«Aravot.am-ը ՀՀ ՊՆ մամուլի խոսնակ Արծրուն Հովհաննիսյանից կարծիք հարցրեց ազատամարտիկ Վովա Վարդանովի այն հարցադրման շուրջ, թե «ո՞վ չի ուզում Բաքու մտնել… Պատերազմը չի վերջանա, մինչեւ մայրաքաղաքներից մեկը չհանձնվի»: «Ճիշտ չեմ համարում անհատ ռազմական փորձագետների տեսակետները պաշտոնական մեկնաբանություններով «լցնելը», որովհետեւ պաշտոնական մեկնաբանությունները կարող են լինել շատ տարբեր եւ ողջ գործիքակազմի չբացահայտման բնույթով: Իսկ անհատ փորձագետն ազատ է իր գնահատականների եւ ցանկությունների մեջ»,- ասաց Արծրուն Հովհաննիսյանը եւ հիշեցրեց պաշտոնական տեսակետը. «ՀՀ զինված ուժերը իրենց խնդիրը լավ են գիտակցում եւ կատարում են: Իհարկե, շատ բան մանրամասնելու ենթակա չէ»:

Խնդրեցինք մեկնաբանել նաեւ Ալիեւի վերջին հայտարարությունը, որով նա ասում էր, թե «Շուշին մերն է…եթե հայերը դասեր չքաղեն ապրիլյան մարտերից, նրանց սպասում են բազմաթիվ հաջող գործողություններ՝ Լելե Թեփեի օրինակով»: «Ապրիլյան պատերազմից առաջ եւ հետո ասել եմ, որ նման տրամաչափի քաղաքական գործիչների համար մեծախոսությունը, գլուխ գովելը կարեւոր չպետք է համարվի: Գիտակցող քաղաքական գործիչը պետք է հասկանա, որ իր բանակի համար «Լելե Թեփեն» չէր կարող լինել հիմնական ուղղության հարվածի գլխավոր խնդիր»:

«Առավոտ»

Ամբողջությամբ կարող եք կարդալ  թերթի այսօրվա համարում:

ՕԵԿ պատգամավոր Հովհաննես Մարգարյանը հայտարարել էր, որ շուտով բացահայտելու է Գյումրիի հուդաներին: Ի պատասխան՝ Շիրակի մարզպետն ասել էր, որ հուդան իր իմանալով մեկն է եղել, այն էլ՝ Շիրակի մարզում չի եղել: Երեկ ԱԺ ճեպազրույցների ժամանակ մենք հետաքրքրվեցինք՝ ե՞րբ եք բացահայտելու հուդաներին և ո՞ւմ մասին է խոսքը:

Հովհաննես Մարգարյանը պատասխանեց, որ ինքն էլ գիտի, որ միակն է եղել Հուդան, պարզարպես դավաճաններին նկատի ունի. «Իսկ դավաճանները, չեմ կարծում, մեկն են: Հունվար ամսին դատաքննությունը սկսվելու է:

Ես դիմել եմ դատարան, որպեսզի իմ անձի հետ կապված այդ ճղճիմ զրպարտությունը վեր բարձրացնեմ, և այն վիրավորանքը, այն տեսանյութը, որ տարածվեց, բոլոր փաստարկները կան, որ ակնհայտ նենգություն էր իմ անձի նկատմամբ, իրականության հետ ոչ մի աղերս չուներ: Բոլորիդ աչքերի մեջ նայեյով՝ ասում եմ՝ ես որևէ գործով որևէ անգամ դատապարտված չեմ եղել»,–գրում է թերթը։

«Առավոտ»

Մանրամասները՝ թերթի այսօրվա համարում։

«Առավոտ» թերթի գլխավոր խմբագիր Արամ Աբրահամյանն իր այսօրվա խմբագրականում գրում է. «Արդեն 25 տարի է՝ լսում եմ հետեւյալ երկխոսությունը: Ընդդիմություն. «Իշխանավորները թալանչիներ են»: Իշխանություն. «Անուններ տվեք, թող դատախազությունը զբաղվի»: Ընդդիմություն. «Դուք այդ անունները մեզնից լավ գիտեք»:

Բնականաբար, քաղաքացիների զգալի մասը շատ գոհ է ընդդիմության այդ «խրոխտ» պահվածքից, բայց խնդիրը, ցավոք, շարունակում է փակուղում մնալ: Որովհետեւ հանցագործությունն ապացուցելը շատ ավելի դժվար գործ է, քան օդի մեջ մեղադրանքներ հնչեցնելը: Իհարկե, երբեմն պատահում է, որ պաշտոնյան պարզապես կաշառք է վերցնում, ինչպես որ դա, ենթադրաբար, արել է Ռուսաստանի տնտեսական զարգացման նախարար Ալեքսեյ Ուլյուկաեւը:

Ռուս իրավապահները, որոնց բողոքել է «Ռոսնեֆտը» (որն իրականում հենց իշխանական շրջանակների բիզնեսն է), զբաղվել են այդ հարցով մոտ մեկ տարի եւ վերջապես, իրենց խոսքերով, բռնել են նախարարին հանցանքը կատարելիս: Բայց այդպես լինում է շատ հազվադեպ: Թե որ գեներալն ինչ է գողացել բանակից՝ մենք դա չենք արձանագրել, չենք տեսանկարահանել, որպեսզի այդ գեներալին այդ պահին տանենք դատարան:

Մենք գործ ունենք արդեն կատարված փաստի հետ՝ գեներալն ունի պալատ, որի արժեքը մի քանի հարյուր անգամ գերազանցում է իր ողջ ծառայության ընթացքում ստացած աշխատավարձը: Անկախ նրանից՝ այդ տունը գրանցված է իր զոքանչի, թե բաջանաղի անունով, ինքնին այն փաստը, որ գեներալն ապրում է նման տանը, արդեն իսկ կասկածների տեղիք է տալիս: Իրավապահ մարմինները պետք է գեներալով զբաղվեն, իսկ գերագույն հրամանատարը պիտի մտածի՝ կարո՞ղ է արդյոք նման գեներալը ծառայել»:

Ամբողջությամբ կարող եք կարդալ «Առավոտ»թերթի այսօրվա համարում:

Շան կեր,  զուգարանի թուղթ,   կոկորդի բժիշկ մոմ. Անդրանիկի փողոցում տեղակայված դեղատներից մեկի վաճառասեղանին փակցված  են հաճախորդների  զավեշտալի պահանջները։

«Բարև   Ձեզ,   ինձ մի հատ բթի Ստալին կտա՞ք»,   «Բարև   Ձեզ,   911– ի   бродяга կտա՞ք»,   «Հավերիս համար Վիագրա կտա՞ք,  էս 6 ամիս Է՝ չեն ածում,  ասել  են՝ Վիագրա տամ»,   այսպես վաճառողուհին գրի Է առել,   թե ինչ հարցով են  երբեմն մարդիկ դիմում իրեն՝ այդպիսով զգուշացնելով ներս  մտնողին,   որ «Սալին» դեղի փոխարեն Ստալին չեն ուզում,   հավերի  ձու  ածելու համար  «Վիագրան» պիտանի չի, իսկ  911-ի Бадяга Է լինում սովորաբար։

Անվստահությունն  այնքան է մեծացել,   որ դեղատան աշխատողից պահանջում են հղիության թեստը փորձել,   տեսնել աշխատում Է,   նոր տալ,   բողոքում են,  որ ձողիկը դնում են բերանում, անմիջապես հալում է,  չեն հասցնոմ բժշկի ասած ցուցումները կատարել և ուզում են ամենաանհավանական տնտեսական, կենցաղային ապրանքները, որոնք կապ չունեն դեղատան և բժշկության հետ առհասարակ»,–գրում է թերթը։

«Առավոտ»

Մանրամասները՝ թերթի այսօրվա համարում։

Ներկայացնում ենք թերթի խմբագրականից մի հատված.

«Այն, ինչ ասել է նախագահի թեկնածու Թրամփը, շեշտակիորեն տարբերվելու է նրանից, ինչ անելու է նախագահ Թրամփը։ Նա, այո, «ոչ համակարգային» դեմք է, բայց համակարգը, ներկայիս քաղաքական վերնախավը, այդ թվում կոնգրեսականներն ու սենատորները «կբացատրեն» նրան, որ ԱՄՆ նախագահը, որքան էլ ունենա քաղաքացիների աջակցությունը, ու որքան էլ այդ քաղաքացիները ձանձրացել են ամերիկյան քաղաքական և տնտեսական վերնախավից (իսկ Թրամփը հենց այդպիսի  վստահություն վայելող նախագահ է), նա միևնույն է՝ պետք է խաղա որոշակի կանոններով։

Օրինակ՝ թեկնածու Թրամփն ասում էր, որ պետք է աջակցել Ասադին, որ նա մնա իշխանության գլուխ, բայց Միացյալ Նահանգները դա չի անի։ Նա ասում էր՝ պետք է եղբայրանալ Պուտինի հետ, բայց իր երկիրը ներկայիս Ռուսաստանի դաշնակիցը չի դառնա, թեև, հուսանք, այսօրվա ծայրահեղ լարվածությունը կթուլանա։ Թեկնածու Թրամփը վիրավորել է Անգելա Մերկելին, բայց Գերմանիան և ԱՄՆ-ը, հակառակը, կմնան կայուն դաշնակիցներ։

ԱՄՆ արտաքին քաղաքականության մեջ տեկտոնիկ փոփոխություններ չեն լինի։ Նախընտրական հռետորաբանությունը շատ արագ կմոռացվի»,–գրում է թերթի խմբագիրը։

«Առավոտ»

Ամբողջությամբ՝ թերթի այսօրվա համարում։

«Երեկ ԱԺճում «Առավոտ»-ի հետ զրույցում աշխատանքի եւ սոցիալական հարցերի նախարար Արտեմ Ասատրյանը հորդորել է դրական բաներ ասել, դրական հարցեր տալ։

Թերթը հիշեցրել է, որ իր հարցազրույցներից մեկում նա ասել էր, որ իր ամենասիրած ճաշատեսակը տոլման է, ու դիտարկմանը, որ թոշակառուները այդ հարցազրույցը կարդան, կասեն՝ նախարարն ամեն օր տոլմա է ուտում, բա մե՞նք, Արտեմ Ասատրյանն արձագանքել է. «Դուք էլ թոշակառուների մի տվեք կարդան այդ հարցազրույցը։ Կարող է այդ հարցազրույցը ինչ-որ տոնական միջոցառման ժամանակ է եղել, կամ որ հարցրել են՝ չասե՞մ, որ տոլման է, ի՞նչ ասեի բա։ Վա՞տ բան է։ Ֆրունզիկին հիշո՞ւմ եք «Միմինո» ֆիլմում։ Ասում է՝ Ты любишь долма?, ասում է՝ нет, ասում է՝ потому что твоя мать не может готовить долма։ Հիմա իմ мать-ը կարողանում է, ես սիրում եմ այդ տոլման։ Բայց, իսկապես, շատ լավ հարց տվեցիք, վերջին անգամ չեմ հիշում՝ երբ եմ կերել»։

«Առավոտ»

Առավել մանրամասն՝ թերթի այսօրվա համարում։

Ներկայացնում ենք թերթի խմբագրականից մի հատված.

Թե ինչու իշխանությունից հեռացրեցին հայտնի դեմքերին՝ հասկանալի Է։ Բայց դրա մասին բարձրաձայն չի ասվում, ինչը թույլ Է տալիս, օրինակ, Սուրիկ Խաչատրյանին ասել, որ իրականում իրեն չեն հեռացրել, որ նա ինքն է հրաժարական տվել։ Եթե պաշտոնապես ասվեր, թե Սյունիքի մարզպետի՝ աշխատանքից ազատման պատճառը այսինչ դեպերն են, ապա մնացած պաշտոնյաներին պարզ կդառնար, թե որ սահմաններում է պետք մնալ։ Օդիոզ դեմքերի դեմքում (մասնավորապես՝ մի քանի նախարարների) մոտավորապես կարելի Է կռահել, թե ինչու են նրանք զրկվել Պաշտոններից, իսկ ինչո՞ւմ էր թերացել, օրինակ, Արմեն Մուրադյանը։  Դրա  մասին  հավանաբար  երբեք չենք  իմանա»,–գրում է թերթի խմբագիրը։

«Առավոտ»

Ամբողջությամբ՝ թերթի այսօրվա համարում։

«Առավոտ» թերթն իր խմբագրականում գրում է. «Երեկ ինձ մեկն ասում է՝ շատ չե՞ս հիանում Կարեն Կարապետյանի կառավարությամբ։ Միանգամից ասեմ, որ ոչ մի կառավարություն, ոչ մի չինովնիկ եւ ոչ մի իշխանավոր չի կարող արժանանալ իմ ոչ իմ, ոչ էլ որեւէ մեկի հիացմունից։ Եվ այդպես է ոչ միայն մեր, այլեւ աշխարհի գրեթե բոլոր երկրներում․ Կորեայում իրենց առաջնորդով գուցե հիանում են, բայց պարզ է , որ «իրավիճակի փոփոխությունից» հետո նույն այդ հիացողները կփշրեն իրենց կուռքի արձանները այնպիսի փոքր կտորների, որ դրանք նույնիսկ որպես մետաղի ջարդոն հնարավոր չի լինի հանձնել։

Մի խոսքով՝ որեւէ բան անելու փորձերը կարող են արվել տարբեր մարդկանց կողմից եւ ունենալ տարբեր արտահայտություններ: Դրանք գուցե հիացմունքի արժանի չեն, բայց, մյուս կողմից, պետք չէ դրանց մոտենալ նախապաշարված, չարացած «աբիժնիկի» կեցվածքով:

Մենք բոլորս պետք է փորձենք սահմանափակել մեր «էգոն» եւ լինենք փոքր-ինչ ավելի բարյացակամ։ Դա ամենեւին չի նշանակում, որ Կարեն Կարապետյանի կառավարությունն, անպայման, կհաջողի կամ՝ որ այդ կառավարության անդամները չեն հասցրել սխալ բան անել։ Հիացմունք, կրկնեմ, չկա եւ չպիտի լինի։ Բայց երբեմն արժե մարդկանց մի փոքր քաջալերել։ Երբ 22 տարի առաջ Վանո Սիրադեղյանն ինձ առաջարկում էր թերթի խմբագիր դառնալ, իմ առաջին ռեակցիան շատ բնական էր՝ ես ընդունակ չեմ թերթ խմբագրել, ինչին Վանոն պատասխանեց՝ ես ավելի լավ գիտեմ, թե ով ինչի է ընդունակ»։

Առավել մանրամասն՝ թերթի այսօրվա համարում։

«Առավոտ» թերթի խմբագրականից մի հատված. «Հավանաբար, նկատել եք՝ երբ պարեղանակը մոտենում է ավարտին, նվազողները պարողներին էլ ավելի «տաքացնելու» համար արագացնում են տեմպն այնպես, որ ի վերջո երաժշտությունը հնչում է երկու անգամ ավելի արագ։ Այդպես է ոչ միայն մեր՝ հայերիս մշակույթում, այլև շատուշատ այլ ազգերի պարերի դեպքում։ Իսկ հարսանիք նվագողները դա անվանում են՝ «նա դվա», 6/8-ը հնարավորինս «պարզեցվում է» և դառնում է 2/2, նշանավորելով պարի վերջին՝ էքստատիկ փուլը։ Այս պահին «խորհրդարանական պարի» վերջին արարն է, և շուտով ամեն ինչ ընթանալու է արագացված տեմպով։ Այսինքն՝ մոտակա երկու ամսում ով մտնում է քաղաքականություն՝ պետք է մտնի, ով վերադառնում է՝ պիտի վերադառնա, ով ամուսնանում է (քաղաքական իմաստով)՝ պիտի ամուսնանա, ով բաժանվում է՝ պիտի բաժանվի։ Հիշեցի 90-ականների սկզբի «բացահայտվելու» գործընթացը, մասնավորապես, նրանք, ովքեր խորհրդարան էին մտել որպես կոմունիստներ կամ ՀՀՇ-ականներ, սկսեցին «բացահայտվել» որպես դաշնակցականներ։ Այսինքն՝ այդ մարդիկ, կարելի է ասել, մանկուց դաշնակցական էին, պարզապես ինչ-ինչ պատճառներով թաքցնում էին դա, և ահա՝ եկել էր պահը քաղաքական նախասիրությունների մասին հրապարակավ հայտարարելու»։

«Առավոտ»

Ամբողջությամբ՝ թերթի այսօրվա համարում։

Ըստ գնդապետ Զորայր Գաբրիելյանի՝ համակարգերի ձեռք բերումից առաջ արդեն պատրաստել են անձնակազմին

Պատերազմական գործողությունների ժամանակ «Իսկանդեր» կիրառելու կամ չկիրառելու թույլտվություն ՌԴ-ից խնդրելու հարկ չկա։ Կիրառե՞լ, թե՞ չկիրառել՝ այդ հարցը որոշում է Հայաստանի կառավարությունը»,- երեկ ասաց ՀՀ ԶՈՒ սպառազինության վարչության զրահատանկային ծառայության շահագործման և պլանավորման բաժնի պետ, գնդապետ Զորայր Գաբրիելյանը։ Ըստ նրա՝ «Իսկանդերը» 280 և ավելի կմ հեռավորության վրա ճշգրիտ հարված է հասցնում, մարտական մասի քաշը կես տոննա է. «Դե, պատկերացրեք՝ ինչ ավերածություններ է առաջացնում»։

Ի՞նչ հնարավորություններ ունեն «Սմերչ» և «Իսկանդեր» համակարգերը՝ հարցին պարոն Գաբրիելյանն ասաց՝ համակարգերի ձեռք բերումից աոաջ արդեն պատրաստել են անձնակազմին. «Կիրառման համար ոչ մի բարդություն չունենք։ Մենք ապրիլյան գործողությունների ժամանակ ստորաբաժանումը բերել էինք մարտական պատրաստականության՝ ցանկացած պահի կառավարության որոշման դեպքում հրթիռային հարվածները կհասցվեին»։ Նրա խոսքով՝ պատերազմի դաշտում մարտական գործողությունների ընթացքում սովորաբար լուսաբանվում են ավելի լարված մարտական գործողությունները, բայց սովորաբար կադրից դուրս է մնում այն մարդկանց աշխատանքը, որոնք ապահովել են տանկային ստորաբաժանումների հաջող գործողությունները. «Այդ ստորաբաժանումներից է զրահատանկային ծառայությունը, որը զբաղվում է տանկատեխնիկական ապահովմամբ, վնասված տեխնիկայի՝ մարտի դաշտից դուրսբերմամբ և այլ խնդիրներով»։

«Առավոտ»

Ամբողջական տեքստը՝ թերթի այսօրվա համարում։