Ադրբեջանի պաշտպանության նախարարության տարածած հաղորդագրությունը, թե հունվարի 27-ին ՀՀ ԶՈՒ ստորաբաժանումները կրակ են բացել հայ-ադրբեջանական սահմանի հյուսիս-արևելյան հատվածում տեղակայված ադրբեջանական մարտական դիրքերի ուղղությամբ՝ ապատեղեկատվություն է։ Այս մասին հայտնում են ՀՀ պաշտպանության նախարարությունից։ 

«Իրականում, հունվարի 27-ին, ժամը 22։00-ի սահմաններում, սահմանի նշված հատվածում, մի քանի անկանոն կրակահերթ է արձակվել ադրբեջանական կողմից, որոնց հայկական ստորաբաժանումները չեն պատասխանել»,- նշում են պաշտպանության նախարարությունից։ 

ՀՀ նախագահ Արմեն Սարգսյանի հրաժարականն այլևս կայացած իրողություն է, որքան էլ օրենքի տեսակետից դեռ գործում է յոթօրյա ժամկետում դիմումը հետ վերցնելու հնարավորությունը։  Այս մասին ֆեյսբուքում գրել են ԱԱԾ պահեստազորի սպաների միությունը.

«Արմեն Սարգսյանն իր վարքագծով ու գործելակերպով եղել է լիդերին ոչ բնորոշ որակներ ունեցող անձնավորություն: Դրա անմիջական վկայությունն էր 2018 թվականի դրոշափոխությունն ու ամբողջովին վարչապետի ուղիղ ազդեցության տակ գործունեություն ծավալելը:

Զբաղեցնելով երկրի բարձրագույն պետական պաշտոնը, ունենալով հեղինակություն, միջազգային կապեր` Արմեն Սարգսյանը դրանք ի նպաստ Հայաստանի օգտագործելու փոխարեն հանդուրժեց քաղաքական իշխանությունների կողմից մինչև պատերազմն ու պատերազմի ընթացքում վարած սխալ քաղաքականությունը, վարչական ռեսուրսների օգտագործումը համապետական ու ՏԻՄ ընտրություններում, դատարանների, մամուլի նկատմամբ բռնաճնշումները, քաղաքական այլախոհներին քրեական հետապնդումների անհիմն ենթարկելը, Հայ առաքելական եկեղեցուն վարկաբեկելը:

Արդյունքում ունենք երկրում մեկ անձի դիկտատուրայի հաստատման հետևողական փորձեր: Նախագահը նման վարքագիծ կարող էր դրսևորել, եթե ընդհանրապես չունի լիդերին բնորոշ կամային հատկանիշներ կամ նրա անձի վերաբերյալ առկա են կոմպրոմատներ: Տվյալ դեպքում նման հիմք կարող է հանդիսանալ այլ երկրի քաղաքացի լինելը, ինչը նախագահի պարագայում քրեական պատասխանատվության է հանգեցնում:

Գտնում ենք` դատախազությունը վերջնարդյունքում պիտի հանրայնացնի այդ փաստի առթիվ կատարված քննության տվյալները, որպեսզի հանրությունը հստակ տեղեկանա` պաշտոնը ստանձնելիս նախագահը եղե՞լ է այլ պետության քաղաքացի, նա ու նրան իշխանության բերող ուժերը խաբե՞լ են ժողովրդին, թե` ոչ: Այլապես ոչինչ չասող, կցկտուր տեղեկությունների տարածումը չի վերացնի նրա նկատմամբ խաբեության մասին ողջամիտ կասկածը:

Ի դեպ` սա Արմեն Սարգսյանի երկրորդ հրաժարականն է զբաղեցրած բարձր պաշտոններից, երկու անգամ էլ նա այդ բանն անում է անսպասելիորեն ու․․․ Լոնդոնից:

Նկատենք նաև, որ Արմեն Սարգսյանը երկար տարիներ շահարկել է անվանի հետախույզներ Գևորգ և Գոհար Վարդանյանների ընտանիքին մերձ լինելու, համարյա թե նրանց տանը մեծացած, դաստիարակված լինելու թեման։ Անհավատալի է, որ Վարդանյանների նման մարդկանց ազդեցությունը կրած անձն այսպիսի անտարբեր, անպատասխանատու, իներտ վարքագիծ դրսևորեր սեփական հայրենիքի նկատմամբ»:

Մի քանի ժամից Հայոց Բանակի, մեր զինված ուժերի կազմավորման 30 ամյակն է. Հայոց Բանակը ստեղծվել էր հաղթանակի, Հայրենիքը պաշտպանելու սրբազան գաղափարներով: Այս մասին Facebook-ի իր էջում գրել է ԱԺ «Հայաստան» խմբակցության պատգամավոր Արամ Վարդեւանյանը:

Նա, մասնավորապես, նշել է. «Երեսուն տարի առաջ Բանակի կազմավորման հիմնադիրները նույնիսկ վատ երազում չէին պատկերացնի, որ 30 տարի անց զինվորական ու պետական էլիտան փաստացի խուսափելու է այդ պատմական օրը նշելուց»:

Պատահական չէ, որ Թուրքիայի հետ սահման բացելու մասին ամենաակտիվ խոսում է Խաչատուր Սուքիասյանը։2021թ․ հունվարի 25-ին՝ ճիշտ մեկ տարի առաջ, ինձ հանդիպման հրավիրեց խոշոր գործարար, այժմ ԱԺ-ում ՔՊ պատգամավոր Խաչատուր Սուքիասյանը։ Այդ մասին 2021-ի մարտի 22-ին ես հպանցիկ անդրադարձ արել էի՝ նշելով մեր զրույցի այն հատվածները, որոնք ենթակա են հրապարակման (https://www.facebook.com/nhokhikyan/posts/10158163576328831)։ Այն ժամանակ էլ ես նշեցի, որ Սուքիասյանը հետաքրքրված էր Թուրքիայի հետ սահման բացելու հեռանկարով։ Նա պնդում էր, որ ինքը լուրջ փողերի հոսք է տեսնում, իսկ ես հակադարձում էի, որ փողից առավել կարևոր է պետականության անվտանգությունը, որի առումով Թուրքիան սպառնալիք է մեզ համար, և այժմ չի կարելի սահման բացել հիմա։ Դա կարելի է անել մի քանի տարի անց, երբ մենք կկարողանանք ոտքի կանգնել, ապահովել որոշակի կայունացում, ունենալ տնտեսական ու քաղաքական իմունիտետ, էլ չասեմ, որ սպասվում է Ադրբեջանի հետ նոր՝ ավելի մեծ պատերազմ։ Սուքիասյանին, սակայն, հետաքրքրում էր, թե ինչպես կարելի է օգտագործել Արևմտյան Հայաստանի ծպտյալ հայերի գործոնը սահման բացելու գործում։ Ես կտրականապես դեմ եմ արտահայտվել։ Ինձ հետաքրքրում էր ազգային ինքնությունն ու պետական անվտանգությունը, Սուքիասյանին՝ բիզնես կապերն ու տնտեսությունը։ Նրանք համարում են, որ Արևմտյան Հայաստանի նկատմամբ մեր հոգևոր կապն ու զգացմունքները կարելի է մոնետիզացնել և զբոսաշրջային հոսք ապահովել, ինչը հայ և թուրք գործարարներին հավասարաչափ ձեռնտու է։Ես սպասում էի, որ 2021-ի վերջից պետք է զարկ տրվեր Թուրքիայի հետ սիրախաղին։ Առաջիկայում մենք կլսենք նաև խոսակցություններ հայ-թուրքական համատեղ կոոպերացիաների, Հայաստանի ծառայությունների ոլորտը փորձառու թուրքերին հանձնելու անհրաժեշտության մասին։Մեր միջին բիզնեսի տերերը և այգիներ ունեցող գյուղացիները պետք է պատրաստ լինեն պայքարելու իրենց ունեցվածքի համար։ Սահման բացելուց հետո սկզբում խոսակցությունների, հետո էլ պահանջների տեսքով կբարձրացվի սահմանին կանգնած ռուսական ռազմաբազայի ավելորդ լինելու հարցը։ Դա էլ այլ թեմա է՝ փաստերով։ Նաիրի ՀոխիկյանԼրագրող, Փորձագետ

ՀՀ քաղավիացիայի կոմիտեն Երևան-Ստամբուլ առաջիկա չվերթի ուղևորներին 36 ամսով ազատել է 10.000 դրամ «օդի տուրքից»: Այս մասին հրամանը ստորագրել է ՔԱԿ նախագահի պաշտոնակատար Միհրան Խաչատրյանը:

Միևնույն ժամանակ կոմիտեն հունվարի 10-ին թույլատրել է թուրքական «Pegasus Airlines» ավիաընկերությանը իրականացնել Ստամբուլ-Երևան-Ստամբուլ թռիչքներ, որոնք լինելու են ոչ կանոնավոր:

Փետրվարի առաջին շաբաթվա ընթացքում կատարվելու է 2 չվերթ (ըստ «Pegasus»-ի չվացուցակի՝ փետրվարի 2-ին և 5-ին), իսկ փետրվարի 7-ից մինչև մարտի 27-ը՝ շաբաթական 3 չվերթ (երկուշաբթի, հինգշաբթի և շաբաթ օրերին):

Նշենք, որ «FlyOne Armenia» ընկերությունը հայտարարել է, որ փետրվարի 2-ից սկսելու է շաբաթական 2 անգամ (երկուշաբթի և ուրբաթ օրերին) ոչ կանոնավոր թռիչքներ իրականացնել Երևան-Ստամբուլ-Երևան չվերթով:

ՀՀ նախագահի աշխատակազմը հայտարարություն է տարածել, որը ներկայացնում ենք ստորև.

«Վերջին օրերին տարբեր անհատների, քաղաքական գործիչների, քաղաքագետների, ներկա կամ նախկին պատգամավորների, վերլուծաբանների և «կանխատեսողների» կողմից հնչում են տարբեր մտքեր, պնդումներ և համոզմունքներ, ներկայացվում են տարբեր մտացածին պատմություններ ու պատումներ:

Հանրապետության նախագահի աշխատակազմը չի պատրաստվում մեկնաբանել դավադրության տեսությունների և քաղաքական առասպելաբանության այդ դրսևորումները:

Նախագահ Արմեն Սարգսյանի մտահոգությունները վերաբերել և վերաբերում են պետության առջև ծառացած իրական խնդիրներին ու մարտահրավերներին, որոնց դիմակայելն ու լուծման ճանապարհներ գտնելն այսօրվա և բոլորի գերխնդիրն է»:

Հիշեցնենք, որ հունվարի 23-ին Արմեն Սարգսյանը հրաժարական է տվել ՀՀ նախագահի պաշտոնից:

Արցախի Կարմիր Շուկա գյուղի բնակիչներն այսօր փակել են գյուղի միջով անցնող ադրբեջանական շարասյան ճանապարհը:

Արցախի ԱԺ-ի պատգամավոր Մետաքսե Հակոբյանը պատմեց՝ բնակիչները պահանջել են, որ ադրբեջանցիները տիրոջ իրավունքով չօգտագործեն ճանապարհը, այլ նախապես զգուշացնեն, համաձայնության գան՝ նոր անցնեն այդ ճանապարհով: Մերոնք իրենց պահանջները ադրբեջանցիներին փոխանցել են ռուս խաղաղապահների միջոցով, այնուհետև՝ բանակցություններից հետո, բացել են ճանապարհը:

Արցախցի պատգամավորը հայտնեց, որ ադրբեջանցիները չեն արձագանքել դեռևս արցախցիների պահանջին.

«Մյուս անցնելուց կտեսնենք, նախապես տեղյակ կպահե՞ն, և արդեն հասկանալի կլինի՝ ընդունվե՞լ են հայկական կողմի պահանջները»:
Մետաքսե Հակոբյանի խոսքով՝ բնակիչների համբերությունն արդեն հատել է, փորձում են ինքնակազմակերպվել և այդ կերպ ապահովել իրենց սեփական անվտանգությունը.

«Եթե իրենք ապրում են Արցախում, նշանակում է՝ չեն վախենում թշնամու սադրանքներից, պետք է թշնամին էլ դա հասկանա և սադրանքների չդիմի, հակառակ դեպքում՝ նման միջադեպեր էլի կլինեն: Հուսով եմ՝ սա ադրբեջանցիների համար ազդակ կլինի»,-ասաց Հակոբյանը և հավելեց.« Արցախում ապրող յուրաքանչյուր ոք հերոս է, քանի որ ապրում է՝ գիտակցելով, որ մի քանի մետր այն կողմ արնախում թշնամի է: Միայն հայրենիքի հանդեպ մեծ սերն է, որ կարող է ստիպել մարդուն ապրել այդպես: Հատկապես պատերազմից հետո դողում ենք մեր հայրենիքի համար և այլ կերպ ենք դիտարկում ամեն բան: Մինչ այս մտածում էինք, որ բանակցությունների արդյունքում Արցախի հարցն ի նպաստ Հայաստանի կլուծվի, բայց հակառակն ենք ականատես լինում, Հայաստանի իշխանություններն այս 25%-ի հարցն են ուզում փակել և վերջացնել: Մեզ մնում է հաստատակամ ապրել Արցախում և այնպես չանենք, որ Արցախը հանկարծ հայաթափվի»-ասաց Մետաքսե Հակոբյանը:

Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 12-րդ եւ 22-րդ կետերով, «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքի 22-րդ հոդվածով՝ կարգադրում եմ.

1. Ազգային ժողովի աշխատակազմի պետական ծառայողներին եւ աշխատողներին խրախուսել միանվագ դրամական պարգեւատրմամբ՝ համաձայն 1-ին եւ 2-րդ հավելվածների:

2. Ազգային ժողովի աշխատակազմի ղեկավար-գլխավոր քարտուղար Վ. ՆԱՐԻԲԵԿՅԱՆԻՆ՝ Հայաստանի Հանրապետության օրենսդրությամբ սահմանված կարգով ապահովել համապատասխան վճարումների կատարումը»,- նշված է Ալեն Սիմոնյանի այսօր ստորագրված կարգադրության մեջ։

Նշենք,որ ԱԺ աշխատակազմին պարգեւատրում էր տրվել նաեւ 2021 թվականի դեկտեմբերին, ընդ որում՝ երկու անգամ։

Ստացվում է ԱԺ-ն մեկ ամսվա ընթացքում երեք անգամ պարգեւատրում է բաժանել։ Մինչդեռ կառավարությունը մերժում է նվազագույն աշխատավարձը բարձրացնելու նախագիծը։

Արցախյան 44-օրյա պատերազմի ընթացքում հայերին ծաղրող եւ հայհոյող ազգությամբ բաշկիր Ալիշեր Վալեևն, ով առավել հայտնի է Մորգենշտերն անունով պատրաստվում է մարտ ամսին Մարզահամերգային համալիրում մենահամերգի: Այս մասին իր ֆեյսբուքյան էջում գրել է Մասիսի Սուրբ Գեւորգ եկեղեցու եւ Այնթապի հոգեւոր հովիվ Տեր Եզնիկ քահանա Մարդիրյանը:

«Ազգությամբ բաշկիր Ալիշեր Վալեևն, ով առավել հայտնի է Մորգենշտերն անունով, Ռուսաստանում գործող ռեփեր է, ով անցյալ տարվա նոյեմբեր ամսին ՌԴ ներքին անվտանգության կողմից վտարվեց երկրից և այս պահին գտնվում է Դուբայում: Վերջինս հայտնի է դեռահասների և երիտասարդների շրջանում անբարոյականության, թմրամոլության և հակաքրիստոնեական քարոզներով: Բացահայտ սատանիստ է և չի թաքցնում իր հակակրանքը քրիստոնեական արժեքների նկատմամբ: Արցախյան 44-օրյա պատերազմի ընթացքում վերջինս ծաղրում և հայհոյում էր հայերին: Եվ այս անձը պատրաստվում է մարտ ամսին Մարզահամերգային համալիրում մենահամերգի՝ համերգի, որի բառերի մեծամասնությունը հայհոյություն է և անպատվություն: Իսկ Հայաստանում սպառել ենք վերոնշյալ սատանիստի, Հայ Ազգ ծաղրողի գրեթե բոլոր տոմսերը և սրտատրոփ սպասում ենք հայհոյախառն «երգեր» լսելուն: Անընդունելի ենք համարում և դեմ ենք մեր երիտասարդության շրջանում նմանաբնույթ միջոցառումների անցկացմանը և կոչ ենք անում հրաժարվել դրան մասնակցելուց»,- գրել  է նա:

Այս պահին անհավանական է թվում, սակայն որոշ սցենարների դեպքում Ուկրաինան կարող է մասերի բաժանվել։ Այս մասին ֆեյսբուքյան իր էջում գրել է քաղաքագետ Ստեփան Դանիելյանը։

«Եթե Ռուսաստանը Դոնբասը ճանաչի, ինչպես Աբխազիան ու Հարավային Օսեթիան, ապա չի բացառվում, որ Լեհաստանն ու Ռումինիայի կողմից ԱՄՆ-ը մտնեն Արեւմտյան Ուկրաինա։ Եվ Լեհաստանը, եւ Ռումինիան տարածքային նկրտումներ ունեն Ուկրաինայի հանդեպ։

Ինչն է հետաքրքիր, եթե Երկրորդ համաշխարհային պատերազմից հետո ստեղծված աշխարհակարգը վիճարկվում է, ապա, հետեւապես, պետք է վիճարկվի դրա հետեւանքով ստեղծված Ուկրաինայի ներկայիս սահմանները։ Ստացվում է, որ Սրեւմտյան Ուկրաինան, Բուկովինան եւ Ուժգորոդը պետք է վերականգնեն մինչպատերազմյան իրենց կարգավիճակը։

Որքան էլ տարօրինակ չլինի, դա ձեռնտու է եւ Ռուսաստանին, եւ ԱՄՆ-ին եւ Ուկրաինայի արեւմտյան հարեւաններին։

Երբ երկրի շահը ստորադասվում է դրսի խաղացողների ինտրիգներին, երբ հույսը դրվում է արտաքին ուժերի վրա, երբ մտնում ես գետն առանց լողալ իմանալու, ապա արդյունքներից պետք չէ բողոքել։

Ուկրաինացիները զոհում են սեփական երկիրը մտնելով աշխարհքաղաքական խաղերի մեջ, որտեղ իրենք խաղացող չեն, այլ օբյեկտ են»,֊գրել է Դանիելյանը։