ՀՀԿ Գործադիր մարմնի անդամ Էդուարդ Շարմազանովը գրել է․

«Սերժ Սարգսյանից մեկ Ալիևն է վառված, մեկ՝ նիկոլիստները, մեկ էլ՝ անուղղելի արևմտամոլները։

Նիկոլիստներ, սորոսականներ ու արևմտամոլներ… Սերժ Սարգսյանի ասածներն եք քննադատու՞մ ՝ ասելով, թե նա «երկրորդում է Բաքվին»։

Հիմա ուշադիր կարդացեք գրածներս։

Զեզնից, Նիկոլից ու ձեր արևմտյան «պապա-մամաներից» Բաքվին ավելի լավ երկրորդող չի եղել ու չկա։

Նիկոլն է երկրորդել Բաքվին ու ճանաչել Արցախն Ադրբեջանի մաս։

Արևմուտքն է երկրորդել Բաքվին ու առաջարկել ՀՀ-ին «Արցախի հարցում նշաձողն իջեցնել»։

Արևմուսքն է  Միշելի ու Մակրոնի հովանավորությամբ Պրահայում Փաշինյանին սատարել Արցախն ադրբեջանական ճանաչել։

Փաշինյանն է երկրորդել Բաքվին, երբ համաձայն է Տավուշի 4 գյուղերը հանձնել Ադրբեջանին։

Փաշինյանն է երկրորդել Բաքվին ու Ալիևի նման պատերազմով է սպառնում հայ ժողովրդին։

Փաշինյանն է երկրորդել Բաքվին ու ծրագրում է փոխել Սահմանադրությունն ու Անկախության հռչակագիրը։

Շարքը երկար է…

Սերժ Սարգսյանից մեկ Ալիևն է վառված, մեկ նիկոլիստները, մեկ էլ  արևմտամոլները։

Ինչու՞…որիվհետև թույլ չէր տալիս Հայաստանը դարձնել աշխարհաքաղաքական գործիք»։  

Բրյուսելում Հայաստան-ԵՄ-ԱՄՆ հանդիպումը «վտանգի ևս մեկ աղբյուր է ստեղծում» (չակերտները` Tert.am) Հարավային Կովկասի համար. այս մասին հայտարարել է Ադրբեջանի նախագահ Իլհամ Ալիևը:

«Չնայած այն հանգամանքին, որ Միացյալ Նահանգների և Եվրամիության բարձրաստիճան պաշտոնյաները իրենց նախաձեռնությամբ տեղի ունեցած հեռախոսազրույցների ընթացքում փորձել են համոզել մեզ, որ այս հանդիպումն ուղղված չէ Ադրբեջանի դեմ, մենք գիտենք, որ դա հակասում է Ադրբեջանի հետ համագործակցությանը»,- նշել է Ալիևը Թուրքիայի խորհրդարանի անդամ, ՆԱՏՕ-ի Խորհրդարանական վեհաժողովում պատվիրակության ղեկավար Մևլութ Չավուշօղլուի հետ հանդիպմանը։

Այն, որ Ադրբեջանը չի դատապարտել Իսրայելի կողմից Դամասկոսում Իրանի հյուպատոսության վր հարձակումը, Իրանի իսլամական հեղափոխականների կորպուսի հետ առնչվող տելեգրամյան ալիքները դա դիտարկում են որպես Ադրբեջանի անուղղակի ներգրավվածություն այս ահաբեկչական գործողության մեջ եւ շատ դեպքերում սլաքներն ուղղում են հատկապես Բաքվի բռնապետական վարչախմբին: Այս մասին նշեց իրանագետ Վարդան Ոսկանյանը:

«Թիրախավորվում է Բաքվի վարչախումբը որպես իսրայելական պլացդարմ Հարավային Կովկասում, որպես պետություն, որը Իսրայելին օժանդակում է ամեն ինչում, եւ դա այդպես է: Դա խորքային ռազմավարական դաշինք է՝ ընդդեմ Իրանի, որից օգտվում է Բաքվի բռնապետական վարչախումբը Հայաստանի դեմ գործողություններ իրականացնելով: Գիտեք, որ Իսրայելը ադրբեջանական ահաբեկչության թիվ մեկ հովանավորն է թե քարոզչական, թե ռազմական տիրույթում:

Իրանցիները հստակ հասկանում են, որ Ադրբեջանն Իսրայել արբանյակն է՝ հակաիրնական նպատակների առումով»,-ասաց նա:

Վարդան Ոսկանյանը նաեւ նկատեց, որ եթե Իրանը ներքաշվի լայնածավալ պատերազմի մեջ, դա նոր մարտահրավերներ է բերելու. «Գիտեք, որ Իրանը փաստացի մեր անվտանգային ճարտարապետության կարեւոր բաղադրիչի ապահովողներից մեկն է: Խոսքը հատկապես Սյունիքի մասին է եւ այսպես կոչված, «Զանգեզուրի միջանցքի» մասին: Հետեւաբար, եթե Իրանի ռեսուրսներն ուղղորդվեն այլ լայնածավալ գործողությունների, ապա կարող է ստեղծվել որոշակի վակուում, որից կարող է օգտվել Ադրբեջանը:

Մյուս կողմից կա վտանգ հենց նույն Բաքվի բռնապետական վարչախմբի համար, որովհետեւ այս իրավիճակում որեւէ մեկը չի կարող երաշխավորել, որ դիցուք, թիրախներից մեկը չի դառնա Բաքուն»,- ընդգծեց իրանագետը:

Ապրիլի լույս 5-ի գիշերը ռուսական զորքերը «Շահեդ» տիպի 13 անօդաչու թռչող սարքերով հարձակվել են Ուկրաինայի տարածքի վրա, հաղորդում է Ուկրաինայի զինված ուժերը։ Դրանք բոլորը խոցվել են։ 

Ուկրաինայի զինված ուժերի ռազմաօդային ուժերի հրամանատար, գեներալ-լեյտենանտ Նիկոլայ Օլեշչուկի խոսքով՝ անօդաչու սարքերը խոցվել են Զապորոժյեի, Օդեսայի և Դնեպրոպետրովսկի շրջաններում։

Ինչպես նաև, ըստ Ուկրաինայի Զինված ուժերի, ռուս զինվորականները Բելգորոդի շրջանից արձակել են երկու Ս-300/Ս-400 զենիթային կառավարվող հրթիռներ և երեք «Իսկանդեր-Մ» բալիստիկ հրթիռներ։ Հրթիռային հարվածների հետեւանքների մասին չի հաղորդվում։

ՀՀ հակակոռուպցիոն կոմիտեի աշխատակիցների կողմից իրականացված լայնածավալ օպերատիվ-հետախուզական միջոցառումների արդյունքում նախաձեռնված քրեական վարույթով կատարված նախաքննությամբ հիմնավորվել է, որ ՀՀ քաղաքաշինության,  տեխնիկական և հրդեհային անվտանգության տեսչական մարմնի երկու ստորաբաժանումների ղեկավարներ Ա. Ս.-ն և Կ. Կ.-ն, ինչպես նաև նույն տեսչական մարմնի 4 աշխատակիցները, խմբի կազմում, իրենց ծառայողական լիազորություններն օգտագործելով կաշառք տվողների օգտին գործողություններ կատարելու, ապօրինի անգործություն դրսևորելու համար Երևանում կառուցվող մի շարք շինությունների սեփականատերերից որպես կաշառք պարբերաբար ստացել են տարբեր չափի գումարներ: Հայտնել է ՀՀ հակակոռուպցիոն կոմիտեն։

Նախաքննությամբ պարզվել է, որ տեսչական մարմնի վերը նշված պաշտոնատար անձինք Երևանի տարբեր հասցեներում կառուցվող շինությունների՝ շահագործման հանձնելուց առաջ սահմանված նորմերի համապատասխանության վերաբերյալ  ավարտական փաստաթղթերում դրական կարծիք (եզրակացություն) տալու գործընթացը կազմակերպելու համար տվյալ շինությունների սեփականատերերից պահանջել և 2023 թվականի հոկտեմբեր-նոյեմբեր ամիսներին նրանցից ստացել են 50.000-ից մինչև 3.000.000 ՀՀ դրամ  կաշառք, որն այնուհետև բաժանել են միմյանց միջև:

Բացի այդ, նշված անձինք իրենց ծառայողական լիազորություններն օգտագործելով կաշառք տվողի օգտին ապօրինի անգործություն դրսևորելու, այն է՝ քաղաքաշինական բնագավառում  խախտումների առկայության պայմաններում Երևանի կենտրոնական հատվածներից մեկում կառուցվող շինության՝ շահագործման հանձնելուց առաջ սահմանված նորմերի համապատասխանության վերաբերյալ ավարտական փաստաթղթերում եզրակացություն տալու գործընթացը կազմակերպելու համար տվյալ շինարարական կազմակերության տնօրենից 2023 թվականի հոկտեմբեր ամսին պահանջել և ստացել են խոշոր չափերի՝ 3.000.000 ՀՀ դրամին համարժեք 7.000 ԱՄՆ դոլար կաշառք:

Այսպիսով՝ ՀՀ քաղաքաշինության,  տեխնիկական և հրդեհային անվտանգության տեսչական մարմնի վերը նշված 6 պաշտոնատար անձինք, այդ թվում՝ երկու ստորաբաժանումների ղեկավարները, Երևանի տարբեր հասցեներում կառուցվող շինությունների 9 սեփականատերերից 2023 թվականի հոկտեմբեր-դեկտեմբեր ամիսներին ընդհանուր առմամբ որպես կաշառք ստացել են 8,800 ԱՄՆ դոլար և 5 մլն ՀՀ դրամ:

Կաշառք ստանալու համար պաշտոնատար անձանց մեղադրանք է ներկայացվել ՀՀ քրեական օրենսգրքի 435-րդ հոդվածի տարբեր մասերով, իսկ վերջիններիս կաշառք տված շինությունների սեփականատերերին՝ ՀՀ քրեական օրենսգրքի 436-րդ հոդվածի տարբեր մասերով:

Պաշտոնյաներից 4-ի նկատմամբ որպես խափանման միջոց է կիրառվել կալանքը:

Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են դատարան՝ ըստ էության քննելու համար:

«Հայքի մշակութային ժառանգության» օմբուդսմենը գրում է․

Ադրբեջանի պետական վարչակարգը շարունակում է յուրացնել և ոչնչացնել Արցախի մշակութային ժառանգությունը։ Ապրիլի 4-ին ադրբեջանական սոցցանցային հարթակներում տարածվեց մի տեսանյութ, որը նկարահանվել է Արցախի Հանրապետության բռնազավթված Քաշաթաղի շրջանում։ Տեսանյութում Քաշաթաղի շրջանում գտնվող Զորախաչ եկեղեցին ներկայացվում է որպես աղվանական։ Այս քաղաքականությամբ խեղաթյուրվում է պատմությունը։ Զորախաչի եկեղեցին գտնվում է Արցախի Հանրապետության Քաշաթաղի շրջանում (այժմ՝ Ադրբեջանի վերահսկողության տակ), Բերձորից 52 կիլոմետր հյուսիս, Հակարի գետի Շալվա վտակի ձախակողմյան հատվածում, Արախիշ գյուղի տարածքում: Եկեղեցու մասին առավել մանրամասն կարող եք կարդալ հետևյալ հղմամբ https://monumentwatch.org/en/monument/zorakhach-church/:

Ադրբեջանը որպես աղվանական է ներկայացնում ոչ միայն Արցախի ու Նախիջևանի հայկական մշակութային ժառանգության զգալի մասը, այլ նաև՝ Տաթևի վանքը, Հառիճավանքը, Էջմիածնի Մայր տաճարը, Հաղարծինի վանքը, Գոշավանքը, Հաղպատի վանական համալիրը, Սևանավանքը, Գեղարդավանքը, Աղթամարի Սուրբ խաչ եկեղեցին և այլ հոգևոր մշակութային արժեքներ։

Ըստ «Զինված հակամարտությունների ժամանակ մշակութային արժեքների պաշտպանության մասին» 1954 թվականի Հաագայի կոնվենցիայի 4-րդ հոդվածի՝ արգելված է մշակութային ժառանգության հանդեպ վանդալիզմի, գողության, կողոպուտի, յուրացման, թշնամանքի և հաշվեհարդարի ցանկացած գործողություն։ Հաագայի 1954 թվականի առաջին արձանագրությունն արգելում է օկուպացված տարածքներում ոչնչացնել մշակութային կամ հոգևոր արժեքները։

«Կրոկուս»-ում ահաբեկչություն կատարելու մեջ մեղադրվողներից մեկի հեռախոսում հայտնաբերվել են Ուկրաինայի դրոշով քողարկված մարդկանց լուսանկարներ, հայտնում է Քննչական կոմիտեն Telegram-ի իր ալիքում։

«Ահաբեկչի հեռախոսում եղել են քողարկված համազգեստով մարդկանց լուսանկարներ՝ ուկրաինական դրոշով ավերված տների ֆոնին և ուկրաինական փոստային նամականիշ՝ անպարկեշտ ժեստով։ Այս տվյալները կարող են վկայել կատարված ահաբեկչության և հատուկ ռազմական գործողության անցկացման միջև կապի մասին»,- ասվում է հրապարակման մեջ։

Հետաքննությունը պարզել է, որ հարձակվողներն ահաբեկչության համար ընտրել են Crocus City Hall համերգասրահը՝ իրենց գործողությունները ղեկավարած կուրատորի հանձնարարությամբ։

«2024 թվականի փետրվարի 24-ի առավոտյան, այսինքն՝ հատուկ ռազմական գործողության մեկնարկի տարեդարձին, մեղսակիցներից մեկը համացանցային ռեսուրսներում գտել և նրան է ուղարկել Crocus City Hall շենքի և դրան մուտքի ճանապարհների մուտքերի պատկերների սքրինշոթներ»,- նշվում է հաղորդագրության մեջ։

Քննիչներն ընդգծել են, որ մեղադրյալն իր ցուցմունքում հաստատել է այս ամենը։
Քննչական կոմիտեն ստուգում է ահաբեկչության կազմակերպմանն ու ֆինանսավորմանը Ուկրաինայի հատուկ ծառայությունների և իսլամիստական ​​ահաբեկչական կազմակերպությունների ներկայացուցիչների մասնակցությունը։

Կրասնոգորսկի Crocus City Hall համերգասրահում կրակոցներ են տեղի ունեցել մարտի 22-ի երեկոյան։ Մի քանի տղամարդ ներխուժել են շենք, նրանք կրակել են մարդկանց ուղիղ հեռավորության վրա և հրկիզիչ ռումբեր նետել:

«Ժողովուրդ» օրաթերթը գրում է․ «Շարունակվող բռնությունը կարող է խաթարել տեւական ու արժանապատիվ խաղաղության ուղղությամբ Հայաստանի եւ Ադրբեջանի ունեցած առաջընթացը:
«Ժողովուրդ» օրաթերթի հարցմանն ի պատասխան՝ այս մասին հայտնել են Հայաստանում ԱՄՆ դեսպանությունից:
Այսպիսով, «Ժողովուրդ» օրաթերթը ապրիլի 1-ին գրավոր հարցմամբ դիմել էր ՀՀ-ում ԱՄՆ դեսպան Քրիստինա Քվինին՝ խնդրելով պատասխանել մի քանի հարցերի՝ Տավուշի գյուղերի հանձման վերաբերյալ արված Նիկոլ Փաշինյանի հայտարարությունների առնչությամբ:
ԱՄՆ դեսպանին, մասնավորապես, խնդրել էինք պատասխանել, թե ինչ տեղեկություններ կան դեսպանի մոտ, որտեղ է սկսվում եւ որտեղ է ավարտվում Հայաստանի Հանրապետությունը:
Ո՞ր թվականի քարտեզներն է միջազգային հանրությունը համարում լեգիտիմ եւ առաջարկում սահմանազատումն իրականացնել այդ քարտեզներով:
Ինչո՞ւ դեսպանը՝ որպես միջազգային հանրության վառ ներկայացուցիչ, չի գործադրում ջանքեր, որպեսզի Ադրբեջանը, որ 2021 թվականից օկուպացրել է ՀՀ ինքնիշխան տարածքները Սյունիքի, Գեղարքունիքի եւ Ջերմուկի հատվածներում, հետ քաշվի: Իսկ եթե գործադրում է ջանքեր, ապա ինչո՞ւ չկա հաջողություն:
ՀՀ վարչապետը մարտի 18-ին՝ Տավուշի մարզում բնակիչների հետ հանդիպման ժամանակ, հայտարարել է, որ եթե 1 շաբաթվա ընթացքում սահմանազատման գործընթացը չսկսվի, այսինքն՝ տարածքները չհանձնվեն, ապա պատերազմ է սկսվելու: Դեսպանն ի՞նչ տեղեկություն ունի, արդյոք պատերազմը անխուսափելի՞ է, եւ եթե հարձակում լինի ՀՀ վրա, ինչպե՞ս կարձագանքի դրան միջազգային հանրությունը:Ի պատասխան մեր այս հարցերի՝ ՀՀ-ում ԱՄՆ դեսպանությունը տվել է այսպիսի պատասխան.
«Միացյալ Նահանգներն աջակցում է Հայաստանի ինքնիշխանությանն ու տարածքային ամբողջականությանը։ Հուսով ենք, որ Հայաստանն ու Ադրբեջանը կստորագրեն տեւական խաղաղության համաձայնագիր, որով կճանաչվի այդ ինքնիշխանությունը եւ տարածքային ամբողջականությունը․ եւ ինչքան շուտ, այնքան լավ։
Միացյալ Նահանգները հստակ մատնանշել է, որ այս հակամարտությունը չունի ռազմական լուծում։ Մենք կարծում ենք, որ շարունակվող բռնությունը կարող է խաթարել տեւական ու արժանապատիվ խաղաղության ուղղությամբ Հայաստանի եւ Ադրբեջանի ունեցած առաջընթացը»»։
Մանրամասները՝ «Ժողովուրդ» օրաթերթի այսօրվա համարում:

Լեմկինի Ցեղասպանության կանխարգելման ինստիտուտը երրորդ անգամ է հայտարարել կարմիր դրոշի ահազանգ (ամենաբարձր նախազգուշացումը)՝ հաշվի առնելով Ադրբեջանի սրացող հռետորաբանությունն ու պահանջները Երևանի հասցեին, ինչպես նաև վերջին հարձակումները Սյունիքի և Գեղարքունիքի մարզերի վրա։

«Նախկինում մենք բազմաթիվ կարմիր դրոշի և SOS ահազանգեր ենք տարածել 2023 թվականի սեպտեմբերի 19-ին Ադրբեջանի կողմից օկուպացված և հայաթափված Արցախի Հանրապետության համար: Այժմ, ինչպես և ենթադրվում էր մեր նախորդ հրապարակումներում, ցեղասպանության վտանգը տարածվել է նաև բուն Հայաստանի Հանրապետության ինքնիշխան տարածքի վրա։ Ադրբեջանը, կարծես, վարում է Հայաստանի ինքնիշխան տարածքի աստիճանական օկուպացման ռազմավարություն», — նշում են ինստիտուտի փորձագետները՝ ընդգծելով, որ Բաքուն այժմ ձգտում է վերահսկողություն հաստատել ութ գյուղի նկատմամբ, որոնք, Ադրբեջանի պնդմամբ, գտնվում են «հայկական օկուպացիայի» (չակերտները՝ Tert.am) տակ:

«Նրա նպատակն է ամբողջապես վերահսկել հայկական պետությունը և Ադրբեջանը միավորել Թուրքիային… Հավակնելով վերահսկել Հայաստանի ռազմավարական կետերը, Ադրբեջանը, կարծես թե, իր քաղաքականությունը մոդելավորում է Պաղեստինում իսրայելական բնակավայրերի ստեղծման օրինակի վրա: Հայաստանին սպառնացող վտանգը դարձել է հրատապ՝ պահանջելով միջազգային հանրության անհապաղ և համակարգված ուշադրությունը։ Հրատապ գործողությունները հրամայական են՝ թույլ չտալու համար տարածքային օկուպացիայի և ցեղասպանության հերթական դեպքը, որը նման է ընդամենը վեց ամիս առաջ Արցախում տեղի ունեցածին», — նշվում է հրապարակման մեջ:

մանկավարժ, հրատարակիչ, «Այբբենարանի» հեղինակ Վաչագան Ա. Սարգսյանը գրում է. 

«ՏԽՈՒՐ Է ՈՒ ՁԱՆՁՐԱԼԻ

Վերջերս սովորույթ է դարձել համացանցում դնել որևէ դասագրքի որևէ էջի նկար ու գրել՝ օգնեք լուծել, գտնել պատասխանը և այլն: Սա համարում եմ բնական մի բան: Մարդը չի կարողացել, չգիտի, տեղյակ չէ, խելքը չի հասնում և օգնություն է խնդրում:

Անբնականն ու աննորմալությունն այն է, որ կան դեպքեր,  երբ այդ ամենը պիտակավորված է ներկայացվում՝ դեբիլություն, հիմարություն, աղբ և այլն: Այդպես գրողները չեն էլ հասկանում, որ իրենք իրենց են բնորոշում:

Բայց ավելի զազրելի է, որ իրենց ամենագետ համարող որոշ թունավոր տհասներ իրենց մեկնաբանություններում սկսում են հայհոյել դասագիրք կազմողներին, իրենց նման տհասներին դուր գալու նպատակով:

Առանց ամաչելու, առանց հասկանալու խնդրի էությունը, առանց գիտակցելու թե ինչի է կոչված որևէ առաջադրանք, ինչ նպատակով է ստեղծված, կյանքում որևէ օգտակար բան չարած, բանից անտեղյակ որևէ դուրսպրծուկ կարող է հանգիստ հայհոյել տքնաջան աշխատանքով ստեղծված դասագրքի հեղինակներին, երեխաների միտքն ու տրամաբանությունը զարգագացնող, բայց իր հավուղեղին անհասանելի առաջադրանքը անվանարկելով ու ծաղրելով, համարելով դեբիլություն:
Մարդը փոխանակ ամաչելու, որ հասարակ բանը չի հասկանում, առանց կարմրելու գնահատական է տալիս դասագրքին՝ իրեն վեր դասելով դասագրքաստեղծ խմբից, իր պստլիկ եսիկի խեղված պահանջմունքները բավարարելու համար:

Ուրախալին այն է, որ բոլոր նման գրառումների տակ միշտ հանդես են գալիս բազմաթիվ օգտատերեր, որոնք մանրամասն, համբերատար ու ճշգրիտ բացատրում են, թե ինչն ինչոց է, բայց ցավալին այն է, որ նրանց  լսող չկա: Կարևորը՝ տեղ է բացվել իրենց թույնը թափելու, զսպված խելացնորությունները դուրս տալու համար»։