«Ժամանակ»-ը գրում է. «Հայաստանը պարադոքսների երկիր է: Կենդանաբանական այգում գազանները կարող են ապրել ուղղակի նույնիսկ վայրի կենդանիների համար անտանելի պայմաններում, իսկ քաղաքապետարանը հոգ տանի գազանանոցում անվճար WiFi կապի մասին: Մարդիկ կարող են ժամերով աշխատանքի գնալիս կամ աշխատանքից տուն գալիս սպասել կանգառներում, իսկ քաղաքապետարանը կարող է մտածել ավտոբուսներում ինտերնետային կապի պիլոտային ծրագիր իրականացնելու կամ կանգառներում ինտերնետ քաշելու մասին:

Մայրաքաղաքի բնակֆոնդը կարող է հասնել մաշվածության եզրին, վերելակները կարող են ուղղակի մարդկանց մահվան պատճառ դառնալ, շենքերը կարող են կորել աղբի մեջ, իսկ քաղաքապետարանը կարող է մտածել շենքերի ֆասադները ներկելու մասին: Մարդիկ կարող են երկրից հեռանալ, արտագաղթել ընդմիշտ կամ տարվա սկզբից մինչև վերջ տուն ու տեղ, ընտանիք թողած մեկնել խոպան, իսկ կառավարության ղեկավարը կարող է հպարտանալ տարածաշրջանում միակ 4G սերնդի տեխնոլոգիա կիրառող երկիր լինելու համար»:

«Ժամանակ» օրաթերթին հայտնի է դարձել, որ տևական ժամանակ է լարվել են Ամենայն Հայոց կաթողիկոս Գարեգին Բ-ի և Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանի հարաբերությունները։ Ըստ թերթի, վերջին շրջանում Նավասարդ սրբազանի գործունեության հանդեպ հանրային դժգոհությունները լրջորեն ազդել են նաև Վեհափառ հայրապետի և Նավասարդ արքեպիսկոպոսի հարաբերությունների վրա:

Թերթի աղբյուրի պնդմամբ՝ Ամենայն Հայոց կաթողիկոսի և Վրաստանի պատրիարք Իլյա Բ-ի միջև Վրաստանում ԶԼՄ-ների համար չնախատեսված զրույցի տեսագրության արտահոսքը կազմակերպել է Նավասարդ արքեպիսկոպոսը` շատ լավ իմանալով դրանից հետո հանրության արձագանքը Վեհափառի անձի հանդեպ»:

Մեդվեդևը հույսը չի կորցրել

Թերթի տեղեկություններով, ՌԴ-ն շարունակում է ակտիվ ջանքեր գործադրել ԼՂ կարգավորման գործընթացում։ ՌԴ նախագահ Դմիտրի Մեդվեդևը լուրջ ջանքեր է գործադրում Սարգսյան-Ալիև հանդիպումը կազմակերպելու ուղղությամբ և մտադիր է մոտ ապագայում Սոչիում անցկացնել բանակցային հերթական ռաունդը` Սերժ Սարգսյանին և Իլհամ Ալիևին համաձայնության հասցնելու, մասնավորապես՝ փաստաթուղթ ստորագրելու նպատակով։ Կհաջողվի՞ արդյոք այս հանդիպումը հնգակողմ անցկացնել, այսինքն` բանակցություններին ներկա կգտնվե՞ն Միացյալ Նահանգների և Ֆրանսիայի նախագահները, թերթի կարծիքով` սա թերևս կախված է լինելու նրանից, թե մինչ այդ կողմերից համաձայնության գնալու ուղղությամբ ինչ ճնշումներ կգործադրվեն և երաշխիքներ կստացվեն։

Թերթի աղբյուրները փոխանցում են, որ Ռոբերտ Քոչարյանը արդեն մեկ ամիս է բանակցությունների համար պատվիրակություն է ուղարկում բոլոր այն մարդկանց մոտ, ովքեր Հանրապետական կուսակցության կամ անձամբ Սերժ Սարգսյանի կողմից վերջին երեքուկես տարվա ընթացքում քաղաքական կամ տնտեսական խնդիրներ են ունեցել։ Ըստ թերթի` Ռոբերտ Քոչարյանի հիմնական խնդիրը Սերժ Սարգսյանից «աբիժնիկ» մնացածներին հաշվառում անելն է՝ քաղաքական դաշտում ակտիվանալու դեպքում նրանց հետ ընդհանուր ճակատով հանդես գալու համար:

«Ժամանակ»-ի դիտարկմամբ` ամռան սկզբից ՀՀ ԱԱԾ-ն փոխել է իր գործունեության հիմնական ուղղությունը. եթե մինչ այդ Հայ ազգային կոնգրեսն ու անձամբ Լևոն Տեր-Պետրոսյանն էին համարվում ԱԱԾ-ի հիմնական թիրախները, ապա այժմ ԱԱԾ-ն իր հիմնական խնդիրն է համարում անձամբ Ռոբերտ Քոչարյանի և նրա շրջապատի շարժը՝ Սերժ Սարգսյանի իշխանության համար իրական սպառնալիք նկատելով հենց նրան:

«Ժամանակ»-ի աղբյուրների փոխանցմամբ՝ սեպտեմբեր ամսին Երևանի նախկին քաղաքապետ Գագիկ Բեգլարյանը, 2010 թ. դեկտեմբերից ի վեր քաղաքական ասպարեզը թողնելուց հետո, առաջին անգամ կհայտարարի ակտիվ քաղաքականություն վերադառնալու մասին։ Ըստ թերթի տեղեկությունների, Գագիկ Բեգլարյանը շարունակելու է մնալ ՀՀԿ անդամ և իր ուժերը ծառայեցնելու է խորհրդարանական ընտրություններում իր կուսակցության օգտին։ Թերթի աղբյուրը հայտնում է նաև, որ Գագիկ Բեգլարյանը պարբերաբար հանդիպում է Սերժ Սարգսյանի հետ, և վերջին անգամ նման հանդիպում տեղի է ունեցել 15 օր առաջ:

«Ժամանակ»-ն անդրադարձել է հուլիսի 19-ին Հայաստանի ոստիկանապետ Ալիկ Սարգսյանի հրամանով Ոստիկանության Երևան քաղաքի վարչության ժամանակավոր պահման ընդունիչ մեկուսարանի պետ Էդիկ Գալստյանի պաշտոնանկությանը: Ըստ թերթին հասած լուրերի` ոստիկանության Ներքին անվտանգության վարչությանը ոստիկանապետը հանձնարարել էր նշված մեկուսարանում ծառայողական քննություն անցկացնել, որի արդյունքում պարզվել է, որ Էդիկ Գալստյանը «ԿՊԶ»-ում գիշերը կազմակերպել է այնտեղ գտնվող մի քրեական հեղինակության հանդիպումը այլ անձի հետ:

Դրա հետևանքով, ըստ թերթի, ինֆորմացիայի արտահոսք է եղել, որն ազդել է մի քրեական գործի նախաքննության վրա:

Թերթի տեղեկություններով, նախօրեին «ինքնասպանություն» է գործել անցյալ տարի, հուլիսի 28-ին ԼՂՀ Մարտունու զորամասի մարտական դիրքերից մեկում սպանված զինծառայողներից մեկի` Կարո Այվազյանի մորեղբայրը:

«Ժամանակ»-ը հիշեցնում է, որ խոսքը մարտական դիրքում սպանված 6 զինծառայողների դեպքի մասին է: Դիակները հրազենային մարմնական վնասվածքներով հայտնաբերելու փաստի առթիվ հարուցվել էր քրեական գործ ՀՀ քրեական օրենսգրքի 104 հոդվածի 2-րդ մասի 1-ին կետի հատկանիշներով` 2 կամ ավելի անձանց սպանություն: Դեպքից հետո Կարոյի մորեղբայրը, որը նախկին ազատամարտիկ էր, թերթին հուզմունքով պատմել էր զարմիկի մահվան մասին ունեցած տեղեկությունների մասին:

Թերթը հիշեցնում է, որ հենց սկզբից նախաքննական մարմինը առաջ էր քաշել Կարոյի կողմից համածառայակիցներին սպանելու, ապա` ինքնասպան լինելու վարկածը, սակայն մինչ օրս հրաժարվում են տղաների հարազատներին տալ գործով նշանակված փորձաքննությունների եզրակացությունները: Իսկ Կարոյի պապիկը` Ջիվան Միքայելյանը, բողոքում էր և պահանջում` քրեական պատասխանատվության ենթարկել իր թոռնիկին ապօրինաբար բանակ զորակոչած (քանի որ նախկինում դատված է եղել) և չզորակոչելու համար «կաշառք ուզած» պաշտոնյաներին: Այդ բողոքից հետո, ըստ թերթի, ինչ-որ անհայտ անձինք սկսել էին ահաբեկել, սպառնալ Ջիվան Միքայելյանին: Դրան հետևել էին նաև Արաբկիր համայնքի թաղապետարանի և Երևանի քաղաքապետարանի կողմից` Ջիվան Միքայելյանին մոտ 3 միլիոն դրամ տուգանելու վերաբերյալ կազմված ակտերը` ապօրինի շինարարություն անելու հիմքով: Թերթը գրում է, որ հուլիսի 20-ին վարչական դատարանում պետք է տեղի ունենար այդ գործով դատական նիստը, որը սակայն հետաձգվել է հայտնի պատճառով:

Վերոնշյալ հանգամանքները կարո՞ղ են կապ ունենալ Կարոյի մորեղբոր «ինքնասպանության» կամ «սպանության» հետ` թերթը կփորձի պարզել առաջիկայում:

Ըստ «Ժամանակ»-ի աղբյուրների` Երևանի կենտրոնում Խանջյան փողոցի վրա գործող JOSE  համալիրը պատկանում է Արարատյան Հայրապետական թեմի առաջնորդական փոխանորդ Տ. Նավասարդ արքեպիսկոպոս Կճոյանին: Ակնհայտ է, որ համալիրը վերջնական տեսքի բերելու համար անհրաժեշտ է եղել ներդնել միլիոնավոր դոլարներ, և թե սանիկներից որ մեկն է այդ միլիոնները նվիրաբերել Սրբազան հորը, մնում է միայն գուշակել` գրում է թերթը և հիշեցնում, որ Նավասարդ արքեպիսկոպոս Կճոյանը սերտ հարաբերություններ ունի Հանրապետական կուսակցության և հատկապես վարչապետ Տիգրան Սարգսյանի հետ, որի հովանավորությամբ էլ, թերթի ենթադրությամբ, կառուցվել և ընդլայնվում է JOSE-ն:

ԱՄՆ‑ում «Ժամանակ»‑ի աղբյուրները հայտնում են, որ Սերժ Սարգսյանի եղբայրը` ՀՀ ԱԺ պատգամավոր Սաշիկ Սարգսյանը, որը երկար ժամանակ է,  ինչ հաստատվել և բնակվում է Լոս Անջելես քաղաքում, դեռ 2005 թ. 2 միլիոն 800 հազար դոլար կանխիկ գումարով գնել է Տարզանա քաղաքի 4935 Avenida Oriente, Tarzana CA 91356-4632  հասցեում գտնվող  առանձնատունը (որի վրա  այնուհետև ծախսել է 300 հազար դոլար` տունը ավարտուն տեսքի բերելու համար): Սաշիկ Սարգսյանին 2005 թ. ի վեր չի հաջողվում վաճառել այս առանձնատունը, որը, նրա գնահատմամբ, այսօր արդեն արժե 3 միլիոն 125 հազար դոլար: Թերթի աղբյուրը հայտնել է, որ ֆինանսատնտեսական ճգնաժամի ընթացքում Հայաստանից ուղարկված կանխիկ գումարով Սաշիկ Սարգսյանը մի կերպ կարողացել է տունը փրկել կորստից` տան համար վերցրած վարկային պարտավորությունները ժամանակին չկատարելու պատճառով:

Անդրադառնալով ՀԱԿ-իշխանություն երկխոսությանը` «Ժամանակ»-ն իր վերլուծականում գրում է. «Ի՞նչ են քննարկելու կոալիցիոն պատվիրակության ՀՀԿ-ական եւ ԲՀԿ-ական անդամները, ինչպես են իրենց պահելու, ինչ շեշտադրումներ են անելու: Ակնհայտ է, որ այսօր իշխանական ճամբարում ՀՀԿ եւ ԲՀԿ ջրերը բոլորովին էլ նույն առվով չեն հոսում, եւ այդ իմաստով իշխանական պատվիրակությունում ստացվում է որոշակի երկակիություն, երկփեղկում: Նաեւ հենց այդ տեսանկյունից է կարեւոր, որ հստակվի, թե ի վերջո ինչ մանդատով է պատվիրակությունը բանակցելու Կոնգրեսի հետ, կամ իրենց լեզվով ասած՝ աշխատանքային քննարկումներ անցկացնելու: Եվ դա առաջին հերթին անհրաժեշտ է նախ եւ առաջ հենց կոալիցիոն պատվիրակության անդամներին: Խոսքն իհարկե ՕԵԿ-ի մասին չէ, քանի որ այդ կուսակցությունը պատվիրակությունում է ընդամենը ձեւի համար, կամ ամոթի խաթեր, կամ էլ որպես բալաստ՝ անհրաժեշտ պահին դրանից ազատվելու համար:

Թեեւ հնարավոր է իհարկե, որ աշխատանքային քննարկումների ընթացքում ջուր-մուր բերելու անհրաժեշտություն լինի, պատուհան բացելու կամ կոնդիցիոները ուժեղացնելու-թուլացնելու: Սակայն «Բարգավաճ Հայաստանին» օրինակ շատ անհրաժեշտ է, որ պատվիրակության մանդատը հստակեցվի եւ պարզ լինի, թե իրենք ի վերջո ում են ներկայացնում այդ աշխատանքային քննարկումներ-բանակցություններում:

Միգուցե այդ հարցը կուսակցությունը Սերժ Սարգսյանի հետ քննարկել ու ստացել է որոշակի պատասխաններ, սակայն դա երեւի թե շատ քիչ է, քանի որ կա հասարակություն, որի աչքի առաջ է լինելու այդ ամենը, հետեւաբար հանրությունը պետք է հասկանա, թե ԲՀԿ-ն ինչ խաղի կանոն է ընդունել տվյալ պարագայում»:

«Ժամանակ» թերթին հայտնի է դարձել, որ Լոռու արդեն նախկին մարզպետ Արամ Քոչարյանն այսօր գիշերը մեկնելու է Մոսկվա:

Թերթը հիշեցնում է, որ կառավարության որոշմամբ` Արամ Քոչարյանը  ս.թ.օգոստոսի 12-ից, իր դիմումի համաձայն, ազատվել է ՀՀ Լոռու մարզպետի պաշտոնից: Թեև նրա մեկնելուց հետո պատճառաբանելու են, թե ողնաշարային խնդիրները բուժելու նպատակով է մեկնել Մոսկվա, բայց իրական պատճառը, ըստ թերթի, վիրավորանքն է: Նեղ շրջանակներում նա ասել է, որ հավանաբար մեկ ամսից կվերադառնա, սակայն, «Ժամանակ»-ի կարծիքով, իրականում հայտնի չէ՝ Հայաստան կվերադառնա՞, թե՞ ոչ: