Վրաստանի գազատրանսպորտային ընկերությունը պաշտոնապես տեղեկացրել է «ՀայՌուսգազարդին»` սեպտեմբերի 22-ին, ժամը 11:00-ից Հայաստան բնական գազի մատակարարումը ժամանակավորապես դադարեցնելու մասին: Վրացական ընկերությունը նախատեսում է իրականացնել Սագուրամո-«Կրասնի Մոստ» 1000 մմ մայրուղային գազատարի նոր հատվածի միացման աշխատանքներ՝ Թբիլիսիի շրջատար ավտոճանապարհի վերակառուցման հետ կապված: Նախատեսվում են նաև սողանքային հատվածի վերանորոգման և գազի արտահոսքի վերացմանն ուղղված աշխատանքներ:

Աշխատանքների ավարտի մասին վրացական կողմը կտեղեկացնի լրացուցիչ:

Ինչպես հայտնում են «Հայռուսգազարդ»-ից, այս ընթացքում հանրապետության սպառողների գազամատակարարումը կիրականացվի պահուստային ռեզերվների հաշվին` առանց սահմանափակումների:

Այսօր ՀՀ վարչապետ Տիգրան Սարգսյանն Մասիսում ներկա է գտնվել Ռուսաստանի Ստավրոպոլի մարզից Հայաստան ներկրված 1100 տոննա բարձրորակ «էլիտա» ցորենի սերմնացուի վագոնների բեռնաթափմանը։Վարչապետն  անձամբ  է լսել  գյուղատնտեսության պատասխանատուների ու ներկրված սերմնացուի պատասխանատուների մասնագիտական կարծիքը ցորենի որակի մասին:

Ոլորտի պատասխանատուները վարչապետին զեկուցել են, որ անցած տարի ներկրված 950 տոննա ցորենի սերմնացուից ստացվել է ցորենի 7 տեսակներից ստացվել է 220.000 տոննա ցորեն, անցած տարվա 183.000-ի դիմաց: Ստացված 2900 տոննա առաջին վերարտադրության սերմնացուները կբաժանվեն 0.4-3 հա հողատարածք ունեցող շահառուներին, որոնց թիվը հասնում է 9-10 հազարի:  Նախորդ տարվա համեմատ այս տարի նվազել է մեկ կիլոգրամի համար սահմանված ներկրման գինը: 2010 թ. ցորենի սերմնացուն Ռուսաստանից ներկրվել է 1 դոլարին համարժեք գումարով, իսկ այս տարի ներկրված հացահատիկի սերմնացուի գինը կազմել է մոտավորապես 75 ցենտին համարժեք գումար:

Հավելենք, որ երկրորդ տարին է,ինչ Հայաստան է ներկրվում ցորենի «Էլիտա» սերմնացու, որը բաժանվելու է 7 հա և ավել հողատարածք ունեցող գյուղացիներին:

Վերջնկանապես պարզվել է, որ սեպտեմբերի 17-ին` ժամը 17:40-ին, Նալբանդյան փողոցի Արմինե Հովվյանի բնակարանում բռնկված հրդեհի և 64-ամյա տանտիրուհու մահը փոխկապակցված է. նրան սպանել են հրդեհից առաջ: Տանը եղած մյուս անձը`  43-ամյա Կարեն Պետրոսյանը, ով հրշեջների կողմից շնչուղիների այրվածքով տեղափոխվել էր ճառագայթային բժշկության և այրվածքների գիտական կենտրոն, հիվանդանոցից փորձել է փախչել: Հենց այդ արարքն էլ ոստիկանների մոտ կասկած է առաջացրել, և Կարենին անմիջապես խուզարկել են ու գրպաններում հայտնաբերել ոսկյա զարդեր և 40 հազար դրամ, որը, ինչպես պարզվել է, գողացված է:

Բայց նա փախչում էր ոչ նրա համար որ գողոնը գրպանում էր այլ ավելի շուտ նրա`որԿարեն Պետրոսյանը, ով փաստորեն համարվել է տան բարեկամը տիկնոջ գլխին հարվածել էր մուրճով: Նա, ինչպես պարզվել է Արմինեի քրոջ տղայի ընկերն է և ըստ մամուլի, մշտապես օգնել է միայնակ ապրող, չամուսնացած տարեց դասախոս կնոջը կենցաղային հարցերում`ինչ-որ բան վերանորոգել, ինչ-որ բան տեղափոխել: Այդ օրն էլ Արմինեի տուն է գնացել նրա համակարգչային ծրագրերն ուժեղացնելու նպատակով, հետո պետք է գորգը տեղափոխեր լվացման: Եվ քանի որ բոլորն էլ գիտեին, որ Կարենն Արմինեի բնակարան պիտի գնար, դրա համար էլ նա, գողանալով դասախոսի ոսկիներն ու գումարը, մուրճով դաժանաբար հարվածել է Արմինեի գլխին, սպանել, այնուհետև որոշել է հրդեհել բնակարանը և հեռանալ այնտեղից՝ մտածելով, որ ում, ում, բայց իրեն չէին կասկածի: Սակայն ծրագիրը ձախողվել է, խանգարել է հրդեհից տաքացած դուռը, որը ջերմությունից ընդարձակվել է ու չի բացվել, և Կարենը մնացել է փակված բնակարանում:

«Չենք լռելու» երիտասարդական նախաձեռնությունը շնորհավորում է բոլորին Անկախության օրվա առթիվ և կոչ է անում բոլոր հայ երիտասարդներինիրենցից օրինակ վերցնել ու չլռել.

«20 տարեկան` բանակից վերադարձած և ինքնուրույն կյանք սկսող երիտասարդի տարիք…

Այսօր, այս մեծ օրվա նախաշեմին, «Չենք լռելու»-ն կոչով է դիմում բոլոր հայ երիտասարդներին. մի՛ լռեք: Անկախ նրանից` ընդդիմադիր եք, թե իշխանամետ, հանուն մեր հայրենիքի ստեղծե՛ք երիտասարդական նոր նախաձեռնություններ, ընտրեք թիրախային ոլորտներ և բոլոր հնարավոր միջոցներով բարձրաձայնեք մեր երկրի հիվանդությունները: Դրանց ծպտումը միայն վտանգում է բոլորիս ապագան:

«Չենք լռելու»-ի բոլոր տեսանյութերը նկարահանվել են սիրողական տեսախցիկով և մոնտաժվել ամենատարրական ծրագրերով: Արեք նույնը և դուք: Պատրաստեք տեսանյութեր, ըստ ձեզ, ամենատագնապահարույց խնդիրների վերաբերյալ և տարածեք համացանցում: Իրականում դա շատ հեշտ է:

Մի՛ լռեք:

Այո, արդարացումների փոխարեն ձեզ միայն ամոթանք ու նախատինք կմատուցեն, թերթերը կգրեն, որ ֆինանսավորվում եք «մութ ուժերի», Մայր աթոռի, իշխանությունների, ընդդիմության, աղանդավորների, ամերիկացիների, ռուսների, կոնգոցիների և ուդմուրտների կողմից:

Միևնույն է` մի՛ լռեք: Հանուն մեր հայրենիքի մի՛ լռեք:

Ձեզ կմեղադրեն, կքննադատեն հարցերը չափազանց սուր դնելու մեջ: Դրան ի պատասխան` միայն ավելի սուր դրեք հարցերը:

Մի՛ լռեք:

Որքան կարող եք` օգտագործեք YouTube-ի, Facebook-ի, Twitter-ի հնարավորությունները և բարձրաձայնեք մեր երկրում առկա խնդիրները:

Հայաստանի ներկայիս վիճակի պատճառներից մեկը երիտասարդների լռությունն է:

Մի՛ լռեք, և Անկախության 30-ամյակը մենք կնշենք բոլորովին այլ` մաքուր, ազատ, արդար և հիրավի անկախ Հայաստանում:

Մի՛ լռեք»:

Լրատվամիջոցներից  հաղորդում են,որ Արմեն Ջիգարխանյանի առողջական վիճակը կտրուկ վատացել է (հևոց, բարձր ջերմություն) և նրան  հիվանդանոց են տեղափոխել:

Երեք տարի առաջ Ջիգարխանյանն ինսուլտ է ստացել։ Ռուսական Newsliga.ru կայքը հաղորդում է, որ անվանի դերասանը օստեոխոնդրոզ ունի, ինչպես նաև շնչառական ուղիների հետ կապված որոշ  խնդիրներ ևս։

Ի դեպ, սեպտեմբերի 18-ին Լոռու մարզի Ախթալա քաղաքում անցկացված խորովածի միջազգային փառատոնի ծրագրում ընդգրկված էր նաև Ջիգարխանյանի արձանի բացման արարողությունը։ Սակայն, արձանի բացումը կատարեց հայազգի բռնցքամարտիկ Վիկ Դարչինյանը:

Նախագահի աշխատակազմի ղեկավար Կարեն Կարապետյանի պաշտոնանկությունից հետո, համենայն դեպս դե ֆակտո, դեռ հստակեցված չէ նոր թեկնածուի անձը: Հիմնական թեկնածու է համարվում  Միքայել Մինասյանը: Չար լեզուներն ասում են, որ Կարապետյանի նախագահականից հեռանալու պատճառը հենց նրա հետ ունեցած տարաձայնություններն են:

Սակայն Հետաքրքիր է, որ պղտոր գետում ձուկ որսացողները ժամանակ չեն կորցնում. լուրեր են շրջանառվում, որ աշխատակազմի  նոր ղեկավար լինելու է ոչ ավել, ոչ պակաս  Արտաշես Գեղամյանը: Թե ինչքանով է դա հավաստի, թողնում ենք ընթերցողի երևակայությանը, սակայն մեր ունեցած տեղեկություններով լուրեր տարածողը հենց ինքը` Գեղամյանն է:

Արդեն երկրորդ անգամ  կաթվածահար է լինում մայրաքաղաքի տրանսպորտը: Այն, որ անկախության շքերթի փորձն է, հասկանալի է, բայց ինչու ոչ  կիրակի օրը կամ գոնե ոչ աշխատանքային ժամին անցկացնել փորձը, միևնույնն է ոստիկանության շարքային աշխատակիցներին չեն վճարում և ի դեպ չեն վճարել որևէ անգամ: Սակայն սա այլ խոսակցության թեմա է: Բավական չէ աշխատանքային օրվա, աշխատանքային ժամին, շիլաշփոթ է քաղաքում ու վերահսկողություն չկա, դեռ որոշ երթուղայիններ, օգտվելով առիթից,  իրենց քեֆով ոնց ուզում քշում են, ոնց կարճ է ու խցանումներից հեռու ու առանց նախապես զգուշացնելու: Մարդիկ հայտնվում են հիմար վիճակում` իրավմամբ դժգոհելով անկազմակերպ միջոցառումներից:

Քաղաքապետարանի լրատվական վարչության պետ Արթուր Գևորգյանը պարզաբանեց, թե ոստիկանները վերահսկում են, բայց դե խառը վիճակ է:

Տեղեկացնենք, որ ոստիկանները ընդամենը խումբ — խումբ կանգնած էին մայթերին և համենայն դեպս մեր ացնելու պահին,չնայած խառնաշփոթին,  ոչինչ էլ չէին անում:

Ոստիկանությունը փորձաքննության եզրակացությամբ պարզել է, որ վերջերս սկանդալի կենտրոնում հայտնված դերասանուհի Անժելա Սարգսյանի ինտերնետում տարածված լուսանկարները պոռնկագրական բնույթի են:

Ոստիկանության Քննչական գլխավոր վարչության պետ Գագաիկ Համբարձումյանը մեզ հետ զրույցում հաստատեց այդ, սակայն դժվարացավ ասել  հարուցվելու է քրեական գործ, թե ոչ: «Դեռ  հստակ որոշված չէ, նյութերը ուղարկվել են մեզ մոտ, քննություն է կատարվում»,- ասաց նա:

Հիշեցնենք, որ դերասանուհու պոռնոգրաֆիկ բնույթի լուսանկարները տարածել է նրա նախկին գուգընկեր Կարեն Արայանը:

Հայաստանի Տնտեսական մրցակցության պաշտպանության պետական հանձնաժողովն (ՏՄՊՊՀ) իր այսօրվա` սեպտեմբերի 19-ի նիստում որոշել է լուծվող սուրճի ներկրման ոլորտում խոշոր ծավալներ ունեցող «Մոկոնաթ» ընկերության հանդեպ կիրառել տուգանք`  20 մլն դրամի չափով:

ՏՄՊՊՀ մամուլի ծառայությունից  հայտնում են, որ Հանձնաժողովը դեմպինգի, խտրական գների կիրառման եւ անհիմն գնաճի փաստեր է բացահայտել:Հանձնաժողովի ուսումնասիրություններով, բացահայտվել է, որ, վերոնշյալ ընկերությունը տեւական ժամանակ լուծվող սուրճն իրացրել է խիստ տարբերակված գներով,իսկ որոշ դեպքերում էլ՝ անհիմն կերպով բարձրացրել է գինը:

Հանձնաժողովը պարզել է նաեւ, որ մի որոշ ժամանակահատված  էլ «Մոկոնաթը» գների կտրուկ իջեցման միջոցով փորձել է շուկայից դուրս մղել իր մրցակցներին, այսինքն, ընկերությունը իրականացրել է դեմպինգ, ինչի արդյունքում էլ լուծվող սուրճի շուկայում կարողացել է զբաղեցնել գերիշխող դիրք՝ ներկրման ծավալներով դառնալով առաջատար: Հանձնաժողովի փորձագետներն այս ընկերության վարքագծի հետ կապված բավականին ուշագրավ բացահայտումներ են կատարել: Մասնավորապես, համաձայն ընկերության կողմից Հանձնաժողով ներկայացված փաստաթղթերի, լուծվող սուրճի ձեռքբերման գինը կազմել է  820 դրամ, սակայն վաճառքը տեղի է ունեցել գնման գնից անհամեմատ ցածր արժեքով՝ 620 դրամով: Այս գործելաոճով շուկայում առաջատար դիրքերի հասնելով, ընկերությունը կտրուկ փոխել է իր վարքագիծը եւ վարել է հակառակ քաղաքականությունը. Նույն 820 դրամով ձեռք բերված սուրճը վաճառել է քառակի անգամ թանկ՝ 3300 դրամով:

Փաստաթղթերի ուսումնասիրությունից պարզ է դառնում, որ լուծվող սուրճի շուկայում գերիշխող դիրք ունեցող ընկերությունը տեւական ժամանակ գործել է օրենքի ակնհայտ խախտումներով եւ գերշահույթներ կորզել սպառողներից: Ի դեպ, ընկերության կողմից Հանձնաժողով ներկայացված փաստաթղթերի  ուսումնասիրությունից պարզվել է նաեւ, որ ապրանքի ձեռքբերման եւ վաճառքի գները ակնհայտորեն չեն համապատասխանում իրական շուկայական գներին, ինչի հետ կապված բոլոր նյութերն ուղարկվել են Պետական եկամուտների կոմիտե:

Տեղեկացնենք, որ  «Մոկոնաթ» ընկերությունը  խոշոր ներկրող է հանդիսանում նաեւ հետեւյալ ապրանքային շուկաներում՝ «Սառեցրած ձկներ», «Ներկրվող սառեցված միս» եւ «Բրինձ»:

Սփյուռքի կառույցների ղեկավարների մասնակցությամբ Երեւանում ընթացող համաժողովում Մեծի Տան Կիլիկիո կաթողիկոս Արամ Ա-ն հայտարարել է. « Մենք անհանգստացած ենք, որ Հայաստանում արտագաղթը նույն տեմպերով շարունակվում է»: Նրա խոսքով` այսօր մեր հայրենիքը և ազգը դիմագրավում է լուրջ խնդիրների,որոնց վերջը չի էլ երևում:

«Արտագաղթի մտահոգության մասին մենք հայտնել ենք «Հայաստան-սփյուռք» համաժողովին, նույնը հայտնում ենք նաեւ այստեղ ցավով: Մենք սպասում ենք Հայաստանի իշխանության արձագանքին այս խնդրի առնչությամբ, ինչպես նաեւ մտավորականների եւ հասարակակական կառույցների, հասարակ հայ ժողովրդի գնահատականը: Մեր թշնամին ուզեց Հայաստանը պահպանել առանց հայության, այսօր մենք մեր ձեռքերով ենք թողնում Հայաստանն առանց ժողովրդի: Այդ խնդիրը ունի տնտեսական պատճառներ, որոնց լուծումն անհրաժեշտություն է:

Հայաստանում մշակութային կոռոպցիա կոչվող հիվանդության արագացող ընթացքը, հարուստ փոքրամասնության հղփացած տնտեսական վիճակը եւ նրանց դիմաց մտավորականության` գրողների, ուսուցիչների եւ ընդհանրապես մեր ժողովրդի կենսական պայմանները պետք է հիմնարար բարեփոխումների ենթարկվեն բարոյական արժեքներով, օրինական սկզբունքներով եւ ընկերային հարաբերությունների չափանիշներով: Եկեղեցին չի կարող անտարբեր մնալ այս վատառողջ երեւույթների հանդեպ»,- ընդգծել է Արամ Ա-ն:

Կաթողիկոսն անդրադարձել է նաև Ցեղասպանության խնդրին` նշելով, որ բոլորս ազգովի պատրատվում ենք նշելու Հայոց Ցեղասպանության 100-րդ տարելիցը. « Մենք պահանջատեր ազգ ենք, մեկուկես միլիոն հայի արյուն արդեն թափվել է: Մեր եկեղեցական կալվածքները եւ մեր ժողովրդի զավակների սեփական տները, հողերը, ունեցվածքը բռնագրված ցեղասպան թուրքերի կողմից: Հավատարիմ մեր պապերի կտակին` մենք շարունակում ենք եւ պիտի շարունակենք մեր պահանջատիրական պայքարը  Հայաստանը` որպես պետություն իր մոտեցումով եւ կոչով եւ սփյուռքը` որպես ցեղասպանության ենթարկված մեր ազգի մի մաս իր կոչով, մոտեցումներով պետք է աշխարհին ներկայանանք որպես մեկ ազգ, հավաքական մեկ կամք, որպեսզի կարողանանք հասնել պահանջատիրության մոտեցումներին, որպեսզի կարողանանք վերականգնել պատմական արդարությունը»,- ասել  է նա: