Թերթը Գյումրիի քաղաքապետ Վարդան Ղուկասյանից փորձել է մեկնաբանություն ստանալ մամուլում հայտնված այն տեղեկատվության վերաբերյալ, ըստ որի Գյումրիի քաղաքապետից ՀՀԿ-ն հետ է պահանջել Գյումրիում ընտրությունները կազմակերպելու համար հատկացված գումարը:

«Մեզ հետ զրույցում Վարդան Ղուկասյանը հերքեց տարածված տեղեկատվությունը եւ բարկացած ասաց. «Ես զարմանում եմ, թե ինչքան մեղք եք դուք: Ուղղակի մեղքում եմ ձեզ եւ ձեր լրատվամիջոցներին, որ էդքան սանձարձակ ու անմակարդակ մարդիկ եք, հաջողություն»»,- գրում է «Ժամանակ» թերթը:

«Ժամանակ».  Թերթը զրուցել է Գյումրիի քաղաքապետ Վարդան Ղուկասյանի հետ: Ներկայացնում ենք հատված հարցազրույցից.

«- Կարծո՞ւմ եք` այս ընտրությունները նոր պատգամավորներով նոր Հայաստան ստեղծելու են:

— Լավ կլինի դա դուք ասեք, բայց ես, ընդհանուր առմամբ, բարետես եմ, լավատես: Եւ ես գիտեմ, որ լավ պետք է լինի, լավ Հայաստան, ուժեղ երկիր, եւ ես հավատում ու վստահում եմ:

— Պարոն Ղուկասյան, Դուք նշեցիք, որ Գյումրիում, ընդհանուր առմամբ, ընդդիմադիր են, նկատի ունեք, որ ԲՀԿ-ն ընդդիմությո՞ւն է:

— ԲՀԿ-ն շինծու ընդդիմություն է, ինչքան էլ այսօր ընդդիմություն է դարձել: Այն ժամանակ դիմություն էր, դարձավ ընդդիմություն, եւ այդպես ժողովրդին կարողացավ ապակողմնորոշել:

— Ապակողմնորոշելով ձայները խլե՞ց Հանրապետականից:

— Այո, որոշակի:

— Ինչպիսի՞ն են հետընտրական հարաբերությունները, ՀՀԿ-ԲՀԿ հարաբերությունները:

— Նորմալ, ինչպես Հայաստանի յուրաքանչյուր քաղաքում, այպես էլ Գյումրիում:

— Բայց Հայաստանի տարբեր մարզերում հետընտրական բախումներ եղան:

— Ես նմանատիպ բաներ չգիտեմ:

— Ի՞նչ եք կարծում, Հայաստանը ժողովրդավա՞ր երկիր է եւ ընտրություններն էլ ժողովրդավարականին մո՞տ են անցնում:

— Գյումրիի ընտրությունները ՀՀ-ում, Եվրոպայից սկսած կարող են գալ տեսնել, որ Գյումրիի քաղաքապետը առանց կեղծիքի, կաշառքի մշտական ընտրվել է, եւ թող գան սովորեն»,- գրում է «Ժամանակը»:

«Ժամանակ». Թերթը գրում է, որ իր հավաստի աղբյուրների պնդմամբ, Հրազդան քաղաքն ընդգրկող թիվ 25 ընտրատարածքից խորհրդարանական  ընտրություններում մեծամասնական ընտրակարգով պատգամավոր ընտրված ԲՀԿ թեկնածու Դավիթ Քոչարյանի կողմնակիցները բազմաթիվ ընտրախախտումներ են թույլ տվել, որոնք հայտնաբերել են ՀԱԿ թեկնածու  Սասուն Միքայելյանի կողմնակիցները:

«Սակայն Կոնգրեսի կենտրոնական գրասենյակը Սասուն Միքայելյանի շտաբի ներկայացուցիչներին «խորհուրդ» է տվել բացահայտված ընտրախախտումներին ընթացք չտալ` հետեւյալ պարզաբանմամբ, թե դրա արդյունքում կարող է խախտվել Միասնական շտաբի գործունեությունը, որում, ինչպես հայտնի է,  բացի ՀԱԿ-ից ներկայացված են նաեւ ԲՀԿ-ն եւ ՀՅԴ-ն: Մեր աղբյուրների  փոխանցմամբ, ՀԱԿ կենտրոնական գրասենյակի պահվածքը լուրջ դժգոհություն է առաջացրել Սասուն Միքայելյանի շտաբի անդամների շրջանում»,- գրում  է «Ժամանակը»:

«Ժամանակ».  Մայիսի 8-ին Ստեփանակերտի զորամասերից մեկում ֆիզպատրաստության ժամանակ՝ շարահրապարակում վազելուց հետո Ստեփանակերտի զինվորական հոսպիտալ տեղափոխված եւ հանկարծամահ եղած զինծառայող Գոռ Մարտիրոսյանի նկատմամբ նշանակվել է դատաբժշկական փորձաքննություն, որից հետո միայն պարզ կդառնա, թե որն է եղել ժամկետային զինծառայողի մահվան պատճառը։ Այդ մասին գրում է «Ժամանակ» թերթը:

«ՀՀ ՊՆ քննչական լրատվական ծառայությունից Մերի Սարգսյանը «Ժամանակին» ասաց, որ առայժմ տեղեկություններ չկան, թե տղան բանակ է զորակոչվել շարային, թե ոչ շարային ծառայության համար, քանի որ, ըստ մեր տեղեկությունների, Գեղարքունիքի մարզի Սեւանի շրջանի Դդմաշեն համայնքից զորակոչված, արդեն 1 տարվա զինծառայողը դեռ փոքր տարիքից սրտի հետ կապված խնդիրներ է ունեցել, իսկ զորակոչելուց առաջ բժշկական հանձնաժողովը դա պետք է որ նկատած լիներ»,- գրում է «Ժամանակը»։

«Ժամանակ». Կենտրոնի բնակիչներ, ՀՅԴ անդամներ  Վահան Հովհաննիսյանն ու Լեւոն Մկրտչյանը ընտրելու են իրենց` թիվ 10 ընտրատարածքում մեծամասնական կարգով առաջադրված անկուսակցական, ՀՀԿ կողմից առաջադրված Գարեգին Նուշիկյանին: Այդ մասին գրում է «Ժամանակը»:

«Վահան Հովհաննիսյանը ցանկանում է այս ընտրատարածքում հաղթող տեսնել Գարեգին Նուշիկյանին, քանի որ մեր երկրի տնտեսության զարգացման համար հարկավոր է տնտեսական նոր` մաքուր կուլտուրա, որի կրողներից մեկն էլ հենց Գարեգին Նուշիկյանն է: Իսկ Լեւոն Մկրտչյանը նրան է ընտրելու, որովհետեւ նախ` Կենտրոնում միասին են մեծացել, եւ երկրորդ` նա վստահ է, որ իբրեւ բիզնեսմեն եւ հայրենասեր մարդ Նուշիկյանը միայն օգտակար դերակատարում կունենա Ազգային ժողովում»,- գրում է «Ժամանակ» թերթը։

«Ժամանակ» Թերթի հետ զրույցում, անդրադառնալով այս ընտրությունների առանձնահատկություններին, «Ազատ դեմոկրատներ» կուսակցության նախագահ, «ժառանգություն» — «Ազատ դեմոկրատներ» կուսակցությունների նախընտրական շտաբի ղեկավար Խաչատուր Քոքոբելյանը մասնավորապես նշել է.

«Հայաստանի նորանկախ պետության ամբողջ քաղաքական պատմության ընթացքում առաջին անգամ կոալիցիոն ուժերից մեկը` ԲՀԿ-ն, փորձեց ներկայանալ ընդդիմության դաշտում` որպես ընդդիմադիր, ու իմ խորին համոզմամբ, դա փորձ է ընդամենը, որովհետեւ մայիսի 6-ից հետո մենք ականատես կլինենք այլ պրոցեսի:

— Բայց դա արվեց նաեւ ընդդիմության որոշ ներկայացուցիչների թեթեւ ձեռքով:

— Անշուշտ, ինձ համար նաեւ շատ զարմանալի է, որ ՀԱԿ-ի իմ ընկերների լռությամբ կամ աջակցությամբ տեղի ունեցավ այդ գործընթացը:
Միգուցե իրենց տպավորությամբ  քաղաքական առումով այդ գործընթացը հանրության լայն շերտերին հասկանալի չէր, բայց ես վստահ եմ, որ շատերը հասկացան, թե ինչ տեղի ունեցավ, եւ իրենց իսկ լեզվով, մասնավորապես, ՀՅԴ ներկայացուցչի բնութագրմամբ, տեղի ունեցավ բյուրեղացում: Ես իրոք կարծում եմ, որ տեղի ունեցավ այդ բյուրեղացումը, եղավ թե աշխարհաքաղաքական առումով, թե զուտ մոտեցումների առումով… »,- գրում է «Ժամանակ» թերթը:

Երեկ, ժամը 09,30-ին ոստիկաններն այցելել են ՌԱՀՀԿ ղեկավար, Մաշտոցի պուրակի ապամոնտաժող կրպակներից առաջին բրիգադի անդամ Մանվել Սարգսյանին`պատճառաբանությամբ, որ ապրիլի 15-ին պուրակում իրականացված գործողությունների ժամանակ բազրիքն անցել է, որի համար ցանկացել են ակտավորել: Այդ մասին գրում է «Ժամանակը»:

««Ասացի` ինչո՞ւ չեք ակտավորել տեղում, պատասխանեցին, որ իրենք այսպես էլ իրավունք ունեն ակտավորելու»,- «Ժամանակին» տեղեկացրերց Մանվել Սարգսյանը: Հարցին` ոստիկանության այս քայլը արդյոք վախեցնելո՞ւ, ընկճելո՞ւ նպատակ ունի, Մ. Սարգսյանը պատասխանեց, որ իրենք իրենց ոտքով-ձեռքով պուրակ են եկելեւ հայտարարել` եթե անօրինական են իրենց գործողությունները, ձերբակալեն եւ տանեն: Պարզապես, նրա խոսքերով, հիմա սկսել են քաղաքակիրթ եղանակով զբաղվել, մինչեւ հիմա ոտքով-ձեռքով էին զբաղվում»,- գրում է «Ժամանակ» թերթը:

«Ժամանակ». Թերթը գրում է, որ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում ապրիլի 5-ին կշարունակվի 8 տարբեր աղջիկների պոռնկությամբ շահագործած կանանց հանցախմբի դատավարությունը: «Հանցախմբի, ըստ երեւույթին, ղեկավար համարվողին` բանգլադեշցի Աղունիկ Այվազյանին, մեղադրանք է առաջադրվել այն բանի համար, որ նա թրաֆիքինգի` շահագործման նպատակով մարդկանց հավաքագրելու, տեղափոխելու, փոխանցելու, թաքցնելու, ստանալու, ինչպես նաեւ սեռական շահագործման ենթարկելու ու պահելու դիտավորությամբ, միավորվելով Արաբական Միացյալ Էմիրություններում բնակվող Նելլի Ներսիսյանի հետ եւ վերջինիս միջոցով նաեւ Ծովիկ Ավետիսյանի, Վահան Ավետիսյանի, Հասմիկ Առաքելյանի, Ազատուհի Հայրապետյանի, Աշոտ Ներսիսյանի, Սիլվա Հովսեփյանի, ոմն Նառայի, Սերինեի եւ քննությամբ դեռեւս չպարզված այլ անձանց հետ, ստեղծել է կազմակերպված հանցավոր խումբ եւ իր հանցավոր մտադրությունն իրականացնելու նպատակով հավաքագրված կանանցից վերցրել է անձնագրերը, ապա առողջության համար վտանգավոր բռնություն գործադրելու սպառնալիքով եւ ոչ վտանգավոր բռնության գործադրմամբ, վիճակի խոցելիությունը օգտագործելով, ներգրավել է նրանց մարմնավաճառության մեջ` տեւական ժամանակ դնելով եւ պահելով պոռնկության շահագործման վիճակի մեջ ու ստացել նրանց կողմից վաստակած գումարները:

Թրաֆիքինգի վերաբերյալ հերթական գործը Կենտրոնի դատարան ստացվել է 2011 թվականի հունիսին, իսկ գործն այժմ քննվում է դատավոր Գագիկ Պողոսյանի նախագահությամբ»,- գրում է «Ժամանակ»-ը:

«Ժամանակ». Թերթը գրում է, որ թիվ 19 ընտրատարածքում մեծամասնական ընտրակարգով պատգամավորի թեկնածու առաջադրված Հակոբ Հակոբյանը պատրաստվում է դիմել վարչական դատարան` բողոքարկելու ՀՀԿ-ի կողմից նույն ընտրատարածքում առաջադրված գեներալ- մայոր Սեդրակ Սարոյանի` վերջին 5 տարում Հայաստանում մշտապես բնակվելու վերաբերյալ տրամադրված տեղեկանքի իսկությունը: « Այդ մասին նա ասաց «Ժամանակ»-ի հետ զրույցում: Հիշեցնենք, որ թիվ 19 ԸԸՀ-ն նախօրեին Սեդրակ Սարոյանին գրանցել էր պատգամավորի թեկնածու»,- գրում է «Ժամանակ»-ը:

«Ժամանակ». Թերթը զրուցել է Ֆրանսիայի Ռազմավարական հետազոտությունների հիմնադրամի փորձագետ , քաղաքագետ Կայծ Մինասյանի հետ: Ներկայացնում ենք հատված զրույցից:

Եվրախորհրդարանը օրերս Հայաստանի վերաբերյալ նախագիծ է պատրաստել, որտեղ առաջարկվում է ԵԱՀԿ Մինսկի խմբում Ֆրանսիան փոխարինել Եվրամիությամբ: Ի՞նչպես կգնահատեք այս նախագիծը եւ արդյոք այն իրատեսական է:

Շատ հավանական է, որ այս նախագիծն ընդունվի խորհրդարանում, որովհետեւ հանձնաժողովը կողմ է քվեարկել, իսկ լիագումր նիստն ընդհանրապես նույն կերպ է քվեարկում, բայց սա չի նշանակում, թե Ֆրանսիան պետք է թողնի իր առողտ Մինսկի խմբի կազմում: Այս հարցին մի քանի տեսանկյունից պետք է նայենք` արդյոք Ֆրանսիա՞ն պետք է ներկայացնի Եվրամիությունը, կամ էլ Ֆրանսիան պիտի թողնի՞ իր տեղը, որ ԵՄ մեկ այլ երկիր իբրեւ ԵՄ ներկայացուցիչ մտնի Մինսկի խմբի մեջ, կամ արդյոք ԵՄ-ն իբրեւ ուղղակի կազմակերպություն պիտի մտնի՞  Մինսկի խմբի մեջ, քանզի  ՄԽ-ի մեջ ներգրավվելը մեկ բան է, նախագահության անդամ լինելը` այլ բանն: Այսինքն` եթե ԵՄ-ն ուզում է ավելի ակտիվորեն մասնակցել ԼՂ հարցի կարգավորման գործընթացին, ապա պետք է հստակեցնի իր մասնակցության ձեւաչափը` որպես համանախագա՞հ, թե՞ ուղղակի ՄԽ անդամ դառնալով` այնպես Թուրքիան է կամ մեկ այլ երկիր:

Այս նախագծի շրջանառության մեջ դնելուց ի վեր տարբեր կարծիքներ են հնչում, բայց ամենաշատը դիտարկվում է այն հանգամանքը, որ այս նախագիծը ստեղծվել է Ադրբեջանի եւ Թուրքիայի ճնշումների տակ:

Պետք չէ միանշանական պնդել Ադրբեջանի եւ Թուրքիայի հանգամանքը, քանզի եվրոպացիները նաեւ իրենց շահն են հետապնդում` ԵՄ-ում ներքին խնդիր կա, եւ ֆրանսիացիներն ու գերմանացիները ցանկանում են կարեւոր գործընթացներում որոշիչ տեղ գրավել, եւ ԵՄ անդամ այլ երկրներ, ըստ երեւույթին, ցանկություն կունենան հանդես գալ այս երկրների փոխարեն, բայց ամեն դեպքում չեմ կարծում, որ Ֆրանսիան կզիջի:

Չեմ կարծում, որ Ֆրանսիան զրկվի իր տեղից ՄԽ-ում, շատ հավանական է, որ պարզապես ԵՄ-ն ՄԽ-ում Ֆրանսիայի ներկայացուցիչ ասի, որ դու ոչ միայն Ֆրանսիայի ներկայացուցիչ ես, այլեւ ԵՄ-ի: Ավելին` այս պահին դե ֆակտե այդպես է: