ՀՀ Անկախության 20-րդ տարեդարձի միջոցառումների կազմակերպման կենտրոնը հայտարարել էր «Հայաստանը դու ես» լուսանկարների մրցույթ: Լուսանկարները պետք է արտահայտեին անկախության գաղափարը և նվիրված լինեին 20-րդ հոբելյանին: Մրցույթի վերջնաժամկետը սեպտեմբերի 16-ն էր, արդյունքների հայտարարման օր էր նախատեսված սեպտեմբերի 19-ը:

Մրցույթի կազմակերպիչները նշել էին, որ լուսանկարների բարձր որակը ցանկալի է, սակայն էականը լուսանկարների բովանդակությունն է ու ստեղծագործական մոտեցումը: Մրցույթին կարող էին մասնակցել ինչպես պրոֆեսիոնալ, այնպես էլ սիրողական լուսանկարիչները: Երեք լավագույն լուսանկարները կընտրվեն Ֆոտոլուր լրատվական գործակալության լուսանկարիչներից կազմված ժյուրիի կողմից: Երեք լավագույն լուսանկարի հեղինակները կստանան հատուկ մրցանակ-հուշանվերներ: Հատուկ մրցանակ կստանա նաև Ֆեյսբուքում ամենից շատ հավանություն ստացած լուսանկարը, որի անունը քիչ առաջ հայտարարեց տարեդարձի միջոցառումների կազմակերպման կենտրոնի գեյսբուքյան պաշտոնական 20 years of Independence of the Republic of Armenia էջը։ Մրցույթին ներկայացվել են 214 լուսանկարներ։

«Ֆեյսբուքում ամենից շատ հավանություն ստացած լուսանկարը։

465 հոգի հավանել են այս լուսանկարը:

Շնորհավորում ենք Արմեն Ղազարյանին հաղթանակի կապակցությամբ»:

Թե ինչպես է ծնվել լուսանկարը, պատմում է հեղինակը։

«2010 թվի հոկտեմբեր, Երեւան, իմ համար շատ դեպրեսիվ ու զզվելի օր… Այդ օրը ես բարոյական նորմերից ու սկզբուքներից ելնելով, քանի որ լցվել էր համբերությանս բաժակը, դիմում գրեցի ու շպրտեցի ուր որ պետք էր: Ջղայն` հավաքեցի «խաղալիքներս» ու լքեցի հիմնարկությունը` ինչպես ամերիկյան ֆիլմերում լիքը արկղը ձեռքիս մոտեցա մեքենայիս ու քամու արագությամբ եկա տուն, ուր ինձ սպասում էին կինս ու մեկ տարուց քիչ մեծ տղաս` Դավիթը:

Իհարկե` առաջին րոպեից տեսնելով տղայիս ես անմիջապես մոռացա ամեն ինչի մասին, ինչ ամբողջ օրվա ընթացքում կատարվել էր…. Դավիթի հետ խաղում էինք, երբ նրան շատ հետաքրքրեց լիքը արկղը` նա շրջեց ու թափեց ամբողջ պարունակությունը այդ «գրասենյակային կույտի», միջից ինքը վերցրեց այս եռագույնը, որը ես արդեն քանի տարի է իմ հետ եմ տանում, ուր գնում եմ աշխատելու,, սկսեց վազել, պարել, փչել դրոշին` որ ծածանվի, ես էլ իսկույն վազեցի ֆոտոխցիկի ետեւից։

Ետ գալուց տեսա, որ աչքերը փակ դրոշը ուսին ինչ-որ բան է մրթմրթում քթի տակ երգելու նման ես չխանգարեցի, ուղղակի ֆիքսեցի այս վայրկյանը, այդ օրվանից կա երկար ֆոտոշարք, բայց այս մեկը յուրահատուկ էր, յուրահատուկ էր իր ազնվությամբ, որ չէր սցենավորվել նախապես, եւ իհարկե իմ համար էր յուրահատուկ, որ թեկուզ չհասկանալով, կամ հասկանալով, չգիտեմ, բայց տղաս ինձ տվեց հակադեպրեսանտ-միջոց, ու նաեւ` հոգեւոր թեւեր։

Հաջորդ օրը ապացուցեց խոսքերիս ճշմարտությունը, ես սկսեցի հիմնել իմ սեփական բիզնեսը եւ այս դրոշը հիմա իմ գրասենյակի սեղանին պատվավոր տեղ է գրավում:
Այ այսպես ծնվեց այս լուսանկարը։ Իսկ անունը ես կդնեի` «Հոգեւոր վերածնունդ», կամ «Հակադեպրեսանտ»։

Հավելեմ, որ Մեծ Դավիթի հայրը` Արմեն Ղազարյանը «Indigo Media» մեդիա արտադրող ընկերության հիմնադիր-տնօրենն է, որը հիմա զբաղվում է  դոկումենտալ ֆիլմերի արտադրությամբ։

«Այս պահին մեր երկրում դոկումենտալ ֆիլմերը այսպես ասած` «օղորմածիկ» վիճակում են գտնվում, մեր առաջին «պիլոտ» ֆիլմը նվիրված է հայկակական աստղագիտությանը` Վիկտոր Համբարձումյանին։ Հետագայում կլինի շարք` ուսուցողական, սոցիալական, գիտահանրամատչելի։ Դեռ չգիտեմ, թե որ հեռոսւտաընկերությամբ կգնա պրոյեկտը, բոլորն այպիսի անճաշակության մեջ են, որ վախենում եմ կորի` չնկատվի… Հավակնոտ է, բայց կարծում եմ, որ փորձել պետք է»։

Ի դեպ` Դավիթի տատիկը` Նազելի Վարդանյանը փաստաբան է, իրավաբան, միջազգային գործերով դատապաշտպան։ Բուդապեշտում զոհված հայ սպա Գուրգեն Մարգարյանի շահերի պաշտպանն էր։ Իսկ Դավիթի պապայի պապիկը, այսինքն` Արմենի պապիկը Ջերմուկ քաղաքի հիմնադիր եւ առաջին քաղաքապետն էր… 31 տարի շարունակ։ Ջերմուկի կենտրոնում կարող եք գտնել Զավեն Վարդանյանի հուշարձանը։

Այ էսպիսի ընտանիքից է մեր ֆեյսբուքահայության կողմից լավագույնը ընտրված, կամ ֆեյսբուքավարի ասած` «ամենաշատ «like»-եր հավաքած» լուսանկարի ու նրա հերոսի ու հեղինակի գերդաստանի պատմությունը։ Սրտանց շնոորհավորում եմ, երջանիկ ու արժանապատիվ կյանք մաղթում մեր Դավիթին, որ մենք կարողանանք նրան ապահովել այդ կյանքը…

Հ.Գ. Մրցույթին հիմնականում ներկայացված էին պոզիտիվ ու լավատեսական, ընտանեկան ու հույսով լի, պաթետիկայից ոչ զուրկ լուսանկարներ։ Փոքրիկ Դավիթը իր հիրավի հարգարժան գերդաստանով, Դավիթի հայրը իր վայելած ու որսած հրաշալի պահով, դրան հաջորդած հաջողություններով իրոք կարող է ասել` «Հայաստանը ես եմ»։ Բայց աչքովս ընկավ մեկ այլ` Իննա Մխիթարյանի  ծայրահեղ աղքատության մեջ ապրող ընտանիքի երեխաների կյանքը պատկերող լուսանկար։ Ըստ իս` Հայաստանը նրանք էլ են…

Հայերը պետք է կարողանան տարբերվել ուրիշներից եւ ավելի լավը լինել, բայց մենք այժմ բռնել ենք «ինքնաթանգարանացման» ուղին: Այս մասին այսօր մամուլի ասուլիսում ասաց գերմանահայ PR մասնագետ, փիլիսոփայական գիտությունների դոկտոր Վազրիկ Բազիլը:

Աշխարհին ներկայանալուց առաջ, Հայաստանի պետական մարմինները, ըստ Բազիլի, պետք է հաշվի առնեն երեք հանգամանք. «Երբ պետական մարմինները ներկայացնում են երկիրը, պետք է բծախնդրություն ցուցաբերեն իրենց ներկայացրածի նկատմամբ, ուշադրություն դարձնեն ցանկացած մանրուքի,ոչ թե առաջնորդվեն  «դե լավ էլի» մոտեցմամբ: Եթե ցանկանում ենք, որ Հայաստանը լավագույնս ներկայացվի, ապա պետք է բծախնդրություն ցուցաբերվի նույնիսկ աննշան թվացող մանրուքի նկատմամբ: «Դե լավ էլի»-ով, «արա մարա»-ով հարցեր չեն լուծվում»,-ասաց  PR մասնագետը, հավելելով, որ պետք է նաեւ բարձրացնել սպասարկման որոլորտի մակարդակը, քանի որ մի աննշան դեպքից զբոսաշրջիկը կարող է պատկերացում  կազմել ողջ ոլորտի մասին:

Բազիլի առանձնացրած երկրորդ հանգամանքը «արտասահման» հասկացությունն է. «Գոյություն չունի նման հասկացություն, պարզապես կան երկրներ, կան մշակույթներ եւ, Հայաստանը ներկայացնելիս, պետք է հաշվի առնել դա: Մինչդեռ Հայաստանի պետական մարմինները դա հաշվի չեն առնում»:

Բազիլը խորհուրդ տվեց, նաև որ Հայաստանի ներկայացուցիչները, մինչ հանրային ելույթները,նախ ծանոթանան հյուրընկալող երկրների  ազգային առանձնահատկություններին և սովորույթներին, համագործակցեն տեղի հայ համայնքի ներկայացուցիչների հետ,ապա նոր խոսեն այս կամ այն երևույթի մասին: Որպես ապացույց նա մի օրինակ բերեց, երբ հայ փոխնախարարն, անտեսելով այն հանգամանքը, որ Գերմանիայում ընդունված չէ ռազմական բառապաշարը, այն օգտագործել է իր խոսքում:

Երրորդ հանգամանքը, ըստ Բազիլի,այն է, որ Հայաստանն ամենուր ներկայանում է որպես էկզոտիկ երկիր` առանց հաշվի առնելու բացասական կողմերը. «Օրինակ, արևելյան մի շարք երկրներ ունեն շուրջպար, դհոլ ու զուռնա, և երբ Հայաստանը այդ ամենով ներկայանում է Եվրոպային, թյուրիմացության տեղիք է տալիս: Ֆրանսիացու, գերմանացու համար հայկական, վրացական, թուրքական կամ ադրբեջանական շուրջպարը նույնն է: Արևմուտքի համար ամենամեծ դրամագլուխն ուշադրությունն է: Իսկ ուշադրությունը կարող ես վաստակել միայն ինքնությամբ: Անհրաժեշտ է հինը ներկայացնել նորովի: Պետք է տարբերվել ուրիշներից եւ ավելի լավը լինել»:

Բազիլը կարծում է, որ հայերը կիրառող են, բայց ոչ ստեղծագործող, կիրառում են ուրիշի ստեղծածը, մինչդեռ, ըստ նրա, մերն է պետք որպեսզի տարբերվենք:

Այսօր Երևանի կոնյակի գործարանի Հոկտեմբերյանի մասնաճյուղում  մեկնարկել է խաղողի մթերման գործընթացը:  ՀՀ գյուղատնտեսության նախարար Սերգո Կարապետյանը Արմավիրի մարզպետ Աշոտ Ղահրամանյանի և գլխավոր տնօրեն Արա Գրիգորյանի ուղեկցությամբ շրջել են գործարանում:

«Նախարարությունը մարզպետարանների համապատասխան աշխատակիցների հետ միասին հետևելու է մթերման ողջ գործընթացին: Մասնագետները լինելու են բոլոր մթերող կազմակերպություններում, որպեսզի ամեն ինչ կազմակերպվի պատշաճ կերպով: Վճարումները լինելու են ժամանակին: Այն կազմակերպությունները, որոնք չեն կարողանա միանգամից վճարել գյուղացուն, գումարները կվճարեն ըստ նախապես սահմանված ժամանակացույցի` պայմանագրերի հիման վրա»,- ասել է նախարարը` շեշտելով, որ գյուղացու ողջ արտադրանքը կմթերվի ամբողջությամբ ու ժամանակին:

Գյուղանտեսության նախարարը վստահեցրել է,որ հանրապետության բոլոր մարզերի գործարաններում ևս մի քանի օրից կսկսվի խաղողի մթերման գործընթացը.
«Այս տարի ակնկալում ենք ունենալ 222 – 225 հազար տոննա խաղող, և մթերման ծավալները նախորդ տարվա համեմատությամբ կմնան նույնը»:

Սերգո Կարապետյանն ասել է, որ խաղողը պետք է մթերվի կիլոգրամի համար 130 դրամից սկսած սակագնով:

ՀՀ Անկախության հռչակման 20-րդ տարեդարձին ընդառաջ` Երևանի քաղաքապետարանը սեպտեմբերի 17-ը հայտարարել է համաքաղաքային շաբաթօրյակի օր և կոչ է անում բոլոր երևանցիներին, տնտեսվարողներին, կրթական և առողջապահական հաստատություններին, պետական և հասարակական կազմակերպություններին ու հաստատություններին ակտիվորեն մասնակցել համաքաղաքային շաբաթօրյակին։
«Հոգատար լինենք Երևանի հանդեպ ամեն օր և ակտիվորեն մասնակցենք շաբաթօրյակին, մաքրենք ու բարեկարգենք մեր քաղաքը:
Անկախության տոնը դիմավորենք վառ տրամադրությամբ և Երևանին նվիրած թարմ ու բարեկարգ միջավայրում»,-ասվում է քաղաքապետարանի հաղորդագրությունում:

Երևանի քաղաքապետարանը տեղեկացնում է, որ ՀՀ անկախության 20- րդ տարեդարձի և «Էրեբունի-Երևան» տոնակատարությունների նախօրյակին, Երևանի մետրոպոլիտենի 30-ամյակի կապակցությամբ, հաճելի ու սպասված անակնկալ է մատուցվել երևանցիներին: Երթուղի է դուրս եկել նորագույն տեխնոլոգիաներով հագեցած, ժամանակակից տեսքով կահավորված ուղևորասրահով նոր շարժակազմ:
Տոնական զարդարանքով նոր շարժակազմի մեկնարկային շնորհանդեսին մասնակցել և առաջին ուղևորներից մեկը եղել է Երևանի քաղաքապետի առաջին տեղակալ Տարոն Մարգարյանը, որը շրջել է վագոններում ու համոզվել, որ հարմարավետ երթևեկելու համար ամեն ինչ արված է: Քաղաքապետի առաջին տեղակալը եղել է նաև ավտոմատ կառավարման համակարգերով կահավորված մեքենավարական խցիկում:

Քանի որ շարժակազմը կառավարվում է բորտ-համակարգիչներով, նոր գնացքի մեքենավարները վերապատրաստվել են: Երևանի մետրոպոլիտենի տնօրեն Փայլակ Յայլոյանը վստահեցրել է, որ եվրոպական չափանիշներին համապատասխանող նոր գնացքն առաջինն է, բայց ոչ վերջինը: Նոր գնացքը 15 տարի շահագործման ժամկետ ունի: Նա նաև ընդգծել է, որ այս և համակարգում շարունակաբար ընթացող բարեփոխումները կատարվում են մետրոպոլիտենի զարգացման ծրագրի շրջանակում, որը կառավարության կողմից հաստատվել է 2008 թ.-ին՝ հանրապետության նախագահ Սերժ Սարգսյանի մետրոպոիտեն կատարած շրջայցից հետո:

Ծրագրերի շարունակականության մասին ևս մեկ անգամ վստահեցրել է Երևանի քաղաքապետ Կարեն Կարապետյանը` Երևանի մետրոպոլիտեն կատարած այցելության ժամանակ:

Սեպտեմբերի 11-ին Հ. Ղափլանյանի անվան դրամատիկական թատրոնի խաղացանկում եղել է «Ախ Աննա, Աննա» ներկայացումը, որի գլխավոր դերում հանդես է եկել վերջերս  հանրության ուշադրության կենտրոնում հայտնված  Անժելա Սարգսյանը:

Դրամատիկը վաղուց նման հաջողություն չէր ունեցել:

Նախապես սպառված են եղել բորլոր տոմսերը: Ներկայացումն անցել է լեփ- լեցուն դահլիճում: Ականատեսները պատմում են, որ անգամ կանգնելու տեղ չի եղել: Մեր ունեցած տվյալներով հատկապես գլխավոր դերակատարին` Անժելային ճանապարհել են բուռն ծափողջույններով:

«Հայաստան-Արցախ-Սփյուռք» համահայկական կազմակերպությունը, «Բիզնես ԷՅ ԷՄ» տեղեկատվական կենտրոնը և «Սոցիոմետր» անկախ սոցիոլոգիական կենտրոնը նոյեմբերի 7-ին Կարեն Դեմիրճյանի անվան մարզահամերգային համալիրում կանցկացնեն համաժողովրդական քվեարկությամբ «Տարվա լավագույն ապրանքանիշ» ազգային մրցանակաբաշխությունը:

«Սա կլինի ազգային տոն, որով մարդիկ կկարողանան վայելել այն, ինչ արտադրվում է իրենց երկրում»,-լրագրողների հետ հանդիպման ժամանակ ասաց  «Հայաստան-Արցախ-Սփյուռք» համահայկական կազմակերպության երևանյան գրասենյակի ղեկավար Աստղիկ Խաչատրյանը` հավելելով որնման է ռուսական «Նարոդնայա մարկա» նախագծին:

Իսկ Ահարոն Ադիբեկյանը ասաց.«Դուք գիտեք, որ մեր շուկայի մեծ մասը մենաշնորհված է և նրանց դեմ խաղ չկա»,-պարզաբանելով, որ իրենք աշխատել են այնպիսի մեթոդաբանությամբ, որով նախապատվությունը տրվելու է շուկայում ոչ մեծ դիրք ունեցող ընկերություններին կամ անձանց, որոնք ներկայացնում են որակյալ և մատչելի արտադրանք, բացի այդ՝ իրականացնում են սոցիալական ծրագրեր:

Ուսումնասիրություններին ու հարցումներին մասնակցել է 1600 ընտանիք:

Ադիբեկյանի խոսքով՝ կսահմանվի նաև «Լավագույն հանրային ծառայություն մատուցող» անվանակարգը, այսինքն՝ կընտրվի լավագույն քաղաքապետ, լավագույն մարզպետ. «Սա ավելի բարձր է, քան պետական պարգևը, որովհետև դա հանրային անվանակոչում է: Ինչպես, օրինակ, աշխարհում ավելի հեղինակավոր են հանրային մրցանակաբաշխությունները, ինչպիսին, օրինակ, «Օսկարն է», որովհետև դա հանրային մրցանակաբաշխություն է»,- ասաց սոցիոլոգը: Ի դեպ, նա ասաց, որ նախագծին արձագանքել են նաև խոշոր գործարարներ: Ադիբեկյանը դեռևս չցանկացավ անուններ նշել, բացառությամբ Երևանի կոնյակի գործարանի:

Սեպտեմբերի 14-ին`ժամը 15.40–ին տեղեկատվություն է ստացվել, որ Երևան քաղաքի Հ.Շիրազի փողոցի թիվ 40 շենքի 14-րդ հարկից ինքնասպանության փորձ է ուզում կատարել մի քա-ղա¬քա¬ցի:
Դեպքի վայր են մեկնել ճգնաժամային կառավարման կենտրոնի օպերատիվ խումբը և փրկարարական ուժերի վարչության հատուկ փրկարարական ջոկատի հերթապահ խումբը:
Տեղում պարզվել է, որ Երևան քաղաքի 16-րդ թաղամասի թիվ 23 շենքի 101-րդ բնակարանի բնակիչ, 1948 թվականին ծնված Մելքոն Գասպարյանը շենքի 14-րդ հարկի ընդհանուր օգտագործման պատշգամբից փորձել է ցած նետվել:
Մինչ փրկարարների կանչի վայր հասնելը` ոստիկանության աշխատակիցների կողմից ինքնասպանության փորձը կանխվել է:

Նվազագույն աշխատավարձի չափով առաջին հորիզոնականում Լյուքսեմբուրգն է, որտեղ այն կազմում է 2,513 դոլար: Եվրոպական փոքրիկ պետությանը հետևում են Իռլանդիան` 2,090 դոլար և Բելգիան` 2,064 դոլար աշխատավարձով: Այս պատկերը պարզել են  RIA-Novosti գործակալության վերլուծաբանները, հիմնվելով  եվրոպական վիճակագրական տարբեր կազմակերպությունների ներկայացրած տվյալների վրա:

Հետաքրքիր դասավորություն է ցանկում. Եվրամիության անդամ երկրները աղյուսակի վերին մասում են, իսկ վերջին հորիզոնականը զբաղեցնում են ԱՊՀ անդամ եվրոպական երկրները: Մեր երկիրն այս անգամ էլ վերջից առաջին տեղում է. Հայաստանը զբաղեցնում է ամենաստորին հորիզոնականը, որտեղ նվազագույն աշխատավարձը կազմում է 86.8 դոլար: Մեր երկրին նախորդում են Մոլդովան` 95.4 դոլար  և Ադրբեջանը` 108.1դոլար աշխատավարձերով:

Սեպտեմբերի 13-ին` ժամը ժ.16.35-ին, տեղեկատվություն է ստացվել, որ ժամը 15.45-ին Երևան քաղաքի Նոր Նորքի 4-րդ զանգվածի Բակունցի փողոցի թիվ 15 շենքի 7-րդ բնակարանից ահազանգ է ստացվել, որ թունավորվել է 1981թ. ծնված Սերգեյ Մանվելյանը:

Հայաստանի ԱԻՆ փրկարար ծառայությունից տեղեկացնում են, որ թունավորման պատճառ է հանդիսացել աման լվանալու հեղուկը: Տուժածը տեղում ստացել է առաջին բուժօգնություն և հրաժարվել հոսպիտալացումից: