Բելգիայում այս տարվա Եվրախորհրդարանի ընտրություններում հաղթել են ազգայնական կուսակցությունները՝ Նոր Ֆլամանդական դաշինք կուսակցությունը և Սոցիալիստական կուսակցությունը: Սրանք նախընտրական շրջանում խոստացել են փոխել միգրացիոն քաղաքականությունը, այն է՝ այլ երկրից միգրանտներին Բելգիայում քաղաքացիություն կամ ժամանակավոր ապաստան տալ միայն ծայրահեղ դեպքում:

Ընտրություններից կարճ ժամանակ անց արդեն նկատվում են նրանց վարած քաղաքականության առաջին պտուղները:
Տեղի հայ համայնքի ներկայացուցիչներից Լ. Հայրապետյանը «Ժամանակի» հետ զրույցում ասաց, որ Մագիդա Բլոգը, ով մասնագիտությամբ բժշկուհի է, և հենց ինքն է զբաղվում միգրանտներին քաղաքացիություն կամ ժամանակավոր ապաստան տալու հարցով, մոտ մեկ շաբաթ առաջ հայտարարել է, որ 40 տոկոսով իր շնորհիվ իջել է միգրանտների թիվը:

Մեր զրուցակիցը նշում է նաև, որ եթե նախկինում Հայաստանում բուռն ու ակտիվ քաղաքական կյանք էր, և մարդիկ ապաստան ստանալու համար որպես պատճառ ներկայացնում էին քաղաքական հետապնդումը կամ քաղաքական հալածանքը, ապա հիմա այլևս դրա հնարավորությունը չունեն և մեծ մասամբ առաջ են քաշում առողջական խնդիրներ. «Հատկապես հայաստանցիները գալիս են բժշկական խնդիրներով, բայց նորից ետ են ուղարկվում, որովհետև թե՛ դիալեզի, թե՛ նույնիսկ քաղցկեղի դեպքում այլևս չեն ընդառաջում ու ժամանակավոր ապաստանի փաստաթուղթ չեն տալիս»:

Մեր զրուցակիցն ընդգծեց նաև, որ Բելգիայի տարբեր քաղաքներում կան հայ համայնքի շահերը ներկայացնող 10-ից ավելի կազմակերպություններ՝ մեկը զբաղվում է եկեղեցին ներկայացնելով, մյուսը՝ մշակույթը, երրորդն էլ հատուկ միգրանտների հարցերով է զբաղվում: Հիմա այդ կազմակերպությունները պատրաստվում են միավորվել և հենց հայ միգրանտների հարցերով Բելգիայի կառավարությանը պահանջներ ներկայացնել:

Ժամանակ

ԵԱՀԿ գործող նախագահի անձնական ներկայացուցիչ Անջեյ Կասպրշիկը հայտարարել է, որ հայ-ադրբեջանական շփման գծում լարվածությունը վտանգի է ենթարկում ԵԱՀԿ դիտորդների կյանքը, որոնք շփման գծի դիտարկումներ են իրականացնում: ԵԱՀԿ գործող նախագահի անձնական ներկայացուցչի այդ հայտարարությունները շատ ուշագրավ են, նման հայտարարություն՝ դիտորդների կյանքին սպառնացող վտանգի մասին, կարծես թե երբեք չի հնչել: Ինչն է խնդիրը:

ԵԱՀԿ գործող նախագահի անձնական ներկայացուցիչը հայտարարում է դիտորդների կյանքին սպառնացող վտանգի մասին: Եթե սա ռազմական գործողությունների վերսկսման վտանգի մասին ուղղակի ահազանգ չէ, ապա, ըստ էության, կարող է հանդիսանալ արդեն «ձեռքերը լվանալու» ազդակ: Այսինքն՝ Կասպրշիկի հայտարարությունը կարող է նշանակել, որ ԵԱՀԿ մոնիտորինգի ինստիտուտը լվանում է ձեռքերը հայ-ադրբեջանական շփման գծից և կողմերին թողնում է դեմ դիմաց: Իսկ սա կարող է շատ հեռուն տանող հետևանքներ ունենալ, եթե վերածվի իսկապես առարկայական գործընթացի, այսինքն՝ եթե հարցն իսկապես առկա է օրակարգում և քննարկվում է ԵԱՀԿ շրջանակներում: Հարկ է հիշեցնել, որ Կասպրշիկի հանդեպ ուշադրությունը վերջին օրերին հատկապես սրվեց նախիջևանյան միջադեպից հետո, երբ նրան հրավիրեցին Հայաստանի ՊՆ և ուղիղ հորդորեցին քայլեր ձեռնարկել սահմանային կայունության ուղղությամբ: Սա ևս աննախադեպ քայլ էր հայկական կողմից, ինչը վկայում է այն մասին, որ Նախիջևանի ուղղությամբ կրակոցները ըստ էության հայկական կողմում էլ մեծ անհանգստություն էին առաջացրել: Իսկ սա էլ իր հերթին գուցե վկայում է, որ ԵԱՀԿ-ն ըստ էության հայտնվել է խաղից դուրս մնալու վտանգի առաջ և այսպիսով փորձում է կա՛մ սահուն կերպով դուրս գալ խաղից, այսինքն՝ դեմքը պահելով և ցույց տալով, որ մտածում են դիտորդների անվտանգության մասին, կա՛մ էլ ԵԱՀԿ-ն այս խնդիրը նախաձեռնում է, որպեսզի կանխի դերակատարման հետագա նվազման գործընթացը և հակամարտության կողմերին ստիպի վերադառնալ ԵԱՀԿ կանոնակարգման և վերահսկման շրջանակ: Այսպես, թե այնպես՝ ակնհայտ է, որ ղարաբաղյան խնդրում արձանագրվել է ուժերի հավասարակշռության էական տեղաշարժ ոչ միայն կողմերի դիրքավորման, այլ նաև ներգրավված միջնորդների մասով, և ԵԱՀԿ-ն առնվազն ազդարարում է իր կարևորության, իր կշռի նվազման միտումների մասին: Եվ այս կոնտեքստում հատկապես հետաքրքրական է դառնում և Մոսկվայում Թուրքիայի արտգործնախարարի հավակնոտ հայտարարությունները ղարաբաղյան կարգավորման գործընթացում Թուրքիայի դերի, Ռուսաստանի հետ «համատեղ կարգավորման» մասին: Այս միտումները չեն կարող չանհանգստացնել Երևանին, քանի որ հակամարտության գործընթացում Երևանը երևի թե ամենաշահագրգռված սուբյեկտն է, Ստեփանակերտի հետ միասին՝ բնականաբար, որի համար ԵԱՀԿ ֆորմատը գրեթե անփոխարինելի է:

Առավել ևս այսօր, երբ գրեթե կայացած փաստ է Հայաստանի ինքնիշխանության հանձնումը Ռուսաստանին:

Ժամանակ

Թերթի տեղեկություններով, Ազգային անվտանգության քննչական ծառայությունը, որը մեկ ամսից ավելի է՝ քննում է քրեական հեղինակություն Թևոսիկի եղբոր՝ Արթուր Սաֆարյանի սպանության գործը, նոր ապացույցներ է հայտնաբերել: Խոսքը 2 հեռախոսի մասին է, որոնք պատկանել են սպանված և դիտահորը նետված Մովսես Ներսիսյանին: Հեռախոսները հայտնաբերվել են հենց այդ դիտահորի հարակից տարածքից:

Նշենք, որ, ըստ նախաքննական մարմնի, Իսրայել Սարգսյանը՝ Իսոն, Մովսես Ներսիսյանին՝ Մոսոյին սպանել էր նախորդ սպանության հետքերը թաքցնելու համար և դիակը նետել էր Քանաքեռավան գյուղի կոյուղու դիտահորերից մեկը: Նախաքննական մարմինը դրա մասին վկայող ձայնագրություն ունի՝ Իսոյի և Տիգրանի հեռախոսազրույցը, որը մինչ օրս համարվում էր գործով միակ ապացույցը: Հենց այդ ձայնագրության մեջ ևս հիշատակվում է հեռախոսների մասին:
«Լավ եմ արել, սպանել եմ, հեռախոսն էլ ջարդել շպրտել եմ»,-ասում է Իսոն: Հեռախոսները հայտնաբերելը նախաքննական մարմնին լրացուցիչ վստահություն է տալիս պնդելու, որ Մոսոն սպանված է, և այս պահին ավելի են ակտիվացվել դիակի որոնողական աշխատանքները:

Նշենք, որ դիակի հայտնաբերումից է կախված Իսոյի հետագա ճակատագիրը, քանի որ եթե չկա դիակ՝ չկա սպանություն: Չկա սպանություն՝ չկա պատասխանատվություն:

Նշենք նաև, որ այս գործով արդեն իսկ կան որոշ փորձաքննությունների պատասխաններ, որոնք ևս հետաքրքիր մանրամանսեր են պարունակում

Նախկին վարչապետ Տիգրան Սարգսյանը պարբերաբար շեշտում էր շքեղության հարկ կիրառելու անհրաժեշտությունը և դեռևս 2011թ. փոփոխություն կատարվեց «Ակցիզային հարկի մասին»  օրենքում, որն էլ ստացավ «շքեղության հարկ» անվանումը։ Տիգրան Սարգսյանի հեղինակած այս հարկատեսակը, սակայն, տարածվում էր միայն թանկարժեք ավտոմեքենաների վրա։

Այսօր Հովիկ Աբրահամյանի կառավարությունը հրաժարվում է այդ հարկատեսակից։ Շքեղ ու թանկարժեք ավտոմեքենաների սիրահարները այսուհետ դրանք Հայաստան կբերեն առանց 20 տոկոս ակցիզային հարկի։ Առաջիկա նիստում ՀՀ կառավարությունը հավանություն է տալու «Ակցիզային հարկի մասին»  օրենսդրական նախաձեռնությանը, որով առաջարկվում է 25 մլն՝ մոտ 61 հազար ԱՄՆ դոլար և ավելի արժողությամբ մեքենաներն ազատել 20 տոկոս ակցիզային հարկից:

Ժամանակ

Այսօր կայանալիք հանրահավաքին «Բարգավաճ Հայաստան» կուսակցությունը հերթական անգամ կապացուցի, որ ինքը երբեք չի կարող ընդդիմադիր, ժողովրդի կողքին կանգնած քաղաքական ուժ լինել։ Բանն այն է, որ ԲՀԿ-ն որոշել է անկախ հրավերի բացակայությունից  մասնակցել Հայ  ազգայյին կոնգրեսի կողմից այսօր հրավիրված հանրահավաքին, քանի որ «իրենք այնտեղ են, որտեղ կա ժողովուրդ»: Բայց այս անգամ իրենք կլինեն այնտեղ, որտեղ ղեկավար մասն է։

ԲՀԿ-ից հանրահավաքին մասնակցելու են ընդամենը մեկ-երկու հոգի՝ թերևս Նաիրա Զոհրաբյանն ու Տիգրան Ուրիխանյանը, և կանգնելու են հարթակում։ Այս անգամ ԲՀԿ-ն ավտոբուսներով մարդ չի բերելու ՀԱԿ-ի հանրահավաքին, քանի որ Սերժ Սարգսյանն օրերս Գագիկ Ծառուկյանին շատ խիստ նկատողություն է արել ԲՀԿ-ի ակտիվության, միտինգներին, բողոքի ակցիաներին նրանց մասնակցության մասով։ Ծառուկյանին հասկացրել են, որ իրենք չեն կարող լինել այնտեղ, որտեղ ժողովուրդն է։ Վերջինս էլ, բնականաբար, սերտել է իրեն տրված դասը։ Եվ որպեսզի անհարմար դրության մեջ չհայտնվեն իրենց ընդդիմադիր գործընկերների առաջ, որոշել են, որ հանրահավաքին կապահովեն միայն ձևական կողմը:

Ժամանակ

«Ես իրա հետ ծանոթ չեմ եղել, իրան չեմ տեսել, դաժե բարև չեմ տվել իրան։ Ոչ ճանաչել եմ էդ մարդուն, ոչ էլ ուզում եմ ճանաչել։ Իրա ասածները բոլորը սուտ են։ Ես չեմ ուզում դա լսել և չեմ հետաքրքրվում դրանով»,- երեկ «Ժամանակի» հետ զրույցում ասաց ՊՆ ռազմաօդային ուժերի նախկին հրամանատար  Ալիկ Աբրահամյանը՝ արձագանքելով Վարդան Սեդրակյանի նամակին։

Մեր ձեռքի տակ է հայտնվել ՀՀ նախագահի նախկին թեկնածու, էպոսագետ, այժմ ԱԻՄ առաջնորդ Պարույր Հայրիկյանի դեմ մահափորձ  կազմակերպելու համար 14 տարվա ազատազրկման դատապարտված Վարդան Սեդրակյանի՝ ՔԿՀ-ից գրված նամակը, որտեղ  վերջինս ուշագրավ մանրամասներ է հայտնում Ալիկ Աբրահամյանի և նրա որդու, նախկին «Միտք» վերլուծական կենտրոնի ղեկավար, «Չորրորդ հանրապետություն» կուսակցության նախագահ Էդուարդ Աբրահամյանի մասին։ Մասնավորապես, որ հենց նրանք են ֆինանսավորել իր նախընտրական քարոզարշավը, մեծ գումարներ են ներդրել, ապա՝ հետ պահանջել: Երբ Սեդրակյանը չի վերադարձրել պահանջվող գումարը, սպառնալիքներ են սկսվել իր և ընտանիքի նկատմամբ:

Ըստ Սեդրակյանի նամակի՝ Ալիկ Աբրահամյանն իբր ասել է, թե հենց իր «շնորհիվ» է, որ Սեդրակյանին դատապարտեցին 14 տարվա ազատազրկման, ինչպես նաև, որ իր ձեռքերը երկար են, և պետք եղած ժամանակ ինքը կարող է վնասել Սեդրակյանին ու նրա ընտանիքին:

Ժամանակ

Թերթի փոխանցմամբ, Ամերիկյան գործարար, «Արարատ» ֆուտբոլային ակումբի նախագահ «Արցախ» բանկի 40 տոկոսի բաժնետեր, շվեյցարական «Ֆրանկ Մյուլլեր» և AWI ժամացույցների ընկերությունների ներկայացուցիչ Հրաչ Կապրիելյանը ժամանակ առաջ դատի է տվել ՀՀ ՊԵԿ-ին և շահել դատը, սակայն, նրա խոսքով, դատարանի որոշումը ՊԵԿ-ում ի կատար է ածվել միայն այն բանից հետո, երբ ինքը նամակով դիմել է վարչապետ Տիգրան Սարգսյանին:

Ամերիկահայ գործարարն ասում է, որ Հայաստանում կարելի է հաջողություն ունենալ առանց հայաստանցի գործընկերոջ՝ «օրթախի»:

Պարոն Կապրիելյան, Հայաստանի գործարար միջավայրն ինչպե՞ս եք գնահատում, ճի՞շտ է, որ խնդիրներ եք ունեցել:

Ես այստեղ ժամագործություն եմ անում, երբ ապրանքներս եկան, մաքսայինը երեք տարի պահեց ապրանքներս և էնտեղ Գևորգ Ներսիսյան կար (ՊԵԿ հետաքննության վարչության պետ) ինց ասաց՝ Money laundering ես անում (փողերի լվացում): Ես երկու մլն դոլար եմ դրել ժամագործության մեջ, փող եմ կորցրել, ինձ ասում է փողերի լվացում ես անում: Ուրիշը լիներ փախել էր Հայաստանից: Դատի տվեցի, երեք ատյանում դատն էլ շահեցի: Չէր ստորագրում ՊԵԿ նախագահ Գագիկ Խաչատրյանը: Վարչապետին նամակ գրեցի, մեկ օրվա մեջ ստորագրեց: Եթե վարչապետը չլիներ, մեծ պրոբլեմ էի ունենալու, վարչապետը ստորագրել տվեց:

Ժամանակ

Թերթը գրում է. հնարավոր է` առաջիկայում Վազգեն Խաչիկյանի գործով հարցաքննվի ԱԺ պատգամավոր Աղվան Վարդանյանը։ Նա որոշ ժամանակ սոցապ նախարար է եղել: Սոցիալական ապահովության ծառայությունը, որն այն ժամանակ ղեկավարում էր Խաչիկյանը, գտնվում է սոցիալական ապահովության նախարարության ենթակայության ներքո։ Կարծիք կա, որ առանց Ա. Վարդանյանի կամ ընդհանրապես նախարարների համաձայնության դժվար թե Խաչիկյանը նման չարաշահումներ թույլ տար:

Մանրամասները՝ «Ժամանակ»-ի այսօրվա համարում:

Թերթի զրուցակիցն է Սյունիքի նորանշանակ մարզպետի՝ ԱԺ ՀՀԿ-ական երիտասարդ պատգամավոր Վահե Հակոբյանի հայրը՝ Քաջարանի պղնձամոլիբդենային կոմբինատի տնօրեն Մաքսիմ Հակոբյանը։ Հատված հարցազրույցից.

Պարոն Հակոբյան, ի վերջո Ձեր տղային դարձրեցիք էլի Սյունիքի մարզպետ։

Մեր տղան ինքն է դառել։ Մարզպետը դեռ քիչ ա, մեր տղան ավելի բարձր պաշտոնների ա գնալու, սա դեռ փոքր ա։

Ստացվում է՝ իրականացավ Վահեի և Ձեր ցանկությունը։

Բացարձակապես՝ ոչ։ Վահեի և իմ ցանկությունը կիրականանա մի քանի արի հետո, որ շատ ավելի պատասխանատու պոստեր զբաղեցնի։

Այսինքն՝ ուզում եք նախագա՞հ դառնա։

Անպայման, իմ ցանկությունը դա է։ Զինվորը զինվոր չի, որ չի ուզում գեներալ դառնալ։

Պարոն Հակոբյան, Ձեր տղան ԱԺ-ում իր աշխատանքով աչքի չի ընկել, նաև՝ որևէ օրենսդրական գործունեությամբ։

Էդ դուք չեք տեղյակ ուղղակի։

Ոչ ելույթ է ունեցել, ոչ օրենսդրական նախաձեռնություններով է հանդես եկել։

Ես հանրապետության խոշորագույն տնտեսություններից մեկն եմ ղեկավարում, ես էլ ելույթներ չեմ ունենում։ Ընդհանապես, ելույթներով չի աշխատանքը, աշխատանքը գործ անելով ա։

Սակայն պատգամավորի գործը ելույթ ունենալն է, օրենք գրելն է, Ձեր տղան քանի՞ օրենք է գրել։

ԱԺ պատգամավորը օրենք չի գրում, Դուք սխալվում եք։ Գնացեք մի քիչ ուսումնասիիրեք, լավ չեք տիրապետում:

Մանրամասները՝ «Ժամանակի» այսօրվա համարում:

տարեկան հաշվետվության ներկայացումը բավական հետաքրքիր վիճակ է ստեղծել իշխանության ներսում։

«Ժամանակի» տեղեկություններով՝ իշխանություններն այժմ այդ իրավիճակից ելքեր են փնտրում։ Մեր իշխանամերձ աղբյուրները հայտնում են, որ այսօր Սերժ Սարգսյանը նախագահականում մի շարք բարձրաստիճան պաշտոնյաների մասնակցությամբ խորհրդակցություն է հրավիրելու՝ ՎՊ բացահայտած խախտումների առթիվ։ Պատասխանատուների ներկայությամբ քննարկվելեու են խախտումները տարբեր ոլորտներում, և՝ թե որտեղ են պատիժներ կիրառվելու, քրգործեր հարուցվելու և այլն»:

Ժամանակ