«Մեր միջոցառումներին գործնական կերպով մասնակցում են հարյուրավոր խմբեր, որոնց հանրագումարը շատ ավելի մեծ թիվ է կազմում, քան հանրահավաքների մասնակիցներն են»,- հայտարարել է «Ժառանգության» պատգամավոր Արմեն Մարտիրոսյանը։
«ՉԻ»-ն հակադարձում է. «Խոսքն ամենայն հավանականությամբ «Ժառանգության» կազմակերպած «քաղաքացիական ժողովների» մասին է, որոնց լավագույն դեպքում մասնակցում է մի 60-70 հոգի։

Թե ինչպես են այդ 60-70 մասնակիցները ներկայացնում «հարյուրավոր խմբեր»՝ մնում է անհայտ։ Չէ, մենք հասկանում ենք, որ «Ձախորդ Փանոսը» հեքիաթի հանրահայտ հերոսն, օրինակ, կարող է միաժամանակ ներկայացնել և՛ ջրային թռչունների որսի սիրահարների ակումբը, և՛ ընտանեկան բռնություններից տուժածների միությունը։ Ավելին, Արմեն Մարտիրոսյանն ինքը միաժամանակ և՛ ընդդիմադիր կուսակցության անդամ է, և՛ «Նիգ-Ապարան» հայրենակցական միության ներկայացուցիչ։ Եվ այնուամենայնիվ, 60-70 հոգուն չի կարելի անվանել «հարյուրավոր խմբեր» ու եզրակացնել, որ նրանց հանրագումարը հանրահավաքների մասնակիցների թվից մեծ է։

Չնայած՝ ո՞վ ասաց, որ չի կարելի։ Պրն Մարտիրոսյանի երկրորդ «կարգավիճակը» լիովին տալիս է այդ իրավունքը»։

Իշխանական քարոզչամեքենաները սրտաճմլիկ վերլուծություններ են անում, թե բա չեք ասի՝ Հայ ազգային կոնգրեսը պառակտվում է, գրում է թերթը և հավելում, թե քանի որ վերջին օրերին այս թեման հաճախ է քննարկվում, թերևս արժե ավելի հանգամանորեն անդրադառնալ խնդրին…
Վերջին հաշվով մարդկանց ցանկացած խումբ էլ կարող է մի քանի օրում տարբեր անվանումներով մի 40–50 կուսակցություն գրանցել, հետո դրանք միավորել ու անունը դնել, ասենք, «Նոր կոնգրես», բայց ի՞նչը պիտի փոխվի դրանից, եթե համակիրներ չկան, հարցնում է թերթը։ Այլ կերպ ասած, ըստ թերթի, Կոնգրեսի պառակտման մասին խոսակցություններն իրական կլինեին միայն այն դեպքում, եթե Կոնգրեսի 500 հազար համակիրներից, ասենք, հարյուր հազարը երես թեքեին ՀԱԿ–ից և գնային այլ ուժերի հետևից։ Կա՞արդյոք ՀԱԿ–ում այդպիսի պրոբլեմ, հարցնում է թերթը և պատասխանում՝ իհարկե չկա, հետևաբար՝ «պառակտման» շուրջ խոսակցություններն ավելորդ են։

Թալանել է նաև հարկայինի պետին

Նախօրեին Գարեգին նժդեհի անվան հրապարակում ոստիկանների վնասազերծած «ջրի մարդը», որը հիվանդանոցում մահացել էր, ոստիկանության կողմից կասկածվում էր նաև մի քանի ավազակային հարձակումներ կատարելու համար: Երեկ թերթին հայտնի է դարձել, որ նա կարողացել է «ջրի մարդ» անվան տակ ներխուժել Մաշտոցի վարչական  տարածքում բնակվող Աբովյան քաղաքի ծառայության պետ Լյուդվիգ Ղազարյանի տուն: Նա հաջողեցրել է մուտք գործել հարկայինի պետի տուն և նրա տիկնոջից զենքի սպառնալիքի տակ հափշտակել 6200 ԱՄՆ դոլար և ոսկյա զարդեր: Հավանաբար հարուցված քրեական գործը, որը երեկ տեղափոխվել է ՀՀ Հատուկ  քննչական ծառայության վարույթ, տուժող կճանաչի նաև հարկայինի պետին, ենթադրում է թերթը:

«Քաղաքական շրջանակներում, ինչպես նաև իրավապահ համակարգում շատերը գիտեն, որ ՀՀ ոստիկանապետ Ալիկ Սարգսյանը հաճախ է լինում հարևան Վրաստանի Հանրապետությունում»,- գրում է «ՉԻ»-ն և հավելում. «Մեր աղբյուրների համաձայն` ՀՀ ոստիկանապետ Ալիկ Սարգսյանը Հայաստանից մետաղյա խողովակներ է արտահանում Վրաստան: Խողովակներն արտադրվում են Հայաստանում, և դրանք, ասում են, մեծ պահանջարկ ունեն Վրաստանում: Բայց սա Ալիկ Սարգսյանի միակ բիզնես նախագիծը չէ Վրաստանի տարածքում: Որոշ ժամանակ առաջ Վրաստանում գործող բուքմեյքերական գրասենյակները փակվեցին. Վրաստանի նախագահ Սահակաշվիլին ինքն էր արգելել այդ գրասենյակների տարածումը: Որոշ ժամանակ անց հայերից բաղկացած ճարպիկների մի խմբի հաջողվեց բուքմեյքերական գրասենյակներ բացել հենց Թբիլիսիի կենտրոնում: Սահակաշվիլին անձամբ էր թույլատրել հայերին բացել այդ «կանտորաները» այն բանից հետո, երբ հայկական կողմից ազդեցիկ մարդիկ խառնվեցին: Խոսակցություններ կան, որ Ալիկ Սարգսյանն է Վրաստանում բուքմեյքերական գրասենյակների իրական սեփականատերը, և նրա հովանավորությամբ ինչ-որ մարդիկ աշխատեցնում են դրանք: Համենայնդեպս` վրացական հարկային մարմինների ներկայացուցիչներին դրա մասին զգուշացված է, և նրանցից առավել բարձրաստիճանները երբեմն հյուրընկալում և ընկերակցում են Ալիկ Սերգեյիչին` իր վրացական «հյուրախաղերի» շրջանակներում»:

ՀՀԿ փոխնախագահ Ռազմիկ Զոհրաբյանը հայտարարել է, թե իբր «Ղարաբաղ» կոմիտեի ձևավորման ժամանակ ԿԳԲ–ն իրենց զգուշացրել էր, թե «չփորձեք անգամ մոտենալ հարթակին, դուք այնտեղ տեղ չունեք, սա մեր շարժումն է»։

«ՉԻ»-ն այսպես է հակադարձում նրան. «Շա՛տ ապրի Ռազմիկ Զոհրաբյանը։ Մարդ առնվազն մի 7-8 «բակալ» գարեջուր խմած պիտի լինի՝ հայտարարելու համար, որ ղարաբաղյան շարժումը մեր ազգային զարթոնքն էր, իսկ «Ղարաբաղ» կոմիտեն՝ ԿԳԲ–ի ստեղծածը։ Ստացվում է, որ մեր ազգային զարթոնքը ԿԳԲ-ն է կազմակերպել։

Բայց խնդիրը միայն սա չէ։ Ուշադրություն դարձրեք՝ ազգային զարթոնքի օրերին, փաստորեն, ԿԳԲ–ն ու ԱՄԿ–ի անդամները լավ էլ կոնտակտի մեջ են եղել ու երկխոսել են։ Ավելին՝ ԱՄԿ անդամները, փաստորեն, կատարել են ԿԳԲ-ի հրահանգը, և, ինչպես Ռազմիկ Զոհրաբյանն է ասում՝ «իհարկե՝ մենք մեր քաղաքական գործունեությունը շարունակում էինք «Ղարաբաղ» կոմիտեից ու ՀՀՇ-ից առանձին»։

Հետաքրքիր է՝ ԿԳԲ–ի ուրիշ ո՞ր հրահանգներն է կատարել Ռազմիկ Զոհրաբյանը, կամ արդյո՞ք իր քաղաքական գործունեության մեջ միշտ է հետևել ԿԳԲ–ի հորդորներին»։

«Տարիներ առաջ, երբ Արտաշատ քաղաքի թիվ 6 դպրոցի տնօրեն նշանակվեց Աննա Խուսավերդյանը, արտաշատցիները դա ընկալեցին որպես նրա հոր` Կծան Միշայի հանդեպ Ռոբերտ Քոչարյանի անձնական երախտագիտության արտահայտություն: Ոլորտին տեղյակ մարդիկ նշում են, թե ամբողջ Հայաստանում Աննա Խուդավերդյանը միակն է, որ լոգոպեդի որակավորմամբ` նշանակվել է տնօրեն»,-գրում է թերթը` հիշեցնելով, որ Կծան Միշան` Միշա Խուդավերդյանը հայտնի դարձավ Խուճուճ Էդոյի` Էդուարդ Մադաթյանի դեմ սարքված գործի շրջանակներում. Կծանը իրավապահ մարմիններին հայտնել էր, որ Խոսրովի արգելոց այցելող Խուճուճ Էդոն պատվիրել է սպանել խոսրովում հաճախակի որսի գնացող մի շարք բարձրաստիճան պաշտոնյաների, այդ թվում` Ռոբերտ Քոչարյանին:

«Որսի սիրահար պաշտոնյաների համար «որսաշան» կարգավիճակ ունեցող, այսինքն` խված որսի ետեւից վազող Կծանը պարգեւատրվեց 2003 թ, ընդդիմության շարքերն անցած Մադաթյանին ամբաստանելու համար: Սակայն եկել են պարգեւները ետ վերցնելու ժամանակները: Արտաշատի մեր աղբյուրների փոխանցմամբ` Կծանի աղջկա դպրոցում առաջին անգամ լուրջ ստուգումներ են անցկացվել: Նախնական տվյալներով` պարզվել է, որ Աննա Խուդավերդյանը դպրոցի յուրաքանչյուր ուսուցչից յուրացրել է առնվազն 1 միլիոն դրամ»,-տեղեկացնում է  «ՉԻ»-ն: Արտաշատում որպես «Կծանի աղջկա դպրոց» հայտնի դպրոցում տիրող վիճակի եւ ստուգումների մանրամասները թերթը խոստանում է ներկայացնել առաջիկայում:

Նախօրեին տեղացած հորդառատ անձրևից հետո Երևանի մի շարք փողոցներ հերթական անգամ հեղեղվել էին և անանցանելի դարձել, որովհետև ջրահեռացման համակարգերը չէին գործում։ «ՉԻ»-ի հավաստի տեղեկություններով, Երևանի քաղաքապետարանում արտահերթ խորհրդակցություն է հրավիրվել այս առիթով։ Խորհրդակցության ընթացքում մայրաքաղաքի գլխավոր դիզայներին հանձնարարվել է նախագծել ազգային ոճի նավակներ և ապահովել երթուղայիններում «լռված» քաղաքացիների տարհանումը։ Միաժամանակ որոշվել է մրցույթ հայտարարել ջրահեռացման «լյուկերի» արտաքին դիզայնի ընտրության նպատակով։ Քաղաքապետ Կարեն Կարապետյանի կարգադրությամբ՝ անձրևաջրերն այսուհետ պիտի կուտակվեն բացառապես օրենքով նախատեսված փողոցներում, ընդ որում, քաղաքապետարանի համապատասխան վարչություններին հանձնարարվել է այդ վայրում կազմակերպել ջրային մարզաձևերի բաց առաջնություններ՝ «Здоровый город» կարգախոսով։ Ի դեպ, առաջիկայում Ռուսաստանից հրավիրված մասնագետները քաղաքապետարանի աշխատակիցների համար լողի դասընթացներ կկազմակերպեն, հեգնում է օրաթերթը։

Ինքնասպանության փորձ ոստիկանության  բաժնում

Երեկ Իջևանի ոստիկանության բաժնում ինքնասպանության փորձ է կատարել Վահե Սանթրոսյանը, որը նույն օրվա առավոտյան երեք տարվա ազատազրկման է դատապարտվել՝ համաձայն ՀՀ Քր.Օր 177 հոդվածի 2-րդ մասի 3-րդ կետի՝ գողություն, որը կատարվել է բնակարան, պահեստարան կամ շինություն ապօրինի մուտք գործելով (դատավոր՝ Ռաֆիկ Մելքոնյան, դատախազ՝ Անուշ Չիլինգարյան, պաշտպան՝ Կարինե Գասպարյան)։ Ըստ թերթի տեղեկությունների, ժամը 14։30-ին, ոստիկանների ուղեկցությամբ, Սանթրոսյանը տեղափոխվել է «Իջևանի ԲԿ» ՓԲԸ՝ որովայնի և մարմնի տարբեր մասերի կտրած վերքերով։ Այս դեպքի մասին, ըստ թերթի, հաղորդագրություն է տեղադրված մարդու իրավունքների պաշտպանության Հելսինկյան  ասոցիացիայի կայքէջում:

«Ուրիշի փոխարեն քվեարկող պատգամավորը պետք է անհարմար զգա և ամաչի իր քայլի համար»,- հայտարարել է ԱԺ փոխնախագահ Սամվել Նիկոյանը:

«ՉԻ»-ն հեգնանքով հակադարձում է. «Մեր տեղեկություններով, պարոն Նիկոյանի այս հայտարարությունից հետո ԱԺ խմբակցություններն արտահերթ խորհրդակցություններ են անցկացրել և հաստատել անհարմար զգալու և ամաչելու ընթացակարգերը: Ըստ այդմ՝ ընդամենը մի բացակա պատգամավորի փոխարեն քվեարկողը պիտի թեթևակի կարմրի, երկուսի փոխարեն քվեարկողը՝ գետինը մտնի, երեք և ավելի կոճակ սեղմողը՝ հանդիսավորապես մեղա գա, պատառոտի վերնաշապիկը և նախնյաց շիրիմների, Մասիս սարի, քյաբաբի և այլ սրբությունների արևով երդվի, որ պատահաբար է ստացվել:

Մեր տեղեկությունների համաձայն՝ նույն այդ աշխատանքային խորհրդակցությունների ընթացքում քննարկվել է նաև առավելագույնս ամաչած պատգամավորների խրախուսման  ընթացակարգը: Մասնավորապես որոշվել է կառավարության պահուստային ֆոնդից ամաչավճար վճարել առավել ամաչունակ պատգամավորներին: Այս առաջարկները խորհրդարանին կներկայացվեն առաջիկա նստաշրջանին: Քվեարկության ընթացքում կամաչեն շուրջ 60 պատգամավորներ»:

Արաբկիրի նախկին թաղապետ Հովհաննես Շահինյանը երեկ Արաբկիրի դատարանում վկայություն է տվել իր քրոջ որդու` Արսեն Ահարոնյանի, նրա ընկերոջ` Պետրոս Գրիգորյանի և վերջերս ձերբակալված Վռամ Բաղդասարյանի գործով դատաքննության շրջանակներում:

Դատարանի դահլիճից դուրս գալուց հետո «ՉԻ» թղթակիցը զրուցել է Շահինյանի հետ և հետաքրքրվել, թե չի՞ պատրաստվում առաջադրվել Արաբկիր վարչական շրջանում` որպես պատգամավորի թեկնածու: Ի պատասխան` Շահինյանն ասել է, որ մտադրություն ունի առաջադրվելու թիվ 5 ընտրատարածքում: «Եթե իմ կուսակցությունն ու նրա նախագահը հարմար գտնեն` կառաջադրվեմ 5-րդ ընտրատարածքում մեծամասնական ընտրակարգով, եթե ոչ, ապա կլինեմ ՀՀԿ համամասնական ցուցակում և բոլորի նման ու բոլորի հետ միասին կաշխատեմ մեր ցուցակի համար»,- ասել է Շահինյանը:

«ՉԻ»-ն հիշեցնում է, որ թիվ 5 ընտրատարածքից մեծամասնական ընտրակարգով այս խորհրդարանում պատգամավոր է «նշանակվել» ՀՀԿ-ական Լևոն Սարգսյանը` Ալրաղացի Լյովը:

«Ստիպված եմ հիշեցնել, որ 1998-2007 թթ. Հայաստանի Հանրապետությունում ոչ մի քաղբանտարկյալ չի եղել»,- հայտարարել է Ռոբերտ Քոչարյանի գրասենյակի ղեկավար Վիկտոր Սողոմոնյանը։

«ՉԻ»-ն հակադարձում է. «Հին աշխարհի իմաստուններն ասում էին. «Իմ լեզուն իմ թշնամին է», և փաստորեն ճիշտ էին ասում։ Բանն այն է, որ Վիկտոր Սողոմոնյանի վերոհիշյալ հայտարարությունն ուղղակիորեն նշանակում է, որ 2007-ից հետո Հայաստանում եղե´լ են քաղբանտարկյալներ (հակառակ դեպքում ինչո՞ւ պիտի ասեր, որ մինչև 2007-ը չեն եղել)։ Բայց մյուս կողմից էլ բոլոր այն քաղբանտարկյալները, ովքեր Սերժ Սարգսյանի օրոք բանտերում էին, կալանավորվել են կամ մինչև 2008 թ. մարտի 1-ը, կամ դրան հաջորդած մի քանի օրերին, այսինքն՝ Ռոբերտ Քոչարյանի իշխանության օրոք։ Պարզ ասած՝ քաղբանտարկյալների առկայության թիվ մեկ պատասխանատուն հենց Ռոբերտ Քոչարյանն է։ Եվ այնուամենայնիվ՝ ակնհայտ առաջընթաց է, որ Քոչարյանի գրասենյակը վերջին երեք տարիներին Հայաստանի բանտերում գտնվող ընդդիմադիրներին ճանաչում է որպես քաղբանտարկյալ։ Պարզապես հետաքրքիր է՝ ինչո՞ւ ավելի վաղ չէր անում դա։ Ըստ երևույթին, ապագայի որոշ կանխատեսումներ ստիպում են նրան ավելի գորովանքով խոսել քաղբանտարկյալի կարգավիճակի մասին»։

«Մինչև բարեհաճում են գալ` բանը բանից անցած է լինում»

Երեկ «Նուբարաշեն» ՔԿՀ-ում 53 տարեկան հասակում մահացել է բանտարկյալ Գագիկ Սաֆարյանը, տեղեկացնում է «Չորրորդ ինքնիշխանություն» օրաթերթը և ներկայացնում «Նուբարաշեն» ՔԿՀ-ի աշխատակիցներից մեկի պատմածը դեպքի մասին: Աշխատակցի անունը օրաթերթը չի հրապարակել:

«Այստեղ շտապօգնությունը գրեթե չի արձագանքում կանչերին: Բժիշկ կանչելն իսկական պատմություն է դառնում: Մինչև բարեհաճում են գալ` բանը բանից անցած է լինում: Անգամ գալու դեպքում միայն մի բան են անում` ցավազրկում են. էն էլ երկար պետք է համոզես, որ մարդն իսկապես վատ է զգում: Մահացողն իրեն երեկվանից վատ էր զգում, մինչև հասկացան, որ մարդն իսկապես վատ է, մինչև եկան-տարան, մահացավ»:

Ըստ մեր տեղեկությունների, այս օրերին Ավանի աղի հանքի տնօրինությունը կապեր է փնտրում Չինաստանի հետ, որպեսզի կազմակերպի յոդացված աղի խոշոր խմբաքանակների արտահանումն այդ երկիր։ Աղի մագնատներին հուսադրել և նոր բիզնես ծրագիր է հուշել Չինաստանում տիրող աղային խուճապը՝ կապված «Ֆուկուսիմա-1» ատոմակայանի ռեակտորների վթարի հետևանքով ռադիոակտիվ տարրերի դեմ պայքարելու անհրաժեշտության հետ։ ԶԼՄ-ները գրել են, որ պարենային խանութներից մարդիկ գնում են առաջին անհրաժեշտության ապրանքներ, որոնց շարքում առաջին տեղում աղն է, որովհետև հայտնի է, որ ի տարբերություն արդեն իսկ վարակված և վտանգավոր ծովային աղի, յոդացված աղն օգնում է, որպեսզի օրգանիզմն ավելի արագ հաղթահարի ճառագայթման ազդեցությունը։ Չնայած չինական իշխանությունների կողմից տարածվող բացատրություններին, թե վտանգն այլևս անցած է, և կարիք չկա խուճապահար աղ գնել, աղն անհետացել է մայրաքաղաք Պեկինի, ինչպես նաև մի քանի գավառների պարենային խանութներից։ Ըստ լուրերի, Ղուկասյաններն այնքան են ոգևորվել, որ մտածել են՝ հայկական աղի պաշարները չեն բավականացնի, և գուցե հարկ լինի՝ նախ այլ երկրից աղ ներմուծել, ապա արտահանել Չինաստան։