Րաֆֆի Հովհաննիսյանը Մոսկվայից վերադարձից հետո Ազատության հրապարակի հանրահավաքում որևէ անդրադարձ չկատարեց Մոսկվա կատարած այցելությանը:

Այցը հայտարարվել էր մասնավոր, ու թեև Րաֆֆի Հովհաննիսյանն էլ օդանավակայանում շեշտել էր, որ այն կապ չուներ հետընտրական զարգացումների հետ, այնուամենայնիվ նա Մոսկվա գնալուց առաջ հայտարարել էր, որ գնում է հայ ժողովրդի հաղթանակը բերելու: Եվ բացի դա էլ, Րաֆֆի Հովհաննիսյանը հասուն և փորձառու քաղաքական գործիչ է ու հասկանում է, որ անգամ զբոսաշրջային այցը այս իրավիճակում ունի քաղաքական ընդգծված ենթատեքստ, և այն առնվազն պետք է համոզիչ կերպով փարատել:

Քանի որ Րաֆֆի Հովհաննիսյանը հայտարարել է, որ հանդիպումներ ունեցել է «համապատասխան պաշտոնյաների» հետ, ուրեմն ակնհայտ է, որ այստեղ արդեն այցելությունը ստանում է հստակ քաղաքական երանգ: Հետևաբար, այն պահանջում է հաշվետվողականություն սեփական համակիրների առաջ:

Րաֆֆի Հովհաննիսյանի լռությունն այստեղ կարող է մի քանի պատճառ ունենալ: Կա՛մ նա մոսկովյան հանդիպումների արդյունքում որևէ ասելիք չունի, այսինքն՝ հանդիպումները որևէ խոստումնալից կամ էական նշանակություն չեն ունեցել Հովհաննիսյանի և նրա հետագա գործունեության համար, կա՛մ այդ հանդիպումները եղել են այնքան ցածր աստիճանակարգով, որ պարզապես անհարմար է դրանց մասին բարձրաձայն հնչեցնել: Չի բացառվում մեկ այլ պատճառ՝ Րաֆֆի Հովհաննիսյանը հանդիպումների մասին հաշվետվություն չի ներկայացրել հանրահավաքին, որովհետև նախ՝ դեռևս չի ամփոփել արդյունքները և չի ցանկացել հախուռն, ցաքուցրիվ կերպով դրանք ներկայացնել, թեև կարծես թե մինչև այսօր նա չի խուսափել նման ելույթներից՝ կարևոր հարցերի վերաբերյալ, կամ էլ նա հանրահավաքի մասնակիցների թիվը և ընդհանրապես աուրան բավարար չի համարել մոսկովյան այցելության մասին խոսելու համար՝ որոշելով սպասել առավել հարմար և ազդեցիկ ֆորմատի: Ի վերջո, «Ժառանգության» ապրիլի 12-ի հանրահավաքը բավական սակավամարդ էր:

Այսպես, թե այնպես, պետք է փաստել, որ եթե Հայաստանի ներսում ունեցած իր հանդիպումների վերաբերյալ «Ժառանգության» առաջնորդը տալիս էր տեղեկություններ հանրությանը, ապա Մոսկվայի դեպքում նա խուսափում է թափանցիկությունից: Իսկ դա հիմք է տալիս ենթադրել, որ ի թիվս այլ պատճառների՝ Րաֆֆի Հովհաննիսյանը կարող է լռել նաև պարզապես Մոսկվայի ցուցումով, ինչն ամենևին հօգուտ նրա չի խոսում:

Ժամանակ

Երեկ կեսգիշերին Հրաչյա Քոչար-Փափազյան խաչմերուկում վթարի է ենթարկվել նախկին ՀՀԿ-ական, ներկայումս ԲՀԿ շարքերը համալրած Զոհրաբ Զոհրաբյանը։

Վերջինս վարորդի հետ անգիտակից վիճակում տեղափոխվել է «Արմենիա» ԲԿ։ Ըստ ԱԻՆ լրատվական ծառայության՝ դեռևս չբացահայտված հանգամանքներում բախվել են «Օպել Վեկտրա» մակնիշի 34VU251 պետհամարանիշի և «Չերրի» մակնիշի 09UL425 պետհամարանիշի ավտոմեքենաները:

«Արմենիա» Բժշկական կենտրոնից երեկ գիշերը «Ժամանակին» հաղորդեցին, որ տուժողներից մեկը՝ Զոհրաբ Զոհրաբյանը, անգիտակից վիճակում է բերվել հիվանդանոց և այժմ վերակենդանացման բաժանմունքում է։ Նրա վիճակը բժիշկները գնահատում են ծայրահեղ ծանր։ Նա մեր զանգի պահին գտնվում էր հետազոտման փուլում, կոմպյուտերային տոմոգրաֆիա էր անցնում, այնպես որ՝ վերակենդանացման բաժնի հերթապահ բժիշկը չկարողացավ ասել, թե ինչ վնասվածքներ ունի։ «Դեռևս հետազոտվում է, վիճակը ծայրահեղ ծանր է»,- ասաց նա։

Մեր հարցին՝ նրա կյանքին վտանգ սպառնո՞ւմ է, բժիշկը պատասխանեց. «Չեմ կարող ասել, դեռևս հետազոտման փուլում է»։ Մեր զանգի պահին՝ գիշերը ժամը 2-ին, հիվանդանոց էին գնացել ոստիկանները։ Ըստ մեր տեղեկությունների՝ Զոհրաբյանի մեքենայի հետ վթարված մյուս մեքենայի վարորդը «Շառ» մականունով թմրամոլ է, որին տեղափոխել են վիրահատարան:

Ժամանակ

Գործարար Միխայիլ Բաղդասարովին պատկանող Արմավիայի սննկացմամբ գործազուրկ են դառնում ընկերության մոտ 400 աշխատակիցներ: Այս մասին այսօրվա համարում գրում է «Ժամանակ» օրաթերթն ու հավելում է, որ ընկերությունը օդաչուներին պարտք է 5 ամսվա աշխատավարձ՝ 2012 թվականի նոյեմբերից մինչև 2013 թվականի մարտ: Թերթն այս մասին տեղեկացել է ավիաընկերության օդաչուներից մեկից, ում խոսքով էլ սնանկ հայտարարվելու պահին ընկերությունում աշխատելիս է եղել 50 օդաչու, որոնց աշխատավարձը տատանվելիս է եղել ամսեկան 2-3 միլոն դրամ:

Շատ մոտավոր հաշվարկներով այդ պարտքը կազմում է 600 միլոն դրամին մոտ գումար: Բացի օդաչուներից, Արմավիան չի վճարել բորտուղեկցորդուհիների և ավիաինժիներների աշխատավարձը:

Ժամանակ

Թերթի աղբյուրների տեղեկացմամբ՝ ԲՀԿ առաջնորդ Գագիկ Ծառուկյանը Fly Dubai ավիաընկերության չվերթով մարտի 31-ին կվերադառնա Երեւան:

Մեր տեղեկություններով՝ Գագիկ Ծառուկյանն առաջիկայում երկրից չի բացակայի: Նա ապրիլի 7-ից ամբողջ ներուժով կմասնակցի ԲՀԿ Երևանի ավագանու նախընտրական քարոզարշավին:

Նշենք, որ ԲՀԿ նախագահ Գագիկ Ծառուկյանը, ԱԺ ՀՀԿ խմբակցության պատգամավոր Սամվել Ալեքսանյանն ու ռուսաստանաբնակ օլիգարխ Սամվել Կարապետյանը մարտի 19-ից հանգստի համար գտնվում էին Դուբայում: Ընդ որում զարմանալի զուգադիպությամբ այս երեք օլիգարխները Դուբայ են մեկնում նույն կազմով և կրկին` ընտրություններից առաջ:

Ի դեպ, ըստ մեր տեղեկությունների՝ Ծառուկյանը Դուբայ էր մեկնել ավագ որդու ծննդյան տարեդարձը նշելու:

Ժամանակ

Գյումրիի նախկին քաղաքապետ Վարդան Ղուկասյանը իր մտերիմներով ու նախկին աշխատողներով ստվերային քաղաքապետարանի նման ինչ-որ կառույց է ստեղծել, ժամանակ առ ժամանակ «նիստեր» ու «խորհրդակցություններ» է անցկացնում, ելույթներ ունենում և մասնակիցներին հանձնարարականներ տալիս:

Ասենք՝ հանձնարարում է ստուգել Գյումրիում աղբահանության, փողոցների և քաղաքային այլ տնտեսությունների վիճակը, ապա վիճակի մասին զեկուցել իրեն: Այնուհետև արդյունքների մասին հայտարարություններ է անում, հեռուստաեթերով ելույթներ ունենում և այլն: Մի խոսքով, լուրջ «վերահսկողության» տակ է պահում Ս. Բալասանյանին:

«Ժամանակը»  փորձեց անձամբ Վարդան Ղուկասյանից պարզել՝ ինչո՞ւ է նման գործընթաց սկսել և այդպիսով ի՞նչ նպատակ է հետապնդում՝ անտանելի՞ դարձնել Ս. Բալասանյանի աշխատանքը իրենից հետո Գյումրիում քաղաքապետ դառնալու համար, թե՞ պարզապես ցանկանում է նրա գործունեության վրա հասարակական վերահսկողություն սահմանել: Սակայն նախկին քաղաքապետը չցանկացավ պատասխանել մեր հարցերին:

Ժամանակ

Միկա ցեմենտ» գործարանի բանվորները բողոքի ակցիա էին կազմակերպել Հրազդան քաղաքում եւ պահանջում էին վճարել իրենց ամիսներով կուտակված պարտքը:

Նրանք, ի դեպ, դեռ չեն ստացել հոկտեմբեր ամսվա աշխատավարձի պարտքը: Մինչդեռ գործարանի տնօրեն Նաիրա Մարտիրոսյանը նույնիսկ տեղյակ չէր, որ աշխատակիցները բողոքի ակցիա են անցկացրել: «Ժամանակի» հետ զրույցում մեր այն հարցից, թե ինչ իրավիճակ է և ինչու են բողոքում բանվորները, նա զարմացավ, և ինքը հետաքրքրվեց, թե որտեղ և երբ է ակցիա եղել: Ըստ նրա՝ միայն 1 ամիս է, որ բանվորները չեն ստացել աշխատվարձ, որը շուտով կվճարեն: «Երբ գործարանը աշխատի, կստանան»:

Ժամանակ

Թերթի տեղեկություններով՝ Երևանի ավագանու ընտրություններում հաղթանակ ապահովելու համար Հանրապետական և «Բարգավաճ Հայաստան» կուսակցությունները ոտքի են հանել իրենց հետ կապ ունեցող «հեղինակություններին»:

ԲՀԿ-ն, օրինակ, փորձում է նորից օգտագործել Գագիկ Ծառուկյանի հովանավորյալ Բանգլադեշցի Համոյի՝ Աշոտ Ավետիսյանի «հնարավորությունները»: Բայց քանի որ ԲՀԿ-ի յուրաքանչյուր նման քայլ անմիջապես գրավում է ոստիկանապետ Վլադիմիր Գասպարյանի ուշադրությունը՝ դրանից բխող հնարավոր հետևանքներով, կուսակցությունը որոշել է այս անգամ զգույշ գործել:

Ըստ այդմ՝ փորձում են այնպես անել, որ իրավապահ մարմինների ուշադրությունը չգրավեն՝ կալանավայրերում չհայտնվելու հեռահար նպատակով՝ ինչպես անցած խորհրդարանական ընտրություններից առաջ պատահեց նույն Բանգլադեշցի Համոյի հետ: Ըստ շրջանառվող տեղեկությունների՝ ԲՀԿ-ն նաև փորձում է դիմել Հայաստանից դուրս գտնվող քրեական «հեղինակությունների» օգնությանը:

Մեր տեղեկություններով՝ Գ. Ծառուկյանը այս ընտրություններին որոշել է նաև աննախադեպ ծավալի գումար ծախսել: Ծառուկյանի և ԲՀԿ-ի այլ գործիչների կտրուկ հայտարարություններից ակնհայտ է, որ նրանք Երևանի ավագանու ընտրություններին մեծ ակնկալիք ունեն՝ բարձր տոկոսներ ստանալու առումով: Եթե չհաջողեն հաղթել ու քաղաքապետ ունենալ, գոնե ավագանու կազմում ավելի մեծ խմբակցություն ունենալ:
Ի դեպ, նույնպիսի մեթոդոլոգիա է պատրաստվում օգտագործել նաև ՀՀԿ-ն:

Ժամանակ

Նախկին նախագահ Ռոբերտ Քոչարյանի գրասենյակի տնօրեն Վիկտոր Սողոմոնյանը երեկ «Ժամանակին»  ասել է, թե առաջին անգամ է լսում, որ Սեդրակ Քոչարյանը Երևանի ավագանու ընտրություններում կարող է գլխավորել «Բարգավաճ Հայաստան» կուսակցության ցուցակը:
Հիշեցնենք, որ անցած շաբաթ մամուլում հրապարակում կար, թե Ռ. Քոչարյանի ավագ որդին կգլխավորի ԲՀԿ-ի ցուցակը:

2 օր առաջ էլ ԲՀԿ մամլո խոսնակ Տիգրան Ուրիխանյանն էր մեզ հետ զրույցում նշել, թե «Երևանի ավագանու ընտրությունների հետ կապված ԲՀԿ մասնակցության, ձևաչափերի տարբերակների կամ առհասարակ հարցերի առումով չի կարող հավաստի տեղեկատվություն լինել, քանի որ կուսակցությունը դեռ չի քննարկել, հետևաբար՝ չունի որոշում, և չկա պաշտոնական տեղեկատվություն»:

Սակայն «Ժամանակի» տեղեկություններով, ԲՀԿ վերնախավը փետրվարի 24-ին Աղվերանում փոքր հավաք է կազմակերպել, որի ժամանակ էլ քննարկվել է այդ հարցը: Ճիշտ է, ԲՀԿ ղեկավար Գագիկ Ծառուկյանն այդ օրերին Հայաստանում չի եղել, բայց այդ հարցը կուսակցական վերնախավում և նաև նրա գիտությամբ, այնուամենայնիվ, քննարկվել է:

Ամեն դեպքում, վերը նշված երկու անձինք չէին հերքել, որ Երևանի ավագանու ընտրություններում Ս. Քոչարյանը չի գլխավորելու ԲՀԿ-ի ցուցակը:

Ժամանակ

Քայքայիչ պաշտամունքից տուժածների վերականգնման եւ օգնության կենտրոնի տնօրեն Ալեքսանդր Ամարյանը «Ժամանակ» թերթի հետ զրույցում տեղեկացրել է, որ վերջերս Հայաստան են ներթափանցել նոր աղանդներ, որոնք պատկանում են խարիզմատիկ եկեղեցիների թվին։  «Մեկը «Աստծո հարսնացուներ» է անվանվում, մյուսը՝ «Կենդանի հավատք»։

Երկուսն էլ ժամանակին մի մարմնի կողմից են ֆինանսավորվել, սակայն 2004-ին հավատքը դուրս է եկել և այժմ սկսել է մենակ գործել։  «Աստծո հարսնացուներ» աղանդը Կիեւում գտնվող համանուն աղանդավորական կառույցի մասնաճյուղն է, որը ղեկավարվում է Աֆրիկայում ապրող մի կնոջ կողմից։ Մանագետների մեկնաբանությամբ՝ աղանդավորական կառույցները ֆինանսավորվում են արտասահմանից, հիմնականում՝ ԱՄՆ-ից:

Ժամանակ

Նախագահի ընտրություններից հետո, մայիսին տեղի են ունենալու Երեւանի քաղաքապետի և ավագանու նոր ընտրություններ:

Որոշ տեղեկություններով, պաշտոնաթող քաղաքապետ, այժմ կապի եւ տրանսպորտի նախարար Գագիկ Բեգլարյանն ուզում է կրկին քաղաքապետ դառնալ։ Երեկ ԱԺ եկած Գագիկ Բեգլարյանին «Ժամանակը» հարց ուղղեց՝ ճի՞շտ է, որ ուզում է նորից քաղաքապետ դառնալ եւ ավագանու առաջիկա ընտրությունների մասնակցելո՞ւ է։ «Քաղաքապետի ընտրությունները կատարվում են համամասնական ընտրացուցակով, որտեղ ավագանու ցուցակը որոշում են ՀՀԿ կողմից ներկայացվելիք մարդիկ, իրանք կորոշեն։ Ոնց կուսակցությունը որոշում կկայացնի, մենք էդ ձեւ կծառայենք կուսակցությանն ու ժողովրդին»,- պատասխանեց Բեգլարյանը՝փաստացի չթաքցնելով, որ դեմ չէ կրկին քաղաքապետ դառնալուն:

Ժամանակ