2010 թվականին Հայաստանի կառավարության աշխատակազմը պետբյուջեից ավելի քան 31 մլրդ դոլար է ստացել: Հաշվետու տարում 6 ոլորտներում 25 ծրագիր է իրականացվել,  սակայն ծրագրերն իրագործվել են  78,759 տոկոսով:

Իսկ 2009 թվականի համեմատությամբ Հայաստանի կառավարության աշխատակազմի ծախսերն աճել են 73,4 տոկոսով:

2010 թվականի բյուջեի կատարողականը Ազգային ժողովում ներկայացնելիս, այս մասին ասաց գլխավոր գանձապետ Ատոմ Ջանջուղազյանը:

Facebook սոցիալական ցանցի  Նադեժդա Սարգսյանի էջում գրառում կա, որտեղ երգչուհու մոր անունից ասվում է, թե «Եվրատեսիլ-2011» -ի կիսաեզրափակչի արդյունքները Էմմին չի բողոքարկել.

«Սիրելինե՛րս, նախ շնորհակալություն եմ հայտնում բոլոր նրանց, ովքեր մեզ հետ են առ այսօր, ովքեր հավատացել և հավատում են Էմմիին։ Ուզում եմ ասել, որ Էմմին չի բողոքարկել, որովհետև «Եվրատեսիլ» մրցույթի պաշտոնական ներկայացուցիչը Հանրային հեռուստատեսությունն է, միայն «Հ1»-ը կկարողանա ինչ-որ գործողություն անել, որը նույնպես չի բողոքարկել: Մանրամասները` մամլո ասուլիսի ժամանակ, երբ կվերադառնան»,- գրել է Նադեժդա Սարգսյանը:

Հետաքրքիր է, որ Էմմի մենեջերն էր տարածել այդ լուրը, թե` մեր եւ եւս 4 երկրներ բողոքարկել են Եվրոպայի հեռարձակողների միություն` նշելով, որ մի շարք երկրներում «Եվրատեսիլ-2011»-ի կիսաեզրափակիչ փուլը նորմալ չի հեռարձակվել, sms-ներ չեն կարողացել ուղարկել:

Սա մի փոքր տարօրինակ էր, քանի որ տարրական տրամաբանությամբ կարելի է կասկածել թե, ինչպե՞ս sms-ները «ընտրել» հենց Էմմիին, կամ մյուս չորսին դրանք նույն հաջողությամբ կարող էին պարտություն բերել նաև մյուսներին: Կամ, ո՞վ է հիմնավորելու թե դրանք ինչ հաճախականությամբ հասել:

Հայկական պատվիրակությունը Երեւան կվերադառնա մայիսի 16-ին, իսկ վաղը` մայիսի 14-ին կկայանա Եվրատեսիլ-2011-ի եզրափակիչ փուլը:

Մեզանում, կարծես, այլևս ոչ ոք չի զարմանում, որ հիմնական պատասխանատուների փոխարեն՝ նրանց գործառույթները ստանձնում են բոլորովին այլ մարդիկ: Այս դեպքում ևս՝ Գագիկ Ծառուկյանն առաջ է անցել ի պաշտոնե նման նախաձեռնություն իրականացնելու պարտավորություն կրող Արմեն Աշոտյանից և Հասմիկ Պողոսյանից:

«Բարգավաճ Հայաստան» կուսակցության առաջնորդ Գագիկ Ծառուկյանի մամուլի քարտուղար Խաչիկ Գալստյանը տեղեկացրել է, որ մայիսի 12-ին ԲՀԿ առաջնորդը ոչ պաշտոնական հանդիպում է ունեցել մոտ 70 գիտնականների և հայտնի մշակույթի գործիչների հետ: Հանդիպման ընթացքում քննարկվել են մշակույթին, արվեստին, գիտության, կրթության ոլորտներին առնչվող մի շարք հարցեր և գլոբալ խնդիրներ: Հանդիպման նախաձեռնողը եղել է Ծառուկյանը:

Ըստ Գալստյանի, մինչ հանդիպումը երկար ժամանակ կազմակերպչական աշխատանքներ են իրականացվել: Հանդիպման բոլոր մասնակիցներին ուղարկվել են հրավերներ: Բարձրացվել են մի շարք խնդիրներ, որոնք ներկայումս ուսումնասիրվում են, և դրանց լուծման ուղղությամբ կտրվեն կոնկրետ հանձնարարականներ:

Որոշվել է հետագայում քննարկումները շարունակել ոլորտային աշխատանքային խմբերի ֆորմատով, իսկ ընդհանուր նիստերը գումարել պարբերաբար: Հարցին, թե ինչու՞ է ակադեմիկոսների, ինստիտուտների տնօրենների, պրոֆեսորների, երաժիշտների, միջազգային ճանաչում ունեցող գիտնականնների հետ հանդիպումը փակ եղել, Խաչիկ Գալստյանն ասել է, որ իրենք ոչ բոլոր հանդիպումների մասին են իրազեկում, իսկ այդ հանդիպումը բաց ֆորմատով էր` ազատ շփման եղանակով: Նման հանդիպումները, ըստ նրա, պայմանավորված են դրանց անհրաժեշտությամբ և երկուստեք հետաքրքրությամբ:

Կրթության և գիտության նախարարությունից փորձեցինք պարզել, թե ինչպես են վերաբերվում իրենց գործառույթը ստանձնած Ծառուկյանի նախաձեռնությանը, այնտեղից մեզ պատասխանեցին, որ իրենց նախապես՝ ոչ գրավոր, ոչ բանավոր, տեղյակ չեն պահում այդպիսի հանդիպումների մասին, և այս դեպքում էլ՝ կոնկրետ Գիտությունների ազգային ակադեմիան կարող է ինքնուրույն որոշումներ կայացնել և իր խնդիրները  քննարկել ցանկացած հասարակական կամ քաղաքական գործչի հետ: «Այս հանդիպման վերաբերյալ, կարծում եմ, պայմանավորվածությունը եղել է ԳԱԱ նախագահի և Գագիկ Ծառուկյանի միջև»,- ասաց կրթության և գիտության նախարարության աշխատակիցը:

Մշակույթի նախարարությունից էլ այս պատասխանը հնչեց. «Մարդու սահմանադրական իրավունքն ա, ում հետ կուզի՝ կհանդիպի: Իսկ այս դեպքում՝ եթե կա մի մարդ, ով ցանկանում է օգնել  գիտնականներին, ակադեմիկոսներին կամ մշակույթի գործիչներին, շատ լավ փաստ է»:

Ընդդեմ կանանց նկատմամբ բռնության կոալիցիան տարածել է հաղորդագրություն.

Ցավոք, ընտանեկան բռնություն կոչվող ախտը շարունակում է նորանոր հրեշավոր և վտանգավոր դրսևումներ ստանալ մեր հասարակությունում, որտեղ շատ ու շատ կանայք արմատացած գենդերային կարծրատիպերի գերիներն են:

«Ընդդեմ կանանց նկատմամբ բռնության» կոալիցիան ընտանեկան բռնության  նորանոր դեպքերի մասին տեղեկատվություն է ստանում և հետևում է դրանց զարգացմանը:

Վերջերս արձանագրված դեպքերից կարելի է նշել, օրինակ, ք. Երևանի Շենգավիթ վարչական շրջանի ՔԿԱԳ բաժնում ս/թ մայիսի 2-ին ամուսնու` Հայկ Դավթյանի կողմից կատարված դանակահարության փաստը` կնոջ` 25-ամյա Աստղիկ Ղազարյանի նկատմամբ: Վերջինս ծանր մարմնական վնասվածքներով տեղափոխվել է Երևանի Էրեբունի բժշկական կենտրոն: Ա. Ղազարյանին վիրահատել են: Ներկայումս նրա վիճակը գնահատվում է կայուն ծանր:

Մեկ այլ դեպք գրանցվել է Երևան քաղաքի Մալաթիա-Սեբաստիա ոստիկանության բաժանմունքում, երբ 73–ամյա ամուսինը դանակով հարվածել է կնոջը: Բարեբախտաբար, կնոջ առողջությանը վտանգ չի սպառնում:

Ընտանեկան բռնության հանդուրժումը և հասարակության անտարբերությունը այս երևույթի նկատմամբ խարխլում է  հայ ընտանիքների հիմքը, այս չարիքը դառնում է շատ կանանց և երեխաների դժբախտության, անդառնալի կորստի պատճառ:

Մի′ լռեք, բարձրաձայնե′ք հանուն ձեր կյանքի, առողջության, հանուն ձեր և ձեր երեխաների անվտանգ ապագայի:

«Ընդդեմ կանանց նկատմամբ բռնության» կոալիցիան կոչ է անում բոլոր նրանց, ովքեր իրենց շրջապատում ականատես են լինում ընտանեկան բռնության դեպքերի, ահազանգել ներքոհիշյալ հեռախոսահամարներով`

Ընտանեկան բռնության դեպքում

0 800 80 850, 010 54 28 28, 010 44 07 40

Սեռական բռնության դեպքում

0 800 01 280

Թրաֆիկինգ

0 800 50 558, 0 800 80 801

www.justiceforzaruhi.blogspot.com

Էլ.փոստ: csvwarmenia@gmail.com

Այսօր ՀՀ գլխավոր գանձապետ Ատոմ Ջանջուղազյանն Ազգային ժողովում կատարողականի հաշվետվության ընթացքում  հրապարակեց տվյալներ ՀՀ արտաքին պարտքի վերաբերյալ.

Այն 2010 թ. դեկտեմբերի 31-ի դրությամբ կազմել է 3.3 միլիարդ ԱՄՆ դոլար:

2009 թվականին արտաքին պարտքը եղել է 2 միլիարդ 967 միլիոն դոլար:

Ըստ նրա, եթե արտաքին պարտքը  միջազգայնորեն ընդունված ցուցիչների համաձայն գնահատելիս, կարելի է ասել, որ Հայաստանը պարտքի նվազ բեռ ունեցող երկիր է, իսկ այլ ցուցիչներով գնահատելիս՝ միջին պարտք տեր երկիր։
Ըստ նրա՝ պարտքի հիմնական մասը՝ 2 միլիարդ 736.4 միլիոն դոլարը, կառավարության հիմնական պարտավորություններն են, իսկ մնացածը՝ ԿԲ-ի պարտավորությունը։
Ատոմ Ջանջուղազյանը հավաստիացրեց,  որ պարտքի սպասարկումն առաջիկա տարիներին խնդիրներ չի առաջացնի:

Հա, ճիշտ եմ ասում, վերջերս հասկացա: Ես հետևում եմ «Պահանջում ենք գիտության ֆինանսավորման ավելացում» ֆեյսբուքյան նախաձեռնության էջին, եղել եմ նրանց հանդիպմանը «Ժառանգություն» կուսակցությունում, որտեղ պատգամավորները լսեցին գիտնականների պահանջները, ընդունեցին դրանց արդարացիությունը, ու դրա արդյունքում Անահիտ Բախշյանը «Խորհրդարանական շաբաթ» հաղորդման շրջանակներում բարձրաձայնեց գիտնականների պահանջը՝ բարձրացնել ֆինանսավորումը, այլապես «Հայաստանում գիտությունը կարող է ֆիզիկապես դադարել գոյություն ունենալ: Կառավարությունը պարտավոր է անհրաժեշտ գումարներ գտնել ու տրամադրել պետական անվտանգության տեսակետից կարևորագույն խնդիրը` ուղեղների արտահոսքը կանխելու համար»:

Հաջորդ հանդիպմանը ներկա չէի. պատմում է Կարապետ Մկրտչյանը, շատ երիտասարդ՝ 23 տարեկան, գիտությունների թեկնածու, որը մի ոտքով արդեն դրսում է՝ տանում են, լավ պայմաններ են առաջարկում, ինչի՞ չգնա որ, մնա էստեղ՝ ո՞նց գոյատևի: Էլ չեմ ասում գիտնականին արժանապատիվ ապրուստ ապահովելու մասին, որ արվում է յուրաքանչյուր երկրում, որտեղ գնահատում են գիտնականին կամ ինչպես սիրում էր ասել Վիկտոր Համբարձումյանը՝ գիտաշխատողին: Որովհետև գիտնականը տալիս է գիտական արտադրանք՝ աշխատությունների ու հոդվածների տեսքով, իսկ արդեն զանազան ինստիտուտներ իրագործում են կամ չեն իրագործում հայտնագործություններն ու նորամուծությունները: Ավելի շատ՝ չեն օգտագործում, որովհետև, իմ հիշելով, էդպիսի կարգին կառույց չկա մեզ մոտ: Հա՛, ուրեմն՝ Կարապետի պատմածը. «Ազգային ժողովի պատգամավոր, ՀՀԿ երիտասարդական կազմակերպության խորհրդի նախագահ Կարեն Ավագյանի նախաձեռնությամբ, մայիսի 5-ին տեղի ունեցավ հանդիպում երիտասարդ գիտնականների և ուսանողների հետ: Հանդիպման պատճառը ՖԲ-ում տեղի ունեցող բուռն քննարկումներն են գիտության ֆինանսավորման ավելացման վերաբերյալ:

Հնչեցին կարծիքներ, որ Հայաստանում գիտությանը և գիտնականին պետք է պետական և հասարակական ուշադրության արժանացնեն: Կարեն Ավագյանը խոստացավ ԲՈՀ-ի նախագահին ներգրավել այս քննարկումներին, առաջարկներ անել՝ ընդհուպ մինչև գիտական ատենախոսությունների վրա դրվող պայմանները վերանայելու և կանոնակարգերում որոշակի փոփոխություններ կատարելու ուղղությամբ:

Հնչեցին կոնկրետ առաջարկներ և մեխանիզմներ, որոնք կնպաստեն երկրում գիտությունը զարգացնելու, երտասարդ գիտնականներին խրախուսելու և գիտության մեջ ներգրավելու ուղղությամբ: Խաչիկ Գևորգյանը նշեց, որ բնական գիտությունների ոլորտում համեմատաբար վիճակը լավ է, սակայն հասարակական գիտություններում վիճակն ավելի քան ողբալի է: Միջազգային ճանաչում ունեցող ամսագրերում և պարբերականներում հրապարակումներ չկան:

Քանի որ շատ կարևոր է ունենալ հասարակական գիտությունների, մասնավորապես՝ հայագիտական հրապարակումներ միջազգային հեղինակավոր ամսագրերում, իսկ որոշ դեպքերում՝ դրանք տուժում են մասնագետների լեզվին չտիրապետելու պատճառով, առաջարկ հնչեց պետական ֆինանսավորում հատկացնել արժեքավոր աշխատությունների թարգմանության համար:

Նշվեց, որ (զարմանալիորեն) այս խնդիրը չկա բնագիտական սեկտորում, որտեղ գիտնականները տիրապետում են անգլերենին ու կարողանում են հրապարակել իրենց աշխատանքները միջազգային հեղինակավոր ամսագրերում:

Կարեն Ավագյանը խոստացավ ցանկացած կերպ աջակցել նախաձեռնությանը, մասնավորապես՝ դրա մասին բարձրաձայնել Ազգային Ժողովում, կազմակերպել խորհրդարանական լսումներ, քննարկումներին ներգրավել ՀՀ ԿԳ նախարար Արմեն Աշոտյանին: ՀՀ ԱԺ պատգամավորը նաև ասաց, որ հնարավոր է ինչ-ինչ նախագծերի ֆինանսավորում՝ երիտասարդական հիմնադրամի միջոցներով»:

Մեր ֆիզիկոսները, տեսեք, ինչ գեղեցիկ շարադրանք ունեն, ինչ կոռեկտ են:

Ինձ բավականին դժվար է համոզել, որ Կարեն Ավագյանը, որը ՀՀԿ երիտասարդական կազմակերպության խորհրդի նախագահն է, նոր է լսում, որ երիտասարդ գիտնականի աշխատավարձը 32 հազար դրամ է, կամ՝ եթե չի լսել, ուրեմն՝ իր կառույցում գիտնականներ չկան, իսկ դա շատ բան է ասում կառույցի մասին: Այն երկրում, որտեղ չի գնահատվում ռազմավարական կարևոր նշանակություն ունեցող գերակա ոլորտը՝ գիտությունը, ու ոչ միայն պետության, այլ նաև պետական քաղաքականության հետևանքով կորսված գոնե սովետի գիտնականի հանդեպ հարգանքի չափը, եթե ոչ՝ պաշտամունքի չափը, ի վերջո՝ ունենում են այն, ինչը հիմա մենք ունենք՝ ուղեղների արտահոսք:

Ու մենք, որ ամեն տեղ ասում ենք, որ մեր հարստությունը մեր միտքն է, մեր մտավոր պոտենցիալը, դա էլ չենք ունենա: Նավթ չունենք, գազ չունենք, սահմանափակ ենք՝ Հոլանդիայի պես՝ երբեք չենք օրինականացնի մարիհունանան,  որ դառնանք տուրիստական դրախտ, մի պղինձ ու մոլիբդեն ունենք, մի քիչ ոսկի ու ուրան, բայց էդ էլ կվերջանա մի օր, չնայած երկրին բան չի գալիս դրանից՝ մի 10 հոգու գրպանն է մտնում, բայց դե՝ ինչևէ… Ու վերջ, էլ ոչ մի բան չենք ունենա: Իսկ գիտնականները կարան ասեն՝ ոնց անենք, որ ապրենք ու լավ ապրենք:

Ես գիտեմ փոքրուց, որ ամեն քաղաքակրթության հրաշք, ամեն ինչ, ինչը մեզ էսօր տալիս է հարմարավետություն ու հեշտացնում մեր կյանքը, լուսավորում, ամեն-ամեն ինչ՝ լամպից մինչև ինտերնետ՝ գիտության շնորհիվ է: Հիշում եմ, մի ժամանակ, երբ եղավ Չեռնոբիլը, մարդիկ շատ էին խոսում այն մասին, որ գիտությունը վնասում է մարդկությանը: Հիշում եմ, բանավիճում էին, ասում էին՝ ավելի լավ է անլույս ապրենք, քան թե ատոմակայանը պայթի: Անիծում էին ատոմը կիսողին: Անջատեցին ատոմակայանը, անլույս մնացինք մի քանի տարի, ու էլի միացրեցին: Հասկանալի է, սեյսմիկ շրջանում ատոմակայանը վտանգավոր է, պետք է այլընտրանք գտնել:

Իսկ ո՞վ պետք է գտնի: Գիտնականը: Իսկ ի՞նչ գիտնական, եթե բոլորը գնան: Մտածենք սրա մասին, կարևորենք մեզ համար գիտության դերը մարդու ու հասարակության կյանքում, ի վերջո՝ սահմանենք մեզ համար, որ գիտությունը մեզ անհրաժեշտ է օդուջրի պես, օգնենք բարելավել գիտաշխատողների պայմանները, որ վաղը, մյուս օրը գլխներիս չտանք կոպեկներով սեփականաշնորհած օբյեկտատերերին օլիգարխներ տեսնելով: Մենք ենք թույլ տվել…

Այս ֆեյսբուքյան նախաձեռնությունը մինչև այսօր եղածներից տարբերվում է իր և՛ քանակական, և՛ հատկապես որակական առումներով, քանի որ գրանցված մոտ 1900 մասնակիցներից համարյա թե բոլորը՝ բացառությամբ մի 200 համակիրների, գիտնականներն են ու այն կառույցները, որոնք կարող են, այսպես ասած, «հարցեր լուծել»՝ շահառուներն ու թիրախային խմբերը:

Նախաձեռնության մեկ այլ առանձնահատկությունն այն է, որ այստեղ չկա ոչ միայն հիերարխիկ, այլև նույնիսկ կազմակերպչական կորիզ՝ չես կարող որոշել, թե ով է ի վերջո գլխավորը, այսինքն՝ գլխավոր չկա, նախաձեռնող խումբ չկա:

Եվ ամենակարևորը. ի տարբերություն սովորաբար գործածության մեջ մտնող առաջարկներից, առաջին անգամ գիտնականները հանդես են եկել առաջարկներով, որոնք անվանական ամրագրված են, և հետագայում բավական կլինի, օրինակ, Ռուզան Սոխոյանի ասպիրանտներին՝ ընդունվելուն պես, միանվագ որոշակի գումար տրամադրելու առաջարկն ուղղակի կոչել Ռուզան Սոխոյանի առաջարկ, կամ՝ Անահիտ Բախշյանի:

Հետո էլի բաներ եղան, մի քանիսը նորից թվեմ՝ վարչապետը ոնց որ նկատեց ֆեյսբուքյան բումը, իսկ դա, անշուշտ, բում է՝ վերը թվարկված պատճառներով: Վերջապես նկատեց, որ գիտնական լինելու չափանիշներից կարևորագույնը միջազգային բարձր վարկանիշ ունեցող պարբերականներում հոդված տպագրելն է, իսկ 28 հազարով ոչ ոք չի նստելու այստեղ հոդված գրի Հայաստանի անունից, ու որոշեց, որ հենց նախատեսված գումարը լինի, Հայաստանում լավագույն 50 երիտասարդ գիտնականներին պետբյուջեից ամսական վճարել հավելյալ 50-100 հազար դրամ՝ որպես աշխատավարձ։ Բայց դա առնվազն ծիծաղելի է, ամեն ոլորտից ստացվում է երկուական մարդ:

ՀՀ գիտության պետական կոմիտեի նախագահ Սամվել  Հարությունյանը հայտարարել է նաև, որ այս տարի առաջին անգամ Հայաստանում նախատեսվում է պետական բյուջեից ինովացիոն ծրագրեր ֆինանսավորել՝ մոտ 170 մլն դրամ.  կֆինանսավորվեն նորարարական բնույթի այն ծրագրերը, որոնք կունենան նաև համաֆինանսավորում:

«Պետությունը ծրագրերի համար կհատկացնի գումարի 85 տոկոսը, իսկ մնացած 15 տոկոսը գիտնականը պետք է հայթայթի ինքը։ Այսինքն, գիտնականը պետք է պայմանավորվածություն ձեռք բերի որևէ գործարարի հետ ծրագրի համաֆինանսավորում ստանալու համար, այնուհետև նոր ներկայացնի ծրագիրը»,-ասել է նա ու մոռացել նշել, որ գիտնականները քանի տարի է նույնատիպ  առաջարկներով հանդես են գալիս, էն էլ՝ ոչ թե 85/15, այլ 30/70 հարաբերակցությամբ ֆինանսավորման, ու մերժվում են: Բայց դե՝ լավ է ուշ, քան երբեք։ «Եթե այս ծրագիրը աշխատի, ապա պետության կողմից ինովացիոն ծրագրերին տրամադրվող հատկացումները տարեցտարի կավելանան»,- ասել է նա: Ծրագիրն աշխատում է ողջ աշխարհով մեկ, էստեղ էլ կաշխատի հաստատ:

Էսքան բան է արվել էն պահից սկսած, ինչ գիտնականները բարձրաձայնել են իրենց խնդիրները: Շատ մեծ բան չի, բայց ուրախալի է, որ ստացվում է գիտնականների մոտ: Ի վերջո, գերնպատակը պետք է լինի գիտնականի համար ստեղծել այնպիսի պայմաններ, որ նա չմտածի հայրենիքը լքելու մասին: Վաղուց ժամանակն է, որ օդանավակայանում ոչ թե զորակոչիկներին բռնեն ու բաց չթողնեն, այլ գիտնականներին:

Լուսինե Վայաչյան

Երևանի քաղաքապետ Կարեն Կարապետյանի «Մաքրենք քաղաքն աղքատներից» օպերացիայի հետևանքով մանր առևտրականները մետամորֆոզ ապրեցին և հարմարվեցին նոր, էքստրեմալ պայմաններին։ Նրանց մի մասը փոխակերպվեց մուտքային առևտրականների։ Նժդեհի փողոցում, համանուն հրապարակին հարող «ստալինկաների» մուտքերում այժմ կարելի է տեսնել լոլիկի, թարմ կանաչու և մրգի խնամքով դարսած կույտեր, իսկ շենքի բնակիչները հնարավորություն ունեն այս ամենը գնելու անմիջապես սեփական դռան շեմից՝ առանց փողոց դուրս գալու կամ շուկա հասնելու։

Առևտրականների մյուս մասը՝ առավել անապահովները, անցան շրջիկ ռեժիմի։ Նրանք ավելի փոքր տոպրակներ և պայուսակներ են վերցրել, որ հեշտ տեղաշարժվեն և հենց ոստիկան տեսնեն՝փախչեն կամ ձևացնեն, թե տրանսպորտի են սպասում։ Արդեն իսկ ակնհայտ է, որ սա Կարեն Կարապետյանի ամենամեծ պարտությունն է, որովհետև հնամաշ շոր-կոշիկով այս մարդիկ իրենց նույնքան հնամաշ տոպրակներով կրկին ներկա են մեր մայթերին՝կանգնած, թե շարժվող։ Այս կանանցից ու տղամարդկանցից ոմանք կարողացել են լեզու գտնել «էժան գներ» առևտրի սրահների տերերի հետ, և դրանք, ինչպես, օրինակ, այս  լուսանկարում պատկերվածը, նման չեն մայրաքաղաք Երևանի առևտրային կետերին, այլ վերածվել են «գյուղական» խանութի, որտեղ «կալգոտկին» ու սխտորը կողք կողքի են վաճառվումև ,ի դեպ, համարյա նույն գնով։ Բայց առևտրականներից առավել «շուստրիները» հաջողացրել են ոչ թե խանութների տերերի, այլ թաղային ոստիկանների, հեղինակությունների և այլ «ռեկետչիկների» տանիքի տակ մտնել։ Օրինակ՝ Էրեբունու ոստիկանության, որը հնագույն ժամանակներից կայարանի հրապարակում առևտուր անողներից «նալոգ» է հավաքում։

Առաջին օրերին, երբ Կարեն Կարապետյանն սկսեց իր անկոտրում պայքարը, բոլորին թվաց, թե Սասունցի Դավթի արձանի մերձակայքը գրեթե տեսքի եկավ, բաայց չանցավ երկու ամիս, և կայարանամերձ հրապարակը նույն գավառային «բազառի» տեսքըվերագտավ։ Առևտրականներն իրենց  սեղանիկները միացրեցին և դրանցից մի երկար սեղան ստացան։ Թե ինչու են առանձին-առանձին դրված սեղանիկները փողոցային առևտուր համարվում, իսկ ընդհանուր ծածկով և իրար կպցրածները՝ ոչ, կռահել դժվար է։ Փաստ է, որ դրանք այժմ ավելի մեծ տարածք են զբաղեցնում՝ վայելելով և՛քաղաքապետարանի,և՛ Էրեբունու ոստիկանության բարեհաճությունը։

Սյուզան Սիմոնյան

Այսօր Վերահսկիչ պալատի նախագահ Իշխան Զաքարյանը, Սոցիալական ապահովության պետական ծառայության 51 տարածքային բաժիններից, ԱԺ-ին ներկայացրեց 14 տարածքային բաժիններում  ընտրանքային ստուգմամբ արձանագրված  բազմաթիվ խախտումների հաշվետվությունը:

2010 թվականին կենսաթոշակների և նպաստների վճարման գործընթացի օրինականության և արդյունավետության գնահատման նպատակով՝

1. Մահացած կենսաթոշակառուներին վճարված գումարներ.
2008, 2009 թթ. և 2010 թ. ութ ամիսների կտրվածքով մահացած կենսաթոշակառուների թիվը եղել է 58,921:
Ընտրանքային կարգով ստուգվել է 843 գործ:  Հայտնաբերվել է տարբեր բնույթի 581 խախտում:

Մահացած կենսաթոշակառուներին վճարվել է դեպոնենտային գումար: 2005 թ. օգոստոսին մահացած կենսաթոշակառուն 2009 թ. հուլիսին «դիմել և ստացել է» 1,024,404 դրամի չափով դեպոնենտային գումար:

Մահվանից հետո կենսաթոշակառուի անվամբ պարբերաբար վճարվել է ամենամսյա թոշակ:
Կենսաթոշակառուն մահացել է 02.09.2005 թ., սակայն մինչև ստուգման պահը «վճարվում էր կենսաթոշակ»:

Մահվանից հետո «վճարված» գումարը կազմում է 1.1 մլն դրամ:

2. Դեպոնենտի ձևով կատարվող վճարումների մասով.
2008, 2009 թթ. և 2010 թ. ութ ամիսների կտրվածքով դեպոնենտ ստացող կենսաթոշակառուների թիվը կազմում է 14.287 հոգի:

Ընտրանքային կարգով ստուգվել է 1,656 գործ:
Հայտնաբերվել է տարբեր բնույթի 1,157 խախտում:

Կենսաթոշակառուին 2008 թ. հոկտեմբերին միանվագ վճարվել է 6 ամսվա կենսաթոշակ: Վճարումը կատարելուց 3 ամիս հետո՝ արդեն վճարված ժամանակաշրջանի համար կրկին կատարվել է վճարում:

Դեպոնենտի վճարում կատարելուց հետո տեղեկատվական բազաներում «2009 թ. օգոստոսին կենսաթոշակառուին վճարված 1 մլն 85 հազ. դրամի չափով դեպոնենտի գումարը տարածքային տեղեկատվական բազայում ներկայացվել է որպես «չվճարված»:

Դեպոնենտի վճարումից հետո տվյալ գործը կրկին մնում է ցուցակում և ներկայացվում որպես դեպոնենտ:
Համաձայն գործող կարգի` դեպոնենտի վճարումից հետո կենսաթոշակառուի գործը

Վերահսկիչ պալատի նախագահ Իշխան Զաքարյանն այսօր լրագրողների հետ հանդիպման ժամանակ տեղեկացրեց, որ բուհերում բյուջետային միջոցների ոչ ճիշտ պլանավորման և սխալ հաշվարկների հետևանքով հաշվետու տարում արձանագրվել է, որ պետական բյուջեից վճարվել են գումարներ, որոնք իրականում նախատեսված չեն եղել, այսինքն՝ տեղի է ունեցել ավել ֆինանսավորում:

Ըստ Իշխան Զաքարյանի, բարձրագույն ուսումնական հաստատություններում լիարժեք վերահսկողություն իրականացնել հնարավոր չէր, քանի որ «Վերահսկիչ պալատի մասին» ՀՀ օրենքում ՊՈԱԿ-ների գործունեության նկատմամբ վերահսկողության սահմանափակման պատճառով՝ վերահսկողության դաշտից դուրս են մնում բուհերի տնտեսական գործունեությունից ստացված միջոցները, որոնք մի քանի անգամ գերազանցում են պետական բյուջեից ստացված միջոցները:
Ըստ այդմ, անհրաժեշտ է քննարկել «Վերահսկիչ պալատի մասին» ՀՀ օրենքի 5-րդ հոդվածի և 6-րդ հոդվածի 2-րդ մասում փոփոխություն կատարելու նպատակահարմարության հարցը՝  ՊՈԱԿ-ների ֆինանսական միջոցների ձևավորման և ծախսման նկատմամբ վերահսկողական գործառույթները հստակեցնելու և առկա սահմանափակումները վերացնելու նպատակով:
Իսկ խախտումներ նկատվել են հատկապես  բարձրագույն, միջին և հետբուհական մասնագիտական կրթական ծրագրերում, ինչպես նաև գիտաշխատողների գիտական աստիճանների հավելավճարների համար պետական բյուջեից կատարվել է սահմանվածից ավելի ֆինանսավորում` 25,746.7 հազար դրամ գումար, որը վերահսկողության ընթացքում վերականգնվել է ՀՀ պետական բյուջե, այդ թվում`
Հայկական պետական ճարտարագիտական համալսարան ` 15,503.2 հազար դրամ, Երևանի Խ. Աբովյանի անվան պետական մանկավարժական համալսարան` 2,824.7 հազար դրամ, Երևանի Կոմիտասի անվան պետական կոնսերվատորիա` 4,388.8 հազար դրամ, Հայկական պետական ագրարային համալսարան ` 3,030.0 հազար դրամ:
Վայոց ձորի, Տավուշի և Արագածոտնի մարզպետարանների պետական հանրակրթական ուսումնական հաստատությունների աշակերտների համար ավելի գումար է ֆինանսավորվել համապատասխանաբար` 1,772.7 հազար դրամ, 4,646.6 հազար դրամ և 46,472.1 հազար դրամ: Ընդամենը ենթակա է վերականգնման պետական բյուջե՝ 52,891.4 հազար դրամ:
Վերահսկիչ պալատի նախագահը անդրադարձավ  նաև բարձրագույն ուսումնական հաստատությունների լիցենզավորման և հավատարմագրման գործընթացին, որը կատարվում է օրենսդրության պահանջների խախտումներով:
Մասնավորապես, պետական բուհերն իրենց մասնագիտություններով պետական հավատարմագրում չեն անցել, մշակված չէ հետբուհական կրթության պետական չափորոշիչը, հետբուհական կրթական ծրագրերն իրականացվել են առանց լիցենզիայի:

ՀՀ կառավարության 2009 թ. հուլիսի 9-ի թիվ 808-Ն որոշմամբ հաստատված բարձրագույն մասնագիտական կրթական ծրագրի իրականացման լիցենզավորման կարգի ամբողջական կիրառելիությունը չի ապահովվել, քանի որ ՀՀ կրթության և գիտության նախարարության կողմից չեն հաստատվել պրոֆեսորադասախոսական կազմին ներկայացվող պահանջների, լաբորատորիաների, արհեստանոցների, մարզադահլիճի սարքերով, սարքավորումներով, նյութերով, գույքով հագեցվածության չափաքանակների և ըստ սովորողների համակազմի, գեղարվեստական, մասնագիտական, գրադարանային-տեղեկատվական ու այլ գրականության հագեցվածության վերաբերյալ պահանջները:

Մարդահամարի անցկացումը անհրաժեշտություն է,  դրան համաձայնեն,  սակայն գումար չունեն,  և  այսօր այս  խնդրի  շուրջ  կառավարության նիստում տհաճ բանավեճ սկսվեց,  երբ ֆինանսների նախարար Վաչե Գաբրիելյանն  ասաց, թե գումար կարող է հատկացնել մի այն երրորդ եռամսյակում, եթե,  իհարկե, խնայողություններ լինեն։ Ազգային վիճակագրական ծառայության պետ Ստեփան Մնացականյանն անակնկալի եկավ  և  վրդովվեց.  «Ի՞նչ խնայողությունների մասին է խոսքը»։ Ապա  փորձեց վարչապետից ճշտել` իր ներկայացրած նախագծերն  ընդունվու՞մ  են,  թե  ոչ: Վարչապետը լիցքաթափեց  լարվածությունը՝ հավաստիացնելով,  որ ըդունում են,  բայց  ֆինանսավորման հարցը հետո կքննարկվի:

Ի դեպ, հոկտեմբերին Հայաստանում անցկացվելու է անկախությունից ի վեր երկրորդ մարդահամարը:Մնացականյանը ներկայացրել էր միանգամից  2  նախագիծ՝ մարդահամարի հարցաշարի մասին և մարդահամարի կազմակերպման նպատակով  100  մլն դրամ հատկացնելու մասին։