներում, տեղեկացնում է թերթը։

Ըստ «Ժամանակ»-ի ունեցած հավաստի տեղեկությունների` Երեւանի նախկին քաղաքապետ Գագիկ Բեգլարյանին առաջարկվել է առաջադրվել ԱԺ առաջիկա ընտրություններում որպես պատգամավորության թեկնածու։ «Նախկին քաղաքապետը, ով մերժում էր վերջին շրջանում նրան առաջարկված բոլոր պետական պաշտոնները, կարծես հակված է համաձայնել մաս կազմել ՀՀԿ համամասնական ցուցակին։

Իշխանական մեր աղբյուրները հայտնում են, որ Գագիկ Բեգլարյանին արված առաջարկը պայմանավորված է քրեական աշխարհում նրա ունեցած կապերով եւ բարձր հեղինակությամբ, որոնք քաղաքապետի պաշտոնը թողնելուց հետո մնացել են բարձիթողի վիճակում։ Ազգային ժողովի ընտրություններում քրեական աշխարհի «ներուժն» ի նպաստ Հանրապետական կուսակցության օգտագործելուն ուղղված այս քայլով ՀՀԿ-ն այսպիսով չեզոքացնում է քրեական աշխարհում ոչ պակաս հեղինակություն ունեցող մեկ այլ քաղաքական կուսակցության` Բարգավաճ Հայաստանի հնարավորությունները, որն ի դեպ, արդեն հայտարարել է, որ ԱԺ ընտրություններին առանձին է մասնակցելու»,-գրում է թերթը։

Երեկ «Մենք դեմ ենք օտարալեզու դպրոցների վերաբացմանը»  խմբի նախաձեռնած  օտարալիզության ասպարեզում Դելյանով-Աշոտյանի  անվան մրցանակաբաշխություն էր, գրում է «Ժամանակ»-ը: Ներկայացված թեկնածուներից հանրային համացանցային քվեարկության արդյունքում ընտրվել էին այն երեքը, որոնց էլ շնորհվեց երրորդ,  երկրորդ և առաջին կարգի օտարալեզ մրցանակը: Դրանք էին, համապատասխանաբար, «Լեզվի մասին»  ու «Հանրակրթության մասին» օրենքներում փոփոխությունների մասին օրենքին երկրորդ ընթերցմամբ կողմ քվեարկած ԱԺ 69 պատգամավորները, նախագծի «հոգևոր հայր» համարվող Տիգրան Սարգսյանը և օրենքը ստորագրած Սերժ Սարգսյանը: Մնացած յոթ մասնակիցներին շնորհվեցին պատվոգրեր. Գեղամյան  Արտաշես, Երիցյան Սերգո, «Դիլիջան միջազգային դպրոցի» հոգաբարձուների խորհրդի հայազգի անդամներ Աֆեյան Նուբար, Գրիգորյան Վարդան, Մկրտչյան Էնդրյու, Պողոսյան Հրանտ, Սարգսյան Արմեն, Սարգսյան Տիգրան, Վարդանյան Ռուբեն, Եսաջանյան Բելլա` Մանկավարժական ինստիտուտի պրոֆեսոր, Հարությունյան Խոսրով` նախկին վարչապետ, Ղուկասյան Վարդան` Գյումրի քաղաքի քաղաքապետ, Վարդանյան Ռոբերտ` «Քվանտ» վարժարանի տնօրեն:

«Արդեն 20 տարուց ավելի մենք  անկախացել ենք և կարծես թե  ժողովրդավարական պետություն ենք կառուցում, սակայն  դատաիրավական համակարգում քրեական գործերով  խնդիրները չեն պակասում, հակառակը` գնալով խորանում են»,- երեկ, ըստ «Ժամանակ»-ի, ՄԻՊ գրասենյակի կազմակերպած «Արդար դատաքննության իրավունք» ֆորումի ընթացքում  հայտարարել է ՀՀ փաստաբանների պալատի նախագահ  Ռուբեն Սահակյանը`անդրադառնալով  քրեական  դատավարության ընթացքում արձանագրված խախտումներին:

Ըստ նրա, Վճռաբեկ դատարանն ընդունում է նախադեպային որոշումներ, և հենց ինքը չի կիրառում այդ որոշումները: Սահակյանը հիշեցրել է 2009 թ. Մարդու իրավունքների պաշտպանի զեկույցը դատաիրավական համակարգի վերաբերյալ, ԵԱՀԿ փորձագետների 2010 թ. զեկույցը` կապված մարտիմեկյան դեպքերի հետ, որտեղ արձանագրվել են գրեթե միանման խախտումներ: «Ես փաստաբանների պալատի նախագահն եմ, և ամեն օր ինձ են այցելում քաղաքացիներ,  փաստաբաններ ու ներկայացնում բոլոր այն  խախտումները, որոնք  ամեն օր, ամեն ժամ իրենք տեսնում են դատարաններում, տեսնում են մարդու իրավունքների ոտնահարումներ, անարդար դատավճիռներ,  օրենքի տառին խիստ հակասող դատական ակտեր»,- ըստ թերթի, ասել է Սահակյանը և հավելել, որ չի հասկանում, թե որն է այս ամենի պատճառը:

«Կաշառակերությունը»,- եղել է դահլիճի արձագանքը:

«Դա քիչ  է, միայն  կաշառակերությունը չէ, ես կասեի, որ այսօր կաշառակերությունը պակասել է, բայց կաշառակերության չափերն են ավելացել»,- պատասխանել է Սահակյանը:

«Ինձ մոտ տպավորություն է ստեղծվում, թե ինչ- որ մեկը կախարդական փայտիկով նրանց ասում է` մենք մեկին կպատժենք, հասարակությանը ցույց կտանք, թե պայքարում ենք անօրինականությունների դեմ, բայց դուք շարունակեք աշխատել նույն ոճով, ուշադրություն չդարձնեք մեր նախադեպային որոշումներին, տեսեք` մենք էլ ուշադրություն չենք դարձնում»,- ըստ թերթի՝ այսպիսի հետևություն է արել Ռուբեն Սահակյանը: