«Շիրակ կենտրոն» ՀԿ նախագահ Վահան Թումասյանը երեկ մեզ ասաց, որ Գյումրիում մարդկային կուտակումներ չկան, կանգնած են միայն ոստիկանները, հերթապահություն են իրականացնում: Նա տեղեկացրեց, որ ոստիկանական կուտակումներ են նաև հյուպատոսարանի մոտ: «Սերյոժայի մահվան բոթից քարացել է քաղաքը, նաև սարսուռ է ապրում, փողոցները դատարկ են, կարծես անդորր է ամպրոպից առաջ», — ասաց Թումասյանը:

Մեր հարցին՝ բողոքի ցույց նախապատրաստվո՞ւմ է, Վահան Թումասյանը պատասխանեց, որ այս պահին քաղաքը սգում է, դեռ շոկի մեջ է, այս պահին չի հասկանում, թե ինչ է լինելու, ինչ ռեակցիա տա այս ամենին, այս պահին ռեակցիան կատարվածին մոմավառությունն է:

Ժամանակ

Հունվարի 18-ին Վայք քաղաքում նախատեսված է քաղաքապետի ընտրություն:

Հիշեցնենք, որ Վայքի քաղաքապետի լիազորությունները վաղաժամ դադարեցվեցին, երբ քաղաքապետ Հարություն Սարգսյանը վարչապետի որոշմամբ նշանակվեց Վայոց ձորի մարզպետ: Դրանից հետո Վայքի քաղաքապետի ժամանակավոր պաշտոնակատար է նշանակվել Վասիլ Ասլանյանը, որը մարզպետի աներձագն է:

Քաղաքապետի պաշտոնի համար թեկնածու առաջադրել է միայն իշխող Հանրապետական կուսակցությունը՝ ներկայացնելով Արագած Սաղաթելյանին: Առաջադրվել էր նաև անկուսակցական Ալեքսան Սիմոնյանը, որը ձևական թեկնածու էր ու շատ արագ էլ ինքնաբացարկ է հայտնել մրցապայքարում միայնակ թողնելով ՀՀԿ-ական թեկնածուին: Թեկնածու չեն առաջադրել ոչ ՀԱԿ-ը, ոչ «Ժառանգությունը» և ոչ էլ Վայոց ձորում մի ժամանակ իշխանություն հաստատած ԲՀԿ–ն:

Ժամանակ

Ամիսներ առաջ Նոր Նորքում ազատամարտիկ Վարդան Թումանյանին ծեծելով սպանած «Ջունգլ» մականունով Գևորգ Սարգսյանը հնարավոր է ազատ արձակվի՝ երեկ մեզ ասաց Վ. Թումանյանի քույը՝ Մարիետա Թումանյանը:

«Ջունգլի հայրը բոլորին ասել է, որ առաջիկա 10 օրվա մեջ իր տղան ազատության մեջ է լինելու: Ասում են, որ Սարգիսը ծեծի ամբողջ մեղքը վերցրել է իր վրա, որպեսզի Ջունգլը ազատություն ստանա։ Ծեծի հիմնական մասնակիցը, Վարդանի գլխին հարվածներ հասցնողը հենց Զունգլն է եղել; Էնպես չի, որ ասեն, թե ամբողջը Սարգիսն է արել», — ասաց տիկին Մարիետան: Քննիչը նրան հավաստիացրել է, որ նման բան չկա: «Բայց էս դարում դրանց նման հովանավորներ ունեցողներից ամեն ինչ էլ սպասելի է: Ես էլ ոչ մի բանի վրա չեմ զարմանում, հանկարծ նման բան լինի, եթե Ջունգլը չպատժվի իր արածի համար, դուրս գա ազատություն, նրանց տունը կպայթեցնեմ», — թերթի փոխանցմամբ ասել է տիկին Մարիետան։

Ժամանակ

Անշարժ գույքի շուկայում նոյեմբեր-դեկտեմբեր ամիսներին գործարքները կտրուկ նվազել են՝ երեկ մեզ հայտնեց «Վիվա Ռիելթի» անշարժ գույքի գործակալության տնօրեն Էդվարդ Հարությունյանը: Նա նշեց, որ գնորդները պասիվացել են, իսկ բանկերն այս նպատակով վարկեր չեն տրամադրում: «Բոլորը սպասում են իրենց գործարքներին ընթացք տան տոներից հետո, այս պահին իրավիճակն իսկապես սառեցված է» — տեղեկացրեց Հարությունյանը:

Ժամանակ

Ռուսաստանում ավիաընկերությունների շրջանում խուճապային իրավիճակ է։ Առաջիկա օրերին որոշ չվերթներ ռիսկի տակ են հայտնվել: Փոքր ընկերությունները փակվում են, մեծերը՝ «Տրանսաերո» և «Յուտեյր» ավիաընկերությունները, արդեն պետական աջակցություն են խնդրել: Ավելին՝ ամանորյա տոներից հետո հնարավոր է տոմսերի գների մոտ 30 տոկոս թանկացում:

Մենք փարձեցինք  ճշտել, թե այս իրավիճակն ինչպես է անդրադառնալու ռուսական ընկերությունների՝ հայաստանյան շուկայի գնային առաջարկի վրա: Գնային հարցումներ արել ենք դեկտեմբերի 29-ի և հունվարի 15-ի համար, որպեսզի թվերով հնարավոր լինի ցույց տալ, թե ինչ փոփոխություններ են լինելու տոներից հետո:

Դեկտեմբերի 29-ի համար Երևան-Մոսկվա չվերթի համար «Տ7» ավիաընկերությունն առաջարկում է 77.000 դրամ արժողությամբ տոմսեր, իսկ հունվարի 15-ի համար՝ 86.000 դրամ արժողությամբ:

«Աերոֆլոտ» ավիաընկերությունը նույն ուղղության տոմսերը դեկտեմբերի 29–ի համար առաջարկում է 95.000 դրամով, իսկ հունվարի 15-ի համար այս պահի դրությամբ տոմսի գինը 87.000 դրամ է: Սակայն ընկերության երևանյան գրասենյակից տեղեկացրին, թե չի բացառվում, որ հունվարի 15-ի տոմսի գինը բարձրանա, որովհետև մի քանի տոմս է դեռևս վաճառվել: «Այս շրջանում հնարավոր է գների փոքր-ինչ տատանում, որովհետև արտագնա աշխատանքից տուն վերադարձած մարդիկ նորից մեկնելու են», — հայտնեցին «Աերոֆլոտի» գրասենյակից:

Ժամանակ

Մեզ հասած տեղեկություններով՝ բանկերը դադարեցրել են ապառիկների ձևակերպումները: Մասնավորապես «Ինեկո» և «Անելիք» բանկերից հայտնեցին, որ այս պահին ապառիկները կասեցված են: Մինչդեռ կենցաղային տեխնիկայի խանութները մեզ հետ զրույցում հակառակը պնդեցին՝ նույնիսկ նշելով համագործակցող բանկերի անունները: «Իհարկե, աշխատում ենք ապառիկով՝ «Ինեկո» և «Էյչ-Էս-Բի-Սի» բանկերի հետ, ավելի մանրամասն տեղեկություն Ձեզ կտան, եթե մեր խանութներ զանգահարեք:

Ժամանակ

Վերջերս Կոտայքի մարզպետարանը հրապարակել է «Նաիրիշին» ԲԲԸ-ի հետ դեկտեմբերի 19-ին կնքված պայմանագիրը, ըստ որի՝ մարզպետարանը 13 միլիոն դրամով նշված ընկերությունից մարզպետ Արամ Հարությունյանի համար ծառայողական ավտոմեքենա է գնել՝ 2014 թվականի արտադրության, մինչև 1000 կիլոմետր վազքով Toyota Camry:

Նշենք, որ «Նաիրիշին» ԲԲԸ-ն ուղիղ կապ ունի մարզպետի անձի հետ:

Ժամանակ

Քրեական հեղինակություն Թևոսիկի՝ Թևոս Սաֆարյանի ազատության մեջ հայտնվելը առաջիկայում լուրջ «ռազբորկաների» պատճառ կարող է հանդիսանալ: Բանն այն է, որ վերջերս ազատության մեջ հայտնվեց նաև Թևոսիկի եղբոր՝ Արթուր Սաֆարյանի սպանության մեջ մեղադրվող Տիգրան Ասատրյանը:

Թևոսիկը դեռ անազատության մեջ եղած ժամանակ է փորձել պարզել, թե ինչ առնչություն ունի Տիգրանը եղբոր սպանության հետ, ուստի գործով միակ ապացույց հանդիսացող ձայնագրության հետ կապված՝ Տիգրանը Թևոսիկին բացատրելու շատ բան կունենա: Ըստ տարածված լուրերի՝ Թևոսիկի ազատ արձակվելուց հետո ոստիկանության համապատասխան վարչությունը ուժեղացված կարգով հսկում է՝ նշված անձանց հնարավոր վենդետան բացառելու համար:

Ժամանակ

Օրերս Վայոց ձորի նորանշանակ մարզպետ՝ ՀՀԿ-ական Հարություն Սարգսյանի առաջարկով վարչապետ Հոկիկ Աբրահամյանը զբաղեցրած պաշտոնից ազատել է Վայոց ձորի փոխմարզպետ Արամ Գրիգորյանին: Մեր տեղեկություններով՝ մարզպետը փոխմարզպետի թափուր տեղի համար արդեն իսկ հավակնորդ ունի, և նա իր աներձագն է՝ Վասիլ Ասլանյանը, ով Սարգսյանի մարզպետ նշանակվելուց հետո Վայքի քաղաքապետի պաշտոնակատարն է:

Ժամանակ

Մի քանի օր է արդեն՝ ավտոգազալիցքավորման կետերում գազը թանկացել է 20-40 դրամով: Մինչդեռ, «Գազպրոմ Արմենիա»-ից հավաստիացրին, իրենք գազի գինը չեն վերանայել և այն, ինչ անում են լիցքավորման կետերը՝ իրենց հետ ոչ մի կապ չունի: Ընկերության մամուլի խոսնակ Շուշան Սարդարյանը մեզ տեղեկացրեց, որ գործող բանաձևի համաձայն՝ գազալցակայանները իրենց սպառած գազի դիմաց վճարում են յուրաքանչյուր հաշվետու ամսվան նախորդող ամսվա 25-ին ՀՀ ԿԲ-ի կողմից հրապարակված 1 ԱՄՆ դոլարին համարժեք դրամով։

Այսինքն՝ դեկտեմբեր ամսվա մեջ սպառած գազի համար նրանք վճարելու են նոյեմբերի 25–ի կուրսով, երբ դոլարն ամենևին էլ չէր թանկացել:

Ժամանակ