Հատուկ քննչական ծառայությունում ավարտվել է ոստիկանության օպերլիազորի կողմից թմրամիջոց իրացնելու դեպքի առթիվ հարուցված քրեական գործի նախաքննությունը: Նախաքննության նկատմամբ հսկողություն իրականացնող դատախազը հաստատել է մեղադրական եզրակացությունը:

Գլխավոր դատախազության մամուլի ծառայությունից հայտնում են, որ նախաքննությամբ պարզվել է, որ ոստիկանության լեյտենանտ Ստեփան Տոնոյանը աշխատել է ոստիկանության Երեւան քաղաքի վարչության քրեական հետախուզության 1-ի բաժանմունքում` որպես օպերլիազոր: Ըստ նախաքննության տվյալների` Ստեփան Տոնոյանը 2010թ. նոյեմբերին Ն. Իգիթյանին հյուրասիրելու եղանակով իրացրել է զգալի չափերի մարիխուանա տեսակի թմրամիջոց: 2011թ. հունվար-փետրվար ամիսներին օպերլիազորը «Ծղոտներ»  ռեստորանային համալիրում մեթիլէնդիօքսիմետամֆենամին տեսակի թմրամիջոց է իրացրել Ն. Իգիթյանին եւ Ն. Մարգարյանին, իսկ 2011թ. մարտի 11-ին նույն ռեստորանային  համալիրում զգալի չափերի մարիխուանա տեսակի թմրամիջոց կրկին հյուրասիրելու եղանակով իրացրել է Ռ. Խաչատրյանին:

Բացի այդ, նախաքննությամբ ձեռք են բերվել տվյալներ, որ օպերլիազոր Ստեփան Տոնոյանի եղբայրը` Սերգեյ Տոնոյանը, ով աշխատել է ՀՀ ԿԱ կադաստրի պետական կոմիտեի Ավանի տարածքային ստորաբաժանման բաժնում` որպես բաժնի պետ, 2010թ. օգոստոսից մինչեւ 2011թ. մայիսն ընկած ժամանակահատվածում աճեցրել է կանաբիս տեսակի բույս, որը վերամշակելով` պատրաստել է առանձնապես խոշոր չափերի մարիխուանա տեսակի թմրամիջոց:

Վերջինս անձամբ եւ իր ընկերուհու միջոցով  պատրաստված թմրամիջոցը  վաճառել է տարբեր անձանց: Նախաքննությամբ ձեռք բերված ապացույցների հիման վրա ոստիկանության լեյտենանտ, ոստիկանության Երեւան քաղաքի վարչության քրեական հետախուզության 1-ին բաժանմունքի օպերլիազոր Ստեփան Տոնոյանին մեղադրանք է առաջադրվել ՀՀ քրեական օրենսգրքի 266-րդ հոդվածի 1-ին մասով, իսկ Սերգեյ Տոնոյանին` ՀՀ քրեական օրենսգրքի 266-րդ հոդվածի 3-րդ մասի 1-ին եւ 2-րդ կետերով:Քրեական գործն ուղարկվել է Արաբկիր եւ Քանաքեռ-Զեյթուն վարչական շրջանների  ընդհանուր իրավասության դատարան` ըստ էության քննելու համար:

Սեպտեմբերի 27-ին` ժամը 19.30-ի սահմաններում,  «Ռենջ Ռովեր»  մակնիշի ավտոմեքենան Երևան-Իջևան ճանապարհի 93-րդ կմ-ին բախվել է  «ԳԱԶ-3110»  մակնիշի մի ավտոմեքենայի և ընկել գետը:

«ԳԱԶ-3110»-ի ուղևորը և «Ռենջ Ռովեր»-ի ուղևորը մարմնական վնասվածքներով տեղափոխվել են հիվանդանոց:

Կատարվում է քննություն:

Երևանի Դանիել Վարուժանի անվան թիվ 89 դպրոցի քիմիայի ուսուցչուհի Գայանե Թանգյանը երեկ իր դրսևորած անհավասարակշիռ վարքի պատճառով ենթարկվել է պատասխանատվության: Նրան այսօր հեռացրել են աշխատանքից:

Դպրոցի տնօրեն Օֆելյա Պետրոսյանը Tert.am-ի հետ զրույցում չցանկացավ մեկնաբանել կատարվածը և սահմանափակվեց միայն ասելով. «Ես իմ պարտքը կատարել եմ, ուսուցչուհին հեռացված է աշխատանքից, և վերջ: Էս ինչ շոու են սարքել, հանցախմբին բռնեցին, սենց շոու չսարքեցին, ոնց որ սրանից»:

Հիշեցնենք, որ երեկ 4-րդ դասարանի դասղեկ Գայանե Թանգյանը, հենց դասարանում, բոլորի աչքի առաջ կտրել էր իր դասարանի 9-ամյա մի քանի տղաների մազերը: «Տուժած» երեխաների ծնողները վսատահեցնում են, որ ուսուցչուհին այնպես է կտրել երեխաների մազերը, որ երեխաները ստիպված պետք է քաչալանան կամ շատ կարճ կտրեն մազերը:

Դասղեկը երեխաներին կանչել է գրատախտակի մոտ, որ կտրի նրանց մազերը, աշակերտները խնդրել են դա չանել: Իր արարքը ուսուչուհին բացատրել է` ասելով. «Կատակ եմ արել մայրաբար»:

Երեւան քաղաքի Տիգրան Մեծ փողոցի թիվ 46 շենքի բնակարաններից մեկում, սեպտեմբերի 26-ին հրդեհ է բռնկվել, որից տուժել է տանտերը:

Հայաստանի ԱԻՆ փրկարար ծառայությունից հայտնում են, որ դեպքի վայր է մեկնել մեկ մարտական հաշվարկ, ապա փրկարարական ուժերի վարչության օպերատիվ խումբը:

Տեղում պարզվել է, որ հրդեհը բռնկվել է թիվ 37 բնակարանում:

Հրդեհը մեկուսացվել է ժամը 13.50-ին, մարվել`14.01-ին:

Այրվել են Մարուսյա Եղիազարյանի բնակարանի միջանցքը եւ խոհանոցը` իր գույքով`25 քմ մակերեսով: Հրդեհի հետեւանքով, 76-ամյա Մ. Եղիազարյանը ծխահարվել է: Նա շտապօգնության աշխատակիցների կողմից ստացել է բուժ.օգնություն եւ հրաժարվել հոսպիտալացումից:

Իրարամերժ կարծիքներ են հնչում վերջին   օրերի ամենահետաքրքիր դեպքի` սկանդալային ավազակախմբի բացահայտման վերաբերյալ. Ոչ ոք չի հավատում, որ բանդան` եթե դա այն խումբն է, որը կարողացել է նման պրոֆեսիոնալ կերպով աշխատել ու քաջատեղյակ լինել բարձրաստիճանների ու հարուստների նիստ ու կացին, բաղկացած է բացառապես մի քանի անգամ դատապարտված հանցագործներից: Մարդիկ ակնկալում են  բացահայտված տեսնել ինչ որ կռիշաներ ու բարձրաստիճաններ.   Այդ է պատճառը, որ ինֆորմացիոն արտահոսքը, թե իրավապահ համակարգի ղեկավարների զավակներ են խառնված գործին, ավելի հետաքրքրեց մարդկանց, քան ավազակախմբի բացահայտված լինելու բուն  փաստը: Արդյո՞ք դա այն խումբն է,  որ վերջին շրջանում 3 մեծահարուստի է թալանել: Այսօր կրկին մեկ այլ խումբ է մուտք գործել գործարարի առանձնատուն` իր հետ տանելով ոսկյա զարդեր:

Արդյո՞ք այն ինչ մատուցվում է հանրությանը ճշմարտություն է, ինչո՞ւ վերջին պահին արձանագրվեց, որ բանդիտների  կողմից ևս կրակոցներ է հնչել, երբ արդեն պաշտոնական հաղորդագրություն էր տրվում: Արդյո՞ք ճիշտ են այն խոսակցությունները, որ հանցագործը ոչ թե ժայռից է վայր ընկել ու մահացել, այլ կրակել են նրան ու սպանել: Եվ վերջապես գտնվե՞լ է երեք նշված մեծահարուստների տներից թալանված իրերից ինչ որ առարկա, որ կապացուցեր բանդայի մասնակցությունը այդ կողոպուտին: Այս վերջին հարցին ի պատասխան Երևանի ոստիկանապետ Ներսիկ Նազարյանն ասաց.

«Մեր իրավասության մեջ չի մտնում, այդ ամենի մասին որևէ տեղեկություն տալը: Դա «քրեականի» ու «վեցերորդ» վարչության գործն է:  Իրենք հիմա զբաղվում են դրանով,բայց տեղյակ ենք,որ նախաքննություն է ընթանում, և իրենք էլ ոչինչ դեռ չեն ասել, բայց խոստացել են, որ երբ նյութերը պատրաստ լինեն, կտրամադրեն լրատվամիջոցներին»:

Սկսած 1979թ-ից` սեպտեմբերի 27-ը նշվում է որպես զբոսաշրջության միջազգային օր: Սակայն Հայաստանում այն առաջին անգամ է նշվում: Ստացվում է` այս հարցում ևս մենք հետ ենք քաղաքակրթությունից. Այդ իսկ պատճառով զարմանալի չէ, որ մեր համաքաղաքացիներն ու նույնիսկ մեր երկիր ժամանած զբոսաշրջիկները չգիտեին այդ մասին:Երբ մի քանի պատահական զբոսաշրջիկներից  փորձեցինք ճշտել, թե որքանով է Հայաստանը գրավիչ, ի՞նչն է իրենց դուր գալիս, ի՞նչը վանում, ստացանք իրարարամերժ պատասխաններ:

«Հայկական Վարկածի» հարցին, թե ինչու՞ եք ընտրել հենց Հայաստանը հանգիստն անցկացնելու համար, Ուկրաինայից ժամանած 36-ամյա Օլգա Զաբոլոտնայան ասաց, որ շատ հայ հարևաններ ունի, նրանք շատ են պատմել Հայաստանի մասին`Արարատի, Տաթևի,Գեղարդի, բայց չէր պատկերացնում, որ այսքան բարի մարդիկ ունեցող երկրում իրեն այսպես «կքամեին» ֆինանսապես. «Շատ թանկ է ամեն ինչ: Կպատկերացնեք, հետ գնալու համար տոմսի գումար եմ խնդրել ընկերներիցս ,բայց լավ ժամանակ անցկացրի, կարևորը` շատ տաք ու արևոտ էր ձեզ մոտ»:

28-ամյա Սուրենը Ֆրանսիայից էր. «Զարգացած պետությունների հետ սպասարկման ոլորտում համեմատության եզրեր չեն կարող լինել,այնտեղ  թանկ ա, բայց  գոնե գիտես, թե ինչի համար ես վճարում: Մերոնք շատ լավն են, բայց հենց գործը հասնում ա փողին, վերջ…Խանութներում ու սպասարկման այլ կետերի աշխատակիցների կրթական մակարդակը շատ ցածր ա, բարեհամբույր չեն: Փողոցում հանկարծ տեսնեն ճղված ջինսերով կամ պիրսինգով ու տատուով մարդկանց`թեկուզ իրենց հայրենակիցը լինի, վերջ.սկսում ենք փսփսալ, հետևներից խոսել ու դաժե` վիրավորել»:

Մի քանիսը չներկայացան, բայց ասվածը նույնն էր. Հայաստանում հենց մի սփյուռքահայ, կամ զբոսաշրջիկ են տեսնում`սկսած օդանավակայանից, տաքսու վարորդից, վերջացրած հյուրանոցով ու նույնիսկ տեղի հավաքարարով, փորձում են գումար շորթել`չմտածելով, որ իրենց գրպանը գումարով լցնելու մոլուցքը, վատ է ազդում մեր երկրի անվան վրա:

«Հոս, եթե բարեգամ մը չունիս, մնալու տեղ մը չունիս, ապա կքամվիս հոթելներու վրա ձախսելով, սնունդին մասին էլ խոսք չի կա: Աղվորցել է քաղաքը, բայց թանգութուն է, գրպաններնիս մեջ վերդարձին բան չի մնացել: Բա նվերներն ինչ թանգ են,Վերնիսաժում ինչքան ուժ ունին, թանգ կասեն աբրանքն, լավ հարուստ պիտի լինիս, որ սրտիդ ուզածին չափ վայիլիս»,‑ասաց հոլանդահայ Արեգը:

Գրավող ու վանող շատ բաներ կան մեր երկրում, բոլորը չէ, որ կարող են մեզ մոտ հանգստանալ ու երկրորդ անգամ վերադարձի մասին մտածել: Եկան, տեսան, էլ չեն գա, ինչքան էլ Արարատի ու Նոյան տապանի հեքիաթը գրավիչ լինի, ինչքան էլ ճոպանուղին աշխարհում ամենաերկարը լինի: Սրանք կարծիքներ են, որոնց հետ չենք կարող չհամաձայնել: «Հլը մի գնացե´ք, տեսե´ք, թե Վրաստանում ինչ էժան է, եկանք Բաթումիով, հիմա էլ ստեղ ենք, բայց ի՞նչ,  երկու տեղ գնացինք, փողերը պրծավ, համեմատելու բան չկա սկի, բա՞ մակարդակն ու հետամնացությունը, էլ չասեմ»,‑դառնացած պատմում էր  մոսկվայաբանկ Հունանը:

«Շատ սիրուն ու պատմական տեսանկյունից վերցրած հրաշք երկիր ունեք, բայց չեք կարողանում ձեզ ճիշտ ներկայացնել:Շատերը չգիտեն նույնիսկ իրենց պատմությունը, գներն էլ թանկ են: Լավ հոթելներում բարձր գներ են, այս նույն պայմանները տեսա Ուզբեկստանում, ուղղակի այստեղ մարդիկ ավելի բարեհամբյուր են: Դե դա էլ նրանից է, որ մահմեդական երկիր է: Ձեր մշակութային հուշարձանները շատ սիրուն են, բայց այնտեղ տանող ճանապարհները վատն են, հիացած եմ Տաթևով, Օձունով ու Շաքիով»,‑ասաց Իգոր Իվանովը, որը ամուսնացել էր հայ աղջկա հետ:

Աննա  Ալեքսանյան

Երեւանում, սեպտեմբերի 26-ին, ժամը 21.30-ին, անհայտ ավտոմեքենայի վարորդը Չեխովի փողոցի թիվ 25 շենքի դիմաց վրաերթի է ենթարկել 9-ամյա մի տղայի:

Ոստիկանության մամուլի ծառայությունից  հայտնում են, որ 9-ամյա երեխան մարմնական վնասվածքներով տեղափոխվել է հիվանդանոց:

Նույն օրը, գիշերը ժամը 03.00-ին, մեկ այլ անհայտ ավտոմեքենայի վարորդ Բագրատունյաց փողոցի թիվ 26 շենքի դիմաց վրաերթի է ենթարկել 35-ամյա մի տղամարդու: Վերջինս մարմնական վնասվածքներով տեղափոխվել է հիվանդանոց:Կատարվում է քննություն:

Շաքարավազի ներկայիս ինվոյսային արժեքները, որոնք հիմք են ընդունվում ներմուծված շաքարավազը կամ շաքարավազի հումքը մաքսազերծելիս, համահունչ են միջազգային գների հետ: Այսօր` սեպտեմբերի 27-ին լրագրողների հետ ճեպազրույցում նման հայտարարություն արեց ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:

Հարցին, թե արդյոք շաքարավազի 20 տոկոս թանկացումը արդարացվա՞ծ էր, Ա. Շաբոյանը պատասխանեց, որ դա պայմանավորված է ինվոյսային արժեքների բարձրացմամբ, ինչն էլ իր հերթին համահունչ է միջազգային գներին:

ՀՀ առողջապահության նախարար Հարություն Քուշկյանի հանձնարարությամբ Վայքի ծննդատանը կատարված դեպքերի առնչությամբ կազմվել էր հանձնաժողով:  Նախարարությունից հաղորդում են, որ հանձնաժողովը, տեղում ուսումնասիրություններ կատարելուց հետո, պարզել է, որ մասնագետների մոտ կան կազմակերպչական և այլ բնույթի բացթողումներ:

Արդյունքում ՀՀ առողջապահության նախարար Հարություն Քուշկյանը սեպտեմբերի 15-ին նամակով դիմել է Վայոց ձորի մարզպետ Սերգեյ Բագրատյանին և առաջարկել զբաղեցրած պաշտոններից ազատել մարզպետարանի առողջապահության և սոցիալական ապահովության վարչության առողջապահության բաժնի պետին, կենտրոնի տնօրենին և ծննդաբերական բաժանմունքի վարիչ Մետաքսյա Հովհաննիսյանին:

Հիշեցնենք, որ օգոստոսի 11-ին Վայքի քաղաքային հիվանդանոցի ծննդաբերական բաժանմունքում ծնված նորածինը արհեստական շնչառությամբ   մեկ շաբաթ ապրելուց հետո մահացավ: Նորածնի հարազատները այդ հարցում մեղադրում էին ծննդատան բաժանմունքի վարիչ Մետաքսյա Հովհաննիսյանին, մասնագիտական պարտականությունները ոչ պատշաճ կատարելու մեջ: