Ոստիկանապետ Վլադիմիր Գասպարյանը երեկ աշխատանքից հեռացրել է ոստիկանության տարբեր ստորաբաժանումների 10 աշխատակիցների: Լուրը մեզ հետ զրույցում հաստատեց ոստիկանության հասարակայնության հետ կապի և լրատվության վարչության պետ Աշոտ Ահարոնյանը: Նա, սակայն, անուններ չհրապարակեց:

Մեր հարցին՝ ոստիկանության զորքերի հրամանատար, փոխոստիկանապետ Լևոն Երանոսյանի դեմ ծառայողական վարույթ սպասվո՞ւմ է արդյոք, Ա. Ահարոնյանը ձեռնպահ մնաց պատասխանելուց: ՀՔԾ մամուլի քարտուղար Միքայել Ահարոնյանն այս կապակցությամբ մեզ ասաց, որ Լ. Երանոսյանի վերաբերյալ ՀՔԾ-ում քրեական զործ չի քննվում:

Ժամանակ

«Բարգավաճ Հայաստան» կուսակցության առաջնորդ Գագիկ Ծառուկյանը նախօրեին Գյումրիում հայտարարել է, որ Ծառուկյան ազգանունն Աստված է տվել հայ ժողովրդին, և ինքը սրբությամբ պահելու է այն: Սրան զուգահեռ՝ Ծառուկյանը հայտարարել է, որ համաժողովրդական շարժումը ծավալվում է և թափ է հավաքում:

Երևի թե, սակայն, համաժողովրդական շարժումն արդեն պատմություն է, և Գագիկ Ծառուկյանն, ըստ էության, մոնարխիստական շարժում է հռչակում Հայաստանում: Խնդիրն այն է, որ միապետներն էին, այսպես ասած, Աստծո տվածը, այսինքն՝ միապետների իշխանությունն էր համարվում աստվածային ծագման, և այդ իսկ պատճառով նաև այդ իշխանությունը փոխանցվում էր ժառանգականորեն:

Ժողովրդավարական համակարգերում և հասարակարգերում, ժողովրդավարական մշակույթներում Աստված որևէ ազգանուն կամ որևէ լիդեր չի շնորհում ժողովուրդներին կամ հասարակություններին: Նման համակարգերում Աստված մարդկանց ինչ-որ մեկի անունը կամ ազգանունը տալու փոխարեն, կյանք է տալիս և բանականություն, ըստ որի նրանք ընտրություն են կատարում և քաղաքական գործունեության մեջ մասնավորապես ընտրում են իրենց լիդերներին, անհատների կամ խմբերի են ընտրում:

Ժամանակ

ՀՀ Ազգային մրցունակության հիմնադրամի գործադիր տնօրեն Արման Խաչատրյանը հրաժարականի դիմում է ներկայացրել: Նշենք, որ Ա. Խաչատրյանը նախկին վարչապետ Տիգրան Սարգսյանի հավատարիմ կադրերից էր, որին Սարգսյանը տվել էր լիակատար ազատություն իրագործելու իր ամենատարբեր ծրագրերը՝ խթանել մրցունակությունը երկրի ներսում, զբոսաշրջությունը ՀՀ-ում և Արցախում, առողջապահական ծրագրեր, «Տաթևի վերածնունդ» ծրագիրը, ՀՀ բրենդավորումը, ի վերջո՝ «Բաց երկնքի» քաղաքականության իրականացումը, որոնց ֆինանսավորումը ապահովված էր կառավարության կողմից: Այս ազատմամբ Հովիկ Աբրահամյանը, հնարավոր է, փորձում է ցույց տալ, որ Տ. Սարգսյանի հերթական մեծ պրոյեկտը, որի նպատակը ոլորտային բարեփոխումներ իրականացնելն էր, ձախողվեց:

Ժամանակ

Վերջին օրերին դոլարի նկատմամբ դրամի կտրուկ արժեզրկմանն առնչվող հարցին ի պատասխան ԱԺ «Բարգավաճ Հայաստան» խմբակցության պատգամավոր Գուրգեն Արսենյանն ասաց, որ ՀՀ-ում մի խումբ խարդախներ իրականացնում են բնակչության կողոպուտ՝ հաշվի առնելով նախատոնական ժամանակահատվածը և հղում անելով ռուսական ռուբլու թուլացմանը:

«Նախատոնական օրերին ստեղծում են աժիոտաժ, բարձրացնում են դոլարի կուրսը, որպեսզի մարդիկ հիմա առնեն թանկ դոլար: Երկու շաբաթ հետո սկսվելու է նախատոնական եռուզեռը, և մարդիկ ստիպված են լինելու արդեն վաճառել թանկ գնով ձեռք բերված իրենց դոլարներն ավելի էժան գնով: Եվ այդ խարդախների խումբը որոշակի ռեսուրս է աշխատելու, ինչին տարբեր ժամանակներում մենք ականատես ենք եղել»:

Ժամանակ

Երևանի «Չաո բամբինո» մանկական սրճարանում նոյեմբերի 19-ի երեկոյան գազով լցված փուչիկների պայթյունի գործով Կենտրոն և Նոր Նորք վարչական շրջանների քննչական կոմիտեում հարուցվել է քրեական գործ՝ քր.օր,-ի 279-րդ հոդվածի 2-րդ մասի 1-ին կետով (Անվտանգության պահանջներին չհամապատասխանող ապրանքներ թողարկելը, որոնք կատարվելեն մանկահասակների համար նախատեսված ապրանքների կապակցությամբ):

Մանկական սրճարանի տնօրեն Գրիշա Հարությունյանը օրեր առաջ ասել էր, թե իրենց փուչիկներ է մատակարարում «Փուչիկների աշխարհ» ՍՊԸ-ն, որը Լիցենզավորված ընկերություն է և մասնագիտացած է այդ գործում, բայց երեկ պարզեցինք, որ ոչ մի լիցենզավորված ընկերություն էլ չկա: Փուչիկները սրճարանին մատակարարում է Արթուր Կտեյան անունով մասնավոր ձեռներեց, որը դրանք լիցքավորել է իր ավտոտնակում, այն էլ՝ ոչ թե հելիումով, այլ սովորական այրվող գազով, իսկ այժմ անցել է ընդհատակ:

Ժամանակ

Վերջին շրջանում կտրուկ թանկացել է խոզի միսը՝ 1 կիլոգրամը 2800-3000 դրամից հասել է մինչև 4200 դրամի: Տեղեկություններ կան, որ այդ թանկացումից առաջ ԲՀԿ-ական պատգամավոր Վահան Կարապետյանին պատկանող «Վասանավի» ընկերության խոզաբուծական ֆերմայում կտրուկ անկում է տեղի ունեցել:

Ընկերությունում խոզի ամբողջ գլխաքանակի՝ մոտ 25.000 խոզի անկում է տեղի ունեցել: Վ. Կարապետյանը երեկ հարցին ի պատասխան հաստատեց, որ այսօրվա դրությամբ ոչ մի կենդանի չի մնացել, սակայն չցանկացավ խոսել անկման պատճառների մասին, որը հավանաբար ինչ-որ հիվանդություն է եղել:

Հետաքրքիր է, որ այդ հիվանդությունը գրանցվել է միայն Վ. Կարապետյանին պատկանող ընկերությունում: Մեր աղբյուրները չբացառեցին անգամ, որ անկումը բոլորովին էլ պատահական չի եղել, հակառակ պարագայում այն կարող էր նկատվել նաև այլ գործարարների պատկանող խոզաբուծական ֆերմաներում կամ գյուղացիական տնտեսություններում:

Ժամանակ

Բժշկական համալսարանի թերապևտիկ և ընտանեկան ստոմատոլոգիայի ամբիոնի վարիչ, թիվ 1 համալսարանական ստոմատոլոգիական պոլիկլինիկայի ղեկավար Լազար Եսայանը վերջերս հերթական ամբիոնի նիստի ժամանակ հայտարարել է. «Ղեկավարության որոշմամբ՝ ես եմ լինելու ամբիոնի վարիչը, և դա այլևս քննարկման ենթակա չէ», չնայած այդ պաշտոնի համար մրցույթ է հայտարարվել, և հաջորդ ամսվա մեջ պետք է կայանա մրցույթը:

Ժամանակ

Իրավապահները զբաղվում են Արագածոտնի մարզպետարանի շինարարական ծրագրերի աշխատանքներով: Պատճառը անցած տարի կառուցված և վարչապետի մասնակցությամբ մեծ շուքով բացված, Արագածոտնի մարզի Օշականի Շաղվարդ գետի վրա կառուցված 18 մետր երկարությամբ և 3 մետր լայնությամբ կամրջի շինարարությունն է: Պարզվում է՝ Օշականի սեփականաշնորհված այգիները գյուղին միացնող Շաղվարդի կամրջի շինարարության համար բյուջեից հատկացվել էր 20 միլիոն դրամ, սակայն, մասնագետների կարծիքով, կամրջի վրա ծախսվել է շատ ավելի քիչ գումար, մոտ 6-8 միլիոն դրամ, իսկ մնացածը յուրացվել է:

Ժամանակ

Կիրակի վաղ առավոտից «Սան տաֆե» սրճարանի անմիջական հարևանությամբ ակտիվ շինարարական աշխատանքներ էին ընթանում: Հակառակ բանվորների հավաստիացումներին, թե տեղում միայն սալիկապատման աշխատանքներ են կատարվում, առաջին հայացքից էլ հասկանալի էր, որ ինչ-որ նոր շինություն է կառուցվում, բետոնապատվում է տարածքը, և որն ավարտվելուն պես փակվելու է Կասկադից դեպի օպերա նայող գեղեցիկ տեսարանը:

Երգիչ, երգահան Արթուր Իսպիրյանը, որն առաջիններից մեկն էր ահազանգել շինարարության մասին, երեկ «Ժամանակին» ասաց, որ երբ ինքը փորձել է պարզել, թե ինչ է կառուցվում, սպառիչ պատասխան չեն տվել: «Հսկայական հիմք է փորված, և պարզից էլ պարզ է, որ տեղում կապիտալ շինարարություն է լինելու: Շինարարությունն ինձ հուշում է, որ այն դառնալու է երկու, եթե ոչ ավելի, հարկանի լափելու տեղ:

Ժամանակ

ՀՀ գյուղնախարարության սննդամթերքի անվտանգության պետական ծառայությունն ու ՌԴ անասնաբուժական և բուսասանիտարական հսկողության դաշնային ծառայությունը համաձայնության են եկել, և այսուհետ հայկական մսամթերքը կիրացվի ռուսական շուկայում: Ուշագրավ է, որ արտահանման թույլտվություն ստացած ընկերությունների ցանկում է նաև ԱԺ ՀՀԿ-ական գործարար պատգամավոր Սամվել Ալեքսանյանին պատկանող «Նատալի ֆարմ» ՍՊԸ-ն:

Նշենք, որ ընդամենը վերջերս ՀՀ դեղամիջոցների խոշոր ներմուծող «Նատալի ֆարմ»-ին կառավարության կողմից թմրամիջոցների և հոգեմետ դեղերի ներկրման և իրացման լիցենգիա հատկացվեց: Եվ եթե այդ դեպքում լիցենզիա տրամադրելու մեջ տրամաբանություն կար, ապա վերը նշված դեպքում այդ տրամաբանությունը բացակայում է: Առնվազն անհասկանալի է, թե ինչպես կարող է դեղ ու թմրամիջոցներ ներկրող ընկերությունը մսամթերք արտահանել:

Ժամանակ